𑁭. 𑀔𑁂𑀢𑁆𑀢𑀽𑀧𑀫𑀲𑀼𑀢𑁆𑀢𑀁

𑁩𑁫𑁯. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀦𑀸𑀴𑀦𑁆𑀤𑀸𑀬𑀁 𑀯𑀺𑀳𑀭𑀢𑀺 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂. 𑀅𑀣 𑀔𑁄 𑀅𑀲𑀺𑀩𑀦𑁆𑀥𑀓𑀧𑀼𑀢𑁆𑀢𑁄 𑀕𑀸𑀫𑀡𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀲𑀺𑀩𑀦𑁆𑀥𑀓𑀧𑀼𑀢𑁆𑀢𑁄 𑀕𑀸𑀫𑀡𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦𑀦𑀼, 𑀪𑀦𑁆𑀢𑁂, 𑀪𑀕𑀯𑀸 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀻’’𑀢𑀺? ‘‘𑀏𑀯𑀁, 𑀕𑀸𑀫𑀡𑀺, 𑀢𑀣𑀸𑀕𑀢𑁄 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀻’’𑀢𑀺. ‘‘𑀅𑀣 𑀓𑀺𑀜𑁆𑀘𑀭𑀳𑀺, 𑀪𑀦𑁆𑀢𑁂, 𑀪𑀕𑀯𑀸 𑀏𑀓𑀘𑁆𑀘𑀸𑀦𑀁 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀏𑀓𑀘𑁆𑀘𑀸𑀦𑀁 𑀦𑁄 𑀢𑀣𑀸 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺? ‘‘𑀢𑁂𑀦 𑀳𑀺, 𑀕𑀸𑀫𑀡𑀺, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀬𑀣𑀸 𑀢𑁂 𑀔𑀫𑁂𑀬𑁆𑀬 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀸𑀫𑀡𑀺, 𑀇𑀥𑀲𑁆𑀲𑀼 [𑀇𑀥 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀓𑀲𑁆𑀲𑀓𑀲𑁆𑀲 𑀕𑀳𑀧𑀢𑀺𑀦𑁄 𑀢𑀻𑀡𑀺 𑀔𑁂𑀢𑁆𑀢𑀸𑀦𑀺 𑁋 𑀏𑀓𑀁 𑀔𑁂𑀢𑁆𑀢𑀁 𑀅𑀕𑁆𑀕𑀁, 𑀏𑀓𑀁 𑀔𑁂𑀢𑁆𑀢𑀁 𑀫𑀚𑁆𑀛𑀺𑀫𑀁, 𑀏𑀓𑀁 𑀔𑁂𑀢𑁆𑀢𑀁 𑀳𑀻𑀦𑀁 𑀚𑀗𑁆𑀕𑀮𑀁 𑀊𑀲𑀭𑀁 𑀧𑀸𑀧𑀪𑀽𑀫𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀸𑀫𑀡𑀺, 𑀅𑀲𑀼 𑀓𑀲𑁆𑀲𑀓𑁄 𑀕𑀳𑀧𑀢𑀺 𑀩𑀻𑀚𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁄 𑀓𑀢𑁆𑀣 𑀧𑀞𑀫𑀁 𑀧𑀢𑀺𑀝𑁆𑀞𑀸𑀧𑁂𑀬𑁆𑀬, 𑀬𑀁 𑀯𑀸 𑀅𑀤𑀼𑀁 𑀔𑁂𑀢𑁆𑀢𑀁 𑀅𑀕𑁆𑀕𑀁, 𑀬𑀁 𑀯𑀸 𑀅𑀤𑀼𑀁 𑀔𑁂𑀢𑁆𑀢𑀁 𑀫𑀚𑁆𑀛𑀺𑀫𑀁, 𑀬𑀁 𑀯𑀸 𑀅𑀤𑀼𑀁 𑀔𑁂𑀢𑁆𑀢𑀁 𑀳𑀻𑀦𑀁 𑀚𑀗𑁆𑀕𑀮𑀁 𑀊𑀲𑀭𑀁 𑀧𑀸𑀧𑀪𑀽𑀫𑀻’’𑀢𑀺? ‘‘𑀅𑀲𑀼, 𑀪𑀦𑁆𑀢𑁂, 𑀓𑀲𑁆𑀲𑀓𑁄 𑀕𑀳𑀧𑀢𑀺 𑀩𑀻𑀚𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁄 𑀬𑀁 𑀅𑀤𑀼𑀁 𑀔𑁂𑀢𑁆𑀢𑀁 𑀅𑀕𑁆𑀕𑀁 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑁂𑀬𑁆𑀬. 