𑁭. 𑀏𑀲𑀦𑀸𑀯𑀕𑁆𑀕𑁄

𑁧. 𑀏𑀲𑀦𑀸𑀲𑀼𑀢𑁆𑀢𑀁

𑁧𑁬𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀏𑀲𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀓𑀸𑀫𑁂𑀲𑀦𑀸, 𑀪𑀯𑁂𑀲𑀦𑀸, 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀏𑀲𑀦𑀸. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀏𑀲𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄. 𑀓𑀢𑀫𑁄 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀏𑀲𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺.

‘‘𑀢𑀺𑀲𑁆𑀲𑁄 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀏𑀲𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀓𑀸𑀫𑁂𑀲𑀦𑀸, 𑀪𑀯𑁂𑀲𑀦𑀸, 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀏𑀲𑀦𑀸. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀏𑀲𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄. 𑀓𑀢𑀫𑁄 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀭𑀸𑀕𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀤𑁄𑀲𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀫𑁄𑀳𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀏𑀲𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺.

‘‘𑀢𑀺𑀲𑁆𑀲𑁄 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀏𑀲𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀓𑀸𑀫𑁂𑀲𑀦𑀸, 𑀪𑀯𑁂𑀲𑀦𑀸, 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀏𑀲𑀦𑀸. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀏𑀲𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄. 𑀓𑀢𑀫𑁄 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀅𑀫𑀢𑁄𑀕𑀥𑀁 𑀅𑀫𑀢𑀧𑀭𑀸𑀬𑀦𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀁. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀏𑀲𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺.

‘‘𑀢𑀺𑀲𑁆𑀲𑁄 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀏𑀲𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀓𑀸𑀫𑁂𑀲𑀦𑀸, 𑀪𑀯𑁂𑀲𑀦𑀸, 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀏𑀲𑀦𑀸. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀏𑀲𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄. 𑀓𑀢𑀫𑁄 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀁 𑀦𑀺𑀩𑁆𑀩𑀸𑀦𑀧𑁄𑀡𑀁 𑀦𑀺𑀩𑁆𑀩𑀸𑀦𑀧𑀩𑁆𑀪𑀸𑀭𑀁. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀏𑀲𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺.

‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀏𑀲𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀓𑀸𑀫𑁂𑀲𑀦𑀸, 𑀪𑀯𑁂𑀲𑀦𑀸, 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀏𑀲𑀦𑀸. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀏𑀲𑀦𑀸𑀦𑀁 𑀧𑀭𑀺𑀜𑁆𑀜𑀸𑀬…𑀧𑁂… 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺. (𑀬𑀤𑀧𑀺 𑀅𑀪𑀺𑀜𑁆𑀜𑀸, 𑀢𑀤𑀧𑀺 𑀧𑀭𑀺𑀜𑁆𑀜𑀸𑀬 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.)

‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀏𑀲𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀓𑀸𑀫𑁂𑀲𑀦𑀸, 𑀪𑀯𑁂𑀲𑀦𑀸, 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀏𑀲𑀦𑀸. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀏𑀲𑀦𑀸𑀦𑀁 𑀧𑀭𑀺𑀓𑁆𑀔𑀬𑀸𑀬…𑀧𑁂… 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺. (𑀬𑀤𑀧𑀺 𑀅𑀪𑀺𑀜𑁆𑀜𑀸, 𑀢𑀤𑀧𑀺 𑀧𑀭𑀺𑀓𑁆𑀔𑀬𑀸𑀬 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.)

‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀏𑀲𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀓𑀸𑀫𑁂𑀲𑀦𑀸, 𑀪𑀯𑁂𑀲𑀦𑀸, 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀏𑀲𑀦𑀸. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀏𑀲𑀦𑀸𑀦𑀁 𑀧𑀳𑀸𑀦𑀸𑀬 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄. 𑀓𑀢𑀫𑁄 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁…𑀧𑁂… 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀏𑀲𑀦𑀸𑀦𑀁 𑀧𑀳𑀸𑀦𑀸𑀬 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺. (𑀬𑀤𑀧𑀺 𑀅𑀪𑀺𑀜𑁆𑀜𑀸, 𑀢𑀤𑀧𑀺 𑀧𑀳𑀸𑀦𑀸𑀬 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.) 𑀧𑀞𑀫𑀁.

