𑁭. 𑀘𑀺𑀢𑁆𑀢𑀲𑀁𑀬𑀼𑀢𑁆𑀢𑀁

𑁧. 𑀲𑀁𑀬𑁄𑀚𑀦𑀲𑀼𑀢𑁆𑀢𑀁

𑁩𑁪𑁩. 𑀏𑀓𑀁 𑀲𑀫𑀬𑀁 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀪𑀺𑀓𑁆𑀔𑀽 𑀫𑀘𑁆𑀙𑀺𑀓𑀸𑀲𑀡𑁆𑀟𑁂 𑀯𑀺𑀳𑀭𑀦𑁆𑀢𑀺 𑀅𑀫𑁆𑀩𑀸𑀝𑀓𑀯𑀦𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸𑀦𑀁 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀁 𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘‘‘𑀲𑀁𑀬𑁄𑀚𑀦’𑀦𑁆𑀢𑀺 𑀯𑀸, 𑀆𑀯𑀼𑀲𑁄, ‘𑀲𑀁𑀬𑁄𑀚𑀦𑀺𑀬𑀸 𑀥𑀫𑁆𑀫𑀸’𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀉𑀤𑀸𑀳𑀼 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺? 𑀢𑀢𑁆𑀭𑁂𑀓𑀘𑁆𑀘𑁂𑀳𑀺 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀯𑀁 𑀩𑁆𑀬𑀸𑀓𑀢𑀁 𑀳𑁄𑀢𑀺 𑁋 ‘‘‘𑀲𑀁𑀬𑁄𑀚𑀦’𑀦𑁆𑀢𑀺 𑀯𑀸, 𑀆𑀯𑀼𑀲𑁄, ‘𑀲𑀁𑀬𑁄𑀚𑀦𑀺𑀬𑀸 𑀥𑀫𑁆𑀫𑀸’𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘𑀸’’𑀢𑀺. 𑀏𑀓𑀘𑁆𑀘𑁂𑀳𑀺 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀯𑀁 𑀩𑁆𑀬𑀸𑀓𑀢𑀁 𑀳𑁄𑀢𑀺 𑁋 ‘‘‘𑀲𑀁𑀬𑁄𑀚𑀦’𑀦𑁆𑀢𑀺 𑀯𑀸, 𑀆𑀯𑀼𑀲𑁄, ‘𑀲𑀁𑀬𑁄𑀚𑀦𑀺𑀬𑀸 𑀥𑀫𑁆𑀫𑀸’𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀫𑀺𑀕𑀧𑀣𑀓𑀁 𑀅𑀦𑀼𑀧𑁆𑀧𑀢𑁆𑀢𑁄 𑀳𑁄𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀲𑁆𑀲𑁄𑀲𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀲𑀫𑁆𑀩𑀳𑀼𑀮𑀸𑀦𑀁 𑀓𑀺𑀭 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀁 𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘‘‘𑀲𑀁𑀬𑁄𑀚𑀦’𑀦𑁆𑀢𑀺 𑀯𑀸, 𑀆𑀯𑀼𑀲𑁄, ‘𑀲𑀁𑀬𑁄𑀚𑀦𑀺𑀬𑀸 𑀥𑀫𑁆𑀫𑀸’𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀉𑀤𑀸𑀳𑀼 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺? 𑀢𑀢𑁆𑀭𑁂𑀓𑀘𑁆𑀘𑁂𑀳𑀺 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀯𑀁 𑀩𑁆𑀬𑀸𑀓𑀢𑀁 𑁋 ‘‘‘𑀲𑀁𑀬𑁄𑀚𑀦’𑀦𑁆𑀢𑀺 𑀯𑀸, 𑀆𑀯𑀼𑀲𑁄, ‘𑀲𑀁𑀬𑁄𑀚𑀦𑀺𑀬𑀸 𑀥𑀫𑁆𑀫𑀸’𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘𑀸’’𑀢𑀺. 𑀏𑀓𑀘𑁆𑀘𑁂𑀳𑀺 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀯𑀁 𑀩𑁆𑀬𑀸𑀓𑀢𑀁 ‘𑀲𑀁𑀬𑁄𑀚𑀦’𑀦𑁆𑀢𑀺 𑀯𑀸, 𑀆𑀯𑀼𑀲𑁄 ‘𑀲𑀁𑀬𑁄𑀚𑀦𑀺𑀬𑀸 𑀥𑀫𑁆𑀫𑀸’𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸𑀦𑀁 𑀓𑀺𑀭 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀁 𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘𑀲𑀁𑀬𑁄𑀚𑀦’𑀦𑁆𑀢𑀺 𑀯𑀸, 𑀆𑀯𑀼𑀲𑁄, ‘𑀲𑀁𑀬𑁄𑀚𑀦𑀺𑀬𑀸 𑀥𑀫𑁆𑀫𑀸’𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀉𑀤𑀸𑀳𑀼 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺? 𑀏𑀓𑀘𑁆𑀘𑁂𑀳𑀺 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀯𑀁 𑀩𑁆𑀬𑀸𑀓𑀢𑀁 𑁋 ‘‘‘𑀲𑀁𑀬𑁄𑀚𑀦’𑀦𑁆𑀢𑀺 𑀯𑀸, 𑀆𑀯𑀼𑀲𑁄, ‘𑀲𑀁𑀬𑁄𑀚𑀦𑀺𑀬𑀸 𑀥𑀫𑁆𑀫𑀸’𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘𑀸’’𑀢𑀺. 𑀏𑀓𑀘𑁆𑀘𑁂𑀳𑀺 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀯𑀁 𑀩𑁆𑀬𑀸𑀓𑀢𑀁 ‘‘‘𑀲𑀁𑀬𑁄𑀚𑀦’𑀦𑁆𑀢𑀺 𑀯𑀸, 𑀆𑀯𑀼𑀲𑁄, ‘𑀲𑀁𑀬𑁄𑀚𑀦𑀺𑀬𑀸 𑀥𑀫𑁆𑀫𑀸’𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺. ‘‘𑀏𑀯𑀁, 𑀕𑀳𑀧𑀢𑀻’’𑀢𑀺.

‘‘‘𑀲𑀁𑀬𑁄𑀚𑀦’𑀦𑁆𑀢𑀺 𑀯𑀸, 𑀪𑀦𑁆𑀢𑁂, ‘𑀲𑀁𑀬𑁄𑀚𑀦𑀺𑀬𑀸 𑀥𑀫𑁆𑀫𑀸’𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘. 𑀢𑁂𑀦 𑀳𑀺, 𑀪𑀦𑁆𑀢𑁂, 𑀉𑀧𑀫𑀁 𑀯𑁄 𑀓𑀭𑀺𑀲𑁆𑀲𑀸𑀫𑀺. 𑀉𑀧𑀫𑀸𑀬𑀧𑀺𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀓𑀸𑀴𑁄 𑀘 𑀩𑀮𑀻𑀩𑀤𑁆𑀤𑁄 𑀑𑀤𑀸𑀢𑁄 𑀘 𑀩𑀮𑀻𑀩𑀤𑁆𑀤𑁄 𑀏𑀓𑁂𑀦 𑀤𑀸𑀫𑁂𑀦 𑀯𑀸 𑀬𑁄𑀢𑁆𑀢𑁂𑀦 𑀯𑀸 𑀲𑀁𑀬𑀼𑀢𑁆𑀢𑀸 𑀅𑀲𑁆𑀲𑀼. 𑀬𑁄 𑀦𑀼 𑀔𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀓𑀸𑀴𑁄 𑀩𑀮𑀻𑀩𑀤𑁆𑀤𑁄 𑀑𑀤𑀸𑀢𑀲𑁆𑀲 𑀩𑀮𑀻𑀩𑀤𑁆𑀤𑀲𑁆𑀲 𑀲𑀁𑀬𑁄𑀚𑀦𑀁, 𑀑𑀤𑀸𑀢𑁄 𑀩𑀮𑀻𑀩𑀤𑁆𑀤𑁄 𑀓𑀸𑀴𑀲𑁆𑀲 𑀩𑀮𑀻𑀩𑀤𑁆𑀤𑀲𑁆𑀲 𑀲𑀁𑀬𑁄𑀚𑀦’𑀦𑁆𑀢𑀺, 𑀲𑀫𑁆𑀫𑀸 𑀦𑀼 𑀔𑁄 𑀲𑁄 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀕𑀳𑀧𑀢𑀺! 𑀦 𑀔𑁄, 𑀕𑀳𑀧𑀢𑀺, 𑀓𑀸𑀴𑁄 𑀩𑀮𑀻𑀩𑀤𑁆𑀤𑁄 𑀑𑀤𑀸𑀢𑀲𑁆𑀲 𑀩𑀮𑀻𑀩𑀤𑁆𑀤𑀲𑁆𑀲 𑀲𑀁𑀬𑁄𑀚𑀦𑀁, 𑀦𑀧𑀺 𑀑𑀤𑀸𑀢𑁄 𑀩𑀮𑀻𑀩𑀤𑁆𑀤𑁄 𑀓𑀸𑀴𑀲𑁆𑀲 𑀩𑀴𑀻𑀩𑀤𑁆𑀤𑀲𑁆𑀲 𑀲𑀁𑀬𑁄𑀚𑀦𑀁; 𑀬𑁂𑀦 𑀔𑁄 𑀢𑁂 𑀏𑀓𑁂𑀦 𑀤𑀸𑀫𑁂𑀦 𑀯𑀸 𑀬𑁄𑀢𑁆𑀢𑁂𑀦 𑀯𑀸 𑀲𑀁𑀬𑀼𑀢𑁆𑀢𑀸 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀦 𑀘𑀓𑁆𑀔𑀼 𑀭𑀽𑀧𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀭𑀽𑀧𑀸 𑀘𑀓𑁆𑀔𑀼𑀲𑁆𑀲 𑀲𑀁𑀬𑁄𑀚𑀦𑀁; 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁. 𑀦 𑀲𑁄𑀢𑀁 𑀲𑀤𑁆𑀤𑀸𑀦𑀁… 𑀦 𑀖𑀸𑀦𑀁 𑀕𑀦𑁆𑀥𑀸𑀦𑀁… 𑀦 𑀚𑀺𑀯𑁆𑀳𑀸 𑀭𑀲𑀸𑀦𑀁… 𑀦 𑀓𑀸𑀬𑁄 𑀨𑁄𑀝𑁆𑀞𑀩𑁆𑀩𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀨𑁄𑀝𑁆𑀞𑀩𑁆𑀩𑀸 𑀓𑀸𑀬𑀲𑁆𑀲 𑀲𑀁𑀬𑁄𑀚𑀦𑀁; 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦𑀁. 𑀦 𑀫𑀦𑁄 𑀥𑀫𑁆𑀫𑀸𑀦𑀁 𑀲𑀁𑀬𑁄𑀚𑀦𑀁, 𑀦 𑀥𑀫𑁆𑀫𑀸 𑀫𑀦𑀲𑁆𑀲 𑀲𑀁𑀬𑁄𑀚𑀦𑀁; 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄 𑀢𑀁 𑀢𑀢𑁆𑀣 𑀲𑀁𑀬𑁄𑀚𑀦’’𑀦𑁆𑀢𑀺. ‘‘𑀮𑀸𑀪𑀸 𑀢𑁂, 𑀕𑀳𑀧𑀢𑀺, 𑀲𑀼𑀮𑀤𑁆𑀥𑀁 𑀢𑁂, 𑀕𑀳𑀧𑀢𑀺, 𑀬𑀲𑁆𑀲 𑀢𑁂 𑀕𑀫𑁆𑀪𑀻𑀭𑁂 𑀩𑀼𑀤𑁆𑀥𑀯𑀘𑀦𑁂 𑀧𑀜𑁆𑀜𑀸𑀘𑀓𑁆𑀔𑀼 𑀓𑀫𑀢𑀻’’𑀢𑀺. 𑀧𑀞𑀫𑀁.

𑁨. 𑀧𑀞𑀫𑀇𑀲𑀺𑀤𑀢𑁆𑀢𑀲𑀼𑀢𑁆𑀢𑀁

𑁩𑁪𑁪. 𑀏𑀓𑀁 𑀲𑀫𑀬𑀁 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀪𑀺𑀓𑁆𑀔𑀽 𑀫𑀘𑁆𑀙𑀺𑀓𑀸𑀲𑀡𑁆𑀟𑁂 𑀯𑀺𑀳𑀭𑀦𑁆𑀢𑀺 𑀅𑀫𑁆𑀩𑀸𑀝𑀓𑀯𑀦𑁂. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀦𑁆𑀢𑀼 𑀫𑁂, 𑀪𑀦𑁆𑀢𑁂, 𑀣𑁂𑀭𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢’’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀼𑀁 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺𑀁𑀲𑀼.

𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀣𑁂𑀭𑀁 𑀏𑀢𑀤𑀯𑁄𑀘 𑁋 ‘‘‘𑀥𑀸𑀢𑀼𑀦𑀸𑀦𑀢𑁆𑀢𑀁, 𑀥𑀸𑀢𑀼𑀦𑀸𑀦𑀢𑁆𑀢’𑀦𑁆𑀢𑀺, 𑀪𑀦𑁆𑀢𑁂 𑀣𑁂𑀭, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀥𑀸𑀢𑀼𑀦𑀸𑀦𑀢𑁆𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀣𑁂𑀭𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀣𑁂𑀭𑀁 𑀏𑀢𑀤𑀯𑁄𑀘 𑁋 ‘‘‘𑀥𑀸𑀢𑀼𑀦𑀸𑀦𑀢𑁆𑀢𑀁, 𑀥𑀸𑀢𑀼𑀦𑀸𑀦𑀢𑁆𑀢’𑀦𑁆𑀢𑀺, 𑀪𑀦𑁆𑀢𑁂 𑀣𑁂𑀭, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀥𑀸𑀢𑀼𑀦𑀸𑀦𑀢𑁆𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸’’𑀢𑀺? 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀣𑁂𑀭𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀣𑁂𑀭𑀁 𑀏𑀢𑀤𑀯𑁄𑀘 𑁋 ‘‘‘𑀥𑀸𑀢𑀼𑀦𑀸𑀦𑀢𑁆𑀢𑀁, 𑀥𑀸𑀢𑀼𑀦𑀸𑀦𑀢𑁆𑀢’𑀦𑁆𑀢𑀺, 𑀪𑀦𑁆𑀢𑁂 𑀣𑁂𑀭, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀥𑀸𑀢𑀼𑀦𑀸𑀦𑀢𑁆𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸’’𑀢𑀺? 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀣𑁂𑀭𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀇𑀲𑀺𑀤𑀢𑁆𑀢𑁄 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀲𑀩𑁆𑀩𑀦𑀯𑀓𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀇𑀲𑀺𑀤𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀣𑁂𑀭𑀁 𑀏𑀢𑀤𑀯𑁄𑀘 𑁋 ‘‘𑀩𑁆𑀬𑀸𑀓𑀭𑁄𑀫𑀳𑀁, 𑀪𑀦𑁆𑀢𑁂 𑀣𑁂𑀭, 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀏𑀢𑀁 𑀧𑀜𑁆𑀳’’𑀦𑁆𑀢𑀺? ‘‘𑀩𑁆𑀬𑀸𑀓𑀭𑁄𑀳𑀺 𑀢𑁆𑀯𑀁, 𑀆𑀯𑀼𑀲𑁄 𑀇𑀲𑀺𑀤𑀢𑁆𑀢, 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀏𑀢𑀁 𑀧𑀜𑁆𑀳’’𑀦𑁆𑀢𑀺. ‘‘𑀏𑀯𑀜𑁆𑀳𑀺 𑀢𑁆𑀯𑀁, 𑀕𑀳𑀧𑀢𑀺, 𑀧𑀼𑀘𑁆𑀙𑀲𑀺 𑁋 ‘𑀥𑀸𑀢𑀼𑀦𑀸𑀦𑀢𑁆𑀢𑀁, 𑀥𑀸𑀢𑀼𑀦𑀸𑀦𑀢𑁆𑀢𑀦𑁆𑀢𑀺, 𑀪𑀦𑁆𑀢𑁂 𑀣𑁂𑀭, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀥𑀸𑀢𑀼𑀦𑀸𑀦𑀢𑁆𑀢𑀁, 𑀯𑀼𑀢𑁆𑀢𑀁 𑀪𑀕𑀯𑀢𑀸’’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀇𑀤𑀁 𑀔𑁄, 𑀕𑀳𑀧𑀢𑀺, 𑀥𑀸𑀢𑀼𑀦𑀸𑀦𑀢𑁆𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 𑀘𑀓𑁆𑀔𑀼𑀥𑀸𑀢𑀼, 𑀭𑀽𑀧𑀥𑀸𑀢𑀼, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼…𑀧𑁂… 𑀫𑀦𑁄𑀥𑀸𑀢𑀼, 𑀥𑀫𑁆𑀫𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀏𑀢𑁆𑀢𑀸𑀯𑀢𑀸 𑀔𑁄, 𑀕𑀳𑀧𑀢𑀺, 𑀥𑀸𑀢𑀼𑀦𑀸𑀦𑀢𑁆𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸’’𑀢𑀺.

𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀢𑁄 𑀇𑀲𑀺𑀤𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀪𑀼𑀢𑁆𑀢𑀸𑀯𑀺𑀦𑁄 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀦𑁄 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀸 𑀣𑁂𑀭𑁄 𑀆𑀬𑀲𑁆𑀫𑀦𑁆𑀢𑀁 𑀇𑀲𑀺𑀤𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀔𑁄 𑀢𑀁, 𑀆𑀯𑀼𑀲𑁄 𑀇𑀲𑀺𑀤𑀢𑁆𑀢, 𑀏𑀲𑁄 𑀧𑀜𑁆𑀳𑁄 𑀧𑀝𑀺𑀪𑀸𑀲𑀺, 𑀦𑁂𑀲𑁄 𑀧𑀜𑁆𑀳𑁄 𑀫𑀁 𑀧𑀝𑀺𑀪𑀸𑀲𑀺. 𑀢𑁂𑀦𑀳𑀸𑀯𑀼𑀲𑁄 𑀇𑀲𑀺𑀤𑀢𑁆𑀢, 𑀬𑀤𑀸 𑀅𑀜𑁆𑀜𑀣𑀸𑀧𑀺 [𑀬𑀤𑀸 𑀅𑀜𑁆𑀜𑀤𑀸𑀧𑀺 (𑀲𑀻. 𑀧𑀻.) 𑀅𑀜𑁆𑀜𑀤𑀸𑀧𑀺 (?)] 𑀏𑀯𑀭𑀽𑀧𑁄 𑀧𑀜𑁆𑀳𑁄 𑀆𑀕𑀘𑁆𑀙𑁂𑀬𑁆𑀬, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀪𑀸𑀲𑁂𑀬𑁆𑀬𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀤𑀼𑀢𑀺𑀬𑀇𑀲𑀺𑀤𑀢𑁆𑀢𑀲𑀼𑀢𑁆𑀢𑀁

𑁩𑁪𑁫. 𑀏𑀓𑀁 𑀲𑀫𑀬𑀁 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀪𑀺𑀓𑁆𑀔𑀽 𑀫𑀘𑁆𑀙𑀺𑀓𑀸𑀲𑀡𑁆𑀟𑁂 𑀯𑀺𑀳𑀭𑀦𑁆𑀢𑀺 𑀅𑀫𑁆𑀩𑀸𑀝𑀓𑀯𑀦𑁂. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀦𑁆𑀢𑀼 𑀫𑁂, 𑀪𑀦𑁆𑀢𑁂 𑀣𑁂𑀭𑀸, 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢’’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀼𑀁 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺𑀁𑀲𑀼.

𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀣𑁂𑀭𑀁 𑀏𑀢𑀤𑀯𑁄𑀘 𑁋 ‘‘𑀬𑀸 𑀇𑀫𑀸, 𑀪𑀦𑁆𑀢𑁂 𑀣𑁂𑀭, 𑀅𑀦𑁂𑀓𑀯𑀺𑀳𑀺𑀢𑀸 𑀤𑀺𑀝𑁆𑀞𑀺𑀬𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀅𑀦𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸. 𑀬𑀸𑀦𑀺 𑀘𑀺𑀫𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀩𑁆𑀭𑀳𑁆𑀫𑀚𑀸𑀮𑁂 𑀪𑀡𑀺𑀢𑀸𑀦𑀺; 𑀇𑀫𑀸 𑀦𑀼 𑀔𑁄, 𑀪𑀦𑁆𑀢𑁂, 𑀤𑀺𑀝𑁆𑀞𑀺𑀬𑁄 𑀓𑀺𑀲𑁆𑀫𑀺𑀁 𑀲𑀢𑀺 𑀳𑁄𑀦𑁆𑀢𑀺, 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀦 𑀳𑁄𑀦𑁆𑀢𑀻’’𑀢𑀺?

𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀣𑁂𑀭𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀣𑁂𑀭𑀁 𑀏𑀢𑀤𑀯𑁄𑀘 𑁋 ‘‘𑀬𑀸 𑀇𑀫𑀸, 𑀪𑀦𑁆𑀢𑁂 𑀣𑁂𑀭, 𑀅𑀦𑁂𑀓𑀯𑀺𑀳𑀺𑀢𑀸 𑀤𑀺𑀝𑁆𑀞𑀺𑀬𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀅𑀦𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸. 𑀬𑀸𑀦𑀺 𑀘𑀺𑀫𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀩𑁆𑀭𑀳𑁆𑀫𑀚𑀸𑀮𑁂 𑀪𑀡𑀺𑀢𑀸𑀦𑀺; 𑀇𑀫𑀸 𑀦𑀼 𑀔𑁄, 𑀪𑀦𑁆𑀢𑁂, 𑀤𑀺𑀝𑁆𑀞𑀺𑀬𑁄 𑀓𑀺𑀲𑁆𑀫𑀺𑀁 𑀲𑀢𑀺 𑀳𑁄𑀦𑁆𑀢𑀺, 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀦 𑀳𑁄𑀦𑁆𑀢𑀻’’𑀢𑀺? 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀣𑁂𑀭𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀇𑀲𑀺𑀤𑀢𑁆𑀢𑁄 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀲𑀩𑁆𑀩𑀦𑀯𑀓𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀇𑀲𑀺𑀤𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀣𑁂𑀭𑀁 𑀏𑀢𑀤𑀯𑁄𑀘 𑁋 ‘‘𑀩𑁆𑀬𑀸𑀓𑀭𑁄𑀫𑀳𑀁, 𑀪𑀦𑁆𑀢𑁂 𑀣𑁂𑀭, 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀏𑀢𑀁 𑀧𑀜𑁆𑀳’’𑀦𑁆𑀢𑀺? ‘‘𑀩𑁆𑀬𑀸𑀓𑀭𑁄𑀳𑀺 𑀢𑁆𑀯𑀁, 𑀆𑀯𑀼𑀲𑁄 𑀇𑀲𑀺𑀤𑀢𑁆𑀢, 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀏𑀢𑀁 𑀧𑀜𑁆𑀳’’𑀦𑁆𑀢𑀺. ‘‘𑀏𑀯𑀜𑁆𑀳𑀺 𑀢𑁆𑀯𑀁, 𑀕𑀳𑀧𑀢𑀺, 𑀧𑀼𑀘𑁆𑀙𑀲𑀺 𑁋 ‘𑀬𑀸 𑀇𑀫𑀸, 𑀪𑀦𑁆𑀢𑁂 𑀣𑁂𑀭, 𑀅𑀦𑁂𑀓𑀯𑀺𑀳𑀺𑀢𑀸 𑀤𑀺𑀝𑁆𑀞𑀺𑀬𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂…; 𑀇𑀫𑀸 𑀦𑀼 𑀔𑁄, 𑀪𑀦𑁆𑀢𑁂, 𑀤𑀺𑀝𑁆𑀞𑀺𑀬𑁄 𑀓𑀺𑀲𑁆𑀫𑀺𑀁 𑀲𑀢𑀺 𑀳𑁄𑀦𑁆𑀢𑀺, 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀦 𑀳𑁄𑀦𑁆𑀢𑀻’’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀬𑀸 𑀇𑀫𑀸, 𑀕𑀳𑀧𑀢𑀺, 𑀅𑀦𑁂𑀓𑀯𑀺𑀳𑀺𑀢𑀸 𑀤𑀺𑀝𑁆𑀞𑀺𑀬𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸 𑀅𑀦𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸. 𑀬𑀸𑀦𑀺 𑀘𑀺𑀫𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀩𑁆𑀭𑀳𑁆𑀫𑀚𑀸𑀮𑁂 𑀪𑀡𑀺𑀢𑀸𑀦𑀺; 𑀇𑀫𑀸 𑀔𑁄, 𑀕𑀳𑀧𑀢𑀺, 𑀤𑀺𑀝𑁆𑀞𑀺𑀬𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀲𑀢𑀺 𑀳𑁄𑀦𑁆𑀢𑀺, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀅𑀲𑀢𑀺 𑀦 𑀳𑁄𑀦𑁆𑀢𑀻’’’𑀢𑀺.

‘‘𑀓𑀣𑀁 𑀧𑀦, 𑀪𑀦𑁆𑀢𑁂, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺? ‘‘𑀇𑀥, 𑀕𑀳𑀧𑀢𑀺, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁; 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺.

‘‘𑀓𑀣𑀁 𑀧𑀦, 𑀪𑀦𑁆𑀢𑁂, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀦 𑀳𑁄𑀢𑀻’’𑀢𑀺? ‘‘𑀇𑀥, 𑀕𑀳𑀧𑀢𑀺, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀦 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀦 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁; 𑀦 𑀯𑁂𑀤𑀦𑀁… 𑀦 𑀲𑀜𑁆𑀜𑀁… 𑀦 𑀲𑀗𑁆𑀔𑀸𑀭𑁂… 𑀦 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀦 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀦 𑀳𑁄𑀢𑀻’’𑀢𑀺.

