𑁭. 𑀫𑀳𑀸𑀯𑀕𑁆𑀕𑁄

𑁧. 𑀅𑀲𑁆𑀲𑀼𑀢𑀯𑀸𑀲𑀼𑀢𑁆𑀢𑀁

𑁬𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂…𑀧𑁂… ‘‘𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀇𑀫𑀲𑁆𑀫𑀺𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀫𑀺𑀁 𑀓𑀸𑀬𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬𑀧𑀺 𑀯𑀺𑀭𑀚𑁆𑀚𑁂𑀬𑁆𑀬𑀧𑀺 𑀯𑀺𑀫𑀼𑀘𑁆𑀘𑁂𑀬𑁆𑀬𑀧𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? [𑀘𑀸𑀢𑀼𑀫𑁆𑀫𑀳𑀸𑀪𑀽𑀢𑀺𑀓𑀲𑁆𑀫𑀺𑀁 (𑀲𑀻. 𑀲𑁆𑀬𑀸. 𑀓𑀁.)] 𑀤𑀺𑀲𑁆𑀲𑀢𑀺, 𑀪𑀺𑀓𑁆𑀔𑀯𑁂 [𑀤𑀺𑀲𑁆𑀲𑀢𑀺 𑀳𑀺 𑀪𑀺𑀓𑁆𑀔𑀯𑁂 (𑀲𑀻. 𑀲𑁆𑀬𑀸. 𑀓𑀁.)], 𑀇𑀫𑀲𑁆𑀲 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀆𑀘𑀬𑁄𑀧𑀺 𑀅𑀧𑀘𑀬𑁄𑀧𑀺 𑀆𑀤𑀸𑀦𑀫𑁆𑀧𑀺 𑀦𑀺𑀓𑁆𑀔𑁂𑀧𑀦𑀫𑁆𑀧𑀺. 𑀢𑀲𑁆𑀫𑀸 𑀢𑀢𑁆𑀭𑀸𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬𑀧𑀺 𑀯𑀺𑀭𑀚𑁆𑀚𑁂𑀬𑁆𑀬𑀧𑀺 𑀯𑀺𑀫𑀼𑀘𑁆𑀘𑁂𑀬𑁆𑀬𑀧𑀺’’.

‘‘𑀬𑀜𑁆𑀘 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺 𑀘𑀺𑀢𑁆𑀢𑀁 𑀇𑀢𑀺𑀧𑀺, 𑀫𑀦𑁄 𑀇𑀢𑀺𑀧𑀺, 𑀯𑀺𑀜𑁆𑀜𑀸𑀡𑀁 𑀇𑀢𑀺𑀧𑀺, 𑀢𑀢𑁆𑀭𑀸𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀦𑀸𑀮𑀁 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀦𑀸𑀮𑀁 𑀯𑀺𑀭𑀚𑁆𑀚𑀺𑀢𑀼𑀁 𑀦𑀸𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀻𑀖𑀭𑀢𑁆𑀢𑀜𑁆𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀚𑁆𑀛𑁄𑀲𑀺𑀢𑀁 𑀫𑀫𑀸𑀬𑀺𑀢𑀁 𑀧𑀭𑀸𑀫𑀝𑁆𑀞𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺. 𑀢𑀲𑁆𑀫𑀸 𑀢𑀢𑁆𑀭𑀸𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀦𑀸𑀮𑀁 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀦𑀸𑀮𑀁 𑀯𑀺𑀭𑀚𑁆𑀚𑀺𑀢𑀼𑀁 𑀦𑀸𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁.

‘‘𑀯𑀭𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀇𑀫𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀁 𑀓𑀸𑀬𑀁 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀦 𑀢𑁆𑀯𑁂𑀯 𑀘𑀺𑀢𑁆𑀢𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀲𑁆𑀲𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀓𑀸𑀬𑁄 𑀏𑀓𑀫𑁆𑀧𑀺 𑀯𑀲𑁆𑀲𑀁 𑀢𑀺𑀝𑁆𑀞𑀫𑀸𑀦𑁄 𑀤𑁆𑀯𑁂𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀢𑀻𑀡𑀺𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀘𑀢𑁆𑀢𑀸𑀭𑀺𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀧𑀜𑁆𑀘𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀤𑀲𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀯𑀻𑀲𑀢𑀺𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀢𑀺𑀁𑀲𑀫𑁆𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀘𑀢𑁆𑀢𑀸𑀭𑀻𑀲𑀫𑁆𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀧𑀜𑁆𑀜𑀸𑀲𑀫𑁆𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀯𑀲𑁆𑀲𑀲𑀢𑀫𑁆𑀧𑀺 𑀢𑀺𑀝𑁆𑀞𑀫𑀸𑀦𑁄, 𑀪𑀺𑀬𑁆𑀬𑁄𑀧𑀺 𑀢𑀺𑀝𑁆𑀞𑀫𑀸𑀦𑁄.

‘‘𑀬𑀜𑁆𑀘 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺 𑀘𑀺𑀢𑁆𑀢𑀁 𑀇𑀢𑀺𑀧𑀺, 𑀫𑀦𑁄 𑀇𑀢𑀺𑀧𑀺, 𑀯𑀺𑀜𑁆𑀜𑀸𑀡𑀁 𑀇𑀢𑀺𑀧𑀺, 𑀢𑀁 𑀭𑀢𑁆𑀢𑀺𑀬𑀸 𑀘 𑀤𑀺𑀯𑀲𑀲𑁆𑀲 𑀘 𑀅𑀜𑁆𑀜𑀤𑁂𑀯 𑀉𑀧𑁆𑀧𑀚𑁆𑀚𑀢𑀺 𑀅𑀜𑁆𑀜𑀁 𑀦𑀺𑀭𑀼𑀚𑁆𑀛𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀓𑁆𑀓𑀝𑁄 𑀅𑀭𑀜𑁆𑀜𑁂 𑀧𑀯𑀦𑁂 𑀘𑀭𑀫𑀸𑀦𑁄 𑀲𑀸𑀔𑀁 𑀕𑀡𑁆𑀳𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀕𑀡𑁆𑀳𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀕𑀡𑁆𑀳𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀫𑀺𑀤𑀁 𑀯𑀼𑀘𑁆𑀘𑀢𑀺 𑀘𑀺𑀢𑁆𑀢𑀁 𑀇𑀢𑀺𑀧𑀺, 𑀫𑀦𑁄 𑀇𑀢𑀺𑀧𑀺, 𑀯𑀺𑀜𑁆𑀜𑀸𑀡𑀁 𑀇𑀢𑀺𑀧𑀺, 𑀢𑀁 𑀭𑀢𑁆𑀢𑀺𑀬𑀸 𑀘 𑀤𑀺𑀯𑀲𑀲𑁆𑀲 𑀘 𑀅𑀜𑁆𑀜𑀤𑁂𑀯 𑀉𑀧𑁆𑀧𑀚𑁆𑀚𑀢𑀺 𑀅𑀜𑁆𑀜𑀁 𑀦𑀺𑀭𑀼𑀚𑁆𑀛𑀢𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁𑀬𑁂𑀯 𑀲𑀸𑀥𑀼𑀓𑀁 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺 𑁋 ‘𑀇𑀢𑀺 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀺; 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀺 𑁋 𑀬𑀤𑀺𑀤𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄; 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’’𑀢𑀺.

‘‘𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀜𑁆𑀜𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀗𑁆𑀔𑀸𑀭𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑀺𑀜𑁆𑀜𑀸𑀡𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺; 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀅𑀲𑁆𑀲𑀼𑀢𑀯𑀸𑀲𑀼𑀢𑁆𑀢𑀁

𑁬𑁨. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀇𑀫𑀲𑁆𑀫𑀺𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀫𑀺𑀁 𑀓𑀸𑀬𑀲𑁆𑀫𑀺𑀁 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬𑀧𑀺 𑀯𑀺𑀭𑀚𑁆𑀚𑁂𑀬𑁆𑀬𑀧𑀺 𑀯𑀺𑀫𑀼𑀘𑁆𑀘𑁂𑀬𑁆𑀬𑀧𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀲𑁆𑀲𑀢𑀺, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀲 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀆𑀘𑀬𑁄𑀧𑀺 𑀅𑀧𑀘𑀬𑁄𑀧𑀺 𑀆𑀤𑀸𑀦𑀫𑁆𑀧𑀺 𑀦𑀺𑀓𑁆𑀔𑁂𑀧𑀦𑀫𑁆𑀧𑀺. 𑀢𑀲𑁆𑀫𑀸 𑀢𑀢𑁆𑀭𑀸𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬𑀧𑀺 𑀯𑀺𑀭𑀚𑁆𑀚𑁂𑀬𑁆𑀬𑀧𑀺 𑀯𑀺𑀫𑀼𑀘𑁆𑀘𑁂𑀬𑁆𑀬𑀧𑀺. 𑀬𑀜𑁆𑀘 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺 𑀘𑀺𑀢𑁆𑀢𑀁 𑀇𑀢𑀺𑀧𑀺, 𑀫𑀦𑁄 𑀇𑀢𑀺𑀧𑀺, 𑀯𑀺𑀜𑁆𑀜𑀸𑀡𑀁 𑀇𑀢𑀺𑀧𑀺, 𑀢𑀢𑁆𑀭𑀸𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀦𑀸𑀮𑀁 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀦𑀸𑀮𑀁 𑀯𑀺𑀭𑀚𑁆𑀚𑀺𑀢𑀼𑀁 𑀦𑀸𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀻𑀖𑀭𑀢𑁆𑀢𑀜𑁆𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀚𑁆𑀛𑁄𑀲𑀺𑀢𑀁 𑀫𑀫𑀸𑀬𑀺𑀢𑀁 𑀧𑀭𑀸𑀫𑀝𑁆𑀞𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺. 𑀢𑀲𑁆𑀫𑀸 𑀢𑀢𑁆𑀭𑀸𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀦𑀸𑀮𑀁 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀦𑀸𑀮𑀁 𑀯𑀺𑀭𑀚𑁆𑀚𑀺𑀢𑀼𑀁 𑀦𑀸𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁’’.

‘‘𑀯𑀭𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀇𑀫𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀁 𑀓𑀸𑀬𑀁 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀦 𑀢𑁆𑀯𑁂𑀯 𑀘𑀺𑀢𑁆𑀢𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀲𑁆𑀲𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀓𑀸𑀬𑁄 𑀏𑀓𑀫𑁆𑀧𑀺 𑀯𑀲𑁆𑀲𑀁 𑀢𑀺𑀝𑁆𑀞𑀫𑀸𑀦𑁄 𑀤𑁆𑀯𑁂𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀢𑀻𑀡𑀺𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀘𑀢𑁆𑀢𑀸𑀭𑀺𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀧𑀜𑁆𑀘𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀤𑀲𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀯𑀻𑀲𑀢𑀺𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀢𑀺𑀁𑀲𑀫𑁆𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀘𑀢𑁆𑀢𑀸𑀭𑀻𑀲𑀫𑁆𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀧𑀜𑁆𑀜𑀸𑀲𑀫𑁆𑀧𑀺 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀯𑀲𑁆𑀲𑀲𑀢𑀫𑁆𑀧𑀺 𑀢𑀺𑀝𑁆𑀞𑀫𑀸𑀦𑁄, 𑀪𑀺𑀬𑁆𑀬𑁄𑀧𑀺 𑀢𑀺𑀝𑁆𑀞𑀫𑀸𑀦𑁄. 𑀬𑀜𑁆𑀘 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺 𑀘𑀺𑀢𑁆𑀢𑀁 𑀇𑀢𑀺𑀧𑀺, 𑀫𑀦𑁄 𑀇𑀢𑀺𑀧𑀺, 𑀯𑀺𑀜𑁆𑀜𑀸𑀡𑀁 𑀇𑀢𑀺𑀧𑀺, 𑀢𑀁 𑀭𑀢𑁆𑀢𑀺𑀬𑀸 𑀘 𑀤𑀺𑀯𑀲𑀲𑁆𑀲 𑀘 𑀅𑀜𑁆𑀜𑀤𑁂𑀯 𑀉𑀧𑁆𑀧𑀚𑁆𑀚𑀢𑀺 𑀅𑀜𑁆𑀜𑀁 𑀦𑀺𑀭𑀼𑀚𑁆𑀛𑀢𑀺.

‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁𑀬𑁂𑀯 𑀲𑀸𑀥𑀼𑀓𑀁 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺 𑁋 ‘𑀇𑀢𑀺 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀺; 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻’𑀢𑀺. 𑀲𑀼𑀔𑀯𑁂𑀤𑀦𑀺𑀬𑀁, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀯𑁂𑀤𑀦𑀸. 𑀢𑀲𑁆𑀲𑁂𑀯 𑀲𑀼𑀔𑀯𑁂𑀤𑀦𑀺𑀬𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀭𑁄𑀥𑀸 𑀬𑀁 𑀢𑀚𑁆𑀚𑀁 𑀯𑁂𑀤𑀬𑀺𑀢𑀁 𑀲𑀼𑀔𑀯𑁂𑀤𑀦𑀺𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀲𑀼𑀔𑀯𑁂𑀤𑀦𑀸 𑀲𑀸 𑀦𑀺𑀭𑀼𑀚𑁆𑀛𑀢𑀺 𑀲𑀸 𑀯𑀽𑀧𑀲𑀫𑁆𑀫𑀢𑀺. 𑀤𑀼𑀓𑁆𑀔𑀯𑁂𑀤𑀦𑀺𑀬𑀁, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀤𑀼𑀓𑁆𑀔𑀯𑁂𑀤𑀦𑀸. 𑀢𑀲𑁆𑀲𑁂𑀯 𑀤𑀼𑀓𑁆𑀔𑀯𑁂𑀤𑀦𑀺𑀬𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀭𑁄𑀥𑀸 𑀬𑀁 𑀢𑀚𑁆𑀚𑀁 𑀯𑁂𑀤𑀬𑀺𑀢𑀁 𑀤𑀼𑀓𑁆𑀔𑀯𑁂𑀤𑀦𑀺𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀤𑀼𑀓𑁆𑀔𑀯𑁂𑀤𑀦𑀸 𑀲𑀸 𑀦𑀺𑀭𑀼𑀚𑁆𑀛𑀢𑀺 𑀲𑀸 𑀯𑀽𑀧𑀲𑀫𑁆𑀫𑀢𑀺. 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀁, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸. 𑀢𑀲𑁆𑀲𑁂𑀯 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀭𑁄𑀥𑀸 𑀬𑀁 𑀢𑀚𑁆𑀚𑀁 𑀯𑁂𑀤𑀬𑀺𑀢𑀁 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸 𑀲𑀸 𑀦𑀺𑀭𑀼𑀚𑁆𑀛𑀢𑀺 𑀲𑀸 𑀯𑀽𑀧𑀲𑀫𑁆𑀫𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀓𑀝𑁆𑀞𑀸𑀦𑀁 𑀲𑀗𑁆𑀖𑀝𑁆𑀝𑀦𑀲𑀫𑁄𑀥𑀸𑀦𑀸 𑀉𑀲𑁆𑀫𑀸 𑀚𑀸𑀬𑀢𑀺 𑀢𑁂𑀚𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑀢𑀺. 𑀢𑁂𑀲𑀁𑀬𑁂𑀯 𑀤𑁆𑀯𑀺𑀦𑁆𑀦𑀁 𑀓𑀝𑁆𑀞𑀸𑀦𑀁 𑀦𑀸𑀦𑀸𑀓𑀢𑀯𑀺𑀦𑀺𑀩𑁆𑀪𑁄𑀕𑀸 [𑀦𑀸𑀦𑀸𑀪𑀸𑀯𑀸𑀯𑀺𑀦𑀺𑀓𑁆𑀔𑁂𑀧𑀸 (𑀲𑀻. 𑀧𑀻.) 𑀫. 𑀦𑀺. 𑁩.𑁩𑁫𑁭] 𑀬𑀸 𑀢𑀚𑁆𑀚𑀸 𑀉𑀲𑁆𑀫𑀸 𑀲𑀸 𑀦𑀺𑀭𑀼𑀚𑁆𑀛𑀢𑀺 𑀲𑀸 𑀯𑀽𑀧𑀲𑀫𑁆𑀫𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀔𑀯𑁂𑀤𑀦𑀺𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀯𑁂𑀤𑀦𑀸. 𑀢𑀲𑁆𑀲𑁂𑀯 𑀲𑀼𑀔𑀯𑁂𑀤𑀦𑀺𑀬𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀭𑁄𑀥𑀸 𑀬𑀁 𑀢𑀚𑁆𑀚𑀁 𑀯𑁂𑀤𑀬𑀺𑀢𑀁 𑀲𑀼𑀔𑀯𑁂𑀤𑀦𑀺𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀲𑀼𑀔𑀯𑁂𑀤𑀦𑀸 𑀲𑀸 𑀦𑀺𑀭𑀼𑀚𑁆𑀛𑀢𑀺 𑀲𑀸 𑀯𑀽𑀧𑀲𑀫𑁆𑀫𑀢𑀺…𑀧𑁂… 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸. 𑀢𑀲𑁆𑀲𑁂𑀯 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀭𑁄𑀥𑀸 𑀬𑀁 𑀢𑀚𑁆𑀚𑀁 𑀯𑁂𑀤𑀬𑀺𑀢𑀁 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸 𑀲𑀸 𑀦𑀺𑀭𑀼𑀚𑁆𑀛𑀢𑀺 𑀲𑀸 𑀯𑀽𑀧𑀲𑀫𑁆𑀫𑀢𑀺.

