𑁧𑁧. 𑀅𑀦𑁆𑀢𑀯𑀕𑁆𑀕𑁄

𑁧. 𑀅𑀦𑁆𑀢𑀲𑀼𑀢𑁆𑀢𑀁

𑁧𑁦𑁩. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀓𑁆𑀓𑀸𑀬𑀦𑁆𑀢𑁄, 𑀲𑀓𑁆𑀓𑀸𑀬𑀲𑀫𑀼𑀤𑀬𑀦𑁆𑀢𑁄, 𑀲𑀓𑁆𑀓𑀸𑀬𑀦𑀺𑀭𑁄𑀥𑀦𑁆𑀢𑁄, 𑀲𑀓𑁆𑀓𑀸𑀬𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑁆𑀧𑀝𑀺𑀧𑀤𑀦𑁆𑀢𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀦𑁆𑀢𑁄? 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀢𑀫𑁂 𑀧𑀜𑁆𑀘? 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀦𑁆𑀢𑁄’’.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀲𑀫𑀼𑀤𑀬𑀦𑁆𑀢𑁄? 𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸 𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀢𑀡𑁆𑀳𑀸, 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀲𑀫𑀼𑀤𑀬𑀦𑁆𑀢𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀦𑀺𑀭𑁄𑀥𑀦𑁆𑀢𑁄? 𑀬𑁄 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀦𑀺𑀭𑁄𑀥𑀦𑁆𑀢𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑁆𑀧𑀝𑀺𑀧𑀤𑀦𑁆𑀢𑁄? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑁆𑀧𑀝𑀺𑀧𑀤𑀦𑁆𑀢𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀅𑀦𑁆𑀢𑀸’’𑀢𑀺. 𑀧𑀞𑀫𑀁.

𑁨. 𑀤𑀼𑀓𑁆𑀔𑀲𑀼𑀢𑁆𑀢𑀁

𑁧𑁦𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀤𑀼𑀓𑁆𑀔𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀤𑀼𑀓𑁆𑀔𑀲𑀫𑀼𑀤𑀬𑀜𑁆𑀘 𑀤𑀼𑀓𑁆𑀔𑀦𑀺𑀭𑁄𑀥𑀜𑁆𑀘 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁. 𑀢𑀁 𑀲𑀼𑀡𑀸𑀣. 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁? 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀢𑀫𑁂 𑀧𑀜𑁆𑀘? 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑀫𑀼𑀤𑀬𑁄? 𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸…𑀧𑁂… 𑀓𑀸𑀫𑀢𑀡𑁆𑀳𑀸, 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑀫𑀼𑀤𑀬𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑁄? 𑀬𑁄 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑀓𑁆𑀓𑀸𑀬𑀲𑀼𑀢𑁆𑀢𑀁

𑁧𑁦𑁫. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀲𑀓𑁆𑀓𑀸𑀬𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀲𑀓𑁆𑀓𑀸𑀬𑀲𑀫𑀼𑀤𑀬𑀜𑁆𑀘 𑀲𑀓𑁆𑀓𑀸𑀬𑀦𑀺𑀭𑁄𑀥𑀜𑁆𑀘 𑀲𑀓𑁆𑀓𑀸𑀬𑀦𑀺𑀭𑁄𑀥𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁. 𑀢𑀁 𑀲𑀼𑀡𑀸𑀣. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑁄? 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀢𑀫𑁂 𑀧𑀜𑁆𑀘? 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀲𑀫𑀼𑀤𑀬𑁄? 𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸…𑀧𑁂… 𑀓𑀸𑀫𑀢𑀡𑁆𑀳𑀸, 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀲𑀫𑀼𑀤𑀬𑁄. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀦𑀺𑀭𑁄𑀥𑁄? 𑀬𑁄 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀦𑀺𑀭𑁄𑀥𑁄. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀓𑁆𑀓𑀸𑀬𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺. 𑀢𑀢𑀺𑀬𑀁.

𑁪. 𑀧𑀭𑀺𑀜𑁆𑀜𑁂𑀬𑁆𑀬𑀲𑀼𑀢𑁆𑀢𑀁

𑁧𑁦𑁬. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀭𑀺𑀜𑁆𑀜𑁂𑀬𑁆𑀬𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺 𑀧𑀭𑀺𑀜𑁆𑀜𑀜𑁆𑀘 𑀧𑀭𑀺𑀜𑁆𑀜𑀸𑀢𑀸𑀯𑀺𑀜𑁆𑀘 𑀧𑀼𑀕𑁆𑀕𑀮𑀁. 𑀢𑀁 𑀲𑀼𑀡𑀸𑀣. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸? 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄. 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀧𑀭𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑁂𑀬𑁆𑀬𑀸 𑀥𑀫𑁆𑀫𑀸. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑀸? 𑀭𑀸𑀕𑀓𑁆𑀔𑀬𑁄, 𑀤𑁄𑀲𑀓𑁆𑀔𑀬𑁄, 𑀫𑁄𑀳𑀓𑁆𑀔𑀬𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑀸. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑀸𑀢𑀸𑀯𑀻 𑀧𑀼𑀕𑁆𑀕𑀮𑁄? 𑀅𑀭𑀳𑀸𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀬𑁆𑀯𑀸𑀬𑀁 𑀆𑀬𑀲𑁆𑀫𑀸 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑁋 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑀸𑀢𑀸𑀯𑀻 𑀧𑀼𑀕𑁆𑀕𑀮𑁄’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀲𑀫𑀡𑀲𑀼𑀢𑁆𑀢𑀁

