𑁬. 𑀉𑀧𑀬𑀯𑀕𑁆𑀕𑁄

𑁧. 𑀉𑀧𑀬𑀲𑀼𑀢𑁆𑀢𑀁

𑁫𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀉𑀧𑀬𑁄 [𑀉𑀧𑀸𑀬𑁄 (𑀩𑀳𑀽𑀲𑀼)], 𑀪𑀺𑀓𑁆𑀔𑀯𑁂, 𑀅𑀯𑀺𑀫𑀼𑀢𑁆𑀢𑁄, 𑀅𑀦𑀼𑀧𑀬𑁄 𑀯𑀺𑀫𑀼𑀢𑁆𑀢𑁄. 𑀭𑀽𑀧𑀼𑀧𑀬𑀁 [𑀭𑀽𑀧𑀽𑀧𑀸𑀬𑀁 (𑀲𑀻. 𑀲𑁆𑀬𑀸. 𑀓𑀁.), 𑀭𑀽𑀧𑀼𑀧𑀸𑀬𑀁 (𑀧𑀻. 𑀓.)] 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀭𑀽𑀧𑀸𑀭𑀫𑁆𑀫𑀡𑀁 𑀭𑀽𑀧𑀧𑁆𑀧𑀢𑀺𑀝𑁆𑀞𑀁 𑀦𑀦𑁆𑀤𑀽𑀧𑀲𑁂𑀘𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬. 𑀯𑁂𑀤𑀦𑀼𑀧𑀬𑀁 𑀯𑀸…𑀧𑁂… 𑀲𑀜𑁆𑀜𑀼𑀧𑀬𑀁 𑀯𑀸…𑀧𑁂… 𑀲𑀗𑁆𑀔𑀸𑀭𑀼𑀧𑀬𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀲𑀗𑁆𑀔𑀸𑀭𑀧𑁆𑀧𑀢𑀺𑀝𑁆𑀞𑀁 𑀦𑀦𑁆𑀤𑀽𑀧𑀲𑁂𑀘𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬’’.

‘‘𑀬𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀳𑀫𑀜𑁆𑀜𑀢𑁆𑀭 𑀭𑀽𑀧𑀸 𑀅𑀜𑁆𑀜𑀢𑁆𑀭 𑀯𑁂𑀤𑀦𑀸𑀬 𑀅𑀜𑁆𑀜𑀢𑁆𑀭 𑀲𑀜𑁆𑀜𑀸𑀬 𑀅𑀜𑁆𑀜𑀢𑁆𑀭 𑀲𑀗𑁆𑀔𑀸𑀭𑁂𑀳𑀺 𑀯𑀺𑀜𑁆𑀜𑀸𑀡𑀲𑁆𑀲 𑀆𑀕𑀢𑀺𑀁 𑀯𑀸 𑀕𑀢𑀺𑀁 𑀯𑀸 𑀘𑀼𑀢𑀺𑀁 𑀯𑀸 𑀉𑀧𑀧𑀢𑁆𑀢𑀺𑀁 𑀯𑀸 𑀯𑀼𑀤𑁆𑀥𑀺𑀁 𑀯𑀸 𑀯𑀺𑀭𑀽𑀴𑁆𑀳𑀺𑀁 𑀯𑀸 𑀯𑁂𑀧𑀼𑀮𑁆𑀮𑀁 𑀯𑀸 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀻’𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀭𑀽𑀧𑀥𑀸𑀢𑀼𑀬𑀸 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀧𑀳𑀻𑀦𑁄 𑀳𑁄𑀢𑀺. 𑀭𑀸𑀕𑀲𑁆𑀲 𑀧𑀳𑀸𑀦𑀸 𑀯𑁄𑀘𑁆𑀙𑀺𑀚𑁆𑀚𑀢𑀸𑀭𑀫𑁆𑀫𑀡𑀁 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀳𑁄𑀢𑀺. 𑀯𑁂𑀤𑀦𑀸𑀥𑀸𑀢𑀼𑀬𑀸 𑀘𑁂, 𑀪𑀺𑀓𑁆𑀔𑀯𑁂… 𑀲𑀜𑁆𑀜𑀸𑀥𑀸𑀢𑀼𑀬𑀸 𑀘𑁂 𑀪𑀺𑀓𑁆𑀔𑀯𑁂… 𑀲𑀗𑁆𑀔𑀸𑀭𑀥𑀸𑀢𑀼𑀬𑀸 𑀘𑁂 𑀪𑀺𑀓𑁆𑀔𑀯𑁂… 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀧𑀳𑀻𑀦𑁄 𑀳𑁄𑀢𑀺. 𑀭𑀸𑀕𑀲𑁆𑀲 𑀧𑀳𑀸𑀦𑀸 𑀯𑁄𑀘𑁆𑀙𑀺𑀚𑁆𑀚𑀢𑀸𑀭𑀫𑁆𑀫𑀡𑀁 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀳𑁄𑀢𑀺. 𑀢𑀤𑀧𑁆𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀅𑀯𑀺𑀭𑀽𑀴𑁆𑀳𑀁 𑀅𑀦𑀪𑀺𑀲𑀗𑁆𑀔𑀘𑁆𑀘𑀯𑀺𑀫𑀼𑀢𑁆𑀢𑀁. 𑀯𑀺𑀫𑀼𑀢𑁆𑀢𑀢𑁆𑀢𑀸 𑀞𑀺𑀢𑀁. 𑀞𑀺𑀢𑀢𑁆𑀢𑀸 𑀲𑀦𑁆𑀢𑀼𑀲𑀺𑀢𑀁. 𑀲𑀦𑁆𑀢𑀼𑀲𑀺𑀢𑀢𑁆𑀢𑀸 𑀦 𑀧𑀭𑀺𑀢𑀲𑁆𑀲𑀢𑀺. 𑀅𑀧𑀭𑀺𑀢𑀲𑁆𑀲𑀁 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀧𑀞𑀫𑀁.

𑁨. 𑀩𑀻𑀚𑀲𑀼𑀢𑁆𑀢𑀁

𑁫𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀻𑀚𑀚𑀸𑀢𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀫𑀽𑀮𑀩𑀻𑀚𑀁, 𑀔𑀦𑁆𑀥𑀩𑀻𑀚𑀁, 𑀅𑀕𑁆𑀕𑀩𑀻𑀚𑀁, 𑀨𑀮𑀼𑀩𑀻𑀚𑀁, 𑀩𑀻𑀚𑀩𑀻𑀚𑀜𑁆𑀜𑁂𑀯 𑀧𑀜𑁆𑀘𑀫𑀁. 𑀇𑀫𑀸𑀦𑀺 𑀘𑀲𑁆𑀲𑀼, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀧𑀽𑀢𑀺𑀓𑀸𑀦𑀺 𑀅𑀯𑀸𑀢𑀸𑀢𑀧𑀳𑀢𑀸𑀦𑀺 𑀲𑀸𑀭𑀸𑀤𑀸𑀦𑀺 [𑀲𑀸𑀭𑀸𑀤𑀸𑀬𑀻𑀦𑀺 (𑀓𑀢𑁆𑀣𑀘𑀺)] 𑀲𑀼𑀔𑀲𑀬𑀺𑀢𑀸𑀦𑀺, 𑀧𑀣𑀯𑀻 [𑀧𑀞𑀯𑀻 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀘 𑀦𑀸𑀲𑁆𑀲, 𑀆𑀧𑁄 𑀘 𑀦𑀸𑀲𑁆𑀲; 𑀅𑀧𑀺 𑀦𑀼𑀫𑀸𑀦𑀺 [𑀅𑀧𑀺 𑀦𑀼 𑀇𑀫𑀸𑀦𑀺 (𑀲𑀻. 𑀧𑀻.)], 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀇𑀫𑀸𑀦𑀺 𑀘𑀲𑁆𑀲𑀼, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀺 𑀅𑀔𑀡𑁆𑀟𑀸𑀦𑀺…𑀧𑁂… 𑀲𑀼𑀔𑀲𑀬𑀺𑀢𑀸𑀦𑀺, 𑀧𑀣𑀯𑀻 𑀘 𑀅𑀲𑁆𑀲, 𑀆𑀧𑁄 𑀘 𑀅𑀲𑁆𑀲; 𑀅𑀧𑀺 𑀦𑀼𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀣𑀯𑀻𑀥𑀸𑀢𑀼, 𑀏𑀯𑀁 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀤𑀝𑁆𑀞𑀩𑁆𑀩𑀸. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀧𑁄𑀥𑀸𑀢𑀼, 𑀏𑀯𑀁 𑀦𑀦𑁆𑀤𑀺𑀭𑀸𑀕𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀺, 𑀏𑀯𑀁 𑀯𑀺𑀜𑁆𑀜𑀸𑀡𑀁 𑀲𑀸𑀳𑀸𑀭𑀁 𑀤𑀝𑁆𑀞𑀩𑁆𑀩𑀁’’.

‘‘𑀭𑀽𑀧𑀼𑀧𑀬𑀁, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀭𑀽𑀧𑀸𑀭𑀫𑁆𑀫𑀡𑀁 𑀭𑀽𑀧𑀧𑁆𑀧𑀢𑀺𑀝𑁆𑀞𑀁 𑀦𑀦𑁆𑀤𑀽𑀧𑀲𑁂𑀘𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬. 𑀯𑁂𑀤𑀦𑀼𑀧𑀬𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬…𑀧𑁂… 𑀲𑀜𑁆𑀜𑀼𑀧𑀬𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬…𑀧𑁂… 𑀲𑀗𑁆𑀔𑀸𑀭𑀼𑀧𑀬𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀲𑀗𑁆𑀔𑀸𑀭𑀧𑁆𑀧𑀢𑀺𑀝𑁆𑀞𑀁 𑀦𑀦𑁆𑀤𑀽𑀧𑀲𑁂𑀘𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬.

