𑁫. 𑀲𑀫𑀸𑀥𑀺𑀫𑀽𑀮𑀓𑀆𑀭𑀫𑁆𑀫𑀡𑀲𑀼𑀢𑁆𑀢𑀁

𑁬𑁬𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀛𑀸𑀬𑀻. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀛𑀸𑀬𑀻 𑀲𑀫𑀸𑀥𑀺𑀲𑁆𑀫𑀺𑀁 𑀲𑀫𑀸𑀥𑀺𑀓𑀼𑀲𑀮𑁄 𑀳𑁄𑀢𑀺, 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀆𑀭𑀫𑁆𑀫𑀡𑀓𑀼𑀲𑀮𑁄. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀛𑀸𑀬𑀻 𑀲𑀫𑀸𑀥𑀺𑀲𑁆𑀫𑀺𑀁 𑀆𑀭𑀫𑁆𑀫𑀡𑀓𑀼𑀲𑀮𑁄 𑀳𑁄𑀢𑀺, 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀲𑀫𑀸𑀥𑀺𑀓𑀼𑀲𑀮𑁄. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀛𑀸𑀬𑀻 𑀦𑁂𑀯 𑀲𑀫𑀸𑀥𑀺𑀲𑁆𑀫𑀺𑀁 𑀲𑀫𑀸𑀥𑀺𑀓𑀼𑀲𑀮𑁄 𑀳𑁄𑀢𑀺, 𑀦 𑀘 𑀲𑀫𑀸𑀥𑀺𑀲𑁆𑀫𑀺𑀁 𑀆𑀭𑀫𑁆𑀫𑀡𑀓𑀼𑀲𑀮𑁄. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀛𑀸𑀬𑀻 𑀲𑀫𑀸𑀥𑀺𑀲𑁆𑀫𑀺𑀁 𑀲𑀫𑀸𑀥𑀺𑀓𑀼𑀲𑀮𑁄 𑀘 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀆𑀭𑀫𑁆𑀫𑀡𑀓𑀼𑀲𑀮𑁄 𑀘. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁆𑀯𑀸𑀬𑀁 𑀛𑀸𑀬𑀻 𑀲𑀫𑀸𑀥𑀺𑀲𑁆𑀫𑀺𑀁 𑀲𑀫𑀸𑀥𑀺𑀓𑀼𑀲𑀮𑁄 𑀘 𑀳𑁄𑀢𑀺 𑀲𑀫𑀸𑀥𑀺𑀲𑁆𑀫𑀺𑀁 𑀆𑀭𑀫𑁆𑀫𑀡𑀓𑀼𑀲𑀮𑁄 𑀘 𑀅𑀬𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀛𑀸𑀬𑀻𑀦𑀁 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀫𑁄𑀓𑁆𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀕𑀯𑀸 𑀔𑀻𑀭𑀁…𑀧𑁂… 𑀧𑀯𑀭𑁄 𑀘𑀸’’𑀢𑀺. 𑀧𑀜𑁆𑀘𑀫𑀁.