𑁪. 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑁄

𑁧. 𑀧𑀞𑀫𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀁

𑁧𑁦𑁨𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸 𑀲𑀼𑀔𑀲𑁆𑀲𑀸𑀳𑀸𑀭𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀅𑀬𑀁 𑀧𑀞𑀫𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄…𑀧𑁂… 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸𑀢𑀺. 𑀅𑀬𑀁 𑀢𑀢𑀺𑀬𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀅𑀔𑀡𑁆𑀟𑁂𑀳𑀺…𑀧𑁂… 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑁂𑀳𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸 𑀲𑀼𑀔𑀲𑁆𑀲𑀸𑀳𑀸𑀭𑀸’’𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀁

𑁧𑁦𑁨𑁮. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸 𑀲𑀼𑀔𑀲𑁆𑀲𑀸𑀳𑀸𑀭𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀅𑀬𑀁 𑀧𑀞𑀫𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄. 𑀅𑀬𑀁 𑀘𑀢𑀼𑀢𑁆𑀣𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸 𑀲𑀼𑀔𑀲𑁆𑀲𑀸𑀳𑀸𑀭𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀢𑀢𑀺𑀬𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀁

𑁧𑁦𑁨𑁯. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸 𑀲𑀼𑀔𑀲𑁆𑀲𑀸𑀳𑀸𑀭𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀅𑀬𑀁 𑀧𑀞𑀫𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀅𑀬𑀁 𑀘𑀢𑀼𑀢𑁆𑀣𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸 𑀲𑀼𑀔𑀲𑁆𑀲𑀸𑀳𑀸𑀭𑀸’’𑀢𑀺. 𑀢𑀢𑀺𑀬𑀁.

𑁪. 𑀧𑀞𑀫𑀤𑁂𑀯𑀧𑀤𑀲𑀼𑀢𑁆𑀢𑀁

𑁧𑁦𑁩𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀁 𑀤𑁂𑀯𑀧𑀤𑀸𑀦𑀺 𑀅𑀯𑀺𑀲𑀼𑀤𑁆𑀥𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀅𑀧𑀭𑀺𑀬𑁄𑀤𑀸𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀭𑀺𑀬𑁄𑀤𑀧𑀦𑀸𑀬.

𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀇𑀤𑀁 𑀧𑀞𑀫𑀁 𑀤𑁂𑀯𑀸𑀦𑀁 𑀤𑁂𑀯𑀧𑀤𑀁 𑀅𑀯𑀺𑀲𑀼𑀤𑁆𑀥𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀅𑀧𑀭𑀺𑀬𑁄𑀤𑀸𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀭𑀺𑀬𑁄𑀤𑀧𑀦𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀅𑀔𑀡𑁆𑀟𑁂𑀳𑀺…𑀧𑁂… 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑁂𑀳𑀺. 𑀇𑀤𑀁 𑀘𑀢𑀼𑀢𑁆𑀣𑀁 𑀤𑁂𑀯𑀸𑀦𑀁 𑀤𑁂𑀯𑀧𑀤𑀁 𑀅𑀯𑀺𑀲𑀼𑀤𑁆𑀥𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀅𑀧𑀭𑀺𑀬𑁄𑀤𑀸𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀭𑀺𑀬𑁄𑀤𑀧𑀦𑀸𑀬. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀤𑁂𑀯𑀸𑀦𑀁 𑀤𑁂𑀯𑀧𑀤𑀸𑀦𑀺 𑀅𑀯𑀺𑀲𑀼𑀤𑁆𑀥𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀅𑀧𑀭𑀺𑀬𑁄𑀤𑀸𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀭𑀺𑀬𑁄𑀤𑀧𑀦𑀸𑀬𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀤𑀼𑀢𑀺𑀬𑀤𑁂𑀯𑀧𑀤𑀲𑀼𑀢𑁆𑀢𑀁

𑁧𑁦𑁩𑁧. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀁 𑀤𑁂𑀯𑀧𑀤𑀸𑀦𑀺 𑀅𑀯𑀺𑀲𑀼𑀤𑁆𑀥𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀅𑀧𑀭𑀺𑀬𑁄𑀤𑀸𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀭𑀺𑀬𑁄𑀤𑀧𑀦𑀸𑀬.