‘‘𑀭𑀽𑀧𑀥𑀸𑀢𑀼𑀬𑀸 𑀘𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀧𑀳𑀻𑀦𑁄 𑀳𑁄𑀢𑀺. 𑀭𑀸𑀕𑀲𑁆𑀲 𑀧𑀳𑀸𑀦𑀸 𑀯𑁄𑀘𑁆𑀙𑀺𑀚𑁆𑀚𑀢𑀸𑀭𑀫𑁆𑀫𑀡𑀁 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀳𑁄𑀢𑀺. 𑀯𑁂𑀤𑀦𑀸𑀥𑀸𑀢𑀼𑀬𑀸 𑀘𑁂… 𑀲𑀜𑁆𑀜𑀸𑀥𑀸𑀢𑀼𑀬𑀸 𑀘𑁂… 𑀲𑀗𑁆𑀔𑀸𑀭𑀥𑀸𑀢𑀼𑀬𑀸 𑀘𑁂… 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀧𑀳𑀻𑀦𑁄 𑀳𑁄𑀢𑀺. 𑀭𑀸𑀕𑀲𑁆𑀲 𑀧𑀳𑀸𑀦𑀸 𑀯𑁄𑀘𑁆𑀙𑀺𑀚𑁆𑀚𑀢𑀸𑀭𑀫𑁆𑀫𑀡𑀁 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀳𑁄𑀢𑀺. 𑀢𑀤𑀧𑁆𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀅𑀯𑀺𑀭𑀽𑀴𑁆𑀳𑀁 𑀅𑀦𑀪𑀺𑀲𑀗𑁆𑀔𑀘𑁆𑀘𑀯𑀺𑀫𑀼𑀢𑁆𑀢𑀁. 𑀯𑀺𑀫𑀼𑀢𑁆𑀢𑀢𑁆𑀢𑀸 𑀞𑀺𑀢𑀁. 𑀞𑀺𑀢𑀢𑁆𑀢𑀸 𑀲𑀦𑁆𑀢𑀼𑀲𑀺𑀢𑀁. 𑀲𑀦𑁆𑀢𑀼𑀲𑀺𑀢𑀢𑁆𑀢𑀸 𑀦 𑀧𑀭𑀺𑀢𑀲𑁆𑀲𑀢𑀺. 𑀅𑀧𑀭𑀺𑀢𑀲𑁆𑀲𑀁 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀉𑀤𑀸𑀦𑀲𑀼𑀢𑁆𑀢𑀁

𑁫𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑀢𑁆𑀭 𑀔𑁄 𑀪𑀕𑀯𑀸 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘‘𑀦𑁄 𑀘𑀲𑁆𑀲𑀁, 𑀦𑁄 𑀘 𑀫𑁂 𑀲𑀺𑀬𑀸, 𑀦𑀸𑀪𑀯𑀺𑀲𑁆𑀲, 𑀦 𑀫𑁂 𑀪𑀯𑀺𑀲𑁆𑀲𑀢𑀻’𑀢𑀺 𑁋 𑀏𑀯𑀁 𑀅𑀥𑀺𑀫𑀼𑀘𑁆𑀘𑀫𑀸𑀦𑁄 𑀪𑀺𑀓𑁆𑀔𑀼 𑀙𑀺𑀦𑁆𑀤𑁂𑀬𑁆𑀬 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀣𑀸 𑀓𑀣𑀁 𑀧𑀦, 𑀪𑀦𑁆𑀢𑁂, ‘𑀦𑁄 𑀘𑀲𑁆𑀲𑀁, 𑀦𑁄 𑀘 𑀫𑁂 𑀲𑀺𑀬𑀸, 𑀦𑀸𑀪𑀯𑀺𑀲𑁆𑀲, 𑀦 𑀫𑁂 𑀪𑀯𑀺𑀲𑁆𑀲𑀢𑀻’𑀢𑀺 𑁋 𑀏𑀯𑀁 𑀅𑀥𑀺𑀫𑀼𑀘𑁆𑀘𑀫𑀸𑀦𑁄 𑀪𑀺𑀓𑁆𑀔𑀼 𑀙𑀺𑀦𑁆𑀤𑁂𑀬𑁆𑀬 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀻’’𑀢𑀺?

‘‘𑀇𑀥, 𑀪𑀺𑀓𑁆𑀔𑀼, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻…𑀧𑁂… 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁; 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑀺𑀜𑁆𑀜𑀸𑀡𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁; 𑀅𑀢𑁆𑀢𑀦𑀺 𑀯𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁.

‘‘𑀲𑁄 𑀅𑀦𑀺𑀘𑁆𑀘𑀁 𑀭𑀽𑀧𑀁 ‘𑀅𑀦𑀺𑀘𑁆𑀘𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑀁 𑀯𑁂𑀤𑀦𑀁 ‘𑀅𑀦𑀺𑀘𑁆𑀘𑀸 𑀯𑁂𑀤𑀦𑀸’𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑀁 𑀲𑀜𑁆𑀜𑀁 ‘𑀅𑀦𑀺𑀘𑁆𑀘𑀸 𑀲𑀜𑁆𑀜𑀸’𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑁂 𑀲𑀗𑁆𑀔𑀸𑀭𑁂 ‘𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸’𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑀁 𑀯𑀺𑀜𑁆𑀜𑀸𑀡𑀁 ‘𑀅𑀦𑀺𑀘𑁆𑀘𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺.

‘‘𑀤𑀼𑀓𑁆𑀔𑀁 𑀭𑀽𑀧𑀁 ‘𑀤𑀼𑀓𑁆𑀔𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀤𑀼𑀓𑁆𑀔𑀁 𑀯𑁂𑀤𑀦𑀁… 𑀤𑀼𑀓𑁆𑀔𑀁 𑀲𑀜𑁆𑀜𑀁… 𑀤𑀼𑀓𑁆𑀔𑁂 𑀲𑀗𑁆𑀔𑀸𑀭𑁂… 𑀤𑀼𑀓𑁆𑀔𑀁 𑀯𑀺𑀜𑁆𑀜𑀸𑀡𑀁 ‘𑀤𑀼𑀓𑁆𑀔𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺.

‘‘𑀅𑀦𑀢𑁆𑀢𑀁 𑀭𑀽𑀧𑀁 ‘𑀅𑀦𑀢𑁆𑀢𑀸 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀦𑀢𑁆𑀢𑀁 𑀯𑁂𑀤𑀦𑀁 ‘𑀅𑀦𑀢𑁆𑀢𑀸 𑀯𑁂𑀤𑀦𑀸’𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀦𑀢𑁆𑀢𑀁 𑀲𑀜𑁆𑀜𑀁 ‘𑀅𑀦𑀢𑁆𑀢𑀸 𑀲𑀜𑁆𑀜𑀸’𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀦𑀢𑁆𑀢𑁂 𑀲𑀗𑁆𑀔𑀸𑀭𑁂 ‘𑀅𑀦𑀢𑁆𑀢𑀸 𑀲𑀗𑁆𑀔𑀸𑀭𑀸’𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀦𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 ‘𑀅𑀦𑀢𑁆𑀢𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺.

‘‘𑀲𑀗𑁆𑀔𑀢𑀁 𑀭𑀽𑀧𑀁 ‘𑀲𑀗𑁆𑀔𑀢𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀲𑀗𑁆𑀔𑀢𑀁 𑀯𑁂𑀤𑀦𑀁… 𑀲𑀗𑁆𑀔𑀢𑀁 𑀲𑀜𑁆𑀜𑀁… 𑀲𑀗𑁆𑀔𑀢𑁂 𑀲𑀗𑁆𑀔𑀸𑀭𑁂… 𑀲𑀗𑁆𑀔𑀢𑀁 𑀯𑀺𑀜𑁆𑀜𑀸𑀡𑀁 ‘𑀲𑀗𑁆𑀔𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀭𑀽𑀧𑀁 𑀯𑀺𑀪𑀯𑀺𑀲𑁆𑀲𑀢𑀻𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀯𑁂𑀤𑀦𑀸 𑀯𑀺𑀪𑀯𑀺𑀲𑁆𑀲𑀢𑀺… 𑀲𑀜𑁆𑀜𑀸 𑀯𑀺𑀪𑀯𑀺𑀲𑁆𑀲𑀢𑀺… 𑀲𑀗𑁆𑀔𑀸𑀭𑀸 𑀯𑀺𑀪𑀯𑀺𑀲𑁆𑀲𑀦𑁆𑀢𑀺… 𑀯𑀺𑀜𑁆𑀜𑀸𑀡𑀁 𑀯𑀺𑀪𑀯𑀺𑀲𑁆𑀲𑀢𑀻𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺.

‘‘𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀼, 𑀅𑀭𑀺𑀬𑀲𑀸𑀯𑀓𑁄 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀦 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀦 𑀯𑁂𑀤𑀦𑀁… 𑀦 𑀲𑀜𑁆𑀜𑀁… 𑀦 𑀲𑀗𑁆𑀔𑀸𑀭𑁂… 𑀦 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺.

‘‘𑀲𑁄 𑀅𑀦𑀺𑀘𑁆𑀘𑀁 𑀭𑀽𑀧𑀁 ‘𑀅𑀦𑀺𑀘𑁆𑀘𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀦𑀺𑀘𑁆𑀘𑀁 𑀯𑁂𑀤𑀦𑀁… 𑀅𑀦𑀺𑀘𑁆𑀘𑀁 𑀲𑀜𑁆𑀜𑀁… 𑀅𑀦𑀺𑀘𑁆𑀘𑁂 𑀲𑀗𑁆𑀔𑀸𑀭𑁂… 𑀅𑀦𑀺𑀘𑁆𑀘𑀁 𑀯𑀺𑀜𑁆𑀜𑀸𑀡𑀁 ‘𑀅𑀦𑀺𑀘𑁆𑀘𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀤𑀼𑀓𑁆𑀔𑀁 𑀭𑀽𑀧𑀁…𑀧𑁂… 𑀤𑀼𑀓𑁆𑀔𑀁 𑀯𑀺𑀜𑁆𑀜𑀸𑀡𑀁… 𑀅𑀦𑀢𑁆𑀢𑀁 𑀭𑀽𑀧𑀁…𑀧𑁂… 𑀅𑀦𑀢𑁆𑀢𑀁 𑀯𑀺𑀜𑁆𑀜𑀸𑀡𑀁… 𑀲𑀗𑁆𑀔𑀢𑀁 𑀭𑀽𑀧𑀁…𑀧𑁂… 𑀲𑀗𑁆𑀔𑀢𑀁 𑀯𑀺𑀜𑁆𑀜𑀸𑀡𑀁 ‘𑀲𑀗𑁆𑀔𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀭𑀽𑀧𑀁 𑀯𑀺𑀪𑀯𑀺𑀲𑁆𑀲𑀢𑀻𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀯𑀺𑀪𑀯𑀺𑀲𑁆𑀲𑀢𑀻𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

‘‘𑀲𑁄 𑀭𑀽𑀧𑀲𑁆𑀲 𑀯𑀺𑀪𑀯𑀸, 𑀯𑁂𑀤𑀦𑀸𑀬 𑀯𑀺𑀪𑀯𑀸, 𑀲𑀜𑁆𑀜𑀸 𑀯𑀺𑀪𑀯𑀸, 𑀲𑀗𑁆𑀔𑀸𑀭𑀸𑀦𑀁 𑀯𑀺𑀪𑀯𑀸, 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀪𑀯𑀸, 𑀏𑀯𑀁 𑀔𑁄, 𑀪𑀺𑀓𑁆𑀔𑀼, ‘𑀦𑁄 𑀘𑀲𑁆𑀲𑀁, 𑀦𑁄 𑀘 𑀫𑁂 𑀲𑀺𑀬𑀸, 𑀦𑀸𑀪𑀯𑀺𑀲𑁆𑀲, 𑀦 𑀫𑁂 𑀪𑀯𑀺𑀲𑁆𑀲𑀢𑀻’𑀢𑀺 𑁋 𑀏𑀯𑀁 𑀅𑀥𑀺𑀫𑀼𑀘𑁆𑀘𑀫𑀸𑀦𑁄 𑀪𑀺𑀓𑁆𑀔𑀼 𑀙𑀺𑀦𑁆𑀤𑁂𑀬𑁆𑀬 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀻’’𑀢𑀺. ‘‘𑀏𑀯𑀁 𑀅𑀥𑀺𑀫𑀼𑀘𑁆𑀘𑀫𑀸𑀦𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀙𑀺𑀦𑁆𑀤𑁂𑀬𑁆𑀬 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀻’’𑀢𑀺.

