𑁧𑁦. 𑀅𑀩𑁆𑀬𑀸𑀓𑀢𑀲𑀁𑀬𑀼𑀢𑁆𑀢𑀁

𑁧. 𑀔𑁂𑀫𑀸𑀲𑀼𑀢𑁆𑀢𑀁

𑁪𑁧𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀔𑁂𑀫𑀸 𑀪𑀺𑀓𑁆𑀔𑀼𑀦𑀻 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀅𑀦𑁆𑀢𑀭𑀸 𑀘 𑀲𑀸𑀯𑀢𑁆𑀣𑀺𑀁 𑀅𑀦𑁆𑀢𑀭𑀸 𑀘 𑀲𑀸𑀓𑁂𑀢𑀁 𑀢𑁄𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀯𑀸𑀲𑀁 𑀉𑀧𑀕𑀢𑀸 𑀳𑁄𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀸𑀓𑁂𑀢𑀸 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑁄, 𑀅𑀦𑁆𑀢𑀭𑀸 𑀘 𑀲𑀸𑀓𑁂𑀢𑀁 𑀅𑀦𑁆𑀢𑀭𑀸 𑀘 𑀲𑀸𑀯𑀢𑁆𑀣𑀺𑀁 𑀢𑁄𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀏𑀓𑀭𑀢𑁆𑀢𑀺𑀯𑀸𑀲𑀁 𑀉𑀧𑀕𑀘𑁆𑀙𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀢𑁄𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀢𑀣𑀸𑀭𑀽𑀧𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀚𑀸𑀦 𑀬𑀫𑀳𑀁 𑀅𑀚𑁆𑀚 𑀧𑀬𑀺𑀭𑀼𑀧𑀸𑀲𑁂𑀬𑁆𑀬’’𑀦𑁆𑀢𑀺.

‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀲𑁄 𑀧𑀼𑀭𑀺𑀲𑁄 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀓𑁂𑀯𑀮𑀓𑀧𑁆𑀧𑀁 𑀢𑁄𑀭𑀡𑀯𑀢𑁆𑀣𑀼𑀁 𑀆𑀳𑀺𑀡𑁆𑀟𑀦𑁆𑀢𑁄 [𑀅𑀦𑁆𑀯𑀸𑀳𑀺𑀡𑁆𑀟𑀦𑁆𑀢𑁄 (𑀲𑀻.)] 𑀦𑀸𑀤𑁆𑀤𑀲 𑀢𑀣𑀸𑀭𑀽𑀧𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀬𑀁 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀧𑀬𑀺𑀭𑀼𑀧𑀸𑀲𑁂𑀬𑁆𑀬. 𑀅𑀤𑁆𑀤𑀲𑀸 𑀔𑁄 𑀲𑁄 𑀧𑀼𑀭𑀺𑀲𑁄 𑀔𑁂𑀫𑀁 𑀪𑀺𑀓𑁆𑀔𑀼𑀦𑀺𑀁 𑀢𑁄𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀯𑀸𑀲𑀁 𑀉𑀧𑀕𑀢𑀁. 𑀤𑀺𑀲𑁆𑀯𑀸𑀦 𑀬𑁂𑀦 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀏𑀢𑀤𑀯𑁄𑀘 𑁋

‘‘𑀦𑀢𑁆𑀣𑀺 𑀔𑁄, 𑀤𑁂𑀯, 𑀢𑁄𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀢𑀣𑀸𑀭𑀽𑀧𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀬𑀁 𑀤𑁂𑀯𑁄 𑀧𑀬𑀺𑀭𑀼𑀧𑀸𑀲𑁂𑀬𑁆𑀬. 𑀅𑀢𑁆𑀣𑀺 𑀘 𑀔𑁄, 𑀤𑁂𑀯, 𑀔𑁂𑀫𑀸 𑀦𑀸𑀫 𑀪𑀺𑀓𑁆𑀔𑀼𑀦𑀻, 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀺𑀓𑀸 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀢𑀲𑁆𑀲𑀸 𑀔𑁄 𑀧𑀦 𑀅𑀬𑁆𑀬𑀸𑀬 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀧𑀡𑁆𑀟𑀺𑀢𑀸, 𑀯𑀺𑀬𑀢𑁆𑀢𑀸 𑀫𑁂𑀥𑀸𑀯𑀺𑀦𑀻 𑀩𑀳𑀼𑀲𑁆𑀲𑀼𑀢𑀸 𑀘𑀺𑀢𑁆𑀢𑀓𑀣𑀸 𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑀸’𑀢𑀺. 𑀢𑀁 𑀤𑁂𑀯𑁄 𑀧𑀬𑀺𑀭𑀼𑀧𑀸𑀲𑀢𑀽’’𑀢𑀺.

𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀬𑁂𑀦 𑀔𑁂𑀫𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀔𑁂𑀫𑀁 𑀪𑀺𑀓𑁆𑀔𑀼𑀦𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀔𑁂𑀫𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀅𑀬𑁆𑀬𑁂, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀧𑀦𑀬𑁆𑀬𑁂, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀅𑀬𑁆𑀬𑁂, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑁋 ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀧𑀦𑀬𑁆𑀬𑁂, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺. ‘‘𑀏𑀢𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺.

‘‘‘𑀓𑀺𑀁 𑀦𑀼 𑀔𑁄, 𑀅𑀬𑁆𑀬𑁂, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺, 𑀇𑀢𑀺 𑀧𑀼𑀝𑁆𑀞𑀸 𑀲𑀫𑀸𑀦𑀸 𑁋 ‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑁋 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀧𑀦𑀬𑁆𑀬𑁂, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀇𑀢𑀺 𑀧𑀼𑀝𑁆𑀞𑀸 𑀲𑀫𑀸𑀦𑀸 𑁋 ‘𑀏𑀢𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀦𑀼 𑀔𑁄, 𑀅𑀬𑁆𑀬𑁂, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀇𑀢𑀺 𑀧𑀼𑀝𑁆𑀞𑀸 𑀲𑀫𑀸𑀦𑀸 𑁋 ‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑁋 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀧𑀦𑀬𑁆𑀬𑁂, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀇𑀢𑀺 𑀧𑀼𑀝𑁆𑀞𑀸 𑀲𑀫𑀸𑀦𑀸 𑁋 ‘𑀏𑀢𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀤𑁂𑀲𑀺. ‘𑀓𑁄 𑀦𑀼 𑀔𑁄, 𑀅𑀬𑁆𑀬𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’’𑀢𑀺?

‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀬𑀣𑀸 𑀢𑁂 𑀔𑀫𑁂𑀬𑁆𑀬 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀢𑁂 𑀓𑁄𑀘𑀺 𑀕𑀡𑀓𑁄 𑀯𑀸 𑀫𑀼𑀤𑁆𑀤𑀺𑀓𑁄 𑀯𑀸 𑀲𑀗𑁆𑀔𑀸𑀬𑀓𑁄 𑀯𑀸 𑀬𑁄 𑀧𑀳𑁄𑀢𑀺 𑀕𑀗𑁆𑀕𑀸𑀬 𑀯𑀸𑀮𑀼𑀓𑀁 [𑀯𑀸𑀮𑀺𑀓𑀁 (𑀲𑀻. 𑀲𑁆𑀬𑀸. 𑀓𑀁.)] 𑀕𑀡𑁂𑀢𑀼𑀁 𑁋 𑀏𑀢𑁆𑀢𑀓𑀸 [𑀏𑀢𑁆𑀢𑀺𑀓𑀸 (𑀲𑀻.)] 𑀯𑀸𑀮𑀼𑀓𑀸 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀸𑀮𑀼𑀓𑀲𑀢𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀸𑀮𑀼𑀓𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀯𑀸𑀮𑀼𑀓𑀲𑀢𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀅𑀬𑁆𑀬𑁂’’. ‘‘𑀅𑀢𑁆𑀣𑀺 𑀧𑀦 𑀢𑁂 𑀓𑁄𑀘𑀺 𑀕𑀡𑀓𑁄 𑀯𑀸 𑀫𑀼𑀤𑁆𑀤𑀺𑀓𑁄 𑀯𑀸 𑀲𑀗𑁆𑀔𑀸𑀬𑀓𑁄 𑀯𑀸 𑀬𑁄 𑀧𑀳𑁄𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀕𑀡𑁂𑀢𑀼𑀁 𑁋 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀢𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸, 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀢𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀅𑀬𑁆𑀬𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀫𑀳𑀸𑀬𑁆𑀬𑁂, 𑀲𑀫𑀼𑀤𑁆𑀤𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑁄’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂𑀦 𑀭𑀽𑀧𑁂 𑀢𑀣𑀸𑀕𑀢𑀁 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀬𑁆𑀬 𑀢𑀁 𑀭𑀽𑀧𑀁 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀁 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀗𑁆𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁. 𑀭𑀽𑀧𑀲𑀗𑁆𑀔𑀸𑀬𑀯𑀺𑀫𑀼𑀢𑁆𑀢𑁄 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀫𑀼𑀤𑁆𑀤𑁄. ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺.

‘‘𑀬𑀸𑀬 𑀯𑁂𑀤𑀦𑀸𑀬 𑀢𑀣𑀸𑀕𑀢𑀁 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀬𑁆𑀬, 𑀲𑀸 𑀯𑁂𑀤𑀦𑀸 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀗𑁆𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀯𑁂𑀤𑀦𑀸𑀲𑀗𑁆𑀔𑀸𑀬𑀯𑀺𑀫𑀼𑀢𑁆𑀢𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀫𑀼𑀤𑁆𑀤𑁄. ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺.

‘‘𑀬𑀸𑀬 𑀲𑀜𑁆𑀜𑀸 𑀢𑀣𑀸𑀕𑀢𑀁…𑀧𑁂… 𑀬𑁂𑀳𑀺 𑀲𑀗𑁆𑀔𑀸𑀭𑁂𑀳𑀺 𑀢𑀣𑀸𑀕𑀢𑀁 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀬𑁆𑀬, 𑀢𑁂 𑀲𑀗𑁆𑀔𑀸𑀭𑀸 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀗𑁆𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀲𑀗𑁆𑀔𑀸𑀭𑀲𑀗𑁆𑀔𑀸𑀬𑀯𑀺𑀫𑀼𑀢𑁆𑀢𑁄 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀫𑀼𑀤𑁆𑀤𑁄. ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺.

‘‘𑀬𑁂𑀦 𑀯𑀺𑀜𑁆𑀜𑀸𑀡𑁂 𑀢𑀣𑀸𑀕𑀢𑀁 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀬𑁆𑀬 𑀢𑀁 𑀯𑀺𑀜𑁆𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀁 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀗𑁆𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁. 𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀬𑀯𑀺𑀫𑀼𑀢𑁆𑀢𑁄 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀫𑀼𑀤𑁆𑀤𑁄. ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀻’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀔𑁂𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀔𑁂𑀫𑀁 𑀪𑀺𑀓𑁆𑀔𑀼𑀦𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀫𑀳𑀸𑀭𑀸𑀚, 𑀫𑀬𑀸 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀅𑀩𑁆𑀬𑀸𑀓𑀢𑀁 𑀫𑀬𑀸 𑁋 ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀫𑀳𑀸𑀭𑀸𑀚, 𑀫𑀬𑀸 𑁋 ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀅𑀩𑁆𑀬𑀸𑀓𑀢𑀁 𑀫𑀬𑀸 𑁋 ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀫𑀳𑀸𑀭𑀸𑀚, 𑀫𑀬𑀸 𑁋 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀤𑁂𑀲𑀺…𑀧𑁂…. ‘‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘‘‘𑀏𑀢𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀅𑀩𑁆𑀬𑀸𑀓𑀢𑀁 𑀫𑀬𑀸 𑁋 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀤𑁂𑀲𑀺. 𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺?

‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀬𑀣𑀸 𑀢𑁂 𑀔𑀫𑁂𑀬𑁆𑀬 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀢𑁂 𑀓𑁄𑀘𑀺 𑀕𑀡𑀓𑁄 𑀯𑀸 𑀫𑀼𑀤𑁆𑀤𑀺𑀓𑁄 𑀯𑀸 𑀲𑀗𑁆𑀔𑀸𑀬𑀓𑁄 𑀯𑀸 𑀬𑁄 𑀧𑀳𑁄𑀢𑀺 𑀕𑀗𑁆𑀕𑀸𑀬 𑀯𑀸𑀮𑀼𑀓𑀁 𑀕𑀡𑁂𑀢𑀼𑀁 𑁋 𑀏𑀢𑁆𑀢𑀓𑀸 𑀯𑀸𑀮𑀼𑀓𑀸 𑀇𑀢𑀺 𑀯𑀸…𑀧𑁂… 𑀏𑀢𑁆𑀢𑀓𑀸𑀦𑀺 𑀯𑀸𑀮𑀼𑀓𑀲𑀢𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀅𑀢𑁆𑀣𑀺 𑀧𑀦 𑀢𑁂 𑀓𑁄𑀘𑀺 𑀕𑀡𑀓𑁄 𑀯𑀸 𑀫𑀼𑀤𑁆𑀤𑀺𑀓𑁄 𑀯𑀸 𑀲𑀗𑁆𑀔𑀸𑀬𑀓𑁄 𑀯𑀸 𑀬𑁄 𑀧𑀳𑁄𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀕𑀡𑁂𑀢𑀼𑀁 𑁋 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀸𑀦𑀺 𑀇𑀢𑀺 𑀯𑀸…𑀧𑁂… 𑀏𑀢𑁆𑀢𑀓𑀸𑀦𑀺 𑀉𑀤𑀓𑀸𑀴𑁆𑀳𑀓𑀲𑀢𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀫𑀳𑀸, 𑀪𑀦𑁆𑀢𑁂, 𑀲𑀫𑀼𑀤𑁆𑀤𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑁄. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂𑀦 𑀭𑀽𑀧𑁂𑀦 𑀢𑀣𑀸𑀕𑀢𑀁 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀬𑁆𑀬, 𑀢𑀁 𑀭𑀽𑀧𑀁 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀁 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀗𑁆𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁. 𑀭𑀽𑀧𑀲𑀗𑁆𑀔𑀸𑀬𑀯𑀺𑀫𑀼𑀢𑁆𑀢𑁄 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀫𑀼𑀤𑁆𑀤𑁄. ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺. 𑀬𑀸𑀬 𑀯𑁂𑀤𑀦𑀸𑀬…𑀧𑁂… 𑀬𑀸𑀬 𑀲𑀜𑁆𑀜𑀸𑀬…𑀧𑁂… 𑀬𑁂𑀳𑀺 𑀲𑀗𑁆𑀔𑀸𑀭𑁂𑀳𑀺…𑀧𑁂…’’.

‘‘𑀬𑁂𑀦 𑀯𑀺𑀜𑁆𑀜𑀸𑀡𑁂𑀦 𑀢𑀣𑀸𑀕𑀢𑀁 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀬𑁆𑀬, 𑀢𑀁 𑀯𑀺𑀜𑁆𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀁 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀗𑁆𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁. 𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀬𑀯𑀺𑀫𑀼𑀢𑁆𑀢𑁄 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀫𑀼𑀤𑁆𑀤𑁄. ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀺, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺 𑀦 𑀉𑀧𑁂𑀢𑀻’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀢𑁆𑀭 𑀳𑀺 𑀦𑀸𑀫 𑀲𑀢𑁆𑀣𑀼 𑀘𑁂𑀯 [𑀲𑀢𑁆𑀣𑀼𑀦𑁄 𑀘𑁂𑀯 (𑀲𑀻.)] 𑀲𑀸𑀯𑀺𑀓𑀸𑀬 𑀘 𑀅𑀢𑁆𑀣𑁂𑀦 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀁 𑀲𑀁𑀲𑀦𑁆𑀤𑀺𑀲𑁆𑀲𑀢𑀺, 𑀲𑀫𑁂𑀲𑁆𑀲𑀢𑀺, 𑀦 𑀯𑀺𑀭𑁄𑀥𑀬𑀺𑀲𑁆𑀲𑀢𑀺 [𑀯𑀺𑀳𑀸𑀬𑀺𑀲𑁆𑀲𑀢𑀺 (𑀲𑀻. 𑀲𑁆𑀬𑀸. 𑀓𑀁.), 𑀯𑀺𑀕𑀸𑀬𑀺𑀲𑁆𑀲𑀢𑀺 (𑀓.)] 𑀬𑀤𑀺𑀤𑀁 𑀅𑀕𑁆𑀕𑀧𑀤𑀲𑁆𑀫𑀺𑀁. 𑀏𑀓𑀫𑀺𑀤𑀸𑀳𑀁, 𑀪𑀦𑁆𑀢𑁂, 𑀲𑀫𑀬𑀁 𑀔𑁂𑀫𑀁 𑀪𑀺𑀓𑁆𑀔𑀼𑀦𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀅𑀧𑀼𑀘𑁆𑀙𑀺𑀁. 𑀲𑀸𑀧𑀺 𑀫𑁂 𑀅𑀬𑁆𑀬𑀸 𑀏𑀢𑁂𑀳𑀺 𑀧𑀤𑁂𑀳𑀺 𑀏𑀢𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀸𑀲𑀺, 𑀲𑁂𑀬𑁆𑀬𑀣𑀸𑀧𑀺 𑀪𑀕𑀯𑀸. 𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀢𑁆𑀭 𑀳𑀺 𑀦𑀸𑀫 𑀲𑀢𑁆𑀣𑀼 𑀘𑁂𑀯 𑀲𑀸𑀯𑀺𑀓𑀸𑀬 𑀘 𑀅𑀢𑁆𑀣𑁂𑀦 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀁 𑀲𑀁𑀲𑀦𑁆𑀤𑀺𑀲𑁆𑀲𑀢𑀺, 𑀲𑀫𑁂𑀲𑁆𑀲𑀢𑀺, 𑀦 𑀯𑀺𑀭𑁄𑀥𑀬𑀺𑀲𑁆𑀲𑀢𑀺 𑀬𑀤𑀺𑀤𑀁 𑀅𑀕𑁆𑀕𑀧𑀤𑀲𑁆𑀫𑀺𑀁. 𑀳𑀦𑁆𑀤 𑀤𑀸𑀦𑀺 𑀫𑀬𑀁, 𑀪𑀦𑁆𑀢𑁂, 𑀕𑀘𑁆𑀙𑀸𑀫. 𑀩𑀳𑀼𑀓𑀺𑀘𑁆𑀘𑀸 𑀫𑀬𑀁 𑀩𑀳𑀼𑀓𑀭𑀡𑀻𑀬𑀸’’𑀢𑀺. ‘‘𑀬𑀲𑁆𑀲 𑀤𑀸𑀦𑀺 𑀢𑁆𑀯𑀁, 𑀫𑀳𑀸𑀭𑀸𑀚, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺. 𑀧𑀞𑀫𑀁.

𑁨. 𑀅𑀦𑀼𑀭𑀸𑀥𑀲𑀼𑀢𑁆𑀢𑀁

𑁪𑁧𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀅𑀦𑀼𑀭𑀸𑀥𑁄 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀁 𑀯𑀺𑀳𑀭𑀢𑀺. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀬𑁂𑀦𑀸𑀬𑀲𑁆𑀫𑀸 𑀅𑀦𑀼𑀭𑀸𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀅𑀦𑀼𑀭𑀸𑀥𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀸𑀥𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑁄 𑀲𑁄, 𑀆𑀯𑀼𑀲𑁄 𑀅𑀦𑀼𑀭𑀸𑀥, 𑀢𑀣𑀸𑀕𑀢𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑀢𑁆𑀢𑁄, 𑀢𑀁 𑀢𑀣𑀸𑀕𑀢𑁄 𑀇𑀫𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀢𑀺 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸’’𑀢𑀺? ‘‘𑀬𑁄 𑀲𑁄, 𑀆𑀯𑀼𑀲𑁄, 𑀢𑀣𑀸𑀕𑀢𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑀢𑁆𑀢𑁄, 𑀢𑀁 𑀢𑀣𑀸𑀕𑀢𑁄 𑀅𑀜𑁆𑀜𑀢𑁆𑀭 𑀇𑀫𑁂𑀳𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀢𑀺 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀸𑀥𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑁄 𑀘𑀸𑀬𑀁 [𑀬𑁄 𑀘𑀸𑀬𑀁 (𑀲𑀻.)] 𑀪𑀺𑀓𑁆𑀔𑀼 𑀦𑀯𑁄 𑀪𑀯𑀺𑀲𑁆𑀲𑀢𑀺 𑀅𑀘𑀺𑀭𑀧𑀩𑁆𑀩𑀚𑀺𑀢𑁄, 𑀣𑁂𑀭𑁄 𑀯𑀸 𑀧𑀦 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄’’𑀢𑀺. 𑀅𑀣 𑀔𑁄 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀸𑀥𑀁 𑀦𑀯𑀯𑀸𑀤𑁂𑀦 𑀘 𑀩𑀸𑀮𑀯𑀸𑀤𑁂𑀦 𑀘 𑀅𑀧𑀲𑀸𑀤𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁𑀲𑀼.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀅𑀦𑀼𑀭𑀸𑀥𑀲𑁆𑀲 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀲𑀼 𑀧𑀭𑀺𑀩𑁆𑀩𑀸𑀚𑀓𑁂𑀲𑀼 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀔𑁄 𑀫𑀁 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀉𑀢𑁆𑀢𑀭𑀺𑀁 𑀧𑀼𑀘𑁆𑀙𑁂𑀬𑁆𑀬𑀼𑀁, 𑀓𑀣𑀁 𑀩𑁆𑀬𑀸𑀓𑀭𑀫𑀸𑀦𑁄 𑀦𑀼 𑀔𑁆𑀯𑀸𑀳𑀁 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀯𑀼𑀢𑁆𑀢𑀯𑀸𑀤𑀻 𑀘𑁂𑀯 𑀪𑀕𑀯𑀢𑁄 𑀅𑀲𑁆𑀲𑀁, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬𑀁, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀸𑀥𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀸𑀥𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀁 𑀯𑀺𑀳𑀭𑀸𑀫𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀬𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄, 𑀪𑀦𑁆𑀢𑁂, 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑁄 𑀲𑁄, 𑀆𑀯𑀼𑀲𑁄 𑀅𑀦𑀼𑀭𑀸𑀥, 𑀢𑀣𑀸𑀕𑀢𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑀢𑁆𑀢𑁄, 𑀢𑀁 𑀢𑀣𑀸𑀕𑀢𑁄 𑀇𑀫𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀢𑀺 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸’’𑀢𑀺? 𑀏𑀯𑀁 𑀯𑀼𑀢𑁆𑀢𑀸𑀳𑀁, 𑀪𑀦𑁆𑀢𑁂, 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑁂 𑀧𑀭𑀺𑀩𑁆𑀩𑀸𑀚𑀓𑁂 𑀏𑀢𑀤𑀯𑁄𑀘𑀁 𑁋 ‘‘𑀬𑁄 𑀲𑁄, 𑀆𑀯𑀼𑀲𑁄, 𑀢𑀣𑀸𑀕𑀢𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑀢𑁆𑀢𑁄, 𑀢𑀁 𑀢𑀣𑀸𑀕𑀢𑁄 𑀅𑀜𑁆𑀜𑀢𑁆𑀭 𑀇𑀫𑁂𑀳𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀢𑀺 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑁄 𑀘𑀸𑀬𑀁 𑀪𑀺𑀓𑁆𑀔𑀼 𑀦𑀯𑁄 𑀪𑀯𑀺𑀲𑁆𑀲𑀢𑀺 𑀅𑀘𑀺𑀭𑀧𑀩𑁆𑀩𑀚𑀺𑀢𑁄 𑀣𑁂𑀭𑁄 𑀯𑀸 𑀧𑀦 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄’’𑀢𑀺. 𑀅𑀣 𑀔𑁄 𑀫𑀁, 𑀪𑀦𑁆𑀢𑁂, 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀦𑀯𑀯𑀸𑀤𑁂𑀦 𑀘 𑀩𑀸𑀮𑀯𑀸𑀤𑁂𑀦 𑀘 𑀅𑀧𑀲𑀸𑀤𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁𑀲𑀼. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀢𑁂𑀲𑀼 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀲𑀼 𑀧𑀭𑀺𑀩𑁆𑀩𑀸𑀚𑀓𑁂𑀲𑀼 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀔𑁄 𑀫𑀁 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀉𑀢𑁆𑀢𑀭𑀺𑀁 𑀧𑀼𑀘𑁆𑀙𑁂𑀬𑁆𑀬𑀼𑀁, 𑀓𑀣𑀁 𑀩𑁆𑀬𑀸𑀓𑀭𑀫𑀸𑀦𑁄 𑀦𑀼 𑀔𑁆𑀯𑀸𑀳𑀁 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀯𑀼𑀢𑁆𑀢𑀯𑀸𑀤𑀻 𑀘𑁂𑀯 𑀪𑀕𑀯𑀢𑁄 𑀅𑀲𑁆𑀲𑀁, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬𑀁, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺?