‘‘𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀲𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀓𑀺𑀁 𑀦𑀼 𑀔𑁄 𑀤𑁂𑀯𑀸𑀦𑀁 𑀤𑁂𑀯𑀧𑀤’𑀦𑁆𑀢𑀺? 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀅𑀩𑁆𑀬𑀸𑀩𑀚𑁆𑀛𑀧𑀭𑀫𑁂 𑀔𑁆𑀯𑀸𑀳𑀁 𑀏𑀢𑀭𑀳𑀺 𑀤𑁂𑀯𑁂 𑀲𑀼𑀡𑀸𑀫𑀺. 𑀦 𑀘 𑀔𑁄 𑀧𑀦𑀸𑀳𑀁 𑀓𑀺𑀜𑁆𑀘𑀺 𑀩𑁆𑀬𑀸𑀩𑀸𑀥𑁂𑀫𑀺 𑀢𑀲𑀁 𑀯𑀸 𑀣𑀸𑀯𑀭𑀁 𑀯𑀸. 𑀅𑀤𑁆𑀥𑀸𑀳𑀁 𑀤𑁂𑀯𑀧𑀤𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀯𑀺𑀳𑀭𑀸𑀫𑀻’’’𑀢𑀺. 𑀇𑀤𑀁 𑀧𑀞𑀫𑀁 𑀤𑁂𑀯𑀸𑀦𑀁 𑀤𑁂𑀯𑀧𑀤𑀁 𑀅𑀯𑀺𑀲𑀼𑀤𑁆𑀥𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀅𑀧𑀭𑀺𑀬𑁄𑀤𑀸𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀭𑀺𑀬𑁄𑀤𑀧𑀦𑀸𑀬.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂….

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀅𑀔𑀡𑁆𑀟𑁂𑀳𑀺…𑀧𑁂… 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑁂𑀳𑀺. 𑀲𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀓𑀺𑀁 𑀦𑀼 𑀔𑁄 𑀤𑁂𑀯𑀸𑀦𑀁 𑀤𑁂𑀯𑀧𑀤’𑀦𑁆𑀢𑀺? 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀅𑀩𑁆𑀬𑀸𑀩𑀚𑁆𑀛𑀧𑀭𑀫𑁂 𑀔𑁆𑀯𑀸𑀳𑀁 𑀏𑀢𑀭𑀳𑀺 𑀤𑁂𑀯𑁂 𑀲𑀼𑀡𑀸𑀫𑀺. 𑀦 𑀔𑁄 𑀧𑀦𑀸𑀳𑀁 𑀓𑀺𑀜𑁆𑀘𑀺 𑀩𑁆𑀬𑀸𑀩𑀸𑀥𑁂𑀫𑀺 𑀢𑀲𑀁 𑀯𑀸 𑀣𑀸𑀯𑀭𑀁 𑀯𑀸. 𑀅𑀤𑁆𑀥𑀸𑀳𑀁 𑀤𑁂𑀯𑀧𑀤𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀯𑀺𑀳𑀭𑀸𑀫𑀻’𑀢𑀺. 𑀇𑀤𑀁 𑀘𑀢𑀼𑀢𑁆𑀣𑀁 𑀤𑁂𑀯𑀸𑀦𑀁 𑀤𑁂𑀯𑀧𑀤𑀁 𑀅𑀯𑀺𑀲𑀼𑀤𑁆𑀥𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀅𑀧𑀭𑀺𑀬𑁄𑀤𑀸𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀭𑀺𑀬𑁄𑀤𑀧𑀦𑀸𑀬. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀤𑁂𑀯𑀸𑀦𑀁 𑀤𑁂𑀯𑀧𑀤𑀸𑀦𑀺 𑀅𑀯𑀺𑀲𑀼𑀤𑁆𑀥𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀅𑀧𑀭𑀺𑀬𑁄𑀤𑀸𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀭𑀺𑀬𑁄𑀤𑀧𑀦𑀸𑀬𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑁂𑀯𑀲𑀪𑀸𑀕𑀲𑀼𑀢𑁆𑀢𑀁