‘‘𑀓𑀣𑀁 𑀧𑀦, 𑀪𑀦𑁆𑀢𑁂, 𑀚𑀸𑀦𑀢𑁄 𑀓𑀣𑀁 𑀧𑀲𑁆𑀲𑀢𑁄 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻’’𑀢𑀺? ‘‘𑀇𑀥, 𑀪𑀺𑀓𑁆𑀔𑀼, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀢𑀲𑀺𑀢𑀸𑀬𑁂 𑀞𑀸𑀦𑁂 𑀢𑀸𑀲𑀁 𑀆𑀧𑀚𑁆𑀚𑀢𑀺. 𑀢𑀸𑀲𑁄 𑀳𑁂𑀲𑁄 [𑀳𑁂𑀲𑀸 (𑀓.)] 𑀪𑀺𑀓𑁆𑀔𑀼 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑁋 ‘𑀦𑁄 𑀘𑀲𑁆𑀲𑀁, 𑀦𑁄 𑀘 𑀫𑁂 𑀲𑀺𑀬𑀸, 𑀦𑀸𑀪𑀯𑀺𑀲𑁆𑀲, 𑀦 𑀫𑁂 𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀼, 𑀅𑀭𑀺𑀬𑀲𑀸𑀯𑀓𑁄 𑀅𑀢𑀲𑀺𑀢𑀸𑀬𑁂 𑀞𑀸𑀦𑁂 𑀦 𑀢𑀸𑀲𑀁 𑀆𑀧𑀚𑁆𑀚𑀢𑀺. 𑀦 𑀳𑁂𑀲𑁄 [𑀦 𑀳𑁂𑀲𑀸 (𑀓.)], 𑀪𑀺𑀓𑁆𑀔𑀼, 𑀢𑀸𑀲𑁄 𑀲𑀼𑀢𑀯𑀢𑁄 𑀅𑀭𑀺𑀬𑀲𑀸𑀯𑀓𑀲𑁆𑀲 𑁋 ‘𑀦𑁄 𑀘𑀲𑁆𑀲𑀁, 𑀦𑁄 𑀘 𑀫𑁂 𑀲𑀺𑀬𑀸, 𑀦𑀸𑀪𑀯𑀺𑀲𑁆𑀲, 𑀦 𑀫𑁂 𑀪𑀯𑀺𑀲𑁆𑀲𑀢𑀻’𑀢𑀺. 𑀭𑀽𑀧𑀼𑀧𑀬𑀁 𑀯𑀸, 𑀪𑀺𑀓𑁆𑀔𑀼, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀭𑀽𑀧𑀸𑀭𑀫𑁆𑀫𑀡𑀁 𑀭𑀽𑀧𑀧𑁆𑀧𑀢𑀺𑀝𑁆𑀞𑀁 𑀦𑀦𑁆𑀤𑀽𑀧𑀲𑁂𑀘𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬. 𑀯𑁂𑀤𑀦𑀼𑀧𑀬𑀁 𑀯𑀸, 𑀪𑀺𑀓𑁆𑀔𑀼… 𑀲𑀜𑁆𑀜𑀼𑀧𑀬𑀁 𑀯𑀸, 𑀪𑀺𑀓𑁆𑀔𑀼… 𑀲𑀗𑁆𑀔𑀸𑀭𑀼𑀧𑀬𑀁 𑀯𑀸, 𑀪𑀺𑀓𑁆𑀔𑀼, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀲𑀗𑁆𑀔𑀸𑀭𑀧𑁆𑀧𑀢𑀺𑀝𑁆𑀞𑀁 𑀦𑀦𑁆𑀤𑀽𑀧𑀲𑁂𑀘𑀦𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬.

‘‘𑀬𑁄 [𑀲𑁄 (𑀲𑀩𑁆𑀩𑀢𑁆𑀣)] 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀳𑀫𑀜𑁆𑀜𑀢𑁆𑀭 𑀭𑀽𑀧𑀸, 𑀅𑀜𑁆𑀜𑀢𑁆𑀭 𑀯𑁂𑀤𑀦𑀸𑀬, 𑀅𑀜𑁆𑀜𑀢𑁆𑀭 𑀲𑀜𑁆𑀜𑀸𑀬, 𑀅𑀜𑁆𑀜𑀢𑁆𑀭 𑀲𑀗𑁆𑀔𑀸𑀭𑁂𑀳𑀺 𑀯𑀺𑀜𑁆𑀜𑀸𑀡𑀲𑁆𑀲 𑀆𑀕𑀢𑀺𑀁 𑀯𑀸 𑀕𑀢𑀺𑀁 𑀯𑀸 𑀘𑀼𑀢𑀺𑀁 𑀯𑀸 𑀉𑀧𑀧𑀢𑁆𑀢𑀺𑀁 𑀯𑀸 𑀯𑀼𑀤𑁆𑀥𑀺𑀁 𑀯𑀸 𑀯𑀺𑀭𑀽𑀴𑁆𑀳𑀺𑀁 𑀯𑀸 𑀯𑁂𑀧𑀼𑀮𑁆𑀮𑀁 𑀯𑀸 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀻’𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀭𑀽𑀧𑀥𑀸𑀢𑀼𑀬𑀸 𑀘𑁂, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀧𑀳𑀻𑀦𑁄 𑀳𑁄𑀢𑀺. 𑀭𑀸𑀕𑀲𑁆𑀲 𑀧𑀳𑀸𑀦𑀸 𑀯𑁄𑀘𑁆𑀙𑀺𑀚𑁆𑀚𑀢𑀸𑀭𑀫𑁆𑀫𑀡𑀁 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀳𑁄𑀢𑀺. 𑀯𑁂𑀤𑀦𑀸𑀥𑀸𑀢𑀼𑀬𑀸 𑀘𑁂, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼𑀦𑁄… 𑀲𑀜𑁆𑀜𑀸𑀥𑀸𑀢𑀼𑀬𑀸 𑀘𑁂, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼𑀦𑁄… 𑀲𑀗𑁆𑀔𑀸𑀭𑀥𑀸𑀢𑀼𑀬𑀸 𑀘𑁂, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼𑀦𑁄… 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀘𑁂, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼𑀦𑁄 𑀭𑀸𑀕𑁄 𑀧𑀳𑀻𑀦𑁄 𑀳𑁄𑀢𑀺. 𑀭𑀸𑀕𑀲𑁆𑀲 𑀧𑀳𑀸𑀦𑀸 𑀯𑁄𑀘𑁆𑀙𑀺𑀚𑁆𑀚𑀢𑀸𑀭𑀫𑁆𑀫𑀡𑀁 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦 𑀳𑁄𑀢𑀺. 𑀢𑀤𑀧𑁆𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀅𑀯𑀺𑀭𑀽𑀴𑁆𑀳𑀁 𑀅𑀦𑀪𑀺𑀲𑀗𑁆𑀔𑀸𑀭𑀜𑁆𑀘 𑀯𑀺𑀫𑀼𑀢𑁆𑀢𑀁. 𑀯𑀺𑀫𑀼𑀢𑁆𑀢𑀢𑁆𑀢𑀸 𑀞𑀺𑀢𑀁. 𑀞𑀺𑀢𑀢𑁆𑀢𑀸 𑀲𑀦𑁆𑀢𑀼𑀲𑀺𑀢𑀁. 𑀲𑀦𑁆𑀢𑀼𑀲𑀺𑀢𑀢𑁆𑀢𑀸 𑀦 𑀧𑀭𑀺𑀢𑀲𑁆𑀲𑀢𑀺. 𑀅𑀧𑀭𑀺𑀢𑀲𑁆𑀲𑀁 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. ‘𑀔𑀻𑀡𑀸 𑀚𑀸𑀢𑀺…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀅𑀦𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀉𑀧𑀸𑀤𑀸𑀦𑀧𑀭𑀺𑀧𑀯𑀢𑁆𑀢𑀲𑀼𑀢𑁆𑀢𑀁

𑁫𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀓𑀢𑀫𑁂 𑀧𑀜𑁆𑀘? 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀬𑀸𑀯𑀓𑀻𑀯𑀜𑁆𑀘𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀘𑀢𑀼𑀧𑀭𑀺𑀯𑀝𑁆𑀝𑀁 𑀬𑀣𑀸𑀪𑀽𑀢𑀁 𑀦𑀸𑀩𑁆𑀪𑀜𑁆𑀜𑀸𑀲𑀺𑀁, 𑀦𑁂𑀯 𑀢𑀸𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀁. 𑀬𑀢𑁄 𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀘𑀢𑀼𑀧𑀭𑀺𑀯𑀝𑁆𑀝𑀁 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, 𑀅𑀣𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑁂 𑀮𑁄𑀓𑁂…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀁’’.

‘‘𑀓𑀣𑀜𑁆𑀘 𑀘𑀢𑀼𑀧𑀭𑀺𑀯𑀝𑁆𑀝𑀁? 𑀭𑀽𑀧𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, 𑀭𑀽𑀧𑀲𑀫𑀼𑀤𑀬𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, 𑀭𑀽𑀧𑀦𑀺𑀭𑁄𑀥𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀩𑁆𑀪𑀜𑁆𑀜𑀸𑀲𑀺𑀁; 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀩𑁆𑀪𑀜𑁆𑀜𑀸𑀲𑀺𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀽𑀧𑀁? 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀭𑀽𑀧𑀁. 𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄; 𑀆𑀳𑀸𑀭𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀭𑀽𑀧𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀭𑀽𑀧𑀲𑀫𑀼𑀤𑀬𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀭𑀽𑀧𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀜𑁆𑀜𑀸𑀬 𑀭𑀽𑀧𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑀸, 𑀢𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸. 𑀬𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸, 𑀢𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀕𑀸𑀥𑀦𑁆𑀢𑀺.

‘‘𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀭𑀽𑀧𑀁 𑀅𑀪𑀺𑀜𑁆𑀜𑀸𑀬…𑀧𑁂… 𑀏𑀯𑀁 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀜𑁆𑀜𑀸𑀬, 𑀭𑀽𑀧𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑀸 𑀢𑁂 𑀲𑀼𑀯𑀺𑀫𑀼𑀢𑁆𑀢𑀸. 𑀬𑁂 𑀲𑀼𑀯𑀺𑀫𑀼𑀢𑁆𑀢𑀸 𑀢𑁂 𑀓𑁂𑀯𑀮𑀺𑀦𑁄. 𑀬𑁂 𑀓𑁂𑀯𑀮𑀺𑀦𑁄 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸? 𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀓𑀸𑀬𑀸 𑁋 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸. 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄; 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀯𑁂𑀤𑀦𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑁂𑀤𑀦𑀸𑀲𑀫𑀼𑀤𑀬𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑁂𑀤𑀦𑀸𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀜𑁆𑀜𑀸𑀬 𑀯𑁂𑀤𑀦𑀸𑀬 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑀸, 𑀢𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸. 𑀬𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸, 𑀢𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀕𑀸𑀥𑀦𑁆𑀢𑀺.