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀦𑀼𑀭𑀸𑀥, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺?

‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺?

‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺?

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀯𑁂𑀤𑀦𑀸 𑀦𑀺𑀘𑁆𑀘𑀸 𑀯𑀸 𑀅𑀦𑀺𑀘𑁆𑀘𑀸 𑀯𑀸’’𑀢𑀺?…𑀧𑁂… 𑀲𑀜𑁆𑀜𑀸 …𑀧𑁂… 𑀲𑀗𑁆𑀔𑀸𑀭𑀸…𑀧𑁂… ‘‘𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺?

‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’.

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺?

‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’.

‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀢𑀲𑁆𑀫𑀸𑀢𑀺𑀳, 𑀅𑀦𑀼𑀭𑀸𑀥, 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀬𑀸 𑀓𑀸𑀘𑀺 𑀯𑁂𑀤𑀦𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸…𑀧𑁂… 𑀬𑀸 𑀓𑀸𑀘𑀺 𑀲𑀜𑁆𑀜𑀸…𑀧𑁂… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸…𑀧𑁂… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀧𑀲𑁆𑀲𑀁, 𑀅𑀦𑀼𑀭𑀸𑀥, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀜𑁆𑀜𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀗𑁆𑀔𑀸𑀭𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑀺𑀜𑁆𑀜𑀸𑀡𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺; 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺; 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀦𑀼𑀭𑀸𑀥, 𑀭𑀽𑀧𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑁂𑀤𑀦𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀜𑁆𑀜𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀗𑁆𑀔𑀸𑀭𑁂 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑀺𑀜𑁆𑀜𑀸𑀡𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀦𑀼𑀭𑀸𑀥, 𑀭𑀽𑀧𑀲𑁆𑀫𑀺𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀅𑀜𑁆𑀜𑀢𑁆𑀭 𑀭𑀽𑀧𑀸 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑁂𑀤𑀦𑀸𑀬…𑀧𑁂… 𑀅𑀜𑁆𑀜𑀢𑁆𑀭 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬…𑀧𑁂… 𑀅𑀜𑁆𑀜𑀢𑁆𑀭 𑀲𑀜𑁆𑀜𑀸𑀬…𑀧𑁂… 𑀲𑀗𑁆𑀔𑀸𑀭𑁂𑀲𑀼…𑀧𑁂… 𑀅𑀜𑁆𑀜𑀢𑁆𑀭 𑀲𑀗𑁆𑀔𑀸𑀭𑁂𑀳𑀺…𑀧𑁂… 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀅𑀜𑁆𑀜𑀢𑁆𑀭 𑀯𑀺𑀜𑁆𑀜𑀸𑀡𑀸 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀦𑀼𑀭𑀸𑀥, 𑀭𑀽𑀧𑀁, 𑀯𑁂𑀤𑀦𑀁, 𑀲𑀜𑁆𑀜𑀁, 𑀲𑀗𑁆𑀔𑀸𑀭𑁂, 𑀯𑀺𑀜𑁆𑀜𑀸𑀡𑀁 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀦𑀼𑀭𑀸𑀥, 𑀅𑀬𑀁 𑀲𑁄 𑀅𑀭𑀽𑀧𑀻 𑀅𑀯𑁂𑀤𑀦𑁄 𑀅𑀲𑀜𑁆𑀜𑀻 𑀅𑀲𑀗𑁆𑀔𑀸𑀭𑁄 𑀅𑀯𑀺𑀜𑁆𑀜𑀸𑀡𑁄 𑀢𑀣𑀸𑀕𑀢𑁄𑀢𑀺 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀏𑀢𑁆𑀣 𑀘 𑀢𑁂, 𑀅𑀦𑀼𑀭𑀸𑀥, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀢𑀣𑀸𑀕𑀢𑁂 𑀅𑀦𑀼𑀧𑀮𑀩𑁆𑀪𑀺𑀬𑀫𑀸𑀦𑁂 [𑀢𑀣𑀸𑀕𑀢𑁄 𑀅𑀦𑀼𑀧𑀮𑀩𑁆𑀪𑀺𑀬𑀫𑀸𑀦𑁄 (𑀲𑁆𑀬𑀸. 𑀓.), 𑀢𑀣𑀸𑀕𑀢𑁂 𑀅𑀦𑀼𑀧𑀮𑀩𑁆𑀪𑀫𑀸𑀦𑁂 (?)] 𑀓𑀮𑁆𑀮𑀁 𑀦𑀼 𑀢𑁂 𑀢𑀁 𑀯𑁂𑀬𑁆𑀬𑀸𑀓𑀭𑀡𑀁 [𑀯𑁂𑀬𑁆𑀬𑀸𑀓𑀭𑀡𑀸𑀬 (𑀲𑀻.)] 𑁋 𑀬𑁄 𑀲𑁄, 𑀆𑀯𑀼𑀲𑁄, 𑀢𑀣𑀸𑀕𑀢𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑀢𑁆𑀢𑁄, 𑀢𑀁 𑀢𑀣𑀸𑀕𑀢𑁄 𑀅𑀜𑁆𑀜𑀢𑁆𑀭 𑀇𑀫𑁂𑀳𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀢𑀺 𑁋 ‘‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼 𑀲𑀸𑀥𑀼, 𑀅𑀦𑀼𑀭𑀸𑀥! 𑀧𑀼𑀩𑁆𑀩𑁂 𑀘𑀸𑀳𑀁, 𑀅𑀦𑀼𑀭𑀸𑀥, 𑀏𑀢𑀭𑀳𑀺 𑀘 𑀤𑀼𑀓𑁆𑀔𑀜𑁆𑀘𑁂𑀯 𑀧𑀜𑁆𑀜𑀸𑀧𑁂𑀫𑀺 𑀤𑀼𑀓𑁆𑀔𑀲𑁆𑀲 𑀘 𑀦𑀺𑀭𑁄𑀥’’𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀧𑀞𑀫𑀲𑀸𑀭𑀺𑀧𑀼𑀢𑁆𑀢𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀁

𑁪𑁧𑁨. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄, 𑀆𑀬𑀲𑁆𑀫𑀸 𑀘 𑀫𑀳𑀸𑀓𑁄𑀝𑁆𑀞𑀺𑀓𑁄 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀦𑁆𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑁋 ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺.

‘‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄, ‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑁋 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀤𑁂𑀲𑀺…𑀧𑁂… ‘𑀓𑀺𑀁 𑀧𑀦𑀸𑀯𑀼𑀲𑁄, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀏𑀢𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀤𑁂𑀲𑀺. 𑀓𑁄 𑀦𑀼 𑀔𑁄, 𑀆𑀯𑀼𑀲𑁄, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺?

‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀔𑁄, 𑀆𑀯𑀼𑀲𑁄, 𑀭𑀽𑀧𑀕𑀢𑀫𑁂𑀢𑀁. 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀭𑀽𑀧𑀕𑀢𑀫𑁂𑀢𑀁. 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀭𑀽𑀧𑀕𑀢𑀫𑁂𑀢𑀁. 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀭𑀽𑀧𑀕𑀢𑀫𑁂𑀢𑀁. 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀔𑁄, 𑀆𑀯𑀼𑀲𑁄, 𑀯𑁂𑀤𑀦𑀸𑀕𑀢𑀫𑁂𑀢𑀁. 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀯𑁂𑀤𑀦𑀸𑀕𑀢𑀫𑁂𑀢𑀁. 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀯𑁂𑀤𑀦𑀸𑀕𑀢𑀫𑁂𑀢𑀁. 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀯𑁂𑀤𑀦𑀸𑀕𑀢𑀫𑁂𑀢𑀁. 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀔𑁄, 𑀆𑀯𑀼𑀲𑁄, 𑀲𑀜𑁆𑀜𑀸𑀕𑀢𑀫𑁂𑀢𑀁. 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀲𑀜𑁆𑀜𑀸𑀕𑀢𑀫𑁂𑀢𑀁. 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀲𑀜𑁆𑀜𑀸𑀕𑀢𑀫𑁂𑀢𑀁. 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀲𑀜𑁆𑀜𑀸𑀕𑀢𑀫𑁂𑀢𑀁. 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀔𑁄, 𑀆𑀯𑀼𑀲𑁄, 𑀲𑀗𑁆𑀔𑀸𑀭𑀕𑀢𑀫𑁂𑀢𑀁. 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀲𑀗𑁆𑀔𑀸𑀭𑀕𑀢𑀫𑁂𑀢𑀁. 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀲𑀗𑁆𑀔𑀸𑀭𑀕𑀢𑀫𑁂𑀢𑀁. 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀲𑀗𑁆𑀔𑀸𑀭𑀕𑀢𑀫𑁂𑀢𑀁. 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀔𑁄, 𑀆𑀯𑀼𑀲𑁄, 𑀯𑀺𑀜𑁆𑀜𑀸𑀡𑀕𑀢𑀫𑁂𑀢𑀁. 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀯𑀺𑀜𑁆𑀜𑀸𑀡𑀕𑀢𑀫𑁂𑀢𑀁. 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀯𑀺𑀜𑁆𑀜𑀸𑀡𑀕𑀢𑀫𑁂𑀢𑀁. 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺, 𑀯𑀺𑀜𑁆𑀜𑀸𑀡𑀕𑀢𑀫𑁂𑀢𑀁. 𑀅𑀬𑀁 𑀔𑁄, 𑀆𑀯𑀼𑀲𑁄, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀲𑀸𑀭𑀺𑀧𑀼𑀢𑁆𑀢𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀁

𑁪𑁧𑁩. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄, 𑀆𑀬𑀲𑁆𑀫𑀸 𑀘 𑀫𑀳𑀸𑀓𑁄𑀝𑁆𑀞𑀺𑀓𑁄 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀦𑁆𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂…𑀧𑁂… (𑀲𑀸𑀬𑁂𑀯 𑀧𑀼𑀘𑁆𑀙𑀸) ‘‘𑀓𑁄 𑀦𑀼 𑀔𑁄, 𑀆𑀯𑀼𑀲𑁄, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺? ‘‘𑀭𑀽𑀧𑀁 𑀔𑁄, 𑀆𑀯𑀼𑀲𑁄, 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, 𑀭𑀽𑀧𑀲𑀫𑀼𑀤𑀬𑀁 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, 𑀭𑀽𑀧𑀦𑀺𑀭𑁄𑀥𑀁 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺; ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺; ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺; ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺. 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑀁 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀁 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺; ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺; ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺; ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺𑀧𑀺𑀲𑁆𑀲 𑀳𑁄𑀢𑀺.

‘‘𑀭𑀽𑀧𑀜𑁆𑀘 𑀔𑁄, 𑀆𑀯𑀼𑀲𑁄, 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, 𑀭𑀽𑀧𑀲𑀫𑀼𑀤𑀬𑀁 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, 𑀭𑀽𑀧𑀦𑀺𑀭𑁄𑀥𑀁 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺. 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂…𑀧𑁂… 𑀯𑀺𑀜𑁆𑀜𑀸𑀡𑀁 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑀁 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀁 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺; ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺; ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺; ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺. 𑀅𑀬𑀁 𑀔𑁄, 𑀆𑀯𑀼𑀲𑁄, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀢𑀢𑀺𑀬𑀲𑀸𑀭𑀺𑀧𑀼𑀢𑁆𑀢𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀁

𑁪𑁧𑁪. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄, 𑀆𑀬𑀲𑁆𑀫𑀸 𑀘 𑀫𑀳𑀸𑀓𑁄𑀝𑁆𑀞𑀺𑀓𑁄 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀦𑁆𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂…𑀧𑁂… (𑀲𑀸𑀬𑁂𑀯 𑀧𑀼𑀘𑁆𑀙𑀸) ‘‘𑀓𑁄 𑀦𑀼 𑀔𑁄, 𑀆𑀯𑀼𑀲𑁄, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺? ‘‘𑀭𑀽𑀧𑁂 𑀔𑁄, 𑀆𑀯𑀼𑀲𑁄, 𑀅𑀯𑀺𑀕𑀢𑀭𑀸𑀕𑀲𑁆𑀲 𑀅𑀯𑀺𑀕𑀢𑀘𑁆𑀙𑀦𑁆𑀤𑀲𑁆𑀲 𑀅𑀯𑀺𑀕𑀢𑀧𑁂𑀫𑀲𑁆𑀲 𑀅𑀯𑀺𑀕𑀢𑀧𑀺𑀧𑀸𑀲𑀲𑁆𑀲 𑀅𑀯𑀺𑀕𑀢𑀧𑀭𑀺𑀴𑀸𑀳𑀲𑁆𑀲 𑀅𑀯𑀺𑀕𑀢𑀢𑀡𑁆𑀳𑀲𑁆𑀲 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺. 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬…𑀧𑁂… 𑀲𑀗𑁆𑀔𑀸𑀭𑁂𑀲𑀼…𑀧𑁂… 𑀯𑀺𑀜𑁆𑀜𑀸𑀡𑁂 𑀅𑀯𑀺𑀕𑀢𑀭𑀸𑀕𑀲𑁆𑀲 𑀅𑀯𑀺𑀕𑀢𑀘𑁆𑀙𑀦𑁆𑀤𑀲𑁆𑀲 𑀅𑀯𑀺𑀕𑀢𑀧𑁂𑀫𑀲𑁆𑀲 𑀅𑀯𑀺𑀕𑀢𑀧𑀺𑀧𑀸𑀲𑀲𑁆𑀲 𑀅𑀯𑀺𑀕𑀢𑀧𑀭𑀺𑀴𑀸𑀳𑀲𑁆𑀲 𑀅𑀯𑀺𑀕𑀢𑀢𑀡𑁆𑀳𑀲𑁆𑀲 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺. 𑀭𑀽𑀧𑁂 𑀘 𑀔𑁄, 𑀆𑀯𑀼𑀲𑁄, 𑀯𑀺𑀕𑀢𑀭𑀸𑀕𑀲𑁆𑀲…𑀧𑁂… 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬…𑀧𑁂… 𑀲𑀗𑁆𑀔𑀸𑀭𑁂𑀲𑀼…𑀧𑁂… 𑀯𑀺𑀜𑁆𑀜𑀸𑀡𑁂 𑀯𑀺𑀕𑀢𑀭𑀸𑀕𑀲𑁆𑀲 𑀯𑀺𑀕𑀢𑀘𑁆𑀙𑀦𑁆𑀤𑀲𑁆𑀲 𑀯𑀺𑀕𑀢𑀧𑁂𑀫𑀲𑁆𑀲 𑀯𑀺𑀕𑀢𑀧𑀺𑀧𑀸𑀲𑀲𑁆𑀲 𑀯𑀺𑀕𑀢𑀧𑀭𑀺𑀴𑀸𑀳𑀲𑁆𑀲 𑀯𑀺𑀕𑀢𑀢𑀡𑁆𑀳𑀲𑁆𑀲 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺. 𑀅𑀬𑀁 𑀔𑁄, 𑀆𑀯𑀼𑀲𑁄, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀘𑀢𑀼𑀢𑁆𑀣𑀲𑀸𑀭𑀺𑀧𑀼𑀢𑁆𑀢𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀁

𑁪𑁧𑁫. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄, 𑀆𑀬𑀲𑁆𑀫𑀸 𑀘 𑀫𑀳𑀸𑀓𑁄𑀝𑁆𑀞𑀺𑀓𑁄 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀦𑁆𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀫𑀳𑀸𑀓𑁄𑀝𑁆𑀞𑀺𑀓𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑁄𑀝𑁆𑀞𑀺𑀓𑀁 𑀏𑀢𑀤𑀯𑁄𑀘 𑁋 ‘‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀓𑁄𑀝𑁆𑀞𑀺𑀓, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺…𑀧𑁂… ‘𑀓𑀺𑀁 𑀧𑀦𑀸𑀯𑀼𑀲𑁄, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀏𑀢𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀤𑁂𑀲𑀺’’. ‘‘𑀓𑁄 𑀦𑀼 𑀔𑁄, 𑀆𑀯𑀼𑀲𑁄, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺?

‘‘𑀭𑀽𑀧𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀭𑀽𑀧𑀭𑀢𑀲𑁆𑀲 𑀭𑀽𑀧𑀲𑀫𑁆𑀫𑀼𑀤𑀺𑀢𑀲𑁆𑀲 𑀭𑀽𑀧𑀦𑀺𑀭𑁄𑀥𑀁 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺; ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺; ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺; ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺. 𑀯𑁂𑀤𑀦𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀯𑁂𑀤𑀦𑀸𑀭𑀢𑀲𑁆𑀲 𑀯𑁂𑀤𑀦𑀸𑀲𑀫𑁆𑀫𑀼𑀤𑀺𑀢𑀲𑁆𑀲, 𑀯𑁂𑀤𑀦𑀸𑀦𑀺𑀭𑁄𑀥𑀁 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺…𑀧𑁂… 𑀲𑀜𑁆𑀜𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄…𑀧𑁂… 𑀲𑀗𑁆𑀔𑀸𑀭𑀸𑀭𑀸𑀫𑀲𑁆𑀲 𑀔𑁄 𑀆𑀯𑀼𑀲𑁄…𑀧𑁂… 𑀯𑀺𑀜𑁆𑀜𑀸𑀡𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀯𑀺𑀜𑁆𑀜𑀸𑀡𑀭𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑀫𑁆𑀫𑀼𑀤𑀺𑀢𑀲𑁆𑀲 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀁 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺’’.

‘‘𑀦 𑀭𑀽𑀧𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀦 𑀭𑀽𑀧𑀭𑀢𑀲𑁆𑀲 𑀦 𑀭𑀽𑀧𑀲𑀫𑁆𑀫𑀼𑀤𑀺𑀢𑀲𑁆𑀲, 𑀭𑀽𑀧𑀦𑀺𑀭𑁄𑀥𑀁 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺. 𑀦 𑀯𑁂𑀤𑀦𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄…𑀧𑁂… 𑀦 𑀲𑀜𑁆𑀜𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄…𑀧𑁂… 𑀦 𑀲𑀗𑁆𑀔𑀸𑀭𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄…𑀧𑁂… 𑀦 𑀯𑀺𑀜𑁆𑀜𑀸𑀡𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀦 𑀯𑀺𑀜𑁆𑀜𑀸𑀡𑀭𑀢𑀲𑁆𑀲 𑀦 𑀯𑀺𑀜𑁆𑀜𑀸𑀡𑀲𑀫𑁆𑀫𑀼𑀤𑀺𑀢𑀲𑁆𑀲, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀁 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺. 𑀅𑀬𑀁 𑀔𑁄, 𑀆𑀯𑀼𑀲𑁄, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺.

‘‘𑀲𑀺𑀬𑀸 𑀧𑀦𑀸𑀯𑀼𑀲𑁄, 𑀅𑀜𑁆𑀜𑁄𑀧𑀺 𑀧𑀭𑀺𑀬𑀸𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺? ‘‘𑀲𑀺𑀬𑀸, 𑀆𑀯𑀼𑀲𑁄. 𑀪𑀯𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀪𑀯𑀭𑀢𑀲𑁆𑀲 𑀪𑀯𑀲𑀫𑁆𑀫𑀼𑀤𑀺𑀢𑀲𑁆𑀲, 𑀪𑀯𑀦𑀺𑀭𑁄𑀥𑀁 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺. 𑀦 𑀪𑀯𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀦 𑀪𑀯𑀭𑀢𑀲𑁆𑀲 𑀦 𑀪𑀯𑀲𑀫𑁆𑀫𑀼𑀤𑀺𑀢𑀲𑁆𑀲, 𑀪𑀯𑀦𑀺𑀭𑁄𑀥𑀁 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺. 𑀅𑀬𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀧𑀭𑀺𑀬𑀸𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺.

