𑁪. 𑀑𑀓𑁆𑀓𑀦𑁆𑀢𑀲𑀁𑀬𑀼𑀢𑁆𑀢𑀁

𑁧. 𑀘𑀓𑁆𑀔𑀼𑀲𑀼𑀢𑁆𑀢𑀁

𑁩𑁦𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀘𑀓𑁆𑀔𑀼𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺; 𑀲𑁄𑀢𑀁 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺; 𑀖𑀸𑀦𑀁 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺; 𑀚𑀺𑀯𑁆𑀳𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻 [𑀯𑀺𑀧𑀭𑀺𑀡𑀸𑀫𑀺𑀦𑀻 𑀅𑀜𑁆𑀜𑀣𑀸𑀪𑀸𑀯𑀺𑀦𑀻 (?)]; 𑀓𑀸𑀬𑁄 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻; 𑀫𑀦𑁄 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀬𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑁂 𑀏𑀯𑀁 𑀲𑀤𑁆𑀤𑀳𑀢𑀺 𑀅𑀥𑀺𑀫𑀼𑀘𑁆𑀘𑀢𑀺 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻, 𑀑𑀓𑁆𑀓𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁, 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀑𑀓𑁆𑀓𑀦𑁆𑀢𑁄, 𑀯𑀻𑀢𑀺𑀯𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀁; 𑀅𑀪𑀩𑁆𑀩𑁄 𑀢𑀁 𑀓𑀫𑁆𑀫𑀁 𑀓𑀸𑀢𑀼𑀁, 𑀬𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀯𑀸 𑀉𑀧𑀧𑀚𑁆𑀚𑁂𑀬𑁆𑀬; 𑀅𑀪𑀩𑁆𑀩𑁄 𑀘 [𑀅𑀪𑀩𑁆𑀩𑁄𑀯 (𑀲𑀻. 𑀲𑁆𑀬𑀸. 𑀓𑀁.)] 𑀢𑀸𑀯 𑀓𑀸𑀮𑀁 𑀓𑀸𑀢𑀼𑀁 𑀬𑀸𑀯 𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺’’.

‘‘𑀬𑀲𑁆𑀲 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑀸 𑀏𑀯𑀁 𑀧𑀜𑁆𑀜𑀸𑀬 𑀫𑀢𑁆𑀢𑀲𑁄 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑁋 ‘𑀥𑀫𑁆𑀫𑀸𑀦𑀼𑀲𑀸𑀭𑀻, 𑀑𑀓𑁆𑀓𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁, 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀑𑀓𑁆𑀓𑀦𑁆𑀢𑁄, 𑀯𑀻𑀢𑀺𑀯𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀁; 𑀅𑀪𑀩𑁆𑀩𑁄 𑀢𑀁 𑀓𑀫𑁆𑀫𑀁 𑀓𑀸𑀢𑀼𑀁, 𑀬𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀯𑀸 𑀉𑀧𑀧𑀚𑁆𑀚𑁂𑀬𑁆𑀬; 𑀅𑀪𑀩𑁆𑀩𑁄 𑀘 𑀢𑀸𑀯 𑀓𑀸𑀮𑀁 𑀓𑀸𑀢𑀼𑀁 𑀬𑀸𑀯 𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺’. 𑀬𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑁂 𑀏𑀯𑀁 𑀧𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄’’’𑀢𑀺. 𑀧𑀞𑀫𑀁.

