𑁧𑁪. 𑀤𑀼𑀓𑁆𑀔𑀧𑀜𑁆𑀳𑀸𑀲𑀼𑀢𑁆𑀢𑀁

𑁩𑁨𑁭. ‘‘‘𑀤𑀼𑀓𑁆𑀔𑀁, 𑀤𑀼𑀓𑁆𑀔’𑀦𑁆𑀢𑀺, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀯𑀼𑀘𑁆𑀘𑀢𑀺. 𑀓𑀢𑀫𑀁 𑀦𑀼 𑀔𑁄, 𑀆𑀯𑀼𑀲𑁄, 𑀤𑀼𑀓𑁆𑀔’’𑀦𑁆𑀢𑀺? ‘‘𑀢𑀺𑀲𑁆𑀲𑁄 𑀇𑀫𑀸, 𑀆𑀯𑀼𑀲𑁄, 𑀤𑀼𑀓𑁆𑀔𑀢𑀸. 𑀤𑀼𑀓𑁆𑀔𑀤𑀼𑀓𑁆𑀔𑀢𑀸, 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸 𑁋 𑀇𑀫𑀸 𑀔𑁄, 𑀆𑀯𑀼𑀲𑁄, 𑀢𑀺𑀲𑁆𑀲𑁄 𑀤𑀼𑀓𑁆𑀔𑀢𑀸’’𑀢𑀺. ‘‘𑀅𑀢𑁆𑀣𑀺 𑀧𑀦𑀸𑀯𑀼𑀲𑁄 𑀫𑀕𑁆𑀕𑁄 𑀅𑀢𑁆𑀣𑀺 𑀧𑀝𑀺𑀧𑀤𑀸, 𑀏𑀢𑀸𑀲𑀁 𑀤𑀼𑀓𑁆𑀔𑀢𑀸𑀦𑀁 𑀧𑀭𑀺𑀜𑁆𑀜𑀸𑀬𑀸’’𑀢𑀺? ‘‘𑀅𑀢𑁆𑀣𑀺 𑀔𑁄, 𑀆𑀯𑀼𑀲𑁄, 𑀫𑀕𑁆𑀕𑁄 𑀅𑀢𑁆𑀣𑀺 𑀧𑀝𑀺𑀧𑀤𑀸, 𑀏𑀢𑀸𑀲𑀁 𑀤𑀼𑀓𑁆𑀔𑀢𑀸𑀦𑀁 𑀧𑀭𑀺𑀜𑁆𑀜𑀸𑀬𑀸’’𑀢𑀺. ‘‘𑀓𑀢𑀫𑁄 𑀧𑀦𑀸𑀯𑀼𑀲𑁄, 𑀫𑀕𑁆𑀕𑁄 𑀓𑀢𑀫𑀸 𑀧𑀝𑀺𑀧𑀤𑀸, 𑀏𑀢𑀸𑀲𑀁 𑀤𑀼𑀓𑁆𑀔𑀢𑀸𑀦𑀁 𑀧𑀭𑀺𑀜𑁆𑀜𑀸𑀬𑀸’’𑀢𑀺? ‘‘𑀅𑀬𑀫𑁂𑀯 𑀔𑁄, 𑀆𑀯𑀼𑀲𑁄, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀏𑀢𑀸𑀲𑀁 𑀤𑀼𑀓𑁆𑀔𑀢𑀸𑀦𑀁 𑀧𑀭𑀺𑀜𑁆𑀜𑀸𑀬, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀔𑁄, 𑀆𑀯𑀼𑀲𑁄, 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸, 𑀏𑀢𑀸𑀲𑀁 𑀤𑀼𑀓𑁆𑀔𑀢𑀸𑀦𑀁 𑀧𑀭𑀺𑀜𑁆𑀜𑀸𑀬𑀸’’𑀢𑀺. ‘‘𑀪𑀤𑁆𑀤𑀓𑁄, 𑀆𑀯𑀼𑀲𑁄, 𑀫𑀕𑁆𑀕𑁄 𑀪𑀤𑁆𑀤𑀺𑀓𑀸 𑀧𑀝𑀺𑀧𑀤𑀸, 𑀏𑀢𑀸𑀲𑀁 𑀤𑀼𑀓𑁆𑀔𑀢𑀸𑀦𑀁 𑀧𑀭𑀺𑀜𑁆𑀜𑀸𑀬. 𑀅𑀮𑀜𑁆𑀘 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀅𑀧𑁆𑀧𑀫𑀸𑀤𑀸𑀬𑀸’’𑀢𑀺. 𑀘𑀼𑀤𑁆𑀤𑀲𑀫𑀁.