𑁩. 𑀪𑀸𑀭𑀯𑀕𑁆𑀕𑁄

𑁧. 𑀪𑀸𑀭𑀲𑀼𑀢𑁆𑀢𑀁

𑁨𑁨. 𑀲𑀸𑀯𑀢𑁆𑀣𑀺𑀬𑀁 … 𑀢𑀢𑁆𑀭 𑀔𑁄 … ‘‘𑀪𑀸𑀭𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀪𑀸𑀭𑀳𑀸𑀭𑀜𑁆𑀘 𑀪𑀸𑀭𑀸𑀤𑀸𑀦𑀜𑁆𑀘 𑀪𑀸𑀭𑀦𑀺𑀓𑁆𑀔𑁂𑀧𑀦𑀜𑁆𑀘. 𑀢𑀁 𑀲𑀼𑀡𑀸𑀣. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀪𑀸𑀭𑁄? 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀢𑀫𑁂 𑀧𑀜𑁆𑀘? 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄; 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀸𑀭𑁄’’.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀪𑀸𑀭𑀳𑀸𑀭𑁄? 𑀧𑀼𑀕𑁆𑀕𑀮𑁄 𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀬𑁆𑀯𑀸𑀬𑀁 𑀆𑀬𑀲𑁆𑀫𑀸 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄; 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀸𑀭𑀳𑀸𑀭𑁄.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀸𑀭𑀸𑀤𑀸𑀦𑀁? 𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸 [𑀧𑁄𑀦𑁄𑀩𑁆𑀪𑀯𑀺𑀓𑀸 (𑀲𑁆𑀬𑀸. 𑀓𑀁. 𑀓.)] 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸 [𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸 (𑀲𑀩𑁆𑀩𑀢𑁆𑀣)] 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀢𑀡𑁆𑀳𑀸, 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀸𑀭𑀸𑀤𑀸𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀸𑀭𑀦𑀺𑀓𑁆𑀔𑁂𑀧𑀦𑀁? 𑀬𑁄 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀸𑀭𑀦𑀺𑀓𑁆𑀔𑁂𑀧𑀦’’𑀦𑁆𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 [𑀯𑀢𑁆𑀯𑀸 (𑀲𑀻.) 𑀏𑀯𑀫𑀻𑀤𑀺𑀲𑁂𑀲𑀼 𑀞𑀸𑀦𑁂𑀲𑀼] 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀪𑀸𑀭𑀸 𑀳𑀯𑁂 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀪𑀸𑀭𑀳𑀸𑀭𑁄 𑀘 𑀧𑀼𑀕𑁆𑀕𑀮𑁄;

𑀪𑀸𑀭𑀸𑀤𑀸𑀦𑀁 𑀤𑀼𑀔𑀁 𑀮𑁄𑀓𑁂, 𑀪𑀸𑀭𑀦𑀺𑀓𑁆𑀔𑁂𑀧𑀦𑀁 𑀲𑀼𑀔𑀁.

‘‘𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀭𑀼𑀁 𑀪𑀸𑀭𑀁, 𑀅𑀜𑁆𑀜𑀁 𑀪𑀸𑀭𑀁 𑀅𑀦𑀸𑀤𑀺𑀬;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳 [𑀢𑀡𑁆𑀳𑀫𑀩𑁆𑀪𑀼𑀬𑁆𑀳 (𑀧𑀻. 𑀓.)], 𑀦𑀺𑀘𑁆𑀙𑀸𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀧𑀞𑀫𑀁;

𑁨. 𑀧𑀭𑀺𑀜𑁆𑀜𑀲𑀼𑀢𑁆𑀢𑀁

𑁨𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀭𑀺𑀜𑁆𑀜𑁂𑀬𑁆𑀬𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺 𑀧𑀭𑀺𑀜𑁆𑀜𑀜𑁆𑀘. 𑀢𑀁 𑀲𑀼𑀡𑀸𑀣. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸? 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄, 𑀯𑁂𑀤𑀦𑀸 𑀧𑀭𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄, 𑀲𑀜𑁆𑀜𑀸 𑀧𑀭𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄, 𑀲𑀗𑁆𑀔𑀸𑀭𑀸 𑀧𑀭𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄, 𑀯𑀺𑀜𑁆𑀜𑀸𑀡𑀁 𑀧𑀭𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑀸? 𑀬𑁄, 𑀪𑀺𑀓𑁆𑀔𑀯𑁂, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀅𑀪𑀺𑀚𑀸𑀦𑀲𑀼𑀢𑁆𑀢𑀁

