𑁧𑁨. 𑀭𑀸𑀲𑀺𑀬𑀲𑀼𑀢𑁆𑀢𑀁

𑁩𑁬𑁪. 𑀅𑀣 𑀔𑁄 𑀭𑀸𑀲𑀺𑀬𑁄 𑀕𑀸𑀫𑀡𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀲𑀺𑀬𑁄 𑀕𑀸𑀫𑀡𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂, ‘𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀁 𑀢𑀧𑀁 𑀕𑀭𑀳𑀢𑀺, 𑀲𑀩𑁆𑀩𑀁 𑀢𑀧𑀲𑁆𑀲𑀺𑀁 𑀮𑀽𑀔𑀚𑀻𑀯𑀺𑀁 𑀏𑀓𑀁𑀲𑁂𑀦 𑀉𑀧𑀯𑀤𑀢𑀺 𑀉𑀧𑀓𑁆𑀓𑁄𑀲𑀢𑀻’𑀢𑀺 [𑀉𑀧𑀓𑁆𑀓𑁄𑀲𑀢𑀺 𑀉𑀧𑀯𑀤𑀢𑀻𑀢𑀺 (𑀤𑀻. 𑀦𑀺. 𑁧.𑁩𑁮𑁧)]. 𑀬𑁂 𑀢𑁂, 𑀪𑀦𑁆𑀢𑁂, 𑀏𑀯𑀫𑀸𑀳𑀁𑀲𑀼 𑁋 ‘𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀁 𑀢𑀧𑀁 𑀕𑀭𑀳𑀢𑀺, 𑀲𑀩𑁆𑀩𑀁 𑀢𑀧𑀲𑁆𑀲𑀺𑀁 𑀮𑀽𑀔𑀚𑀻𑀯𑀺𑀁 𑀏𑀓𑀁𑀲𑁂𑀦 𑀉𑀧𑀯𑀤𑀢𑀺 𑀉𑀧𑀓𑁆𑀓𑁄𑀲𑀢𑀻’𑀢𑀺, 𑀓𑀘𑁆𑀘𑀺 𑀢𑁂, 𑀪𑀦𑁆𑀢𑁂, 𑀪𑀕𑀯𑀢𑁄 𑀯𑀼𑀢𑁆𑀢𑀯𑀸𑀤𑀺𑀦𑁄, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑀢𑀻’’𑀢𑀺? ‘‘𑀬𑁂 𑀢𑁂, 𑀕𑀸𑀫𑀡𑀺, 𑀏𑀯𑀫𑀸𑀳𑀁𑀲𑀼 𑁋 ‘𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀁 𑀢𑀧𑀁 𑀕𑀭𑀳𑀢𑀺, 𑀲𑀩𑁆𑀩𑀁 𑀢𑀧𑀲𑁆𑀲𑀺𑀁 𑀮𑀽𑀔𑀚𑀻𑀯𑀺𑀁 𑀏𑀓𑀁𑀲𑁂𑀦 𑀉𑀧𑀯𑀤𑀢𑀺 𑀉𑀧𑀓𑁆𑀓𑁄𑀲𑀢𑀻’𑀢𑀺, 𑀦 𑀫𑁂 𑀢𑁂 𑀯𑀼𑀢𑁆𑀢𑀯𑀸𑀤𑀺𑀦𑁄, 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺 𑀘 𑀧𑀦 𑀫𑀁 𑀢𑁂 𑀅𑀲𑀢𑀸 𑀢𑀼𑀘𑁆𑀙𑀸 𑀅𑀪𑀽𑀢𑁂𑀦’’.

