𑁯. 𑀢𑀺𑀲𑁆𑀲𑀲𑀼𑀢𑁆𑀢𑀁

𑁨𑁪𑁩. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀢𑀺𑀲𑁆𑀲𑁄 𑀪𑀕𑀯𑀢𑁄 𑀧𑀺𑀢𑀼𑀘𑁆𑀙𑀸𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑀬𑀫𑀸𑀦𑁄. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀢𑀺𑀲𑁆𑀲𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄 𑀢𑁆𑀯𑀁, 𑀢𑀺𑀲𑁆𑀲, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑀬𑀫𑀸𑀦𑁄’’𑀢𑀺? ‘‘𑀢𑀣𑀸 𑀳𑀺 𑀧𑀦 𑀫𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀲𑀫𑀦𑁆𑀢𑀸 𑀯𑀸𑀘𑀸𑀲𑀦𑁆𑀦𑀺𑀢𑁄𑀤𑀓𑁂𑀦 [𑀯𑀸𑀘𑀸𑀬 𑀲𑀦𑁆𑀦𑀺𑀢𑁄𑀤𑀓𑁂𑀦 (𑀓.)] 𑀲𑀜𑁆𑀚𑀫𑁆𑀪𑀭𑀺𑀫𑀓𑀁𑀲𑀽’’𑀢𑀺 [𑀲𑀜𑁆𑀚𑀩𑁆𑀪𑀭𑀺𑀫𑀓𑀁𑀲𑀽𑀢𑀺 (?)]. ‘‘𑀢𑀣𑀸𑀳𑀺 𑀧𑀦 𑀢𑁆𑀯𑀁, 𑀢𑀺𑀲𑁆𑀲, 𑀯𑀢𑁆𑀢𑀸 𑀦𑁄 𑀘 𑀯𑀘𑀦𑀓𑁆𑀔𑀫𑁄; 𑀦 𑀔𑁄 𑀢𑁂 𑀢𑀁, 𑀢𑀺𑀲𑁆𑀲, 𑀧𑀢𑀺𑀭𑀽𑀧𑀁 𑀓𑀼𑀮𑀧𑀼𑀢𑁆𑀢𑀲𑁆𑀲 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀲𑁆𑀲, 𑀬𑀁 𑀢𑁆𑀯𑀁 𑀯𑀢𑁆𑀢𑀸 𑀦𑁄 𑀘 𑀯𑀘𑀦𑀓𑁆𑀔𑀫𑁄. 𑀏𑀢𑀁 𑀔𑁄 𑀢𑁂, 𑀢𑀺𑀲𑁆𑀲, 𑀧𑀢𑀺𑀭𑀽𑀧𑀁 𑀓𑀼𑀮𑀧𑀼𑀢𑁆𑀢𑀲𑁆𑀲 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀲𑁆𑀲 𑁋 ‘𑀬𑀁 𑀢𑁆𑀯𑀁 𑀯𑀢𑁆𑀢𑀸 𑀘 𑀅𑀲𑁆𑀲 𑀯𑀘𑀦𑀓𑁆𑀔𑀫𑁄 𑀘𑀸’’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀓𑀺𑀁 𑀦𑀼 𑀓𑀼𑀚𑁆𑀛𑀲𑀺 𑀫𑀸 𑀓𑀼𑀚𑁆𑀛𑀺, 𑀅𑀓𑁆𑀓𑁄𑀥𑁄 𑀢𑀺𑀲𑁆𑀲 𑀢𑁂 𑀯𑀭𑀁;

𑀓𑁄𑀥𑀫𑀸𑀦𑀫𑀓𑁆𑀔𑀯𑀺𑀦𑀬𑀢𑁆𑀣𑀜𑁆𑀳𑀺, 𑀢𑀺𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺. 𑀦𑀯𑀫𑀁;