‘‘𑀓𑀼𑀢𑁄, 𑀪𑀦𑁆𑀢𑁂, 𑀅𑀬𑁆𑀬𑁄 𑀇𑀲𑀺𑀤𑀢𑁆𑀢𑁄 𑀆𑀕𑀘𑁆𑀙𑀢𑀻’’𑀢𑀺? ‘‘𑀅𑀯𑀦𑁆𑀢𑀺𑀬𑀸 𑀔𑁄, 𑀕𑀳𑀧𑀢𑀺, 𑀆𑀕𑀘𑁆𑀙𑀸𑀫𑀻’’𑀢𑀺. ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀅𑀯𑀦𑁆𑀢𑀺𑀬𑀸 𑀇𑀲𑀺𑀤𑀢𑁆𑀢𑁄 𑀦𑀸𑀫 𑀓𑀼𑀮𑀧𑀼𑀢𑁆𑀢𑁄 𑀅𑀫𑁆𑀳𑀸𑀓𑀁 𑀅𑀤𑀺𑀝𑁆𑀞𑀲𑀳𑀸𑀬𑁄 𑀧𑀩𑁆𑀩𑀚𑀺𑀢𑁄? 𑀤𑀺𑀝𑁆𑀞𑁄 𑀲𑁄 𑀆𑀬𑀲𑁆𑀫𑀢𑀸’’𑀢𑀺? ‘‘𑀏𑀯𑀁, 𑀕𑀳𑀧𑀢𑀻’’𑀢𑀺. ‘‘𑀓𑀳𑀁 𑀦𑀼 𑀔𑁄 𑀲𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀏𑀢𑀭𑀳𑀺 𑀯𑀺𑀳𑀭𑀢𑀻’’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀇𑀲𑀺𑀤𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. ‘‘𑀅𑀬𑁆𑀬𑁄 𑀦𑁄, 𑀪𑀦𑁆𑀢𑁂, 𑀇𑀲𑀺𑀤𑀢𑁆𑀢𑁄’’𑀢𑀺? ‘‘𑀏𑀯𑀁, 𑀕𑀳𑀧𑀢𑀻’’𑀢𑀺. ‘‘𑀅𑀪𑀺𑀭𑀫𑀢𑀼, 𑀪𑀦𑁆𑀢𑁂, 𑀅𑀬𑁆𑀬𑁄 𑀇𑀲𑀺𑀤𑀢𑁆𑀢𑁄 𑀫𑀘𑁆𑀙𑀺𑀓𑀸𑀲𑀡𑁆𑀟𑁂. 𑀭𑀫𑀡𑀻𑀬𑀁 𑀅𑀫𑁆𑀩𑀸𑀝𑀓𑀯𑀦𑀁. 𑀅𑀳𑀁 𑀅𑀬𑁆𑀬𑀲𑁆𑀲 𑀇𑀲𑀺𑀤𑀢𑁆𑀢𑀲𑁆𑀲 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺. ‘‘𑀓𑀮𑁆𑀬𑀸𑀡𑀁 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀻’’𑀢𑀺.

𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀢𑁄 𑀇𑀲𑀺𑀤𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀪𑀼𑀢𑁆𑀢𑀸𑀯𑀺𑀦𑁄 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀦𑁄 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀸 𑀣𑁂𑀭𑁄 𑀆𑀬𑀲𑁆𑀫𑀦𑁆𑀢𑀁 𑀇𑀲𑀺𑀤𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀔𑁄 𑀢𑀁, 𑀆𑀯𑀼𑀲𑁄 𑀇𑀲𑀺𑀤𑀢𑁆𑀢, 𑀏𑀲𑁄 𑀧𑀜𑁆𑀳𑁄 𑀧𑀝𑀺𑀪𑀸𑀲𑀺. 𑀦𑁂𑀲𑁄 𑀧𑀜𑁆𑀳𑁄 𑀫𑀁 𑀧𑀝𑀺𑀪𑀸𑀲𑀺. 𑀢𑁂𑀦𑀳𑀸𑀯𑀼𑀲𑁄 𑀇𑀲𑀺𑀤𑀢𑁆𑀢, 𑀬𑀤𑀸 𑀅𑀜𑁆𑀜𑀣𑀸𑀧𑀺 𑀏𑀯𑀭𑀽𑀧𑁄 𑀧𑀜𑁆𑀳𑁄 𑀆𑀕𑀘𑁆𑀙𑁂𑀬𑁆𑀬, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀪𑀸𑀲𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀇𑀲𑀺𑀤𑀢𑁆𑀢𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀫𑀘𑁆𑀙𑀺𑀓𑀸𑀲𑀡𑁆𑀟𑀫𑁆𑀳𑀸 𑀧𑀓𑁆𑀓𑀸𑀫𑀺. 𑀬𑀁 𑀫𑀘𑁆𑀙𑀺𑀓𑀸𑀲𑀡𑁆𑀟𑀫𑁆𑀳𑀸 𑀧𑀓𑁆𑀓𑀸𑀫𑀺, 𑀢𑀣𑀸 𑀧𑀓𑁆𑀓𑀦𑁆𑀢𑁄𑀯 𑀅𑀳𑁄𑀲𑀺, 𑀦 𑀧𑀼𑀦 𑀧𑀘𑁆𑀘𑀸𑀕𑀘𑁆𑀙𑀻𑀢𑀺. 𑀢𑀢𑀺𑀬𑀁.

𑁪. 𑀫𑀳𑀓𑀧𑀸𑀝𑀺𑀳𑀸𑀭𑀺𑀬𑀲𑀼𑀢𑁆𑀢𑀁

𑁩𑁪𑁬. 𑀏𑀓𑀁 𑀲𑀫𑀬𑀁 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀪𑀺𑀓𑁆𑀔𑀽 𑀫𑀘𑁆𑀙𑀺𑀓𑀸𑀲𑀡𑁆𑀟𑁂 𑀯𑀺𑀳𑀭𑀦𑁆𑀢𑀺 𑀅𑀫𑁆𑀩𑀸𑀝𑀓𑀯𑀦𑁂. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀦𑁆𑀢𑀼 𑀫𑁂, 𑀪𑀦𑁆𑀢𑁂 𑀣𑁂𑀭𑀸, 𑀲𑁆𑀯𑀸𑀢𑀦𑀸𑀬 𑀕𑁄𑀓𑀼𑀮𑁂 𑀪𑀢𑁆𑀢’’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀼𑀁 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀕𑁄𑀓𑀼𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺𑀁𑀲𑀼.

𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀣𑁂𑀭𑁂 𑀪𑀺𑀓𑁆𑀔𑀽 𑀧𑀡𑀻𑀢𑁂𑀦 𑀲𑀧𑁆𑀧𑀺𑀧𑀸𑀬𑀸𑀲𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀪𑀼𑀢𑁆𑀢𑀸𑀯𑀺𑀦𑁄 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀦𑁄 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁𑀲𑀼. 𑀘𑀺𑀢𑁆𑀢𑁄𑀧𑀺 𑀔𑁄 𑀕𑀳𑀧𑀢𑀺 ‘𑀲𑁂𑀲𑀓𑀁 𑀯𑀺𑀲𑁆𑀲𑀚𑁆𑀚𑁂𑀣𑀸’𑀢𑀺 𑀯𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀡𑁆𑀳𑀁 𑀳𑁄𑀢𑀺 𑀓𑀼𑀣𑀺𑀢𑀁 [𑀓𑀼𑀝𑁆𑀞𑀺𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)]; 𑀢𑁂 𑀘 𑀣𑁂𑀭𑀸 𑀪𑀺𑀓𑁆𑀔𑀽 𑀧𑀯𑁂𑀮𑀺𑀬𑀫𑀸𑀦𑁂𑀦 𑀫𑀜𑁆𑀜𑁂 𑀓𑀸𑀬𑁂𑀦 𑀕𑀘𑁆𑀙𑀦𑁆𑀢𑀺, 𑀬𑀣𑀸 𑀢𑀁 𑀪𑁄𑀚𑀦𑀁 𑀪𑀼𑀢𑁆𑀢𑀸𑀯𑀺𑀦𑁄.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀓𑁄 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀲𑀩𑁆𑀩𑀦𑀯𑀓𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀓𑁄 𑀆𑀬𑀲𑁆𑀫𑀦𑁆𑀢𑀁 𑀣𑁂𑀭𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀔𑁆𑀯𑀲𑁆𑀲, 𑀪𑀦𑁆𑀢𑁂 𑀣𑁂𑀭, 𑀲𑀻𑀢𑀓𑁄 𑀘 𑀯𑀸𑀢𑁄 𑀯𑀸𑀬𑁂𑀬𑁆𑀬, 𑀅𑀩𑁆𑀪𑀲𑀫𑁆𑀧𑀺𑀮𑀸𑀧𑁄 [𑀅𑀩𑁆𑀪𑀲𑀁𑀩𑀺𑀮𑀸𑀧𑁄 (𑀲𑀻.), 𑀅𑀩𑁆𑀪𑀲𑀁𑀯𑀺𑀮𑀸𑀧𑁄 (𑀧𑀻.)] 𑀘 𑀅𑀲𑁆𑀲, 𑀤𑁂𑀯𑁄 𑀘 𑀏𑀓𑀫𑁂𑀓𑀁 𑀨𑀼𑀲𑀸𑀬𑁂𑀬𑁆𑀬𑀸’’𑀢𑀺.

‘‘𑀲𑀸𑀥𑀼 𑀔𑁆𑀯𑀲𑁆𑀲, 𑀆𑀯𑀼𑀲𑁄 𑀫𑀳𑀓, 𑀬𑀁 𑀲𑀻𑀢𑀓𑁄 𑀘 𑀯𑀸𑀢𑁄 𑀯𑀸𑀬𑁂𑀬𑁆𑀬, 𑀅𑀩𑁆𑀪𑀲𑀫𑁆𑀧𑀺𑀮𑀸𑀧𑁄 𑀘 𑀅𑀲𑁆𑀲, 𑀤𑁂𑀯𑁄 𑀘 𑀏𑀓𑀫𑁂𑀓𑀁 𑀨𑀼𑀲𑀸𑀬𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀓𑁄 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺 [𑀅𑀪𑀺𑀲𑀗𑁆𑀔𑀸𑀲𑀺 (𑀲𑀻.)] 𑀬𑀣𑀸 𑀲𑀻𑀢𑀓𑁄 𑀘 𑀯𑀸𑀢𑁄 𑀯𑀸𑀬𑀺, 𑀅𑀩𑁆𑀪𑀲𑀫𑁆𑀧𑀺𑀮𑀸𑀧𑁄 𑀘 𑀅𑀲𑁆𑀲 [𑀆𑀲𑀺 (?)], 𑀤𑁂𑀯𑁄 𑀘 𑀏𑀓𑀫𑁂𑀓𑀁 𑀨𑀼𑀲𑀺. 𑀅𑀣 𑀔𑁄 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑁄 𑀔𑁄 𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀲𑀩𑁆𑀩𑀦𑀯𑀓𑁄 𑀪𑀺𑀓𑁆𑀔𑀼 𑀢𑀲𑁆𑀲𑀸𑀬𑀁 𑀏𑀯𑀭𑀽𑀧𑁄 𑀇𑀤𑁆𑀥𑀸𑀦𑀼𑀪𑀸𑀯𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀓𑁄 𑀆𑀭𑀸𑀫𑀁 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀣𑁂𑀭𑀁 𑀏𑀢𑀤𑀯𑁄𑀘 𑁋 ‘‘𑀅𑀮𑀫𑁂𑀢𑁆𑀢𑀸𑀯𑀢𑀸, 𑀪𑀦𑁆𑀢𑁂 𑀣𑁂𑀭𑀸’’𑀢𑀺? ‘‘𑀅𑀮𑀫𑁂𑀢𑁆𑀢𑀸𑀯𑀢𑀸, 𑀆𑀯𑀼𑀲𑁄 𑀫𑀳𑀓! 𑀓𑀢𑀫𑁂𑀢𑁆𑀢𑀸𑀯𑀢𑀸, 𑀆𑀯𑀼𑀲𑁄 𑀫𑀳𑀓! 𑀧𑀽𑀚𑀺𑀢𑀫𑁂𑀢𑁆𑀢𑀸𑀯𑀢𑀸, 𑀆𑀯𑀼𑀲𑁄 𑀫𑀳𑀓𑀸’’𑀢𑀺. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀬𑀣𑀸𑀯𑀺𑀳𑀸𑀭𑀁 𑀅𑀕𑀫𑀁𑀲𑀼. 𑀆𑀬𑀲𑁆𑀫𑀸𑀧𑀺 𑀫𑀳𑀓𑁄 𑀲𑀓𑀁 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺.

𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦𑀸𑀬𑀲𑁆𑀫𑀸 𑀫𑀳𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀓𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀫𑀳𑀓𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀳𑀓𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑀽’’𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀕𑀳𑀧𑀢𑀺, 𑀆𑀮𑀺𑀦𑁆𑀤𑁂 𑀉𑀢𑁆𑀢𑀭𑀸𑀲𑀗𑁆𑀕𑀁 𑀧𑀜𑁆𑀜𑀧𑁂𑀢𑁆𑀯𑀸 𑀢𑀺𑀡𑀓𑀮𑀸𑀧𑀁 𑀑𑀓𑀸𑀲𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀢𑁄 𑀫𑀳𑀓𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀆𑀮𑀺𑀦𑁆𑀤𑁂 𑀉𑀢𑁆𑀢𑀭𑀸𑀲𑀗𑁆𑀕𑀁 𑀧𑀜𑁆𑀜𑀧𑁂𑀢𑁆𑀯𑀸 𑀢𑀺𑀡𑀓𑀮𑀸𑀧𑀁 𑀑𑀓𑀸𑀲𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀓𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀽𑀘𑀺𑀖𑀝𑀺𑀓𑀁 𑀤𑀢𑁆𑀯𑀸 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀺 𑀬𑀣𑀸 𑀢𑀸𑀮𑀘𑁆𑀙𑀺𑀕𑁆𑀕𑀴𑁂𑀦 𑀘 𑀅𑀕𑁆𑀕𑀴𑀦𑁆𑀢𑀭𑀺𑀓𑀸𑀬 𑀘 𑀅𑀘𑁆𑀘𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀺𑀡𑀸𑀦𑀺 𑀛𑀸𑀧𑁂𑀲𑀺, 𑀉𑀢𑁆𑀢𑀭𑀸𑀲𑀗𑁆𑀕𑀁 𑀦 𑀛𑀸𑀧𑁂𑀲𑀺. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀓𑁄 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀅𑀮𑀫𑁂𑀢𑁆𑀢𑀸𑀯𑀢𑀸, 𑀕𑀳𑀧𑀢𑀻’’𑀢𑀺?

‘‘𑀅𑀮𑀫𑁂𑀢𑁆𑀢𑀸𑀯𑀢𑀸, 𑀪𑀦𑁆𑀢𑁂 𑀫𑀳𑀓! 𑀓𑀢𑀫𑁂𑀢𑁆𑀢𑀸𑀯𑀢𑀸, 𑀪𑀦𑁆𑀢𑁂, 𑀫𑀳𑀓! 𑀧𑀽𑀚𑀺𑀢𑀫𑁂𑀢𑁆𑀢𑀸𑀯𑀢𑀸, 𑀪𑀦𑁆𑀢𑁂 𑀫𑀳𑀓! 𑀅𑀪𑀺𑀭𑀫𑀢𑀼, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀳𑀓𑁄 𑀫𑀘𑁆𑀙𑀺𑀓𑀸𑀲𑀡𑁆𑀟𑁂. 𑀭𑀫𑀡𑀻𑀬𑀁 𑀅𑀫𑁆𑀩𑀸𑀝𑀓𑀯𑀦𑀁. 𑀅𑀳𑀁 𑀅𑀬𑁆𑀬𑀲𑁆𑀲 𑀫𑀳𑀓𑀲𑁆𑀲 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺. ‘‘𑀓𑀮𑁆𑀬𑀸𑀡𑀁 𑀯𑀼𑀘𑁆𑀘𑀢𑀺, 𑀕𑀳𑀧𑀢𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀓𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀫𑀘𑁆𑀙𑀺𑀓𑀸𑀲𑀡𑁆𑀟𑀫𑁆𑀳𑀸 𑀧𑀓𑁆𑀓𑀸𑀫𑀺. 𑀬𑀁 𑀫𑀘𑁆𑀙𑀺𑀓𑀸𑀲𑀡𑁆𑀟𑀫𑁆𑀳𑀸 𑀧𑀓𑁆𑀓𑀸𑀫𑀺, 𑀢𑀣𑀸 𑀧𑀓𑁆𑀓𑀦𑁆𑀢𑁄𑀯 𑀅𑀳𑁄𑀲𑀺; 𑀦 𑀧𑀼𑀦 𑀧𑀘𑁆𑀘𑀸𑀕𑀘𑁆𑀙𑀻𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀓𑀸𑀫𑀪𑀽𑀲𑀼𑀢𑁆𑀢𑀁

𑁩𑁪𑁭. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀓𑀸𑀫𑀪𑀽 𑀫𑀘𑁆𑀙𑀺𑀓𑀸𑀲𑀡𑁆𑀟𑁂 𑀯𑀺𑀳𑀭𑀢𑀺 𑀅𑀫𑁆𑀩𑀸𑀝𑀓𑀯𑀦𑁂. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦𑀸𑀬𑀲𑁆𑀫𑀸 𑀓𑀸𑀫𑀪𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀓𑀸𑀫𑀪𑀼𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀆𑀬𑀲𑁆𑀫𑀸 𑀓𑀸𑀫𑀪𑀽 𑀏𑀢𑀤𑀯𑁄𑀘 𑁋

‘‘𑀯𑀼𑀢𑁆𑀢𑀫𑀺𑀤𑀁, 𑀕𑀳𑀧𑀢𑀺 𑁋

‘‘𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄, 𑀏𑀓𑀸𑀭𑁄 𑀯𑀢𑁆𑀢𑀢𑀻 𑀭𑀣𑁄;

𑀅𑀦𑀻𑀖𑀁 𑀧𑀲𑁆𑀲 𑀆𑀬𑀦𑁆𑀢𑀁 [𑀅𑀧𑁆𑀧𑀢𑁆𑀢𑀁 (𑀲𑁆𑀬𑀸. 𑀓𑀁. 𑀓.)], 𑀙𑀺𑀦𑁆𑀦𑀲𑁄𑀢𑀁 𑀅𑀩𑀦𑁆𑀥𑀦’’𑀦𑁆𑀢𑀺.

‘‘𑀇𑀫𑀲𑁆𑀲 𑀦𑀼 𑀔𑁄, 𑀕𑀳𑀧𑀢𑀺, 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀓𑀣𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺? ‘‘𑀓𑀺𑀁 𑀦𑀼 𑀔𑁄 𑀏𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀪𑀸𑀲𑀺𑀢’’𑀦𑁆𑀢𑀺? ‘‘𑀏𑀯𑀁, 𑀕𑀳𑀧𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀫𑀼𑀳𑀼𑀢𑁆𑀢𑀁 𑀆𑀕𑀫𑁂𑀳𑀺 𑀬𑀸𑀯𑀲𑁆𑀲 𑀅𑀢𑁆𑀣𑀁 𑀧𑁂𑀓𑁆𑀔𑀸𑀫𑀻’’𑀢𑀺. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀫𑀼𑀳𑀼𑀢𑁆𑀢𑀁 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀓𑀸𑀫𑀪𑀼𑀁 𑀏𑀢𑀤𑀯𑁄𑀘 𑁋

‘‘‘𑀦𑁂𑀮𑀗𑁆𑀕’𑀦𑁆𑀢𑀺 𑀔𑁄, 𑀪𑀦𑁆𑀢𑁂, 𑀲𑀻𑀮𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. ‘𑀲𑁂𑀢𑀧𑀘𑁆𑀙𑀸𑀤𑁄’𑀢𑀺 𑀔𑁄, 𑀪𑀦𑁆𑀢𑁂, 𑀯𑀺𑀫𑀼𑀢𑁆𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. ‘𑀏𑀓𑀸𑀭𑁄’𑀢𑀺 𑀔𑁄, 𑀪𑀦𑁆𑀢𑁂, 𑀲𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. ‘𑀯𑀢𑁆𑀢𑀢𑀻’𑀢𑀺 𑀔𑁄, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. ‘𑀭𑀣𑁄’𑀢𑀺 𑀔𑁄, 𑀪𑀦𑁆𑀢𑁂, 𑀇𑀫𑀲𑁆𑀲𑁂𑀢𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀅𑀥𑀺𑀯𑀘𑀦𑀁 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀲𑁆𑀲 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀲𑁆𑀲 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀲𑁆𑀲. 𑀭𑀸𑀕𑁄 𑀔𑁄, 𑀪𑀦𑁆𑀢𑁂, 𑀦𑀻𑀖𑁄, 𑀤𑁄𑀲𑁄 𑀦𑀻𑀖𑁄, 𑀫𑁄𑀳𑁄 𑀦𑀻𑀖𑁄. 𑀢𑁂 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀗𑁆𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 ‘𑀅𑀦𑀻𑀖𑁄’𑀢𑀺 𑀯𑀼𑀘𑁆𑀘𑀢𑀺. ‘𑀆𑀬𑀦𑁆𑀢’𑀦𑁆𑀢𑀺 𑀔𑁄, 𑀪𑀦𑁆𑀢𑁂, 𑀅𑀭𑀳𑀢𑁄 𑀏𑀢𑀁 𑀅𑀥𑀺𑀯𑀘𑀦𑀁. ‘𑀲𑁄𑀢𑁄’𑀢𑀺 𑀔𑁄, 𑀪𑀦𑁆𑀢𑁂, 𑀢𑀡𑁆𑀳𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀸 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀗𑁆𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 ‘𑀙𑀺𑀦𑁆𑀦𑀲𑁄𑀢𑁄’𑀢𑀺 𑀯𑀼𑀘𑁆𑀘𑀢𑀺. 𑀭𑀸𑀕𑁄 𑀔𑁄, 𑀪𑀦𑁆𑀢𑁂, 𑀩𑀦𑁆𑀥𑀦𑀁, 𑀤𑁄𑀲𑁄 𑀩𑀦𑁆𑀥𑀦𑀁, 𑀫𑁄𑀳𑁄 𑀩𑀦𑁆𑀥𑀦𑀁. 𑀢𑁂 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀗𑁆𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 ‘𑀅𑀩𑀦𑁆𑀥𑀦𑁄’𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 𑀔𑁄, 𑀪𑀦𑁆𑀢𑁂, 𑀬𑀁 𑀢𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁 𑁋

‘‘𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄, 𑀏𑀓𑀸𑀭𑁄 𑀯𑀢𑁆𑀢𑀢𑀻 𑀭𑀣𑁄;

𑀅𑀦𑀻𑀖𑀁 𑀧𑀲𑁆𑀲 𑀆𑀬𑀦𑁆𑀢𑀁, 𑀙𑀺𑀦𑁆𑀦𑀲𑁄𑀢𑀁 𑀅𑀩𑀦𑁆𑀥𑀦’’𑀦𑁆𑀢𑀺.

‘‘𑀇𑀫𑀲𑁆𑀲 𑀔𑁄, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀻’’𑀢𑀺. ‘‘𑀮𑀸𑀪𑀸 𑀢𑁂, 𑀕𑀳𑀧𑀢𑀺, 𑀲𑀼𑀮𑀤𑁆𑀥𑀁 𑀢𑁂, 𑀕𑀳𑀧𑀢𑀺! 𑀬𑀲𑁆𑀲 𑀢𑁂 𑀕𑀫𑁆𑀪𑀻𑀭𑁂 𑀩𑀼𑀤𑁆𑀥𑀯𑀘𑀦𑁂 𑀧𑀜𑁆𑀜𑀸𑀘𑀓𑁆𑀔𑀼 𑀓𑀫𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀓𑀸𑀫𑀪𑀽𑀲𑀼𑀢𑁆𑀢𑀁

𑁩𑁪𑁮. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀓𑀸𑀫𑀪𑀽 𑀫𑀘𑁆𑀙𑀺𑀓𑀸𑀲𑀡𑁆𑀟𑁂 𑀯𑀺𑀳𑀭𑀢𑀺 𑀅𑀫𑁆𑀩𑀸𑀝𑀓𑀯𑀦𑁂. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦𑀸𑀬𑀲𑁆𑀫𑀸 𑀓𑀸𑀫𑀪𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀓𑀸𑀫𑀪𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀲𑀗𑁆𑀔𑀸𑀭𑀸’’𑀢𑀺? ‘‘𑀢𑀬𑁄 𑀔𑁄, 𑀕𑀳𑀧𑀢𑀺, 𑀲𑀗𑁆𑀔𑀸𑀭𑀸 𑁋 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀲𑀗𑁆𑀔𑀸𑀭𑁄, 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀢𑁄 𑀓𑀸𑀫𑀪𑀼𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀓𑀸𑀫𑀪𑀼𑀁 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀓𑀸𑀬𑀲𑀗𑁆𑀔𑀸𑀭𑁄, 𑀓𑀢𑀫𑁄 𑀯𑀘𑀻𑀲𑀗𑁆𑀔𑀸𑀭𑁄, 𑀓𑀢𑀫𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺? ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀔𑁄, 𑀕𑀳𑀧𑀢𑀺, 𑀓𑀸𑀬𑀲𑀗𑁆𑀔𑀸𑀭𑁄, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀘𑀻𑀲𑀗𑁆𑀔𑀸𑀭𑁄, 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺…𑀧𑁂… 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘𑀓𑀲𑁆𑀫𑀸 𑀧𑀦, 𑀪𑀦𑁆𑀢𑁂, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑀲𑀗𑁆𑀔𑀸𑀭𑁄, 𑀓𑀲𑁆𑀫𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀘𑀻𑀲𑀗𑁆𑀔𑀸𑀭𑁄, 𑀓𑀲𑁆𑀫𑀸 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺? ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀔𑁄, 𑀕𑀳𑀧𑀢𑀺, 𑀓𑀸𑀬𑀺𑀓𑀸. 𑀏𑀢𑁂 𑀥𑀫𑁆𑀫𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸, 𑀢𑀲𑁆𑀫𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑀲𑀗𑁆𑀔𑀸𑀭𑁄. 𑀧𑀼𑀩𑁆𑀩𑁂 𑀔𑁄, 𑀕𑀳𑀧𑀢𑀺, 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀯𑀸𑀘𑀁 𑀪𑀺𑀦𑁆𑀤𑀢𑀺, 𑀢𑀲𑁆𑀫𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀘𑀻𑀲𑀗𑁆𑀔𑀸𑀭𑁄. 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑁂𑀢𑀲𑀺𑀓𑀸. 𑀏𑀢𑁂 𑀥𑀫𑁆𑀫𑀸 𑀘𑀺𑀢𑁆𑀢𑀧𑁆𑀧𑀝𑀺𑀩𑀤𑁆𑀥𑀸, 𑀢𑀲𑁆𑀫𑀸 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺.