‘‘𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀯𑁂𑀤𑀦𑀁 𑀅𑀪𑀺𑀜𑁆𑀜𑀸𑀬…𑀧𑁂… 𑀏𑀯𑀁 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀜𑁆𑀜𑀸𑀬…𑀧𑁂… 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸? 𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀓𑀸𑀬𑀸 𑁋 𑀭𑀽𑀧𑀲𑀜𑁆𑀜𑀸, 𑀲𑀤𑁆𑀤𑀲𑀜𑁆𑀜𑀸, 𑀕𑀦𑁆𑀥𑀲𑀜𑁆𑀜𑀸, 𑀭𑀲𑀲𑀜𑁆𑀜𑀸, 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸, 𑀥𑀫𑁆𑀫𑀲𑀜𑁆𑀜𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸. 𑀨𑀲𑁆𑀲𑀲𑀫𑀼𑀤𑀬𑀸 𑀲𑀜𑁆𑀜𑀸𑀲𑀫𑀼𑀤𑀬𑁄; 𑀨𑀲𑁆𑀲𑀦𑀺𑀭𑁄𑀥𑀸 𑀲𑀜𑁆𑀜𑀸𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀜𑁆𑀜𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺…𑀧𑁂… 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸? 𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀘𑁂𑀢𑀦𑀸𑀓𑀸𑀬𑀸 𑁋 𑀭𑀽𑀧𑀲𑀜𑁆𑀘𑁂𑀢𑀦𑀸, 𑀲𑀤𑁆𑀤𑀲𑀜𑁆𑀘𑁂𑀢𑀦𑀸, 𑀕𑀦𑁆𑀥𑀲𑀜𑁆𑀘𑁂𑀢𑀦𑀸, 𑀭𑀲𑀲𑀜𑁆𑀘𑁂𑀢𑀦𑀸, 𑀨𑁄𑀝𑁆𑀞𑀩𑁆𑀩𑀲𑀜𑁆𑀘𑁂𑀢𑀦𑀸, 𑀥𑀫𑁆𑀫𑀲𑀜𑁆𑀘𑁂𑀢𑀦𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸. 𑀨𑀲𑁆𑀲𑀲𑀫𑀼𑀤𑀬𑀸 𑀲𑀗𑁆𑀔𑀸𑀭𑀲𑀫𑀼𑀤𑀬𑁄; 𑀨𑀲𑁆𑀲𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀲𑀗𑁆𑀔𑀸𑀭𑁂 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀜𑁆𑀜𑀸𑀬 𑀲𑀗𑁆𑀔𑀸𑀭𑀸𑀦𑀁 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑀸, 𑀢𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸. 𑀬𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸, 𑀢𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀕𑀸𑀥𑀦𑁆𑀢𑀺.

‘‘𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀲𑀗𑁆𑀔𑀸𑀭𑁂 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀜𑁆𑀜𑀸𑀬 𑀲𑀗𑁆𑀔𑀸𑀭𑀸𑀦𑀁 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑀸, 𑀢𑁂 𑀲𑀼𑀯𑀺𑀫𑀼𑀢𑁆𑀢𑀸. 𑀬𑁂 𑀲𑀼𑀯𑀺𑀫𑀼𑀢𑁆𑀢𑀸, 𑀢𑁂 𑀓𑁂𑀯𑀮𑀺𑀦𑁄. 𑀬𑁂 𑀓𑁂𑀯𑀮𑀺𑀦𑁄 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁? 𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀓𑀸𑀬𑀸 𑁋 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀫𑀦𑁄𑀯𑀺𑀜𑁆𑀜𑀸𑀡𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁. 𑀦𑀸𑀫𑀭𑀽𑀧𑀲𑀫𑀼𑀤𑀬𑀸 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑁄; 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀯𑀺𑀜𑁆𑀜𑀸𑀡𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀜𑁆𑀜𑀸𑀬 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑀸, 𑀢𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸. 𑀬𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸, 𑀢𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀕𑀸𑀥𑀦𑁆𑀢𑀺.

‘‘𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀯𑀺𑀜𑁆𑀜𑀸𑀡𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀜𑁆𑀜𑀸𑀬 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑀸, 𑀢𑁂 𑀲𑀼𑀯𑀺𑀫𑀼𑀢𑁆𑀢𑀸. 𑀬𑁂 𑀲𑀼𑀯𑀺𑀫𑀼𑀢𑁆𑀢𑀸, 𑀢𑁂 𑀓𑁂𑀯𑀮𑀺𑀦𑁄. 𑀬𑁂 𑀓𑁂𑀯𑀮𑀺𑀦𑁄 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀲𑀢𑁆𑀢𑀝𑁆𑀞𑀸𑀦𑀲𑀼𑀢𑁆𑀢𑀁

𑁫𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀲𑀢𑁆𑀢𑀝𑁆𑀞𑀸𑀦𑀓𑀼𑀲𑀮𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀺𑀯𑀺𑀥𑀽𑀧𑀧𑀭𑀺𑀓𑁆𑀔𑀻 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀢𑀝𑁆𑀞𑀸𑀦𑀓𑀼𑀲𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀽𑀧𑀁 𑀧𑀚𑀸𑀦𑀸𑀢𑀺, 𑀭𑀽𑀧𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀭𑀽𑀧𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺; 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑀁 𑀧𑀚𑀸𑀦𑀸𑀢𑀺, 𑀭𑀽𑀧𑀲𑁆𑀲 𑀆𑀤𑀻𑀦𑀯𑀁 𑀧𑀚𑀸𑀦𑀸𑀢𑀺, 𑀭𑀽𑀧𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀚𑀸𑀦𑀸𑀢𑀺; 𑀯𑁂𑀤𑀦𑀁 𑀧𑀚𑀸𑀦𑀸𑀢𑀺 … 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀧𑀚𑀸𑀦𑀸𑀢𑀺, 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀁 𑀧𑀚𑀸𑀦𑀸𑀢𑀺, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀚𑀸𑀦𑀸𑀢𑀺; 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑀁 𑀧𑀚𑀸𑀦𑀸𑀢𑀺, 𑀯𑀺𑀜𑁆𑀜𑀸𑀡𑀲𑁆𑀲 𑀆𑀤𑀻𑀦𑀯𑀁 𑀧𑀚𑀸𑀦𑀸𑀢𑀺, 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀚𑀸𑀦𑀸𑀢𑀺.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀽𑀧𑀁? 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸, 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀭𑀽𑀧𑀁. 𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄; 𑀆𑀳𑀸𑀭𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑀁 𑀭𑀽𑀧𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑁋 𑀅𑀬𑀁 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑁄. 𑀬𑀁 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁 𑁋 𑀅𑀬𑀁 𑀭𑀽𑀧𑀲𑁆𑀲 𑀆𑀤𑀻𑀦𑀯𑁄. 𑀬𑁄 𑀭𑀽𑀧𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑁋 𑀇𑀤𑀁 𑀭𑀽𑀧𑀲𑁆𑀲 𑀦𑀺𑀲𑁆𑀲𑀭𑀡𑀁.

‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀭𑀽𑀧𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀭𑀽𑀧𑀲𑀫𑀼𑀤𑀬𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀭𑀽𑀧𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀜𑁆𑀜𑀸𑀬; 𑀏𑀯𑀁 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀭𑀽𑀧𑀲𑁆𑀲 𑀆𑀤𑀻𑀦𑀯𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀭𑀽𑀧𑀲𑁆𑀲 𑀦𑀺𑀲𑁆𑀲𑀭𑀡𑀁 𑀅𑀪𑀺𑀜𑁆𑀜𑀸𑀬 𑀭𑀽𑀧𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑀸, 𑀢𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸. 𑀬𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸, 𑀢𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀕𑀸𑀥𑀦𑁆𑀢𑀺.

‘‘𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀭𑀽𑀧𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀭𑀽𑀧𑀲𑀫𑀼𑀤𑀬𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀭𑀽𑀧𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀜𑁆𑀜𑀸𑀬; 𑀏𑀯𑀁 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀭𑀽𑀧𑀲𑁆𑀲 𑀆𑀤𑀻𑀦𑀯𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀭𑀽𑀧𑀲𑁆𑀲 𑀦𑀺𑀲𑁆𑀲𑀭𑀡𑀁 𑀅𑀪𑀺𑀜𑁆𑀜𑀸𑀬 𑀭𑀽𑀧𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑀸, 𑀢𑁂 𑀲𑀼𑀯𑀺𑀫𑀼𑀢𑁆𑀢𑀸. 𑀬𑁂 𑀲𑀼𑀯𑀺𑀫𑀼𑀢𑁆𑀢𑀸, 𑀢𑁂 𑀓𑁂𑀯𑀮𑀺𑀦𑁄. 𑀬𑁂 𑀓𑁂𑀯𑀮𑀺𑀦𑁄 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸? 𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀓𑀸𑀬𑀸 𑁋 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸. 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄; 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑁋 𑀅𑀬𑀁 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄. 𑀬𑀸 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸 𑁋 𑀅𑀬𑀁 𑀯𑁂𑀤𑀦𑀸𑀬 𑀆𑀤𑀻𑀦𑀯𑁄. 𑀬𑁄 𑀯𑁂𑀤𑀦𑀸𑀬 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑁋 𑀇𑀤𑀁 𑀯𑁂𑀤𑀦𑀸𑀬 𑀦𑀺𑀲𑁆𑀲𑀭𑀡𑀁.

‘‘𑀬𑁂 𑀳𑀺, 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀯𑁂𑀤𑀦𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑁂𑀤𑀦𑀸𑀲𑀫𑀼𑀤𑀬𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑁂𑀤𑀦𑀸𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀜𑁆𑀜𑀸𑀬; 𑀏𑀯𑀁 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑁂𑀤𑀦𑀸𑀬 𑀆𑀤𑀻𑀦𑀯𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑁂𑀤𑀦𑀸𑀬 𑀦𑀺𑀲𑁆𑀲𑀭𑀡𑀁 𑀅𑀪𑀺𑀜𑁆𑀜𑀸𑀬 𑀯𑁂𑀤𑀦𑀸𑀬 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑀸, 𑀢𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸. 𑀬𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸, 𑀢𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀕𑀸𑀥𑀦𑁆𑀢𑀺.

‘‘𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀯𑁂𑀤𑀦𑀁 𑀅𑀪𑀺𑀜𑁆𑀜𑀸𑀬…𑀧𑁂… 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸? 𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀘𑁂𑀢𑀦𑀸𑀓𑀸𑀬𑀸 𑁋 𑀭𑀽𑀧𑀲𑀜𑁆𑀘𑁂𑀢𑀦𑀸, 𑀲𑀤𑁆𑀤𑀲𑀜𑁆𑀘𑁂𑀢𑀦𑀸, 𑀕𑀦𑁆𑀥𑀲𑀜𑁆𑀘𑁂𑀢𑀦𑀸, 𑀭𑀲𑀲𑀜𑁆𑀘𑁂𑀢𑀦𑀸, 𑀨𑁄𑀝𑁆𑀞𑀩𑁆𑀩𑀲𑀜𑁆𑀘𑁂𑀢𑀦𑀸, 𑀥𑀫𑁆𑀫𑀲𑀜𑁆𑀘𑁂𑀢𑀦𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸. 𑀨𑀲𑁆𑀲𑀲𑀫𑀼𑀤𑀬𑀸 𑀲𑀗𑁆𑀔𑀸𑀭𑀲𑀫𑀼𑀤𑀬𑁄; 𑀨𑀲𑁆𑀲𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀬𑀁 𑀲𑀗𑁆𑀔𑀸𑀭𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑁋 𑀅𑀬𑀁 𑀲𑀗𑁆𑀔𑀸𑀭𑀸𑀦𑀁 𑀅𑀲𑁆𑀲𑀸𑀤𑁄. 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸 𑁋 𑀅𑀬𑀁 𑀲𑀗𑁆𑀔𑀸𑀭𑀸𑀦𑀁 𑀆𑀤𑀻𑀦𑀯𑁄. 𑀬𑁄 𑀲𑀗𑁆𑀔𑀸𑀭𑁂𑀲𑀼 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑁋 𑀇𑀤𑀁 𑀲𑀗𑁆𑀔𑀸𑀭𑀸𑀦𑀁 𑀦𑀺𑀲𑁆𑀲𑀭𑀡𑀁.

‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀲𑀗𑁆𑀔𑀸𑀭𑁂 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀜𑁆𑀜𑀸𑀬…𑀧𑁂… 𑀲𑀗𑁆𑀔𑀸𑀭𑀸𑀦𑀁 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑀸 𑀢𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸. 𑀬𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸, 𑀢𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀕𑀸𑀥𑀦𑁆𑀢𑀺…𑀧𑁂… 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬.

‘‘𑀬𑀁 𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑁋 𑀅𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑁄. 𑀬𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁 𑁋 𑀅𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀆𑀤𑀻𑀦𑀯𑁄. 𑀬𑁄 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑁋 𑀇𑀤𑀁 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀭𑀡𑀁.

‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀯𑀺𑀜𑁆𑀜𑀸𑀡𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀜𑁆𑀜𑀸𑀬; 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲 𑀆𑀤𑀻𑀦𑀯𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀭𑀡𑀁 𑀅𑀪𑀺𑀜𑁆𑀜𑀸𑀬 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑀸, 𑀢𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸. 𑀬𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸, 𑀢𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀕𑀸𑀥𑀦𑁆𑀢𑀺.

‘‘𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀯𑀁 𑀯𑀺𑀜𑁆𑀜𑀸𑀡𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀪𑀺𑀜𑁆𑀜𑀸𑀬; 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲 𑀆𑀤𑀻𑀦𑀯𑀁 𑀅𑀪𑀺𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀭𑀡𑀁 𑀅𑀪𑀺𑀜𑁆𑀜𑀸𑀬 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑀸, 𑀢𑁂 𑀲𑀼𑀯𑀺𑀫𑀼𑀢𑁆𑀢𑀸. 𑀬𑁂 𑀲𑀼𑀯𑀺𑀫𑀼𑀢𑁆𑀢𑀸, 𑀢𑁂 𑀓𑁂𑀯𑀮𑀺𑀦𑁄. 𑀬𑁂 𑀓𑁂𑀯𑀮𑀺𑀦𑁄 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀢𑀝𑁆𑀞𑀸𑀦𑀓𑀼𑀲𑀮𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀺𑀯𑀺𑀥𑀽𑀧𑀧𑀭𑀺𑀓𑁆𑀔𑀻 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀸𑀢𑀼𑀲𑁄 𑀉𑀧𑀧𑀭𑀺𑀓𑁆𑀔𑀢𑀺, 𑀆𑀬𑀢𑀦𑀲𑁄 𑀉𑀧𑀧𑀭𑀺𑀓𑁆𑀔𑀢𑀺, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁄 𑀉𑀧𑀧𑀭𑀺𑀓𑁆𑀔𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀺𑀯𑀺𑀥𑀽𑀧𑀧𑀭𑀺𑀓𑁆𑀔𑀻 𑀳𑁄𑀢𑀺. 𑀲𑀢𑁆𑀢𑀝𑁆𑀞𑀸𑀦𑀓𑀼𑀲𑀮𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀺𑀯𑀺𑀥𑀽𑀧𑀧𑀭𑀺𑀓𑁆𑀔𑀻, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 ‘𑀉𑀢𑁆𑀢𑀫𑀧𑀼𑀭𑀺𑀲𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀼𑀢𑁆𑀢𑀁

𑁫𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀭𑀽𑀧𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀪𑀺𑀓𑁆𑀔𑀼𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀭𑀽𑀧𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑁂𑀤𑀦𑀸𑀬 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀪𑀺𑀓𑁆𑀔𑀼𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀯𑁂𑀤𑀦𑀸𑀬 𑀦𑀺𑀩𑁆𑀩𑀺𑀤𑀸…𑀧𑁂… 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑀸𑀦𑀁… 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀪𑀺𑀓𑁆𑀔𑀼𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀢𑀢𑁆𑀭 𑀔𑁄, 𑀪𑀺𑀓𑁆𑀔𑀯𑁂, 𑀓𑁄 𑀯𑀺𑀲𑁂𑀲𑁄, 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄 [𑀅𑀥𑀺𑀧𑁆𑀧𑀸𑀬𑁄 (𑀲𑀻.), 𑀅𑀥𑀺𑀧𑁆𑀧𑀸𑀬𑀲𑁄 (𑀲𑁆𑀬𑀸. 𑀓𑀁. 𑀧𑀻. 𑀓.)], 𑀓𑀺𑀁 𑀦𑀸𑀦𑀸𑀓𑀭𑀡𑀁, 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸’’𑀢𑀺? ‘‘𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸 𑀪𑀕𑀯𑀁𑀦𑁂𑀢𑁆𑀢𑀺𑀓𑀸 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀲𑀸𑀥𑀼 𑀯𑀢, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀜𑁆𑀜𑁂𑀯 𑀧𑀝𑀺𑀪𑀸𑀢𑀼 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄. 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸 [𑀲𑀜𑁆𑀚𑀸𑀦𑁂𑀢𑀸 (𑀲𑁆𑀬𑀸. 𑀓𑀁.)], 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸 𑀫𑀕𑁆𑀕𑀜𑁆𑀜𑀽, 𑀫𑀕𑁆𑀕𑀯𑀺𑀤𑀽, 𑀫𑀕𑁆𑀕𑀓𑁄𑀯𑀺𑀤𑁄; 𑀫𑀕𑁆𑀕𑀸𑀦𑀼𑀕𑀸 𑀘, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸𑀲𑀫𑀦𑁆𑀦𑀸𑀕𑀢𑀸. 𑀅𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀲𑁂𑀲𑁄, 𑀅𑀬𑀁 𑀅𑀥𑀺𑀧𑁆𑀧𑀬𑀸𑀲𑁄, 𑀇𑀤𑀁 𑀦𑀸𑀦𑀸𑀓𑀭𑀡𑀁 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸’’𑀢𑀺. 𑀙𑀝𑁆𑀞𑀁.

𑁭. 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀁

𑁫𑁯. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀢𑀸. 𑀭𑀽𑀧𑀜𑁆𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀮𑀩𑁆𑀪𑁂𑀣 𑀘 𑀭𑀽𑀧𑁂 𑁋 ‘𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀭𑀽𑀧𑁂 𑁋 ‘𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’’’𑀢𑀺.

‘‘𑀯𑁂𑀤𑀦𑀸 𑀅𑀦𑀢𑁆𑀢𑀸. 𑀯𑁂𑀤𑀦𑀸 𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀯𑁂𑀤𑀦𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀮𑀩𑁆𑀪𑁂𑀣 𑀘 𑀯𑁂𑀤𑀦𑀸𑀬 𑁋 ‘𑀏𑀯𑀁 𑀫𑁂 𑀯𑁂𑀤𑀦𑀸 𑀳𑁄𑀢𑀼, 𑀏𑀯𑀁 𑀫𑁂 𑀯𑁂𑀤𑀦𑀸 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀯𑁂𑀤𑀦𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀯𑁂𑀤𑀦𑀸𑀬 𑁋 ‘𑀏𑀯𑀁 𑀫𑁂 𑀯𑁂𑀤𑀦𑀸 𑀳𑁄𑀢𑀼, 𑀏𑀯𑀁 𑀫𑁂 𑀯𑁂𑀤𑀦𑀸 𑀫𑀸 𑀅𑀳𑁄𑀲𑀻’’’𑀢𑀺.

‘‘𑀲𑀜𑁆𑀜𑀸 𑀅𑀦𑀢𑁆𑀢𑀸…𑀧𑁂… 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸. 𑀲𑀗𑁆𑀔𑀸𑀭𑀸 𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲𑀁𑀲𑀼, 𑀦𑀬𑀺𑀤𑀁 𑀲𑀗𑁆𑀔𑀸𑀭𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼𑀁, 𑀮𑀩𑁆𑀪𑁂𑀣 𑀘 𑀲𑀗𑁆𑀔𑀸𑀭𑁂𑀲𑀼 𑁋 ‘𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀼, 𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀫𑀸 𑀅𑀳𑁂𑀲𑀼’𑀦𑁆𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀲𑀗𑁆𑀔𑀸𑀭𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦 𑀘 𑀮𑀩𑁆𑀪𑀢𑀺 𑀲𑀗𑁆𑀔𑀸𑀭𑁂𑀲𑀼 𑁋 ‘𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀼, 𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀫𑀸 𑀅𑀳𑁂𑀲𑀼’’’𑀦𑁆𑀢𑀺.

‘‘𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸. 𑀯𑀺𑀜𑁆𑀜𑀸𑀡𑀜𑁆𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀯𑀺𑀜𑁆𑀜𑀸𑀡𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀮𑀩𑁆𑀪𑁂𑀣 𑀘 𑀯𑀺𑀜𑁆𑀜𑀸𑀡𑁂 𑁋 ‘𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀳𑁄𑀢𑀼, 𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀯𑀺𑀜𑁆𑀜𑀸𑀡𑁂 𑁋 ‘𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀳𑁄𑀢𑀼, 𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀫𑀸 𑀅𑀳𑁄𑀲𑀻’’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 𑁋 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀬𑀸 𑀓𑀸𑀘𑀺 𑀯𑁂𑀤𑀦𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀅𑀚𑁆𑀛𑀢𑁆𑀢𑀸 𑀯𑀸 𑀩𑀳𑀺𑀤𑁆𑀥𑀸 𑀯𑀸…𑀧𑁂… 𑀬𑀸 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀸 𑀯𑁂𑀤𑀦𑀸 𑁋 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁.

‘‘𑀬𑀸 𑀓𑀸𑀘𑀺 𑀲𑀜𑁆𑀜𑀸…𑀧𑁂… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸…𑀧𑁂… 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑁋 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁.

‘‘𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑁋 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁.

‘‘𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀜𑁆𑀜𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀗𑁆𑀔𑀸𑀭𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑀺𑀜𑁆𑀜𑀸𑀡𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺; 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀁 [𑀅𑀪𑀺𑀦𑀦𑁆𑀤𑀼𑀦𑁆𑀢𑀺 (𑀓.)].

𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀽𑀢𑀺. 𑀲𑀢𑁆𑀢𑀫𑀁.

𑁮. 𑀫𑀳𑀸𑀮𑀺𑀲𑀼𑀢𑁆𑀢𑀁

𑁬𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀫𑀳𑀸𑀮𑀺 𑀮𑀺𑀘𑁆𑀙𑀯𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺 …𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀳𑀸𑀮𑀺 𑀮𑀺𑀘𑁆𑀙𑀯𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀧𑀽𑀭𑀡𑁄, 𑀪𑀦𑁆𑀢𑁂, 𑀓𑀲𑁆𑀲𑀧𑁄 𑀏𑀯𑀫𑀸𑀳 𑁋 ‘𑀦𑀢𑁆𑀣𑀺 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬; 𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺. 𑀦𑀢𑁆𑀣𑀺 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸; 𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’𑀢𑀺. 𑀇𑀥, 𑀪𑀕𑀯𑀸 𑀓𑀺𑀫𑀸𑀳𑀸’’𑀢𑀺?

‘‘𑀅𑀢𑁆𑀣𑀺, 𑀫𑀳𑀸𑀮𑀺, 𑀳𑁂𑀢𑀼 𑀅𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬; 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺. 𑀅𑀢𑁆𑀣𑀺, 𑀫𑀳𑀸𑀮𑀺, 𑀳𑁂𑀢𑀼, 𑀅𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸; 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺.

‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀼 𑀓𑀢𑀫𑁄 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬; 𑀓𑀣𑀁 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀻’’𑀢𑀺?