𑁨𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀪𑀺𑀚𑀸𑀦𑀁 𑀅𑀧𑀭𑀺𑀚𑀸𑀦𑀁 𑀅𑀯𑀺𑀭𑀸𑀚𑀬𑀁 𑀅𑀧𑁆𑀧𑀚𑀳𑀁 𑀅𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬; 𑀯𑁂𑀤𑀦𑀁 𑀅𑀦𑀪𑀺𑀚𑀸𑀦𑀁 𑀅𑀧𑀭𑀺𑀚𑀸𑀦𑀁 𑀅𑀯𑀺𑀭𑀸𑀚𑀬𑀁 𑀅𑀧𑁆𑀧𑀚𑀳𑀁 𑀅𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬; 𑀲𑀜𑁆𑀜𑀁 𑀅𑀦𑀪𑀺𑀚𑀸𑀦𑀁… 𑀲𑀗𑁆𑀔𑀸𑀭𑁂 𑀅𑀦𑀪𑀺𑀚𑀸𑀦𑀁 𑀅𑀧𑀭𑀺𑀚𑀸𑀦𑀁 𑀅𑀯𑀺𑀭𑀸𑀚𑀬𑀁 𑀅𑀧𑁆𑀧𑀚𑀳𑀁 𑀅𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬; 𑀯𑀺𑀜𑁆𑀜𑀸𑀡𑀁 𑀅𑀦𑀪𑀺𑀚𑀸𑀦𑀁 𑀅𑀧𑀭𑀺𑀚𑀸𑀦𑀁 𑀅𑀯𑀺𑀭𑀸𑀚𑀬𑀁 𑀅𑀧𑁆𑀧𑀚𑀳𑀁 𑀅𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀭𑀽𑀧𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀚𑀸𑀦𑀁 𑀧𑀭𑀺𑀚𑀸𑀦𑀁 𑀯𑀺𑀭𑀸𑀚𑀬𑀁 𑀧𑀚𑀳𑀁 𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬; 𑀯𑁂𑀤𑀦𑀁 𑀅𑀪𑀺𑀚𑀸𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀪𑀺𑀚𑀸𑀦𑀁 𑀧𑀭𑀺𑀚𑀸𑀦𑀁 𑀯𑀺𑀭𑀸𑀚𑀬𑀁 𑀧𑀚𑀳𑀁 𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’’𑀢𑀺. 𑀢𑀢𑀺𑀬𑀁.

𑁪. 𑀙𑀦𑁆𑀤𑀭𑀸𑀕𑀲𑀼𑀢𑁆𑀢𑀁

𑁨𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑁄 𑀢𑀁 𑀧𑀚𑀳𑀣. 𑀏𑀯𑀁 𑀢𑀁 𑀭𑀽𑀧𑀁 𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁. 𑀬𑁄 𑀯𑁂𑀤𑀦𑀸𑀬 𑀙𑀦𑁆𑀤𑀭𑀸𑀕𑁄 𑀢𑀁 𑀧𑀚𑀳𑀣. 𑀏𑀯𑀁 𑀲𑀸 𑀯𑁂𑀤𑀦𑀸 𑀧𑀳𑀻𑀦𑀸 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀬𑁄 𑀲𑀜𑁆𑀜𑀸𑀬 𑀙𑀦𑁆𑀤𑀭𑀸𑀕𑁄 𑀢𑀁 𑀧𑀚𑀳𑀣. 𑀏𑀯𑀁 𑀲𑀸 𑀲𑀜𑁆𑀜𑀸 𑀧𑀳𑀻𑀦𑀸 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀬𑁄 𑀲𑀗𑁆𑀔𑀸𑀭𑁂𑀲𑀼 𑀙𑀦𑁆𑀤𑀭𑀸𑀕𑁄 𑀢𑀁 𑀧𑀚𑀳𑀣. 𑀏𑀯𑀁 𑀢𑁂 𑀲𑀗𑁆𑀔𑀸𑀭𑀸 𑀧𑀳𑀻𑀦𑀸 𑀪𑀯𑀺𑀲𑁆𑀲𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀬𑁄 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑁄 𑀢𑀁 𑀧𑀚𑀳𑀣. 𑀏𑀯𑀁 𑀢𑀁 𑀯𑀺𑀜𑁆𑀜𑀸𑀡𑀁 𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀅𑀲𑁆𑀲𑀸𑀤𑀲𑀼𑀢𑁆𑀢𑀁