𑀲𑀸𑀥𑀼…𑀧𑁂… 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘𑀓𑀣𑀁 𑀧𑀦, 𑀪𑀦𑁆𑀢𑁂, 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀳𑁄𑀢𑀻’’𑀢𑀺? ‘‘𑀦 𑀔𑁄, 𑀕𑀳𑀧𑀢𑀺, 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀲𑁆𑀲’𑀦𑁆𑀢𑀺 𑀯𑀸 ‘𑀅𑀳𑀁 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀸𑀫𑀻’𑀢𑀺 𑀯𑀸 ‘𑀅𑀳𑀁 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄’𑀢𑀺 𑀯𑀸. 𑀅𑀣 𑀔𑁆𑀯𑀲𑁆𑀲 𑀧𑀼𑀩𑁆𑀩𑁂𑀯 𑀢𑀣𑀸 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀺 𑀬𑀁 𑀢𑀁 𑀢𑀣𑀢𑁆𑀢𑀸𑀬 𑀉𑀧𑀦𑁂𑀢𑀻’’𑀢𑀺.

𑀲𑀸𑀥𑀼 …𑀧𑁂… 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀧𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀓𑀢𑀫𑁂 𑀥𑀫𑁆𑀫𑀸 𑀧𑀞𑀫𑀁 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀬𑀤𑀺 𑀯𑀸 𑀓𑀸𑀬𑀲𑀗𑁆𑀔𑀸𑀭𑁄, 𑀬𑀤𑀺 𑀯𑀸 𑀯𑀘𑀻𑀲𑀗𑁆𑀔𑀸𑀭𑁄, 𑀬𑀤𑀺 𑀯𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺? ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀔𑁄, 𑀕𑀳𑀧𑀢𑀺, 𑀪𑀺𑀓𑁆𑀔𑀼𑀦𑁄 𑀯𑀘𑀻𑀲𑀗𑁆𑀔𑀸𑀭𑁄 𑀧𑀞𑀫𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀢𑁄 𑀓𑀸𑀬𑀲𑀗𑁆𑀔𑀸𑀭𑁄, 𑀢𑀢𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺.

𑀲𑀸𑀥𑀼…𑀧𑁂… 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘𑀬𑁆𑀯𑀸𑀬𑀁, 𑀪𑀦𑁆𑀢𑁂, 𑀫𑀢𑁄 𑀓𑀸𑀮𑀗𑁆𑀓𑀢𑁄, 𑀬𑁄 𑀘𑀸𑀬𑀁 𑀪𑀺𑀓𑁆𑀔𑀼 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄, 𑀇𑀫𑁂𑀲𑀁 𑀓𑀺𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺? ‘‘𑀬𑁆𑀯𑀸𑀬𑀁 𑀕𑀳𑀧𑀢𑀺, 𑀫𑀢𑁄 𑀓𑀸𑀮𑀗𑁆𑀓𑀢𑁄 𑀢𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀤𑁆𑀥𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄, 𑀯𑀘𑀻𑀲𑀗𑁆𑀔𑀸𑀭𑁄 𑀦𑀺𑀭𑀼𑀤𑁆𑀥𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄, 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦𑀺𑀭𑀼𑀤𑁆𑀥𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄, 𑀆𑀬𑀼 𑀧𑀭𑀺𑀓𑁆𑀔𑀻𑀡𑁄, 𑀉𑀲𑁆𑀫𑀸 𑀯𑀽𑀧𑀲𑀦𑁆𑀢𑀸, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀧𑀭𑀺𑀪𑀺𑀦𑁆𑀦𑀸𑀦𑀺. 𑀬𑁄 𑀘 𑀔𑁆𑀯𑀸𑀬𑀁, 𑀕𑀳𑀧𑀢𑀺, 𑀪𑀺𑀓𑁆𑀔𑀼 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄, 𑀢𑀲𑁆𑀲𑀧𑀺 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀤𑁆𑀥𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄, 𑀯𑀘𑀻𑀲𑀗𑁆𑀔𑀸𑀭𑁄 𑀦𑀺𑀭𑀼𑀤𑁆𑀥𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄, 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦𑀺𑀭𑀼𑀤𑁆𑀥𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄, 𑀆𑀬𑀼 𑀅𑀧𑀭𑀺𑀓𑁆𑀔𑀻𑀡𑁄, 𑀉𑀲𑁆𑀫𑀸 𑀅𑀯𑀽𑀧𑀲𑀦𑁆𑀢𑀸, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀧𑁆𑀧𑀲𑀦𑁆𑀦𑀸𑀦𑀺. 𑀬𑁆𑀯𑀸𑀬𑀁, 𑀕𑀳𑀧𑀢𑀺, 𑀫𑀢𑁄 𑀓𑀸𑀮𑀗𑁆𑀓𑀢𑁄, 𑀬𑁄 𑀘𑀸𑀬𑀁 𑀪𑀺𑀓𑁆𑀔𑀼 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄, 𑀇𑀤𑀁 𑀦𑁂𑀲𑀁 𑀦𑀸𑀦𑀸𑀓𑀭𑀡’’𑀦𑁆𑀢𑀺.

𑀲𑀸𑀥𑀼…𑀧𑁂… 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘𑀓𑀣𑀁 𑀧𑀦, 𑀪𑀦𑁆𑀢𑁂, 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀁 𑀳𑁄𑀢𑀻’’𑀢𑀺? ‘‘𑀦 𑀔𑁄, 𑀕𑀳𑀧𑀢𑀺, 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀲𑁆𑀲’𑀦𑁆𑀢𑀺 𑀯𑀸 ‘𑀅𑀳𑀁 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀸𑀫𑀻’𑀢𑀺 𑀯𑀸 ‘𑀅𑀳𑀁 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑁄’𑀢𑀺 𑀯𑀸. 𑀅𑀣 𑀔𑁆𑀯𑀲𑁆𑀲 𑀧𑀼𑀩𑁆𑀩𑁂𑀯 𑀢𑀣𑀸 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀺, 𑀬𑀁 𑀢𑀁 𑀢𑀣𑀢𑁆𑀢𑀸𑀬 𑀉𑀧𑀦𑁂𑀢𑀻’’𑀢𑀺.

𑀲𑀸𑀥𑀼, 𑀪𑀦𑁆𑀢𑁂…𑀧𑁂… 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀧𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀓𑀢𑀫𑁂 𑀥𑀫𑁆𑀫𑀸 𑀧𑀞𑀫𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀬𑀤𑀺 𑀯𑀸 𑀓𑀸𑀬𑀲𑀗𑁆𑀔𑀸𑀭𑁄, 𑀬𑀤𑀺 𑀯𑀸 𑀯𑀘𑀻𑀲𑀗𑁆𑀔𑀸𑀭𑁄, 𑀬𑀤𑀺 𑀯𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺? ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲, 𑀕𑀳𑀧𑀢𑀺, 𑀪𑀺𑀓𑁆𑀔𑀼𑀦𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀓𑀸𑀬𑀲𑀗𑁆𑀔𑀸𑀭𑁄, 𑀢𑀢𑁄 𑀯𑀘𑀻𑀲𑀗𑁆𑀔𑀸𑀭𑁄’’𑀢𑀺.

𑀲𑀸𑀥𑀼…𑀧𑁂… 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑀁 𑀧𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀁 𑀓𑀢𑀺 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺’’? ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑀁 𑀔𑁄, 𑀕𑀳𑀧𑀢𑀺, 𑀪𑀺𑀓𑁆𑀔𑀼𑀁 𑀢𑀬𑁄 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺 𑁋 𑀲𑀼𑀜𑁆𑀜𑀢𑁄 𑀨𑀲𑁆𑀲𑁄, 𑀅𑀦𑀺𑀫𑀺𑀢𑁆𑀢𑁄 𑀨𑀲𑁆𑀲𑁄, 𑀅𑀧𑁆𑀧𑀡𑀺𑀳𑀺𑀢𑁄 𑀨𑀲𑁆𑀲𑁄’’𑀢𑀺.

𑀲𑀸𑀥𑀼…𑀧𑁂… 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑀲𑁆𑀲 𑀧𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀓𑀺𑀁𑀦𑀺𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀺𑀁𑀧𑁄𑀡𑀁, 𑀓𑀺𑀁𑀧𑀩𑁆𑀪𑀸𑀭’’𑀦𑁆𑀢𑀺? ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑀲𑁆𑀲 𑀔𑁄, 𑀕𑀳𑀧𑀢𑀺, 𑀪𑀺𑀓𑁆𑀔𑀼𑀦𑁄 𑀯𑀺𑀯𑁂𑀓𑀦𑀺𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺 𑀯𑀺𑀯𑁂𑀓𑀧𑁄𑀡𑀁 𑀯𑀺𑀯𑁂𑀓𑀧𑀩𑁆𑀪𑀸𑀭’’𑀦𑁆𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀢𑁄 𑀓𑀸𑀫𑀪𑀼𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀓𑀸𑀫𑀪𑀼𑀁 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋 ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀧𑀦, 𑀪𑀦𑁆𑀢𑁂, 𑀓𑀢𑀺 𑀥𑀫𑁆𑀫𑀸 𑀩𑀳𑀽𑀧𑀓𑀸𑀭𑀸’’𑀢𑀺? ‘‘𑀅𑀤𑁆𑀥𑀸 𑀔𑁄 𑀢𑁆𑀯𑀁, 𑀕𑀳𑀧𑀢𑀺, 𑀬𑀁 𑀧𑀞𑀫𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑀢𑀁 𑀧𑀼𑀘𑁆𑀙𑀲𑀺. 𑀅𑀧𑀺 𑀘 𑀢𑁆𑀬𑀸𑀳𑀁 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀺. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀔𑁄, 𑀕𑀳𑀧𑀢𑀺, 𑀤𑁆𑀯𑁂 𑀥𑀫𑁆𑀫𑀸 𑀩𑀳𑀽𑀧𑀓𑀸𑀭𑀸 𑁋 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘𑀸’’𑀢𑀺. 𑀙𑀝𑁆𑀞𑀁.

𑁭. 𑀕𑁄𑀤𑀢𑁆𑀢𑀲𑀼𑀢𑁆𑀢𑀁

𑁩𑁪𑁯. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀕𑁄𑀤𑀢𑁆𑀢𑁄 𑀫𑀘𑁆𑀙𑀺𑀓𑀸𑀲𑀡𑁆𑀟𑁂 𑀯𑀺𑀳𑀭𑀢𑀺 𑀅𑀫𑁆𑀩𑀸𑀝𑀓𑀯𑀦𑁂. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦𑀸𑀬𑀲𑁆𑀫𑀸 𑀕𑁄𑀤𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀕𑁄𑀤𑀢𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀆𑀬𑀲𑁆𑀫𑀸 𑀕𑁄𑀤𑀢𑁆𑀢𑁄 𑀏𑀢𑀤𑀯𑁄𑀘 𑁋 ‘‘𑀬𑀸 𑀘𑀸𑀬𑀁, 𑀕𑀳𑀧𑀢𑀺, 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀬𑀸 𑀘 𑀆𑀓𑀺𑀜𑁆𑀘𑀜𑁆𑀜𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀬𑀸 𑀘 𑀲𑀼𑀜𑁆𑀜𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀬𑀸 𑀘 𑀅𑀦𑀺𑀫𑀺𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀉𑀤𑀸𑀳𑀼 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘. 𑀅𑀢𑁆𑀣𑀺 𑀧𑀦, 𑀪𑀦𑁆𑀢𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺.