𑁧𑁦𑁩𑁨. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀢𑁆𑀢𑀫𑀦𑀸 𑀤𑁂𑀯𑀸 𑀲𑀪𑀸𑀕𑀢𑀁 𑀓𑀣𑁂𑀦𑁆𑀢𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀬𑀸 𑀢𑀸 𑀤𑁂𑀯𑀢𑀸 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀭𑀽𑀧𑀧𑀦𑁆𑀦𑀸 𑀢𑀸𑀲𑀁 𑀏𑀯𑀁 𑀳𑁄𑀢𑀺 𑁋 ‘𑀬𑀣𑀸𑀭𑀽𑀧𑁂𑀦 𑀔𑁄 𑀫𑀬𑀁 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀢𑀢𑁄 𑀘𑀼𑀢𑀸 𑀇𑀥𑀽𑀧𑀧𑀦𑁆𑀦𑀸, 𑀅𑀭𑀺𑀬𑀲𑀸𑀯𑀓𑁄𑀧𑀺 𑀢𑀣𑀸𑀭𑀽𑀧𑁂𑀦 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀏𑀳𑀻𑀢𑀺 𑀤𑁂𑀯𑀸𑀦𑀁 𑀲𑀦𑁆𑀢𑀺𑀓𑁂’’’𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀅𑀔𑀡𑁆𑀟𑁂𑀳𑀺…𑀧𑁂… 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑁂𑀳𑀺. 𑀬𑀸 𑀢𑀸 𑀤𑁂𑀯𑀢𑀸 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀭𑀽𑀧𑀧𑀦𑁆𑀦𑀸 𑀢𑀸𑀲𑀁 𑀏𑀯𑀁 𑀳𑁄𑀢𑀺 𑁋 ‘𑀬𑀣𑀸𑀭𑀽𑀧𑁂𑀳𑀺 𑀔𑁄 𑀫𑀬𑀁 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀢𑀢𑁄 𑀘𑀼𑀢𑀸 𑀇𑀥𑀽𑀧𑀧𑀦𑁆𑀦𑀸, 𑀅𑀭𑀺𑀬𑀲𑀸𑀯𑀓𑁄𑀧𑀺 𑀢𑀣𑀸𑀭𑀽𑀧𑁂𑀳𑀺 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀏𑀳𑀻𑀢𑀺 𑀤𑁂𑀯𑀸𑀦𑀁 𑀲𑀦𑁆𑀢𑀺𑀓𑁂’𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀅𑀢𑁆𑀢𑀫𑀦𑀸 𑀤𑁂𑀯𑀸 𑀲𑀪𑀸𑀕𑀢𑀁 𑀓𑀣𑁂𑀦𑁆𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀫𑀳𑀸𑀦𑀸𑀫𑀲𑀼𑀢𑁆𑀢𑀁

𑁧𑁦𑁩𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀅𑀣 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀳𑁄𑀢𑀻’’𑀢𑀺? ‘‘𑀬𑀢𑁄 𑀔𑁄, 𑀫𑀳𑀸𑀦𑀸𑀫, 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺 𑁋 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀳𑁄𑀢𑀻’’𑀢𑀺.

‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺? ‘‘𑀬𑀢𑁄 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑁋 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺.

‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺? ‘‘𑀇𑀥, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀲𑀤𑁆𑀥𑁄 𑀳𑁄𑀢𑀺, 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺.

‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀘𑀸𑀕𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺? ‘‘𑀇𑀥, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄 𑁋 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀘𑀸𑀕𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺.

‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺? ‘‘𑀇𑀥, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸 𑁋 𑀏𑀢𑁆𑀢𑀸𑀯𑀢𑀸 𑀔𑁄, 𑀫𑀳𑀸𑀦𑀸𑀫, 𑀉𑀧𑀸𑀲𑀓𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀯𑀲𑁆𑀲𑀲𑀼𑀢𑁆𑀢𑀁