𑁨𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀼𑀩𑁆𑀩𑁂𑀯 [𑀧𑀼𑀩𑁆𑀩𑁂 (𑀧𑀻. 𑀓.)] 𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 [𑀩𑁄𑀥𑀺𑀲𑀢𑁆𑀢𑀲𑁆𑀲 (𑀧𑀻. 𑀓.)] 𑀲𑀢𑁄 𑀏𑀢𑀤𑀳𑁄𑀲𑀺 𑁋 ‘𑀓𑁄 𑀦𑀼 𑀔𑁄 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡𑀁? 𑀓𑁄 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡𑀁? 𑀓𑁄 𑀲𑀜𑁆𑀜𑀸𑀬 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡𑀁? 𑀓𑁄 𑀲𑀗𑁆𑀔𑀸𑀭𑀸𑀦𑀁 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡𑀁? 𑀓𑁄 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡’𑀦𑁆𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀬𑀁 𑀔𑁄 𑀭𑀽𑀧𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑁄. 𑀬𑀁 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀅𑀬𑀁 𑀭𑀽𑀧𑀲𑁆𑀲 𑀆𑀤𑀻𑀦𑀯𑁄. 𑀬𑁄 𑀭𑀽𑀧𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁, 𑀇𑀤𑀁 𑀭𑀽𑀧𑀲𑁆𑀲 𑀦𑀺𑀲𑁆𑀲𑀭𑀡𑀁. 𑀬𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄 [𑀬𑀸 (𑀓.)]. 𑀬𑀁 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸, 𑀅𑀬𑀁 𑀯𑁂𑀤𑀦𑀸𑀬 𑀆𑀤𑀻𑀦𑀯𑁄. 𑀬𑁄 𑀯𑁂𑀤𑀦𑀸𑀬 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁, 𑀇𑀤𑀁 𑀯𑁂𑀤𑀦𑀸𑀬 𑀦𑀺𑀲𑁆𑀲𑀭𑀡𑀁. 𑀬𑀁 𑀲𑀜𑁆𑀜𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀬𑀁 𑀲𑀗𑁆𑀔𑀸𑀭𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀲𑀗𑁆𑀔𑀸𑀭𑀸𑀦𑀁 𑀅𑀲𑁆𑀲𑀸𑀤𑁄. 𑀬𑀁 [𑀬𑁂 (𑀲𑀻. 𑀓.)] 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸, 𑀅𑀬𑀁 𑀲𑀗𑁆𑀔𑀸𑀭𑀸𑀦𑀁 𑀆𑀤𑀻𑀦𑀯𑁄. 𑀬𑁄 𑀲𑀗𑁆𑀔𑀸𑀭𑁂𑀲𑀼 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁, 𑀇𑀤𑀁 𑀲𑀗𑁆𑀔𑀸𑀭𑀸𑀦𑀁 𑀦𑀺𑀲𑁆𑀲𑀭𑀡𑀁. 𑀬𑀁 𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑁄. 𑀬𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀅𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀆𑀤𑀻𑀦𑀯𑁄. 𑀬𑁄 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁, 𑀇𑀤𑀁 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀭𑀡𑀁’’’.

‘‘𑀬𑀸𑀯𑀓𑀻𑀯𑀜𑁆𑀘𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀏𑀯𑀁 𑀅𑀲𑁆𑀲𑀸𑀤𑀜𑁆𑀘 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀜𑁆𑀘 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀜𑁆𑀘 𑀦𑀺𑀲𑁆𑀲𑀭𑀡𑀢𑁄 𑀬𑀣𑀸𑀪𑀽𑀢𑀁 𑀦𑀸𑀩𑁆𑀪𑀜𑁆𑀜𑀸𑀲𑀺𑀁, 𑀦𑁂𑀯 𑀢𑀸𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀁 [𑀅𑀪𑀺𑀲𑀫𑁆𑀩𑀼𑀤𑁆𑀥𑁄 (𑀲𑀻.)]. 𑀬𑀢𑁄 𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀏𑀯𑀁 𑀅𑀲𑁆𑀲𑀸𑀤𑀜𑁆𑀘 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀜𑁆𑀘 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀜𑁆𑀘 𑀦𑀺𑀲𑁆𑀲𑀭𑀡𑀢𑁄 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁; 𑀅𑀣𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀁. 𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺 𑁋 ‘𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀺 [𑀘𑁂𑀢𑁄𑀯𑀺𑀫𑀼𑀢𑁆𑀢𑀺 (𑀲𑀻. 𑀧𑀻. 𑀓.)]; 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺; 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀅𑀲𑁆𑀲𑀸𑀤𑀲𑀼𑀢𑁆𑀢𑀁