‘‘𑀭𑀽𑀧𑀜𑁆𑀘 𑀳𑀺𑀤𑀁, 𑀫𑀳𑀸𑀮𑀺, 𑀏𑀓𑀦𑁆𑀢𑀤𑀼𑀓𑁆𑀔𑀁 𑀅𑀪𑀯𑀺𑀲𑁆𑀲 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀁 𑀤𑀼𑀓𑁆𑀔𑀸𑀯𑀓𑁆𑀓𑀦𑁆𑀢𑀁 𑀅𑀦𑀯𑀓𑁆𑀓𑀦𑁆𑀢𑀁 𑀲𑀼𑀔𑁂𑀦, 𑀦𑀬𑀺𑀤𑀁 𑀲𑀢𑁆𑀢𑀸 𑀭𑀽𑀧𑀲𑁆𑀫𑀺𑀁 𑀲𑀸𑀭𑀚𑁆𑀚𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀮𑀺, 𑀭𑀽𑀧𑀁 𑀲𑀼𑀔𑀁 𑀲𑀼𑀔𑀸𑀦𑀼𑀧𑀢𑀺𑀢𑀁 𑀲𑀼𑀔𑀸𑀯𑀓𑁆𑀓𑀦𑁆𑀢𑀁 𑀅𑀦𑀯𑀓𑁆𑀓𑀦𑁆𑀢𑀁 𑀤𑀼𑀓𑁆𑀔𑁂𑀦, 𑀢𑀲𑁆𑀫𑀸 𑀲𑀢𑁆𑀢𑀸 𑀭𑀽𑀧𑀲𑁆𑀫𑀺𑀁 𑀲𑀸𑀭𑀚𑁆𑀚𑀦𑁆𑀢𑀺; 𑀲𑀸𑀭𑀸𑀕𑀸 𑀲𑀁𑀬𑀼𑀚𑁆𑀚𑀦𑁆𑀢𑀺; 𑀲𑀁𑀬𑁄𑀕𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺. 𑀅𑀬𑀁 𑀔𑁄, 𑀫𑀳𑀸𑀮𑀺, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬; 𑀏𑀯𑀁 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺.

‘‘𑀯𑁂𑀤𑀦𑀸 𑀘 𑀳𑀺𑀤𑀁, 𑀫𑀳𑀸𑀮𑀺, 𑀏𑀓𑀦𑁆𑀢𑀤𑀼𑀓𑁆𑀔𑀸 𑀅𑀪𑀯𑀺𑀲𑁆𑀲 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀸 𑀤𑀼𑀓𑁆𑀔𑀸𑀯𑀓𑁆𑀓𑀦𑁆𑀢𑀸 𑀅𑀦𑀯𑀓𑁆𑀓𑀦𑁆𑀢𑀸 𑀲𑀼𑀔𑁂𑀦, 𑀦𑀬𑀺𑀤𑀁 𑀲𑀢𑁆𑀢𑀸 𑀯𑁂𑀤𑀦𑀸𑀬 𑀲𑀸𑀭𑀚𑁆𑀚𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀮𑀺, 𑀯𑁂𑀤𑀦𑀸 𑀲𑀼𑀔𑀸 𑀲𑀼𑀔𑀸𑀦𑀼𑀧𑀢𑀺𑀢𑀸 𑀲𑀼𑀔𑀸𑀯𑀓𑁆𑀓𑀦𑁆𑀢𑀸 𑀅𑀦𑀯𑀓𑁆𑀓𑀦𑁆𑀢𑀸 𑀤𑀼𑀓𑁆𑀔𑁂𑀦, 𑀢𑀲𑁆𑀫𑀸 𑀲𑀢𑁆𑀢𑀸 𑀯𑁂𑀤𑀦𑀸𑀬 𑀲𑀸𑀭𑀚𑁆𑀚𑀦𑁆𑀢𑀺; 𑀲𑀸𑀭𑀸𑀕𑀸 𑀲𑀁𑀬𑀼𑀚𑁆𑀚𑀦𑁆𑀢𑀺; 𑀲𑀁𑀬𑁄𑀕𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺. 𑀅𑀬𑀫𑁆𑀧𑀺 𑀔𑁄, 𑀫𑀳𑀸𑀮𑀺, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬. 𑀏𑀯𑀫𑁆𑀧𑀺 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺.

‘‘𑀲𑀜𑁆𑀜𑀸 𑀘 𑀳𑀺𑀤𑀁, 𑀫𑀳𑀸𑀮𑀺…𑀧𑁂… 𑀲𑀗𑁆𑀔𑀸𑀭𑀸 𑀘 𑀳𑀺𑀤𑀁, 𑀫𑀳𑀸𑀮𑀺, 𑀏𑀓𑀦𑁆𑀢𑀤𑀼𑀓𑁆𑀔𑀸 𑀅𑀪𑀯𑀺𑀲𑁆𑀲𑀁𑀲𑀼 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀸 𑀤𑀼𑀓𑁆𑀔𑀸𑀯𑀓𑁆𑀓𑀦𑁆𑀢𑀸 𑀅𑀦𑀯𑀓𑁆𑀓𑀦𑁆𑀢𑀸 𑀲𑀼𑀔𑁂𑀦, 𑀦𑀬𑀺𑀤𑀁 𑀲𑀢𑁆𑀢𑀸 𑀲𑀗𑁆𑀔𑀸𑀭𑁂𑀲𑀼 𑀲𑀸𑀭𑀚𑁆𑀚𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀮𑀺, 𑀲𑀗𑁆𑀔𑀸𑀭𑀸 𑀲𑀼𑀔𑀸 𑀲𑀼𑀔𑀸𑀦𑀼𑀧𑀢𑀺𑀢𑀸 𑀲𑀼𑀔𑀸𑀯𑀓𑁆𑀓𑀦𑁆𑀢𑀸 𑀅𑀦𑀯𑀓𑁆𑀓𑀦𑁆𑀢𑀸 𑀤𑀼𑀓𑁆𑀔𑁂𑀦, 𑀢𑀲𑁆𑀫𑀸 𑀲𑀢𑁆𑀢𑀸 𑀲𑀗𑁆𑀔𑀸𑀭𑁂𑀲𑀼 𑀲𑀸𑀭𑀚𑁆𑀚𑀦𑁆𑀢𑀺; 𑀲𑀸𑀭𑀸𑀕𑀸 𑀲𑀁𑀬𑀼𑀚𑁆𑀚𑀦𑁆𑀢𑀺; 𑀲𑀁𑀬𑁄𑀕𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺. 𑀅𑀬𑀫𑁆𑀧𑀺 𑀔𑁄, 𑀫𑀳𑀸𑀮𑀺, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬. 𑀏𑀯𑀫𑁆𑀧𑀺 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺.

‘‘𑀯𑀺𑀜𑁆𑀜𑀸𑀡𑀜𑁆𑀘 𑀳𑀺𑀤𑀁, 𑀫𑀳𑀸𑀮𑀺, 𑀏𑀓𑀦𑁆𑀢𑀤𑀼𑀓𑁆𑀔𑀁 𑀅𑀪𑀯𑀺𑀲𑁆𑀲 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀁 𑀤𑀼𑀓𑁆𑀔𑀸𑀯𑀓𑁆𑀓𑀦𑁆𑀢𑀁 𑀅𑀦𑀯𑀓𑁆𑀓𑀦𑁆𑀢𑀁 𑀲𑀼𑀔𑁂𑀦, 𑀦𑀬𑀺𑀤𑀁 𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀲𑀸𑀭𑀚𑁆𑀚𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀮𑀺, 𑀯𑀺𑀜𑁆𑀜𑀸𑀡𑀁 𑀲𑀼𑀔𑀁 𑀲𑀼𑀔𑀸𑀦𑀼𑀧𑀢𑀺𑀢𑀁 𑀲𑀼𑀔𑀸𑀯𑀓𑁆𑀓𑀦𑁆𑀢𑀁 𑀅𑀦𑀯𑀓𑁆𑀓𑀦𑁆𑀢𑀁 𑀤𑀼𑀓𑁆𑀔𑁂𑀦, 𑀢𑀲𑁆𑀫𑀸 𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀲𑀸𑀭𑀚𑁆𑀚𑀦𑁆𑀢𑀺; 𑀲𑀸𑀭𑀸𑀕𑀸 𑀲𑀁𑀬𑀼𑀚𑁆𑀚𑀦𑁆𑀢𑀺; 𑀲𑀁𑀬𑁄𑀕𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺. 𑀅𑀬𑀫𑁆𑀧𑀺 𑀔𑁄, 𑀫𑀳𑀸𑀮𑀺, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬. 𑀏𑀯𑀫𑁆𑀧𑀺 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀻’’𑀢𑀺.

‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀼 𑀓𑀢𑀫𑁄 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸; 𑀓𑀣𑀁 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺? ‘‘𑀭𑀽𑀧𑀜𑁆𑀘 𑀳𑀺𑀤𑀁, 𑀫𑀳𑀸𑀮𑀺, 𑀏𑀓𑀦𑁆𑀢𑀲𑀼𑀔𑀁 𑀅𑀪𑀯𑀺𑀲𑁆𑀲 𑀲𑀼𑀔𑀸𑀦𑀼𑀧𑀢𑀺𑀢𑀁 𑀲𑀼𑀔𑀸𑀯𑀓𑁆𑀓𑀦𑁆𑀢𑀁 𑀅𑀦𑀯𑀓𑁆𑀓𑀦𑁆𑀢𑀁 𑀤𑀼𑀓𑁆𑀔𑁂𑀦, 𑀦𑀬𑀺𑀤𑀁 𑀲𑀢𑁆𑀢𑀸 𑀭𑀽𑀧𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀮𑀺, 𑀭𑀽𑀧𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀁 𑀤𑀼𑀓𑁆𑀔𑀸𑀯𑀓𑁆𑀓𑀦𑁆𑀢𑀁 𑀅𑀦𑀯𑀓𑁆𑀓𑀦𑁆𑀢𑀁 𑀲𑀼𑀔𑁂𑀦, 𑀢𑀲𑁆𑀫𑀸 𑀲𑀢𑁆𑀢𑀸 𑀭𑀽𑀧𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀺; 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀦𑁆𑀢𑀺; 𑀯𑀺𑀭𑀸𑀕𑀸 𑀯𑀺𑀲𑀼𑀚𑁆𑀛𑀦𑁆𑀢𑀺. 𑀅𑀬𑀁 𑀔𑁄, 𑀫𑀳𑀸𑀮𑀺, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸. 𑀏𑀯𑀁 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀺’’.