‘‘𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀨𑀲𑁆𑀲𑁂𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀜𑁆𑀜𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀗𑁆𑀔𑀸𑀭𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑀺𑀜𑁆𑀜𑀸𑀡𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺; 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀧𑀼𑀢𑁆𑀢𑀫𑀁𑀲𑀽𑀧𑀫𑀲𑀼𑀢𑁆𑀢𑀁

𑁬𑁩. 𑀲𑀸𑀯𑀢𑁆𑀣𑀺𑀬𑀁 …𑀧𑁂… ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑀸 𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀅𑀦𑀼𑀕𑁆𑀕𑀳𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀑𑀴𑀸𑀭𑀺𑀓𑁄 𑀯𑀸 𑀲𑀼𑀔𑀼𑀫𑁄 𑀯𑀸, 𑀨𑀲𑁆𑀲𑁄 𑀤𑀼𑀢𑀺𑀬𑁄, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀢𑀢𑀺𑀬𑀸, 𑀯𑀺𑀜𑁆𑀜𑀸𑀡𑀁 𑀘𑀢𑀼𑀢𑁆𑀣𑀁. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀅𑀦𑀼𑀕𑁆𑀕𑀳𑀸𑀬’’.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀤𑀝𑁆𑀞𑀩𑁆𑀩𑁄? 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀚𑀸𑀬𑀫𑁆𑀧𑀢𑀺𑀓𑀸 [𑀚𑀬𑀫𑁆𑀧𑀢𑀺𑀓𑀸 (𑀲𑀻. 𑀧𑀻.) 𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀧𑀭𑀺𑀢𑁆𑀢𑀁 𑀲𑀫𑁆𑀩𑀮𑀁 𑀆𑀤𑀸𑀬 𑀓𑀦𑁆𑀢𑀸𑀭𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑁂𑀬𑁆𑀬𑀼𑀁. 𑀢𑁂𑀲𑀫𑀲𑁆𑀲 𑀏𑀓𑀧𑀼𑀢𑁆𑀢𑀓𑁄 𑀧𑀺𑀬𑁄 𑀫𑀦𑀸𑀧𑁄. 𑀅𑀣 𑀔𑁄 𑀢𑁂𑀲𑀁, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀚𑀸𑀬𑀫𑁆𑀧𑀢𑀺𑀓𑀸𑀦𑀁 𑀓𑀦𑁆𑀢𑀸𑀭𑀕𑀢𑀸𑀦𑀁 𑀬𑀸 𑀧𑀭𑀺𑀢𑁆𑀢𑀸 𑀲𑀫𑁆𑀩𑀮𑀫𑀢𑁆𑀢𑀸, 𑀲𑀸 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬. 𑀲𑀺𑀬𑀸 𑀘 𑀦𑁂𑀲𑀁 𑀓𑀦𑁆𑀢𑀸𑀭𑀸𑀯𑀲𑁂𑀲𑁄 𑀅𑀦𑀢𑀺𑀡𑁆𑀡𑁄. 𑀅𑀣 𑀔𑁄 𑀢𑁂𑀲𑀁, 𑀪𑀺𑀓𑁆𑀔𑀯𑁂, 𑀤𑁆𑀯𑀺𑀦𑁆𑀦𑀁 𑀚𑀸𑀬𑀫𑁆𑀧𑀢𑀺𑀓𑀸𑀦𑀁 𑀏𑀯𑀫𑀲𑁆𑀲 𑁋 ‘𑀅𑀫𑁆𑀳𑀸𑀓𑀁 𑀔𑁄 𑀬𑀸 𑀧𑀭𑀺𑀢𑁆𑀢𑀸 𑀲𑀫𑁆𑀩𑀮𑀫𑀢𑁆𑀢𑀸 𑀲𑀸 𑀧𑀭𑀺𑀓𑁆𑀔𑀻𑀡𑀸 𑀧𑀭𑀺𑀬𑀸𑀤𑀺𑀡𑁆𑀡𑀸 [𑀧𑀭𑀺𑀬𑀸𑀤𑀺𑀦𑁆𑀦𑀸 (𑀲𑁆𑀬𑀸. 𑀓𑀁.)]. 𑀅𑀢𑁆𑀣𑀺 𑀘𑀸𑀬𑀁 𑀓𑀦𑁆𑀢𑀸𑀭𑀸𑀯𑀲𑁂𑀲𑁄 𑀅𑀦𑀺𑀢𑁆𑀢𑀺𑀡𑁆𑀡𑁄 [𑀅𑀦𑀺𑀢𑁆𑀣𑀺𑀡𑁆𑀡𑁄 (𑀲𑁆𑀬𑀸. 𑀓𑀁.), 𑀅𑀦𑀢𑀺𑀡𑁆𑀡𑁄 (𑀓.)]. 𑀬𑀁𑀦𑀽𑀦 𑀫𑀬𑀁 𑀇𑀫𑀁 𑀏𑀓𑀧𑀼𑀢𑁆𑀢𑀓𑀁 𑀧𑀺𑀬𑀁 𑀫𑀦𑀸𑀧𑀁 𑀯𑀥𑀺𑀢𑁆𑀯𑀸 𑀯𑀮𑁆𑀮𑀽𑀭𑀜𑁆𑀘 𑀲𑁄𑀡𑁆𑀟𑀺𑀓𑀜𑁆𑀘 𑀓𑀭𑀺𑀢𑁆𑀯𑀸 𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀦𑁆𑀢𑀸 𑀏𑀯𑀁 𑀢𑀁 𑀓𑀦𑁆𑀢𑀸𑀭𑀸𑀯𑀲𑁂𑀲𑀁 𑀦𑀺𑀢𑁆𑀣𑀭𑁂𑀬𑁆𑀬𑀸𑀫, 𑀫𑀸 𑀲𑀩𑁆𑀩𑁂𑀯 𑀢𑀬𑁄 𑀯𑀺𑀦𑀲𑁆𑀲𑀺𑀫𑁆𑀳𑀸’𑀢𑀺. 𑀅𑀣 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀚𑀸𑀬𑀫𑁆𑀧𑀢𑀺𑀓𑀸 𑀢𑀁 𑀏𑀓𑀧𑀼𑀢𑁆𑀢𑀓𑀁 𑀧𑀺𑀬𑀁 𑀫𑀦𑀸𑀧𑀁 𑀯𑀥𑀺𑀢𑁆𑀯𑀸 𑀯𑀮𑁆𑀮𑀽𑀭𑀜𑁆𑀘 𑀲𑁄𑀡𑁆𑀟𑀺𑀓𑀜𑁆𑀘 𑀓𑀭𑀺𑀢𑁆𑀯𑀸 𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀦𑁆𑀢𑀸 𑀏𑀯𑀁 𑀢𑀁 𑀓𑀦𑁆𑀢𑀸𑀭𑀸𑀯𑀲𑁂𑀲𑀁 𑀦𑀺𑀢𑁆𑀣𑀭𑁂𑀬𑁆𑀬𑀼𑀁. 𑀢𑁂 𑀧𑀼𑀢𑁆𑀢𑀫𑀁𑀲𑀸𑀦𑀺 𑀘𑁂𑀯 𑀔𑀸𑀤𑁂𑀬𑁆𑀬𑀼𑀁, 𑀉𑀭𑁂 𑀘 𑀧𑀝𑀺𑀧𑀺𑀲𑁂𑀬𑁆𑀬𑀼𑀁 𑁋 ‘𑀓𑀳𑀁, 𑀏𑀓𑀧𑀼𑀢𑁆𑀢𑀓, 𑀓𑀳𑀁, 𑀏𑀓𑀧𑀼𑀢𑁆𑀢𑀓𑀸’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀢𑁂 𑀤𑀯𑀸𑀬 𑀯𑀸 𑀆𑀳𑀸𑀭𑀁 𑀆𑀳𑀸𑀭𑁂𑀬𑁆𑀬𑀼𑀁, 𑀫𑀤𑀸𑀬 𑀯𑀸 𑀆𑀳𑀸𑀭𑀁 𑀆𑀳𑀸𑀭𑁂𑀬𑁆𑀬𑀼𑀁, 𑀫𑀡𑁆𑀟𑀦𑀸𑀬 𑀯𑀸 𑀆𑀳𑀸𑀭𑀁 𑀆𑀳𑀸𑀭𑁂𑀬𑁆𑀬𑀼𑀁, 𑀯𑀺𑀪𑀽𑀲𑀦𑀸𑀬 𑀯𑀸 𑀆𑀳𑀸𑀭𑀁 𑀆𑀳𑀸𑀭𑁂𑀬𑁆𑀬𑀼’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀦𑀦𑀼 𑀢𑁂, 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂𑀯 𑀓𑀦𑁆𑀢𑀸𑀭𑀲𑁆𑀲 𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀆𑀳𑀸𑀭𑀁 𑀆𑀳𑀸𑀭𑁂𑀬𑁆𑀬𑀼’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀏𑀯𑀫𑁂𑀯 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀯𑀤𑀸𑀫𑀺. 𑀓𑀩𑀴𑀻𑀓𑀸𑀭𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀧𑀭𑀺𑀜𑁆𑀜𑀸𑀢𑁂 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀧𑀭𑀺𑀜𑁆𑀜𑀸𑀢𑁄 𑀳𑁄𑀢𑀺. 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁂 𑀭𑀸𑀕𑁂 𑀧𑀭𑀺𑀜𑁆𑀜𑀸𑀢𑁂 𑀦𑀢𑁆𑀣𑀺 𑀢𑀁 𑀲𑀁𑀬𑁄𑀚𑀦𑀁 𑀬𑁂𑀦 𑀲𑀁𑀬𑁄𑀚𑀦𑁂𑀦 𑀲𑀁𑀬𑀼𑀢𑁆𑀢𑁄 𑀅𑀭𑀺𑀬𑀲𑀸𑀯𑀓𑁄 𑀧𑀼𑀦 𑀇𑀫𑀁 𑀮𑁄𑀓𑀁 𑀆𑀕𑀘𑁆𑀙𑁂𑀬𑁆𑀬.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀨𑀲𑁆𑀲𑀸𑀳𑀸𑀭𑁄 𑀤𑀝𑁆𑀞𑀩𑁆𑀩𑁄? 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀕𑀸𑀯𑀻 𑀦𑀺𑀘𑁆𑀘𑀫𑁆𑀫𑀸 𑀓𑀼𑀝𑁆𑀝𑀁 𑀘𑁂 [𑀓𑀼𑀟𑁆𑀟𑀜𑁆𑀘𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑁂𑀬𑁆𑀬. 𑀬𑁂 𑀓𑀼𑀝𑁆𑀝𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀢𑁂 𑀦𑀁 𑀔𑀸𑀤𑁂𑀬𑁆𑀬𑀼𑀁. 𑀭𑀼𑀓𑁆𑀔𑀁 𑀘𑁂 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑁂𑀬𑁆𑀬, 𑀬𑁂 𑀭𑀼𑀓𑁆𑀔𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀢𑁂 𑀦𑀁 𑀔𑀸𑀤𑁂𑀬𑁆𑀬𑀼𑀁. 𑀉𑀤𑀓𑀁 𑀘𑁂 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑁂𑀬𑁆𑀬, 𑀬𑁂 𑀉𑀤𑀓𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀢𑁂 𑀦𑀁 𑀔𑀸𑀤𑁂𑀬𑁆𑀬𑀼𑀁. 𑀆𑀓𑀸𑀲𑀁 𑀘𑁂 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑁂𑀬𑁆𑀬, 𑀬𑁂 𑀆𑀓𑀸𑀲𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀢𑁂 𑀦𑀁 𑀔𑀸𑀤𑁂𑀬𑁆𑀬𑀼𑀁. 𑀬𑀁 𑀬𑀤𑁂𑀯 𑀳𑀺 𑀲𑀸, 𑀪𑀺𑀓𑁆𑀔𑀯𑁂, 𑀕𑀸𑀯𑀻 𑀦𑀺𑀘𑁆𑀘𑀫𑁆𑀫𑀸 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑁂𑀬𑁆𑀬, 𑀬𑁂 𑀢𑀦𑁆𑀦𑀺𑀲𑁆𑀲𑀺𑀢𑀸 [𑀬𑁂 𑀢𑀦𑁆𑀦𑀺𑀲𑁆𑀲𑀺𑀢𑀸 𑀢𑀦𑁆𑀦𑀺𑀲𑁆𑀲𑀺𑀢𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀸𑀡𑀸 𑀢𑁂 𑀦𑀁 𑀔𑀸𑀤𑁂𑀬𑁆𑀬𑀼𑀁. 𑀏𑀯𑀫𑁂𑀯 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, ‘‘𑀨𑀲𑁆𑀲𑀸𑀳𑀸𑀭𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀯𑀤𑀸𑀫𑀺. 𑀨𑀲𑁆𑀲𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀧𑀭𑀺𑀜𑁆𑀜𑀸𑀢𑁂 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀧𑀭𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀺. 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀧𑀭𑀺𑀜𑁆𑀜𑀸𑀢𑀸𑀲𑀼 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺𑀓𑀭𑀡𑀻𑀬𑀦𑁆𑀢𑀺 [𑀉𑀢𑁆𑀢𑀭𑀺𑀁𑀓𑀭𑀡𑀻𑀬𑀦𑁆𑀢𑀺 (𑀲𑀻. 𑀧𑀻.)] 𑀯𑀤𑀸𑀫𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀤𑀝𑁆𑀞𑀩𑁆𑀩𑁄? 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑀸𑀭𑀓𑀸𑀲𑀼 𑀲𑀸𑀥𑀺𑀓𑀧𑁄𑀭𑀺𑀲𑀸 𑀧𑀼𑀡𑁆𑀡𑀸 𑀅𑀗𑁆𑀕𑀸𑀭𑀸𑀦𑀁 𑀯𑀻𑀢𑀘𑁆𑀘𑀺𑀓𑀸𑀦𑀁 𑀯𑀻𑀢𑀥𑀽𑀫𑀸𑀦𑀁. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀚𑀻𑀯𑀺𑀢𑀼𑀓𑀸𑀫𑁄 𑀅𑀫𑀭𑀺𑀢𑀼𑀓𑀸𑀫𑁄 𑀲𑀼𑀔𑀓𑀸𑀫𑁄 𑀤𑀼𑀓𑁆𑀔𑀧𑁆𑀧𑀝𑀺𑀓𑀽𑀮𑁄. 𑀢𑀫𑁂𑀦𑀁 𑀤𑁆𑀯𑁂 𑀩𑀮𑀯𑀦𑁆𑀢𑁄 𑀧𑀼𑀭𑀺𑀲𑀸 𑀦𑀸𑀦𑀸𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸 𑀢𑀁 𑀅𑀗𑁆𑀕𑀸𑀭𑀓𑀸𑀲𑀼𑀁 𑀉𑀧𑀓𑀟𑁆𑀠𑁂𑀬𑁆𑀬𑀼𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀆𑀭𑀓𑀸𑀯𑀲𑁆𑀲 𑀘𑁂𑀢𑀦𑀸 𑀆𑀭𑀓𑀸 𑀧𑀢𑁆𑀣𑀦𑀸 𑀆𑀭𑀓𑀸 𑀧𑀡𑀺𑀥𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑀺, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑁄𑀢𑀺 𑁋 ‘𑀇𑀫𑀁 𑀘𑀸𑀳𑀁 𑀅𑀗𑁆𑀕𑀸𑀭𑀓𑀸𑀲𑀼𑀁 𑀧𑀧𑀢𑀺𑀲𑁆𑀲𑀸𑀫𑀺, 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑀸𑀫𑀺 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔’𑀦𑁆𑀢𑀺. 𑀏𑀯𑀫𑁂𑀯 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, ‘𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀤𑀝𑁆𑀞𑀩𑁆𑀩𑁄’𑀢𑀺 𑀯𑀤𑀸𑀫𑀺. 𑀫𑀦𑁄𑀲𑀜𑁆𑀘𑁂𑀢𑀦𑀸𑀬, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀧𑀭𑀺𑀜𑁆𑀜𑀸𑀢𑁂 𑀢𑀺𑀲𑁆𑀲𑁄 𑀢𑀡𑁆𑀳𑀸 𑀧𑀭𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀺. 𑀢𑀻𑀲𑀼 𑀢𑀡𑁆𑀳𑀸𑀲𑀼 𑀧𑀭𑀺𑀜𑁆𑀜𑀸𑀢𑀸𑀲𑀼 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺𑀓𑀭𑀡𑀻𑀬𑀦𑁆𑀢𑀺 𑀯𑀤𑀸𑀫𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀤𑀝𑁆𑀞𑀩𑁆𑀩𑁄? 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀬𑁆𑀬𑀼𑀁 𑁋 ‘𑀅𑀬𑀁 𑀢𑁂, 𑀤𑁂𑀯, 𑀘𑁄𑀭𑁄 𑀆𑀕𑀼𑀘𑀸𑀭𑀻, 𑀇𑀫𑀲𑁆𑀲 𑀬𑀁 𑀇𑀘𑁆𑀙𑀲𑀺 𑀢𑀁 𑀤𑀡𑁆𑀟𑀁 𑀧𑀡𑁂𑀳𑀻’𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀕𑀘𑁆𑀙𑀣, 𑀪𑁄, 𑀇𑀫𑀁 𑀧𑀼𑀭𑀺𑀲𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀲𑀢𑁆𑀢𑀺𑀲𑀢𑁂𑀦 𑀳𑀦𑀣𑀸’𑀢𑀺. 𑀢𑀫𑁂𑀦𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀲𑀢𑁆𑀢𑀺𑀲𑀢𑁂𑀦 𑀳𑀦𑁂𑀬𑁆𑀬𑀼𑀁. 𑀅𑀣 𑀭𑀸𑀚𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀫𑁆𑀪𑁄, 𑀓𑀣𑀁 𑀲𑁄 𑀧𑀼𑀭𑀺𑀲𑁄’𑀢𑀺? ‘𑀢𑀣𑁂𑀯, 𑀤𑁂𑀯, 𑀚𑀻𑀯𑀢𑀻’𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀕𑀘𑁆𑀙𑀣, 𑀪𑁄, 𑀢𑀁 𑀧𑀼𑀭𑀺𑀲𑀁 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀲𑀢𑁆𑀢𑀺𑀲𑀢𑁂𑀦 𑀳𑀦𑀣𑀸’𑀢𑀺. 𑀢𑀫𑁂𑀦𑀁 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀲𑀢𑁆𑀢𑀺𑀲𑀢𑁂𑀦 𑀳𑀦𑁂𑀬𑁆𑀬𑀼𑀁. 𑀅𑀣 𑀭𑀸𑀚𑀸 𑀲𑀸𑀬𑀦𑁆𑀳𑀲𑀫𑀬𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀫𑁆𑀪𑁄, 𑀓𑀣𑀁 𑀲𑁄 𑀧𑀼𑀭𑀺𑀲𑁄’𑀢𑀺? ‘𑀢𑀣𑁂𑀯, 𑀤𑁂𑀯, 𑀚𑀻𑀯𑀢𑀻’𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀕𑀘𑁆𑀙𑀣, 𑀪𑁄, 𑀢𑀁 𑀧𑀼𑀭𑀺𑀲𑀁 𑀲𑀸𑀬𑀦𑁆𑀳𑀲𑀫𑀬𑀁 𑀲𑀢𑁆𑀢𑀺𑀲𑀢𑁂𑀦 𑀳𑀦𑀣𑀸’𑀢𑀺. 𑀢𑀫𑁂𑀦𑀁 𑀲𑀸𑀬𑀦𑁆𑀳𑀲𑀫𑀬𑀁 𑀲𑀢𑁆𑀢𑀺𑀲𑀢𑁂𑀦 𑀳𑀦𑁂𑀬𑁆𑀬𑀼𑀁. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀤𑀺𑀯𑀲𑀁 𑀢𑀻𑀳𑀺 𑀲𑀢𑁆𑀢𑀺𑀲𑀢𑁂𑀳𑀺 𑀳𑀜𑁆𑀜𑀫𑀸𑀦𑁄 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀺𑀬𑁂𑀣𑀸’’𑀢𑀺? ‘‘𑀏𑀓𑀺𑀲𑁆𑀲𑀸𑀧𑀺, 𑀪𑀦𑁆𑀢𑁂, 𑀲𑀢𑁆𑀢𑀺𑀬𑀸 𑀳𑀜𑁆𑀜𑀫𑀸𑀦𑁄 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀺𑀬𑁂𑀣; 𑀓𑁄 𑀧𑀦 𑀯𑀸𑀤𑁄 𑀢𑀻𑀳𑀺 𑀲𑀢𑁆𑀢𑀺𑀲𑀢𑁂𑀳𑀺 𑀳𑀜𑁆𑀜𑀫𑀸𑀦𑁄’’𑀢𑀺! ‘‘𑀏𑀯𑀫𑁂𑀯 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀤𑀝𑁆𑀞𑀩𑁆𑀩𑁄𑀢𑀺 𑀯𑀤𑀸𑀫𑀺. 𑀯𑀺𑀜𑁆𑀜𑀸𑀡𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀧𑀭𑀺𑀜𑁆𑀜𑀸𑀢𑁂 𑀦𑀸𑀫𑀭𑀽𑀧𑀁 𑀧𑀭𑀺𑀜𑁆𑀜𑀸𑀢𑀁 𑀳𑁄𑀢𑀺, 𑀦𑀸𑀫𑀭𑀽𑀧𑁂 𑀧𑀭𑀺𑀜𑁆𑀜𑀸𑀢𑁂 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺𑀓𑀭𑀡𑀻𑀬𑀦𑁆𑀢𑀺 𑀯𑀤𑀸𑀫𑀻’’𑀢𑀺. 𑀢𑀢𑀺𑀬𑀁.

𑁪. 𑀅𑀢𑁆𑀣𑀺𑀭𑀸𑀕𑀲𑀼𑀢𑁆𑀢𑀁

𑁬𑁪. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑀸 𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀅𑀦𑀼𑀕𑁆𑀕𑀳𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀑𑀴𑀸𑀭𑀺𑀓𑁄 𑀯𑀸 𑀲𑀼𑀔𑀼𑀫𑁄 𑀯𑀸, 𑀨𑀲𑁆𑀲𑁄 𑀤𑀼𑀢𑀺𑀬𑁄, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀢𑀢𑀺𑀬𑀸, 𑀯𑀺𑀜𑁆𑀜𑀸𑀡𑀁 𑀘𑀢𑀼𑀢𑁆𑀣𑀁. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀅𑀦𑀼𑀕𑁆𑀕𑀳𑀸𑀬’’.