𑁨𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀭𑀽𑀧𑀲𑁆𑀲𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀸𑀤𑀧𑀭𑀺𑀬𑁂𑀲𑀦𑀁 𑀅𑀘𑀭𑀺𑀁. 𑀬𑁄 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑁄 𑀢𑀤𑀚𑁆𑀛𑀕𑀫𑀁. 𑀬𑀸𑀯𑀢𑀸 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑁄 𑀧𑀜𑁆𑀜𑀸𑀬 𑀫𑁂 𑀲𑁄 𑀲𑀼𑀤𑀺𑀝𑁆𑀞𑁄. 𑀭𑀽𑀧𑀲𑁆𑀲𑀸𑀳𑀁, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀧𑀭𑀺𑀬𑁂𑀲𑀦𑀁 𑀅𑀘𑀭𑀺𑀁. 𑀬𑁄 𑀭𑀽𑀧𑀲𑁆𑀲 𑀆𑀤𑀻𑀦𑀯𑁄 𑀢𑀤𑀚𑁆𑀛𑀕𑀫𑀁. 𑀬𑀸𑀯𑀢𑀸 𑀭𑀽𑀧𑀲𑁆𑀲 𑀆𑀤𑀻𑀦𑀯𑁄 𑀧𑀜𑁆𑀜𑀸𑀬 𑀫𑁂 𑀲𑁄 𑀲𑀼𑀤𑀺𑀝𑁆𑀞𑁄. 𑀭𑀽𑀧𑀲𑁆𑀲𑀸𑀳𑀁, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀭𑀡𑀧𑀭𑀺𑀬𑁂𑀲𑀦𑀁 𑀅𑀘𑀭𑀺𑀁. 𑀬𑀁 𑀭𑀽𑀧𑀲𑁆𑀲 𑀦𑀺𑀲𑁆𑀲𑀭𑀡𑀁 𑀢𑀤𑀚𑁆𑀛𑀕𑀫𑀁. 𑀬𑀸𑀯𑀢𑀸 𑀭𑀽𑀧𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬 𑀫𑁂 𑀢𑀁 𑀲𑀼𑀤𑀺𑀝𑁆𑀞𑀁. 𑀯𑁂𑀤𑀦𑀸𑀬𑀸𑀳𑀁, 𑀪𑀺𑀓𑁆𑀔𑀯𑁂… 𑀲𑀜𑁆𑀜𑀸𑀬𑀸𑀳𑀁, 𑀪𑀺𑀓𑁆𑀔𑀯𑁂… 𑀲𑀗𑁆𑀔𑀸𑀭𑀸𑀦𑀸𑀳𑀁, 𑀪𑀺𑀓𑁆𑀔𑀯𑁂… 𑀯𑀺𑀜𑁆𑀜𑀸𑀡𑀲𑁆𑀲𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀸𑀤𑀧𑀭𑀺𑀬𑁂𑀲𑀦𑀁 𑀅𑀘𑀭𑀺𑀁. 𑀬𑁄 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑁄 𑀢𑀤𑀚𑁆𑀛𑀕𑀫𑀁. 𑀬𑀸𑀯𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑁄 𑀧𑀜𑁆𑀜𑀸𑀬 𑀫𑁂 𑀲𑁄 𑀲𑀼𑀤𑀺𑀝𑁆𑀞𑁄. 𑀯𑀺𑀜𑁆𑀜𑀸𑀡𑀲𑁆𑀲𑀸𑀳𑀁, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀧𑀭𑀺𑀬𑁂𑀲𑀦𑀁 𑀅𑀘𑀭𑀺𑀁. 𑀬𑁄 𑀯𑀺𑀜𑁆𑀜𑀸𑀡𑀲𑁆𑀲 𑀆𑀤𑀻𑀦𑀯𑁄 𑀢𑀤𑀚𑁆𑀛𑀕𑀫𑀁. 𑀬𑀸𑀯𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀆𑀤𑀻𑀦𑀯𑁄 𑀧𑀜𑁆𑀜𑀸𑀬 𑀫𑁂 𑀲𑁄 𑀲𑀼𑀤𑀺𑀝𑁆𑀞𑁄. 𑀯𑀺𑀜𑁆𑀜𑀸𑀡𑀲𑁆𑀲𑀸𑀳𑀁, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀭𑀡𑀧𑀭𑀺𑀬𑁂𑀲𑀦𑀁 𑀅𑀘𑀭𑀺𑀁. 𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀭𑀡𑀁 𑀢𑀤𑀚𑁆𑀛𑀕𑀫𑀁. 𑀬𑀸𑀯𑀢𑀸 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬 𑀫𑁂 𑀢𑀁 𑀲𑀼𑀤𑀺𑀝𑁆𑀞𑀁. 𑀬𑀸𑀯𑀓𑀻𑀯𑀜𑁆𑀘𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀲𑁆𑀲𑀸𑀤𑀜𑁆𑀘 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀜𑁆𑀘 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀜𑁆𑀘 𑀦𑀺𑀲𑁆𑀲𑀭𑀡𑀢𑁄 𑀬𑀣𑀸𑀪𑀽𑀢𑀁 𑀦𑀸𑀩𑁆𑀪𑀜𑁆𑀜𑀸𑀲𑀺𑀁…𑀧𑁂… 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺 𑁋 ‘𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀺 [𑀘𑁂𑀢𑁄𑀯𑀺𑀫𑀼𑀢𑁆𑀢𑀺 (𑀲𑀻. 𑀧𑀻. 𑀓.)]; 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺; 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’’𑀢𑀺. 𑀙𑀝𑁆𑀞𑀁.