‘‘𑀤𑁆𑀯𑁂𑀫𑁂, 𑀕𑀸𑀫𑀡𑀺, 𑀅𑀦𑁆𑀢𑀸 𑀧𑀩𑁆𑀩𑀚𑀺𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑀸 𑁋 𑀬𑁄 𑀘𑀸𑀬𑀁 𑀓𑀸𑀫𑁂𑀲𑀼 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀳𑀻𑀦𑁄 𑀕𑀫𑁆𑀫𑁄 𑀧𑁄𑀣𑀼𑀚𑁆𑀚𑀦𑀺𑀓𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄, 𑀬𑁄 𑀘𑀸𑀬𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀤𑀼𑀓𑁆𑀔𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄. 𑀏𑀢𑁂 𑀢𑁂, 𑀕𑀸𑀫𑀡𑀺, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸 𑁋 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀓𑀢𑀫𑀸 𑀘 𑀲𑀸, 𑀕𑀸𑀫𑀡𑀺, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸 𑁋 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀔𑁄 𑀲𑀸, 𑀕𑀸𑀫𑀡𑀺, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸 𑁋 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀢𑀬𑁄 𑀔𑁄 𑀫𑁂, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀺𑀦𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀇𑀥, 𑀕𑀸𑀫𑀡𑀺, 𑀏𑀓𑀘𑁆𑀘𑁄 𑀓𑀸𑀫𑀪𑁄𑀕𑀻 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺, 𑀲𑀸𑀳𑀲𑁂𑀦 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀸𑀳𑀲𑁂𑀦 𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀦 𑀧𑀻𑀡𑁂𑀢𑀺 𑀦 𑀲𑀁𑀯𑀺𑀪𑀚𑀢𑀺 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀇𑀥 𑀧𑀦, 𑀕𑀸𑀫𑀡𑀺, 𑀏𑀓𑀘𑁆𑀘𑁄 𑀓𑀸𑀫𑀪𑁄𑀕𑀻 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦. 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀸𑀳𑀲𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀲𑀁𑀯𑀺𑀪𑀚𑀢𑀺 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀇𑀥 𑀧𑀦, 𑀕𑀸𑀫𑀡𑀺, 𑀏𑀓𑀘𑁆𑀘𑁄 𑀓𑀸𑀫𑀪𑁄𑀕𑀻 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦. 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀸𑀳𑀲𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀁𑀯𑀺𑀪𑀚𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺.

‘‘𑀇𑀥 𑀧𑀦, 𑀕𑀸𑀫𑀡𑀺, 𑀏𑀓𑀘𑁆𑀘𑁄 𑀓𑀸𑀫𑀪𑁄𑀕𑀻 𑀥𑀫𑁆𑀫𑀸𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦𑀧𑀺 𑀅𑀲𑀸𑀳𑀲𑁂𑀦𑀧𑀺. 𑀥𑀫𑁆𑀫𑀸𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀸𑀳𑀲𑁂𑀦𑀧𑀺 𑀅𑀲𑀸𑀳𑀲𑁂𑀦𑀧𑀺 𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺, 𑀦 𑀧𑀻𑀡𑁂𑀢𑀺, 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀇𑀥 𑀧𑀦, 𑀕𑀸𑀫𑀡𑀺, 𑀏𑀓𑀘𑁆𑀘𑁄 𑀓𑀸𑀫𑀪𑁄𑀕𑀻 𑀥𑀫𑁆𑀫𑀸𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦𑀧𑀺 𑀅𑀲𑀸𑀳𑀲𑁂𑀦𑀧𑀺. 𑀥𑀫𑁆𑀫𑀸𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀸𑀳𑀲𑁂𑀦𑀧𑀺 𑀅𑀲𑀸𑀳𑀲𑁂𑀦𑀧𑀺 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀇𑀥 𑀧𑀦, 𑀕𑀸𑀫𑀡𑀺, 𑀏𑀓𑀘𑁆𑀘𑁄 𑀓𑀸𑀫𑀪𑁄𑀕𑀻 𑀥𑀫𑁆𑀫𑀸𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺, 𑀲𑀸𑀳𑀲𑁂𑀦𑀧𑀺 𑀅𑀲𑀸𑀳𑀲𑁂𑀦𑀧𑀺. 𑀥𑀫𑁆𑀫𑀸𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀸𑀳𑀲𑁂𑀦𑀧𑀺 𑀅𑀲𑀸𑀳𑀲𑁂𑀦𑀧𑀺 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀁𑀯𑀺𑀪𑀚𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺.

