𑁧. 𑀭𑀸𑀕𑀯𑀺𑀭𑀸𑀕𑀲𑀼𑀢𑁆𑀢𑀁

𑁪𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀲𑀘𑁂 𑀯𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀺𑀫𑀢𑁆𑀣𑀺𑀬𑀁, 𑀆𑀯𑀼𑀲𑁄, 𑀲𑀫𑀡𑁂 𑀕𑁄𑀢𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺, 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀣 𑁋 ‘𑀭𑀸𑀕𑀯𑀺𑀭𑀸𑀕𑀢𑁆𑀣𑀁 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺. 𑀲𑀘𑁂 𑀧𑀦 𑀯𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀅𑀢𑁆𑀣𑀺 𑀧𑀦𑀸𑀯𑀼𑀲𑁄, 𑀫𑀕𑁆𑀕𑁄, 𑀅𑀢𑁆𑀣𑀺 𑀧𑀝𑀺𑀧𑀤𑀸 𑀭𑀸𑀕𑀯𑀺𑀭𑀸𑀕𑀸𑀬𑀸’𑀢𑀺, 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀣 𑁋 ‘𑀅𑀢𑁆𑀣𑀺 𑀔𑁄, 𑀆𑀯𑀼𑀲𑁄, 𑀫𑀕𑁆𑀕𑁄, 𑀅𑀢𑁆𑀣𑀺 𑀧𑀝𑀺𑀧𑀤𑀸 𑀭𑀸𑀕𑀯𑀺𑀭𑀸𑀕𑀸𑀬𑀸’𑀢𑀺. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄, 𑀓𑀢𑀫𑀸 𑀘 𑀧𑀝𑀺𑀧𑀤𑀸 𑀭𑀸𑀕𑀯𑀺𑀭𑀸𑀕𑀸𑀬? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄, 𑀅𑀬𑀁 𑀧𑀝𑀺𑀧𑀤𑀸 𑀭𑀸𑀕𑀯𑀺𑀭𑀸𑀕𑀸𑀬𑀸𑀢𑀺. 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀣𑀸’’𑀢𑀺. 𑀧𑀞𑀫𑀁.