𑁨. 𑀭𑀽𑀧𑀲𑀼𑀢𑁆𑀢𑀁

𑁩𑁦𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀭𑀽𑀧𑀸, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀺𑀦𑁄 𑀅𑀜𑁆𑀜𑀣𑀸𑀪𑀸𑀯𑀺𑀦𑁄; 𑀲𑀤𑁆𑀤𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀺𑀦𑁄 𑀅𑀜𑁆𑀜𑀣𑀸𑀪𑀸𑀯𑀺𑀦𑁄; 𑀕𑀦𑁆𑀥𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀺𑀦𑁄 𑀅𑀜𑁆𑀜𑀣𑀸𑀪𑀸𑀯𑀺𑀦𑁄; 𑀭𑀲𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀺𑀦𑁄 𑀅𑀜𑁆𑀜𑀣𑀸𑀪𑀸𑀯𑀺𑀦𑁄; 𑀨𑁄𑀝𑁆𑀞𑀩𑁆𑀩𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀺𑀦𑁄 𑀅𑀜𑁆𑀜𑀣𑀸𑀪𑀸𑀯𑀺𑀦𑁄; 𑀥𑀫𑁆𑀫𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀺𑀦𑁄 𑀅𑀜𑁆𑀜𑀣𑀸𑀪𑀸𑀯𑀺𑀦𑁄. 𑀬𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑁂 𑀏𑀯𑀁 𑀲𑀤𑁆𑀤𑀳𑀢𑀺 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻, 𑀑𑀓𑁆𑀓𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁, 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀑𑀓𑁆𑀓𑀦𑁆𑀢𑁄, 𑀯𑀻𑀢𑀺𑀯𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀁; 𑀅𑀪𑀩𑁆𑀩𑁄 𑀢𑀁 𑀓𑀫𑁆𑀫𑀁 𑀓𑀸𑀢𑀼𑀁, 𑀬𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀯𑀸 𑀉𑀧𑀧𑀚𑁆𑀚𑁂𑀬𑁆𑀬; 𑀅𑀪𑀩𑁆𑀩𑁄 𑀘 𑀢𑀸𑀯 𑀓𑀸𑀮𑀁 𑀓𑀸𑀢𑀼𑀁 𑀬𑀸𑀯 𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺’’.

‘‘𑀬𑀲𑁆𑀲 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑀸 𑀏𑀯𑀁 𑀧𑀜𑁆𑀜𑀸𑀬 𑀫𑀢𑁆𑀢𑀲𑁄 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑁋 ‘𑀥𑀫𑁆𑀫𑀸𑀦𑀼𑀲𑀸𑀭𑀻, 𑀑𑀓𑁆𑀓𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁, 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀑𑀓𑁆𑀓𑀦𑁆𑀢𑁄, 𑀯𑀻𑀢𑀺𑀯𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀁; 𑀅𑀪𑀩𑁆𑀩𑁄 𑀢𑀁 𑀓𑀫𑁆𑀫𑀁 𑀓𑀸𑀢𑀼𑀁, 𑀬𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀯𑀸 𑀉𑀧𑀧𑀚𑁆𑀚𑁂𑀬𑁆𑀬; 𑀅𑀪𑀩𑁆𑀩𑁄 𑀘 𑀢𑀸𑀯 𑀓𑀸𑀮𑀁 𑀓𑀸𑀢𑀼𑀁 𑀬𑀸𑀯 𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺’. 𑀬𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑁂 𑀏𑀯𑀁 𑀧𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄’’’𑀢𑀺. 𑀤𑀼𑀢𑀺𑀬𑀁.

𑁩. 𑀯𑀺𑀜𑁆𑀜𑀸𑀡𑀲𑀼𑀢𑁆𑀢𑀁

𑁩𑁦𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺; 𑀲𑁄𑀢𑀯𑀺𑀜𑁆𑀜𑀸𑀡𑀁… 𑀖𑀸𑀦𑀯𑀺𑀜𑁆𑀜𑀸𑀡𑀁… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁… 𑀓𑀸𑀬𑀯𑀺𑀜𑁆𑀜𑀸𑀡𑀁… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺. 𑀬𑁄 𑀪𑀺𑀓𑁆𑀔𑀯𑁂…𑀧𑁂… 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄’’𑀢𑀺. 𑀢𑀢𑀺𑀬𑀁.