𑁭. 𑀢𑀢𑀺𑀬𑀅𑀲𑁆𑀲𑀸𑀤𑀲𑀼𑀢𑁆𑀢𑀁

𑁨𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀦𑁄 𑀘𑁂𑀤𑀁, 𑀪𑀺𑀓𑁆𑀔𑀯𑁂, 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑁄 𑀅𑀪𑀯𑀺𑀲𑁆𑀲 𑀦𑀬𑀺𑀤𑀁 𑀲𑀢𑁆𑀢𑀸 𑀭𑀽𑀧𑀲𑁆𑀫𑀺𑀁 𑀲𑀸𑀭𑀚𑁆𑀚𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑁄, 𑀢𑀲𑁆𑀫𑀸 𑀲𑀢𑁆𑀢𑀸 𑀭𑀽𑀧𑀲𑁆𑀫𑀺𑀁 𑀲𑀸𑀭𑀚𑁆𑀚𑀦𑁆𑀢𑀺. 𑀦𑁄 𑀘𑁂𑀤𑀁, 𑀪𑀺𑀓𑁆𑀔𑀯𑁂, 𑀭𑀽𑀧𑀲𑁆𑀲 𑀆𑀤𑀻𑀦𑀯𑁄 𑀅𑀪𑀯𑀺𑀲𑁆𑀲 𑀦𑀬𑀺𑀤𑀁 𑀲𑀢𑁆𑀢𑀸 𑀭𑀽𑀧𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀭𑀽𑀧𑀲𑁆𑀲 𑀆𑀤𑀻𑀦𑀯𑁄, 𑀢𑀲𑁆𑀫𑀸 𑀲𑀢𑁆𑀢𑀸 𑀭𑀽𑀧𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀺. 𑀦𑁄 𑀘𑁂𑀤𑀁, 𑀪𑀺𑀓𑁆𑀔𑀯𑁂, 𑀭𑀽𑀧𑀲𑁆𑀲 𑀦𑀺𑀲𑁆𑀲𑀭𑀡𑀁 𑀅𑀪𑀯𑀺𑀲𑁆𑀲 𑀦𑀬𑀺𑀤𑀁 𑀲𑀢𑁆𑀢𑀸 𑀭𑀽𑀧𑀲𑁆𑀫𑀸 𑀦𑀺𑀲𑁆𑀲𑀭𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀭𑀽𑀧𑀲𑁆𑀲 𑀦𑀺𑀲𑁆𑀲𑀭𑀡𑀁, 𑀢𑀲𑁆𑀫𑀸 𑀲𑀢𑁆𑀢𑀸 𑀭𑀽𑀧𑀲𑁆𑀫𑀸 𑀦𑀺𑀲𑁆𑀲𑀭𑀦𑁆𑀢𑀺. 𑀦𑁄 𑀘𑁂𑀤𑀁, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀬…𑀧𑁂… 𑀦𑁄 𑀘𑁂𑀤𑀁, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀬… 𑀦𑁄 𑀘𑁂𑀤𑀁, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸𑀦𑀁 𑀦𑀺𑀲𑁆𑀲𑀭𑀡𑀁 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀲𑀢𑁆𑀢𑀸 𑀲𑀗𑁆𑀔𑀸𑀭𑁂𑀳𑀺 𑀦𑀺𑀲𑁆𑀲𑀭𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀲𑀗𑁆𑀔𑀸𑀭𑀸𑀦𑀁 𑀦𑀺𑀲𑁆𑀲𑀭𑀡𑀁, 𑀢𑀲𑁆𑀫𑀸 𑀲𑀢𑁆𑀢𑀸 𑀲𑀗𑁆𑀔𑀸𑀭𑁂𑀳𑀺 𑀦𑀺𑀲𑁆𑀲𑀭𑀦𑁆𑀢𑀺. 𑀦𑁄 𑀘𑁂𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑁄 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀲𑀸𑀭𑀚𑁆𑀚𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑁄, 𑀢𑀲𑁆𑀫𑀸 𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀲𑀸𑀭𑀚𑁆𑀚𑀦𑁆𑀢𑀺. 𑀦𑁄 𑀘𑁂𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀲𑁆𑀲 𑀆𑀤𑀻𑀦𑀯𑁄 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀯𑀺𑀜𑁆𑀜𑀸𑀡𑀲𑁆𑀲 𑀆𑀤𑀻𑀦𑀯𑁄, 𑀢𑀲𑁆𑀫𑀸 𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀺. 𑀦𑁄 𑀘𑁂𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀭𑀡𑀁 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀫𑀸 𑀦𑀺𑀲𑁆𑀲𑀭𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀭𑀡𑀁, 𑀢𑀲𑁆𑀫𑀸 𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀲𑁆𑀫𑀸 𑀦𑀺𑀲𑁆𑀲𑀭𑀦𑁆𑀢𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀲𑁆𑀲𑀸𑀤𑀜𑁆𑀘 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀜𑁆𑀘 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀜𑁆𑀘 𑀦𑀺𑀲𑁆𑀲𑀭𑀡𑀢𑁄 𑀬𑀣𑀸𑀪𑀽𑀢𑀁 𑀦𑀸𑀩𑁆𑀪𑀜𑁆𑀜𑀁𑀲𑀼 [𑀦𑀸𑀩𑁆𑀪𑀜𑁆𑀜𑀺𑀁𑀲𑀼 (𑀲𑀻.)]; 𑀦𑁂𑀯 𑀢𑀸𑀯, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀤𑁂𑀯𑀓𑀸 𑀮𑁄𑀓𑀸 𑀲𑀫𑀸𑀭𑀓𑀸 𑀲𑀩𑁆𑀭𑀳𑁆𑀫𑀓𑀸 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀦𑀺𑀲𑁆𑀲𑀝𑀸 𑀯𑀺𑀲𑀁𑀬𑀼𑀢𑁆𑀢𑀸 𑀯𑀺𑀧𑁆𑀧𑀫𑀼𑀢𑁆𑀢𑀸 𑀯𑀺𑀫𑀭𑀺𑀬𑀸𑀤𑀻𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀺𑀁𑀲𑀼. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀲𑁆𑀲𑀸𑀤𑀜𑁆𑀘 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀜𑁆𑀘 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀜𑁆𑀘 𑀦𑀺𑀲𑁆𑀲𑀭𑀡𑀢𑁄 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀁𑀲𑀼; 𑀅𑀣, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀤𑁂𑀯𑀓𑀸 𑀮𑁄𑀓𑀸 𑀲𑀫𑀸𑀭𑀓𑀸 𑀲𑀩𑁆𑀭𑀳𑁆𑀫𑀓𑀸 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀦𑀺𑀲𑁆𑀲𑀝𑀸 𑀯𑀺𑀲𑀁𑀬𑀼𑀢𑁆𑀢𑀸 𑀯𑀺𑀧𑁆𑀧𑀫𑀼𑀢𑁆𑀢𑀸 𑀯𑀺𑀫𑀭𑀺𑀬𑀸𑀤𑀻𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀦𑁆𑀢𑀺’’. 𑀲𑀢𑁆𑀢𑀫𑀁.

