𑁪. 𑀓𑀺𑀫𑀢𑁆𑀣𑀺𑀬𑀲𑀼𑀢𑁆𑀢𑀁

𑁩𑁧𑁭. ‘‘𑀓𑀺𑀫𑀢𑁆𑀣𑀺𑀬𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀲𑀫𑀡𑁂 𑀕𑁄𑀢𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺? ‘‘𑀤𑀼𑀓𑁆𑀔𑀲𑁆𑀲 𑀔𑁄, 𑀆𑀯𑀼𑀲𑁄, 𑀧𑀭𑀺𑀜𑁆𑀜𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺. ‘‘𑀅𑀢𑁆𑀣𑀺 𑀧𑀦𑀸𑀯𑀼𑀲𑁄, 𑀫𑀕𑁆𑀕𑁄 𑀅𑀢𑁆𑀣𑀺 𑀧𑀝𑀺𑀧𑀤𑀸 𑀏𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬𑀸’’𑀢𑀺? ‘‘𑀅𑀢𑁆𑀣𑀺 𑀔𑁄, 𑀆𑀯𑀼𑀲𑁄, 𑀫𑀕𑁆𑀕𑁄 𑀅𑀢𑁆𑀣𑀺 𑀧𑀝𑀺𑀧𑀤𑀸, 𑀏𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬𑀸’’𑀢𑀺? ‘‘𑀓𑀢𑀫𑁄 𑀧𑀦𑀸𑀯𑀼𑀲𑁄, 𑀫𑀕𑁆𑀕𑁄 𑀓𑀢𑀫𑀸 𑀧𑀝𑀺𑀧𑀤𑀸, 𑀏𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬𑀸’’𑀢𑀺?

‘‘𑀅𑀬𑀫𑁂𑀯 𑀔𑁄, 𑀆𑀯𑀼𑀲𑁄, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀏𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀔𑁄, 𑀆𑀯𑀼𑀲𑁄, 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸 𑀏𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬𑀸’’𑀢𑀺. ‘‘𑀪𑀤𑁆𑀤𑀓𑁄, 𑀆𑀯𑀼𑀲𑁄, 𑀫𑀕𑁆𑀕𑁄 𑀪𑀤𑁆𑀤𑀺𑀓𑀸 𑀧𑀝𑀺𑀧𑀤𑀸, 𑀏𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬. 𑀅𑀮𑀜𑁆𑀘 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀅𑀧𑁆𑀧𑀫𑀸𑀤𑀸𑀬𑀸’’𑀢𑀺. 𑀘𑀢𑀼𑀢𑁆𑀣𑀁.