𑁬. 𑀅𑀪𑀺𑀦𑀦𑁆𑀤𑀲𑀼𑀢𑁆𑀢𑀁

𑁧𑁧𑁯. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀬𑁄, 𑀪𑀺𑀓𑁆𑀔𑀯𑁂, 𑀧𑀣𑀯𑀻𑀥𑀸𑀢𑀼𑀁 𑀅𑀪𑀺𑀦𑀦𑁆𑀤𑀢𑀺, 𑀤𑀼𑀓𑁆𑀔𑀁 𑀲𑁄 𑀅𑀪𑀺𑀦𑀦𑁆𑀤𑀢𑀺. 𑀬𑁄 𑀤𑀼𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺, 𑀅𑀧𑀭𑀺𑀫𑀼𑀢𑁆𑀢𑁄 𑀲𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀬𑁄 𑀆𑀧𑁄𑀥𑀸𑀢𑀼𑀁 𑀅𑀪𑀺𑀦𑀦𑁆𑀤𑀢𑀺…𑀧𑁂… 𑀬𑁄 𑀢𑁂𑀚𑁄𑀥𑀸𑀢𑀼𑀁… 𑀬𑁄 𑀯𑀸𑀬𑁄𑀥𑀸𑀢𑀼𑀁 𑀅𑀪𑀺𑀦𑀦𑁆𑀤𑀢𑀺, 𑀤𑀼𑀓𑁆𑀔𑀁 𑀲𑁄 𑀅𑀪𑀺𑀦𑀦𑁆𑀤𑀢𑀺. 𑀬𑁄 𑀤𑀼𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺, 𑀅𑀧𑀭𑀺𑀫𑀼𑀢𑁆𑀢𑁄 𑀲𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺’’.

‘‘𑀬𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀧𑀣𑀯𑀻𑀥𑀸𑀢𑀼𑀁 𑀦𑀸𑀪𑀺𑀦𑀦𑁆𑀤𑀢𑀺, 𑀤𑀼𑀓𑁆𑀔𑀁 𑀲𑁄 𑀦𑀸𑀪𑀺𑀦𑀦𑁆𑀤𑀢𑀺. 𑀬𑁄 𑀤𑀼𑀓𑁆𑀔𑀁 𑀦𑀸𑀪𑀺𑀦𑀦𑁆𑀤𑀢𑀺, 𑀧𑀭𑀺𑀫𑀼𑀢𑁆𑀢𑁄 𑀲𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀬𑁄 𑀆𑀧𑁄𑀥𑀸𑀢𑀼𑀁…𑀧𑁂… 𑀬𑁄 𑀢𑁂𑀚𑁄𑀥𑀸𑀢𑀼𑀁… 𑀬𑁄 𑀯𑀸𑀬𑁄𑀥𑀸𑀢𑀼𑀁 𑀦𑀸𑀪𑀺𑀦𑀦𑁆𑀤𑀢𑀺, 𑀤𑀼𑀓𑁆𑀔𑀁 𑀲𑁄 𑀦𑀸𑀪𑀺𑀦𑀦𑁆𑀤𑀢𑀺. 𑀬𑁄 𑀤𑀼𑀓𑁆𑀔𑀁 𑀦𑀸𑀪𑀺𑀦𑀦𑁆𑀤𑀢𑀺, 𑀧𑀭𑀺𑀫𑀼𑀢𑁆𑀢𑁄 𑀲𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀻’’𑀢𑀺. 𑀙𑀝𑁆𑀞𑀁.