‘‘𑀯𑁂𑀤𑀦𑀸 𑀘 𑀳𑀺𑀤𑀁, 𑀫𑀳𑀸𑀮𑀺, 𑀏𑀓𑀦𑁆𑀢𑀲𑀼𑀔𑀸 𑀅𑀪𑀯𑀺𑀲𑁆𑀲…𑀧𑁂… 𑀲𑀜𑁆𑀜𑀸 𑀘 𑀳𑀺𑀤𑀁, 𑀫𑀳𑀸𑀮𑀺…𑀧𑁂… 𑀲𑀗𑁆𑀔𑀸𑀭𑀸 𑀘 𑀳𑀺𑀤𑀁, 𑀫𑀳𑀸𑀮𑀺, 𑀏𑀓𑀦𑁆𑀢𑀲𑀼𑀔𑀸 𑀅𑀪𑀯𑀺𑀲𑁆𑀲𑀁𑀲𑀼…𑀧𑁂… 𑀯𑀺𑀜𑁆𑀜𑀸𑀡𑀜𑁆𑀘 𑀳𑀺𑀤𑀁, 𑀫𑀳𑀸𑀮𑀺, 𑀏𑀓𑀦𑁆𑀢𑀲𑀼𑀔𑀁 𑀅𑀪𑀯𑀺𑀲𑁆𑀲 𑀲𑀼𑀔𑀸𑀦𑀼𑀧𑀢𑀺𑀢𑀁 𑀲𑀼𑀔𑀸𑀯𑀓𑁆𑀓𑀦𑁆𑀢𑀁 𑀅𑀦𑀯𑀓𑁆𑀓𑀦𑁆𑀢𑀁 𑀤𑀼𑀓𑁆𑀔𑁂𑀦, 𑀦𑀬𑀺𑀤𑀁 𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀮𑀺, 𑀯𑀺𑀜𑁆𑀜𑀸𑀡𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀁 𑀤𑀼𑀓𑁆𑀔𑀸𑀯𑀓𑁆𑀓𑀦𑁆𑀢𑀁 𑀅𑀦𑀯𑀓𑁆𑀓𑀦𑁆𑀢𑀁 𑀲𑀼𑀔𑁂𑀦, 𑀢𑀲𑁆𑀫𑀸 𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀺; 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀦𑁆𑀢𑀺; 𑀯𑀺𑀭𑀸𑀕𑀸 𑀯𑀺𑀲𑀼𑀚𑁆𑀛𑀦𑁆𑀢𑀺. 𑀅𑀬𑀁 𑀔𑁄, 𑀫𑀳𑀸𑀮𑀺, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸. 𑀏𑀯𑀫𑁆𑀧𑀺 𑀲𑀳𑁂𑀢𑀽 𑀲𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀆𑀤𑀺𑀢𑁆𑀢𑀲𑀼𑀢𑁆𑀢𑀁

𑁬𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢𑀁, 𑀯𑁂𑀤𑀦𑀸 𑀆𑀤𑀺𑀢𑁆𑀢𑀸, 𑀲𑀜𑁆𑀜𑀸 𑀆𑀤𑀺𑀢𑁆𑀢𑀸, 𑀲𑀗𑁆𑀔𑀸𑀭𑀸 𑀆𑀤𑀺𑀢𑁆𑀢𑀸, 𑀯𑀺𑀜𑁆𑀜𑀸𑀡𑀁 𑀆𑀤𑀺𑀢𑁆𑀢𑀁. 𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬𑀧𑀺… 𑀲𑀜𑁆𑀜𑀸𑀬𑀧𑀺… 𑀲𑀗𑁆𑀔𑀸𑀭𑁂𑀲𑀼𑀧𑀺… 𑀯𑀺𑀜𑁆𑀜𑀸𑀡𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺; 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀦𑀺𑀭𑀼𑀢𑁆𑀢𑀺𑀧𑀣𑀲𑀼𑀢𑁆𑀢𑀁

𑁬𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀦𑀺𑀭𑀼𑀢𑁆𑀢𑀺𑀧𑀣𑀸 𑀅𑀥𑀺𑀯𑀘𑀦𑀧𑀣𑀸 𑀧𑀜𑁆𑀜𑀢𑁆𑀢𑀺𑀧𑀣𑀸 𑀅𑀲𑀗𑁆𑀓𑀺𑀡𑁆𑀡𑀸 𑀅𑀲𑀗𑁆𑀓𑀺𑀡𑁆𑀡𑀧𑀼𑀩𑁆𑀩𑀸, 𑀦 𑀲𑀗𑁆𑀓𑀻𑀬𑀦𑁆𑀢𑀺, 𑀦 𑀲𑀗𑁆𑀓𑀻𑀬𑀺𑀲𑁆𑀲𑀦𑁆𑀢𑀺, 𑀅𑀧𑁆𑀧𑀝𑀺𑀓𑀼𑀝𑁆𑀞𑀸 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺. 𑀓𑀢𑀫𑁂 𑀢𑀬𑁄? 𑀬𑀁, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁 𑀯𑀺𑀧𑀭𑀺𑀡𑀢𑀁 ‘𑀅𑀳𑁄𑀲𑀻’𑀢𑀺 𑀢𑀲𑁆𑀲 𑀲𑀗𑁆𑀔𑀸, ‘𑀅𑀳𑁄𑀲𑀻’𑀢𑀺 𑀢𑀲𑁆𑀲 𑀲𑀫𑀜𑁆𑀜𑀸, ‘𑀅𑀳𑁄𑀲𑀻’𑀢𑀺 𑀢𑀲𑁆𑀲 𑀧𑀜𑁆𑀜𑀢𑁆𑀢𑀺; 𑀦 𑀢𑀲𑁆𑀲 𑀲𑀗𑁆𑀔𑀸 ‘𑀅𑀢𑁆𑀣𑀻’𑀢𑀺, 𑀦 𑀢𑀲𑁆𑀲 𑀲𑀗𑁆𑀔𑀸 ‘𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀬𑀸 𑀯𑁂𑀤𑀦𑀸 𑀅𑀢𑀻𑀢𑀸 𑀦𑀺𑀭𑀼𑀤𑁆𑀥𑀸 𑀯𑀺𑀧𑀭𑀺𑀡𑀢𑀸 ‘𑀅𑀳𑁄𑀲𑀻’𑀢𑀺 𑀢𑀲𑁆𑀲𑀸 𑀲𑀗𑁆𑀔𑀸, ‘𑀅𑀳𑁄𑀲𑀻’𑀢𑀺 𑀢𑀲𑁆𑀲𑀸 𑀲𑀫𑀜𑁆𑀜𑀸, ‘𑀅𑀳𑁄𑀲𑀻’𑀢𑀺 𑀢𑀲𑁆𑀲𑀸 𑀧𑀜𑁆𑀜𑀢𑁆𑀢𑀺; 𑀦 𑀢𑀲𑁆𑀲𑀸 𑀲𑀗𑁆𑀔𑀸 ‘𑀅𑀢𑁆𑀣𑀻’𑀢𑀺, 𑀦 𑀢𑀲𑁆𑀲𑀸 𑀲𑀗𑁆𑀔𑀸 ‘𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀬𑀸 𑀲𑀜𑁆𑀜𑀸… 𑀬𑁂 𑀲𑀗𑁆𑀔𑀸𑀭𑀸 𑀅𑀢𑀻𑀢𑀸 𑀦𑀺𑀭𑀼𑀤𑁆𑀥𑀸 𑀯𑀺𑀧𑀭𑀺𑀡𑀢𑀸 ‘𑀅𑀳𑁂𑀲𑀼’𑀦𑁆𑀢𑀺 𑀢𑁂𑀲𑀁 𑀲𑀗𑁆𑀔𑀸, ‘𑀅𑀳𑁂𑀲𑀼’𑀦𑁆𑀢𑀺 𑀢𑁂𑀲𑀁 𑀲𑀫𑀜𑁆𑀜𑀸, ‘𑀅𑀳𑁂𑀲𑀼’𑀦𑁆𑀢𑀺 𑀢𑁂𑀲𑀁 𑀧𑀜𑁆𑀜𑀢𑁆𑀢𑀺; 𑀦 𑀢𑁂𑀲𑀁 𑀲𑀗𑁆𑀔𑀸 ‘𑀅𑀢𑁆𑀣𑀻’𑀢𑀺, 𑀦 𑀢𑁂𑀲𑀁 𑀲𑀗𑁆𑀔𑀸 ‘𑀪𑀯𑀺𑀲𑁆𑀲𑀦𑁆𑀢𑀻’’’𑀢𑀺.

‘‘𑀬𑀁 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁 𑀯𑀺𑀧𑀭𑀺𑀡𑀢𑀁, ‘𑀅𑀳𑁄𑀲𑀻’𑀢𑀺 𑀢𑀲𑁆𑀲 𑀲𑀗𑁆𑀔𑀸, ‘𑀅𑀳𑁄𑀲𑀻’𑀢𑀺 𑀢𑀲𑁆𑀲 𑀲𑀫𑀜𑁆𑀜𑀸, ‘𑀅𑀳𑁄𑀲𑀻’𑀢𑀺 𑀢𑀲𑁆𑀲 𑀧𑀜𑁆𑀜𑀢𑁆𑀢𑀺; 𑀦 𑀢𑀲𑁆𑀲 𑀲𑀗𑁆𑀔𑀸 ‘𑀅𑀢𑁆𑀣𑀻’𑀢𑀺, 𑀦 𑀢𑀲𑁆𑀲 𑀲𑀗𑁆𑀔𑀸 ‘𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀬𑀁, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀅𑀚𑀸𑀢𑀁 𑀅𑀧𑀸𑀢𑀼𑀪𑀽𑀢𑀁, ‘𑀪𑀯𑀺𑀲𑁆𑀲𑀢𑀻’𑀢𑀺 𑀢𑀲𑁆𑀲 𑀲𑀗𑁆𑀔𑀸, ‘𑀪𑀯𑀺𑀲𑁆𑀲𑀢𑀻’𑀢𑀺 𑀢𑀲𑁆𑀲 𑀲𑀫𑀜𑁆𑀜𑀸, ‘𑀪𑀯𑀺𑀲𑁆𑀲𑀢𑀻’𑀢𑀺 𑀢𑀲𑁆𑀲 𑀧𑀜𑁆𑀜𑀢𑁆𑀢𑀺; 𑀦 𑀢𑀲𑁆𑀲 𑀲𑀗𑁆𑀔𑀸 ‘𑀅𑀢𑁆𑀣𑀻’𑀢𑀺, 𑀦 𑀢𑀲𑁆𑀲 𑀲𑀗𑁆𑀔𑀸 ‘𑀅𑀳𑁄𑀲𑀻’’’𑀢𑀺.

‘‘𑀬𑀸 𑀯𑁂𑀤𑀦𑀸 𑀅𑀚𑀸𑀢𑀸 𑀅𑀧𑀸𑀢𑀼𑀪𑀽𑀢𑀸, ‘𑀪𑀯𑀺𑀲𑁆𑀲𑀢𑀻’𑀢𑀺 𑀢𑀲𑁆𑀲𑀸 𑀲𑀗𑁆𑀔𑀸, ‘𑀪𑀯𑀺𑀲𑁆𑀲𑀢𑀻’𑀢𑀺 𑀢𑀲𑁆𑀲𑀸 𑀲𑀫𑀜𑁆𑀜𑀸, ‘𑀪𑀯𑀺𑀲𑁆𑀲𑀢𑀻’𑀢𑀺 𑀢𑀲𑁆𑀲𑀸 𑀧𑀜𑁆𑀜𑀢𑁆𑀢𑀺; 𑀦 𑀢𑀲𑁆𑀲𑀸 𑀲𑀗𑁆𑀔𑀸 ‘𑀅𑀢𑁆𑀣𑀻’𑀢𑀺, 𑀦 𑀢𑀲𑁆𑀲𑀸 𑀲𑀗𑁆𑀔𑀸 ‘𑀅𑀳𑁄𑀲𑀻’’’𑀢𑀺.