‘‘𑀲𑀺𑀬𑀸 𑀧𑀦𑀸𑀯𑀼𑀲𑁄, 𑀅𑀜𑁆𑀜𑁄𑀧𑀺 𑀧𑀭𑀺𑀬𑀸𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺? ‘‘𑀲𑀺𑀬𑀸, 𑀆𑀯𑀼𑀲𑁄. 𑀉𑀧𑀸𑀤𑀸𑀦𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀉𑀧𑀸𑀤𑀸𑀦𑀭𑀢𑀲𑁆𑀲 𑀉𑀧𑀸𑀤𑀸𑀦𑀲𑀫𑁆𑀫𑀼𑀤𑀺𑀢𑀲𑁆𑀲, 𑀉𑀧𑀸𑀤𑀸𑀦𑀦𑀺𑀭𑁄𑀥𑀁 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺. 𑀦 𑀉𑀧𑀸𑀤𑀸𑀦𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀦 𑀉𑀧𑀸𑀤𑀸𑀦𑀭𑀢𑀲𑁆𑀲 𑀦 𑀉𑀧𑀸𑀤𑀸𑀦𑀲𑀫𑁆𑀫𑀼𑀤𑀺𑀢𑀲𑁆𑀲, 𑀉𑀧𑀸𑀤𑀸𑀦𑀦𑀺𑀭𑁄𑀥𑀁 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺…𑀧𑁂… ‘𑀦𑁂𑀯, 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺. 𑀅𑀬𑀫𑁆𑀧𑀺 𑀔𑁄 𑀆𑀯𑀼𑀲𑁄, 𑀧𑀭𑀺𑀬𑀸𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺.

‘‘𑀲𑀺𑀬𑀸 𑀧𑀦𑀸𑀯𑀼𑀲𑁄, 𑀅𑀜𑁆𑀜𑁄𑀧𑀺 𑀧𑀭𑀺𑀬𑀸𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺? ‘‘𑀲𑀺𑀬𑀸, 𑀆𑀯𑀼𑀲𑁄. 𑀢𑀡𑁆𑀳𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀢𑀡𑁆𑀳𑀸𑀭𑀢𑀲𑁆𑀲 𑀢𑀡𑁆𑀳𑀸𑀲𑀫𑁆𑀫𑀼𑀤𑀺𑀢𑀲𑁆𑀲, 𑀢𑀡𑁆𑀳𑀸𑀦𑀺𑀭𑁄𑀥𑀁 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀳𑁄𑀢𑀺. 𑀦 𑀢𑀡𑁆𑀳𑀸𑀭𑀸𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀦 𑀢𑀡𑁆𑀳𑀸𑀭𑀢𑀲𑁆𑀲 𑀦 𑀢𑀡𑁆𑀳𑀸𑀲𑀫𑁆𑀫𑀼𑀤𑀺𑀢𑀲𑁆𑀲, 𑀢𑀡𑁆𑀳𑀸𑀦𑀺𑀭𑁄𑀥𑀁 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀬𑀣𑀸𑀪𑀽𑀢𑀁, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺…𑀧𑁂. … ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺𑀲𑁆𑀲 𑀦 𑀳𑁄𑀢𑀺. 𑀅𑀬𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀧𑀭𑀺𑀬𑀸𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺.

‘‘𑀲𑀺𑀬𑀸 𑀧𑀦𑀸𑀯𑀼𑀲𑁄, 𑀅𑀜𑁆𑀜𑁄𑀧𑀺 𑀧𑀭𑀺𑀬𑀸𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸’’𑀢𑀺? ‘‘𑀏𑀢𑁆𑀣 𑀤𑀸𑀦𑀺, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀇𑀢𑁄 𑀉𑀢𑁆𑀢𑀭𑀺 𑀓𑀺𑀁 𑀇𑀘𑁆𑀙𑀲𑀺? 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀲𑁆𑀲, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑁄 𑀯𑀝𑁆𑀝𑀁 [𑀯𑀢𑁆𑀢𑀁 (𑀲𑁆𑀬𑀸. 𑀓𑀁. 𑀓.) 𑀯𑀤𑁆𑀥𑀁 (𑀧𑀻.)] 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬𑀸’’𑀢𑀺. 𑀙𑀝𑁆𑀞𑀁.

𑁭. 𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀁

𑁪𑁧𑁬. 𑀅𑀣 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 𑁋

‘‘𑀓𑀺𑀁 𑀦𑀼 𑀔𑁄, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀯𑀘𑁆𑀙, 𑀪𑀕𑀯𑀢𑀸 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’’’𑀢𑀺. ‘‘𑀓𑀺𑀁 𑀧𑀦, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀯𑀘𑁆𑀙, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 ‘𑀅𑀲𑀲𑁆𑀲𑀢𑁄 𑀮𑁄𑀓𑁄’’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀦𑁆𑀢𑀯𑀸 𑀮𑁄𑀓𑁄’’𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀯𑀘𑁆𑀙, 𑀪𑀕𑀯𑀢𑀸 𑁋 ‘𑀅𑀦𑁆𑀢𑀯𑀸 𑀮𑁄𑀓𑁄’’’𑀢𑀺. ‘‘𑀓𑀺𑀁 𑀧𑀦, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀦𑀦𑁆𑀢𑀯𑀸 𑀮𑁄𑀓𑁄’’𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀯𑀘𑁆𑀙, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 ‘𑀅𑀦𑀦𑁆𑀢𑀯𑀸 𑀮𑁄𑀓𑁄’’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀯𑀘𑁆𑀙, 𑀪𑀕𑀯𑀢𑀸 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’’𑀦𑁆𑀢𑀺. ‘‘𑀓𑀺𑀁 𑀧𑀦, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀯𑀘𑁆𑀙, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’’𑀦𑁆𑀢𑀺. ‘‘𑀓𑀺𑀁 𑀦𑀼 𑀔𑁄, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀯𑀘𑁆𑀙, 𑀪𑀕𑀯𑀢𑀸 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀧𑀦, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀯𑀘𑁆𑀙, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀦𑀼 𑀔𑁄, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀯𑀘𑁆𑀙, 𑀪𑀕𑀯𑀢𑀸 𑁋 ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀧𑀦, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀯𑀘𑁆𑀙, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺.

‘‘𑀓𑁄 𑀦𑀼 𑀔𑁄, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀧𑀼𑀝𑁆𑀞𑀸𑀦𑀁 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸, 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀅𑀦𑀦𑁆𑀢𑀯𑀸 𑀮𑁄𑀓𑁄𑀢𑀺 𑀯𑀸, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸? 𑀓𑁄 𑀧𑀦, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀏𑀯𑀁 𑀧𑀼𑀝𑁆𑀞𑀲𑁆𑀲 𑀦 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺𑀧𑀺, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺𑀧𑀺, 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺𑀧𑀺, 𑀅𑀦𑀦𑁆𑀢𑀯𑀸 𑀮𑁄𑀓𑁄𑀢𑀺𑀧𑀺, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺𑀧𑀺, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺𑀧𑀺, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺𑀧𑀺, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺𑀧𑀺, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺𑀧𑀺, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺𑀧𑀻’’𑀢𑀺?

‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀔𑁄, 𑀯𑀘𑁆𑀙, 𑀧𑀭𑀺𑀩𑁆𑀩𑀸𑀚𑀓𑀸 𑀘𑀓𑁆𑀔𑀼𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑀺…𑀧𑁂… 𑀚𑀺𑀯𑁆𑀳𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑀺…𑀧𑁂… 𑀫𑀦𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑀺. 𑀢𑀲𑁆𑀫𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀧𑀼𑀝𑁆𑀞𑀸𑀦𑀁 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀯𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀯𑀸. 𑀢𑀣𑀸𑀕𑀢𑁄 𑀘 𑀔𑁄, 𑀯𑀘𑁆𑀙, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀘𑀓𑁆𑀔𑀼𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀚𑀺𑀯𑁆𑀳𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀫𑀦𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀧𑀼𑀝𑁆𑀞𑀲𑁆𑀲 𑀦 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺𑀧𑀺…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺𑀧𑀻’’𑀢𑀺.

𑀅𑀣 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺? 𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀯𑀘𑁆𑀙, 𑀫𑀬𑀸 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺…𑀧𑁂…. ‘‘𑀓𑀺𑀁 𑀧𑀦, 𑀪𑁄 𑀕𑁄𑀢𑀫, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀯𑀘𑁆𑀙, 𑀅𑀩𑁆𑀬𑀸𑀓𑀢𑀁 𑀫𑀬𑀸 𑁋 ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺.

‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀧𑀼𑀝𑁆𑀞𑀸𑀦𑀁 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸? 𑀓𑁄 𑀧𑀦, 𑀪𑁄 𑀕𑁄𑀢𑀫, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀏𑀯𑀁 𑀧𑀼𑀝𑁆𑀞𑀲𑁆𑀲 𑀦 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺𑀧𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀻’’𑀢𑀺?

‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀔𑁄, 𑀯𑀘𑁆𑀙, 𑀧𑀭𑀺𑀩𑁆𑀩𑀸𑀚𑀓𑀸 𑀘𑀓𑁆𑀔𑀼𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑀺…𑀧𑁂… 𑀚𑀺𑀯𑁆𑀳𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑀺…𑀧𑁂… 𑀫𑀦𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑀺. 𑀢𑀲𑁆𑀫𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀧𑀼𑀝𑁆𑀞𑀸𑀦𑀁 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸. 𑀢𑀣𑀸𑀕𑀢𑁄 𑀘 𑀔𑁄, 𑀯𑀘𑁆𑀙, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀘𑀓𑁆𑀔𑀼𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀚𑀺𑀯𑁆𑀳𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀫𑀦𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀧𑀼𑀝𑁆𑀞𑀲𑁆𑀲 𑀦 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺𑀧𑀺, ‘𑀅𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺𑀧𑀺, ‘𑀅𑀦𑁆𑀢𑀯𑀸 𑀮𑁄𑀓𑁄’𑀢𑀺𑀧𑀺, ‘𑀅𑀦𑀦𑁆𑀢𑀯𑀸 𑀮𑁄𑀓𑁄’𑀢𑀺𑀧𑀺, ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺𑀧𑀺, ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺𑀧𑀺, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺, ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺, ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀻’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑁄 𑀕𑁄𑀢𑀫, 𑀅𑀩𑁆𑀪𑀼𑀢𑀁, 𑀪𑁄 𑀕𑁄𑀢𑀫! 𑀬𑀢𑁆𑀭 𑀳𑀺 𑀦𑀸𑀫 𑀲𑀢𑁆𑀣𑀼 𑀘 [𑀲𑀢𑁆𑀣𑀼𑀲𑁆𑀲 𑀘 (𑀲𑀻. 𑀧𑀻.), 𑀲𑀢𑁆𑀣𑀼 𑀘𑁂𑀯 (𑀔𑁂𑀫𑀸𑀲𑀼𑀢𑁆𑀢𑁂)] 𑀲𑀸𑀯𑀓𑀲𑁆𑀲 𑀘 𑀅𑀢𑁆𑀣𑁂𑀦 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀁 𑀲𑀁𑀲𑀦𑁆𑀤𑀺𑀲𑁆𑀲𑀢𑀺 𑀲𑀫𑁂𑀲𑁆𑀲𑀢𑀺 𑀦 𑀯𑀺𑀭𑁄𑀥𑀬𑀺𑀲𑁆𑀲𑀢𑀺, 𑀬𑀤𑀺𑀤𑀁 𑀅𑀕𑁆𑀕𑀧𑀤𑀲𑁆𑀫𑀺𑀁. 𑀇𑀤𑀸𑀦𑀸𑀳𑀁, 𑀪𑁄 𑀕𑁄𑀢𑀫, 𑀲𑀫𑀡𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀅𑀧𑀼𑀘𑁆𑀙𑀺𑀁. 𑀲𑀫𑀡𑁄𑀧𑀺 𑀫𑁂 𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀢𑁂𑀳𑀺 𑀧𑀤𑁂𑀳𑀺 𑀏𑀢𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀢𑀫𑀢𑁆𑀣𑀁 𑀩𑁆𑀬𑀸𑀓𑀸𑀲𑀺, 𑀲𑁂𑀬𑁆𑀬𑀣𑀸𑀧𑀺 𑀪𑀯𑀁 𑀕𑁄𑀢𑀫𑁄. 𑀅𑀘𑁆𑀙𑀭𑀺𑀬𑀁, 𑀪𑁄 𑀕𑁄𑀢𑀫, 𑀅𑀩𑁆𑀪𑀼𑀢𑀁, 𑀪𑁄 𑀕𑁄𑀢𑀫! 𑀬𑀢𑁆𑀭 𑀳𑀺 𑀦𑀸𑀫 𑀲𑀢𑁆𑀣𑀼 𑀘 𑀲𑀸𑀯𑀓𑀲𑁆𑀲 𑀘 𑀅𑀢𑁆𑀣𑁂𑀦 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀁 𑀲𑀁𑀲𑀦𑁆𑀤𑀺𑀲𑁆𑀲𑀢𑀺 𑀲𑀫𑁂𑀲𑁆𑀲𑀢𑀺 𑀦 𑀯𑀺𑀭𑁄𑀥𑀬𑀺𑀲𑁆𑀲𑀢𑀺, 𑀬𑀤𑀺𑀤𑀁 𑀅𑀕𑁆𑀕𑀧𑀤𑀲𑁆𑀫𑀺’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀯𑀘𑁆𑀙𑀕𑁄𑀢𑁆𑀢𑀲𑀼𑀢𑁆𑀢𑀁