‘‘𑀓𑀢𑀫𑁄 𑀘, 𑀪𑀦𑁆𑀢𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘? 𑀇𑀥, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁 [𑀘𑀢𑀼𑀢𑁆𑀣𑀺𑀁 (?)]. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 [𑀅𑀩𑁆𑀬𑀸𑀧𑀚𑁆𑀛𑁂𑀦 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀅𑀩𑁆𑀬𑀸𑀩𑀚𑁆𑀛𑁂𑀦 (?)] 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀦𑁆𑀢𑁂, 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

‘‘𑀓𑀢𑀫𑀸 𑀘, 𑀪𑀦𑁆𑀢𑁂, 𑀆𑀓𑀺𑀜𑁆𑀘𑀜𑁆𑀜𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺? 𑀇𑀥, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫, ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀦𑁆𑀢𑁂, 𑀆𑀓𑀺𑀜𑁆𑀘𑀜𑁆𑀜𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

‘‘𑀓𑀢𑀫𑀸 𑀘, 𑀪𑀦𑁆𑀢𑁂, 𑀲𑀼𑀜𑁆𑀜𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺? 𑀇𑀥, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀲𑀼𑀜𑁆𑀜𑀫𑀺𑀤𑀁 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸’𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀦𑁆𑀢𑁂, 𑀲𑀼𑀜𑁆𑀜𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

‘‘𑀓𑀢𑀫𑀸 𑀘, 𑀪𑀦𑁆𑀢𑁂, 𑀅𑀦𑀺𑀫𑀺𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺? 𑀇𑀥, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀦𑁆𑀢𑁂, 𑀅𑀦𑀺𑀫𑀺𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀅𑀬𑀁 𑀔𑁄, 𑀪𑀦𑁆𑀢𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘.

‘‘𑀓𑀢𑀫𑁄 𑀘, 𑀪𑀦𑁆𑀢𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁? 𑀭𑀸𑀕𑁄, 𑀪𑀦𑁆𑀢𑁂, 𑀧𑀫𑀸𑀡𑀓𑀭𑀡𑁄, 𑀤𑁄𑀲𑁄 𑀧𑀫𑀸𑀡𑀓𑀭𑀡𑁄, 𑀫𑁄𑀳𑁄 𑀧𑀫𑀸𑀡𑀓𑀭𑀡𑁄. 𑀢𑁂 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀗𑁆𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀬𑀸𑀯𑀢𑀸 𑀔𑁄, 𑀪𑀦𑁆𑀢𑁂, 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑁄, 𑀅𑀓𑀼𑀧𑁆𑀧𑀸 𑀢𑀸𑀲𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀲𑀸 𑀔𑁄 𑀧𑀦 𑀅𑀓𑀼𑀧𑁆𑀧𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑀼𑀜𑁆𑀜𑀸 𑀭𑀸𑀕𑁂𑀦, 𑀲𑀼𑀜𑁆𑀜𑀸 𑀤𑁄𑀲𑁂𑀦, 𑀲𑀼𑀜𑁆𑀜𑀸 𑀫𑁄𑀳𑁂𑀦. 𑀭𑀸𑀕𑁄 𑀔𑁄, 𑀪𑀦𑁆𑀢𑁂, 𑀓𑀺𑀜𑁆𑀘𑀦𑀁, 𑀤𑁄𑀲𑁄 𑀓𑀺𑀜𑁆𑀘𑀦𑀁, 𑀫𑁄𑀳𑁄 𑀓𑀺𑀜𑁆𑀘𑀦𑀁. 𑀢𑁂 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀗𑁆𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀬𑀸𑀯𑀢𑀸 𑀔𑁄, 𑀪𑀦𑁆𑀢𑁂, 𑀆𑀓𑀺𑀜𑁆𑀘𑀜𑁆𑀜𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑁄, 𑀅𑀓𑀼𑀧𑁆𑀧𑀸 𑀢𑀸𑀲𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀲𑀸 𑀔𑁄 𑀧𑀦 𑀅𑀓𑀼𑀧𑁆𑀧𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑀼𑀜𑁆𑀜𑀸 𑀭𑀸𑀕𑁂𑀦, 𑀲𑀼𑀜𑁆𑀜𑀸 𑀤𑁄𑀲𑁂𑀦, 𑀲𑀼𑀜𑁆𑀜𑀸 𑀫𑁄𑀳𑁂𑀦. 𑀭𑀸𑀕𑁄 𑀔𑁄, 𑀪𑀦𑁆𑀢𑁂, 𑀦𑀺𑀫𑀺𑀢𑁆𑀢𑀓𑀭𑀡𑁄, 𑀤𑁄𑀲𑁄 𑀦𑀺𑀫𑀺𑀢𑁆𑀢𑀓𑀭𑀡𑁄, 𑀫𑁄𑀳𑁄 𑀦𑀺𑀫𑀺𑀢𑁆𑀢𑀓𑀭𑀡𑁄. 𑀢𑁂 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀗𑁆𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀬𑀸𑀯𑀢𑀸 𑀔𑁄, 𑀪𑀦𑁆𑀢𑁂, 𑀅𑀦𑀺𑀫𑀺𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑁄, 𑀅𑀓𑀼𑀧𑁆𑀧𑀸 𑀢𑀸𑀲𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀲𑀸 𑀔𑁄 𑀧𑀦 𑀅𑀓𑀼𑀧𑁆𑀧𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑀼𑀜𑁆𑀜𑀸 𑀭𑀸𑀕𑁂𑀦, 𑀲𑀼𑀜𑁆𑀜𑀸 𑀤𑁄𑀲𑁂𑀦, 𑀲𑀼𑀜𑁆𑀜𑀸 𑀫𑁄𑀳𑁂𑀦. 𑀅𑀬𑀁 𑀔𑁄, 𑀪𑀦𑁆𑀢𑁂, 𑀧𑀭𑀺𑀬𑀸𑀬𑁄 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺. ‘‘𑀮𑀸𑀪𑀸 𑀢𑁂, 𑀕𑀳𑀧𑀢𑀺, 𑀲𑀼𑀮𑀤𑁆𑀥𑀁 𑀢𑁂, 𑀕𑀳𑀧𑀢𑀺! 𑀬𑀲𑁆𑀲 𑀢𑁂 𑀕𑀫𑁆𑀪𑀻𑀭𑁂 𑀩𑀼𑀤𑁆𑀥𑀯𑀘𑀦𑁂 𑀧𑀜𑁆𑀜𑀸𑀘𑀓𑁆𑀔𑀼 𑀓𑀫𑀢𑀻’’𑀢𑀺. 𑀲𑀢𑁆𑀢𑀫𑀁.

𑁮. 𑀦𑀺𑀕𑀡𑁆𑀞𑀦𑀸𑀝𑀧𑀼𑀢𑁆𑀢𑀲𑀼𑀢𑁆𑀢𑀁

𑁩𑁫𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 [𑀦𑀸𑀢𑀧𑀼𑀢𑁆𑀢𑁄 (𑀲𑀻.)] 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀅𑀦𑀼𑀧𑁆𑀧𑀢𑁆𑀢𑁄 𑀳𑁄𑀢𑀺 𑀫𑀳𑀢𑀺𑀬𑀸 𑀦𑀺𑀕𑀡𑁆𑀞𑀧𑀭𑀺𑀲𑀸𑀬 𑀲𑀤𑁆𑀥𑀺𑀁. 𑀅𑀲𑁆𑀲𑁄𑀲𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑁋 ‘‘𑀦𑀺𑀕𑀡𑁆𑀞𑁄 𑀓𑀺𑀭 𑀦𑀸𑀝𑀧𑀼𑀢𑁆𑀢𑁄 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀅𑀦𑀼𑀧𑁆𑀧𑀢𑁆𑀢𑁄 𑀫𑀳𑀢𑀺𑀬𑀸 𑀦𑀺𑀕𑀡𑁆𑀞𑀧𑀭𑀺𑀲𑀸𑀬 𑀲𑀤𑁆𑀥𑀺’’𑀦𑁆𑀢𑀺. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀲𑀫𑁆𑀩𑀳𑀼𑀮𑁂𑀳𑀺 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀕𑀡𑁆𑀞𑁂𑀦 𑀦𑀸𑀝𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋 ‘‘𑀲𑀤𑁆𑀤𑀳𑀲𑀺 𑀢𑁆𑀯𑀁, 𑀕𑀳𑀧𑀢𑀺, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑁋 𑀅𑀢𑁆𑀣𑀺 𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺, 𑀅𑀢𑁆𑀣𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀦𑀺𑀭𑁄𑀥𑁄’’𑀢𑀺?

‘‘𑀦 𑀔𑁆𑀯𑀸𑀳𑀁 𑀏𑀢𑁆𑀣, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀤𑁆𑀥𑀸𑀬 𑀕𑀘𑁆𑀙𑀸𑀫𑀺. 𑀅𑀢𑁆𑀣𑀺 𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺, 𑀅𑀢𑁆𑀣𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀦𑀺𑀭𑁄𑀥𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀉𑀮𑁆𑀮𑁄𑀓𑁂𑀢𑁆𑀯𑀸 [𑀲𑀓𑀁 𑀧𑀭𑀺𑀲𑀁 𑀅𑀧𑀮𑁄𑀓𑁂𑀢𑁆𑀯𑀸 (𑀲𑀻. 𑀲𑁆𑀬𑀸. 𑀓𑀁.), 𑀑𑀮𑁄𑀓𑁂𑀢𑁆𑀯𑀸 (𑀲𑀻. 𑀅𑀝𑁆𑀞. 𑀲𑁆𑀬𑀸. 𑀅𑀝𑁆𑀞.)] 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀪𑀯𑀦𑁆𑀢𑁄 𑀧𑀲𑁆𑀲𑀦𑁆𑀢𑀼, 𑀬𑀸𑀯 𑀉𑀚𑀼𑀓𑁄 𑀘𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀬𑀸𑀯 𑀅𑀲𑀞𑁄 𑀘𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀬𑀸𑀯 𑀅𑀫𑀸𑀬𑀸𑀯𑀻 𑀘𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀯𑀸𑀢𑀁 𑀯𑀸 𑀲𑁄 𑀚𑀸𑀮𑁂𑀦 𑀩𑀸𑀥𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬, 𑀬𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀦𑀺𑀭𑁄𑀥𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬, 𑀲𑀓𑀫𑀼𑀝𑁆𑀞𑀺𑀦𑀸 𑀯𑀸 𑀲𑁄 𑀕𑀗𑁆𑀕𑀸𑀬 𑀲𑁄𑀢𑀁 𑀆𑀯𑀸𑀭𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬, 𑀬𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀦𑀺𑀭𑁄𑀥𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀪𑀦𑁆𑀢𑁂, 𑀓𑀢𑀫𑀁 𑀦𑀼 𑀔𑁄 𑀧𑀡𑀻𑀢𑀢𑀭𑀁 𑁋 𑀜𑀸𑀡𑀁 𑀯𑀸 𑀲𑀤𑁆𑀥𑀸 𑀯𑀸’’𑀢𑀺? ‘‘𑀲𑀤𑁆𑀥𑀸𑀬 𑀔𑁄, 𑀕𑀳𑀧𑀢𑀺, 𑀜𑀸𑀡𑀁𑀬𑁂𑀯 𑀧𑀡𑀻𑀢𑀢𑀭’’𑀦𑁆𑀢𑀺. ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀅𑀳𑀁 𑀔𑁄, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀅𑀳𑀁 𑀔𑁄, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺, 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀅𑀳𑀁 𑀔𑁄, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺, 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀦 𑀲𑁄 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀏𑀯𑀁 𑀚𑀸𑀦𑀦𑁆𑀢𑁄 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀓𑀲𑁆𑀲 𑀅𑀜𑁆𑀜𑀲𑁆𑀲 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀲𑀤𑁆𑀥𑀸𑀬 𑀕𑀫𑀺𑀲𑁆𑀲𑀸𑀫𑀺? 𑀅𑀢𑁆𑀣𑀺 𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺, 𑀅𑀢𑁆𑀣𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀦𑀺𑀭𑁄𑀥𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀲𑀓𑀁 𑀧𑀭𑀺𑀲𑀁 𑀅𑀧𑀮𑁄𑀓𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀪𑀯𑀦𑁆𑀢𑁄 𑀧𑀲𑁆𑀲𑀦𑁆𑀢𑀼, 𑀬𑀸𑀯 𑀅𑀦𑀼𑀚𑀼𑀓𑁄 𑀘𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀬𑀸𑀯 𑀲𑀞𑁄 𑀘𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀬𑀸𑀯 𑀫𑀸𑀬𑀸𑀯𑀻 𑀘𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀻’’𑀢𑀺.