𑁮. 𑀅𑀪𑀺𑀦𑀦𑁆𑀤𑀦𑀲𑀼𑀢𑁆𑀢𑀁

𑁨𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀅𑀪𑀺𑀦𑀦𑁆𑀤𑀢𑀺, 𑀤𑀼𑀓𑁆𑀔𑀁 𑀲𑁄 𑀅𑀪𑀺𑀦𑀦𑁆𑀤𑀢𑀺. 𑀬𑁄 𑀤𑀼𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺, 𑀅𑀧𑀭𑀺𑀫𑀼𑀢𑁆𑀢𑁄 𑀲𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀬𑁄 𑀯𑁂𑀤𑀦𑀁 𑀅𑀪𑀺𑀦𑀦𑁆𑀤𑀢𑀺… 𑀬𑁄 𑀲𑀜𑁆𑀜𑀁 𑀅𑀪𑀺𑀦𑀦𑁆𑀤𑀢𑀺… 𑀬𑁄 𑀲𑀗𑁆𑀔𑀸𑀭𑁂 𑀅𑀪𑀺𑀦𑀦𑁆𑀤𑀢𑀺… 𑀬𑁄 𑀯𑀺𑀜𑁆𑀜𑀸𑀡𑀁 𑀅𑀪𑀺𑀦𑀦𑁆𑀤𑀢𑀺, 𑀤𑀼𑀓𑁆𑀔𑀁 𑀲𑁄 𑀅𑀪𑀺𑀦𑀦𑁆𑀤𑀢𑀺. 𑀬𑁄 𑀤𑀼𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺, 𑀅𑀧𑀭𑀺𑀫𑀼𑀢𑁆𑀢𑁄 𑀲𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀬𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀸𑀪𑀺𑀦𑀦𑁆𑀤𑀢𑀺, 𑀤𑀼𑀓𑁆𑀔𑀁 𑀲𑁄 𑀦𑀸𑀪𑀺𑀦𑀦𑁆𑀤𑀢𑀺. 𑀬𑁄 𑀤𑀼𑀓𑁆𑀔𑀁 𑀦𑀸𑀪𑀺𑀦𑀦𑁆𑀤𑀢𑀺, 𑀧𑀭𑀺𑀫𑀼𑀢𑁆𑀢𑁄 𑀲𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀬𑁄 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑀺… 𑀬𑁄 𑀲𑀜𑁆𑀜𑀁 𑀦𑀸𑀪𑀺𑀦𑀦𑁆𑀤𑀢𑀺… 𑀬𑁄 𑀲𑀗𑁆𑀔𑀸𑀭𑁂 𑀦𑀸𑀪𑀺𑀦𑀦𑁆𑀤𑀢𑀺… 𑀬𑁄 𑀯𑀺𑀜𑁆𑀜𑀸𑀡𑀁 𑀦𑀸𑀪𑀺𑀦𑀦𑁆𑀤𑀢𑀺, 𑀤𑀼𑀓𑁆𑀔𑀁 𑀲𑁄 𑀦𑀸𑀪𑀺𑀦𑀦𑁆𑀤𑀢𑀺. 𑀬𑁄 𑀤𑀼𑀓𑁆𑀔𑀁 𑀦𑀸𑀪𑀺𑀦𑀦𑁆𑀤𑀢𑀺, 𑀧𑀭𑀺𑀫𑀼𑀢𑁆𑀢𑁄 𑀲𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀉𑀧𑁆𑀧𑀸𑀤𑀲𑀼𑀢𑁆𑀢𑀁

