𑁪. 𑀤𑀼𑀕𑁆𑀕𑀢𑀺𑀪𑀬𑀲𑀼𑀢𑁆𑀢𑀁

𑁧𑁦𑁧𑁦. ‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀲𑀩𑁆𑀩𑀤𑀼𑀕𑁆𑀕𑀢𑀺𑀪𑀬𑀁 𑀲𑀫𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀥𑀫𑁆𑀫𑁂…𑀧𑁂… 𑀲𑀗𑁆𑀖𑁂…𑀧𑁂… 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀅𑀔𑀡𑁆𑀟𑁂𑀳𑀺…𑀧𑁂… 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑁂𑀳𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀲𑀩𑁆𑀩𑀤𑀼𑀕𑁆𑀕𑀢𑀺𑀪𑀬𑀁 𑀲𑀫𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀻’’𑀢𑀺. 𑀘𑀢𑀼𑀢𑁆𑀣𑀁.