𑁪𑁧𑁭. 𑀅𑀣 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺? 𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀯𑀘𑁆𑀙, 𑀫𑀬𑀸 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺…𑀧𑁂…. ‘‘𑀓𑀺𑀁 𑀧𑀦, 𑀪𑁄 𑀕𑁄𑀢𑀫, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀯𑀘𑁆𑀙, 𑀅𑀩𑁆𑀬𑀸𑀓𑀢𑀁 𑀫𑀬𑀸 𑁋 ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺.

‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀧𑀼𑀝𑁆𑀞𑀸𑀦𑀁 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸? 𑀓𑁄 𑀧𑀦, 𑀪𑁄 𑀕𑁄𑀢𑀫, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀏𑀯𑀁 𑀧𑀼𑀝𑁆𑀞𑀲𑁆𑀲 𑀦 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺𑀧𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀻’’𑀢𑀺?

‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀔𑁄, 𑀯𑀘𑁆𑀙, 𑀧𑀭𑀺𑀩𑁆𑀩𑀸𑀚𑀓𑀸 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑀺…𑀧𑁂… 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀢𑀲𑁆𑀫𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀧𑀼𑀝𑁆𑀞𑀸𑀦𑀁 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸. 𑀢𑀣𑀸𑀕𑀢𑁄 𑀘 𑀔𑁄, 𑀯𑀘𑁆𑀙, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀦 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀦 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀦 𑀲𑀜𑁆𑀜𑀁…𑀧𑁂… 𑀦 𑀲𑀗𑁆𑀔𑀸𑀭𑁂…𑀧𑁂… 𑀦 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀦 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀢𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀧𑀼𑀝𑁆𑀞𑀲𑁆𑀲 𑀦 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺𑀧𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀻’’𑀢𑀺.

𑀅𑀣 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺? 𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀯𑀘𑁆𑀙, 𑀪𑀕𑀯𑀢𑀸 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺…𑀧𑁂…. ‘‘𑀓𑀺𑀁 𑀧𑀦, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀯𑀘𑁆𑀙, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺.

‘‘𑀓𑁄 𑀦𑀼 𑀔𑁄, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀧𑀼𑀝𑁆𑀞𑀸𑀦𑀁 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸? 𑀓𑁄 𑀧𑀦, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀏𑀯𑀁 𑀧𑀼𑀝𑁆𑀞𑀲𑁆𑀲 𑀦 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺𑀧𑀺…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀻’’𑀢𑀺?

‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀔𑁄, 𑀯𑀘𑁆𑀙, 𑀧𑀭𑀺𑀩𑁆𑀩𑀸𑀚𑀓𑀸 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑀺…𑀧𑁂… 𑀲𑀜𑁆𑀜𑀁…𑀧𑁂… 𑀲𑀗𑁆𑀔𑀸𑀭𑁂…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀢𑀲𑁆𑀫𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀧𑀼𑀝𑁆𑀞𑀸𑀦𑀁 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸. 𑀢𑀣𑀸𑀕𑀢𑁄 𑀘 𑀔𑁄, 𑀯𑀘𑁆𑀙, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀦 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀦 𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀦 𑀲𑀜𑁆𑀜𑀁…𑀧𑁂… 𑀦 𑀲𑀗𑁆𑀔𑀸𑀭𑁂…𑀧𑁂… 𑀦 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀦 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀦 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀢𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀧𑀼𑀝𑁆𑀞𑀲𑁆𑀲 𑀦 𑀏𑀯𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺𑀧𑀺, ‘𑀅𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺𑀧𑀺, ‘𑀅𑀦𑁆𑀢𑀯𑀸 𑀮𑁄𑀓𑁄’𑀢𑀺𑀧𑀺, ‘𑀅𑀦𑀦𑁆𑀢𑀯𑀸 𑀮𑁄𑀓𑁄’𑀢𑀺𑀧𑀺, ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺𑀧𑀺, ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺𑀧𑀺, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺, ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺, ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀺, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺𑀧𑀻’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀩𑁆𑀪𑀼𑀢𑀁, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦! 𑀬𑀢𑁆𑀭 𑀳𑀺 𑀦𑀸𑀫 𑀲𑀢𑁆𑀣𑀼 𑀘 𑀲𑀸𑀯𑀓𑀲𑁆𑀲 𑀘 𑀅𑀢𑁆𑀣𑁂𑀦 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀁 𑀲𑀁𑀲𑀦𑁆𑀤𑀺𑀲𑁆𑀲𑀢𑀺, 𑀲𑀫𑁂𑀲𑁆𑀲𑀢𑀺, 𑀦 𑀯𑀺𑀭𑁄𑀥𑀬𑀺𑀲𑁆𑀲𑀢𑀺, 𑀬𑀤𑀺𑀤𑀁 𑀅𑀕𑁆𑀕𑀧𑀤𑀲𑁆𑀫𑀺𑀁. 𑀇𑀤𑀸𑀦𑀸𑀳𑀁, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀅𑀧𑀼𑀘𑁆𑀙𑀺𑀁. 𑀲𑀫𑀡𑁄𑀧𑀺 𑀫𑁂 𑀕𑁄𑀢𑀫𑁄 𑀏𑀢𑁂𑀳𑀺 𑀧𑀤𑁂𑀳𑀺 𑀏𑀢𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀸𑀲𑀺, 𑀲𑁂𑀬𑁆𑀬𑀣𑀸𑀧𑀺 𑀪𑀯𑀁 𑀫𑁄𑀕𑁆𑀕𑀮𑁆𑀮𑀸𑀦𑁄. 𑀅𑀘𑁆𑀙𑀭𑀺𑀬𑀁, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀩𑁆𑀪𑀼𑀢𑀁, 𑀪𑁄 𑀫𑁄𑀕𑁆𑀕𑀮𑁆𑀮𑀸𑀦! 𑀬𑀢𑁆𑀭 𑀳𑀺 𑀦𑀸𑀫 𑀲𑀢𑁆𑀣𑀼 𑀘 𑀲𑀸𑀯𑀓𑀲𑁆𑀲 𑀘 𑀅𑀢𑁆𑀣𑁂𑀦 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀁 𑀲𑀁𑀲𑀦𑁆𑀤𑀺𑀲𑁆𑀲𑀢𑀺 𑀲𑀫𑁂𑀲𑁆𑀲𑀢𑀺 𑀦 𑀯𑀺𑀭𑁄𑀥𑀬𑀺𑀲𑁆𑀲𑀢𑀺, 𑀬𑀤𑀺𑀤𑀁 𑀅𑀕𑁆𑀕𑀧𑀤𑀲𑁆𑀫𑀺’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀓𑀼𑀢𑀽𑀳𑀮𑀲𑀸𑀮𑀸𑀲𑀼𑀢𑁆𑀢𑀁

𑁪𑁧𑁮. 𑀅𑀣 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀧𑀼𑀭𑀺𑀫𑀸𑀦𑀺, 𑀪𑁄 𑀕𑁄𑀢𑀫, 𑀤𑀺𑀯𑀲𑀸𑀦𑀺 𑀧𑀼𑀭𑀺𑀫𑀢𑀭𑀸𑀦𑀺 𑀲𑀫𑁆𑀩𑀳𑀼𑀮𑀸𑀦𑀁 𑀦𑀸𑀦𑀸𑀢𑀺𑀢𑁆𑀣𑀺𑀬𑀸𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀓𑀼𑀢𑀽𑀳𑀮𑀲𑀸𑀮𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘𑀅𑀬𑀁 𑀔𑁄 𑀧𑀽𑀭𑀡𑁄 𑀓𑀲𑁆𑀲𑀧𑁄 𑀲𑀗𑁆𑀖𑀻 𑀘𑁂𑀯 𑀕𑀡𑀻 𑀘 𑀕𑀡𑀸𑀘𑀭𑀺𑀬𑁄 𑀘 𑀜𑀸𑀢𑁄 𑀬𑀲𑀲𑁆𑀲𑀻 𑀢𑀺𑀢𑁆𑀣𑀓𑀭𑁄 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲. 𑀲𑁄𑀧𑀺 𑀲𑀸𑀯𑀓𑀁 𑀅𑀩𑁆𑀪𑀢𑀻𑀢𑀁 𑀓𑀸𑀮𑀗𑁆𑀓𑀢𑀁 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑁋 ‘𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄, 𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄’𑀢𑀺. 𑀬𑁄𑀧𑀺𑀲𑁆𑀲 𑀲𑀸𑀯𑀓𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑀢𑁆𑀢𑁄 𑀢𑀫𑁆𑀧𑀺 𑀲𑀸𑀯𑀓𑀁 𑀅𑀩𑁆𑀪𑀢𑀻𑀢𑀁 𑀓𑀸𑀮𑀗𑁆𑀓𑀢𑀁 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑁋 ‘𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄, 𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄’’’𑀢𑀺.