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀁 𑀅𑀤𑀼𑀁 𑀔𑁂𑀢𑁆𑀢𑀁 𑀫𑀚𑁆𑀛𑀺𑀫𑀁 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑁂𑀬𑁆𑀬. 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀬𑀁 𑀅𑀤𑀼𑀁 𑀔𑁂𑀢𑁆𑀢𑀁 𑀳𑀻𑀦𑀁 𑀚𑀗𑁆𑀕𑀮𑀁 𑀊𑀲𑀭𑀁 𑀧𑀸𑀧𑀪𑀽𑀫𑀺 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑁂𑀬𑁆𑀬𑀧𑀺, 𑀦𑁄𑀧𑀺 𑀧𑀢𑀺𑀝𑁆𑀞𑀸𑀧𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑁆𑀢𑀫𑀲𑁄 𑀕𑁄𑀪𑀢𑁆𑀢𑀫𑁆𑀧𑀺 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀕𑀸𑀫𑀡𑀺, 𑀬𑀁 𑀅𑀤𑀼𑀁 𑀔𑁂𑀢𑁆𑀢𑀁 𑀅𑀕𑁆𑀕𑀁; 𑀏𑀯𑀫𑁂𑀯 𑀫𑀬𑁆𑀳𑀁 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀬𑁄. 𑀢𑁂𑀲𑀸𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺 𑁋 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁, 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀢𑁂 𑀳𑀺, 𑀕𑀸𑀫𑀡𑀺, 𑀫𑀁𑀤𑀻𑀧𑀸 𑀫𑀁𑀮𑁂𑀡𑀸 𑀫𑀁𑀢𑀸𑀡𑀸 𑀫𑀁𑀲𑀭𑀡𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀕𑀸𑀫𑀡𑀺, 𑀬𑀁 𑀅𑀤𑀼𑀁 𑀔𑁂𑀢𑁆𑀢𑀁 𑀫𑀚𑁆𑀛𑀺𑀫𑀁; 𑀏𑀯𑀫𑁂𑀯 𑀫𑀬𑁆𑀳𑀁 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀬𑁄. 𑀢𑁂𑀲𑀁 𑀧𑀸𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺 𑁋 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁, 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀢𑁂 𑀳𑀺, 𑀕𑀸𑀫𑀡𑀺, 