𑁧𑁦𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀓𑀢𑀫𑁂 𑀧𑀜𑁆𑀘? 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀺…𑀧𑁂… 𑀧𑀚𑀸𑀦𑀦𑁆𑀢𑀺, 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀲𑀫𑀡𑀲𑀼𑀢𑁆𑀢𑀁

𑁧𑁦𑁮. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀓𑀢𑀫𑁂 𑀧𑀜𑁆𑀘? 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀦𑁆𑀢𑀺…𑀧𑁂… 𑀧𑀚𑀸𑀦𑀦𑁆𑀢𑀺, 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺. 𑀙𑀝𑁆𑀞𑀁.

𑁭. 𑀲𑁄𑀢𑀸𑀧𑀦𑁆𑀦𑀲𑀼𑀢𑁆𑀢𑀁

𑁧𑁦𑁯. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀓𑀢𑀫𑁂 𑀧𑀜𑁆𑀘? 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄’’𑀢𑀺. 𑀲𑀢𑁆𑀢𑀫𑀁.

𑁮. 𑀅𑀭𑀳𑀦𑁆𑀢𑀲𑀼𑀢𑁆𑀢𑀁

𑁧𑁧𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀓𑀢𑀫𑁂 𑀧𑀜𑁆𑀘? 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄’’𑀢𑀺. 𑀅𑀝𑁆𑀞𑀫𑀁.

𑁯. 𑀙𑀦𑁆𑀤𑀧𑁆𑀧𑀳𑀸𑀦𑀲𑀼𑀢𑁆𑀢𑀁

𑁧𑁧𑁧. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀭𑀽𑀧𑁂, 𑀪𑀺𑀓𑁆𑀔𑀯𑁂, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸, 𑀢𑀁 𑀧𑀚𑀳𑀣. 𑀏𑀯𑀁 𑀢𑀁 𑀭𑀽𑀧𑀁 𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁. 𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸, 𑀢𑀁 𑀧𑀚𑀳𑀣. 𑀏𑀯𑀁 𑀢𑀁 𑀯𑀺𑀜𑁆𑀜𑀸𑀡𑀁 𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀙𑀦𑁆𑀤𑀧𑁆𑀧𑀳𑀸𑀦𑀲𑀼𑀢𑁆𑀢𑀁

𑁧𑁧𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀭𑀽𑀧𑁂, 𑀪𑀺𑀓𑁆𑀔𑀯𑁂, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀬𑀼𑀧𑀸𑀤𑀸𑀦𑀸 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸, 𑀢𑁂 𑀧𑀚𑀳𑀣. 𑀏𑀯𑀁 𑀢𑀁 𑀭𑀽𑀧𑀁 𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁…𑀧𑁂… 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼 𑀬𑁄 𑀙𑀦𑁆𑀤𑁄…𑀧𑁂… 𑀏𑀯𑀁 𑀢𑁂 𑀲𑀗𑁆𑀔𑀸𑀭𑀸 𑀧𑀳𑀻𑀦𑀸 𑀪𑀯𑀺𑀲𑁆𑀲𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀯𑀺𑀜𑁆𑀜𑀸𑀡𑁂 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀬𑀼𑀧𑀸𑀤𑀸𑀦𑀸 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸, 𑀢𑁂 𑀧𑀚𑀳𑀣. 𑀏𑀯𑀁 𑀢𑀁 𑀯𑀺𑀜𑁆𑀜𑀸𑀡𑀁 𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫’’𑀦𑁆𑀢𑀺. 𑀤𑀲𑀫𑀁.

𑀅𑀦𑁆𑀢𑀯𑀕𑁆𑀕𑁄 𑀏𑀓𑀸𑀤𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀦𑁆𑀢𑁄 𑀤𑀼𑀓𑁆𑀔𑀜𑁆𑀘 𑀲𑀓𑁆𑀓𑀸𑀬𑁄, 𑀧𑀭𑀺𑀜𑁆𑀜𑁂𑀬𑁆𑀬𑀸 𑀲𑀫𑀡𑀸 𑀤𑀼𑀯𑁂;

𑀲𑁄𑀢𑀸𑀧𑀦𑁆𑀦𑁄 𑀅𑀭𑀳𑀸 𑀘, 𑀤𑀼𑀯𑁂 𑀘 𑀙𑀦𑁆𑀤𑀧𑁆𑀧𑀳𑀸𑀦𑀸𑀢𑀺.