𑁯. 𑀦𑀦𑁆𑀤𑀺𑀓𑁆𑀔𑀬𑀲𑀼𑀢𑁆𑀢𑀁

𑁫𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀅𑀦𑀺𑀘𑁆𑀘𑀜𑁆𑀜𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀧𑀲𑁆𑀲𑀢𑀺. 𑀲𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀫𑁆𑀫𑀸 𑀧𑀲𑁆𑀲𑀁 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀦𑁆𑀤𑀺𑀓𑁆𑀔𑀬𑀸 𑀭𑀸𑀕𑀓𑁆𑀔𑀬𑁄, 𑀭𑀸𑀕𑀓𑁆𑀔𑀬𑀸 𑀦𑀦𑁆𑀤𑀺𑀓𑁆𑀔𑀬𑁄. 𑀦𑀦𑁆𑀤𑀺𑀭𑀸𑀕𑀓𑁆𑀔𑀬𑀸 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀺𑀘𑁆𑀘𑀜𑁆𑀜𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑁂𑀤𑀦𑀁 𑀅𑀦𑀺𑀘𑁆𑀘𑀦𑁆𑀢𑀺 𑀧𑀲𑁆𑀲𑀢𑀺. 𑀲𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀫𑁆𑀫𑀸 𑀧𑀲𑁆𑀲𑀁 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀦𑁆𑀤𑀺𑀓𑁆𑀔𑀬𑀸 𑀭𑀸𑀕𑀓𑁆𑀔𑀬𑁄, 𑀭𑀸𑀕𑀓𑁆𑀔𑀬𑀸 𑀦𑀦𑁆𑀤𑀺𑀓𑁆𑀔𑀬𑁄. 𑀦𑀦𑁆𑀤𑀺𑀭𑀸𑀕𑀓𑁆𑀔𑀬𑀸 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀺𑀘𑁆𑀘𑁂𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀜𑁆𑀜𑀁 𑀅𑀦𑀺𑀘𑁆𑀘𑀦𑁆𑀢𑀺 𑀧𑀲𑁆𑀲𑀢𑀺…𑀧𑁂… 𑀅𑀦𑀺𑀘𑁆𑀘𑁂𑀬𑁂𑀯 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀸𑀢𑀺 𑀧𑀲𑁆𑀲𑀢𑀺. 𑀲𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀫𑁆𑀫𑀸 𑀧𑀲𑁆𑀲𑀁 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀦𑁆𑀤𑀺𑀓𑁆𑀔𑀬𑀸 𑀭𑀸𑀕𑀓𑁆𑀔𑀬𑁄, 𑀭𑀸𑀕𑀓𑁆𑀔𑀬𑀸 𑀦𑀦𑁆𑀤𑀺𑀓𑁆𑀔𑀬𑁄. 𑀦𑀦𑁆𑀤𑀺𑀭𑀸𑀕𑀓𑁆𑀔𑀬𑀸 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀺𑀘𑁆𑀘𑀜𑁆𑀜𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀦𑁆𑀢𑀺 𑀧𑀲𑁆𑀲𑀢𑀺. 𑀲𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀫𑁆𑀫𑀸 𑀧𑀲𑁆𑀲𑀁 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀦𑁆𑀤𑀺𑀓𑁆𑀔𑀬𑀸 𑀭𑀸𑀕𑀓𑁆𑀔𑀬𑁄, 𑀭𑀸𑀕𑀓𑁆𑀔𑀬𑀸 𑀦𑀦𑁆𑀤𑀺𑀓𑁆𑀔𑀬𑁄. 𑀦𑀦𑁆𑀤𑀺𑀭𑀸𑀕𑀓𑁆𑀔𑀬𑀸 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀦𑀯𑀫𑀁.