‘‘𑀓𑀩𑀴𑀻𑀓𑀸𑀭𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄 𑀅𑀢𑁆𑀣𑀺 𑀦𑀦𑁆𑀤𑀻 𑀅𑀢𑁆𑀣𑀺 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁. 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁, 𑀅𑀢𑁆𑀣𑀺 𑀢𑀢𑁆𑀣 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺. 𑀬𑀢𑁆𑀣 𑀅𑀢𑁆𑀣𑀺 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁, 𑀲𑀲𑁄𑀓𑀁 𑀢𑀁, 𑀪𑀺𑀓𑁆𑀔𑀯𑁂, 𑀲𑀤𑀭𑀁 𑀲𑀉𑀧𑀸𑀬𑀸𑀲𑀦𑁆𑀢𑀺 𑀯𑀤𑀸𑀫𑀺.

‘‘𑀨𑀲𑁆𑀲𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂…𑀧𑁂… 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂… 𑀯𑀺𑀜𑁆𑀜𑀸𑀡𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄 𑀅𑀢𑁆𑀣𑀺 𑀦𑀦𑁆𑀤𑀻 𑀅𑀢𑁆𑀣𑀺 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁. 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁, 𑀅𑀢𑁆𑀣𑀺 𑀢𑀢𑁆𑀣 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺. 𑀬𑀢𑁆𑀣 𑀅𑀢𑁆𑀣𑀺 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁, 𑀲𑀲𑁄𑀓𑀁 𑀢𑀁, 𑀪𑀺𑀓𑁆𑀔𑀯𑁂, 𑀲𑀤𑀭𑀁 𑀲𑀉𑀧𑀸𑀬𑀸𑀲𑀦𑁆𑀢𑀺 𑀯𑀤𑀸𑀫𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀚𑀓𑁄 𑀯𑀸 𑀘𑀺𑀢𑁆𑀢𑀓𑀸𑀭𑀓𑁄 𑀯𑀸 𑀲𑀢𑀺 𑀭𑀚𑀦𑀸𑀬 𑀯𑀸 𑀮𑀸𑀔𑀸𑀬 𑀯𑀸 𑀳𑀮𑀺𑀤𑁆𑀤𑀺𑀬𑀸 𑀯𑀸 𑀦𑀻𑀮𑀺𑀬𑀸 𑀯𑀸 𑀫𑀜𑁆𑀚𑀺𑀝𑁆𑀞𑀸𑀬 𑀯𑀸 𑀲𑀼𑀧𑀭𑀺𑀫𑀝𑁆𑀞𑁂 𑀯𑀸 𑀨𑀮𑀓𑁂 𑀪𑀺𑀢𑁆𑀢𑀺𑀬𑀸 𑀯𑀸 𑀤𑀼𑀲𑁆𑀲𑀧𑀝𑁆𑀝𑁂 𑀯𑀸 𑀇𑀢𑁆𑀣𑀺𑀭𑀽𑀧𑀁 𑀯𑀸 𑀧𑀼𑀭𑀺𑀲𑀭𑀽𑀧𑀁 𑀯𑀸 𑀅𑀪𑀺𑀦𑀺𑀫𑁆𑀫𑀺𑀦𑁂𑀬𑁆𑀬 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀁; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀓𑀩𑀴𑀻𑀓𑀸𑀭𑁂 𑀘𑁂 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄 𑀅𑀢𑁆𑀣𑀺 𑀦𑀦𑁆𑀤𑀻 𑀅𑀢𑁆𑀣𑀺 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁. 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁, 𑀅𑀢𑁆𑀣𑀺 𑀢𑀢𑁆𑀣 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺. 𑀬𑀢𑁆𑀣 𑀅𑀢𑁆𑀣𑀺 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁, 𑀲𑀲𑁄𑀓𑀁 𑀢𑀁, 𑀪𑀺𑀓𑁆𑀔𑀯𑁂, 𑀲𑀤𑀭𑀁 𑀲𑀉𑀧𑀸𑀬𑀸𑀲𑀦𑁆𑀢𑀺 𑀯𑀤𑀸𑀫𑀺.

‘‘𑀨𑀲𑁆𑀲𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂…𑀧𑁂… 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂… 𑀯𑀺𑀜𑁆𑀜𑀸𑀡𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄 𑀅𑀢𑁆𑀣𑀺 𑀦𑀦𑁆𑀤𑀻 𑀅𑀢𑁆𑀣𑀺 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁. 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀁, 𑀅𑀢𑁆𑀣𑀺 𑀢𑀢𑁆𑀣 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺. 𑀬𑀢𑁆𑀣 𑀅𑀢𑁆𑀣𑀺 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀅𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁, 𑀲𑀲𑁄𑀓𑀁 𑀢𑀁, 𑀪𑀺𑀓𑁆𑀔𑀯𑁂, 𑀲𑀤𑀭𑀁 𑀲𑀉𑀧𑀸𑀬𑀸𑀲𑀦𑁆𑀢𑀺 𑀯𑀤𑀸𑀫𑀺.

‘‘𑀓𑀩𑀴𑀻𑀓𑀸𑀭𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀦𑀢𑁆𑀣𑀺 𑀭𑀸𑀕𑁄 𑀦𑀢𑁆𑀣𑀺 𑀦𑀦𑁆𑀤𑀻 𑀦𑀢𑁆𑀣𑀺 𑀢𑀡𑁆𑀳𑀸, 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀅𑀯𑀺𑀭𑀽𑀴𑁆𑀳𑀁. 𑀬𑀢𑁆𑀣 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀅𑀯𑀺𑀭𑀽𑀴𑁆𑀳𑀁, 𑀦𑀢𑁆𑀣𑀺 𑀢𑀢𑁆𑀣 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺. 𑀬𑀢𑁆𑀣 𑀦𑀢𑁆𑀣𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺, 𑀦𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺. 𑀬𑀢𑁆𑀣 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺, 𑀦𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀬𑀢𑁆𑀣 𑀦𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀦𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁. 𑀬𑀢𑁆𑀣 𑀦𑀢𑁆𑀣𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁, 𑀅𑀲𑁄𑀓𑀁 𑀢𑀁, 𑀪𑀺𑀓𑁆𑀔𑀯𑁂, 𑀅𑀤𑀭𑀁 𑀅𑀦𑀼𑀧𑀸𑀬𑀸𑀲𑀦𑁆𑀢𑀺 𑀯𑀤𑀸𑀫𑀺.

‘‘𑀨𑀲𑁆𑀲𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂…𑀧𑁂… 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂… 𑀯𑀺𑀜𑁆𑀜𑀸𑀡𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀦𑀢𑁆𑀣𑀺 𑀭𑀸𑀕𑁄 𑀦𑀢𑁆𑀣𑀺 𑀦𑀦𑁆𑀤𑀻 𑀦𑀢𑁆𑀣𑀺 𑀢𑀡𑁆𑀳𑀸, 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀅𑀯𑀺𑀭𑀽𑀴𑁆𑀳𑀁. 𑀬𑀢𑁆𑀣 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀅𑀯𑀺𑀭𑀽𑀴𑁆𑀳𑀁, 𑀦𑀢𑁆𑀣𑀺 𑀢𑀢𑁆𑀣 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺. 𑀬𑀢𑁆𑀣 𑀦𑀢𑁆𑀣𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺, 𑀦𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺. 𑀬𑀢𑁆𑀣 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺, 𑀦𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀬𑀢𑁆𑀣 𑀦𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀦𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁. 𑀬𑀢𑁆𑀣 𑀦𑀢𑁆𑀣𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁, 𑀅𑀲𑁄𑀓𑀁 𑀢𑀁, 𑀪𑀺𑀓𑁆𑀔𑀯𑁂, 𑀅𑀤𑀭𑀁 𑀅𑀦𑀼𑀧𑀸𑀬𑀸𑀲𑀦𑁆𑀢𑀺 𑀯𑀤𑀸𑀫𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀽𑀝𑀸𑀕𑀸𑀭𑀁 𑀯𑀸 𑀓𑀽𑀝𑀸𑀕𑀸𑀭𑀲𑀸𑀮𑀁 𑀯𑀸 𑀉𑀢𑁆𑀢𑀭𑀸𑀬 𑀯𑀸 𑀤𑀓𑁆𑀔𑀺𑀡𑀸𑀬 𑀯𑀸 𑀧𑀸𑀘𑀻𑀦𑀸𑀬 𑀯𑀸 𑀯𑀸𑀢𑀧𑀸𑀦𑀸 𑀲𑀽𑀭𑀺𑀬𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀯𑀸𑀢𑀧𑀸𑀦𑁂𑀦 𑀭𑀲𑁆𑀫𑀺 𑀧𑀯𑀺𑀲𑀺𑀢𑁆𑀯𑀸 𑀓𑁆𑀯𑀸𑀲𑁆𑀲 𑀧𑀢𑀺𑀝𑁆𑀞𑀺𑀢𑀸’’ [𑀓𑀢𑁆𑀣 𑀧𑀢𑀺𑀝𑁆𑀞𑀺𑀢𑀸 (𑀓.)] 𑀢𑀺? ‘‘𑀧𑀘𑁆𑀙𑀺𑀫𑀸𑀬𑀁, 𑀪𑀦𑁆𑀢𑁂, 𑀪𑀺𑀢𑁆𑀢𑀺𑀬’’𑀦𑁆𑀢𑀺. ‘‘𑀧𑀘𑁆𑀙𑀺𑀫𑀸 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀢𑁆𑀢𑀺 𑀦𑀸𑀲𑁆𑀲 𑀓𑁆𑀯𑀸𑀲𑁆𑀲 𑀧𑀢𑀺𑀝𑁆𑀞𑀺𑀢𑀸’’𑀢𑀺? ‘‘𑀧𑀣𑀯𑀺𑀬𑀁, 𑀪𑀦𑁆𑀢𑁂’’𑀢𑀺. ‘‘𑀧𑀣𑀯𑀻 𑀘𑁂, 𑀪𑀺𑀓𑁆𑀔𑀯𑁂, 𑀦𑀸𑀲𑁆𑀲 𑀓𑁆𑀯𑀸𑀲𑁆𑀲 𑀧𑀢𑀺𑀝𑁆𑀞𑀺𑀢𑀸’’𑀢𑀺? ‘‘𑀆𑀧𑀲𑁆𑀫𑀺𑀁, 𑀪𑀦𑁆𑀢𑁂’’𑀢𑀺. ‘‘𑀆𑀧𑁄 𑀘𑁂, 𑀪𑀺𑀓𑁆𑀔𑀯𑁂, 𑀦𑀸𑀲𑁆𑀲 𑀓𑁆𑀯𑀸𑀲𑁆𑀲 𑀧𑀢𑀺𑀝𑁆𑀞𑀺𑀢𑀸’’𑀢𑀺? ‘‘𑀅𑀧𑁆𑀧𑀢𑀺𑀝𑁆𑀞𑀺𑀢𑀸, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀓𑀩𑀴𑀻𑀓𑀸𑀭𑁂 𑀘𑁂 𑀆𑀳𑀸𑀭𑁂 𑀦𑀢𑁆𑀣𑀺 𑀭𑀸𑀕𑁄 𑀦𑀢𑁆𑀣𑀺 𑀦𑀦𑁆𑀤𑀻 𑀦𑀢𑁆𑀣𑀺 𑀢𑀡𑁆𑀳𑀸…𑀧𑁂….

‘‘𑀨𑀲𑁆𑀲𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂… 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂… 𑀯𑀺𑀜𑁆𑀜𑀸𑀡𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀦𑀢𑁆𑀣𑀺 𑀭𑀸𑀕𑁄 𑀦𑀢𑁆𑀣𑀺 𑀦𑀦𑁆𑀤𑀻 𑀦𑀢𑁆𑀣𑀺 𑀢𑀡𑁆𑀳𑀸, 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀅𑀯𑀺𑀭𑀽𑀴𑁆𑀳𑀁. 𑀬𑀢𑁆𑀣 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀅𑀯𑀺𑀭𑀽𑀴𑁆𑀳𑀁, 𑀦𑀢𑁆𑀣𑀺 𑀢𑀢𑁆𑀣 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺. 𑀬𑀢𑁆𑀣 𑀦𑀢𑁆𑀣𑀺 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺, 𑀦𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺. 𑀬𑀢𑁆𑀣 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀺, 𑀦𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀬𑀢𑁆𑀣 𑀦𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺, 𑀦𑀢𑁆𑀣𑀺 𑀢𑀢𑁆𑀣 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁. 𑀬𑀢𑁆𑀣 𑀦𑀢𑁆𑀣𑀺 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁 𑀅𑀲𑁄𑀓𑀁 𑀢𑀁, 𑀪𑀺𑀓𑁆𑀔𑀯𑁂, 𑀅𑀤𑀭𑀁 𑀅𑀦𑀼𑀧𑀸𑀬𑀸𑀲𑀦𑁆𑀢𑀺 𑀯𑀤𑀸𑀫𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀦𑀕𑀭𑀲𑀼𑀢𑁆𑀢𑀁

𑁬𑁫. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺…𑀧𑁂… ‘‘𑀧𑀼𑀩𑁆𑀩𑁂 𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀏𑀢𑀤𑀳𑁄𑀲𑀺 𑁋 ‘𑀓𑀺𑀘𑁆𑀙𑀸 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄 𑀚𑀸𑀬𑀢𑀺 𑀘 𑀚𑀻𑀬𑀢𑀺 𑀘 𑀫𑀻𑀬𑀢𑀺 𑀘 𑀘𑀯𑀢𑀺 𑀘 𑀉𑀧𑀧𑀚𑁆𑀚𑀢𑀺 𑀘. 𑀅𑀣 𑀘 𑀧𑀦𑀺𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀲𑁆𑀲𑀭𑀡𑀁 𑀦𑀧𑁆𑀧𑀚𑀸𑀦𑀸𑀢𑀺 𑀚𑀭𑀸𑀫𑀭𑀡𑀲𑁆𑀲. 𑀓𑀼𑀤𑀸𑀲𑁆𑀲𑀼 𑀦𑀸𑀫 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀺𑀲𑁆𑀲𑀢𑀺 𑀚𑀭𑀸𑀫𑀭𑀡𑀲𑁆𑀲𑀸’𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀚𑀸𑀢𑀺𑀬𑀸 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’’𑀦𑁆𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀚𑀸𑀢𑀺 𑀳𑁄𑀢𑀺…𑀧𑁂… 𑀪𑀯𑁄 𑀳𑁄𑀢𑀺… 𑀉𑀧𑀸𑀤𑀸𑀦𑀁 𑀳𑁄𑀢𑀺… 𑀢𑀡𑁆𑀳𑀸 𑀳𑁄𑀢𑀺… 𑀯𑁂𑀤𑀦𑀸 𑀳𑁄𑀢𑀺… 𑀨𑀲𑁆𑀲𑁄 𑀳𑁄𑀢𑀺… 𑀲𑀴𑀸𑀬𑀢𑀦𑀁 𑀳𑁄𑀢𑀺… 𑀦𑀸𑀫𑀭𑀽𑀧𑀁 𑀳𑁄𑀢𑀺… 𑀓𑀺𑀁𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’𑀦𑁆𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀯𑀺𑀜𑁆𑀜𑀸𑀡𑁂 𑀔𑁄 𑀲𑀢𑀺 𑀦𑀸𑀫𑀭𑀽𑀧𑀁 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’𑀦𑁆𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀦𑀸𑀫𑀭𑀽𑀧𑁂 𑀔𑁄 𑀲𑀢𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’’𑀦𑁆𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 𑀧𑀘𑁆𑀘𑀼𑀤𑀸𑀯𑀢𑁆𑀢𑀢𑀺 𑀔𑁄 𑀇𑀤𑀁 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀫𑁆𑀳𑀸 𑀦 𑀧𑀭𑀁 𑀕𑀘𑁆𑀙𑀢𑀺. 𑀏𑀢𑁆𑀢𑀸𑀯𑀢𑀸 𑀚𑀸𑀬𑁂𑀣 𑀯𑀸 𑀚𑀻𑀬𑁂𑀣 𑀯𑀸 𑀫𑀻𑀬𑁂𑀣 𑀯𑀸 𑀘𑀯𑁂𑀣 𑀯𑀸 𑀉𑀧𑀧𑀚𑁆𑀚𑁂𑀣 𑀯𑀸, 𑀬𑀤𑀺𑀤𑀁 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁; 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁; 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁; 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. ‘𑀲𑀫𑀼𑀤𑀬𑁄, 𑀲𑀫𑀼𑀤𑀬𑁄’𑀢𑀺 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑀜𑀸𑀡𑀁 𑀉𑀤𑀧𑀸𑀤𑀺 𑀧𑀜𑁆𑀜𑀸 𑀉𑀤𑀧𑀸𑀤𑀺 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺 𑀆𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺, 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺; 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀚𑀸𑀢𑀺𑀬𑀸 𑀔𑁄 𑀅𑀲𑀢𑀺, 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺; 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀚𑀸𑀢𑀺 𑀦 𑀳𑁄𑀢𑀺…𑀧𑁂… 𑀪𑀯𑁄 𑀦 𑀳𑁄𑀢𑀺… 𑀉𑀧𑀸𑀤𑀸𑀦𑀁 𑀦 𑀳𑁄𑀢𑀺… 𑀢𑀡𑁆𑀳𑀸 𑀦 𑀳𑁄𑀢𑀺… 𑀯𑁂𑀤𑀦𑀸 𑀦 𑀳𑁄𑀢𑀺… 𑀨𑀲𑁆𑀲𑁄 𑀦 𑀳𑁄𑀢𑀺… 𑀲𑀴𑀸𑀬𑀢𑀦𑀁 𑀦 𑀳𑁄𑀢𑀺… 𑀦𑀸𑀫𑀭𑀽𑀧𑀁 𑀦 𑀳𑁄𑀢𑀺. 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄’𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀯𑀺𑀜𑁆𑀜𑀸𑀡𑁂 𑀔𑁄 𑀅𑀲𑀢𑀺, 𑀦𑀸𑀫𑀭𑀽𑀧𑀁 𑀦 𑀳𑁄𑀢𑀺; 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄’’’𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀯𑀺𑀜𑁆𑀜𑀸𑀡𑀁 𑀦 𑀳𑁄𑀢𑀺; 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄’𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀦𑀸𑀫𑀭𑀽𑀧𑁂 𑀔𑁄 𑀅𑀲𑀢𑀺, 𑀯𑀺𑀜𑁆𑀜𑀸𑀡𑀁 𑀦 𑀳𑁄𑀢𑀺; 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄’’’𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀫𑀕𑁆𑀕𑁄 𑀩𑁄𑀥𑀸𑀬 𑀬𑀤𑀺𑀤𑀁 𑁋 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄; 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄; 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄; 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺. ‘𑀦𑀺𑀭𑁄𑀥𑁄, 𑀦𑀺𑀭𑁄𑀥𑁄’𑀢𑀺 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑀜𑀸𑀡𑀁 𑀉𑀤𑀧𑀸𑀤𑀺 𑀧𑀜𑁆𑀜𑀸 𑀉𑀤𑀧𑀸𑀤𑀺 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺 𑀆𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀅𑀭𑀜𑁆𑀜𑁂 𑀧𑀯𑀦𑁂 𑀘𑀭𑀫𑀸𑀦𑁄 𑀧𑀲𑁆𑀲𑁂𑀬𑁆𑀬 𑀧𑀼𑀭𑀸𑀡𑀁 𑀫𑀕𑁆𑀕𑀁 𑀧𑀼𑀭𑀸𑀡𑀜𑁆𑀚𑀲𑀁 𑀧𑀼𑀩𑁆𑀩𑀓𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀅𑀦𑀼𑀬𑀸𑀢𑀁. 𑀲𑁄 𑀢𑀫𑀦𑀼𑀕𑀘𑁆𑀙𑁂𑀬𑁆𑀬. 𑀢𑀫𑀦𑀼𑀕𑀘𑁆𑀙𑀦𑁆𑀢𑁄 𑀧𑀲𑁆𑀲𑁂𑀬𑁆𑀬 𑀧𑀼𑀭𑀸𑀡𑀁 𑀦𑀕𑀭𑀁 𑀧𑀼𑀭𑀸𑀡𑀁 𑀭𑀸𑀚𑀥𑀸𑀦𑀺𑀁 𑀧𑀼𑀩𑁆𑀩𑀓𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀅𑀚𑁆𑀛𑀸𑀯𑀼𑀝𑁆𑀞𑀁 [𑀅𑀚𑁆𑀛𑀸𑀯𑀼𑀢𑁆𑀣𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀆𑀭𑀸𑀫𑀲𑀫𑁆𑀧𑀦𑁆𑀦𑀁 𑀯𑀦𑀲𑀫𑁆𑀧𑀦𑁆𑀦𑀁 𑀧𑁄𑀓𑁆𑀔𑀭𑀡𑀻𑀲𑀫𑁆𑀧𑀦𑁆𑀦𑀁 𑀉𑀤𑁆𑀥𑀸𑀧𑀯𑀦𑁆𑀢𑀁 [𑀉𑀤𑁆𑀤𑀸𑀧𑀯𑀦𑁆𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀭𑀫𑀡𑀻𑀬𑀁. 𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀭𑀜𑁆𑀜𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀲𑁆𑀲 𑀯𑀸 𑀆𑀭𑁄𑀘𑁂𑀬𑁆𑀬 𑁋 ‘𑀬𑀕𑁆𑀖𑁂, 𑀪𑀦𑁆𑀢𑁂, 𑀚𑀸𑀦𑁂𑀬𑁆𑀬𑀸𑀲𑀺 𑁋 𑀅𑀳𑀁 𑀅𑀤𑁆𑀤𑀲𑀁 𑀅𑀭𑀜𑁆𑀜𑁂 𑀧𑀯𑀦𑁂 𑀘𑀭𑀫𑀸𑀦𑁄 𑀧𑀼𑀭𑀸𑀡𑀁 𑀫𑀕𑁆𑀕𑀁 𑀧𑀼𑀭𑀸𑀡𑀜𑁆𑀚𑀲𑀁 𑀧𑀼𑀩𑁆𑀩𑀓𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀅𑀦𑀼𑀬𑀸𑀢𑀁 𑀢𑀫𑀦𑀼𑀕𑀘𑁆𑀙𑀺𑀁. 𑀢𑀫𑀦𑀼𑀕𑀘𑁆𑀙𑀦𑁆𑀢𑁄 𑀅𑀤𑁆𑀤𑀲𑀁 𑀧𑀼𑀭𑀸𑀡𑀁 𑀦𑀕𑀭𑀁 𑀧𑀼𑀭𑀸𑀡𑀁 𑀭𑀸𑀚𑀥𑀸𑀦𑀺𑀁 𑀧𑀼𑀩𑁆𑀩𑀓𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀅𑀚𑁆𑀛𑀸𑀯𑀼𑀝𑁆𑀞𑀁 𑀆𑀭𑀸𑀫𑀲𑀫𑁆𑀧𑀦𑁆𑀦𑀁 𑀯𑀦𑀲𑀫𑁆𑀧𑀦𑁆𑀦𑀁 𑀧𑁄𑀓𑁆𑀔𑀭𑀡𑀻𑀲𑀫𑁆𑀧𑀦𑁆𑀦𑀁 𑀉𑀤𑁆𑀥𑀸𑀧𑀯𑀦𑁆𑀢𑀁 𑀭𑀫𑀡𑀻𑀬𑀁. 𑀢𑀁, 𑀪𑀦𑁆𑀢𑁂, 𑀦𑀕𑀭𑀁 𑀫𑀸𑀧𑁂𑀳𑀻’𑀢𑀺. 𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁄 𑀯𑀸 𑀢𑀁 𑀦𑀕𑀭𑀁 𑀫𑀸𑀧𑁂𑀬𑁆𑀬. 𑀢𑀤𑀲𑁆𑀲 𑀦𑀕𑀭𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀩𑀸𑀳𑀼𑀚𑀜𑁆𑀜𑀁 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀁 𑀯𑀼𑀤𑁆𑀥𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀁. 𑀏𑀯𑀫𑁂𑀯 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀤𑁆𑀤𑀲𑀁 𑀧𑀼𑀭𑀸𑀡𑀁 𑀫𑀕𑁆𑀕𑀁 𑀧𑀼𑀭𑀸𑀡𑀜𑁆𑀚𑀲𑀁 𑀧𑀼𑀩𑁆𑀩𑀓𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀦𑀼𑀬𑀸𑀢𑀁.