𑁨. 𑀯𑀺𑀥𑀸𑀲𑀼𑀢𑁆𑀢𑀁

𑁧𑁬𑁨. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑀺𑀥𑀸. 𑀓𑀢𑀫𑀸 𑀢𑀺𑀲𑁆𑀲𑁄? ‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’𑀢𑀺 𑀯𑀺𑀥𑀸, ‘𑀲𑀤𑀺𑀲𑁄𑀳𑀫𑀲𑁆𑀫𑀻’𑀢𑀺 𑀯𑀺𑀥𑀸, ‘𑀳𑀻𑀦𑁄𑀳𑀫𑀲𑁆𑀫𑀻’𑀢𑀺 𑀯𑀺𑀥𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀯𑀺𑀥𑀸. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀯𑀺𑀥𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄. 𑀓𑀢𑀫𑁄 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁…𑀧𑁂… 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂 𑀢𑀺𑀲𑁆𑀲𑀦𑁆𑀦𑀁 𑀯𑀺𑀥𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺. (𑀬𑀣𑀸 𑀏𑀲𑀦𑀸, 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁). 𑀤𑀼𑀢𑀺𑀬𑀁.

𑁩. 𑀆𑀲𑀯𑀲𑀼𑀢𑁆𑀢𑀁

𑁧𑁬𑁩. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀆𑀲𑀯𑀸. 𑀓𑀢𑀫𑁂 𑀢𑀬𑁄? 𑀓𑀸𑀫𑀸𑀲𑀯𑁄, 𑀪𑀯𑀸𑀲𑀯𑁄, 𑀅𑀯𑀺𑀚𑁆𑀚𑀸𑀲𑀯𑁄 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀆𑀲𑀯𑀸. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀦𑁆𑀦𑀁 𑀆𑀲𑀯𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬…𑀧𑁂… 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺. 𑀢𑀢𑀺𑀬𑀁.

𑁪. 𑀪𑀯𑀲𑀼𑀢𑁆𑀢𑀁

𑁧𑁬𑁪. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀸. 𑀓𑀢𑀫𑁂 𑀢𑀬𑁄? 𑀓𑀸𑀫𑀪𑀯𑁄, 𑀭𑀽𑀧𑀪𑀯𑁄, 𑀅𑀭𑀽𑀧𑀪𑀯𑁄 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀪𑀯𑀸. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀦𑁆𑀦𑀁 𑀪𑀯𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬…𑀧𑁂… 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀤𑀼𑀓𑁆𑀔𑀢𑀸𑀲𑀼𑀢𑁆𑀢𑀁

𑁧𑁬𑁫. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀢𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀤𑀼𑀓𑁆𑀔𑀤𑀼𑀓𑁆𑀔𑀢𑀸, 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀤𑀼𑀓𑁆𑀔𑀢𑀸. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀤𑀼𑀓𑁆𑀔𑀢𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬…𑀧𑁂… 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺. 𑀧𑀜𑁆𑀘𑀫𑀁.

𑁬. 𑀔𑀺𑀮𑀲𑀼𑀢𑁆𑀢𑀁

𑁧𑁬𑁬. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀔𑀺𑀮𑀸. 𑀓𑀢𑀫𑁂 𑀢𑀬𑁄? 𑀭𑀸𑀕𑁄 𑀔𑀺𑀮𑁄, 𑀤𑁄𑀲𑁄 𑀔𑀺𑀮𑁄, 𑀫𑁄𑀳𑁄 𑀔𑀺𑀮𑁄 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀔𑀺𑀮𑀸. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀦𑁆𑀦𑀁 𑀔𑀺𑀮𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬…𑀧𑁂… 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺. 𑀙𑀝𑁆𑀞𑀁.

𑁭. 𑀫𑀮𑀲𑀼𑀢𑁆𑀢𑀁

𑁧𑁬𑁭. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀮𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀭𑀸𑀕𑁄 𑀫𑀮𑀁, 𑀤𑁄𑀲𑁄 𑀫𑀮𑀁, 𑀫𑁄𑀳𑁄 𑀫𑀮𑀁 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀫𑀮𑀸𑀦𑀺. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀦𑁆𑀦𑀁 𑀫𑀮𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬…𑀧𑁂… 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺. 𑀲𑀢𑁆𑀢𑀫𑀁.