𑁩𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑁄 𑀞𑀺𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀸𑀢𑀼𑀪𑀸𑀯𑁄, 𑀤𑀼𑀓𑁆𑀔𑀲𑁆𑀲𑁂𑀲𑁄 𑀉𑀧𑁆𑀧𑀸𑀤𑁄 𑀭𑁄𑀕𑀸𑀦𑀁 𑀞𑀺𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀸𑀢𑀼𑀪𑀸𑀯𑁄. 𑀬𑁄 𑀯𑁂𑀤𑀦𑀸𑀬…𑀧𑁂… 𑀬𑁄 𑀲𑀜𑁆𑀜𑀸𑀬…𑀧𑁂… 𑀬𑁄 𑀲𑀗𑁆𑀔𑀸𑀭𑀸𑀦𑀁…𑀧𑁂… 𑀬𑁄 𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑁄 𑀞𑀺𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀸𑀢𑀼𑀪𑀸𑀯𑁄, 𑀤𑀼𑀓𑁆𑀔𑀲𑁆𑀲𑁂𑀲𑁄 𑀉𑀧𑁆𑀧𑀸𑀤𑁄 𑀭𑁄𑀕𑀸𑀦𑀁 𑀞𑀺𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀸𑀢𑀼𑀪𑀸𑀯𑁄. 𑀬𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀲𑁆𑀲 𑀦𑀺𑀭𑁄𑀥𑁄 𑀯𑀽𑀧𑀲𑀫𑁄 𑀅𑀢𑁆𑀣𑀗𑁆𑀕𑀫𑁄, 𑀤𑀼𑀓𑁆𑀔𑀲𑁆𑀲𑁂𑀲𑁄 𑀦𑀺𑀭𑁄𑀥𑁄 𑀭𑁄𑀕𑀸𑀦𑀁 𑀯𑀽𑀧𑀲𑀫𑁄 𑀚𑀭𑀸𑀫𑀭𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄. 𑀬𑁄 𑀯𑁂𑀤𑀦𑀸𑀬 …𑀧𑁂… 𑀬𑁄 𑀲𑀜𑁆𑀜𑀸𑀬… 𑀬𑁄 𑀲𑀗𑁆𑀔𑀸𑀭𑀸𑀦𑀁… 𑀬𑁄 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁄 𑀯𑀽𑀧𑀲𑀫𑁄 𑀅𑀢𑁆𑀣𑀗𑁆𑀕𑀫𑁄, 𑀤𑀼𑀓𑁆𑀔𑀲𑁆𑀲𑁂𑀲𑁄 𑀦𑀺𑀭𑁄𑀥𑁄 𑀭𑁄𑀕𑀸𑀦𑀁 𑀯𑀽𑀧𑀲𑀫𑁄 𑀚𑀭𑀸𑀫𑀭𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’’𑀢𑀺. 𑀦𑀯𑀫𑀁.