‘‘𑀇𑀥 𑀧𑀦, 𑀕𑀸𑀫𑀡𑀺, 𑀏𑀓𑀘𑁆𑀘𑁄 𑀓𑀸𑀫𑀪𑁄𑀕𑀻 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦. 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀲𑀸𑀳𑀲𑁂𑀦 𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺, 𑀦 𑀧𑀻𑀡𑁂𑀢𑀺, 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀇𑀥 𑀧𑀦, 𑀕𑀸𑀫𑀡𑀺, 𑀏𑀓𑀘𑁆𑀘𑁄 𑀓𑀸𑀫𑀪𑁄𑀕𑀻 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦. 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀲𑀸𑀳𑀲𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀇𑀥 𑀧𑀦, 𑀕𑀸𑀫𑀡𑀺, 𑀏𑀓𑀘𑁆𑀘𑁄 𑀓𑀸𑀫𑀪𑁄𑀕𑀻 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦. 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀲𑀸𑀳𑀲𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀁𑀯𑀺𑀪𑀚𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀢𑁂 𑀘 𑀪𑁄𑀕𑁂 𑀕𑀥𑀺𑀢𑁄 [𑀕𑀣𑀺𑀢𑁄 (𑀲𑀻.)] 𑀫𑀼𑀘𑁆𑀙𑀺𑀢𑁄 𑀅𑀚𑁆𑀛𑁄𑀧𑀦𑁆𑀦𑁄 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺. 𑀇𑀥 𑀧𑀦, 𑀕𑀸𑀫𑀡𑀺, 𑀏𑀓𑀘𑁆𑀘𑁄 𑀓𑀸𑀫𑀪𑁄𑀕𑀻 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦. 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀲𑀸𑀳𑀲𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀁𑀯𑀺𑀪𑀚𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀢𑁂 𑀘 𑀪𑁄𑀕𑁂 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑁄𑀧𑀦𑁆𑀦𑁄 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺.

‘‘𑀢𑀢𑁆𑀭, 𑀕𑀸𑀫𑀡𑀺, 𑀬𑁆𑀯𑀸𑀬𑀁 𑀓𑀸𑀫𑀪𑁄𑀕𑀻 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦, 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀸𑀳𑀲𑁂𑀦 𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺, 𑀦 𑀧𑀻𑀡𑁂𑀢𑀺, 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀢𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄. 𑀓𑀢𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄? 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦𑀸𑀢𑀺, 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀦 𑀧𑀻𑀡𑁂𑀢𑀻𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺, 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀇𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄.

‘‘𑀢𑀢𑁆𑀭, 𑀕𑀸𑀫𑀡𑀺, 𑀬𑁆𑀯𑀸𑀬𑀁 𑀓𑀸𑀫𑀪𑁄𑀕𑀻 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦, 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀸𑀳𑀲𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄, 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄? 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦𑀸𑀢𑀺, 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀓𑀢𑀫𑁂𑀦 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄? 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀻𑀢𑀺, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄.

‘‘𑀢𑀢𑁆𑀭, 𑀕𑀸𑀫𑀡𑀺, 𑀬𑁆𑀯𑀸𑀬𑀁 𑀓𑀸𑀫𑀪𑁄𑀕𑀻 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦, 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀸𑀳𑀲𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀁𑀯𑀺𑀪𑀚𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄, 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄. 𑀓𑀢𑀫𑁂𑀦 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄? 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦𑀸𑀢𑀺, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄? 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀻𑀢𑀺, 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀲𑀁𑀯𑀺𑀪𑀚𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄, 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄.