𑀫𑀁𑀤𑀻𑀧𑀸 𑀫𑀁𑀮𑁂𑀡𑀸 𑀫𑀁𑀢𑀸𑀡𑀸 𑀫𑀁𑀲𑀭𑀡𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀕𑀸𑀫𑀡𑀺, 𑀬𑀁 𑀅𑀤𑀼𑀁 𑀔𑁂𑀢𑁆𑀢𑀁 𑀳𑀻𑀦𑀁 𑀚𑀗𑁆𑀕𑀮𑀁 𑀊𑀲𑀭𑀁 𑀧𑀸𑀧𑀪𑀽𑀫𑀺; 𑀏𑀯𑀫𑁂𑀯 𑀫𑀬𑁆𑀳𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸. 𑀢𑁂𑀲𑀁 𑀧𑀸𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺 𑁋 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀧𑁆𑀧𑁂𑀯 𑀦𑀸𑀫 𑀏𑀓𑀁 𑀧𑀤𑀫𑁆𑀧𑀺 𑀆𑀚𑀸𑀦𑁂𑀬𑁆𑀬𑀼𑀁 𑀢𑀁 𑀦𑁂𑀲𑀁 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀕𑀸𑀫𑀡𑀺, 𑀧𑀼𑀭𑀺𑀲𑀲𑁆𑀲 𑀢𑀬𑁄 𑀉𑀤𑀓𑀫𑀡𑀺𑀓𑀸 𑁋 𑀏𑀓𑁄 𑀉𑀤𑀓𑀫𑀡𑀺𑀓𑁄 𑀅𑀘𑁆𑀙𑀺𑀤𑁆𑀤𑁄 𑀅𑀳𑀸𑀭𑀻 𑀅𑀧𑀭𑀺𑀳𑀸𑀭𑀻, 𑀏𑀓𑁄 𑀉𑀤𑀓𑀫𑀡𑀺𑀓𑁄 𑀅𑀘𑁆𑀙𑀺𑀤𑁆𑀤𑁄 𑀳𑀸𑀭𑀻 𑀧𑀭𑀺𑀳𑀸𑀭𑀻, 𑀏𑀓𑁄 𑀉𑀤𑀓𑀫𑀡𑀺𑀓𑁄 𑀙𑀺𑀤𑁆𑀤𑁄 𑀳𑀸𑀭𑀻 𑀧𑀭𑀺𑀳𑀸𑀭𑀻. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀕𑀸𑀫𑀡𑀺, 𑀅𑀲𑀼 𑀧𑀼𑀭𑀺𑀲𑁄 𑀉𑀤𑀓𑀁 𑀦𑀺𑀓𑁆𑀔𑀺𑀧𑀺𑀢𑀼𑀓𑀸𑀫𑁄 𑀓𑀢𑁆𑀣 𑀧𑀞𑀫𑀁 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀬𑁄 𑀯𑀸 𑀲𑁄 𑀉𑀤𑀓𑀫𑀡𑀺𑀓𑁄 𑀅𑀘𑁆𑀙𑀺𑀤𑁆𑀤𑁄 𑀅𑀳𑀸𑀭𑀻 𑀅𑀧𑀭𑀺𑀳𑀸𑀭𑀻, 𑀬𑁄 𑀯𑀸 𑀲𑁄 𑀉𑀤𑀓𑀫𑀡𑀺𑀓𑁄 𑀅𑀘𑁆𑀙𑀺𑀤𑁆𑀤𑁄 𑀳𑀸𑀭𑀻 𑀧𑀭𑀺𑀳𑀸𑀭𑀻, 𑀬𑁄 𑀯𑀸 𑀲𑁄 𑀉𑀤𑀓𑀫𑀡𑀺𑀓𑁄 𑀙𑀺𑀤𑁆𑀤𑁄 𑀳𑀸𑀭𑀻 𑀧𑀭𑀺𑀳𑀸𑀭𑀻’’𑀢𑀺? ‘‘𑀅𑀲𑀼, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀉𑀤𑀓𑀁 𑀦𑀺𑀓𑁆𑀔𑀺𑀧𑀺𑀢𑀼𑀓𑀸𑀫𑁄, 𑀬𑁄 𑀲𑁄 𑀉𑀤𑀓𑀫𑀡𑀺𑀓𑁄 𑀅𑀘𑁆𑀙𑀺𑀤𑁆𑀤𑁄 𑀅𑀳𑀸𑀭𑀻 𑀅𑀧𑀭𑀺𑀳𑀸𑀭𑀻 𑀢𑀢𑁆𑀣 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀢𑀢𑁆𑀣 𑀦𑀺𑀓𑁆𑀔𑀺𑀧𑀺𑀢𑁆𑀯𑀸, 𑀬𑁄 𑀲𑁄 𑀉𑀤𑀓𑀫𑀡𑀺𑀓𑁄 𑀅𑀘𑁆𑀙𑀺𑀤𑁆𑀤𑁄 𑀳𑀸𑀭𑀻 𑀧𑀭𑀺𑀳𑀸𑀭𑀻 𑀢𑀢𑁆𑀣 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀢𑀢𑁆𑀣 𑀦𑀺𑀓𑁆𑀔𑀺𑀧𑀺𑀢𑁆𑀯𑀸, 𑀬𑁄 𑀲𑁄 𑀉𑀤𑀓𑀫𑀡𑀺𑀓𑁄 𑀙𑀺𑀤𑁆𑀤𑁄 𑀳𑀸𑀭𑀻 𑀧𑀭𑀺𑀳𑀸𑀭𑀻 𑀢𑀢𑁆𑀣 𑀦𑀺𑀓𑁆𑀔𑀺𑀧𑁂𑀬𑁆𑀬𑀧𑀺, 𑀦𑁄𑀧𑀺 