𑁩. 𑀧𑀞𑀫𑀭𑀽𑀧𑀸𑀭𑀸𑀫𑀲𑀼𑀢𑁆𑀢𑀁

𑁧𑁩𑁬. ‘‘𑀭𑀽𑀧𑀸𑀭𑀸𑀫𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀫𑀦𑀼𑀲𑁆𑀲𑀸 𑀭𑀽𑀧𑀭𑀢𑀸 𑀭𑀽𑀧𑀲𑀫𑁆𑀫𑀼𑀤𑀺𑀢𑀸. 𑀭𑀽𑀧𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀸 𑀤𑀼𑀓𑁆𑀔𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀫𑀦𑀼𑀲𑁆𑀲𑀸 𑀯𑀺𑀳𑀭𑀦𑁆𑀢𑀺. 𑀲𑀤𑁆𑀤𑀸𑀭𑀸𑀫𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀫𑀦𑀼𑀲𑁆𑀲𑀸 𑀲𑀤𑁆𑀤𑀭𑀢𑀸 𑀲𑀤𑁆𑀤𑀲𑀫𑁆𑀫𑀼𑀤𑀺𑀢𑀸. 𑀲𑀤𑁆𑀤𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀸 𑀤𑀼𑀓𑁆𑀔𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀫𑀦𑀼𑀲𑁆𑀲𑀸 𑀯𑀺𑀳𑀭𑀦𑁆𑀢𑀺. 𑀕𑀦𑁆𑀥𑀸𑀭𑀸𑀫𑀸… 𑀭𑀲𑀸𑀭𑀸𑀫𑀸… 𑀨𑁄𑀝𑁆𑀞𑀩𑁆𑀩𑀸𑀭𑀸𑀫𑀸… 𑀥𑀫𑁆𑀫𑀸𑀭𑀸𑀫𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀫𑀦𑀼𑀲𑁆𑀲𑀸 𑀥𑀫𑁆𑀫𑀭𑀢𑀸 𑀥𑀫𑁆𑀫𑀲𑀫𑁆𑀫𑀼𑀤𑀺𑀢𑀸. 𑀥𑀫𑁆𑀫𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀸 𑀤𑀼𑀓𑁆𑀔𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀫𑀦𑀼𑀲𑁆𑀲𑀸 𑀯𑀺𑀳𑀭𑀦𑁆𑀢𑀺. 𑀢𑀣𑀸𑀕𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀭𑀽𑀧𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀁 𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀦 𑀭𑀽𑀧𑀸𑀭𑀸𑀫𑁄 𑀦 𑀭𑀽𑀧𑀭𑀢𑁄 𑀦 𑀭𑀽𑀧𑀲𑀫𑁆𑀫𑀼𑀤𑀺𑀢𑁄. 𑀭𑀽𑀧𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀼𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀯𑀺𑀳𑀭𑀢𑀺. 𑀲𑀤𑁆𑀤𑀸𑀦𑀁… 𑀕𑀦𑁆𑀥𑀸𑀦𑀁… 𑀭𑀲𑀸𑀦𑀁… 𑀨𑁄𑀝𑁆𑀞𑀩𑁆𑀩𑀸𑀦𑀁… 𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀦 𑀥𑀫𑁆𑀫𑀸𑀭𑀸𑀫𑁄, 𑀦 𑀥𑀫𑁆𑀫𑀭𑀢𑁄, 𑀦 𑀥𑀫𑁆𑀫𑀲𑀫𑁆𑀫𑀼𑀤𑀺𑀢𑁄. 𑀥𑀫𑁆𑀫𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀼𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀯𑀺𑀳𑀭𑀢𑀺’’. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸, 𑀨𑀲𑁆𑀲𑀸 𑀥𑀫𑁆𑀫𑀸 𑀘 𑀓𑁂𑀯𑀮𑀸;

𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀘, 𑀬𑀸𑀯𑀢𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀏𑀢𑁂 𑀯𑁄 𑀲𑀼𑀔𑀲𑀫𑁆𑀫𑀢𑀸;

𑀬𑀢𑁆𑀣 𑀘𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀁 𑀢𑁂𑀲𑀁 𑀤𑀼𑀓𑁆𑀔𑀲𑀫𑁆𑀫𑀢𑀁.