‘‘𑀢𑀢𑁆𑀭, 𑀕𑀸𑀫𑀡𑀺, 𑀬𑁆𑀯𑀸𑀬𑀁 𑀓𑀸𑀫𑀪𑁄𑀕𑀻 𑀥𑀫𑁆𑀫𑀸𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦𑀧𑀺 𑀅𑀲𑀸𑀳𑀲𑁂𑀦𑀧𑀺, 𑀥𑀫𑁆𑀫𑀸𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀸𑀳𑀲𑁂𑀦𑀧𑀺 𑀅𑀲𑀸𑀳𑀲𑁂𑀦𑀧𑀺 𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺, 𑀦 𑀧𑀻𑀡𑁂𑀢𑀺, 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄, 𑀢𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄. 𑀓𑀢𑀫𑁂𑀦 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄? 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦𑀸𑀢𑀺, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀓𑀢𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄? 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦𑀸𑀢𑀺, 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺, 𑀦 𑀧𑀻𑀡𑁂𑀢𑀻𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺, 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄, 𑀇𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄.

‘‘𑀢𑀢𑁆𑀭, 𑀕𑀸𑀫𑀡𑀺, 𑀬𑁆𑀯𑀸𑀬𑀁 𑀓𑀸𑀫𑀪𑁄𑀕𑀻 𑀥𑀫𑁆𑀫𑀸𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦𑀧𑀺 𑀅𑀲𑀸𑀳𑀲𑁂𑀦𑀧𑀺, 𑀥𑀫𑁆𑀫𑀸𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀸𑀳𑀲𑁂𑀦𑀧𑀺 𑀅𑀲𑀸𑀳𑀲𑁂𑀦𑀧𑀺 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄, 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄? 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦𑀸𑀢𑀺, 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀻𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄? 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦𑀸𑀢𑀺, 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄, 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄.

‘‘𑀢𑀢𑁆𑀭, 𑀕𑀸𑀫𑀡𑀺, 𑀬𑁆𑀯𑀸𑀬𑀁 𑀓𑀸𑀫𑀪𑁄𑀕𑀻 𑀥𑀫𑁆𑀫𑀸𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦𑀧𑀺 𑀅𑀲𑀸𑀳𑀲𑁂𑀦𑀧𑀺, 𑀥𑀫𑁆𑀫𑀸𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀸𑀳𑀲𑁂𑀦𑀧𑀺 𑀅𑀲𑀸𑀳𑀲𑁂𑀦𑀧𑀺 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀁𑀯𑀺𑀪𑀚𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄, 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀓𑀢𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄? 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦𑀸𑀢𑀺, 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀻𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀲𑀁𑀯𑀺𑀪𑀚𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺, 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀓𑀢𑀫𑁂𑀦 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄? 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦𑀸𑀢𑀺, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀇𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄.

‘‘𑀢𑀢𑁆𑀭, 𑀕𑀸𑀫𑀡𑀺, 𑀬𑁆𑀯𑀸𑀬𑀁 𑀓𑀸𑀫𑀪𑁄𑀕𑀻 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦, 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀲𑀸𑀳𑀲𑁂𑀦, 𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺, 𑀦 𑀧𑀻𑀡𑁂𑀢𑀺, 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄, 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄. 𑀓𑀢𑀫𑁂𑀦 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄? 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦𑀸𑀢𑀺, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄? 𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺, 𑀦 𑀧𑀻𑀡𑁂𑀢𑀻𑀢𑀺, 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄, 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄.

‘‘𑀢𑀢𑁆𑀭, 𑀕𑀸𑀫𑀡𑀺, 𑀬𑁆𑀯𑀸𑀬𑀁 𑀓𑀸𑀫𑀪𑁄𑀕𑀻 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦, 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀲𑀸𑀳𑀲𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺, 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄, 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄? 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦𑀸𑀢𑀺, 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀻𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀓𑀢𑀫𑁂𑀦 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄? 𑀦 𑀲𑀁𑀯𑀺𑀪𑀚𑀢𑀺, 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄.