𑁧𑁦. 𑀅𑀖𑀫𑀽𑀮𑀲𑀼𑀢𑁆𑀢𑀁

𑁩𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀅𑀖𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀅𑀖𑀫𑀽𑀮𑀜𑁆𑀘. 𑀢𑀁 𑀲𑀼𑀡𑀸𑀣. 𑀓𑀢𑀫𑀜𑁆𑀘 𑀪𑀺𑀓𑁆𑀔𑀯𑁂 𑀅𑀖𑀁? 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀖𑀁, 𑀯𑁂𑀤𑀦𑀸 𑀅𑀖𑀁, 𑀲𑀜𑁆𑀜𑀸 𑀅𑀖𑀁, 𑀲𑀗𑁆𑀔𑀸𑀭𑀸 𑀅𑀖𑀁, 𑀯𑀺𑀜𑁆𑀜𑀸𑀡𑀁 𑀅𑀖𑀁. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀖𑀁. 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀖𑀫𑀽𑀮𑀁? 𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸 [𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸 (𑀲𑀩𑁆𑀩𑀢𑁆𑀣)] 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻; 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀢𑀡𑁆𑀳𑀸, 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀖𑀫𑀽𑀮’’𑀦𑁆𑀢𑀺. 𑀤𑀲𑀫𑀁.

𑁧𑁧. 𑀧𑀪𑀗𑁆𑀕𑀼𑀲𑀼𑀢𑁆𑀢𑀁

𑁩𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀪𑀗𑁆𑀕𑀼𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀅𑀧𑁆𑀧𑀪𑀗𑁆𑀕𑀼𑀜𑁆𑀘. 𑀢𑀁 𑀲𑀼𑀡𑀸𑀣. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀪𑀗𑁆𑀕𑀼, 𑀓𑀺𑀁 𑀅𑀧𑁆𑀧𑀪𑀗𑁆𑀕𑀼? 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀧𑀪𑀗𑁆𑀕𑀼. 𑀬𑁄 𑀢𑀲𑁆𑀲 𑀦𑀺𑀭𑁄𑀥𑁄 𑀯𑀽𑀧𑀲𑀫𑁄 𑀅𑀢𑁆𑀣𑀗𑁆𑀕𑀫𑁄, 𑀇𑀤𑀁 𑀅𑀧𑁆𑀧𑀪𑀗𑁆𑀕𑀼. 𑀯𑁂𑀤𑀦𑀸 𑀧𑀪𑀗𑁆𑀕𑀼. 𑀬𑁄 𑀢𑀲𑁆𑀲𑀸 𑀦𑀺𑀭𑁄𑀥𑁄 𑀯𑀽𑀧𑀲𑀫𑁄 𑀅𑀢𑁆𑀣𑀗𑁆𑀕𑀫𑁄, 𑀇𑀤𑀁 𑀅𑀧𑁆𑀧𑀪𑀗𑁆𑀕𑀼. 𑀲𑀜𑁆𑀜𑀸 𑀧𑀪𑀗𑁆𑀕𑀼… 𑀲𑀗𑁆𑀔𑀸𑀭𑀸 𑀧𑀪𑀗𑁆𑀕𑀼. 𑀬𑁄 𑀢𑁂𑀲𑀁 𑀦𑀺𑀭𑁄𑀥𑁄 𑀯𑀽𑀧𑀲𑀫𑁄 𑀅𑀢𑁆𑀣𑀗𑁆𑀕𑀫𑁄, 𑀇𑀤𑀁 𑀅𑀧𑁆𑀧𑀪𑀗𑁆𑀕𑀼. 𑀯𑀺𑀜𑁆𑀜𑀸𑀡𑀁 𑀧𑀪𑀗𑁆𑀕𑀼. 𑀬𑁄 𑀢𑀲𑁆𑀲 𑀦𑀺𑀭𑁄𑀥𑁄 𑀯𑀽𑀧𑀲𑀫𑁄 𑀅𑀢𑁆𑀣𑀗𑁆𑀕𑀫𑁄, 𑀇𑀤𑀁 𑀅𑀧𑁆𑀧𑀪𑀗𑁆𑀕𑀽’’𑀢𑀺. 𑀏𑀓𑀸𑀤𑀲𑀫𑀁.

𑀪𑀸𑀭𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀪𑀸𑀭𑀁 𑀧𑀭𑀺𑀜𑁆𑀜𑀁 𑀅𑀪𑀺𑀚𑀸𑀦𑀁, 𑀙𑀦𑁆𑀤𑀭𑀸𑀕𑀁 𑀘𑀢𑀼𑀢𑁆𑀣𑀓𑀁;

𑀅𑀲𑁆𑀲𑀸𑀤𑀸 𑀘 𑀢𑀬𑁄 𑀯𑀼𑀢𑁆𑀢𑀸, 𑀅𑀪𑀺𑀦𑀦𑁆𑀤𑀦𑀫𑀝𑁆𑀞𑀫𑀁;

𑀉𑀧𑁆𑀧𑀸𑀤𑀁 𑀅𑀖𑀫𑀽𑀮𑀜𑁆𑀘, 𑀏𑀓𑀸𑀤𑀲𑀫𑁄 𑀧𑀪𑀗𑁆𑀕𑀽𑀢𑀺.