𑁨. 𑀫𑀜𑁆𑀜𑀫𑀸𑀦𑀲𑀼𑀢𑁆𑀢𑀁

𑁬𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼…𑀧𑁂… 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. ‘‘𑀫𑀜𑁆𑀜𑀫𑀸𑀦𑁄 𑀔𑁄, 𑀪𑀺𑀓𑁆𑀔𑀼, 𑀩𑀤𑁆𑀥𑁄 𑀫𑀸𑀭𑀲𑁆𑀲; 𑀅𑀫𑀜𑁆𑀜𑀫𑀸𑀦𑁄 𑀫𑀼𑀢𑁆𑀢𑁄 𑀧𑀸𑀧𑀺𑀫𑀢𑁄’’𑀢𑀺. ‘‘𑀅𑀜𑁆𑀜𑀸𑀢𑀁 𑀪𑀕𑀯𑀸, 𑀅𑀜𑁆𑀜𑀸𑀢𑀁 𑀲𑀼𑀕𑀢𑀸’’𑀢𑀺.

‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀲𑀻’’𑀢𑀺? ‘‘𑀭𑀽𑀧𑀁 𑀔𑁄, 𑀪𑀦𑁆𑀢𑁂, 𑀫𑀜𑁆𑀜𑀫𑀸𑀦𑁄 𑀩𑀤𑁆𑀥𑁄 𑀫𑀸𑀭𑀲𑁆𑀲; 𑀅𑀫𑀜𑁆𑀜𑀫𑀸𑀦𑁄 𑀫𑀼𑀢𑁆𑀢𑁄 𑀧𑀸𑀧𑀺𑀫𑀢𑁄. 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀫𑀜𑁆𑀜𑀫𑀸𑀦𑁄 𑀩𑀤𑁆𑀥𑁄 𑀫𑀸𑀭𑀲𑁆𑀲; 𑀅𑀫𑀜𑁆𑀜𑀫𑀸𑀦𑁄 𑀫𑀼𑀢𑁆𑀢𑁄 𑀧𑀸𑀧𑀺𑀫𑀢𑁄. 𑀇𑀫𑀲𑁆𑀲 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀻’’𑀢𑀺.

‘‘𑀲𑀸𑀥𑀼 𑀲𑀸𑀥𑀼, 𑀪𑀺𑀓𑁆𑀔𑀼! 𑀲𑀸𑀥𑀼 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀲𑀺. 𑀭𑀽𑀧𑀁 𑀔𑁄, 𑀪𑀺𑀓𑁆𑀔𑀼, 𑀫𑀜𑁆𑀜𑀫𑀸𑀦𑁄 𑀩𑀤𑁆𑀥𑁄 𑀫𑀸𑀭𑀲𑁆𑀲; 𑀅𑀫𑀜𑁆𑀜𑀫𑀸𑀦𑁄 𑀫𑀼𑀢𑁆𑀢𑁄 𑀧𑀸𑀧𑀺𑀫𑀢𑁄. 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀫𑀜𑁆𑀜𑀫𑀸𑀦𑁄 𑀩𑀤𑁆𑀥𑁄 𑀫𑀸𑀭𑀲𑁆𑀲; 𑀅𑀫𑀜𑁆𑀜𑀫𑀸𑀦𑁄 𑀫𑀼𑀢𑁆𑀢𑁄 𑀧𑀸𑀧𑀺𑀫𑀢𑁄. 𑀇𑀫𑀲𑁆𑀲 𑀔𑁄, 𑀪𑀺𑀓𑁆𑀔𑀼, 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺…𑀧𑁂… 𑀅𑀜𑁆𑀜𑀢𑀭𑁄 𑀘 𑀧𑀦 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺. 𑀤𑀼𑀢𑀺𑀬𑀁.