𑁭. 𑀅𑀚𑁆𑀛𑀢𑁆𑀢𑀸𑀦𑀺𑀘𑁆𑀘𑀳𑁂𑀢𑀼𑀲𑀼𑀢𑁆𑀢𑀁

𑁧𑁪𑁦. ‘‘𑀘𑀓𑁆𑀔𑀼𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁. 𑀬𑁄𑀧𑀺 𑀳𑁂𑀢𑀼, 𑀬𑁄𑀧𑀺 𑀧𑀘𑁆𑀘𑀬𑁄 𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀲𑁄𑀧𑀺 𑀅𑀦𑀺𑀘𑁆𑀘𑁄. 𑀅𑀦𑀺𑀘𑁆𑀘𑀲𑀫𑁆𑀪𑀽𑀢𑀁, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼 𑀓𑀼𑀢𑁄 𑀦𑀺𑀘𑁆𑀘𑀁 𑀪𑀯𑀺𑀲𑁆𑀲𑀢𑀺…𑀧𑁂… 𑀚𑀺𑀯𑁆𑀳𑀸 𑀅𑀦𑀺𑀘𑁆𑀘𑀸. 𑀬𑁄𑀧𑀺 𑀳𑁂𑀢𑀼, 𑀬𑁄𑀧𑀺 𑀧𑀘𑁆𑀘𑀬𑁄 𑀚𑀺𑀯𑁆𑀳𑀸𑀬 𑀉𑀧𑁆𑀧𑀸𑀤𑀸𑀬 𑀲𑁄𑀧𑀺 𑀅𑀦𑀺𑀘𑁆𑀘𑁄. 𑀅𑀦𑀺𑀘𑁆𑀘𑀲𑀫𑁆𑀪𑀽𑀢𑀸, 𑀪𑀺𑀓𑁆𑀔𑀯𑁂, 𑀚𑀺𑀯𑁆𑀳𑀸 𑀓𑀼𑀢𑁄 𑀦𑀺𑀘𑁆𑀘𑀸 𑀪𑀯𑀺𑀲𑁆𑀲𑀢𑀺…𑀧𑁂… 𑀫𑀦𑁄 𑀅𑀦𑀺𑀘𑁆𑀘𑁄. 𑀬𑁄𑀧𑀺, 𑀪𑀺𑀓𑁆𑀔𑀯𑁂, 𑀳𑁂𑀢𑀼 𑀬𑁄𑀧𑀺 𑀧𑀘𑁆𑀘𑀬𑁄 𑀫𑀦𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀲𑁄𑀧𑀺 𑀅𑀦𑀺𑀘𑁆𑀘𑁄. 𑀅𑀦𑀺𑀘𑁆𑀘𑀲𑀫𑁆𑀪𑀽𑀢𑁄, 𑀪𑀺𑀓𑁆𑀔𑀯𑁂, 𑀫𑀦𑁄 𑀓𑀼𑀢𑁄 𑀦𑀺𑀘𑁆𑀘𑁄 𑀪𑀯𑀺𑀲𑁆𑀲𑀢𑀺! 𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀘𑀓𑁆𑀔𑀼𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺…𑀧𑁂… 𑀚𑀺𑀯𑁆𑀳𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺…𑀧𑁂… 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺; 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺; 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀲𑀢𑁆𑀢𑀫𑀁.