‘‘𑀓𑀢𑀫𑁄 𑀘 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀸𑀡𑀫𑀕𑁆𑀕𑁄 𑀧𑀼𑀭𑀸𑀡𑀜𑁆𑀚𑀲𑁄 𑀧𑀼𑀩𑁆𑀩𑀓𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀦𑀼𑀬𑀸𑀢𑁄? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀸𑀡𑀫𑀕𑁆𑀕𑁄 𑀧𑀼𑀭𑀸𑀡𑀜𑁆𑀚𑀲𑁄 𑀧𑀼𑀩𑁆𑀩𑀓𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀦𑀼𑀬𑀸𑀢𑁄, 𑀢𑀫𑀦𑀼𑀕𑀘𑁆𑀙𑀺𑀁; 𑀢𑀫𑀦𑀼𑀕𑀘𑁆𑀙𑀦𑁆𑀢𑁄 𑀚𑀭𑀸𑀫𑀭𑀡𑀁 𑀅𑀩𑁆𑀪𑀜𑁆𑀜𑀸𑀲𑀺𑀁; 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀅𑀩𑁆𑀪𑀜𑁆𑀜𑀸𑀲𑀺𑀁; 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀅𑀩𑁆𑀪𑀜𑁆𑀜𑀸𑀲𑀺𑀁; 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀢𑀫𑀦𑀼𑀕𑀘𑁆𑀙𑀺𑀁; 𑀢𑀫𑀦𑀼𑀕𑀘𑁆𑀙𑀦𑁆𑀢𑁄 𑀚𑀸𑀢𑀺𑀁 𑀅𑀩𑁆𑀪𑀜𑁆𑀜𑀸𑀲𑀺𑀁…𑀧𑁂… 𑀪𑀯𑀁 𑀅𑀩𑁆𑀪𑀜𑁆𑀜𑀸𑀲𑀺𑀁… 𑀉𑀧𑀸𑀤𑀸𑀦𑀁 𑀅𑀩𑁆𑀪𑀜𑁆𑀜𑀸𑀲𑀺𑀁… 𑀢𑀡𑁆𑀳𑀁 𑀅𑀩𑁆𑀪𑀜𑁆𑀜𑀸𑀲𑀺𑀁… 𑀯𑁂𑀤𑀦𑀁 𑀅𑀩𑁆𑀪𑀜𑁆𑀜𑀸𑀲𑀺𑀁… 𑀨𑀲𑁆𑀲𑀁 𑀅𑀩𑁆𑀪𑀜𑁆𑀜𑀸𑀲𑀺𑀁… 𑀲𑀴𑀸𑀬𑀢𑀦𑀁 𑀅𑀩𑁆𑀪𑀜𑁆𑀜𑀸𑀲𑀺𑀁… 𑀦𑀸𑀫𑀭𑀽𑀧𑀁 𑀅𑀩𑁆𑀪𑀜𑁆𑀜𑀸𑀲𑀺𑀁… 𑀯𑀺𑀜𑁆𑀜𑀸𑀡𑀁 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀢𑀫𑀦𑀼𑀕𑀘𑁆𑀙𑀺𑀁; 𑀢𑀫𑀦𑀼𑀕𑀘𑁆𑀙𑀦𑁆𑀢𑁄 𑀲𑀗𑁆𑀔𑀸𑀭𑁂 𑀅𑀩𑁆𑀪𑀜𑁆𑀜𑀸𑀲𑀺𑀁; 𑀲𑀗𑁆𑀔𑀸𑀭𑀲𑀫𑀼𑀤𑀬𑀁 𑀅𑀩𑁆𑀪𑀜𑁆𑀜𑀸𑀲𑀺𑀁; 𑀲𑀗𑁆𑀔𑀸𑀭𑀦𑀺𑀭𑁄𑀥𑀁 𑀅𑀩𑁆𑀪𑀜𑁆𑀜𑀸𑀲𑀺𑀁; 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀢𑀤𑀪𑀺𑀜𑁆𑀜𑀸 𑀆𑀘𑀺𑀓𑁆𑀔𑀺𑀁 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁. 𑀢𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀲𑀫𑁆𑀫𑀲𑀲𑀼𑀢𑁆𑀢𑀁

𑁬𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀼𑀭𑀽𑀲𑀼 𑀯𑀺𑀳𑀭𑀢𑀺 𑀓𑀫𑁆𑀫𑀸𑀲𑀥𑀫𑁆𑀫𑀁 𑀦𑀸𑀫 𑀓𑀼𑀭𑀽𑀦𑀁 𑀦𑀺𑀕𑀫𑁄. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀫𑁆𑀫𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀁 𑀲𑀫𑁆𑀫𑀲’’𑀦𑁆𑀢𑀺 [𑀅𑀦𑁆𑀢𑀭𑀸 𑀲𑀫𑁆𑀫𑀲𑀦𑀦𑁆𑀢𑀺 (𑀲𑀻.)]. 𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀲𑀫𑁆𑀫𑀲𑀸𑀫𑀺 𑀅𑀦𑁆𑀢𑀭𑀁 𑀲𑀫𑁆𑀫𑀲’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀲𑀫𑁆𑀫𑀲𑀲𑀺 𑀅𑀦𑁆𑀢𑀭𑀁 𑀲𑀫𑁆𑀫𑀲’’𑀦𑁆𑀢𑀺? 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀩𑁆𑀬𑀸𑀓𑀸𑀲𑀺. 𑀬𑀣𑀸 𑀲𑁄 𑀪𑀺𑀓𑁆𑀔𑀼 𑀩𑁆𑀬𑀸𑀓𑀸𑀲𑀺 𑀦 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀘𑀺𑀢𑁆𑀢𑀁 𑀆𑀭𑀸𑀥𑁂𑀲𑀺.

𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑀲𑁆𑀲, 𑀪𑀕𑀯𑀸, 𑀓𑀸𑀮𑁄; 𑀏𑀢𑀲𑁆𑀲, 𑀲𑀼𑀕𑀢, 𑀓𑀸𑀮𑁄; 𑀬𑀁 𑀪𑀕𑀯𑀸 𑀅𑀦𑁆𑀢𑀭𑀁 𑀲𑀫𑁆𑀫𑀲𑀁 𑀪𑀸𑀲𑁂𑀬𑁆𑀬. 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. ‘‘𑀢𑁂𑀦𑀳𑀸𑀦𑀦𑁆𑀤, 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀲𑀫𑀸𑀦𑁄 𑀲𑀫𑁆𑀫𑀲𑀢𑀺 𑀅𑀦𑁆𑀢𑀭𑀁 𑀲𑀫𑁆𑀫𑀲𑀁 [𑀲𑀫𑁆𑀫𑀲𑀦𑀁 (𑀲𑀻.)] 𑁋 ‘𑀬𑀁 𑀔𑁄 𑀇𑀤𑀁 𑀅𑀦𑁂𑀓𑀯𑀺𑀥𑀁 𑀦𑀸𑀦𑀧𑁆𑀧𑀓𑀸𑀭𑀓𑀁 𑀤𑀼𑀓𑁆𑀔𑀁 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀚𑀭𑀸𑀫𑀭𑀡𑀁. 𑀇𑀤𑀁 𑀔𑁄 𑀤𑀼𑀓𑁆𑀔𑀁 𑀓𑀺𑀁𑀦𑀺𑀤𑀸𑀦𑀁 𑀓𑀺𑀁𑀲𑀫𑀼𑀤𑀬𑀁 𑀓𑀺𑀁𑀚𑀸𑀢𑀺𑀓𑀁 𑀓𑀺𑀁𑀧𑀪𑀯𑀁, 𑀓𑀺𑀲𑁆𑀫𑀺𑀁 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀻’𑀢𑀺? 𑀲𑁄 𑀲𑀫𑁆𑀫𑀲𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀬𑀁 𑀔𑁄 𑀇𑀤𑀁 𑀅𑀦𑁂𑀓𑀯𑀺𑀥𑀁 𑀦𑀸𑀦𑀧𑁆𑀧𑀓𑀸𑀭𑀓𑀁 𑀤𑀼𑀓𑁆𑀔𑀁 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀚𑀭𑀸𑀫𑀭𑀡𑀁. 𑀇𑀤𑀁 𑀔𑁄 𑀤𑀼𑀓𑁆𑀔𑀁 𑀉𑀧𑀥𑀺𑀦𑀺𑀤𑀸𑀦𑀁 𑀉𑀧𑀥𑀺𑀲𑀫𑀼𑀤𑀬𑀁 𑀉𑀧𑀥𑀺𑀚𑀸𑀢𑀺𑀓𑀁 𑀉𑀧𑀥𑀺𑀧𑀪𑀯𑀁, 𑀉𑀧𑀥𑀺𑀲𑁆𑀫𑀺𑀁 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀉𑀧𑀥𑀺𑀲𑁆𑀫𑀺𑀁 𑀅𑀲𑀢𑀺 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀻’𑀢𑀺. 𑀲𑁄 𑀚𑀭𑀸𑀫𑀭𑀡𑀜𑁆𑀘 𑀧𑀚𑀸𑀦𑀸𑀢𑀺 𑀚𑀭𑀸𑀫𑀭𑀡𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺 𑀚𑀭𑀸𑀫𑀭𑀡𑀦𑀺𑀭𑁄𑀥𑀜𑁆𑀘 𑀧𑀚𑀸𑀦𑀸𑀢𑀺 𑀬𑀸 𑀘 𑀚𑀭𑀸𑀫𑀭𑀡𑀦𑀺𑀭𑁄𑀥𑀲𑀸𑀭𑀼𑀧𑁆𑀧𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀢𑀜𑁆𑀘 𑀧𑀚𑀸𑀦𑀸𑀢𑀺. 𑀢𑀣𑀸𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺 𑀅𑀦𑀼𑀥𑀫𑁆𑀫𑀘𑀸𑀭𑀻. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬 𑀧𑀝𑀺𑀧𑀦𑁆𑀦𑁄 𑀚𑀭𑀸𑀫𑀭𑀡𑀦𑀺𑀭𑁄𑀥𑀸𑀬.

‘‘𑀅𑀣𑀸𑀧𑀭𑀁 𑀲𑀫𑁆𑀫𑀲𑀫𑀸𑀦𑁄 𑀲𑀫𑁆𑀫𑀲𑀢𑀺 𑀅𑀦𑁆𑀢𑀭𑀁 𑀲𑀫𑁆𑀫𑀲𑀁 𑁋 ‘𑀉𑀧𑀥𑀺 𑀧𑀦𑀸𑀬𑀁 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄, 𑀓𑀺𑀲𑁆𑀫𑀺𑀁 𑀲𑀢𑀺 𑀉𑀧𑀥𑀺 𑀳𑁄𑀢𑀺, 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀉𑀧𑀥𑀺 𑀦 𑀳𑁄𑀢𑀻’𑀢𑀺? 𑀲𑁄 𑀲𑀫𑁆𑀫𑀲𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀉𑀧𑀥𑀺 𑀢𑀡𑁆𑀳𑀸𑀦𑀺𑀤𑀸𑀦𑁄 𑀢𑀡𑁆𑀳𑀸𑀲𑀫𑀼𑀤𑀬𑁄 𑀢𑀡𑁆𑀳𑀸𑀚𑀸𑀢𑀺𑀓𑁄 𑀢𑀡𑁆𑀳𑀸𑀧𑀪𑀯𑁄, 𑀢𑀡𑁆𑀳𑀸𑀬 𑀲𑀢𑀺 𑀉𑀧𑀥𑀺 𑀳𑁄𑀢𑀺, 𑀢𑀡𑁆𑀳𑀸𑀬 𑀅𑀲𑀢𑀺 𑀉𑀧𑀥𑀺 𑀦 𑀳𑁄𑀢𑀻’𑀢𑀺. 𑀲𑁄 𑀉𑀧𑀥𑀺𑀜𑁆𑀘 𑀧𑀚𑀸𑀦𑀸𑀢𑀺 𑀉𑀧𑀥𑀺𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺 𑀉𑀧𑀥𑀺𑀦𑀺𑀭𑁄𑀥𑀜𑁆𑀘 𑀧𑀚𑀸𑀦𑀸𑀢𑀺 𑀬𑀸 𑀘 𑀉𑀧𑀥𑀺𑀦𑀺𑀭𑁄𑀥𑀲𑀸𑀭𑀼𑀧𑁆𑀧𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀢𑀜𑁆𑀘 𑀧𑀚𑀸𑀦𑀸𑀢𑀺. 𑀢𑀣𑀸 𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀺 𑀅𑀦𑀼𑀥𑀫𑁆𑀫𑀘𑀸𑀭𑀻. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬 𑀧𑀝𑀺𑀧𑀦𑁆𑀦𑁄 𑀉𑀧𑀥𑀺𑀦𑀺𑀭𑁄𑀥𑀸𑀬.

‘‘𑀅𑀣𑀸𑀧𑀭𑀁 𑀲𑀫𑁆𑀫𑀲𑀫𑀸𑀦𑁄 𑀲𑀫𑁆𑀫𑀲𑀢𑀺 𑀅𑀦𑁆𑀢𑀭𑀁 𑀲𑀫𑁆𑀫𑀲𑀁 𑁋 ‘𑀢𑀡𑁆𑀳𑀸 𑀧𑀦𑀸𑀬𑀁 𑀓𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀓𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀻’𑀢𑀺? 𑀲𑁄 𑀲𑀫𑁆𑀫𑀲𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 𑀬𑀁 𑀔𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀓𑀺𑀜𑁆𑀘 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁? 𑀘𑀓𑁆𑀔𑀼𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁, 𑀲𑀸𑀢𑀭𑀽𑀧𑀁. 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀲𑁄𑀢𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁…𑀧𑁂… 𑀖𑀸𑀦𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁… 𑀚𑀺𑀯𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁… 𑀓𑀸𑀬𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁… 𑀫𑀦𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀢𑀁 𑀦𑀺𑀘𑁆𑀘𑀢𑁄 𑀅𑀤𑁆𑀤𑀓𑁆𑀔𑀼𑀁 𑀲𑀼𑀔𑀢𑁄 𑀅𑀤𑁆𑀤𑀓𑁆𑀔𑀼𑀁 𑀅𑀢𑁆𑀢𑀢𑁄 𑀅𑀤𑁆𑀤𑀓𑁆𑀔𑀼𑀁 𑀆𑀭𑁄𑀕𑁆𑀬𑀢𑁄 𑀅𑀤𑁆𑀤𑀓𑁆𑀔𑀼𑀁 𑀔𑁂𑀫𑀢𑁄 𑀅𑀤𑁆𑀤𑀓𑁆𑀔𑀼𑀁. 𑀢𑁂 𑀢𑀡𑁆𑀳𑀁 𑀯𑀟𑁆𑀠𑁂𑀲𑀼𑀁. 𑀬𑁂 𑀢𑀡𑁆𑀳𑀁 𑀯𑀟𑁆𑀠𑁂𑀲𑀼𑀁 𑀢𑁂 𑀉𑀧𑀥𑀺𑀁 𑀯𑀟𑁆𑀠𑁂𑀲𑀼𑀁. 𑀬𑁂 𑀉𑀧𑀥𑀺𑀁 𑀯𑀟𑁆𑀠𑁂𑀲𑀼𑀁 𑀢𑁂 𑀤𑀼𑀓𑁆𑀔𑀁 𑀯𑀟𑁆𑀠𑁂𑀲𑀼𑀁. 𑀬𑁂 𑀤𑀼𑀓𑁆𑀔𑀁 𑀯𑀟𑁆𑀠𑁂𑀲𑀼𑀁 𑀢𑁂 𑀦 𑀧𑀭𑀺𑀫𑀼𑀘𑁆𑀘𑀺𑀁𑀲𑀼 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀦 𑀧𑀭𑀺𑀫𑀼𑀘𑁆𑀘𑀺𑀁𑀲𑀼 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