𑁧𑁦𑁩𑁪. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀧𑀭𑀺𑀧𑀩𑁆𑀩𑀢𑁂 𑀣𑀼𑀮𑁆𑀮𑀨𑀼𑀲𑀺𑀢𑀓𑁂 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀢𑀁 𑀉𑀤𑀓𑀁 𑀬𑀣𑀸𑀦𑀺𑀦𑁆𑀦𑀁 𑀧𑀯𑀢𑁆𑀢𑀫𑀸𑀦𑀁 𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸 𑀧𑀭𑀺𑀧𑀽𑀭𑁂𑀢𑀺, 𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸 𑀧𑀭𑀺𑀧𑀽𑀭𑀸 𑀓𑀼𑀲𑁄𑀩𑁆𑀪𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀓𑀼𑀲𑁄𑀩𑁆𑀪𑀸 𑀧𑀭𑀺𑀧𑀽𑀭𑀸 𑀫𑀳𑀸𑀲𑁄𑀩𑁆𑀪𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀫𑀳𑀸𑀲𑁄𑀩𑁆𑀪𑀸 𑀧𑀭𑀺𑀧𑀽𑀭𑀸 𑀓𑀼𑀦𑁆𑀦𑀤𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀓𑀼𑀦𑁆𑀦𑀤𑀺𑀬𑁄 𑀧𑀭𑀺𑀧𑀽𑀭𑀸 𑀫𑀳𑀸𑀦𑀤𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀫𑀳𑀸𑀦𑀤𑀺𑀬𑁄 𑀧𑀭𑀺𑀧𑀽𑀭𑀸 𑀫𑀳𑀸𑀲𑀫𑀼𑀤𑁆𑀤𑀁 [𑀫𑀳𑀸𑀲𑀫𑀼𑀤𑁆𑀤𑀲𑀸𑀕𑀭𑀁 (𑀲𑀩𑁆𑀩𑀢𑁆𑀣) 𑀲𑀁. 𑀦𑀺. 𑁪.𑁭𑁦] 𑀧𑀭𑀺𑀧𑀽𑀭𑁂𑀦𑁆𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀬𑁄 𑀘 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄, 𑀬𑁄 𑀘 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄, 𑀬𑁄 𑀘 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄, 𑀬𑀸𑀦𑀺 𑀘 𑀅𑀭𑀺𑀬𑀓𑀦𑁆𑀢𑀸𑀦𑀺 𑀲𑀻𑀮𑀸𑀦𑀺 𑁋 𑀇𑀫𑁂 𑀥𑀫𑁆𑀫𑀸 𑀲𑀦𑁆𑀤𑀫𑀸𑀦𑀸 𑀧𑀸𑀭𑀁 𑀕𑀦𑁆𑀢𑁆𑀯𑀸 𑀆𑀲𑀯𑀸𑀦𑀁 𑀔𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀓𑀸𑀴𑀺𑀕𑁄𑀥𑀲𑀼𑀢𑁆𑀢𑀁

𑁧𑁦𑁩𑁫. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀓𑀸𑀴𑀺𑀕𑁄𑀥𑀸𑀬 𑀲𑀸𑀓𑀺𑀬𑀸𑀦𑀺𑀬𑀸 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀓𑀸𑀴𑀺𑀕𑁄𑀥𑀸 𑀲𑀸𑀓𑀺𑀬𑀸𑀦𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀓𑀸𑀴𑀺𑀕𑁄𑀥𑀁 𑀲𑀸𑀓𑀺𑀬𑀸𑀦𑀺𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀘𑀢𑀽𑀳𑀺 𑀔𑁄, 𑀕𑁄𑀥𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀲𑀸𑀯𑀺𑀓𑀸 𑀲𑁄𑀢𑀸𑀧𑀦𑁆𑀦𑀸 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀕𑁄𑀥𑁂, 𑀅𑀭𑀺𑀬𑀲𑀸𑀯𑀺𑀓𑀸 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀳𑁄𑀢𑀺 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑀸 𑀧𑀬𑀢𑀧𑀸𑀡𑀺𑀦𑀻 [𑀧𑀬𑀢𑀧𑀸𑀡𑀻 (𑀲𑀩𑁆𑀩𑀢𑁆𑀣) 𑁩.𑁩𑁦 𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀁 𑀑𑀮𑁄𑀓𑁂𑀢𑀩𑁆𑀩𑀁] 𑀯𑁄𑀲𑁆𑀲𑀕𑁆𑀕𑀭𑀢𑀸 𑀬𑀸𑀘𑀬𑁄𑀕𑀸 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑀸. 𑀇𑀫𑁂𑀳𑀺 𑀔𑁄, 𑀕𑁄𑀥𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀲𑀸𑀯𑀺𑀓𑀸 𑀲𑁄𑀢𑀸𑀧𑀦𑁆𑀦𑀸 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’𑀢𑀺.