‘‘𑀬𑀸 𑀲𑀜𑁆𑀜𑀸… 𑀬𑁂 𑀲𑀗𑁆𑀔𑀸𑀭𑀸 𑀅𑀚𑀸𑀢𑀸 𑀅𑀧𑀸𑀢𑀼𑀪𑀽𑀢𑀸, ‘𑀪𑀯𑀺𑀲𑁆𑀲𑀦𑁆𑀢𑀻’𑀢𑀺 𑀢𑁂𑀲𑀁 𑀲𑀗𑁆𑀔𑀸, ‘𑀪𑀯𑀺𑀲𑁆𑀲𑀦𑁆𑀢𑀻’𑀢𑀺 𑀢𑁂𑀲𑀁 𑀲𑀫𑀜𑁆𑀜𑀸, ‘𑀪𑀯𑀺𑀲𑁆𑀲𑀦𑁆𑀢𑀻’𑀢𑀺 𑀢𑁂𑀲𑀁 𑀧𑀜𑁆𑀜𑀢𑁆𑀢𑀺; 𑀦 𑀢𑁂𑀲𑀁 𑀲𑀗𑁆𑀔𑀸 ‘𑀅𑀢𑁆𑀣𑀻’𑀢𑀺, 𑀦 𑀢𑁂𑀲𑀁 𑀲𑀗𑁆𑀔𑀸 ‘𑀅𑀳𑁂𑀲𑀼’’’𑀦𑁆𑀢𑀺.

‘‘𑀬𑀁 𑀯𑀺𑀜𑁆𑀜𑀸𑀡𑀁 𑀅𑀚𑀸𑀢𑀁 𑀅𑀧𑀸𑀢𑀼𑀪𑀽𑀢𑀁, ‘𑀪𑀯𑀺𑀲𑁆𑀲𑀢𑀻’𑀢𑀺 𑀢𑀲𑁆𑀲 𑀲𑀗𑁆𑀔𑀸, ‘𑀪𑀯𑀺𑀲𑁆𑀲𑀢𑀻’𑀢𑀺 𑀢𑀲𑁆𑀲 𑀲𑀫𑀜𑁆𑀜𑀸, ‘𑀪𑀯𑀺𑀲𑁆𑀲𑀢𑀻’𑀢𑀺 𑀢𑀲𑁆𑀲 𑀧𑀜𑁆𑀜𑀢𑁆𑀢𑀺; 𑀦 𑀢𑀲𑁆𑀲 𑀲𑀗𑁆𑀔𑀸 ‘𑀅𑀢𑁆𑀣𑀻’𑀢𑀺, 𑀦 𑀢𑀲𑁆𑀲 𑀲𑀗𑁆𑀔𑀸 ‘𑀅𑀳𑁄𑀲𑀻’’’𑀢𑀺.

‘‘𑀬𑀁, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀚𑀸𑀢𑀁 𑀧𑀸𑀢𑀼𑀪𑀽𑀢𑀁, ‘𑀅𑀢𑁆𑀣𑀻’𑀢𑀺 𑀢𑀲𑁆𑀲 𑀲𑀗𑁆𑀔𑀸, ‘𑀅𑀢𑁆𑀣𑀻’𑀢𑀺 𑀢𑀲𑁆𑀲 𑀲𑀫𑀜𑁆𑀜𑀸, ‘𑀅𑀢𑁆𑀣𑀻’𑀢𑀺 𑀢𑀲𑁆𑀲 𑀧𑀜𑁆𑀜𑀢𑁆𑀢𑀺; 𑀦 𑀢𑀲𑁆𑀲 𑀲𑀗𑁆𑀔𑀸 ‘𑀅𑀳𑁄𑀲𑀻’𑀢𑀺, 𑀦 𑀢𑀲𑁆𑀲 𑀲𑀗𑁆𑀔𑀸 ‘𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀬𑀸 𑀯𑁂𑀤𑀦𑀸 𑀚𑀸𑀢𑀸 𑀧𑀸𑀢𑀼𑀪𑀽𑀢𑀸, ‘𑀅𑀢𑁆𑀣𑀻’𑀢𑀺 𑀢𑀲𑁆𑀲𑀸 𑀲𑀗𑁆𑀔𑀸, ‘𑀅𑀢𑁆𑀣𑀻’𑀢𑀺 𑀢𑀲𑁆𑀲𑀸 𑀲𑀫𑀜𑁆𑀜𑀸, ‘𑀅𑀢𑁆𑀣𑀻’𑀢𑀺 𑀢𑀲𑁆𑀲𑀸 𑀧𑀜𑁆𑀜𑀢𑁆𑀢𑀺; 𑀦 𑀢𑀲𑁆𑀲𑀸 𑀲𑀗𑁆𑀔𑀸 ‘𑀅𑀳𑁄𑀲𑀻’𑀢𑀺, 𑀦 𑀢𑀲𑁆𑀲𑀸 𑀲𑀗𑁆𑀔𑀸 ‘𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀬𑀸 𑀲𑀜𑁆𑀜𑀸… 𑀬𑁂 𑀲𑀗𑁆𑀔𑀸𑀭𑀸 𑀚𑀸𑀢𑀸 𑀧𑀸𑀢𑀼𑀪𑀽𑀢𑀸, ‘𑀅𑀢𑁆𑀣𑀻’𑀢𑀺 𑀢𑁂𑀲𑀁 𑀲𑀗𑁆𑀔𑀸, ‘𑀅𑀢𑁆𑀣𑀻’𑀢𑀺 𑀢𑁂𑀲𑀁 𑀲𑀫𑀜𑁆𑀜𑀸, ‘𑀅𑀢𑁆𑀣𑀻’𑀢𑀺 𑀢𑁂𑀲𑀁 𑀧𑀜𑁆𑀜𑀢𑁆𑀢𑀺; 𑀦 𑀢𑁂𑀲𑀁 𑀲𑀗𑁆𑀔𑀸 ‘𑀅𑀳𑁂𑀲𑀼’𑀦𑁆𑀢𑀺, 𑀦 𑀢𑁂𑀲𑀁 𑀲𑀗𑁆𑀔𑀸, ‘𑀪𑀯𑀺𑀲𑁆𑀲𑀦𑁆𑀢𑀻’’’𑀢𑀺.

‘‘𑀬𑀁 𑀯𑀺𑀜𑁆𑀜𑀸𑀡𑀁 𑀚𑀸𑀢𑀁 𑀧𑀸𑀢𑀼𑀪𑀽𑀢𑀁, ‘𑀅𑀢𑁆𑀣𑀻’𑀢𑀺 𑀢𑀲𑁆𑀲 𑀲𑀗𑁆𑀔𑀸, ‘𑀅𑀢𑁆𑀣𑀻’𑀢𑀺 𑀢𑀲𑁆𑀲 𑀲𑀫𑀜𑁆𑀜𑀸, ‘𑀅𑀢𑁆𑀣𑀻’𑀢𑀺 𑀢𑀲𑁆𑀲 𑀧𑀜𑁆𑀜𑀢𑁆𑀢𑀺; 𑀦 𑀢𑀲𑁆𑀲 𑀲𑀗𑁆𑀔𑀸 ‘𑀅𑀳𑁄𑀲𑀻’𑀢𑀺, 𑀦 𑀢𑀲𑁆𑀲 𑀲𑀗𑁆𑀔𑀸 ‘𑀪𑀯𑀺𑀲𑁆𑀲𑀢𑀻’’’𑀢𑀺.

‘‘𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀦𑀺𑀭𑀼𑀢𑁆𑀢𑀺𑀧𑀣𑀸 𑀅𑀥𑀺𑀯𑀘𑀦𑀧𑀣𑀸 𑀧𑀜𑁆𑀜𑀢𑁆𑀢𑀺𑀧𑀣𑀸 𑀅𑀲𑀗𑁆𑀓𑀺𑀡𑁆𑀡𑀸 𑀅𑀲𑀗𑁆𑀓𑀺𑀡𑁆𑀡𑀧𑀼𑀩𑁆𑀩𑀸, 𑀦 𑀲𑀗𑁆𑀓𑀻𑀬𑀦𑁆𑀢𑀺, 𑀦 𑀲𑀗𑁆𑀓𑀻𑀬𑀺𑀲𑁆𑀲𑀦𑁆𑀢𑀺, 𑀅𑀧𑁆𑀧𑀝𑀺𑀓𑀼𑀝𑁆𑀞𑀸 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀺. 𑀬𑁂𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀅𑀳𑁂𑀲𑀼𑀁 𑀉𑀓𑁆𑀓𑀮𑀸 𑀯𑀲𑁆𑀲𑀪𑀜𑁆𑀜𑀸 [𑀑𑀓𑁆𑀓𑀮𑀸 𑀯𑀬𑀪𑀺𑀜𑁆𑀜𑀸 (𑀫. 𑀦𑀺. 𑁩.𑁩𑁪𑁩)] 𑀅𑀳𑁂𑀢𑀼𑀓𑀯𑀸𑀤𑀸 𑀅𑀓𑀺𑀭𑀺𑀬𑀯𑀸𑀤𑀸 𑀦𑀢𑁆𑀣𑀺𑀓𑀯𑀸𑀤𑀸, 𑀢𑁂𑀧𑀺𑀫𑁂 𑀢𑀬𑁄 𑀦𑀺𑀭𑀼𑀢𑁆𑀢𑀺𑀧𑀣𑁂 𑀅𑀥𑀺𑀯𑀘𑀦𑀧𑀣𑁂 𑀧𑀜𑁆𑀜𑀢𑁆𑀢𑀺𑀧𑀣𑁂 𑀦 𑀕𑀭𑀳𑀺𑀢𑀩𑁆𑀩𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁 𑀅𑀫𑀜𑁆𑀜𑀺𑀁𑀲𑀼. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦𑀺𑀦𑁆𑀤𑀸𑀖𑀝𑁆𑀝𑀦𑀩𑁆𑀬𑀸𑀭𑁄𑀲𑀉𑀧𑀸𑀭𑀫𑁆𑀪𑀪𑀬𑀸’’𑀢𑀺 [𑀦𑀺𑀦𑁆𑀤𑀸𑀩𑁆𑀬𑀸𑀭𑁄𑀲𑀉𑀧𑀸𑀭𑀫𑁆𑀪𑀪𑀬𑀸𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.) 𑀫. 𑀦𑀺. 𑁩.𑁩𑁪𑁩].

𑀉𑀧𑀬𑀯𑀕𑁆𑀕𑁄 𑀙𑀝𑁆𑀞𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀉𑀧𑀬𑁄 𑀩𑀻𑀚𑀁 𑀉𑀤𑀸𑀦𑀁, 𑀉𑀧𑀸𑀤𑀸𑀦𑀧𑀭𑀺𑀯𑀢𑁆𑀢𑀁;

𑀲𑀢𑁆𑀢𑀝𑁆𑀞𑀸𑀦𑀜𑁆𑀘 𑀲𑀫𑁆𑀩𑀼𑀤𑁆𑀥𑁄, 𑀧𑀜𑁆𑀘𑀫𑀳𑀸𑀮𑀺 𑀆𑀤𑀺𑀢𑁆𑀢𑀸.

𑀯𑀕𑁆𑀕𑁄 𑀦𑀺𑀭𑀼𑀢𑁆𑀢𑀺𑀧𑀣𑁂𑀦 𑀘𑀸𑀢𑀺.