‘‘𑀅𑀬𑀫𑁆𑀧𑀺 𑀔𑁄 𑀫𑀓𑁆𑀔𑀮𑀺 𑀕𑁄𑀲𑀸𑀮𑁄…𑀧𑁂… 𑀅𑀬𑀫𑁆𑀧𑀺 𑀔𑁄 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄…𑀧𑁂… 𑀅𑀬𑀫𑁆𑀧𑀺 𑀔𑁄 𑀲𑀜𑁆𑀘𑀬𑁄 [𑀲𑀜𑁆𑀚𑀬𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀩𑁂𑀮𑀝𑁆𑀞𑀧𑀼𑀢𑁆𑀢𑁄…𑀧𑁂… 𑀅𑀬𑀫𑁆𑀧𑀺 𑀔𑁄 𑀧𑀓𑀼𑀥𑁄 [𑀧𑀓𑀼𑀤𑁆𑀥𑁄 (𑀧𑀻.)] 𑀓𑀘𑁆𑀘𑀸𑀦𑁄…𑀧𑁂… 𑀅𑀬𑀫𑁆𑀧𑀺 𑀔𑁄 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄 𑀲𑀗𑁆𑀖𑀻 𑀘𑁂𑀯 𑀕𑀡𑀻 𑀘 𑀕𑀡𑀸𑀘𑀭𑀺𑀬𑁄 𑀘 𑀜𑀸𑀢𑁄 𑀬𑀲𑀲𑁆𑀲𑀻 𑀢𑀺𑀢𑁆𑀣𑀓𑀭𑁄 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲. 𑀲𑁄𑀧𑀺 𑀲𑀸𑀯𑀓𑀁 𑀅𑀩𑁆𑀪𑀢𑀻𑀢𑀁 𑀓𑀸𑀮𑀗𑁆𑀓𑀢𑀁 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑁋 ‘𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄, 𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄’𑀢𑀺. 𑀬𑁄𑀧𑀺𑀲𑁆𑀲 𑀲𑀸𑀯𑀓𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑀢𑁆𑀢𑁄 𑀢𑀫𑁆𑀧𑀺 𑀲𑀸𑀯𑀓𑀁 𑀅𑀩𑁆𑀪𑀢𑀻𑀢𑀁 𑀓𑀸𑀮𑀗𑁆𑀓𑀢𑀁 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑁋 ‘𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄, 𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄’’’𑀢𑀺.

‘‘𑀅𑀬𑀫𑁆𑀧𑀺 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀲𑀗𑁆𑀖𑀻 𑀘𑁂𑀯 𑀕𑀡𑀻 𑀘 𑀕𑀡𑀸𑀘𑀭𑀺𑀬𑁄 𑀘 𑀜𑀸𑀢𑁄 𑀬𑀲𑀲𑁆𑀲𑀻 𑀢𑀺𑀢𑁆𑀣𑀓𑀭𑁄 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲. 𑀲𑁄𑀧𑀺 𑀲𑀸𑀯𑀓𑀁 𑀅𑀩𑁆𑀪𑀢𑀻𑀢𑀁 𑀓𑀸𑀮𑀗𑁆𑀓𑀢𑀁 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑁋 ‘𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄, 𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄’𑀢𑀺. 𑀬𑁄𑀧𑀺𑀲𑁆𑀲 [𑀬𑁄 𑀘 𑀔𑁆𑀯𑀲𑁆𑀲 (𑀧𑀻.)] 𑀲𑀸𑀯𑀓𑁄 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑀢𑁆𑀢𑁄 𑀢𑀜𑁆𑀘 𑀲𑀸𑀯𑀓𑀁 𑀅𑀩𑁆𑀪𑀢𑀻𑀢𑀁 𑀓𑀸𑀮𑀗𑁆𑀓𑀢𑀁 𑀉𑀧𑀧𑀢𑁆𑀢𑀻𑀲𑀼 𑀦 𑀩𑁆𑀬𑀸𑀓𑀭𑁄𑀢𑀺 𑁋 ‘𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄, 𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄’𑀢𑀺. 𑀅𑀧𑀺 𑀘 𑀔𑁄 𑀦𑀁 𑀏𑀯𑀁 𑀩𑁆𑀬𑀸𑀓𑀭𑁄𑀢𑀺 𑁋 ‘𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀁, 𑀯𑀺𑀯𑀢𑁆𑀢𑀬𑀺 𑀲𑀁𑀬𑁄𑀚𑀦𑀁, 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑁄 𑀕𑁄𑀢𑀫, 𑀅𑀳𑀼 𑀤𑁂𑀯 𑀓𑀗𑁆𑀔𑀸, 𑀅𑀳𑀼 𑀯𑀺𑀘𑀺𑀓𑀺𑀘𑁆𑀙𑀸 𑁋 ‘𑀓𑀣𑀁 𑀦𑀸𑀫 [𑀓𑀣𑀜𑁆𑀳𑀺 𑀦𑀸𑀫 (𑀲𑁆𑀬𑀸. 𑀓𑀁. 𑀧𑀻. 𑀓.) 𑀓𑀣𑀁 𑀓𑀣𑀁 𑀦𑀸𑀫 (𑀙𑀓𑁆𑀓𑀗𑁆𑀕𑀼𑀢𑁆𑀢𑀭𑁂 𑀧𑀜𑁆𑀘𑀫𑀯𑀕𑁆𑀕𑁂 𑀤𑀼𑀢𑀺𑀬𑀲𑀼𑀢𑁆𑀢𑁂)] 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀥𑀫𑁆𑀫𑁄 𑀅𑀪𑀺𑀜𑁆𑀜𑁂𑀬𑁆𑀬𑁄’’’𑀢𑀺 [𑀥𑀫𑁆𑀫𑀸𑀪𑀺𑀜𑁆𑀜𑁂𑀬𑁆𑀬𑀸𑀢𑀺 (𑀧𑀻. 𑀓.) 𑀥𑀫𑁆𑀫𑁄… 𑀅𑀜𑁆𑀜𑁂𑀬𑁆𑀬𑁄 (𑀙𑀓𑁆𑀓𑀗𑁆𑀕𑀼𑀢𑁆𑀢𑀭𑁂)]?

‘‘𑀅𑀮𑀜𑁆𑀳𑀺 𑀢𑁂, 𑀯𑀘𑁆𑀙, 𑀓𑀗𑁆𑀔𑀺𑀢𑀼𑀁, 𑀅𑀮𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀼𑀁. 𑀓𑀗𑁆𑀔𑀦𑀻𑀬𑁂 𑀘 𑀧𑀦 𑀢𑁂 𑀞𑀸𑀦𑁂 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀦𑁆𑀦𑀸. 𑀲𑀉𑀧𑀸𑀤𑀸𑀦𑀲𑁆𑀲 𑀔𑁆𑀯𑀸𑀳𑀁, 𑀯𑀘𑁆𑀙, 𑀉𑀧𑀧𑀢𑁆𑀢𑀺𑀁 𑀧𑀜𑁆𑀜𑀸𑀧𑁂𑀫𑀺 𑀦𑁄 𑀅𑀦𑀼𑀧𑀸𑀤𑀸𑀦𑀲𑁆𑀲. 𑀲𑁂𑀬𑁆𑀬𑀣𑀸𑀧𑀺, 𑀯𑀘𑁆𑀙, 𑀅𑀕𑁆𑀕𑀺 𑀲𑀉𑀧𑀸𑀤𑀸𑀦𑁄 𑀚𑀮𑀢𑀺, 𑀦𑁄 𑀅𑀦𑀼𑀧𑀸𑀤𑀸𑀦𑁄; 𑀏𑀯𑀫𑁂𑀯 𑀔𑁆𑀯𑀸𑀳𑀁, 𑀯𑀘𑁆𑀙, 𑀲𑀉𑀧𑀸𑀤𑀸𑀦𑀲𑁆𑀲 𑀉𑀧𑀧𑀢𑁆𑀢𑀺𑀁 𑀧𑀜𑁆𑀜𑀸𑀧𑁂𑀫𑀺, 𑀦𑁄 𑀅𑀦𑀼𑀧𑀸𑀤𑀸𑀦𑀲𑁆𑀲𑀸’’𑀢𑀺.

‘‘𑀬𑀲𑁆𑀫𑀺𑀁, 𑀪𑁄 𑀕𑁄𑀢𑀫, 𑀲𑀫𑀬𑁂 𑀅𑀘𑁆𑀘𑀺 𑀯𑀸𑀢𑁂𑀦 𑀔𑀺𑀢𑁆𑀢𑀸 𑀤𑀽𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀇𑀫𑀲𑁆𑀲 𑀧𑀦 𑀪𑀯𑀁 𑀕𑁄𑀢𑀫𑁄 𑀓𑀺𑀁 𑀉𑀧𑀸𑀤𑀸𑀦𑀲𑁆𑀫𑀺𑀁 𑀧𑀜𑁆𑀜𑀸𑀧𑁂𑀢𑀻’’𑀢𑀺? ‘‘𑀬𑀲𑁆𑀫𑀺𑀁 𑀔𑁄, 𑀯𑀘𑁆𑀙, 𑀲𑀫𑀬𑁂 𑀅𑀘𑁆𑀘𑀺 𑀯𑀸𑀢𑁂𑀦 𑀔𑀺𑀢𑁆𑀢𑀸 𑀤𑀽𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀢𑀫𑀳𑀁 𑀯𑀸𑀢𑀽𑀧𑀸𑀤𑀸𑀦𑀁 𑀧𑀜𑁆𑀜𑀸𑀧𑁂𑀫𑀺. 𑀯𑀸𑀢𑁄 𑀳𑀺𑀲𑁆𑀲, 𑀯𑀘𑁆𑀙, 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑀸𑀤𑀸𑀦𑀁 𑀳𑁄𑀢𑀻’’𑀢𑀺. ‘‘𑀬𑀲𑁆𑀫𑀺𑀜𑁆𑀘 𑀧𑀦, 𑀪𑁄 𑀕𑁄𑀢𑀫, 𑀲𑀫𑀬𑁂 𑀇𑀫𑀜𑁆𑀘 𑀓𑀸𑀬𑀁 𑀦𑀺𑀓𑁆𑀔𑀺𑀧𑀢𑀺, 𑀲𑀢𑁆𑀢𑁄 𑀘 𑀅𑀜𑁆𑀜𑀢𑀭𑀁 𑀓𑀸𑀬𑀁 𑀅𑀦𑀼𑀧𑀧𑀦𑁆𑀦𑁄 𑀳𑁄𑀢𑀺, 𑀇𑀫𑀲𑁆𑀲 𑀧𑀦 𑀪𑀯𑀁 𑀕𑁄𑀢𑀫𑁄 𑀓𑀺𑀁 𑀉𑀧𑀸𑀤𑀸𑀦𑀲𑁆𑀫𑀺𑀁 𑀧𑀜𑁆𑀜𑀸𑀧𑁂𑀢𑀻’’𑀢𑀺? ‘‘𑀬𑀲𑁆𑀫𑀺𑀁 𑀔𑁄, 𑀯𑀘𑁆𑀙, 𑀲𑀫𑀬𑁂 𑀇𑀫𑀜𑁆𑀘 𑀓𑀸𑀬𑀁 𑀦𑀺𑀓𑁆𑀔𑀺𑀧𑀢𑀺, 𑀲𑀢𑁆𑀢𑁄 𑀘 𑀅𑀜𑁆𑀜𑀢𑀭𑀁 𑀓𑀸𑀬𑀁 𑀅𑀦𑀼𑀧𑀧𑀦𑁆𑀦𑁄 𑀳𑁄𑀢𑀺, 𑀢𑀫𑀳𑀁 𑀢𑀡𑁆𑀳𑀽𑀧𑀸𑀤𑀸𑀦𑀁 𑀯𑀤𑀸𑀫𑀺. 𑀢𑀡𑁆𑀳𑀸 𑀳𑀺𑀲𑁆𑀲, 𑀯𑀘𑁆𑀙, 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀧𑀸𑀤𑀸𑀦𑀁 𑀳𑁄𑀢𑀻’’𑀢𑀺 [𑀳𑁄𑀢𑀻𑀢𑀺…𑀧𑁂… (𑀓.)]. 𑀦𑀯𑀫𑀁.