‘‘𑀲𑀼𑀔𑀁 [𑀲𑀼𑀔𑀦𑁆𑀢𑀺 (𑀲𑀻.)] 𑀤𑀺𑀝𑁆𑀞𑀫𑀭𑀺𑀬𑁂𑀪𑀺, 𑀲𑀓𑁆𑀓𑀸𑀬𑀲𑁆𑀲 𑀦𑀺𑀭𑁄𑀥𑀦𑀁;

𑀧𑀘𑁆𑀘𑀦𑀻𑀓𑀫𑀺𑀤𑀁 𑀳𑁄𑀢𑀺, 𑀲𑀩𑁆𑀩𑀮𑁄𑀓𑁂𑀦 𑀧𑀲𑁆𑀲𑀢𑀁.

‘‘𑀬𑀁 𑀧𑀭𑁂 𑀲𑀼𑀔𑀢𑁄 𑀆𑀳𑀼, 𑀢𑀤𑀭𑀺𑀬𑀸 𑀆𑀳𑀼 𑀤𑀼𑀓𑁆𑀔𑀢𑁄;

𑀬𑀁 𑀧𑀭𑁂 𑀤𑀼𑀓𑁆𑀔𑀢𑁄 𑀆𑀳𑀼, 𑀢𑀤𑀭𑀺𑀬𑀸 𑀲𑀼𑀔𑀢𑁄 𑀯𑀺𑀤𑀽.

‘‘𑀧𑀲𑁆𑀲 𑀥𑀫𑁆𑀫𑀁 𑀤𑀼𑀭𑀸𑀚𑀸𑀦𑀁, 𑀲𑀫𑁆𑀫𑀽𑀴𑁆𑀳𑁂𑀢𑁆𑀣 𑀅𑀯𑀺𑀤𑁆𑀤𑀲𑀼;

𑀦𑀺𑀯𑀼𑀢𑀸𑀦𑀁 𑀢𑀫𑁄 𑀳𑁄𑀢𑀺, 𑀅𑀦𑁆𑀥𑀓𑀸𑀭𑁄 𑀅𑀧𑀲𑁆𑀲𑀢𑀁.

‘‘𑀲𑀢𑀜𑁆𑀘 𑀯𑀺𑀯𑀝𑀁 𑀳𑁄𑀢𑀺, 𑀆𑀮𑁄𑀓𑁄 𑀧𑀲𑁆𑀲𑀢𑀸𑀫𑀺;

𑀲𑀦𑁆𑀢𑀺𑀓𑁂 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀕𑁆𑀕𑀸 [𑀫𑀕𑀸 (𑀲𑀻.)] 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸.

‘‘𑀪𑀯𑀭𑀸𑀕𑀧𑀭𑁂𑀢𑁂𑀪𑀺, 𑀪𑀯𑀭𑀸𑀕𑀸𑀦𑀼𑀲𑀸𑀭𑀻𑀪𑀺 [𑀪𑀯𑀲𑁄𑀢𑀸𑀦𑀼𑀲𑀸𑀭𑀺𑀪𑀺 (𑀲𑁆𑀬𑀸. 𑀓𑀁. 𑀧𑀻.), 𑀪𑀯𑀲𑁄𑀢𑀸𑀦𑀼𑀲𑀸𑀭𑀺𑀳𑀺 (𑀲𑀻.)];

𑀫𑀸𑀭𑀥𑁂𑀬𑁆𑀬𑀸𑀦𑀼𑀧𑀦𑁆𑀦𑁂𑀳𑀺, 𑀦𑀸𑀬𑀁 𑀥𑀫𑁆𑀫𑁄 𑀲𑀼𑀲𑀫𑁆𑀩𑀼𑀥𑁄.

‘‘𑀓𑁄 𑀦𑀼 𑀅𑀜𑁆𑀜𑀢𑁆𑀭 𑀫𑀭𑀺𑀬𑁂𑀪𑀺, 𑀧𑀤𑀁 𑀲𑀫𑁆𑀩𑀼𑀤𑁆𑀥𑀼𑀫𑀭𑀳𑀢𑀺;

𑀬𑀁 𑀧𑀤𑀁 𑀲𑀫𑁆𑀫𑀤𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺 𑀅𑀦𑀸𑀲𑀯𑀸’’𑀢𑀺. 𑀢𑀢𑀺𑀬𑀁;