𑁧. 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑀁

𑁩𑁬𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀅𑀲𑀗𑁆𑀔𑀢𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀅𑀲𑀗𑁆𑀔𑀢𑀕𑀸𑀫𑀺𑀜𑁆𑀘 𑀫𑀕𑁆𑀕𑀁. 𑀢𑀁 𑀲𑀼𑀡𑀸𑀣. 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀲𑀗𑁆𑀔𑀢𑀁? 𑀬𑁄, 𑀪𑀺𑀓𑁆𑀔𑀯𑁂, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀗𑁆𑀔𑀢𑀁. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀗𑁆𑀔𑀢𑀕𑀸𑀫𑀺𑀫𑀕𑁆𑀕𑁄? 𑀓𑀸𑀬𑀕𑀢𑀸𑀲𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀗𑁆𑀔𑀢𑀕𑀸𑀫𑀺𑀫𑀕𑁆𑀕𑁄’’.

‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑀺𑀢𑀁 𑀯𑁄 𑀫𑀬𑀸 𑀅𑀲𑀗𑁆𑀔𑀢𑀁, 𑀤𑁂𑀲𑀺𑀢𑁄 𑀅𑀲𑀗𑁆𑀔𑀢𑀕𑀸𑀫𑀺𑀫𑀕𑁆𑀕𑁄. 𑀬𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸𑀭𑀸 𑀓𑀭𑀡𑀻𑀬𑀁 𑀲𑀸𑀯𑀓𑀸𑀦𑀁 𑀳𑀺𑀢𑁂𑀲𑀺𑀦𑀸 𑀅𑀦𑀼𑀓𑀫𑁆𑀧𑀓𑁂𑀦 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬, 𑀓𑀢𑀁 𑀯𑁄 𑀢𑀁 𑀫𑀬𑀸. 𑀏𑀢𑀸𑀦𑀺, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑀫𑀽𑀮𑀸𑀦𑀺, 𑀏𑀢𑀸𑀦𑀺 𑀲𑀼𑀜𑁆𑀜𑀸𑀕𑀸𑀭𑀸𑀦𑀺. 𑀛𑀸𑀬𑀣 [𑀦𑀺𑀚𑁆𑀛𑀸𑀬𑀣 (𑀓.)], 𑀪𑀺𑀓𑁆𑀔𑀯𑁂, 𑀫𑀸 𑀧𑀫𑀸𑀤𑀢𑁆𑀣; 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣. 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻’’𑀢𑀺. 𑀧𑀞𑀫𑀁.