𑁧𑁦. 𑀆𑀦𑀦𑁆𑀤𑀲𑀼𑀢𑁆𑀢𑀁

𑁪𑁧𑁯. 𑀅𑀣 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀅𑀢𑁆𑀣𑀢𑁆𑀢𑀸’’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀪𑀕𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. ‘‘𑀓𑀺𑀁 𑀧𑀦, 𑀪𑁄 𑀕𑁄𑀢𑀫, 𑀦𑀢𑁆𑀣𑀢𑁆𑀢𑀸’’𑀢𑀺? 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀯𑀘𑁆𑀙𑀕𑁄𑀢𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀪𑀕𑀯𑀸 𑀯𑀘𑁆𑀙𑀕𑁄𑀢𑁆𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀦 𑀩𑁆𑀬𑀸𑀓𑀸𑀲𑀻’’𑀢𑀺? ‘‘𑀅𑀳𑀜𑁆𑀘𑀸𑀦𑀦𑁆𑀤, 𑀯𑀘𑁆𑀙𑀕𑁄𑀢𑁆𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 ‘𑀅𑀢𑁆𑀣𑀢𑁆𑀢𑀸’𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀅𑀢𑁆𑀣𑀢𑁆𑀢𑀸’𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀬𑁂 𑀢𑁂, 𑀆𑀦𑀦𑁆𑀤, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀲𑁆𑀲𑀢𑀯𑀸𑀤𑀸 𑀢𑁂𑀲𑀫𑁂𑀢𑀁 𑀲𑀤𑁆𑀥𑀺𑀁 [𑀢𑁂𑀲𑀫𑁂𑀢𑀁 𑀮𑀤𑁆𑀥𑀺 (𑀲𑀻.)] 𑀅𑀪𑀯𑀺𑀲𑁆𑀲. 𑀅𑀳𑀜𑁆𑀘𑀸𑀦𑀦𑁆𑀤, 𑀯𑀘𑁆𑀙𑀕𑁄𑀢𑁆𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 ‘𑀦𑀢𑁆𑀣𑀢𑁆𑀢𑀸’𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑀢𑁆𑀣𑀢𑁆𑀢𑀸’𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀬𑁂 𑀢𑁂, 𑀆𑀦𑀦𑁆𑀤, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀘𑁆𑀙𑁂𑀤𑀯𑀸𑀤𑀸 𑀢𑁂𑀲𑀫𑁂𑀢𑀁 𑀲𑀤𑁆𑀥𑀺𑀁 𑀅𑀪𑀯𑀺𑀲𑁆𑀲. 𑀅𑀳𑀜𑁆𑀘𑀸𑀦𑀦𑁆𑀤, 𑀯𑀘𑁆𑀙𑀕𑁄𑀢𑁆𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 ‘𑀅𑀢𑁆𑀣𑀢𑁆𑀢𑀸’𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀅𑀢𑁆𑀣𑀢𑁆𑀢𑀸’𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀅𑀧𑀺 𑀦𑀼 𑀫𑁂 𑀢𑀁, 𑀆𑀦𑀦𑁆𑀤, 𑀅𑀦𑀼𑀮𑁄𑀫𑀁 𑀅𑀪𑀯𑀺𑀲𑁆𑀲 𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀸𑀬 𑁋 ‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀅𑀳𑀜𑁆𑀘𑀸𑀦𑀦𑁆𑀤, 𑀯𑀘𑁆𑀙𑀕𑁄𑀢𑁆𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 ‘𑀦𑀢𑁆𑀣𑀢𑁆𑀢𑀸’𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑀢𑁆𑀣𑀢𑁆𑀢𑀸’𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀲𑀫𑁆𑀫𑀽𑀴𑁆𑀳𑀲𑁆𑀲, 𑀆𑀦𑀦𑁆𑀤, 𑀯𑀘𑁆𑀙𑀕𑁄𑀢𑁆𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀪𑀺𑀬𑁆𑀬𑁄 𑀲𑀫𑁆𑀫𑁄𑀳𑀸𑀬 𑀅𑀪𑀯𑀺𑀲𑁆𑀲 𑁋 ‘𑀅𑀳𑀼𑀯𑀸 𑀫𑁂 𑀦𑀽𑀦 𑀧𑀼𑀩𑁆𑀩𑁂 𑀅𑀢𑁆𑀢𑀸, 𑀲𑁄 𑀏𑀢𑀭𑀳𑀺 𑀦𑀢𑁆𑀣𑀻’’’𑀢𑀺. 𑀤𑀲𑀫𑀁.

𑁧𑁧. 𑀲𑀪𑀺𑀬𑀓𑀘𑁆𑀘𑀸𑀦𑀲𑀼𑀢𑁆𑀢𑀁

𑁪𑁨𑁦. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀲𑀪𑀺𑀬𑁄 𑀓𑀘𑁆𑀘𑀸𑀦𑁄 𑀜𑀸𑀢𑀺𑀓𑁂 𑀯𑀺𑀳𑀭𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁂. 𑀅𑀣 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦𑀸𑀬𑀲𑁆𑀫𑀸 𑀲𑀪𑀺𑀬𑁄 𑀓𑀘𑁆𑀘𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀪𑀺𑀬𑁂𑀦 𑀓𑀘𑁆𑀘𑀸𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀘𑁆𑀙𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀲𑀪𑀺𑀬𑀁 𑀓𑀘𑁆𑀘𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄 𑀪𑁄, 𑀓𑀘𑁆𑀘𑀸𑀦, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀯𑀘𑁆𑀙, 𑀪𑀕𑀯𑀢𑀸 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀧𑀦, 𑀪𑁄 𑀓𑀘𑁆𑀘𑀸𑀦, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀯𑀘𑁆𑀙, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺.

‘‘𑀓𑀺𑀁 𑀦𑀼 𑀔𑁄, 𑀪𑁄 𑀓𑀘𑁆𑀘𑀸𑀦, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀯𑀘𑁆𑀙, 𑀪𑀕𑀯𑀢𑀸 𑁋 ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺. ‘‘𑀓𑀺𑀁 𑀧𑀦, 𑀪𑁄 𑀓𑀘𑁆𑀘𑀸𑀦, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀯𑀘𑁆𑀙, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’’𑀢𑀺.

‘‘‘𑀓𑀺𑀁 𑀦𑀼 𑀔𑁄, 𑀪𑁄 𑀓𑀘𑁆𑀘𑀸𑀦, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀯𑀘𑁆𑀙, 𑀪𑀕𑀯𑀢𑀸 𑁋 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀧𑀦, 𑀪𑁄 𑀓𑀘𑁆𑀘𑀸𑀦, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀯𑀘𑁆𑀙, 𑀪𑀕𑀯𑀢𑀸 𑁋 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀦𑀼 𑀔𑁄, 𑀪𑁄 𑀓𑀘𑁆𑀘𑀸𑀦, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀯𑀘𑁆𑀙, 𑀪𑀕𑀯𑀢𑀸 𑁋 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀤𑁂𑀲𑀺. ‘𑀓𑀺𑀁 𑀧𑀦, 𑀪𑁄 𑀓𑀘𑁆𑀘𑀸𑀦, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑁋 ‘𑀏𑀢𑀫𑁆𑀧𑀺 𑀔𑁄, 𑀯𑀘𑁆𑀙, 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸 𑁋 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀤𑁂𑀲𑀺. 𑀓𑁄 𑀦𑀼 𑀔𑁄, 𑀪𑁄 𑀓𑀘𑁆𑀘𑀸𑀦, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦𑀸’’𑀢𑀺? ‘‘𑀬𑁄 𑀘, 𑀯𑀘𑁆𑀙, 𑀳𑁂𑀢𑀼, 𑀬𑁄 𑀘 𑀧𑀘𑁆𑀘𑀬𑁄 𑀧𑀜𑁆𑀜𑀸𑀧𑀦𑀸𑀬 𑀭𑀽𑀧𑀻𑀢𑀺 𑀯𑀸 𑀅𑀭𑀽𑀧𑀻𑀢𑀺 𑀯𑀸 𑀲𑀜𑁆𑀜𑀻𑀢𑀺 𑀯𑀸 𑀅𑀲𑀜𑁆𑀜𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀯𑀸, 𑀲𑁄 𑀘 𑀳𑁂𑀢𑀼, 𑀲𑁄 𑀘 𑀧𑀘𑁆𑀘𑀬𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑁂𑀬𑁆𑀬. 𑀓𑁂𑀦 𑀦𑀁 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀬𑁆𑀬 𑀭𑀽𑀧𑀻𑀢𑀺 𑀯𑀸 𑀅𑀭𑀽𑀧𑀻𑀢𑀺 𑀯𑀸 𑀲𑀜𑁆𑀜𑀻𑀢𑀺 𑀯𑀸 𑀅𑀲𑀜𑁆𑀜𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀯𑀸’’𑀢𑀺. ‘‘𑀓𑀻𑀯𑀘𑀺𑀭𑀁 𑀧𑀩𑁆𑀩𑀚𑀺𑀢𑁄𑀲𑀺, 𑀪𑁄 𑀓𑀘𑁆𑀘𑀸𑀦𑀸’’𑀢𑀺? ‘‘𑀦𑀘𑀺𑀭𑀁, 𑀆𑀯𑀼𑀲𑁄, 𑀢𑀻𑀡𑀺 𑀯𑀲𑁆𑀲𑀸𑀦𑀻’’𑀢𑀺. ‘‘𑀬𑀲𑁆𑀲𑀧’𑀲𑁆𑀲, 𑀆𑀯𑀼𑀲𑁄, 𑀏𑀢𑀫𑁂𑀢𑁆𑀢𑀓𑁂𑀦 𑀏𑀢𑁆𑀢𑀓𑀫𑁂𑀯 𑀢𑀁𑀧’𑀲𑁆𑀲 𑀩𑀳𑀼, 𑀓𑁄 𑀧𑀦 𑀯𑀸𑀤𑁄 𑀏𑀯𑀁 [𑀓𑁄 𑀧𑀦 𑀯𑀸𑀤𑁄 𑀏𑀯 (𑀲𑀻. 𑀧𑀻.)] 𑀅𑀪𑀺𑀓𑁆𑀓𑀦𑁆𑀢𑁂’’𑀢𑀺! 𑀏𑀓𑀸𑀤𑀲𑀫𑀁.

𑀅𑀩𑁆𑀬𑀸𑀓𑀢𑀲𑀁𑀬𑀼𑀢𑁆𑀢𑀁 𑀲𑀫𑀢𑁆𑀢𑀁.