𑁫𑁫. 𑀲𑀸𑀢𑀘𑁆𑀘𑀫𑀽𑀮𑀓𑀲𑀧𑁆𑀧𑀸𑀬𑀓𑀸𑀭𑀻𑀲𑀼𑀢𑁆𑀢𑀁

𑁭𑁧𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀘𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀛𑀸𑀬𑀻. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀛𑀸𑀬𑀻 𑀲𑀫𑀸𑀥𑀺𑀲𑁆𑀫𑀺𑀁 𑀲𑀸𑀢𑀘𑁆𑀘𑀓𑀸𑀭𑀻 𑀳𑁄𑀢𑀺, 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀲𑀧𑁆𑀧𑀸𑀬𑀓𑀸𑀭𑀻. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀛𑀸𑀬𑀻 𑀲𑀫𑀸𑀥𑀺𑀲𑁆𑀫𑀺𑀁 𑀲𑀧𑁆𑀧𑀸𑀬𑀓𑀸𑀭𑀻 𑀳𑁄𑀢𑀺, 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀲𑀸𑀢𑀘𑁆𑀘𑀓𑀸𑀭𑀻. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀛𑀸𑀬𑀻 𑀦𑁂𑀯 𑀲𑀫𑀸𑀥𑀺𑀲𑁆𑀫𑀺𑀁 𑀲𑀸𑀢𑀘𑁆𑀘𑀓𑀸𑀭𑀻 𑀳𑁄𑀢𑀺, 𑀦 𑀘 𑀲𑀫𑀸𑀥𑀺𑀲𑁆𑀫𑀺𑀁 𑀲𑀧𑁆𑀧𑀸𑀬𑀓𑀸𑀭𑀻. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀛𑀸𑀬𑀻 𑀲𑀫𑀸𑀥𑀺𑀲𑁆𑀫𑀺𑀁 𑀲𑀸𑀢𑀘𑁆𑀘𑀓𑀸𑀭𑀻 𑀘 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀲𑀧𑁆𑀧𑀸𑀬𑀓𑀸𑀭𑀻 𑀘. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀛𑀸𑀬𑀻 𑀲𑀫𑀸𑀥𑀺𑀲𑁆𑀫𑀺𑀁 𑀲𑀸𑀢𑀘𑁆𑀘𑀓𑀸𑀭𑀻 𑀘 𑀳𑁄𑀢𑀺 𑀲𑀫𑀸𑀥𑀺𑀲𑁆𑀫𑀺𑀁 𑀲𑀧𑁆𑀧𑀸𑀬𑀓𑀸𑀭𑀻 𑀘 𑀅𑀬𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀛𑀸𑀬𑀻𑀦𑀁 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀫𑁄𑀓𑁆𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀕𑀯𑀸 𑀔𑀻𑀭𑀁, 𑀔𑀻𑀭𑀫𑁆𑀳𑀸 𑀤𑀥𑀺, 𑀤𑀥𑀺𑀫𑁆𑀳𑀸 𑀦𑀯𑀦𑀻𑀢𑀁, 𑀦𑀯𑀦𑀻𑀢𑀫𑁆𑀳𑀸 𑀲𑀧𑁆𑀧𑀺, 𑀲𑀧𑁆𑀧𑀺𑀫𑁆𑀳𑀸 𑀲𑀧𑁆𑀧𑀺𑀫𑀡𑁆𑀟𑁄 𑀢𑀢𑁆𑀭 𑀅𑀕𑁆𑀕𑀫𑀓𑁆𑀔𑀸𑀬𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀛𑀸𑀬𑀻 𑀲𑀫𑀸𑀥𑀺𑀲𑁆𑀫𑀺𑀁 𑀲𑀸𑀢𑀘𑁆𑀘𑀓𑀸𑀭𑀻 𑀘 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀲𑀧𑁆𑀧𑀸𑀬𑀓𑀸𑀭𑀻 𑀅𑀬𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀛𑀸𑀬𑀻𑀦𑀁 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀫𑁄𑀓𑁆𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘𑀸’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺. 𑀧𑀜𑁆𑀘𑀧𑀜𑁆𑀜𑀸𑀲𑀫𑀁. (𑀬𑀣𑀸 𑀧𑀜𑁆𑀘𑀧𑀜𑁆𑀜𑀸𑀲𑀁 𑀯𑁂𑀬𑁆𑀬𑀸𑀓𑀭𑀡𑀸𑀦𑀺 𑀳𑁄𑀦𑁆𑀢𑀺 𑀢𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺.)

𑀛𑀸𑀦𑀲𑀁𑀬𑀼𑀢𑁆𑀢𑀁 [𑀲𑀫𑀸𑀥𑀺𑀲𑀁𑀬𑀼𑀢𑁆𑀢𑀁 (𑀲𑁆𑀬𑀸. 𑀓𑀁.)] 𑀲𑀫𑀢𑁆𑀢𑀁.