‘‘𑀬𑀸𑀦𑀺𑀫𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑀸 𑀘𑀢𑁆𑀢𑀸𑀭𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀤𑁂𑀲𑀺𑀢𑀸𑀦𑀺, 𑀲𑀁𑀯𑀺𑀚𑁆𑀚𑀦𑁆𑀢𑁂 𑀢𑁂 𑀥𑀫𑁆𑀫𑀸 𑀫𑀬𑀺, 𑀅𑀳𑀜𑁆𑀘 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀦𑁆𑀤𑀺𑀲𑁆𑀲𑀸𑀫𑀺. 𑀅𑀳𑀜𑁆𑀳𑀺, 𑀪𑀦𑁆𑀢𑁂, 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀬𑀁 𑀔𑁄 𑀧𑀦 𑀓𑀺𑀜𑁆𑀘𑀺 𑀓𑀼𑀮𑁂 𑀤𑁂𑀬𑁆𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀁 𑀲𑀻𑀮𑀯𑀦𑁆𑀢𑁂𑀳𑀺 𑀓𑀮𑁆𑀬𑀸𑀡𑀥𑀫𑁆𑀫𑁂𑀳𑀻’’𑀢𑀺. ‘‘𑀮𑀸𑀪𑀸 𑀢𑁂, 𑀕𑁄𑀥𑁂, 𑀲𑀼𑀮𑀤𑁆𑀥𑀁 𑀢𑁂, 𑀕𑁄𑀥𑁂! 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀢𑀬𑀸, 𑀕𑁄𑀥𑁂, 𑀩𑁆𑀬𑀸𑀓𑀢’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀦𑀦𑁆𑀤𑀺𑀬𑀲𑀓𑁆𑀓𑀲𑀼𑀢𑁆𑀢𑀁

𑁧𑁦𑁩𑁬. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀅𑀣 𑀔𑁄 𑀦𑀦𑁆𑀤𑀺𑀬𑁄 𑀲𑀓𑁆𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀦𑀦𑁆𑀤𑀺𑀬𑁄 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀲𑁆𑀲𑁂𑀯 𑀦𑀼 𑀔𑁄, 𑀪𑀦𑁆𑀢𑁂, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘𑀢𑁆𑀢𑀸𑀭𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀦𑀢𑁆𑀣𑀺 𑀲𑁆𑀯𑁂𑀯 𑀦𑀼 𑀔𑁄, 𑀪𑀦𑁆𑀢𑁂, 𑀅𑀭𑀺𑀬𑀲𑀸𑀯𑀓𑁄 𑀧𑀫𑀸𑀤𑀯𑀺𑀳𑀸𑀭𑀻’’𑀢𑀺.

