𑁯. 𑀤𑀼𑀢𑀺𑀬𑀕𑀺𑀜𑁆𑀚𑀓𑀸𑀯𑀲𑀣𑀲𑀼𑀢𑁆𑀢𑀁

𑁧𑁦𑁦𑁫. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀲𑁄𑀓𑁄 𑀦𑀸𑀫, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄; 𑀢𑀲𑁆𑀲 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄? 𑀅𑀲𑁄𑀓𑀸 𑀦𑀸𑀫, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀻 𑀓𑀸𑀮𑀗𑁆𑀓𑀢𑀸…𑀧𑁂… 𑀅𑀲𑁄𑀓𑁄 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀓𑀸𑀮𑀗𑁆𑀓𑀢𑁄…𑀧𑁂… 𑀅𑀲𑁄𑀓𑀸 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀺𑀓𑀸 𑀓𑀸𑀮𑀗𑁆𑀓𑀢𑀸; 𑀢𑀲𑁆𑀲𑀸 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’’𑀢𑀺?

‘‘𑀅𑀲𑁄𑀓𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺…𑀧𑁂… (𑀧𑀼𑀭𑀺𑀫𑀯𑁂𑀬𑁆𑀬𑀸𑀓𑀭𑀡𑁂𑀦 𑀏𑀓𑀦𑀺𑀤𑀸𑀦𑀁).

‘‘𑀅𑀬𑀁 𑀔𑁄 𑀲𑁄, 𑀆𑀦𑀦𑁆𑀤, 𑀥𑀫𑁆𑀫𑀸𑀤𑀸𑀲𑁄 𑀥𑀫𑁆𑀫𑀧𑀭𑀺𑀬𑀸𑀬𑁄; 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀆𑀓𑀗𑁆𑀔𑀫𑀸𑀦𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀩𑁆𑀬𑀸𑀓𑀭𑁂𑀬𑁆𑀬 𑁋 ‘𑀔𑀻𑀡𑀦𑀺𑀭𑀬𑁄𑀫𑁆𑀳𑀺 𑀔𑀻𑀡𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀔𑀻𑀡𑀧𑁂𑀢𑁆𑀢𑀺𑀯𑀺𑀲𑀬𑁄 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄, 𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’’𑀢𑀺. 𑀦𑀯𑀫𑀁.