‘‘𑀢𑀢𑁆𑀭, 𑀕𑀸𑀫𑀡𑀺, 𑀬𑁆𑀯𑀸𑀬𑀁 𑀓𑀸𑀫𑀪𑁄𑀕𑀻 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦, 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀲𑀸𑀳𑀲𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀁𑀯𑀺𑀪𑀚𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺, 𑀢𑁂 𑀘 𑀪𑁄𑀕𑁂 𑀕𑀥𑀺𑀢𑁄 𑀫𑀼𑀘𑁆𑀙𑀺𑀢𑁄 𑀅𑀚𑁆𑀛𑁄𑀧𑀦𑁆𑀦𑁄 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄, 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀓𑀢𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄? 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦𑀸𑀢𑀺, 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀻𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀲𑀁𑀯𑀺𑀪𑀚𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺, 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀓𑀢𑀫𑁂𑀦 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄? 𑀢𑁂 𑀘 𑀪𑁄𑀕𑁂 𑀕𑀥𑀺𑀢𑁄 𑀫𑀼𑀘𑁆𑀙𑀺𑀢𑁄 𑀅𑀚𑁆𑀛𑁄𑀧𑀦𑁆𑀦𑁄 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀻𑀢𑀺, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀇𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄.

‘‘𑀢𑀢𑁆𑀭, 𑀕𑀸𑀫𑀡𑀺, 𑀬𑁆𑀯𑀸𑀬𑀁 𑀓𑀸𑀫𑀪𑁄𑀕𑀻 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦, 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀲𑀸𑀳𑀲𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺 𑀲𑀁𑀯𑀺𑀪𑀚𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺. 𑀢𑁂 𑀘 𑀪𑁄𑀕𑁂 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑁄𑀧𑀦𑁆𑀦𑁄 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄. 𑀓𑀢𑀫𑁂𑀳𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄? 𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀅𑀲𑀸𑀳𑀲𑁂𑀦𑀸𑀢𑀺, 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀻𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀲𑀁𑀯𑀺𑀪𑀚𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺, 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀢𑁂 𑀘 𑀪𑁄𑀕𑁂 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑁄𑀧𑀦𑁆𑀦𑁄 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀻𑀢𑀺, 𑀇𑀫𑀺𑀦𑀸 𑀘𑀢𑀼𑀢𑁆𑀣𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀅𑀬𑀁, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀻 𑀇𑀫𑁂𑀳𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄.

‘‘𑀢𑀬𑁄𑀫𑁂, 𑀕𑀸𑀫𑀡𑀺, 𑀢𑀧𑀲𑁆𑀲𑀺𑀦𑁄 𑀮𑀽𑀔𑀚𑀻𑀯𑀺𑀦𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄? 𑀇𑀥, 𑀕𑀸𑀫𑀡𑀺, 𑀏𑀓𑀘𑁆𑀘𑁄 𑀢𑀧𑀲𑁆𑀲𑀻 𑀮𑀽𑀔𑀚𑀻𑀯𑀻 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺 𑁋 ‘𑀅𑀧𑁆𑀧𑁂𑀯 𑀦𑀸𑀫 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀁, 𑀅𑀧𑁆𑀧𑁂𑀯 𑀦𑀸𑀫 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀭𑁂𑀬𑁆𑀬’𑀦𑁆𑀢𑀺. 𑀲𑁄 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺, 𑀓𑀼𑀲𑀮𑀜𑁆𑀘 𑀥𑀫𑁆𑀫𑀁 𑀦𑀸𑀥𑀺𑀕𑀘𑁆𑀙𑀢𑀺, 𑀉𑀢𑁆𑀢𑀭𑀺 𑀘 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀦 𑀲𑀘𑁆𑀙𑀺𑀓𑀭𑁄𑀢𑀺.

‘‘𑀇𑀥 𑀧𑀦, 𑀕𑀸𑀫𑀡𑀺, 𑀏𑀓𑀘𑁆𑀘𑁄 𑀢𑀧𑀲𑁆𑀲𑀻 𑀮𑀽𑀔𑀚𑀻𑀯𑀻 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺 𑁋 ‘𑀅𑀧𑁆𑀧𑁂𑀯 𑀦𑀸𑀫 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀁, 𑀅𑀧𑁆𑀧𑁂𑀯 𑀦𑀸𑀫 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀭𑁂𑀬𑁆𑀬’𑀦𑁆𑀢𑀺. 𑀲𑁄 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺, 𑀓𑀼𑀲𑀮𑀜𑁆𑀳𑀺 𑀔𑁄 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑀢𑀺, 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀦 𑀲𑀘𑁆𑀙𑀺𑀓𑀭𑁄𑀢𑀺.