‘‘‘𑀬𑀲𑁆𑀲 𑀔𑁄, 𑀦𑀦𑁆𑀤𑀺𑀬, 𑀘𑀢𑁆𑀢𑀸𑀭𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀦𑀢𑁆𑀣𑀺 𑀢𑀫𑀳𑀁 𑀩𑀸𑀳𑀺𑀭𑁄 𑀧𑀼𑀣𑀼𑀚𑁆𑀚𑀦𑀧𑀓𑁆𑀔𑁂 𑀞𑀺𑀢𑁄’𑀢𑀺 𑀯𑀤𑀸𑀫𑀺. 𑀅𑀧𑀺 𑀘, 𑀦𑀦𑁆𑀤𑀺𑀬, 𑀬𑀣𑀸 𑀅𑀭𑀺𑀬𑀲𑀸𑀯𑀓𑁄 𑀧𑀫𑀸𑀤𑀯𑀺𑀳𑀸𑀭𑀻 𑀘𑁂𑀯 𑀳𑁄𑀢𑀺, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀘 𑀢𑀁 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀦𑀦𑁆𑀤𑀺𑀬𑁄 𑀲𑀓𑁆𑀓𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀣𑀜𑁆𑀘, 𑀦𑀦𑁆𑀤𑀺𑀬, 𑀅𑀭𑀺𑀬𑀲𑀸𑀯𑀓𑁄 𑀧𑀫𑀸𑀤𑀯𑀺𑀳𑀸𑀭𑀻 𑀳𑁄𑀢𑀺? 𑀇𑀥 𑀦𑀦𑁆𑀤𑀺𑀬, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀲𑁄 𑀢𑁂𑀦 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀦𑁆𑀢𑀼𑀝𑁆𑀞𑁄 𑀦 𑀉𑀢𑁆𑀢𑀭𑀺 𑀯𑀸𑀬𑀫𑀢𑀺 𑀤𑀺𑀯𑀸 𑀧𑀯𑀺𑀯𑁂𑀓𑀸𑀬, 𑀭𑀢𑁆𑀢𑀺𑀁 𑀧𑀝𑀺𑀲𑀮𑁆𑀮𑀸𑀦𑀸𑀬. 𑀢𑀲𑁆𑀲 𑀏𑀯𑀁 𑀧𑀫𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀧𑀸𑀫𑁄𑀚𑁆𑀚𑀁 𑀦 𑀳𑁄𑀢𑀺. 𑀧𑀸𑀫𑁄𑀚𑁆𑀚𑁂 𑀅𑀲𑀢𑀺, 𑀧𑀻𑀢𑀺 𑀦 𑀳𑁄𑀢𑀺. 𑀧𑀻𑀢𑀺𑀬𑀸 𑀅𑀲𑀢𑀺, 𑀧𑀲𑁆𑀲𑀤𑁆𑀥𑀺 𑀦 𑀳𑁄𑀢𑀺. 𑀧𑀲𑁆𑀲𑀤𑁆𑀥𑀺𑀬𑀸 𑀅𑀲𑀢𑀺, 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺. 𑀤𑀼𑀓𑁆𑀔𑀺𑀦𑁄 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺. 𑀅𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀥𑀫𑁆𑀫𑀸 𑀦 𑀧𑀸𑀢𑀼𑀪𑀯𑀦𑁆𑀢𑀺. 𑀥𑀫𑁆𑀫𑀸𑀦𑀁 𑀅𑀧𑀸𑀢𑀼𑀪𑀸𑀯𑀸 𑀧𑀫𑀸𑀤𑀯𑀺𑀳𑀸𑀭𑀻 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀦𑁆𑀤𑀺𑀬, 𑀅𑀭𑀺𑀬𑀲𑀸𑀯𑀓𑁄 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀅𑀔𑀡𑁆𑀟𑁂𑀳𑀺…𑀧𑁂… 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑁂𑀳𑀺. 𑀲𑁄 𑀢𑁂𑀳𑀺 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀦𑁆𑀢𑀼𑀝𑁆𑀞𑁄 𑀦 𑀉𑀢𑁆𑀢𑀭𑀺 𑀯𑀸𑀬𑀫𑀢𑀺 𑀤𑀺𑀯𑀸 𑀧𑀯𑀺𑀯𑁂𑀓𑀸𑀬 𑀭𑀢𑁆𑀢𑀺𑀁 𑀧𑀝𑀺𑀲𑀮𑁆𑀮𑀸𑀦𑀸𑀬. 𑀢𑀲𑁆𑀲 𑀏𑀯𑀁 𑀧𑀫𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀧𑀸𑀫𑁄𑀚𑁆𑀚𑀁 𑀦 𑀳𑁄𑀢𑀺. 𑀧𑀸𑀫𑁄𑀚𑁆𑀚𑁂 𑀅𑀲𑀢𑀺, 𑀧𑀻𑀢𑀺 𑀦 𑀳𑁄𑀢𑀺. 𑀧𑀻𑀢𑀺𑀬𑀸 𑀅𑀲𑀢𑀺, 𑀧𑀲𑁆𑀲𑀤𑁆𑀥𑀺 𑀦 𑀳𑁄𑀢𑀺. 𑀧𑀲𑁆𑀲𑀤𑁆𑀥𑀺𑀬𑀸 𑀅𑀲𑀢𑀺, 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺. 𑀤𑀼𑀓𑁆𑀔𑀺𑀦𑁄 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺. 𑀅𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀥𑀫𑁆𑀫𑀸 𑀦 𑀧𑀸𑀢𑀼𑀪𑀯𑀦𑁆𑀢𑀺. 𑀥𑀫𑁆𑀫𑀸𑀦𑀁 𑀅𑀧𑀸𑀢𑀼𑀪𑀸𑀯𑀸 𑀧𑀫𑀸𑀤𑀯𑀺𑀳𑀸𑀭𑀻 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀏𑀯𑀁 𑀔𑁄, 𑀦𑀦𑁆𑀤𑀺𑀬, 𑀅𑀭𑀺𑀬𑀲𑀸𑀯𑀓𑁄 𑀧𑀫𑀸𑀤𑀯𑀺𑀳𑀸𑀭𑀻 𑀳𑁄𑀢𑀺.

