𑁮. 𑀤𑀼𑀢𑀺𑀬𑀏𑀓𑀥𑀫𑁆𑀫𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁧. 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀼𑀢𑁆𑀢𑀁

𑁭𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸. 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑁋 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑀺𑀲𑁆𑀲𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀻’’𑀢𑀺. 𑀧𑀞𑀫𑀁.

𑁨-𑁬. 𑀲𑀻𑀮𑀲𑀫𑁆𑀧𑀤𑀸𑀤𑀺𑀲𑀼𑀢𑁆𑀢𑀧𑀜𑁆𑀘𑀓𑀁

𑁭𑁮-𑁮𑁨. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀲𑀻𑀮𑀲𑀫𑁆𑀧𑀤𑀸…𑀧𑁂… 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀲𑀫𑁆𑀧𑀤𑀸…𑀧𑁂… 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀲𑀫𑁆𑀧𑀤𑀸…𑀧𑁂… 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀲𑀫𑁆𑀧𑀤𑀸…𑀧𑁂… 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀸𑀤𑀲𑀫𑁆𑀧𑀤𑀸…𑀧𑁂…. 𑀙𑀝𑁆𑀞𑀁.

𑁭. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀤𑀸𑀲𑀼𑀢𑁆𑀢𑀁

𑁮𑁩. ‘‘𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀤𑀸. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀦𑁆𑀦𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑁋 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑀺𑀲𑁆𑀲𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀦𑁆𑀦𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀦𑁆𑀦𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀻’’𑀢𑀺. 𑀲𑀢𑁆𑀢𑀫𑀁.

𑁧. 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀼𑀢𑁆𑀢𑀁

𑁮𑁪. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸. 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑁋 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑀺𑀲𑁆𑀲𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺 𑀭𑀸𑀕𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀤𑁄𑀲𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀫𑁄𑀳𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀭𑀸𑀕𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀤𑁄𑀲𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀫𑁄𑀳𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀻’’𑀢𑀺. 𑀧𑀞𑀫𑀁.

𑁨-𑁬. 𑀲𑀻𑀮𑀲𑀫𑁆𑀧𑀤𑀸𑀤𑀺𑀲𑀼𑀢𑁆𑀢𑀧𑀜𑁆𑀘𑀓𑀁

𑁮𑁫-𑁮𑁯. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀲𑀻𑀮𑀲𑀫𑁆𑀧𑀤𑀸…𑀧𑁂… 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀲𑀫𑁆𑀧𑀤𑀸…𑀧𑁂… 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀲𑀫𑁆𑀧𑀤𑀸…𑀧𑁂… 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀲𑀫𑁆𑀧𑀤𑀸…𑀧𑁂… 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀸𑀤𑀲𑀫𑁆𑀧𑀤𑀸…𑀧𑁂…. 𑀙𑀝𑁆𑀞𑀁.

𑁭. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀤𑀸𑀲𑀼𑀢𑁆𑀢𑀁

𑁯𑁦. ‘‘𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀤𑀸. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀦𑁆𑀦𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑁋 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑀺𑀲𑁆𑀲𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀦𑁆𑀦𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺 𑀭𑀸𑀕𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀤𑁄𑀲𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀫𑁄𑀳𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀭𑀸𑀕𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀤𑁄𑀲𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀫𑁄𑀳𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀦𑁆𑀦𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀻’’𑀢𑀺. 𑀲𑀢𑁆𑀢𑀫𑀁.

𑀤𑀼𑀢𑀺𑀬𑀏𑀓𑀥𑀫𑁆𑀫𑀧𑁂𑀬𑁆𑀬𑀸𑀮𑀯𑀕𑁆𑀕𑁄 𑀅𑀝𑁆𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀲𑀻𑀮𑀜𑁆𑀘, 𑀙𑀦𑁆𑀤𑁄 𑀘 𑀅𑀢𑁆𑀢𑀲𑀫𑁆𑀧𑀤𑀸;

𑀤𑀺𑀝𑁆𑀞𑀺 𑀘 𑀅𑀧𑁆𑀧𑀫𑀸𑀤𑁄 𑀘, 𑀬𑁄𑀦𑀺𑀲𑁄 𑀪𑀯𑀢𑀺 𑀲𑀢𑁆𑀢𑀫𑀁.