𑁮. 𑀦𑀻𑀖𑀲𑀼𑀢𑁆𑀢𑀁

𑁧𑁬𑁮. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀦𑀻𑀖𑀸. 𑀓𑀢𑀫𑁂 𑀢𑀬𑁄? 𑀭𑀸𑀕𑁄 𑀦𑀻𑀖𑁄, 𑀤𑁄𑀲𑁄 𑀦𑀻𑀖𑁄, 𑀫𑁄𑀳𑁄 𑀦𑀻𑀖𑁄 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀦𑀻𑀖𑀸. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀦𑁆𑀦𑀁 𑀦𑀻𑀖𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬…𑀧𑁂… 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺. 𑀅𑀝𑁆𑀞𑀫𑀁.

𑁯. 𑀯𑁂𑀤𑀦𑀸𑀲𑀼𑀢𑁆𑀢𑀁

𑁧𑁬𑁯. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀲𑀼𑀔𑀸 𑀯𑁂𑀤𑀦𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀯𑁂𑀤𑀦𑀸. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀯𑁂𑀤𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬…𑀧𑁂… 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺. 𑀦𑀯𑀫𑀁.

𑁧𑁦. 𑀢𑀡𑁆𑀳𑀸𑀲𑀼𑀢𑁆𑀢𑀁

𑁧𑁭𑁦. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀓𑀸𑀫𑀢𑀡𑁆𑀳𑀸, 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀢𑀡𑁆𑀳𑀸. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀢𑀡𑁆𑀳𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬…𑀧𑁂… 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄. 𑀓𑀢𑀫𑁄 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀢𑀡𑁆𑀳𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬…𑀧𑁂… 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺. 𑀤𑀲𑀫𑀁.

𑁧𑁧. 𑀢𑀲𑀺𑀦𑀸𑀲𑀼𑀢𑁆𑀢𑀁

𑁧𑁭𑁧. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀢𑀲𑀺𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀓𑀸𑀫𑀢𑀲𑀺𑀦𑀸, 𑀪𑀯𑀢𑀲𑀺𑀦𑀸, 𑀯𑀺𑀪𑀯𑀢𑀲𑀺𑀦𑀸. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀢𑀲𑀺𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬…𑀧𑁂… 𑀭𑀸𑀕𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀤𑁄𑀲𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁 𑀫𑁄𑀳𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀁…𑀧𑁂… 𑀅𑀫𑀢𑁄𑀕𑀥𑀁 𑀅𑀫𑀢𑀧𑀭𑀸𑀬𑀦𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀁…𑀧𑁂… 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀁 𑀦𑀺𑀩𑁆𑀩𑀸𑀦𑀧𑁄𑀡𑀁 𑀦𑀺𑀩𑁆𑀩𑀸𑀦𑀧𑀩𑁆𑀪𑀸𑀭𑀁. 𑀇𑀫𑀸𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑀦𑁆𑀦𑀁 𑀢𑀲𑀺𑀦𑀸𑀦𑀁 𑀅𑀪𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀓𑁆𑀔𑀬𑀸𑀬 𑀧𑀳𑀸𑀦𑀸𑀬…𑀧𑁂… 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄’’𑀢𑀺. 𑀏𑀓𑀸𑀤𑀲𑀫𑀁.

𑀏𑀲𑀦𑀸𑀯𑀕𑁆𑀕𑁄 𑀲𑀢𑁆𑀢𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀏𑀲𑀦𑀸 𑀯𑀺𑀥𑀸 𑀆𑀲𑀯𑁄, 𑀪𑀯𑁄 𑀘 𑀤𑀼𑀓𑁆𑀔𑀢𑀸 𑀔𑀺𑀮𑀸;

𑀫𑀮𑀁 𑀦𑀻𑀖𑁄 𑀘 𑀯𑁂𑀤𑀦𑀸, 𑀤𑁆𑀯𑁂 𑀢𑀡𑁆𑀳𑀸 𑀢𑀲𑀺𑀦𑀸𑀬 𑀘𑀸𑀢𑀺.