𑁪. 𑀲𑀫𑁆𑀨𑀲𑁆𑀲𑀲𑀼𑀢𑁆𑀢𑀁

𑁩𑁦𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻; 𑀲𑁄𑀢𑀲𑀫𑁆𑀨𑀲𑁆𑀲𑁄… 𑀖𑀸𑀦𑀲𑀫𑁆𑀨𑀲𑁆𑀲𑁄… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄… 𑀓𑀸𑀬𑀲𑀫𑁆𑀨𑀲𑁆𑀲𑁄… 𑀫𑀦𑁄𑀲𑀫𑁆𑀨𑀲𑁆𑀲𑁄 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀬𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑁂 𑀏𑀯𑀁 𑀲𑀤𑁆𑀤𑀳𑀢𑀺 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘𑀲𑀤𑁆𑀥𑀸𑀦𑀼𑀲𑀸𑀭𑀻…𑀧𑁂… 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄’’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀲𑀫𑁆𑀨𑀲𑁆𑀲𑀚𑀸𑀲𑀼𑀢𑁆𑀢𑀁

𑁩𑁦𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻; 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀬𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑁂 𑀏𑀯𑀁 𑀲𑀤𑁆𑀤𑀳𑀢𑀺 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘𑀲𑀤𑁆𑀥𑀸𑀦𑀼𑀲𑀸𑀭𑀻…𑀧𑁂… 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄’’’𑀢𑀺. 𑀧𑀜𑁆𑀘𑀫𑀁.

𑁬. 𑀭𑀽𑀧𑀲𑀜𑁆𑀜𑀸𑀲𑀼𑀢𑁆𑀢𑀁

𑁩𑁦𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀭𑀽𑀧𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻; 𑀲𑀤𑁆𑀤𑀲𑀜𑁆𑀜𑀸… 𑀕𑀦𑁆𑀥𑀲𑀜𑁆𑀜𑀸… 𑀭𑀲𑀲𑀜𑁆𑀜𑀸… 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸… 𑀥𑀫𑁆𑀫𑀲𑀜𑁆𑀜𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀬𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑁂 𑀏𑀯𑀁 𑀲𑀤𑁆𑀤𑀳𑀢𑀺 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘𑀲𑀤𑁆𑀥𑀸𑀦𑀼𑀲𑀸𑀭𑀻…𑀧𑁂… 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄’’’𑀢𑀺. 𑀙𑀝𑁆𑀞𑀁.

𑁭. 𑀭𑀽𑀧𑀲𑀜𑁆𑀘𑁂𑀢𑀦𑀸𑀲𑀼𑀢𑁆𑀢𑀁

𑁩𑁦𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀭𑀽𑀧𑀲𑀜𑁆𑀘𑁂𑀢𑀦𑀸, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻; 𑀲𑀤𑁆𑀤𑀲𑀜𑁆𑀘𑁂𑀢𑀦𑀸… 𑀕𑀦𑁆𑀥𑀲𑀜𑁆𑀘𑁂𑀢𑀦𑀸… 𑀭𑀲𑀲𑀜𑁆𑀘𑁂𑀢𑀦𑀸… 𑀨𑁄𑀝𑁆𑀞𑀩𑁆𑀩𑀲𑀜𑁆𑀘𑁂𑀢𑀦𑀸… 𑀥𑀫𑁆𑀫𑀲𑀜𑁆𑀘𑁂𑀢𑀦𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀬𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑁂 𑀏𑀯𑀁 𑀲𑀤𑁆𑀤𑀳𑀢𑀺 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘𑀲𑀤𑁆𑀥𑀸𑀦𑀼𑀲𑀸𑀭𑀻…𑀧𑁂… 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄’’’𑀢𑀺. 𑀲𑀢𑁆𑀢𑀫𑀁.

𑁮. 𑀭𑀽𑀧𑀢𑀡𑁆𑀳𑀸𑀲𑀼𑀢𑁆𑀢𑀁

𑁩𑁦𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀭𑀽𑀧𑀢𑀡𑁆𑀳𑀸, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻; 𑀲𑀤𑁆𑀤𑀢𑀡𑁆𑀳𑀸… 𑀕𑀦𑁆𑀥𑀢𑀡𑁆𑀳𑀸… 𑀭𑀲𑀢𑀡𑁆𑀳𑀸… 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸… 𑀥𑀫𑁆𑀫𑀢𑀡𑁆𑀳𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀬𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑁂 𑀏𑀯𑀁 𑀲𑀤𑁆𑀤𑀳𑀢𑀺 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘𑀲𑀤𑁆𑀥𑀸𑀦𑀼𑀲𑀸𑀭𑀻…𑀧𑁂… 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄’’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀣𑀯𑀻𑀥𑀸𑀢𑀼𑀲𑀼𑀢𑁆𑀢𑀁