‘‘𑀇𑀥 𑀧𑀦, 𑀕𑀸𑀫𑀡𑀺, 𑀏𑀓𑀘𑁆𑀘𑁄 𑀢𑀧𑀲𑁆𑀲𑀻 𑀮𑀽𑀔𑀚𑀻𑀯𑀻 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺 𑁋 ‘𑀅𑀧𑁆𑀧𑁂𑀯 𑀦𑀸𑀫 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀁, 𑀅𑀧𑁆𑀧𑁂𑀯 𑀦𑀸𑀫 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀭𑁂𑀬𑁆𑀬’𑀦𑁆𑀢𑀺. 𑀲𑁄 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺, 𑀓𑀼𑀲𑀮𑀜𑁆𑀘 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑀢𑀺, 𑀉𑀢𑁆𑀢𑀭𑀺 𑀘 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀭𑁄𑀢𑀺.

‘‘𑀢𑀢𑁆𑀭, 𑀕𑀸𑀫𑀡𑀺, 𑀬𑁆𑀯𑀸𑀬𑀁 𑀢𑀧𑀲𑁆𑀲𑀻 𑀮𑀽𑀔𑀚𑀻𑀯𑀻 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺, 𑀓𑀼𑀲𑀮𑀜𑁆𑀘 𑀥𑀫𑁆𑀫𑀁 𑀦𑀸𑀥𑀺𑀕𑀘𑁆𑀙𑀢𑀺, 𑀉𑀢𑁆𑀢𑀭𑀺 𑀘 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀦 𑀲𑀘𑁆𑀙𑀺𑀓𑀭𑁄𑀢𑀺. 𑀅𑀬𑀁, 𑀕𑀸𑀫𑀡𑀺, 𑀢𑀧𑀲𑁆𑀲𑀻 𑀮𑀽𑀔𑀚𑀻𑀯𑀻 𑀢𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄. 𑀓𑀢𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄? 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀻𑀢𑀺, 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀓𑀼𑀲𑀮𑀜𑁆𑀘 𑀥𑀫𑁆𑀫𑀁 𑀦𑀸𑀥𑀺𑀕𑀘𑁆𑀙𑀢𑀻𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀉𑀢𑁆𑀢𑀭𑀺 𑀘 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀦 𑀲𑀘𑁆𑀙𑀺𑀓𑀭𑁄𑀢𑀻𑀢𑀺, 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀅𑀬𑀁, 𑀕𑀸𑀫𑀡𑀺, 𑀢𑀧𑀲𑁆𑀲𑀻 𑀮𑀽𑀔𑀚𑀻𑀯𑀻, 𑀇𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄.

‘‘𑀢𑀢𑁆𑀭, 𑀕𑀸𑀫𑀡𑀺, 𑀬𑁆𑀯𑀸𑀬𑀁 𑀢𑀧𑀲𑁆𑀲𑀻 𑀮𑀽𑀔𑀚𑀻𑀯𑀻 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺, 𑀓𑀼𑀲𑀮𑀜𑁆𑀳𑀺 𑀔𑁄 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑀢𑀺, 𑀉𑀢𑁆𑀢𑀭𑀺 𑀘 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀦 𑀲𑀘𑁆𑀙𑀺𑀓𑀭𑁄𑀢𑀺. 𑀅𑀬𑀁, 𑀕𑀸𑀫𑀡𑀺, 𑀢𑀧𑀲𑁆𑀲𑀻 𑀮𑀽𑀔𑀚𑀻𑀯𑀻 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄, 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄? 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀻𑀢𑀺, 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀉𑀢𑁆𑀢𑀭𑀺 𑀘 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀦 𑀲𑀘𑁆𑀙𑀺𑀓𑀭𑁄𑀢𑀻𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀓𑀢𑀫𑁂𑀦 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄? 𑀓𑀼𑀲𑀮𑀜𑁆𑀳𑀺 𑀔𑁄 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑀢𑀻𑀢𑀺, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀅𑀬𑀁, 𑀕𑀸𑀫𑀡𑀺, 𑀢𑀧𑀲𑁆𑀲𑀻 𑀮𑀽𑀔𑀚𑀻𑀯𑀻 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑁄, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄.