‘‘𑀬𑁂𑀧𑀺 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀢𑀁 𑀦𑀺𑀘𑁆𑀘𑀢𑁄 𑀤𑀓𑁆𑀔𑀺𑀲𑁆𑀲𑀦𑁆𑀢𑀺 [𑀤𑀓𑁆𑀔𑀺𑀦𑁆𑀢𑀺 (𑀲𑀻.)] 𑀲𑀼𑀔𑀢𑁄 𑀤𑀓𑁆𑀔𑀺𑀲𑁆𑀲𑀦𑁆𑀢𑀺 𑀅𑀢𑁆𑀢𑀢𑁄 𑀤𑀓𑁆𑀔𑀺𑀲𑁆𑀲𑀦𑁆𑀢𑀺 𑀆𑀭𑁄𑀕𑁆𑀬𑀢𑁄 𑀤𑀓𑁆𑀔𑀺𑀲𑁆𑀲𑀦𑁆𑀢𑀺 𑀔𑁂𑀫𑀢𑁄 𑀤𑀓𑁆𑀔𑀺𑀲𑁆𑀲𑀦𑁆𑀢𑀺. 𑀢𑁂 𑀢𑀡𑁆𑀳𑀁 𑀯𑀟𑁆𑀠𑀺𑀲𑁆𑀲𑀦𑁆𑀢𑀺. 𑀬𑁂 𑀢𑀡𑁆𑀳𑀁 𑀯𑀟𑁆𑀠𑀺𑀲𑁆𑀲𑀦𑁆𑀢𑀺 𑀢𑁂 𑀉𑀧𑀥𑀺𑀁 𑀯𑀟𑁆𑀠𑀺𑀲𑁆𑀲𑀦𑁆𑀢𑀺. 𑀬𑁂 𑀉𑀧𑀥𑀺𑀁 𑀯𑀟𑁆𑀠𑀺𑀲𑁆𑀲𑀦𑁆𑀢𑀺 𑀢𑁂 𑀤𑀼𑀓𑁆𑀔𑀁 𑀯𑀟𑁆𑀠𑀺𑀲𑁆𑀲𑀦𑁆𑀢𑀺. 𑀬𑁂 𑀤𑀼𑀓𑁆𑀔𑀁 𑀯𑀟𑁆𑀠𑀺𑀲𑁆𑀲𑀦𑁆𑀢𑀺 𑀢𑁂 𑀦 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀦 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

‘‘𑀬𑁂𑀧𑀺 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀢𑀁 𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑀺 𑀲𑀼𑀔𑀢𑁄 𑀧𑀲𑁆𑀲𑀦𑁆𑀢𑀺 𑀅𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑀺 𑀆𑀭𑁄𑀕𑁆𑀬𑀢𑁄 𑀧𑀲𑁆𑀲𑀦𑁆𑀢𑀺 𑀔𑁂𑀫𑀢𑁄 𑀧𑀲𑁆𑀲𑀦𑁆𑀢𑀺. 𑀢𑁂 𑀢𑀡𑁆𑀳𑀁 𑀯𑀟𑁆𑀠𑁂𑀦𑁆𑀢𑀺. 𑀬𑁂 𑀢𑀡𑁆𑀳𑀁 𑀯𑀟𑁆𑀠𑁂𑀦𑁆𑀢𑀺 𑀢𑁂 𑀉𑀧𑀥𑀺𑀁 𑀯𑀟𑁆𑀠𑁂𑀦𑁆𑀢𑀺. 𑀬𑁂 𑀉𑀧𑀥𑀺𑀁 𑀯𑀟𑁆𑀠𑁂𑀦𑁆𑀢𑀺 𑀢𑁂 𑀤𑀼𑀓𑁆𑀔𑀁 𑀯𑀟𑁆𑀠𑁂𑀦𑁆𑀢𑀺. 𑀬𑁂 𑀤𑀼𑀓𑁆𑀔𑀁 𑀯𑀟𑁆𑀠𑁂𑀦𑁆𑀢𑀺 𑀢𑁂 𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀧𑀸𑀦𑀻𑀬𑀓𑀁𑀲𑁄 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀕𑀦𑁆𑀥𑀲𑀫𑁆𑀧𑀦𑁆𑀦𑁄 𑀭𑀲𑀲𑀫𑁆𑀧𑀦𑁆𑀦𑁄. 𑀲𑁄 𑀘 𑀔𑁄 𑀯𑀺𑀲𑁂𑀦 𑀲𑀁𑀲𑀝𑁆𑀞𑁄. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀖𑀫𑁆𑀫𑀸𑀪𑀺𑀢𑀢𑁆𑀢𑁄 𑀖𑀫𑁆𑀫𑀧𑀭𑁂𑀢𑁄 𑀓𑀺𑀮𑀦𑁆𑀢𑁄 𑀢𑀲𑀺𑀢𑁄 𑀧𑀺𑀧𑀸𑀲𑀺𑀢𑁄. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀬𑀁 𑀢𑁂, 𑀅𑀫𑁆𑀪𑁄 𑀧𑀼𑀭𑀺𑀲, 𑀆𑀧𑀸𑀦𑀻𑀬𑀓𑀁𑀲𑁄 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀕𑀦𑁆𑀥𑀲𑀫𑁆𑀧𑀦𑁆𑀦𑁄 𑀭𑀲𑀲𑀫𑁆𑀧𑀦𑁆𑀦𑁄; 𑀲𑁄 𑀘 𑀔𑁄 𑀯𑀺𑀲𑁂𑀦 𑀲𑀁𑀲𑀝𑁆𑀞𑁄. 𑀲𑀘𑁂 𑀆𑀓𑀗𑁆𑀔𑀲𑀺 𑀧𑀺𑀯. 𑀧𑀺𑀯𑀢𑁄 𑀳𑀺 𑀔𑁄 𑀢𑀁 𑀙𑀸𑀤𑁂𑀲𑁆𑀲𑀢𑀺 𑀯𑀡𑁆𑀡𑁂𑀦𑀧𑀺 𑀕𑀦𑁆𑀥𑁂𑀦𑀧𑀺 𑀭𑀲𑁂𑀦𑀧𑀺, 𑀧𑀺𑀯𑀺𑀢𑁆𑀯𑀸 𑀘 𑀧𑀦 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑀲𑀺 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔’𑀦𑁆𑀢𑀺. 𑀲𑁄 𑀢𑀁 𑀆𑀧𑀸𑀦𑀻𑀬𑀓𑀁𑀲𑀁 𑀲𑀳𑀲𑀸 𑀅𑀧𑁆𑀧𑀝𑀺𑀲𑀗𑁆𑀔𑀸 𑀧𑀺𑀯𑁂𑀬𑁆𑀬, 𑀦𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀳𑀺 𑀓𑁂𑀘𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁…𑀧𑁂… 𑀅𑀦𑀸𑀕𑀢𑀫𑀤𑁆𑀥𑀸𑀦𑀁…𑀧𑁂… 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀢𑀁 𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑀺 𑀲𑀼𑀔𑀢𑁄 𑀧𑀲𑁆𑀲𑀦𑁆𑀢𑀺 𑀅𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑀺 𑀆𑀭𑁄𑀕𑁆𑀬𑀢𑁄 𑀧𑀲𑁆𑀲𑀦𑁆𑀢𑀺 𑀔𑁂𑀫𑀢𑁄 𑀧𑀲𑁆𑀲𑀦𑁆𑀢𑀺, 𑀢𑁂 𑀢𑀡𑁆𑀳𑀁 𑀯𑀟𑁆𑀠𑁂𑀦𑁆𑀢𑀺. 𑀬𑁂 𑀢𑀡𑁆𑀳𑀁 𑀯𑀟𑁆𑀠𑁂𑀦𑁆𑀢𑀺 𑀢𑁂 𑀉𑀧𑀥𑀺𑀁 𑀯𑀟𑁆𑀠𑁂𑀦𑁆𑀢𑀺. 𑀬𑁂 𑀉𑀧𑀥𑀺𑀁 𑀯𑀟𑁆𑀠𑁂𑀦𑁆𑀢𑀺 𑀢𑁂 𑀤𑀼𑀓𑁆𑀔𑀁 𑀯𑀟𑁆𑀠𑁂𑀦𑁆𑀢𑀺. 𑀬𑁂 𑀤𑀼𑀓𑁆𑀔𑀁 𑀯𑀟𑁆𑀠𑁂𑀦𑁆𑀢𑀺 𑀢𑁂 𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

‘‘𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀢𑀁 𑀅𑀦𑀺𑀘𑁆𑀘𑀢𑁄 𑀅𑀤𑁆𑀤𑀓𑁆𑀔𑀼𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤𑀓𑁆𑀔𑀼𑀁 𑀅𑀦𑀢𑁆𑀢𑀢𑁄 𑀅𑀤𑁆𑀤𑀓𑁆𑀔𑀼𑀁 𑀭𑁄𑀕𑀢𑁄 𑀅𑀤𑁆𑀤𑀓𑁆𑀔𑀼𑀁 𑀪𑀬𑀢𑁄 𑀅𑀤𑁆𑀤𑀓𑁆𑀔𑀼𑀁, 𑀢𑁂 𑀢𑀡𑁆𑀳𑀁 𑀧𑀚𑀳𑀺𑀁𑀲𑀼. 𑀬𑁂 𑀢𑀡𑁆𑀳𑀁 𑀧𑀚𑀳𑀺𑀁𑀲𑀼 𑀢𑁂 𑀉𑀧𑀥𑀺𑀁 𑀧𑀚𑀳𑀺𑀁𑀲𑀼. 𑀬𑁂 𑀉𑀧𑀥𑀺𑀁 𑀧𑀚𑀳𑀺𑀁𑀲𑀼 𑀢𑁂 𑀤𑀼𑀓𑁆𑀔𑀁 𑀧𑀚𑀳𑀺𑀁𑀲𑀼. 𑀬𑁂 𑀤𑀼𑀓𑁆𑀔𑀁 𑀧𑀚𑀳𑀺𑀁𑀲𑀼 𑀢𑁂 𑀧𑀭𑀺𑀫𑀼𑀘𑁆𑀘𑀺𑀁𑀲𑀼 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀧𑀭𑀺𑀫𑀼𑀘𑁆𑀘𑀺𑀁𑀲𑀼 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

‘‘𑀬𑁂𑀧𑀺 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀢𑀁 𑀅𑀦𑀺𑀘𑁆𑀘𑀢𑁄 𑀤𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑀼𑀓𑁆𑀔𑀢𑁄 𑀤𑀓𑁆𑀔𑀺𑀲𑁆𑀲𑀦𑁆𑀢𑀺 𑀅𑀦𑀢𑁆𑀢𑀢𑁄 𑀤𑀓𑁆𑀔𑀺𑀲𑁆𑀲𑀦𑁆𑀢𑀺 𑀭𑁄𑀕𑀢𑁄 𑀤𑀓𑁆𑀔𑀺𑀲𑁆𑀲𑀦𑁆𑀢𑀺 𑀪𑀬𑀢𑁄 𑀤𑀓𑁆𑀔𑀺𑀲𑁆𑀲𑀦𑁆𑀢𑀺, 𑀢𑁂 𑀢𑀡𑁆𑀳𑀁 𑀧𑀚𑀳𑀺𑀲𑁆𑀲𑀦𑁆𑀢𑀺. 𑀬𑁂 𑀢𑀡𑁆𑀳𑀁 𑀧𑀚𑀳𑀺𑀲𑁆𑀲𑀦𑁆𑀢𑀺…𑀧𑁂… 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

‘‘𑀬𑁂𑀧𑀺 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀢𑀁 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑀺 𑀤𑀼𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑀺 𑀅𑀦𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑀺 𑀭𑁄𑀕𑀢𑁄 𑀧𑀲𑁆𑀲𑀦𑁆𑀢𑀺 𑀪𑀬𑀢𑁄 𑀧𑀲𑁆𑀲𑀦𑁆𑀢𑀺, 𑀢𑁂 𑀢𑀡𑁆𑀳𑀁 𑀧𑀚𑀳𑀦𑁆𑀢𑀺. 𑀬𑁂 𑀢𑀡𑁆𑀳𑀁 𑀧𑀚𑀳𑀦𑁆𑀢𑀺 𑀢𑁂 𑀉𑀧𑀥𑀺𑀁 𑀧𑀚𑀳𑀦𑁆𑀢𑀺. 𑀬𑁂 𑀉𑀧𑀥𑀺𑀁 𑀧𑀚𑀳𑀦𑁆𑀢𑀺 𑀢𑁂 𑀤𑀼𑀓𑁆𑀔𑀁 𑀧𑀚𑀳𑀦𑁆𑀢𑀺. 𑀬𑁂 𑀤𑀼𑀓𑁆𑀔𑀁 𑀧𑀚𑀳𑀦𑁆𑀢𑀺 𑀢𑁂 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀧𑀸𑀦𑀻𑀬𑀓𑀁𑀲𑁄 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀕𑀦𑁆𑀥𑀲𑀫𑁆𑀧𑀦𑁆𑀦𑁄 𑀭𑀲𑀲𑀫𑁆𑀧𑀦𑁆𑀦𑁄. 𑀲𑁄 𑀘 𑀔𑁄 𑀯𑀺𑀲𑁂𑀦 𑀲𑀁𑀲𑀝𑁆𑀞𑁄. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀖𑀫𑁆𑀫𑀸𑀪𑀺𑀢𑀢𑁆𑀢𑁄 𑀖𑀫𑁆𑀫𑀧𑀭𑁂𑀢𑁄 𑀓𑀺𑀮𑀦𑁆𑀢𑁄 𑀢𑀲𑀺𑀢𑁄 𑀧𑀺𑀧𑀸𑀲𑀺𑀢𑁄. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀬𑀁 𑀢𑁂, 𑀅𑀫𑁆𑀪𑁄 𑀧𑀼𑀭𑀺𑀲, 𑀆𑀧𑀸𑀦𑀻𑀬𑀓𑀁𑀲𑁄 𑀯𑀡𑁆𑀡𑀲𑀫𑁆𑀧𑀦𑁆𑀦𑁄 𑀕𑀦𑁆𑀥𑀲𑀫𑁆𑀧𑀦𑁆𑀦𑁄 𑀭𑀲𑀲𑀫𑁆𑀧𑀦𑁆𑀦𑁄 𑀲𑁄 𑀘 𑀔𑁄 𑀯𑀺𑀲𑁂𑀦 𑀲𑀁𑀲𑀝𑁆𑀞𑁄. 𑀲𑀘𑁂 𑀆𑀓𑀗𑁆𑀔𑀲𑀺 𑀧𑀺𑀯. 𑀧𑀺𑀯𑀢𑁄 𑀳𑀺 𑀔𑁄 𑀢𑀁 𑀙𑀸𑀤𑁂𑀲𑁆𑀲𑀢𑀺 𑀯𑀡𑁆𑀡𑁂𑀦𑀧𑀺 𑀕𑀦𑁆𑀥𑁂𑀦𑀧𑀺 𑀭𑀲𑁂𑀦𑀧𑀺; 𑀧𑀺𑀯𑀺𑀢𑁆𑀯𑀸 𑀘 𑀧𑀦 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑀲𑀺 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀏𑀯𑀫𑀲𑁆𑀲 𑁋 ‘𑀲𑀓𑁆𑀓𑀸 𑀔𑁄 𑀫𑁂 𑀅𑀬𑀁 𑀲𑀼𑀭𑀸𑀧𑀺𑀧𑀸𑀲𑀺𑀢𑀸 [𑀲𑀼𑀭𑀸𑀧𑀺𑀧𑀸𑀲𑀸 (?)] 𑀧𑀸𑀦𑀻𑀬𑁂𑀦 𑀯𑀸 𑀯𑀺𑀦𑁂𑀢𑀼𑀁 𑀤𑀥𑀺𑀫𑀡𑁆𑀟𑀓𑁂𑀦 𑀯𑀸 𑀯𑀺𑀦𑁂𑀢𑀼𑀁 𑀪𑀝𑁆𑀞𑀮𑁄𑀡𑀺𑀓𑀸𑀬 [𑀫𑀝𑁆𑀞𑀮𑁄𑀡𑀺𑀓𑀸𑀬 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀸 𑀯𑀺𑀦𑁂𑀢𑀼𑀁 𑀮𑁄𑀡𑀲𑁄𑀯𑀻𑀭𑀓𑁂𑀦 𑀯𑀸 𑀯𑀺𑀦𑁂𑀢𑀼𑀁, 𑀦 𑀢𑁆𑀯𑁂𑀯𑀸𑀳𑀁 𑀢𑀁 𑀧𑀺𑀯𑁂𑀬𑁆𑀬𑀁, 𑀬𑀁 𑀫𑀫 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’𑀢𑀺. 𑀲𑁄 𑀢𑀁 𑀆𑀧𑀸𑀦𑀻𑀬𑀓𑀁𑀲𑀁 𑀧𑀝𑀺𑀲𑀗𑁆𑀔𑀸 𑀦 𑀧𑀺𑀯𑁂𑀬𑁆𑀬, 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀦 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀳𑀺 𑀓𑁂𑀘𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀢𑀁 𑀅𑀦𑀺𑀘𑁆𑀘𑀢𑁄 𑀅𑀤𑁆𑀤𑀓𑁆𑀔𑀼𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤𑀓𑁆𑀔𑀼𑀁 𑀅𑀦𑀢𑁆𑀢𑀢𑁄 𑀅𑀤𑁆𑀤𑀓𑁆𑀔𑀼𑀁 𑀭𑁄𑀕𑀢𑁄 𑀅𑀤𑁆𑀤𑀓𑁆𑀔𑀼𑀁 𑀪𑀬𑀢𑁄 𑀅𑀤𑁆𑀤𑀓𑁆𑀔𑀼𑀁, 𑀢𑁂 𑀢𑀡𑁆𑀳𑀁 𑀧𑀚𑀳𑀺𑀁𑀲𑀼. 𑀬𑁂 𑀢𑀡𑁆𑀳𑀁 𑀧𑀚𑀳𑀺𑀁𑀲𑀼 𑀢𑁂 𑀉𑀧𑀥𑀺𑀁 𑀧𑀚𑀳𑀺𑀁𑀲𑀼. 𑀬𑁂 𑀉𑀧𑀥𑀺𑀁 𑀧𑀚𑀳𑀺𑀁𑀲𑀼 𑀢𑁂 𑀤𑀼𑀓𑁆𑀔𑀁 𑀧𑀚𑀳𑀺𑀁𑀲𑀼. 𑀬𑁂 𑀤𑀼𑀓𑁆𑀔𑀁 𑀧𑀚𑀳𑀺𑀁𑀲𑀼 𑀢𑁂 𑀧𑀭𑀺𑀫𑀼𑀘𑁆𑀘𑀺𑀁𑀲𑀼 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀧𑀭𑀺𑀫𑀼𑀘𑁆𑀘𑀺𑀁𑀲𑀼 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

‘‘𑀬𑁂𑀧𑀺 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁…𑀧𑁂… 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀢𑀁 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑀺 𑀤𑀼𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑀺 𑀅𑀦𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑀺 𑀭𑁄𑀕𑀢𑁄 𑀧𑀲𑁆𑀲𑀦𑁆𑀢𑀺 𑀪𑀬𑀢𑁄 𑀧𑀲𑁆𑀲𑀦𑁆𑀢𑀺, 𑀢𑁂 𑀢𑀡𑁆𑀳𑀁 𑀧𑀚𑀳𑀦𑁆𑀢𑀺. 𑀬𑁂 𑀢𑀡𑁆𑀳𑀁 𑀧𑀚𑀳𑀦𑁆𑀢𑀺 𑀢𑁂 𑀉𑀧𑀥𑀺𑀁 𑀧𑀚𑀳𑀦𑁆𑀢𑀺. 𑀬𑁂 𑀉𑀧𑀥𑀺𑀁 𑀧𑀚𑀳𑀦𑁆𑀢𑀺 𑀢𑁂 𑀤𑀼𑀓𑁆𑀔𑀁 𑀧𑀚𑀳𑀦𑁆𑀢𑀺. 𑀬𑁂 𑀤𑀼𑀓𑁆𑀔𑀁 𑀧𑀚𑀳𑀦𑁆𑀢𑀺 𑀢𑁂 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀻’’𑀢𑀺. 𑀙𑀝𑁆𑀞𑀁.