‘‘𑀇𑀤𑀸𑀦𑁂𑀯 𑀔𑁄 𑀢𑁂 [𑀇𑀤𑀸𑀦𑁂𑀯 𑀘 𑀧𑀦 (𑀲𑁆𑀬𑀸. 𑀓𑀁. 𑀓.)] 𑀫𑀬𑀁, 𑀪𑀦𑁆𑀢𑁂, 𑀪𑀸𑀲𑀺𑀢𑀁 𑁋 ‘𑀏𑀯𑀁 𑀆𑀚𑀸𑀦𑀸𑀫 𑀇𑀤𑀁 𑀪𑀯𑀦𑁆𑀢𑁄 𑀧𑀲𑁆𑀲𑀦𑁆𑀢𑀼, 𑀬𑀸𑀯 𑀉𑀚𑀼𑀓𑁄 𑀘𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀬𑀸𑀯 𑀅𑀲𑀞𑁄 𑀘𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀬𑀸𑀯 𑀅𑀫𑀸𑀬𑀸𑀯𑀻 𑀘𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀻’𑀢𑀺. 𑀇𑀤𑀸𑀦𑁂𑀯 𑀘 𑀧𑀦 𑀫𑀬𑀁, 𑀪𑀦𑁆𑀢𑁂, 𑀪𑀸𑀲𑀺𑀢𑀁 𑁋 ‘𑀏𑀯𑀁 𑀆𑀚𑀸𑀦𑀸𑀫 𑀇𑀤𑀁 𑀪𑀯𑀦𑁆𑀢𑁄 𑀧𑀲𑁆𑀲𑀦𑁆𑀢𑀼, 𑀬𑀸𑀯 𑀅𑀦𑀼𑀚𑀼𑀓𑁄 𑀘𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀬𑀸𑀯 𑀲𑀞𑁄 𑀘𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀬𑀸𑀯 𑀫𑀸𑀬𑀸𑀯𑀻 𑀘𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀻’𑀢𑀺. 𑀲𑀘𑁂 𑀢𑁂, 𑀪𑀦𑁆𑀢𑁂, 𑀧𑀼𑀭𑀺𑀫𑀁 𑀲𑀘𑁆𑀘𑀁, 𑀧𑀘𑁆𑀙𑀺𑀫𑀁 𑀢𑁂 𑀫𑀺𑀘𑁆𑀙𑀸. 𑀲𑀘𑁂 𑀧𑀦 𑀢𑁂, 𑀪𑀦𑁆𑀢𑁂, 𑀧𑀼𑀭𑀺𑀫𑀁 𑀫𑀺𑀘𑁆𑀙𑀸, 𑀧𑀘𑁆𑀙𑀺𑀫𑀁 𑀢𑁂 𑀲𑀘𑁆𑀘𑀁. 𑀇𑀫𑁂 𑀔𑁄 𑀧𑀦, 𑀪𑀦𑁆𑀢𑁂, 𑀤𑀲 𑀲𑀳𑀥𑀫𑁆𑀫𑀺𑀓𑀸 𑀧𑀜𑁆𑀳𑀸 𑀆𑀕𑀘𑁆𑀙𑀦𑁆𑀢𑀺. 𑀬𑀤𑀸 𑀦𑁂𑀲𑀁 𑀅𑀢𑁆𑀣𑀁 𑀆𑀚𑀸𑀦𑁂𑀬𑁆𑀬𑀸𑀲𑀺, 𑀅𑀣 𑀫𑀁 𑀧𑀝𑀺𑀳𑀭𑁂𑀬𑁆𑀬𑀸𑀲𑀺 𑀲𑀤𑁆𑀥𑀺𑀁 𑀦𑀺𑀕𑀡𑁆𑀞𑀧𑀭𑀺𑀲𑀸𑀬. 𑀏𑀓𑁄 𑀧𑀜𑁆𑀳𑁄, 𑀏𑀓𑁄 𑀉𑀤𑁆𑀤𑁂𑀲𑁄, 𑀏𑀓𑀁 𑀯𑁂𑀬𑁆𑀬𑀸𑀓𑀭𑀡𑀁. 𑀤𑁆𑀯𑁂 𑀧𑀜𑁆𑀳𑀸, 𑀤𑁆𑀯𑁂 𑀉𑀤𑁆𑀤𑁂𑀲𑀸, 𑀤𑁆𑀯𑁂 𑀯𑁂𑀬𑁆𑀬𑀸𑀓𑀭𑀡𑀸𑀦𑀺. 𑀢𑀬𑁄 𑀧𑀜𑁆𑀳𑀸, 𑀢𑀬𑁄 𑀉𑀤𑁆𑀤𑁂𑀲𑀸, 𑀢𑀻𑀡𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀺. 𑀘𑀢𑁆𑀢𑀸𑀭𑁄 𑀧𑀜𑁆𑀳𑀸, 𑀘𑀢𑁆𑀢𑀸𑀭𑁄 𑀉𑀤𑁆𑀤𑁂𑀲𑀸, 𑀘𑀢𑁆𑀢𑀸𑀭𑀺 𑀯𑁂𑀬𑁆𑀬𑀸𑀓𑀭𑀡𑀸𑀦𑀺. 𑀧𑀜𑁆𑀘 𑀧𑀜𑁆𑀳𑀸, 𑀧𑀜𑁆𑀘 𑀉𑀤𑁆𑀤𑁂𑀲𑀸, 𑀧𑀜𑁆𑀘 𑀯𑁂𑀬𑁆𑀬𑀸𑀓𑀭𑀡𑀸𑀦𑀺. 𑀙 𑀧𑀜𑁆𑀳𑀸, 𑀙 𑀉𑀤𑁆𑀤𑁂𑀲𑀸, 𑀙 𑀯𑁂𑀬𑁆𑀬𑀸𑀓𑀭𑀡𑀸𑀦𑀺. 𑀲𑀢𑁆𑀢 𑀧𑀜𑁆𑀳𑀸, 𑀲𑀢𑁆𑀢 𑀉𑀤𑁆𑀤𑁂𑀲𑀸, 𑀲𑀢𑁆𑀢 𑀯𑁂𑀬𑁆𑀬𑀸𑀓𑀭𑀡𑀸𑀦𑀺. 𑀅𑀝𑁆𑀞 𑀧𑀜𑁆𑀳𑀸, 𑀅𑀝𑁆𑀞 𑀉𑀤𑁆𑀤𑁂𑀲𑀸, 𑀅𑀝𑁆𑀞 𑀯𑁂𑀬𑁆𑀬𑀸𑀓𑀭𑀡𑀸𑀦𑀺. 𑀦𑀯 𑀧𑀜𑁆𑀳𑀸, 𑀦𑀯 𑀉𑀤𑁆𑀤𑁂𑀲𑀸, 𑀦𑀯 𑀯𑁂𑀬𑁆𑀬𑀸𑀓𑀭𑀡𑀸𑀦𑀺. 𑀤𑀲 𑀧𑀜𑁆𑀳𑀸, 𑀤𑀲 𑀉𑀤𑁆𑀤𑁂𑀲𑀸, 𑀤𑀲 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’’𑀢𑀺. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀦𑀺𑀕𑀡𑁆𑀞𑀁 𑀦𑀸𑀝𑀧𑀼𑀢𑁆𑀢𑀁 𑀇𑀫𑁂 𑀤𑀲 𑀲𑀳𑀥𑀫𑁆𑀫𑀺𑀓𑁂 𑀧𑀜𑁆𑀳𑁂 𑀆𑀧𑀼𑀘𑁆𑀙𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀻𑀢𑀺. 𑀅𑀝𑁆𑀞𑀫𑀁.

𑁯. 𑀅𑀘𑁂𑀮𑀓𑀲𑁆𑀲𑀧𑀲𑀼𑀢𑁆𑀢𑀁

𑁩𑁫𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀅𑀦𑀼𑀧𑁆𑀧𑀢𑁆𑀢𑁄 𑀳𑁄𑀢𑀺 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀧𑀼𑀭𑀸𑀡𑀕𑀺𑀳𑀺𑀲𑀳𑀸𑀬𑁄. 𑀅𑀲𑁆𑀲𑁄𑀲𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑁋 ‘‘𑀅𑀘𑁂𑀮𑁄 𑀓𑀺𑀭 𑀓𑀲𑁆𑀲𑀧𑁄 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀅𑀦𑀼𑀧𑁆𑀧𑀢𑁆𑀢𑁄 𑀅𑀫𑁆𑀳𑀸𑀓𑀁 𑀧𑀼𑀭𑀸𑀡𑀕𑀺𑀳𑀺𑀲𑀳𑀸𑀬𑁄’’𑀢𑀺. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀘𑁂𑀮𑁂𑀦 𑀓𑀲𑁆𑀲𑀧𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀅𑀘𑁂𑀮𑀁 𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋 ‘‘𑀓𑀻𑀯𑀘𑀺𑀭𑀁 𑀧𑀩𑁆𑀩𑀚𑀺𑀢𑀲𑁆𑀲, 𑀪𑀦𑁆𑀢𑁂, 𑀓𑀲𑁆𑀲𑀧𑀸’’𑀢𑀺? ‘‘𑀢𑀺𑀁𑀲𑀫𑀢𑁆𑀢𑀸𑀦𑀺 𑀔𑁄 𑀫𑁂, 𑀕𑀳𑀧𑀢𑀺, 𑀯𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀢𑀲𑁆𑀲𑀸’’𑀢𑀺. ‘‘𑀇𑀫𑁂𑀳𑀺 𑀧𑀦 𑀢𑁂, 𑀪𑀦𑁆𑀢𑁂, 𑀢𑀺𑀁𑀲𑀫𑀢𑁆𑀢𑁂𑀳𑀺 𑀯𑀲𑁆𑀲𑁂𑀳𑀺 𑀅𑀢𑁆𑀣𑀺 𑀓𑁄𑀘𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 [𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 (𑀲𑁆𑀬𑀸. 𑀓𑀁.)] 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺? ‘‘𑀇𑀫𑁂𑀳𑀺 𑀔𑁄 𑀫𑁂, 𑀕𑀳𑀧𑀢𑀺, 𑀢𑀺𑀁𑀲𑀫𑀢𑁆𑀢𑁂𑀳𑀺 𑀯𑀲𑁆𑀲𑁂𑀳𑀺 𑀧𑀩𑁆𑀩𑀚𑀺𑀢𑀲𑁆𑀲 𑀦𑀢𑁆𑀣𑀺 𑀓𑁄𑀘𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄, 𑀅𑀜𑁆𑀜𑀢𑁆𑀭 𑀦𑀕𑁆𑀕𑁂𑀬𑁆𑀬𑀸 𑀘 𑀫𑀼𑀡𑁆𑀟𑁂𑀬𑁆𑀬𑀸 𑀘 𑀧𑀸𑀯𑀴𑀦𑀺𑀧𑁆𑀨𑁄𑀝𑀦𑀸𑀬 𑀘𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀅𑀘𑁂𑀮𑀁 𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄! 𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀢𑀸 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑀬𑀢𑁆𑀭 𑀳𑀺 𑀦𑀸𑀫 𑀢𑀺𑀁𑀲𑀫𑀢𑁆𑀢𑁂𑀳𑀺 𑀯𑀲𑁆𑀲𑁂𑀳𑀺 𑀦 𑀓𑁄𑀘𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀅𑀪𑀯𑀺𑀲𑁆𑀲 𑀨𑀸𑀲𑀼𑀯𑀺𑀳𑀸𑀭𑁄, 𑀅𑀜𑁆𑀜𑀢𑁆𑀭 𑀦𑀕𑁆𑀕𑁂𑀬𑁆𑀬𑀸 𑀘 𑀫𑀼𑀡𑁆𑀟𑁂𑀬𑁆𑀬𑀸 𑀘 𑀧𑀸𑀯𑀴𑀦𑀺𑀧𑁆𑀨𑁄𑀝𑀦𑀸𑀬 𑀘𑀸’’𑀢𑀺!

‘‘𑀢𑀼𑀬𑁆𑀳𑀁 𑀧𑀦, 𑀕𑀳𑀧𑀢𑀺, 𑀓𑀻𑀯𑀘𑀺𑀭𑀁 𑀉𑀧𑀸𑀲𑀓𑀢𑁆𑀢𑀁 𑀉𑀧𑀕𑀢𑀲𑁆𑀲𑀸’’𑀢𑀺? ‘‘𑀫𑀬𑁆𑀳𑀫𑁆𑀧𑀺 𑀔𑁄 𑀧𑀦, 𑀪𑀦𑁆𑀢𑁂, 𑀢𑀺𑀁𑀲𑀫𑀢𑁆𑀢𑀸𑀦𑀺 𑀯𑀲𑁆𑀲𑀸𑀦𑀺 𑀉𑀧𑀸𑀲𑀓𑀢𑁆𑀢𑀁 𑀉𑀧𑀕𑀢𑀲𑁆𑀲𑀸’’𑀢𑀺. ‘‘𑀇𑀫𑁂𑀳𑀺 𑀧𑀦 𑀢𑁂, 𑀕𑀳𑀧𑀢𑀺, 𑀢𑀺𑀁𑀲𑀫𑀢𑁆𑀢𑁂𑀳𑀺 𑀯𑀲𑁆𑀲𑁂𑀳𑀺 𑀅𑀢𑁆𑀣𑀺 𑀓𑁄𑀘𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺? ‘‘𑀕𑀺𑀳𑀺𑀦𑁄𑀧𑀺 𑀲𑀺𑀬𑀸, 𑀪𑀦𑁆𑀢𑁂. 𑀅𑀳𑀜𑁆𑀳𑀺, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀅𑀳𑀜𑁆𑀳𑀺, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 …𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀅𑀳𑀜𑁆𑀳𑀺, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺, 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀅𑀳𑀜𑁆𑀳𑀺, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺, 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀲𑀘𑁂 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 [𑀪𑀕𑀯𑀢𑀸 (𑀲𑁆𑀬𑀸. 𑀓𑀁.)] 𑀧𑀞𑀫𑀢𑀭𑀁 𑀓𑀸𑀮𑀁 𑀓𑀭𑁂𑀬𑁆𑀬𑀁, 𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁 𑀬𑀁 𑀫𑀁 𑀪𑀕𑀯𑀸 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬 𑁋 ‘𑀦𑀢𑁆𑀣𑀺 𑀢𑀁 𑀲𑀁𑀬𑁄𑀚𑀦𑀁 𑀬𑁂𑀦 𑀲𑀁𑀬𑁄𑀚𑀦𑁂𑀦 𑀲𑀁𑀬𑀼𑀢𑁆𑀢𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀧𑀼𑀦 𑀇𑀫𑀁 𑀮𑁄𑀓𑀁 𑀆𑀕𑀘𑁆𑀙𑁂𑀬𑁆𑀬𑀸’’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀢𑀸, 𑀬𑀢𑁆𑀭 𑀳𑀺 𑀦𑀸𑀫 𑀕𑀺𑀳𑀻 𑀑𑀤𑀸𑀢𑀯𑀲𑀦𑁄 [𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 (𑀲𑀻. 𑀧𑀻.)] 𑀏𑀯𑀭𑀽𑀧𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀅𑀥𑀺𑀕𑀫𑀺𑀲𑁆𑀲𑀢𑀺 [𑀅𑀥𑀺𑀕𑀫𑀺𑀲𑁆𑀲𑀦𑁆𑀢𑀺 (𑀲𑀻. 𑀧𑀻.)] 𑀨𑀸𑀲𑀼𑀯𑀺𑀳𑀸𑀭𑀁. 𑀮𑀪𑁂𑀬𑁆𑀬𑀸𑀳𑀁, 𑀕𑀳𑀧𑀢𑀺, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺.

𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀅𑀘𑁂𑀮𑀁 𑀓𑀲𑁆𑀲𑀧𑀁 𑀆𑀤𑀸𑀬 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀅𑀫𑁆𑀳𑀸𑀓𑀁 𑀧𑀼𑀭𑀸𑀡𑀕𑀺𑀳𑀺𑀲𑀳𑀸𑀬𑁄. 𑀇𑀫𑀁 𑀣𑁂𑀭𑀸 𑀧𑀩𑁆𑀩𑀸𑀚𑁂𑀦𑁆𑀢𑀼 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀼. 𑀅𑀳𑀫𑀲𑁆𑀲 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺. 𑀅𑀮𑀢𑁆𑀣 𑀔𑁄 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀁. 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄 𑀘 𑀧𑀦𑀸𑀬𑀲𑁆𑀫𑀸 𑀓𑀲𑁆𑀲𑀧𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀓𑀲𑁆𑀲𑀧𑁄 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺. 𑀦𑀯𑀫𑀁.

𑁧𑁦. 𑀕𑀺𑀮𑀸𑀦𑀤𑀲𑁆𑀲𑀦𑀲𑀼𑀢𑁆𑀢𑀁

𑁩𑁫𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀩𑀸𑀥𑀺𑀓𑁄 𑀳𑁄𑀢𑀺 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀆𑀭𑀸𑀫𑀤𑁂𑀯𑀢𑀸 𑀯𑀦𑀤𑁂𑀯𑀢𑀸 𑀭𑀼𑀓𑁆𑀔𑀤𑁂𑀯𑀢𑀸 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀻𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀡𑀺𑀥𑁂𑀳𑀺, 𑀕𑀳𑀧𑀢𑀺, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀭𑀸𑀚𑀸 𑀅𑀲𑁆𑀲𑀁 𑀘𑀓𑁆𑀓𑀯𑀢𑁆𑀢𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀢𑀸 𑀆𑀭𑀸𑀫𑀤𑁂𑀯𑀢𑀸 𑀯𑀦𑀤𑁂𑀯𑀢𑀸 𑀭𑀼𑀓𑁆𑀔𑀤𑁂𑀯𑀢𑀸 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀻𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀏𑀢𑀤𑀯𑁄𑀘 𑁋 ‘‘𑀢𑀫𑁆𑀧𑀺 𑀅𑀦𑀺𑀘𑁆𑀘𑀁, 𑀢𑀫𑁆𑀧𑀺 𑀅𑀤𑁆𑀥𑀼𑀯𑀁, 𑀢𑀫𑁆𑀧𑀺 𑀧𑀳𑀸𑀬 𑀕𑀫𑀦𑀻𑀬’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀢𑀺𑀁, 𑀅𑀬𑁆𑀬𑀧𑀼𑀢𑁆𑀢, 𑀉𑀧𑀝𑁆𑀞𑀧𑁂𑀳𑀺, 𑀫𑀸 𑀯𑀺𑀧𑁆𑀧𑀮𑀧𑀻’’𑀢𑀺. ‘‘𑀓𑀺𑀁 𑀢𑀸𑀳𑀁 𑀯𑀤𑀸𑀫𑀺 𑀬𑀁 𑀫𑀁 𑀢𑀼𑀫𑁆𑀳𑁂 𑀏𑀯𑀁 𑀯𑀤𑁂𑀣 𑁋 ‘𑀲𑀢𑀺𑀁, 𑀅𑀬𑁆𑀬𑀧𑀼𑀢𑁆𑀢, 𑀉𑀧𑀝𑁆𑀞𑀧𑁂𑀳𑀺, 𑀫𑀸 𑀯𑀺𑀧𑁆𑀧𑀮𑀧𑀻’’’𑀢𑀺? ‘‘𑀏𑀯𑀁 𑀔𑁄 𑀢𑁆𑀯𑀁, 𑀅𑀬𑁆𑀬𑀧𑀼𑀢𑁆𑀢, 𑀯𑀤𑁂𑀲𑀺 𑁋 ‘𑀢𑀫𑁆𑀧𑀺 𑀅𑀦𑀺𑀘𑁆𑀘𑀁, 𑀢𑀫𑁆𑀧𑀺 𑀅𑀤𑁆𑀥𑀼𑀯𑀁, 𑀢𑀫𑁆𑀧𑀺 𑀧𑀳𑀸𑀬 𑀕𑀫𑀦𑀻𑀬’’’𑀦𑁆𑀢𑀺. ‘‘𑀢𑀣𑀸 𑀳𑀺 𑀧𑀦 𑀫𑀁 𑀆𑀭𑀸𑀫𑀤𑁂𑀯𑀢𑀸 𑀯𑀦𑀤𑁂𑀯𑀢𑀸 𑀭𑀼𑀓𑁆𑀔𑀤𑁂𑀯𑀢𑀸 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀻𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘𑀧𑀡𑀺𑀥𑁂𑀳𑀺, 𑀕𑀳𑀧𑀢𑀺, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀭𑀸𑀚𑀸 𑀅𑀲𑁆𑀲𑀁 𑀘𑀓𑁆𑀓𑀯𑀢𑁆𑀢𑀻’𑀢𑀺. 𑀢𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀢𑀫𑁆𑀧𑀺 𑀅𑀦𑀺𑀘𑁆𑀘𑀁…𑀧𑁂… 𑀢𑀫𑁆𑀧𑀺 𑀧𑀳𑀸𑀬 𑀕𑀫𑀦𑀻𑀬’’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑀸, 𑀅𑀬𑁆𑀬𑀧𑀼𑀢𑁆𑀢, 𑀆𑀭𑀸𑀫𑀤𑁂𑀯𑀢𑀸 𑀯𑀦𑀤𑁂𑀯𑀢𑀸 𑀭𑀼𑀓𑁆𑀔𑀤𑁂𑀯𑀢𑀸 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀻𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀏𑀯𑀫𑀸𑀳𑀁𑀲𑀼 𑁋 ‘𑀧𑀡𑀺𑀥𑁂𑀳𑀺, 𑀕𑀳𑀧𑀢𑀺, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀭𑀸𑀚𑀸 𑀅𑀲𑁆𑀲𑀁 𑀘𑀓𑁆𑀓𑀯𑀢𑁆𑀢𑀻’’’𑀢𑀺? ‘‘𑀢𑀸𑀲𑀁 𑀔𑁄 𑀆𑀭𑀸𑀫𑀤𑁂𑀯𑀢𑀸𑀦𑀁 𑀯𑀦𑀤𑁂𑀯𑀢𑀸𑀦𑀁 𑀭𑀼𑀓𑁆𑀔𑀤𑁂𑀯𑀢𑀸𑀦𑀁 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀻𑀲𑀼 𑀅𑀥𑀺𑀯𑀢𑁆𑀣𑀸𑀦𑀁 𑀤𑁂𑀯𑀢𑀸𑀦𑀁 𑀏𑀯𑀁 𑀳𑁄𑀢𑀺 𑁋 ‘𑀅𑀬𑀁 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀲𑀻𑀮𑀯𑀸 [𑀲𑀻𑀮𑀯𑀦𑁆𑀢𑁄 (𑀓.)] 𑀓𑀮𑁆𑀬𑀸𑀡𑀥𑀫𑁆𑀫𑁄. 𑀲𑀘𑁂 𑀧𑀡𑀺𑀤𑀳𑀺𑀲𑁆𑀲𑀢𑀺 𑁋 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀭𑀸𑀚𑀸 𑀅𑀲𑁆𑀲𑀁 𑀘𑀓𑁆𑀓𑀯𑀢𑁆𑀢𑀻’𑀢𑀺, ‘𑀢𑀲𑁆𑀲 𑀔𑁄 𑀅𑀬𑀁 𑀇𑀚𑁆𑀛𑀺𑀲𑁆𑀲𑀢𑀺, 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀲𑀼𑀤𑁆𑀥𑀢𑁆𑀢𑀸 𑀥𑀫𑁆𑀫𑀺𑀓𑁄 𑀥𑀫𑁆𑀫𑀺𑀓𑀁 𑀨𑀮𑀁 𑀅𑀦𑀼𑀧𑀲𑁆𑀲𑀢𑀻’𑀢𑀺. 𑀇𑀫𑀁 𑀔𑁄 𑀢𑀸 𑀆𑀭𑀸𑀫𑀤𑁂𑀯𑀢𑀸 𑀯𑀦𑀤𑁂𑀯𑀢𑀸 𑀭𑀼𑀓𑁆𑀔𑀤𑁂𑀯𑀢𑀸 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀻𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀏𑀯𑀫𑀸𑀳𑀁𑀲𑀼 𑁋 ‘𑀧𑀡𑀺𑀥𑁂𑀳𑀺, 𑀕𑀳𑀧𑀢𑀺, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀭𑀸𑀚𑀸 𑀅𑀲𑁆𑀲𑀁 𑀘𑀓𑁆𑀓𑀯𑀢𑁆𑀢𑀻’𑀢𑀺. 𑀢𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀢𑀫𑁆𑀧𑀺 𑀅𑀦𑀺𑀘𑁆𑀘𑀁, 𑀢𑀫𑁆𑀧𑀺 𑀅𑀤𑁆𑀥𑀼𑀯𑀁, 𑀢𑀫𑁆𑀧𑀺 𑀧𑀳𑀸𑀬 𑀕𑀫𑀦𑀻𑀬’’’𑀦𑁆𑀢𑀺.

‘‘𑀢𑁂𑀦 𑀳𑀺, 𑀅𑀬𑁆𑀬𑀧𑀼𑀢𑁆𑀢, 𑀅𑀫𑁆𑀳𑁂𑀧𑀺 𑀑𑀯𑀤𑀸𑀳𑀻’’𑀢𑀺. ‘‘𑀢𑀲𑁆𑀫𑀸 𑀳𑀺 𑀯𑁄 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑁋 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀪𑀯𑀺𑀲𑁆𑀲𑀸𑀫 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀪𑀯𑀺𑀲𑁆𑀲𑀸𑀫 𑁋 ‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’𑀢𑀺. 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀪𑀯𑀺𑀲𑁆𑀲𑀸𑀫 𑁋 ‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’𑀢𑀺. 𑀬𑀁 𑀔𑁄 𑀧𑀦 𑀓𑀺𑀜𑁆𑀘𑀺 𑀓𑀼𑀮𑁂 𑀤𑁂𑀬𑁆𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀁 𑀪𑀯𑀺𑀲𑁆𑀲𑀢𑀺 𑀲𑀻𑀮𑀯𑀦𑁆𑀢𑁂𑀳𑀺 𑀓𑀮𑁆𑀬𑀸𑀡𑀥𑀫𑁆𑀫𑁂𑀳𑀻𑀢𑀺 𑀏𑀯𑀜𑁆𑀳𑀺 𑀯𑁄 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀫𑀺𑀢𑁆𑀢𑀸𑀫𑀘𑁆𑀘𑁂 𑀜𑀸𑀢𑀺𑀲𑀸𑀮𑁄𑀳𑀺𑀢𑁂 𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘 𑀲𑀗𑁆𑀖𑁂 𑀘 𑀘𑀸𑀕𑁂 𑀘 𑀲𑀫𑀸𑀤𑀧𑁂𑀢𑁆𑀯𑀸 𑀓𑀸𑀮𑀫𑀓𑀸𑀲𑀻𑀢𑀺. 𑀤𑀲𑀫𑀁.

𑀘𑀺𑀢𑁆𑀢𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.