‘‘𑀢𑀢𑁆𑀭, 𑀕𑀸𑀫𑀡𑀺, 𑀬𑁆𑀯𑀸𑀬𑀁 𑀢𑀧𑀲𑁆𑀲𑀻 𑀮𑀽𑀔𑀚𑀻𑀯𑀻 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺, 𑀓𑀼𑀲𑀮𑀜𑁆𑀘 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑀢𑀺, 𑀉𑀢𑁆𑀢𑀭𑀺 𑀘 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀅𑀬𑀁, 𑀕𑀸𑀫𑀡𑀺, 𑀢𑀧𑀲𑁆𑀲𑀻 𑀮𑀽𑀔𑀚𑀻𑀯𑀻 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄, 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄. 𑀓𑀢𑀫𑁂𑀦 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄? 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀻𑀢𑀺, 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄. 𑀓𑀢𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄? 𑀓𑀼𑀲𑀮𑀜𑁆𑀘 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑀢𑀻𑀢𑀺, 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀉𑀢𑁆𑀢𑀭𑀺 𑀘 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺, 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀧𑀸𑀲𑀁𑀲𑁄. 𑀅𑀬𑀁, 𑀕𑀸𑀫𑀡𑀺, 𑀢𑀧𑀲𑁆𑀲𑀻 𑀮𑀽𑀔𑀚𑀻𑀯𑀻 𑀇𑀫𑀺𑀦𑀸 𑀏𑀓𑁂𑀦 𑀞𑀸𑀦𑁂𑀦 𑀕𑀸𑀭𑀬𑁆𑀳𑁄, 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑁄.