𑁭. 𑀦𑀴𑀓𑀮𑀸𑀧𑀻𑀲𑀼𑀢𑁆𑀢𑀁

𑁬𑁭. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀓𑁄𑀝𑁆𑀞𑀺𑀓𑁄 [𑀫𑀳𑀸𑀓𑁄𑀝𑁆𑀞𑀺𑀢𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀦𑁆𑀢𑀺 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀲𑀬𑀁𑀓𑀢𑀁 𑀚𑀭𑀸𑀫𑀭𑀡𑀁, 𑀧𑀭𑀁𑀓𑀢𑀁 𑀚𑀭𑀸𑀫𑀭𑀡𑀁, 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀚𑀭𑀸𑀫𑀭𑀡𑀁, 𑀉𑀤𑀸𑀳𑀼 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀚𑀭𑀸𑀫𑀭𑀡’’𑀦𑁆𑀢𑀺? ‘‘𑀦 𑀔𑁄, 𑀆𑀯𑀼𑀲𑁄 𑀓𑁄𑀝𑁆𑀞𑀺𑀓, 𑀲𑀬𑀁𑀓𑀢𑀁 𑀚𑀭𑀸𑀫𑀭𑀡𑀁, 𑀦 𑀧𑀭𑀁𑀓𑀢𑀁 𑀚𑀭𑀸𑀫𑀭𑀡𑀁, 𑀦 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀚𑀭𑀸𑀫𑀭𑀡𑀁, 𑀦𑀸𑀧𑀺 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀚𑀭𑀸𑀫𑀭𑀡𑀁. 𑀅𑀧𑀺 𑀘, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀲𑀬𑀁𑀓𑀢𑀸 𑀚𑀸𑀢𑀺, 𑀧𑀭𑀁𑀓𑀢𑀸 𑀚𑀸𑀢𑀺, 𑀲𑀬𑀁𑀓𑀢𑀸 𑀘 𑀧𑀭𑀁𑀓𑀢𑀸 𑀘 𑀚𑀸𑀢𑀺, 𑀉𑀤𑀸𑀳𑀼 𑀅𑀲𑀬𑀁𑀓𑀸𑀭𑀸 𑀅𑀧𑀭𑀁𑀓𑀸𑀭𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀚𑀸𑀢𑀻’’𑀢𑀺? ‘‘𑀦 𑀔𑁄, 𑀆𑀯𑀼𑀲𑁄 𑀓𑁄𑀝𑁆𑀞𑀺𑀓, 𑀲𑀬𑀁𑀓𑀢𑀸 𑀚𑀸𑀢𑀺, 𑀦 𑀧𑀭𑀁𑀓𑀢𑀸 𑀚𑀸𑀢𑀺, 𑀦 𑀲𑀬𑀁𑀓𑀢𑀸 𑀘 𑀧𑀭𑀁𑀓𑀢𑀸 𑀘 𑀚𑀸𑀢𑀺, 𑀦𑀸𑀧𑀺 𑀅𑀲𑀬𑀁𑀓𑀸𑀭𑀸 𑀅𑀧𑀭𑀁𑀓𑀸𑀭𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀚𑀸𑀢𑀺. 𑀅𑀧𑀺 𑀘, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’’𑀢𑀺.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀲𑀬𑀁𑀓𑀢𑁄 𑀪𑀯𑁄…𑀧𑁂… 𑀲𑀬𑀁𑀓𑀢𑀁 𑀉𑀧𑀸𑀤𑀸𑀦𑀁… 𑀲𑀬𑀁𑀓𑀢𑀸 𑀢𑀡𑁆𑀳𑀸… 𑀲𑀬𑀁𑀓𑀢𑀸 𑀯𑁂𑀤𑀦𑀸… 𑀲𑀬𑀁𑀓𑀢𑁄 𑀨𑀲𑁆𑀲𑁄… 𑀲𑀬𑀁𑀓𑀢𑀁 𑀲𑀴𑀸𑀬𑀢𑀦𑀁… 𑀲𑀬𑀁𑀓𑀢𑀁 𑀦𑀸𑀫𑀭𑀽𑀧𑀁, 𑀧𑀭𑀁𑀓𑀢𑀁 𑀦𑀸𑀫𑀭𑀽𑀧𑀁, 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀦𑀸𑀫𑀭𑀽𑀧𑀁, 𑀉𑀤𑀸𑀳𑀼 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀦𑀸𑀫𑀭𑀽𑀧’’𑀦𑁆𑀢𑀺? ‘‘𑀦 𑀔𑁄, 𑀆𑀯𑀼𑀲𑁄 𑀓𑁄𑀝𑁆𑀞𑀺𑀓, 𑀲𑀬𑀁𑀓𑀢𑀁 𑀦𑀸𑀫𑀭𑀽𑀧𑀁, 𑀦 𑀧𑀭𑀁𑀓𑀢𑀁 𑀦𑀸𑀫𑀭𑀽𑀧𑀁, 𑀦 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀦𑀸𑀫𑀭𑀽𑀧𑀁, 𑀦𑀸𑀧𑀺 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁, 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀦𑀸𑀫𑀭𑀽𑀧𑀁. 𑀅𑀧𑀺 𑀘, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀲𑀬𑀗𑁆𑀓𑀢𑀁 𑀯𑀺𑀜𑁆𑀜𑀸𑀡𑀁, 𑀧𑀭𑀗𑁆𑀓𑀢𑀁 𑀯𑀺𑀜𑁆𑀜𑀸𑀡𑀁, 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀯𑀺𑀜𑁆𑀜𑀸𑀡𑀁, 𑀉𑀤𑀸𑀳𑀼 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺? ‘‘𑀦 𑀔𑁄, 𑀆𑀯𑀼𑀲𑁄 𑀓𑁄𑀝𑁆𑀞𑀺𑀓, 𑀲𑀬𑀁𑀓𑀢𑀁 𑀯𑀺𑀜𑁆𑀜𑀸𑀡𑀁, 𑀦 𑀧𑀭𑀁𑀓𑀢𑀁 𑀯𑀺𑀜𑁆𑀜𑀸𑀡𑀁 𑀦 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀯𑀺𑀜𑁆𑀜𑀸𑀡𑀁, 𑀦𑀸𑀧𑀺 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀯𑀺𑀜𑁆𑀜𑀸𑀡𑀁. 𑀅𑀧𑀺 𑀘, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺.

‘‘𑀇𑀤𑀸𑀦𑁂𑀯 𑀔𑁄 𑀫𑀬𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 𑀏𑀯𑀁 𑀆𑀚𑀸𑀦𑀸𑀫 𑁋 ‘𑀦 𑀔𑁆𑀯𑀸𑀯𑀼𑀲𑁄 𑀓𑁄𑀝𑁆𑀞𑀺𑀓, 𑀲𑀬𑀁𑀓𑀢𑀁 𑀦𑀸𑀫𑀭𑀽𑀧𑀁, 𑀦 𑀧𑀭𑀁𑀓𑀢𑀁 𑀦𑀸𑀫𑀭𑀽𑀧𑀁, 𑀦 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀦𑀸𑀫𑀭𑀽𑀧𑀁, 𑀦𑀸𑀧𑀺 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀦𑀸𑀫𑀭𑀽𑀧𑀁. 𑀅𑀧𑀺 𑀘, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’’𑀦𑁆𑀢𑀺.

‘‘𑀇𑀤𑀸𑀦𑁂𑀯 𑀘 𑀧𑀦 𑀫𑀬𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 𑀏𑀯𑀁 𑀆𑀚𑀸𑀦𑀸𑀫 𑁋 ‘𑀦 𑀔𑁆𑀯𑀸𑀯𑀼𑀲𑁄 𑀓𑁄𑀝𑁆𑀞𑀺𑀓, 𑀲𑀬𑀁𑀓𑀢𑀁 𑀯𑀺𑀜𑁆𑀜𑀸𑀡𑀁, 𑀦 𑀧𑀭𑀁𑀓𑀢𑀁 𑀯𑀺𑀜𑁆𑀜𑀸𑀡𑀁, 𑀦 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀯𑀺𑀜𑁆𑀜𑀸𑀡𑀁, 𑀦𑀸𑀧𑀺 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀯𑀺𑀜𑁆𑀜𑀸𑀡𑀁. 𑀅𑀧𑀺 𑀘, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’’𑀦𑁆𑀢𑀺.

‘‘𑀬𑀣𑀸 𑀓𑀣𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺? ‘‘𑀢𑁂𑀦𑀳𑀸𑀯𑀼𑀲𑁄, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺. 𑀉𑀧𑀫𑀸𑀬𑀧𑀺𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀤𑁆𑀯𑁂 𑀦𑀴𑀓𑀮𑀸𑀧𑀺𑀬𑁄 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑁂𑀬𑁆𑀬𑀼𑀁. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁; 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁; 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁; 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀢𑀸𑀲𑀁 𑀘𑁂, 𑀆𑀯𑀼𑀲𑁄, 𑀦𑀴𑀓𑀮𑀸𑀧𑀻𑀦𑀁 𑀏𑀓𑀁 𑀆𑀓𑀟𑁆𑀠𑁂𑀬𑁆𑀬, 𑀏𑀓𑀸 𑀧𑀧𑀢𑁂𑀬𑁆𑀬; 𑀅𑀧𑀭𑀁 𑀘𑁂 𑀆𑀓𑀟𑁆𑀠𑁂𑀬𑁆𑀬, 𑀅𑀧𑀭𑀸 𑀧𑀧𑀢𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄; 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄; 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄; 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺. ‘‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢; 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢! 𑀬𑀸𑀯𑀲𑀼𑀪𑀸𑀲𑀺𑀢𑀁 𑀘𑀺𑀤𑀁 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦. 𑀇𑀤𑀜𑁆𑀘 𑀧𑀦 𑀫𑀬𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 𑀇𑀫𑁂𑀳𑀺 𑀙𑀢𑁆𑀢𑀺𑀁𑀲𑀸𑀬 𑀯𑀢𑁆𑀣𑀽𑀳𑀺 𑀅𑀦𑀼𑀫𑁄𑀤𑀸𑀫 𑁋 ‘𑀚𑀭𑀸𑀫𑀭𑀡𑀲𑁆𑀲 𑀘𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀥𑀫𑁆𑀫𑀓𑀣𑀺𑀓𑁄 𑀪𑀺𑀓𑁆𑀔𑀽𑀢𑀺 𑀅𑀮𑀁 𑀯𑀘𑀦𑀸𑀬. 𑀚𑀭𑀸𑀫𑀭𑀡𑀲𑁆𑀲 𑀘𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀽𑀢𑀺 𑀅𑀮𑀁 𑀯𑀘𑀦𑀸𑀬. 𑀚𑀭𑀸𑀫𑀭𑀡𑀲𑁆𑀲 𑀘𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀪𑀺𑀓𑁆𑀔𑀽𑀢𑀺 𑀅𑀮𑀁 𑀯𑀘𑀦𑀸𑀬. 𑀚𑀸𑀢𑀺𑀬𑀸 𑀘𑁂… 𑀪𑀯𑀲𑁆𑀲 𑀘𑁂… 𑀉𑀧𑀸𑀤𑀸𑀦𑀲𑁆𑀲 𑀘𑁂… 𑀢𑀡𑁆𑀳𑀸𑀬 𑀘𑁂… 𑀯𑁂𑀤𑀦𑀸𑀬 𑀘𑁂… 𑀨𑀲𑁆𑀲𑀲𑁆𑀲 𑀘𑁂… 𑀲𑀴𑀸𑀬𑀢𑀦𑀲𑁆𑀲 𑀘𑁂… 𑀦𑀸𑀫𑀭𑀽𑀧𑀲𑁆𑀲 𑀘𑁂… 𑀯𑀺𑀜𑁆𑀜𑀸𑀡𑀲𑁆𑀲 𑀘𑁂… 𑀲𑀗𑁆𑀔𑀸𑀭𑀸𑀦𑀁 𑀘𑁂… 𑀅𑀯𑀺𑀚𑁆𑀚𑀸𑀬 𑀘𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀥𑀫𑁆𑀫𑀓𑀣𑀺𑀓𑁄 𑀪𑀺𑀓𑁆𑀔𑀽𑀢𑀺 𑀅𑀮𑀁 𑀯𑀘𑀦𑀸𑀬. 𑀅𑀯𑀺𑀚𑁆𑀚𑀸𑀬 𑀘𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀽𑀢𑀺 𑀅𑀮𑀁 𑀯𑀘𑀦𑀸𑀬. 𑀅𑀯𑀺𑀚𑁆𑀚𑀸𑀬 𑀘𑁂, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀪𑀺𑀓𑁆𑀔𑀽𑀢𑀺 𑀅𑀮𑀁 𑀯𑀘𑀦𑀸𑀬𑀸’’’𑀢𑀺. 𑀲𑀢𑁆𑀢𑀫𑀁.

𑁮. 𑀓𑁄𑀲𑀫𑁆𑀩𑀺𑀲𑀼𑀢𑁆𑀢𑀁

𑁬𑁮. 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀘 𑀫𑀼𑀲𑀺𑀮𑁄 [𑀫𑀽𑀲𑀺𑀮𑁄 (𑀲𑀻.), 𑀫𑀼𑀲𑀻𑀮𑁄 (𑀧𑀻.)] 𑀆𑀬𑀲𑁆𑀫𑀸 𑀘 𑀧𑀯𑀺𑀝𑁆𑀞𑁄 [𑀲𑀯𑀺𑀝𑁆𑀞𑁄 (𑀲𑀻. 𑀧𑀻.)] 𑀆𑀬𑀲𑁆𑀫𑀸 𑀘 𑀦𑀸𑀭𑀤𑁄 𑀆𑀬𑀲𑁆𑀫𑀸 𑀘 𑀆𑀦𑀦𑁆𑀤𑁄 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀦𑁆𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀯𑀺𑀝𑁆𑀞𑁄 𑀆𑀬𑀲𑁆𑀫𑀦𑁆𑀢𑀁 𑀫𑀼𑀲𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀫𑀼𑀲𑀺𑀮, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀢𑁆𑀣𑀸𑀬𑀲𑁆𑀫𑀢𑁄 𑀫𑀼𑀲𑀺𑀮𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀁 𑁋 ‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’’𑀦𑁆𑀢𑀺? ‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀧𑀯𑀺𑀝𑁆𑀞, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀳𑀫𑁂𑀢𑀁 𑀚𑀸𑀦𑀸𑀫𑀺 𑀅𑀳𑀫𑁂𑀢𑀁 𑀧𑀲𑁆𑀲𑀸𑀫𑀺 𑁋 ‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’’𑀦𑁆𑀢𑀺.

‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀫𑀼𑀲𑀺𑀮, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀢𑁆𑀣𑀸𑀬𑀲𑁆𑀫𑀢𑁄 𑀫𑀼𑀲𑀺𑀮𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀁 𑁋 ‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻𑀢𑀺…𑀧𑁂… 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄𑀢𑀺… 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀦𑁆𑀢𑀺… 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀢𑀺… 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀢𑀺… 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺… 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺… 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺… 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺… 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’’𑀢𑀺? ‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀧𑀯𑀺𑀝𑁆𑀞, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀳𑀫𑁂𑀢𑀁 𑀚𑀸𑀦𑀸𑀫𑀺 𑀅𑀳𑀫𑁂𑀢𑀁 𑀧𑀲𑁆𑀲𑀸𑀫𑀺 𑁋 ‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’’𑀢𑀺.

‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀫𑀼𑀲𑀺𑀮, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀢𑁆𑀣𑀸𑀬𑀲𑁆𑀫𑀢𑁄 𑀫𑀼𑀲𑀺𑀮𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀁 𑁋 ‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’’𑀢𑀺? ‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀧𑀯𑀺𑀝𑁆𑀞, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀳𑀫𑁂𑀢𑀁 𑀚𑀸𑀦𑀸𑀫𑀺 𑀅𑀳𑀫𑁂𑀢𑀁 𑀧𑀲𑁆𑀲𑀸𑀫𑀺 𑁋 ‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’’𑀢𑀺.

‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀫𑀼𑀲𑀺𑀮, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀢𑁆𑀣𑀸𑀬𑀲𑁆𑀫𑀢𑁄 𑀫𑀼𑀲𑀺𑀮𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀁 𑁋 ‘𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄𑀢𑀺…𑀧𑁂… 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄𑀢𑀺… 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄𑀢𑀺… 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄𑀢𑀺… 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄𑀢𑀺… 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄𑀢𑀺… 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄𑀢𑀺… 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄𑀢𑀺 … 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄𑀢𑀺… 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’’𑀢𑀺? ‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀧𑀯𑀺𑀝𑁆𑀞, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀳𑀫𑁂𑀢𑀁 𑀚𑀸𑀦𑀸𑀫𑀺 𑀅𑀳𑀫𑁂𑀢𑀁 𑀧𑀲𑁆𑀲𑀸𑀫𑀺 𑁋 ‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’’𑀢𑀺.

‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀫𑀼𑀲𑀺𑀮, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀢𑁆𑀣𑀸𑀬𑀲𑁆𑀫𑀢𑁄 𑀫𑀼𑀲𑀺𑀮𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀁 𑁋 ‘𑀪𑀯𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’’𑀦𑁆𑀢𑀺? ‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀧𑀯𑀺𑀝𑁆𑀞, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀳𑀫𑁂𑀢𑀁 𑀚𑀸𑀦𑀸𑀫𑀺 𑀅𑀳𑀫𑁂𑀢𑀁 𑀧𑀲𑁆𑀲𑀸𑀫𑀺 𑁋 ‘𑀪𑀯𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’’𑀦𑁆𑀢𑀺.

‘‘𑀢𑁂𑀦𑀳𑀸𑀬𑀲𑁆𑀫𑀸 𑀫𑀼𑀲𑀺𑀮𑁄 𑀅𑀭𑀳𑀁 𑀔𑀻𑀡𑀸𑀲𑀯𑁄’’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀫𑀼𑀲𑀺𑀮𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀭𑀤𑁄 𑀆𑀬𑀲𑁆𑀫𑀦𑁆𑀢𑀁 𑀧𑀯𑀺𑀝𑁆𑀞𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀸𑀯𑀼𑀲𑁄 𑀧𑀯𑀺𑀝𑁆𑀞, 𑀅𑀳𑀁 𑀏𑀢𑀁 𑀧𑀜𑁆𑀳𑀁 𑀮𑀪𑁂𑀬𑁆𑀬𑀁. 𑀫𑀁 𑀏𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙. 𑀅𑀳𑀁 𑀢𑁂 𑀏𑀢𑀁 𑀧𑀜𑁆𑀳𑀁 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀮𑀪𑀢𑀸𑀬𑀲𑁆𑀫𑀸 𑀦𑀸𑀭𑀤𑁄 𑀏𑀢𑀁 𑀧𑀜𑁆𑀳𑀁. 𑀧𑀼𑀘𑁆𑀙𑀸𑀫𑀳𑀁 𑀆𑀬𑀲𑁆𑀫𑀦𑁆𑀢𑀁 𑀦𑀸𑀭𑀤𑀁 𑀏𑀢𑀁 𑀧𑀜𑁆𑀳𑀁. 𑀩𑁆𑀬𑀸𑀓𑀭𑁄𑀢𑀼 𑀘 𑀫𑁂 𑀆𑀬𑀲𑁆𑀫𑀸 𑀦𑀸𑀭𑀤𑁄 𑀏𑀢𑀁 𑀧𑀜𑁆𑀳𑀁’’.

‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀦𑀸𑀭𑀤, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀢𑁆𑀣𑀸𑀬𑀲𑁆𑀫𑀢𑁄 𑀦𑀸𑀭𑀤𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀁 𑁋 ‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’’𑀦𑁆𑀢𑀺? ‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀧𑀯𑀺𑀝𑁆𑀞, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀳𑀫𑁂𑀢𑀁 𑀚𑀸𑀦𑀸𑀫𑀺 𑀅𑀳𑀫𑁂𑀢𑀁 𑀧𑀲𑁆𑀲𑀸𑀫𑀺 𑁋 ‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’’𑀦𑁆𑀢𑀺.

‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀦𑀸𑀭𑀤, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀢𑁆𑀣𑀸𑀬𑀲𑁆𑀫𑀢𑁄 𑀦𑀸𑀭𑀤𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀁 𑁋 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺…𑀧𑁂… 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺? ‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀧𑀯𑀺𑀝𑁆𑀞, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀳𑀫𑁂𑀢𑀁 𑀚𑀸𑀦𑀸𑀫𑀺 𑀅𑀳𑀫𑁂𑀢𑀁 𑀧𑀲𑁆𑀲𑀸𑀫𑀺 𑁋 ‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’’𑀢𑀺.

‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀦𑀸𑀭𑀤, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀢𑁆𑀣𑀸𑀬𑀲𑁆𑀫𑀢𑁄 𑀦𑀸𑀭𑀤𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀁 𑁋 ‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’’𑀢𑀺? ‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀧𑀯𑀺𑀝𑁆𑀞, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀳𑀫𑁂𑀢𑀁 𑀚𑀸𑀦𑀸𑀫𑀺 𑀅𑀳𑀫𑁂𑀢𑀁 𑀧𑀲𑁆𑀲𑀸𑀫𑀺 𑁋 ‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’’𑀢𑀺.

‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀦𑀸𑀭𑀤, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀢𑁆𑀣𑀸𑀬𑀲𑁆𑀫𑀢𑁄 𑀦𑀸𑀭𑀤𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀁 𑁋 ‘𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄𑀢𑀺…𑀧𑁂… 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’’𑀢𑀺? ‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀧𑀯𑀺𑀝𑁆𑀞, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀳𑀫𑁂𑀢𑀁 𑀚𑀸𑀦𑀸𑀫𑀺 𑀅𑀳𑀫𑁂𑀢𑀁 𑀧𑀲𑁆𑀲𑀸𑀫𑀺 𑁋 ‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’’𑀢𑀺.

‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀦𑀸𑀭𑀤, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀢𑁆𑀣𑀸𑀬𑀲𑁆𑀫𑀢𑁄 𑀦𑀸𑀭𑀤𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀁 𑁋 ‘𑀪𑀯𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’’𑀦𑁆𑀢𑀺? ‘‘𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀧𑀯𑀺𑀝𑁆𑀞, 𑀲𑀤𑁆𑀥𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀅𑀳𑀫𑁂𑀢𑀁 𑀚𑀸𑀦𑀸𑀫𑀺 𑀅𑀳𑀫𑁂𑀢𑀁 𑀧𑀲𑁆𑀲𑀸𑀫𑀺 𑁋 ‘𑀪𑀯𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’’𑀦𑁆𑀢𑀺.

‘‘𑀢𑁂𑀦𑀳𑀸𑀬𑀲𑁆𑀫𑀸 𑀦𑀸𑀭𑀤𑁄 𑀅𑀭𑀳𑀁 𑀔𑀻𑀡𑀸𑀲𑀯𑁄’’𑀢𑀺? ‘‘‘𑀪𑀯𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’𑀦𑁆𑀢𑀺 𑀔𑁄 𑀫𑁂, 𑀆𑀯𑀼𑀲𑁄, 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀁, 𑀦 𑀘𑀫𑁆𑀳𑀺 𑀅𑀭𑀳𑀁 𑀔𑀻𑀡𑀸𑀲𑀯𑁄. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀓𑀦𑁆𑀢𑀸𑀭𑀫𑀕𑁆𑀕𑁂 𑀉𑀤𑀧𑀸𑀦𑁄. 𑀢𑀢𑁆𑀭 𑀦𑁂𑀯𑀲𑁆𑀲 𑀭𑀚𑁆𑀚𑀼 𑀦 𑀉𑀤𑀓𑀯𑀸𑀭𑀓𑁄. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀖𑀫𑁆𑀫𑀸𑀪𑀺𑀢𑀢𑁆𑀢𑁄 𑀖𑀫𑁆𑀫𑀧𑀭𑁂𑀢𑁄 𑀓𑀺𑀮𑀦𑁆𑀢𑁄 𑀢𑀲𑀺𑀢𑁄 𑀧𑀺𑀧𑀸𑀲𑀺𑀢𑁄, 𑀲𑁄 𑀢𑀁 𑀉𑀤𑀧𑀸𑀦𑀁 𑀑𑀮𑁄𑀓𑁂𑀬𑁆𑀬. 𑀢𑀲𑁆𑀲 ‘𑀉𑀤𑀓’𑀦𑁆𑀢𑀺 𑀳𑀺 𑀔𑁄 𑀜𑀸𑀡𑀁 𑀅𑀲𑁆𑀲, 𑀦 𑀘 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, ‘𑀪𑀯𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀁, 𑀦 𑀘𑀫𑁆𑀳𑀺 𑀅𑀭𑀳𑀁 𑀔𑀻𑀡𑀸𑀲𑀯𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀧𑀯𑀺𑀝𑁆𑀞𑀁 𑀏𑀢𑀤𑀯𑁄𑀘 𑁋 ‘‘𑀏𑀯𑀁𑀯𑀸𑀤𑀻 [𑀏𑀯𑀁𑀯𑀸𑀤𑀺𑀁 (?)] 𑀢𑁆𑀯𑀁, 𑀆𑀯𑀼𑀲𑁄 𑀧𑀯𑀺𑀝𑁆𑀞, 𑀆𑀬𑀲𑁆𑀫𑀦𑁆𑀢𑀁 𑀦𑀸𑀭𑀤𑀁 𑀓𑀺𑀁 𑀯𑀤𑁂𑀲𑀻’’𑀢𑀺? ‘‘𑀏𑀯𑀁𑀯𑀸𑀤𑀸𑀳𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀆𑀬𑀲𑁆𑀫𑀦𑁆𑀢𑀁 𑀦𑀸𑀭𑀤𑀁 𑀦 𑀓𑀺𑀜𑁆𑀘𑀺 𑀯𑀤𑀸𑀫𑀺 𑀅𑀜𑁆𑀜𑀢𑁆𑀭 𑀓𑀮𑁆𑀬𑀸𑀡𑀸 𑀅𑀜𑁆𑀜𑀢𑁆𑀭 𑀓𑀼𑀲𑀮𑀸’’𑀢𑀺. 𑀅𑀝𑁆𑀞𑀫𑀁.

𑁯. 𑀉𑀧𑀬𑀦𑁆𑀢𑀺𑀲𑀼𑀢𑁆𑀢𑀁

𑁬𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄…𑀧𑁂… ‘‘𑀫𑀳𑀸𑀲𑀫𑀼𑀤𑁆𑀤𑁄, 𑀪𑀺𑀓𑁆𑀔𑀯𑁂, 𑀉𑀧𑀬𑀦𑁆𑀢𑁄 𑀫𑀳𑀸𑀦𑀤𑀺𑀬𑁄 𑀉𑀧𑀬𑀸𑀧𑁂𑀢𑀺, 𑀫𑀳𑀸𑀦𑀤𑀺𑀬𑁄 𑀉𑀧𑀬𑀦𑁆𑀢𑀺𑀬𑁄 𑀓𑀼𑀦𑁆𑀦𑀤𑀺𑀬𑁄 𑀉𑀧𑀬𑀸𑀧𑁂𑀦𑁆𑀢𑀺, 𑀓𑀼𑀦𑁆𑀦𑀤𑀺𑀬𑁄 𑀉𑀧𑀬𑀦𑁆𑀢𑀺𑀬𑁄 𑀫𑀳𑀸𑀲𑁄𑀩𑁆𑀪𑁂 𑀉𑀧𑀬𑀸𑀧𑁂𑀦𑁆𑀢𑀺, 𑀫𑀳𑀸𑀲𑁄𑀩𑁆𑀪𑀸 𑀉𑀧𑀬𑀦𑁆𑀢𑀸 𑀓𑀼𑀲𑁄𑀩𑁆𑀪𑁂 𑀉𑀧𑀬𑀸𑀧𑁂𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸 𑀉𑀧𑀬𑀦𑁆𑀢𑀻 𑀲𑀗𑁆𑀔𑀸𑀭𑁂 𑀉𑀧𑀬𑀸𑀧𑁂𑀢𑀺, 𑀲𑀗𑁆𑀔𑀸𑀭𑀸 𑀉𑀧𑀬𑀦𑁆𑀢𑀸 𑀯𑀺𑀜𑁆𑀜𑀸𑀡𑀁 𑀉𑀧𑀬𑀸𑀧𑁂𑀦𑁆𑀢𑀺, 𑀯𑀺𑀜𑁆𑀜𑀸𑀡𑀁 𑀉𑀧𑀬𑀦𑁆𑀢𑀁 𑀦𑀸𑀫𑀭𑀽𑀧𑀁 𑀉𑀧𑀬𑀸𑀧𑁂𑀢𑀺, 𑀦𑀸𑀫𑀭𑀽𑀧𑀁 𑀉𑀧𑀬𑀦𑁆𑀢𑀁 𑀲𑀴𑀸𑀬𑀢𑀦𑀁 𑀉𑀧𑀬𑀸𑀧𑁂𑀢𑀺, 𑀲𑀴𑀸𑀬𑀢𑀦𑀁 𑀉𑀧𑀬𑀦𑁆𑀢𑀁 𑀨𑀲𑁆𑀲𑀁 𑀉𑀧𑀬𑀸𑀧𑁂𑀢𑀺, 𑀨𑀲𑁆𑀲𑁄 𑀉𑀧𑀬𑀦𑁆𑀢𑁄 𑀯𑁂𑀤𑀦𑀁 𑀉𑀧𑀬𑀸𑀧𑁂𑀢𑀺, 𑀯𑁂𑀤𑀦𑀸 𑀉𑀧𑀬𑀦𑁆𑀢𑀻 𑀢𑀡𑁆𑀳𑀁 𑀉𑀧𑀬𑀸𑀧𑁂𑀢𑀺, 𑀢𑀡𑁆𑀳𑀸 𑀉𑀧𑀬𑀦𑁆𑀢𑀻 𑀉𑀧𑀸𑀤𑀸𑀦𑀁 𑀉𑀧𑀬𑀸𑀧𑁂𑀢𑀺, 𑀉𑀧𑀸𑀤𑀸𑀦𑀁 𑀉𑀧𑀬𑀦𑁆𑀢𑀁 𑀪𑀯𑀁 𑀉𑀧𑀬𑀸𑀧𑁂𑀢𑀺, 𑀪𑀯𑁄 𑀉𑀧𑀬𑀦𑁆𑀢𑁄 𑀚𑀸𑀢𑀺𑀁 𑀉𑀧𑀬𑀸𑀧𑁂𑀢𑀺, 𑀚𑀸𑀢𑀺 𑀉𑀧𑀬𑀦𑁆𑀢𑀻 𑀚𑀭𑀸𑀫𑀭𑀡𑀁 𑀉𑀧𑀬𑀸𑀧𑁂𑀢𑀺.

‘‘𑀫𑀳𑀸𑀲𑀫𑀼𑀤𑁆𑀤𑁄, 𑀪𑀺𑀓𑁆𑀔𑀯𑁂, 𑀅𑀧𑀬𑀦𑁆𑀢𑁄 𑀫𑀳𑀸𑀦𑀤𑀺𑀬𑁄 𑀅𑀧𑀬𑀸𑀧𑁂𑀢𑀺, 𑀫𑀳𑀸𑀦𑀤𑀺𑀬𑁄 𑀅𑀧𑀬𑀦𑁆𑀢𑀺𑀬𑁄 𑀓𑀼𑀦𑁆𑀦𑀤𑀺𑀬𑁄 𑀅𑀧𑀬𑀸𑀧𑁂𑀦𑁆𑀢𑀺, 𑀓𑀼𑀦𑁆𑀦𑀤𑀺𑀬𑁄 𑀅𑀧𑀬𑀦𑁆𑀢𑀺𑀬𑁄 𑀫𑀳𑀸𑀲𑁄𑀩𑁆𑀪𑁂 𑀅𑀧𑀬𑀸𑀧𑁂𑀦𑁆𑀢𑀺, 𑀫𑀳𑀸𑀲𑁄𑀩𑁆𑀪𑀸 𑀅𑀧𑀬𑀦𑁆𑀢𑀸 𑀓𑀼𑀲𑁄𑀩𑁆𑀪𑁂 𑀅𑀧𑀬𑀸𑀧𑁂𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸 𑀅𑀧𑀬𑀦𑁆𑀢𑀻 𑀲𑀗𑁆𑀔𑀸𑀭𑁂 𑀅𑀧𑀬𑀸𑀧𑁂𑀢𑀺, 𑀲𑀗𑁆𑀔𑀸𑀭𑀸 𑀅𑀧𑀬𑀦𑁆𑀢𑀸 𑀯𑀺𑀜𑁆𑀜𑀸𑀡𑀁 𑀅𑀧𑀬𑀸𑀧𑁂𑀦𑁆𑀢𑀺, 𑀯𑀺𑀜𑁆𑀜𑀸𑀡𑀁 𑀅𑀧𑀬𑀦𑁆𑀢𑀁 𑀦𑀸𑀫𑀭𑀽𑀧𑀁 𑀅𑀧𑀬𑀸𑀧𑁂𑀢𑀺, 𑀦𑀸𑀫𑀭𑀽𑀧𑀁 𑀅𑀧𑀬𑀦𑁆𑀢𑀁 𑀲𑀴𑀸𑀬𑀢𑀦𑀁 𑀅𑀧𑀬𑀸𑀧𑁂𑀢𑀺, 𑀲𑀴𑀸𑀬𑀢𑀦𑀁 𑀅𑀧𑀬𑀦𑁆𑀢𑀁 𑀨𑀲𑁆𑀲𑀁 𑀅𑀧𑀬𑀸𑀧𑁂𑀢𑀺, 𑀨𑀲𑁆𑀲𑁄 𑀅𑀧𑀬𑀦𑁆𑀢𑁄 𑀯𑁂𑀤𑀦𑀁 𑀅𑀧𑀬𑀸𑀧𑁂𑀢𑀺, 𑀯𑁂𑀤𑀦𑀸 𑀅𑀧𑀬𑀦𑁆𑀢𑀻 𑀢𑀡𑁆𑀳𑀁 𑀅𑀧𑀬𑀸𑀧𑁂𑀢𑀺, 𑀢𑀡𑁆𑀳𑀸 𑀅𑀧𑀬𑀦𑁆𑀢𑀻 𑀉𑀧𑀸𑀤𑀸𑀦𑀁 𑀅𑀧𑀬𑀸𑀧𑁂𑀢𑀺, 𑀉𑀧𑀸𑀤𑀸𑀦𑀁 𑀅𑀧𑀬𑀦𑁆𑀢𑀁 𑀪𑀯𑀁 𑀅𑀧𑀬𑀸𑀧𑁂𑀢𑀺, 𑀪𑀯𑁄 𑀅𑀧𑀬𑀦𑁆𑀢𑁄 𑀚𑀸𑀢𑀺𑀁 𑀅𑀧𑀬𑀸𑀧𑁂𑀢𑀺, 𑀚𑀸𑀢𑀺 𑀅𑀧𑀬𑀦𑁆𑀢𑀻 𑀚𑀭𑀸𑀫𑀭𑀡𑀁 𑀅𑀧𑀬𑀸𑀧𑁂𑀢𑀻’’𑀢𑀺. 𑀦𑀯𑀫𑀁.

𑁧𑁦. 𑀲𑀼𑀲𑀺𑀫𑀲𑀼𑀢𑁆𑀢𑀁

𑁭𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭-𑀧𑀺𑀡𑁆𑀟𑀧𑀸𑀢-𑀲𑁂𑀦𑀸𑀲𑀦-𑀕𑀺𑀮𑀸𑀦𑀧𑁆𑀧𑀘𑁆𑀘𑀬-𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭-𑀧𑀺𑀡𑁆𑀟𑀧𑀸𑀢-𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬-𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀦 𑀧𑀭𑀺𑀩𑁆𑀩𑀸𑀚𑀓𑀸 𑀅𑀲𑀓𑁆𑀓𑀢𑀸 𑀳𑁄𑀦𑁆𑀢𑀺 𑀅𑀕𑀭𑀼𑀓𑀢𑀸 𑀅𑀫𑀸𑀦𑀺𑀢𑀸 𑀅𑀧𑀽𑀚𑀺𑀢𑀸 𑀅𑀦𑀧𑀘𑀺𑀢𑀸, 𑀦 𑀮𑀸𑀪𑀺𑀦𑁄 𑀘𑀻𑀯𑀭-𑀧𑀺𑀡𑁆𑀟𑀧𑀸𑀢-𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬-𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀲𑀺𑀫𑁄 [𑀲𑀼𑀲𑀻𑀫𑁄 (𑀲𑀻. 𑀓.)] 𑀧𑀭𑀺𑀩𑁆𑀩𑀸𑀚𑀓𑁄 𑀭𑀸𑀚𑀕𑀳𑁂 𑀧𑀝𑀺𑀯𑀲𑀢𑀺 𑀫𑀳𑀢𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸𑀬 𑀲𑀤𑁆𑀥𑀺𑀁. 𑀅𑀣 𑀔𑁄 𑀲𑀼𑀲𑀺𑀫𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀧𑀭𑀺𑀲𑀸 𑀲𑀼𑀲𑀺𑀫𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀏𑀳𑀺 𑀢𑁆𑀯𑀁, 𑀆𑀯𑀼𑀲𑁄 𑀲𑀼𑀲𑀺𑀫, 𑀲𑀫𑀡𑁂 𑀕𑁄𑀢𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭. 𑀢𑁆𑀯𑀁 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀫𑁆𑀳𑁂 𑀯𑀸𑀘𑁂𑀬𑁆𑀬𑀸𑀲𑀺 [𑀯𑀸𑀘𑁂𑀲𑁆𑀲𑀲𑀺 (𑀧𑀻. 𑀓.)]. 𑀢𑀁 𑀫𑀬𑀁 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀕𑀺𑀳𑀻𑀦𑀁 𑀪𑀸𑀲𑀺𑀲𑁆𑀲𑀸𑀫. 𑀏𑀯𑀁 𑀫𑀬𑀫𑁆𑀧𑀺 𑀲𑀓𑁆𑀓𑀢𑀸 𑀪𑀯𑀺𑀲𑁆𑀲𑀸𑀫 𑀕𑀭𑀼𑀓𑀢𑀸 𑀫𑀸𑀦𑀺𑀢𑀸 𑀧𑀽𑀚𑀺𑀢𑀸 𑀅𑀧𑀘𑀺𑀢𑀸 𑀮𑀸𑀪𑀺𑀦𑁄 𑀘𑀻𑀯𑀭-𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦-𑀕𑀺𑀮𑀸𑀦𑀧𑁆𑀧𑀘𑁆𑀘𑀬-𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀲𑀼𑀲𑀺𑀫𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀓𑀸𑀬 𑀧𑀭𑀺𑀲𑀸𑀬 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀼𑀲𑀺𑀫𑁄 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀼𑀲𑀺𑀫𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀲𑀼𑀲𑀺𑀫𑁄 𑀧𑀭𑀺𑀩𑁆𑀩𑀸𑀚𑀓𑁄 𑀏𑀯𑀫𑀸𑀳 𑁋 ‘𑀇𑀘𑁆𑀙𑀸𑀫𑀳𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼’’𑀦𑁆𑀢𑀺. ‘‘𑀢𑁂𑀦𑀳𑀸𑀦𑀦𑁆𑀤, 𑀲𑀼𑀲𑀺𑀫𑀁 𑀧𑀩𑁆𑀩𑀸𑀚𑁂𑀣𑀸’’𑀢𑀺. 𑀅𑀮𑀢𑁆𑀣 𑀔𑁄 𑀲𑀼𑀲𑀺𑀫𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸 𑀳𑁄𑀢𑀺 𑁋 ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀫𑀸’’𑀢𑀺. 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀲𑀼𑀲𑀺𑀫𑁄 𑁋 ‘‘𑀲𑀫𑁆𑀩𑀳𑀼𑀮𑁂𑀳𑀺 𑀓𑀺𑀭 𑀪𑀺𑀓𑁆𑀔𑀽𑀳𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀫𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀲𑀺𑀫𑁄 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀼𑀲𑀺𑀫𑁄 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀲𑀘𑁆𑀘𑀁 𑀓𑀺𑀭𑀸𑀬𑀲𑁆𑀫𑀦𑁆𑀢𑁂𑀳𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸 𑁋 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀫𑀸’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺.

