𑁧𑁧. 𑀆𑀕𑀦𑁆𑀢𑀼𑀓𑀲𑀼𑀢𑁆𑀢𑀁

𑁧𑁫𑁯. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀕𑀦𑁆𑀢𑀼𑀓𑀸𑀕𑀸𑀭𑀁. 𑀢𑀢𑁆𑀣 𑀧𑀼𑀭𑀢𑁆𑀣𑀺𑀫𑀸𑀬𑀧𑀺 𑀤𑀺𑀲𑀸𑀬 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀧𑀘𑁆𑀙𑀺𑀫𑀸𑀬𑀧𑀺 𑀤𑀺𑀲𑀸𑀬 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀉𑀢𑁆𑀢𑀭𑀸𑀬𑀧𑀺 𑀤𑀺𑀲𑀸𑀬 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀤𑀓𑁆𑀔𑀺𑀡𑀸𑀬𑀧𑀺 𑀤𑀺𑀲𑀸𑀬 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀔𑀢𑁆𑀢𑀺𑀬𑀸𑀧𑀺 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸𑀧𑀺 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀯𑁂𑀲𑁆𑀲𑀸𑀧𑀺 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀲𑀼𑀤𑁆𑀤𑀸𑀧𑀺 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀬𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀧𑀭𑀺𑀜𑁆𑀜𑁂𑀬𑁆𑀬𑀸, 𑀢𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑀸 𑀧𑀭𑀺𑀚𑀸𑀦𑀸𑀢𑀺, 𑀬𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀧𑀳𑀸𑀢𑀩𑁆𑀩𑀸, 𑀢𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑀸 𑀧𑀚𑀳𑀢𑀺, 𑀬𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀢𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑁄𑀢𑀺, 𑀬𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸, 𑀢𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑀸 𑀪𑀸𑀯𑁂𑀢𑀺.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀧𑀭𑀺𑀜𑁆𑀜𑁂𑀬𑁆𑀬𑀸? 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀢𑀫𑁂 𑀧𑀜𑁆𑀘? 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀇𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀧𑀭𑀺𑀜𑁆𑀜𑁂𑀬𑁆𑀬𑀸. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀧𑀳𑀸𑀢𑀩𑁆𑀩𑀸? 𑀅𑀯𑀺𑀚𑁆𑀚𑀸 𑀘 𑀪𑀯𑀢𑀡𑁆𑀳𑀸 𑀘 𑁋 𑀇𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀧𑀳𑀸𑀢𑀩𑁆𑀩𑀸. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸? 𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘 𑁋 𑀇𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸? 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘 𑁋 𑀇𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀦𑁆𑀢𑁄, 𑀬𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀧𑀭𑀺𑀜𑁆𑀜𑁂𑀬𑁆𑀬𑀸 𑀢𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑀸 𑀧𑀭𑀺𑀚𑀸𑀦𑀸𑀢𑀺…𑀧𑁂… 𑀬𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸, 𑀢𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑀸 𑀪𑀸𑀯𑁂𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁…𑀧𑁂… 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀬𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀧𑀭𑀺𑀜𑁆𑀜𑁂𑀬𑁆𑀬𑀸, 𑀢𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑀸 𑀧𑀭𑀺𑀚𑀸𑀦𑀸𑀢𑀺, 𑀬𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀧𑀳𑀸𑀢𑀩𑁆𑀩𑀸, 𑀢𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑀸 𑀧𑀚𑀳𑀢𑀺, 𑀬𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸, 𑀢𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑁄𑀢𑀺, 𑀬𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸, 𑀢𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑀸 𑀪𑀸𑀯𑁂𑀢𑀻’’𑀢𑀺. 𑀏𑀓𑀸𑀤𑀲𑀫𑀁.