‘‘𑀢𑀺𑀲𑁆𑀲𑁄 𑀇𑀫𑀸, 𑀕𑀸𑀫𑀡𑀺, 𑀲𑀦𑁆𑀤𑀺𑀝𑁆𑀞𑀺𑀓𑀸 𑀦𑀺𑀚𑁆𑀚𑀭𑀸 𑀅𑀓𑀸𑀮𑀺𑀓𑀸 𑀏𑀳𑀺𑀧𑀲𑁆𑀲𑀺𑀓𑀸 𑀑𑀧𑀦𑁂𑀬𑁆𑀬𑀺𑀓𑀸 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀸 𑀯𑀺𑀜𑁆𑀜𑀽𑀳𑀺. 𑀓𑀢𑀫𑀸 𑀢𑀺𑀲𑁆𑀲𑁄? 𑀬𑀁 𑀭𑀢𑁆𑀢𑁄 𑀭𑀸𑀕𑀸𑀥𑀺𑀓𑀭𑀡𑀁 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺. 𑀭𑀸𑀕𑁂 𑀧𑀳𑀻𑀦𑁂 𑀦𑁂𑀯𑀢𑁆𑀢𑀩𑁆𑀬𑀸𑀩𑀸𑀥𑀸𑀬 𑀘𑁂𑀢𑁂𑀢𑀺, 𑀦 𑀧𑀭𑀩𑁆𑀬𑀸𑀩𑀸𑀥𑀸𑀬 𑀘𑁂𑀢𑁂𑀢𑀺, 𑀦 𑀉𑀪𑀬𑀩𑁆𑀬𑀸𑀩𑀸𑀥𑀸𑀬 𑀘𑁂𑀢𑁂𑀢𑀺. 𑀲𑀦𑁆𑀤𑀺𑀝𑁆𑀞𑀺𑀓𑀸 𑀦𑀺𑀚𑁆𑀚𑀭𑀸 𑀅𑀓𑀸𑀮𑀺𑀓𑀸 𑀏𑀳𑀺𑀧𑀲𑁆𑀲𑀺𑀓𑀸 𑀑𑀧𑀦𑁂𑀬𑁆𑀬𑀺𑀓𑀸 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀸 𑀯𑀺𑀜𑁆𑀜𑀽𑀳𑀺. 𑀬𑀁 𑀤𑀼𑀝𑁆𑀞𑁄 𑀤𑁄𑀲𑀸𑀥𑀺𑀓𑀭𑀡𑀁 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺. 𑀤𑁄𑀲𑁂 𑀧𑀳𑀻𑀦𑁂 𑀦𑁂𑀯𑀢𑁆𑀢𑀩𑁆𑀬𑀸𑀩𑀸𑀥𑀸𑀬 𑀘𑁂𑀢𑁂𑀢𑀺, 𑀦 𑀧𑀭𑀩𑁆𑀬𑀸𑀩𑀸𑀥𑀸𑀬 𑀘𑁂𑀢𑁂𑀢𑀺, 𑀦 𑀉𑀪𑀬𑀩𑁆𑀬𑀸𑀩𑀸𑀥𑀸𑀬 𑀘𑁂𑀢𑁂𑀢𑀺. 𑀲𑀦𑁆𑀤𑀺𑀝𑁆𑀞𑀺𑀓𑀸 𑀦𑀺𑀚𑁆𑀚𑀭𑀸 𑀅𑀓𑀸𑀮𑀺𑀓𑀸 𑀏𑀳𑀺𑀧𑀲𑁆𑀲𑀺𑀓𑀸 𑀑𑀧𑀦𑁂𑀬𑁆𑀬𑀺𑀓𑀸 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀸 𑀯𑀺𑀜𑁆𑀜𑀽𑀳𑀺. 𑀬𑀁 𑀫𑀽𑀴𑁆𑀳𑁄 𑀫𑁄𑀳𑀸𑀥𑀺𑀓𑀭𑀡𑀁 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺. 𑀫𑁄𑀳𑁂 𑀧𑀳𑀻𑀦𑁂 𑀦𑁂𑀯𑀢𑁆𑀢𑀩𑁆𑀬𑀸𑀩𑀸𑀥𑀸𑀬 𑀘𑁂𑀢𑁂𑀢𑀺, 𑀦 𑀧𑀭𑀩𑁆𑀬𑀸𑀩𑀸𑀥𑀸𑀬 𑀘𑁂𑀢𑁂𑀢𑀺, 𑀦 𑀉𑀪𑀬𑀩𑁆𑀬𑀸𑀩𑀸𑀥𑀸𑀬 𑀘𑁂𑀢𑁂𑀢𑀺. 𑀲𑀦𑁆𑀤𑀺𑀝𑁆𑀞𑀺𑀓𑀸 𑀦𑀺𑀚𑁆𑀚𑀭𑀸 𑀅𑀓𑀸𑀮𑀺𑀓𑀸 𑀏𑀳𑀺𑀧𑀲𑁆𑀲𑀺𑀓𑀸 𑀑𑀧𑀦𑁂𑀬𑁆𑀬𑀺𑀓𑀸 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀸 𑀯𑀺𑀜𑁆𑀜𑀽𑀳𑀺. 𑀇𑀫𑀸 𑀔𑁄, 𑀕𑀸𑀫𑀡𑀺, 𑀢𑀺𑀲𑁆𑀲𑁄 𑀲𑀦𑁆𑀤𑀺𑀝𑁆𑀞𑀺𑀓𑀸 𑀦𑀺𑀚𑁆𑀚𑀭𑀸 𑀅𑀓𑀸𑀮𑀺𑀓𑀸 𑀏𑀳𑀺𑀧𑀲𑁆𑀲𑀺𑀓𑀸 𑀑𑀧𑀦𑁂𑀬𑁆𑀬𑀺𑀓𑀸 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀸 𑀯𑀺𑀜𑁆𑀜𑀽𑀳𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀭𑀸𑀲𑀺𑀬𑁄 𑀕𑀸𑀫𑀡𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀤𑁆𑀯𑀸𑀤𑀲𑀫𑀁.