‘‘𑀓𑀣𑀜𑁆𑀘, 𑀦𑀦𑁆𑀤𑀺𑀬, 𑀅𑀭𑀺𑀬𑀲𑀸𑀯𑀓𑁄 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀳𑁄𑀢𑀺? 𑀇𑀥, 𑀦𑀦𑁆𑀤𑀺𑀬, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀲𑁄 𑀢𑁂𑀦 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 𑀉𑀢𑁆𑀢𑀭𑀺 𑀯𑀸𑀬𑀫𑀢𑀺 𑀤𑀺𑀯𑀸 𑀧𑀯𑀺𑀯𑁂𑀓𑀸𑀬 𑀭𑀢𑁆𑀢𑀺𑀁 𑀧𑀝𑀺𑀲𑀮𑁆𑀮𑀸𑀦𑀸𑀬. 𑀢𑀲𑁆𑀲 𑀏𑀯𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺. 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺. 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺. 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀥𑀫𑁆𑀫𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀥𑀫𑁆𑀫𑀸𑀦𑀁 𑀧𑀸𑀢𑀼𑀪𑀸𑀯𑀸 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀦𑁆𑀤𑀺𑀬, 𑀅𑀭𑀺𑀬𑀲𑀸𑀯𑀓𑁄 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀅𑀔𑀡𑁆𑀟𑁂𑀳𑀺…𑀧𑁂… 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑁂𑀳𑀺. 𑀲𑁄 𑀢𑁂𑀳𑀺 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀅𑀲𑀦𑁆𑀢𑀼𑀝𑁆𑀞𑁄 𑀉𑀢𑁆𑀢𑀭𑀺 𑀯𑀸𑀬𑀫𑀢𑀺 𑀤𑀺𑀯𑀸 𑀧𑀯𑀺𑀯𑁂𑀓𑀸𑀬 𑀭𑀢𑁆𑀢𑀺𑀁 𑀧𑀝𑀺𑀲𑀮𑁆𑀮𑀸𑀦𑀸𑀬. 𑀢𑀲𑁆𑀲 𑀏𑀯𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺. 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺. 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺. 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀥𑀫𑁆𑀫𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀥𑀫𑁆𑀫𑀸𑀦𑀁 𑀧𑀸𑀢𑀼𑀪𑀸𑀯𑀸 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀏𑀯𑀁 𑀔𑁄, 𑀦𑀦𑁆𑀤𑀺𑀬, 𑀅𑀭𑀺𑀬𑀲𑀸𑀯𑀓𑁄 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀳𑁄𑀢𑀻’’𑀢𑀺. 𑀤𑀲𑀫𑀁.

𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀪𑀺𑀲𑀦𑁆𑀤𑀸 𑀢𑀬𑁄 𑀯𑀼𑀢𑁆𑀢𑀸, 𑀤𑀼𑀯𑁂 𑀤𑁂𑀯𑀧𑀤𑀸𑀦𑀺 𑀘;

𑀲𑀪𑀸𑀕𑀢𑀁 𑀫𑀳𑀸𑀦𑀸𑀫𑁄, 𑀯𑀲𑁆𑀲𑀁 𑀓𑀸𑀴𑀻 𑀘 𑀦𑀦𑁆𑀤𑀺𑀬𑀸𑀢𑀺.