𑀦𑀺𑀓𑁆𑀔𑀺𑀧𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀦𑁆𑀢𑀫𑀲𑁄 𑀪𑀡𑁆𑀟𑀥𑁄𑀯𑀦𑀫𑁆𑀧𑀺 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀕𑀸𑀫𑀡𑀺, 𑀬𑁄 𑀲𑁄 𑀉𑀤𑀓𑀫𑀡𑀺𑀓𑁄 𑀅𑀘𑁆𑀙𑀺𑀤𑁆𑀤𑁄 𑀅𑀳𑀸𑀭𑀻 𑀅𑀧𑀭𑀺𑀳𑀸𑀭𑀻; 𑀏𑀯𑀫𑁂𑀯 𑀫𑀬𑁆𑀳𑀁 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀬𑁄. 𑀢𑁂𑀲𑀸𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺 𑁋 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀢𑁂 𑀳𑀺, 𑀕𑀸𑀫𑀡𑀺, 𑀫𑀁𑀤𑀻𑀧𑀸 𑀫𑀁𑀮𑁂𑀡𑀸 𑀫𑀁𑀢𑀸𑀡𑀸 𑀫𑀁𑀲𑀭𑀡𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀕𑀸𑀫𑀡𑀺, 𑀬𑁄 𑀲𑁄 𑀉𑀤𑀓𑀫𑀡𑀺𑀓𑁄 𑀅𑀘𑁆𑀙𑀺𑀤𑁆𑀤𑁄 𑀳𑀸𑀭𑀻 𑀧𑀭𑀺𑀳𑀸𑀭𑀻; 𑀏𑀯𑀫𑁂𑀯 𑀫𑀬𑁆𑀳𑀁 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀬𑁄. 𑀢𑁂𑀲𑀸𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺 𑁋 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀢𑁂 𑀳𑀺, 𑀕𑀸𑀫𑀡𑀺, 𑀫𑀁𑀤𑀻𑀧𑀸 𑀫𑀁𑀮𑁂𑀡𑀸 𑀫𑀁𑀢𑀸𑀡𑀸 𑀫𑀁𑀲𑀭𑀡𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀕𑀸𑀫𑀡𑀺, 𑀬𑁄 𑀲𑁄 𑀉𑀤𑀓𑀫𑀡𑀺𑀓𑁄 𑀙𑀺𑀤𑁆𑀤𑁄 𑀳𑀸𑀭𑀻 𑀧𑀭𑀺𑀳𑀸𑀭𑀻; 𑀏𑀯𑀫𑁂𑀯 𑀫𑀬𑁆𑀳𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸. 𑀢𑁂𑀲𑀸𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺 𑁋 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀧𑁆𑀧𑁂𑀯 𑀦𑀸𑀫 𑀏𑀓𑀁 𑀧𑀤𑀫𑁆𑀧𑀺 𑀆𑀚𑀸𑀦𑁂𑀬𑁆𑀬𑀼𑀁, 𑀢𑀁 𑀦𑁂𑀲𑀁 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀅𑀲𑀺𑀩𑀦𑁆𑀥𑀓𑀧𑀼𑀢𑁆𑀢𑁄 𑀕𑀸𑀫𑀡𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂…𑀧𑁂… 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀲𑀢𑁆𑀢𑀫𑀁.