𑁩𑁧𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀣𑀯𑀻𑀥𑀸𑀢𑀼, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻; 𑀆𑀧𑁄𑀥𑀸𑀢𑀼… 𑀢𑁂𑀚𑁄𑀥𑀸𑀢𑀼… 𑀯𑀸𑀬𑁄𑀥𑀸𑀢𑀼… 𑀆𑀓𑀸𑀲𑀥𑀸𑀢𑀼… 𑀯𑀺𑀜𑁆𑀜𑀸𑀡𑀥𑀸𑀢𑀼 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻. 𑀬𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑁂 𑀏𑀯𑀁 𑀲𑀤𑁆𑀤𑀳𑀢𑀺 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘𑀲𑀤𑁆𑀥𑀸𑀦𑀼𑀲𑀸𑀭𑀻…𑀧𑁂… 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄’’’𑀢𑀺. 𑀦𑀯𑀫𑀁.

𑁧𑁦. 𑀔𑀦𑁆𑀥𑀲𑀼𑀢𑁆𑀢𑀁

𑁩𑁧𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺; 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻; 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀯𑀺𑀧𑀭𑀺𑀡𑀸𑀫𑀺𑀦𑁄 𑀅𑀜𑁆𑀜𑀣𑀸𑀪𑀸𑀯𑀺𑀦𑁄; 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺. 𑀬𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑁂 𑀏𑀯𑀁 𑀲𑀤𑁆𑀤𑀳𑀢𑀺 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻, 𑀑𑀓𑁆𑀓𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁, 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀑𑀓𑁆𑀓𑀦𑁆𑀢𑁄, 𑀯𑀻𑀢𑀺𑀯𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀁; 𑀅𑀪𑀩𑁆𑀩𑁄 𑀢𑀁 𑀓𑀫𑁆𑀫𑀁 𑀓𑀸𑀢𑀼𑀁, 𑀬𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀯𑀸 𑀉𑀧𑀧𑀚𑁆𑀚𑁂𑀬𑁆𑀬; 𑀅𑀪𑀩𑁆𑀩𑁄 𑀘 𑀢𑀸𑀯 𑀓𑀸𑀮𑀁 𑀓𑀸𑀢𑀼𑀁 𑀬𑀸𑀯 𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺’’.

‘‘𑀬𑀲𑁆𑀲 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑀸 𑀏𑀯𑀁 𑀧𑀜𑁆𑀜𑀸𑀬 𑀫𑀢𑁆𑀢𑀲𑁄 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑁋 ‘𑀥𑀫𑁆𑀫𑀸𑀦𑀼𑀲𑀸𑀭𑀻, 𑀑𑀓𑁆𑀓𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁, 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀑𑀓𑁆𑀓𑀦𑁆𑀢𑁄, 𑀯𑀻𑀢𑀺𑀯𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀁; 𑀅𑀪𑀩𑁆𑀩𑁄 𑀢𑀁 𑀓𑀫𑁆𑀫𑀁 𑀓𑀸𑀢𑀼𑀁, 𑀬𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀯𑀸 𑀉𑀧𑀧𑀚𑁆𑀚𑁂𑀬𑁆𑀬; 𑀅𑀪𑀩𑁆𑀩𑁄 𑀘 𑀢𑀸𑀯 𑀓𑀸𑀮𑀁 𑀓𑀸𑀢𑀼𑀁 𑀬𑀸𑀯 𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺’. 𑀬𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀥𑀫𑁆𑀫𑁂 𑀏𑀯𑀁 𑀧𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑁋 ‘𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄’’’𑀢𑀺. 𑀤𑀲𑀫𑀁.

𑀑𑀓𑁆𑀓𑀦𑁆𑀢𑀲𑀁𑀬𑀼𑀢𑁆𑀢𑀁 [𑀑𑀓𑁆𑀓𑀦𑁆𑀢𑀺𑀓𑀲𑀁𑀬𑀼𑀢𑁆𑀢𑀁 (𑀧𑀻. 𑀓.)] 𑀲𑀫𑀢𑁆𑀢𑀁.