‘‘𑀅𑀧𑀺 𑀧𑀦 [𑀅𑀧𑀺 𑀦𑀼 (𑀲𑀻. 𑀲𑁆𑀬𑀸. 𑀓𑀁.) 𑀏𑀯𑀫𑀼𑀧𑀭𑀺𑀧𑀺] 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀣 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀣, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀣; 𑀆𑀯𑀺𑀪𑀸𑀯𑀁, 𑀢𑀺𑀭𑁄𑀪𑀸𑀯𑀁, 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑀸 𑀕𑀘𑁆𑀙𑀣, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂; 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀣, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂; 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 𑀕𑀘𑁆𑀙𑀣, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁; 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀣, 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄; 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀺𑀫𑀲𑀣 𑀧𑀭𑀺𑀫𑀚𑁆𑀚𑀣, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’.

‘‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀉𑀪𑁄 𑀲𑀤𑁆𑀤𑁂 𑀲𑀼𑀡𑀸𑀣 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’.

‘‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀣 𑁋 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀯𑀻𑀢𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀯𑀻𑀢𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀲𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 𑀲𑀤𑁄𑀲𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀯𑀻𑀢𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 𑀯𑀻𑀢𑀤𑁄𑀲𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀲𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 𑀲𑀫𑁄𑀳𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀯𑀻𑀢𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 𑀯𑀻𑀢𑀫𑁄𑀳𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀲𑀁𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀲𑀁𑀔𑀺𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀯𑀺𑀓𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 𑀫𑀳𑀕𑁆𑀕𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀅𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀫𑀳𑀕𑁆𑀕𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀲𑀉𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 𑀲𑀉𑀢𑁆𑀢𑀭𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀅𑀦𑀼𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 𑀅𑀦𑀼𑀢𑁆𑀢𑀭𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣; 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’.

‘‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀣, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀭𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺, 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’.

‘‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀣 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀣 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸; 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺, 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀣 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’.

‘‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀬𑁂 𑀢𑁂 𑀲𑀦𑁆𑀢𑀸 𑀯𑀺𑀫𑁄𑀓𑁆𑀔𑀸 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂 𑀆𑀭𑀼𑀧𑁆𑀧𑀸, 𑀢𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀆𑀯𑀼𑀲𑁄’’.

‘‘𑀏𑀢𑁆𑀣 𑀤𑀸𑀦𑀺 𑀆𑀬𑀲𑁆𑀫𑀦𑁆𑀢𑁄 𑀇𑀤𑀜𑁆𑀘 𑀯𑁂𑀬𑁆𑀬𑀸𑀓𑀭𑀡𑀁 𑀇𑀫𑁂𑀲𑀜𑁆𑀘 𑀥𑀫𑁆𑀫𑀸𑀦𑀁 𑀅𑀲𑀫𑀸𑀧𑀢𑁆𑀢𑀺; 𑀇𑀤𑀁 𑀦𑁄, 𑀆𑀯𑀼𑀲𑁄, 𑀓𑀣’’𑀦𑁆𑀢𑀺? ‘‘𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀸 𑀔𑁄 𑀫𑀬𑀁, 𑀆𑀯𑀼𑀲𑁄 𑀲𑀼𑀲𑀺𑀫𑀸’’𑀢𑀺.

‘‘𑀦 𑀔𑁆𑀯𑀸𑀳𑀁 𑀇𑀫𑀲𑁆𑀲 𑀆𑀬𑀲𑁆𑀫𑀦𑁆𑀢𑀸𑀦𑀁 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺. 𑀲𑀸𑀥𑀼 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀢𑀣𑀸 𑀪𑀸𑀲𑀦𑁆𑀢𑀼 𑀬𑀣𑀸𑀳𑀁 𑀇𑀫𑀲𑁆𑀲 𑀆𑀬𑀲𑁆𑀫𑀦𑁆𑀢𑀸𑀦𑀁 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑁂𑀬𑁆𑀬’’𑀦𑁆𑀢𑀺. ‘‘𑀆𑀚𑀸𑀦𑁂𑀬𑁆𑀬𑀸𑀲𑀺 𑀯𑀸 𑀢𑁆𑀯𑀁, 𑀆𑀯𑀼𑀲𑁄 𑀲𑀼𑀲𑀺𑀫, 𑀦 𑀯𑀸 𑀢𑁆𑀯𑀁 𑀆𑀚𑀸𑀦𑁂𑀬𑁆𑀬𑀸𑀲𑀺 𑀅𑀣 𑀔𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀸 𑀫𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀲𑀺𑀫𑁄 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀼𑀲𑀺𑀫𑁄 𑀬𑀸𑀯𑀢𑀓𑁄 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀅𑀳𑁄𑀲𑀺 𑀓𑀣𑀸𑀲𑀮𑁆𑀮𑀸𑀧𑁄 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. ‘‘𑀧𑀼𑀩𑁆𑀩𑁂 𑀔𑁄, 𑀲𑀼𑀲𑀺𑀫, 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀧𑀘𑁆𑀙𑀸 𑀦𑀺𑀩𑁆𑀩𑀸𑀦𑁂 𑀜𑀸𑀡’’𑀦𑁆𑀢𑀺.

‘‘𑀦 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀇𑀫𑀲𑁆𑀲 𑀪𑀕𑀯𑀢𑀸 [𑀪𑀕𑀯𑀢𑁄 (𑀧𑀻.)] 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺. 𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀢𑀣𑀸 𑀪𑀸𑀲𑀢𑀼 𑀬𑀣𑀸𑀳𑀁 𑀇𑀫𑀲𑁆𑀲 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑁂𑀬𑁆𑀬’’𑀦𑁆𑀢𑀺. ‘‘𑀆𑀚𑀸𑀦𑁂𑀬𑁆𑀬𑀸𑀲𑀺 𑀯𑀸 𑀢𑁆𑀯𑀁, 𑀲𑀼𑀲𑀺𑀫, 𑀦 𑀯𑀸 𑀢𑁆𑀯𑀁 𑀆𑀚𑀸𑀦𑁂𑀬𑁆𑀬𑀸𑀲𑀺, 𑀅𑀣 𑀔𑁄 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀦𑀺𑀩𑁆𑀩𑀸𑀦𑁂 𑀜𑀸𑀡𑀁’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀼𑀲𑀺𑀫, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑁂𑀤𑀦𑀸 𑀦𑀺𑀘𑁆𑀘𑀸 𑀯𑀸 𑀅𑀦𑀺𑀘𑁆𑀘𑀸 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀸, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀜𑁆𑀜𑀸 𑀦𑀺𑀘𑁆𑀘𑀸 𑀯𑀸 𑀅𑀦𑀺𑀘𑁆𑀘𑀸 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀸, 𑀪𑀦𑁆𑀢𑁂’’…𑀧𑁂… ‘‘𑀲𑀗𑁆𑀔𑀸𑀭𑀸 𑀦𑀺𑀘𑁆𑀘𑀸 𑀯𑀸 𑀅𑀦𑀺𑀘𑁆𑀘𑀸 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀸, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺? ‘‘𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑀢𑀺? ‘‘𑀤𑀼𑀓𑁆𑀔𑀁, 𑀪𑀦𑁆𑀢𑁂’’. ‘‘𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀢𑀲𑁆𑀫𑀸𑀢𑀺𑀳, 𑀲𑀼𑀲𑀺𑀫, 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 𑀦𑁂𑀢𑀁 𑀫𑀫 𑀦𑁂𑀲𑁄𑀳𑀫𑀲𑁆𑀫𑀺 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺; 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀬𑀸 𑀓𑀸𑀘𑀺 𑀯𑁂𑀤𑀦𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀸 𑀯𑀸 𑀲𑀼𑀔𑀼𑀫𑀸 𑀯𑀸 𑀳𑀻𑀦𑀸 𑀯𑀸 𑀧𑀡𑀻𑀢𑀸 𑀯𑀸 𑀬𑀸 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀸 𑀯𑁂𑀤𑀦𑀸 𑀦𑁂𑀢𑀁 𑀫𑀫 𑀦𑁂𑀲𑁄𑀳𑀫𑀲𑁆𑀫𑀺 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺; 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀬𑀸 𑀓𑀸𑀘𑀺 𑀲𑀜𑁆𑀜𑀸…𑀧𑁂… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀸 𑀯𑀸 𑀲𑀼𑀔𑀼𑀫𑀸 𑀯𑀸 𑀳𑀻𑀦𑀸 𑀯𑀸 𑀧𑀡𑀻𑀢𑀸 𑀯𑀸 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀦𑁂𑀢𑀁 𑀫𑀫 𑀦𑁂𑀲𑁄𑀳𑀫𑀲𑁆𑀫𑀺 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺; 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑀦𑁂𑀢𑀁 𑀫𑀫 𑀦𑁂𑀲𑁄𑀳𑀫𑀲𑁆𑀫𑀺 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺; 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁.

‘‘𑀏𑀯𑀁 𑀧𑀲𑁆𑀲𑀁, 𑀲𑀼𑀲𑀺𑀫, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀜𑁆𑀜𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀗𑁆𑀔𑀸𑀭𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑀺𑀜𑁆𑀜𑀸𑀡𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺.

‘‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺, 𑀲𑀼𑀲𑀺𑀫, 𑀧𑀲𑁆𑀲𑀲𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’𑀢𑀺, 𑀲𑀼𑀲𑀺𑀫, 𑀧𑀲𑁆𑀲𑀲𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’𑀢𑀺, 𑀲𑀼𑀲𑀺𑀫, 𑀧𑀲𑁆𑀲𑀲𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’𑀦𑁆𑀢𑀺, 𑀲𑀼𑀲𑀺𑀫, 𑀧𑀲𑁆𑀲𑀲𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀢𑀺… 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀢𑀺… 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺… 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺… 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺… 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺… 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺, 𑀲𑀼𑀲𑀺𑀫, 𑀧𑀲𑁆𑀲𑀲𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’𑀢𑀺, 𑀲𑀼𑀲𑀺𑀫, 𑀧𑀲𑁆𑀲𑀲𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘‘𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄’𑀢𑀺 𑀲𑀼𑀲𑀺𑀫, 𑀧𑀲𑁆𑀲𑀲𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄𑀢𑀺… 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄𑀢𑀺… 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄𑀢𑀺… 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄𑀢𑀺… 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄𑀢𑀺… 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄𑀢𑀺… 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄𑀢𑀺… 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄𑀢𑀺… 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺, 𑀲𑀼𑀲𑀺𑀫, 𑀧𑀲𑁆𑀲𑀲𑀻’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀅𑀧𑀺 𑀧𑀦 𑀢𑁆𑀯𑀁, 𑀲𑀼𑀲𑀺𑀫, 𑀏𑀯𑀁 𑀚𑀸𑀦𑀦𑁆𑀢𑁄 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀲𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀲𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀲𑀺; 𑀆𑀯𑀺𑀪𑀸𑀯𑀁, 𑀢𑀺𑀭𑁄𑀪𑀸𑀯𑀁, 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀲𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂; 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀲𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂; 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁄 𑀕𑀘𑁆𑀙𑀲𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁; 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀲𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄; 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀺𑀫𑀲𑀲𑀺 𑀧𑀭𑀺𑀫𑀚𑁆𑀚𑀲𑀺, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀧𑀺 𑀧𑀦 𑀢𑁆𑀯𑀁, 𑀲𑀼𑀲𑀺𑀫, 𑀏𑀯𑀁 𑀚𑀸𑀦𑀦𑁆𑀢𑁄 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀉𑀪𑁄 𑀲𑀤𑁆𑀤𑁂 𑀲𑀼𑀡𑀲𑀺 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀧𑀺 𑀧𑀦 𑀢𑁆𑀯𑀁, 𑀲𑀼𑀲𑀺𑀫, 𑀏𑀯𑀁 𑀚𑀸𑀦𑀦𑁆𑀢𑁄 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀲𑀺 𑁋 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀲𑀺…𑀧𑁂… 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀧𑀺 𑀧𑀦 𑀢𑁆𑀯𑀁, 𑀲𑀼𑀲𑀺𑀫, 𑀏𑀯𑀁 𑀚𑀸𑀦𑀦𑁆𑀢𑁄 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀧𑀺 𑀧𑀦 𑀢𑁆𑀯𑀁, 𑀲𑀼𑀲𑀺𑀫, 𑀏𑀯𑀁 𑀚𑀸𑀦𑀦𑁆𑀢𑁄 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀲𑀺 𑀘𑀯𑀫𑀸𑀦𑁂…𑀧𑁂… 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀅𑀧𑀺 𑀧𑀦 𑀢𑁆𑀯𑀁, 𑀲𑀼𑀲𑀺𑀫, 𑀏𑀯𑀁 𑀚𑀸𑀦𑀦𑁆𑀢𑁄 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀬𑁂 𑀢𑁂 𑀲𑀦𑁆𑀢𑀸 𑀯𑀺𑀫𑁄𑀓𑁆𑀔𑀸 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂, 𑀆𑀭𑀼𑀧𑁆𑀧𑀸 𑀢𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀲𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀏𑀢𑁆𑀣 𑀤𑀸𑀦𑀺, 𑀲𑀼𑀲𑀺𑀫, 𑀇𑀤𑀜𑁆𑀘 𑀯𑁂𑀬𑁆𑀬𑀸𑀓𑀭𑀡𑀁 𑀇𑀫𑁂𑀲𑀜𑁆𑀘 𑀥𑀫𑁆𑀫𑀸𑀦𑀁 𑀅𑀲𑀫𑀸𑀧𑀢𑁆𑀢𑀺, 𑀇𑀤𑀁 𑀦𑁄, 𑀲𑀼𑀲𑀺𑀫, 𑀓𑀣’’𑀦𑁆𑀢𑀺?

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀲𑀺𑀫𑁄 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀘𑀬𑁄 𑀫𑀁, 𑀪𑀦𑁆𑀢𑁂, 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁 𑀬𑀣𑀸𑀫𑀽𑀴𑁆𑀳𑀁 𑀬𑀣𑀸𑀅𑀓𑀼𑀲𑀮𑀁, 𑀬𑁆𑀯𑀸𑀳𑀁 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀥𑀫𑁆𑀫𑀢𑁆𑀣𑁂𑀦𑀓𑁄 𑀧𑀩𑁆𑀩𑀚𑀺𑀢𑁄. 𑀢𑀲𑁆𑀲 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸’’𑀢𑀺.

‘‘𑀢𑀕𑁆𑀖 𑀢𑁆𑀯𑀁, 𑀲𑀼𑀲𑀺𑀫, 𑀅𑀘𑁆𑀘𑀬𑁄 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁 𑀬𑀣𑀸𑀫𑀽𑀴𑁆𑀳𑀁 𑀬𑀣𑀸𑀅𑀓𑀼𑀲𑀮𑀁, 𑀬𑁄 𑀢𑁆𑀯𑀁 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀥𑀫𑁆𑀫𑀢𑁆𑀣𑁂𑀦𑀓𑁄 𑀧𑀩𑁆𑀩𑀚𑀺𑀢𑁄. 𑀲𑁂𑀬𑁆𑀬𑀣𑀸𑀧𑀺, 𑀲𑀼𑀲𑀺𑀫, 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀬𑁆𑀬𑀼𑀁 𑁋 ‘𑀅𑀬𑀁 𑀢𑁂, 𑀤𑁂𑀯, 𑀘𑁄𑀭𑁄 𑀆𑀕𑀼𑀘𑀸𑀭𑀻, 𑀇𑀫𑀲𑁆𑀲 𑀬𑀁 𑀇𑀘𑁆𑀙𑀲𑀺 𑀢𑀁 𑀤𑀡𑁆𑀟𑀁 𑀧𑀡𑁂𑀳𑀻’𑀢𑀺. 𑀢𑀫𑁂𑀦𑀁 𑀭𑀸𑀚𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀕𑀘𑁆𑀙𑀣, 𑀪𑁄, 𑀇𑀫𑀁 𑀧𑀼𑀭𑀺𑀲𑀁 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀔𑀭𑀲𑁆𑀲𑀭𑁂𑀦 𑀧𑀡𑀯𑁂𑀦 𑀭𑀣𑀺𑀬𑀸𑀬 𑀭𑀣𑀺𑀬𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀧𑀭𑀺𑀦𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀤𑀓𑁆𑀔𑀺𑀡𑀢𑁄 𑀦𑀕𑀭𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀣𑀸’𑀢𑀺. 𑀢𑀫𑁂𑀦𑀁 𑀭𑀜𑁆𑀜𑁄 𑀧𑀼𑀭𑀺𑀲𑀸 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀔𑀭𑀲𑁆𑀲𑀭𑁂𑀦 𑀧𑀡𑀯𑁂𑀦 𑀭𑀣𑀺𑀬𑀸𑀬 𑀭𑀣𑀺𑀬𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀧𑀭𑀺𑀦𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀤𑀓𑁆𑀔𑀺𑀡𑀢𑁄 𑀦𑀕𑀭𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑁂𑀬𑁆𑀬𑀼𑀁. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀼𑀲𑀺𑀫, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀺𑀬𑁂𑀣𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀬𑀁 𑀔𑁄 𑀲𑁄, 𑀲𑀼𑀲𑀺𑀫, 𑀧𑀼𑀭𑀺𑀲𑁄 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀺𑀬𑁂𑀣 [𑀧𑀝𑀺𑀲𑀁𑀯𑁂𑀤𑀺𑀬𑁂𑀣 𑀯𑀸, 𑀦 𑀯𑀸 𑀧𑀝𑀺𑀲𑀁𑀯𑁂𑀤𑀺𑀬𑁂𑀣 (𑀓.)]. 𑀬𑀸 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀥𑀫𑁆𑀫𑀢𑁆𑀣𑁂𑀦𑀓𑀲𑁆𑀲 𑀧𑀩𑁆𑀩𑀚𑁆𑀚𑀸, 𑀅𑀬𑀁 𑀢𑀢𑁄 𑀤𑀼𑀓𑁆𑀔𑀯𑀺𑀧𑀸𑀓𑀢𑀭𑀸 𑀘 𑀓𑀝𑀼𑀓𑀯𑀺𑀧𑀸𑀓𑀢𑀭𑀸 𑀘, 𑀅𑀧𑀺 𑀘 𑀯𑀺𑀦𑀺𑀧𑀸𑀢𑀸𑀬 𑀲𑀁𑀯𑀢𑁆𑀢𑀢𑀺. 𑀬𑀢𑁄 𑀘 𑀔𑁄 𑀢𑁆𑀯𑀁, 𑀲𑀼𑀲𑀺𑀫, 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀲𑀺 𑀢𑀁 𑀢𑁂 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫. 𑀯𑀼𑀤𑁆𑀥𑀺 𑀳𑁂𑀲𑀸, 𑀲𑀼𑀲𑀺𑀫, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀬𑁄 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀺, 𑀆𑀬𑀢𑀺𑀜𑁆𑀘 [𑀆𑀬𑀢𑀺𑀁 (𑀲𑁆𑀬𑀸. 𑀓𑀁.)] 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺. 𑀤𑀲𑀫𑀁.

𑀫𑀳𑀸𑀯𑀕𑁆𑀕𑁄 𑀲𑀢𑁆𑀢𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑁆𑀯𑁂 𑀅𑀲𑁆𑀲𑀼𑀢𑀯𑀢𑀸 𑀯𑀼𑀢𑁆𑀢𑀸, 𑀧𑀼𑀢𑁆𑀢𑀫𑀁𑀲𑁂𑀦 𑀘𑀸𑀧𑀭𑀁;

𑀅𑀢𑁆𑀣𑀺𑀭𑀸𑀕𑁄 𑀘 𑀦𑀕𑀭𑀁, 𑀲𑀫𑁆𑀫𑀲𑀁 𑀦𑀴𑀓𑀮𑀸𑀧𑀺𑀬𑀁;

𑀓𑁄𑀲𑀫𑁆𑀩𑀻 𑀉𑀧𑀬𑀦𑁆𑀢𑀺 𑀘, 𑀤𑀲𑀫𑁄 𑀲𑀼𑀲𑀺𑀫𑁂𑀦 𑀘𑀸𑀢𑀺 [𑀤𑀲𑀫𑁄 𑀯𑀼𑀢𑁆𑀢𑁄 𑀲𑀼𑀲𑀻𑀫𑁂𑀦𑀸𑀢𑀺 (𑀲𑀻.)].