𑁩𑁦. 𑀧𑁂𑀢𑁆𑀢𑀺𑀤𑁂𑀯𑀧𑁂𑀢𑁆𑀢𑀺𑀯𑀺𑀲𑀬𑀲𑀼𑀢𑁆𑀢𑀁

𑁧𑁨𑁦𑁧. …𑀧𑁂… ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀓𑀸 𑀢𑁂 𑀲𑀢𑁆𑀢𑀸 𑀬𑁂 𑀧𑁂𑀢𑁆𑀢𑀺𑀯𑀺𑀲𑀬𑀸 𑀘𑀼𑀢𑀸 𑀤𑁂𑀯𑁂𑀲𑀼 𑀧𑀘𑁆𑀘𑀸𑀚𑀸𑀬𑀦𑁆𑀢𑀺; 𑀅𑀣 𑀔𑁄 𑀏𑀢𑁂𑀯 𑀩𑀳𑀼𑀢𑀭𑀸 𑀲𑀢𑁆𑀢𑀸 𑀬𑁂 𑀧𑁂𑀢𑁆𑀢𑀺𑀯𑀺𑀲𑀬𑀸 𑀘𑀼𑀢𑀸 𑀧𑁂𑀢𑁆𑀢𑀺𑀯𑀺𑀲𑀬𑁂 𑀧𑀘𑁆𑀘𑀸𑀚𑀸𑀬𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀤𑀺𑀝𑁆𑀞𑀢𑁆𑀢𑀸 𑀪𑀺𑀓𑁆𑀔𑀯𑁂, 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁. 𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲, 𑀤𑀼𑀓𑁆𑀔𑀲𑀫𑀼𑀤𑀬𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲, 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀭𑀺𑀬𑀲𑀘𑁆𑀘𑀲𑁆𑀲’’.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺. 𑀢𑀺𑀁𑀲𑀢𑀺𑀫𑀁.

𑀧𑀜𑁆𑀘𑀕𑀢𑀺𑀧𑁂𑀬𑁆𑀬𑀸𑀮𑀯𑀕𑁆𑀕𑁄 𑀏𑀓𑀸𑀤𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑀦𑀼𑀲𑁆𑀲𑀢𑁄 𑀘𑀼𑀢𑀸 𑀙𑀸𑀧𑀺, 𑀤𑁂𑀯𑀸 𑀘𑀼𑀢𑀸 𑀦𑀺𑀭𑀬𑀢𑁄;

𑀢𑀺𑀭𑀘𑁆𑀙𑀸𑀦𑀧𑁂𑀢𑁆𑀢𑀺𑀯𑀺𑀲𑀬𑀸, 𑀢𑀺𑀁𑀲𑀫𑀢𑁆𑀢𑁄 𑀕𑀢𑀺𑀯𑀕𑁆𑀕𑁄𑀢𑀺.

𑀲𑀘𑁆𑀘𑀲𑀁𑀬𑀼𑀢𑁆𑀢𑀁 𑀤𑁆𑀯𑀸𑀤𑀲𑀫𑀁.