𑁧𑁨. 𑀤𑀓𑁆𑀔𑀺𑀡𑀸𑀯𑀺𑀪𑀗𑁆𑀕𑀲𑀼𑀢𑁆𑀢𑀁

𑁩𑁭𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 [𑀫𑀳𑀸𑀧𑀚𑀸𑀧𑀢𑀻 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀕𑁄𑀢𑀫𑀻 𑀦𑀯𑀁 𑀤𑀼𑀲𑁆𑀲𑀬𑀼𑀕𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀦𑀯𑀁 𑀤𑀼𑀲𑁆𑀲𑀬𑀼𑀕𑀁 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀲𑀸𑀫𑀁 𑀓𑀦𑁆𑀢𑀁 𑀲𑀸𑀫𑀁 𑀯𑀸𑀬𑀺𑀢𑀁. 𑀢𑀁 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀕𑀯𑀸 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀏𑀢𑀤𑀯𑁄𑀘 𑁋 ‘‘𑀲𑀗𑁆𑀖𑁂, 𑀕𑁄𑀢𑀫𑀺, 𑀤𑁂𑀳𑀺. 𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺 𑀲𑀗𑁆𑀖𑁄 𑀘𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀦𑀯𑀁 𑀤𑀼𑀲𑁆𑀲𑀬𑀼𑀕𑀁 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀲𑀸𑀫𑀁 𑀓𑀦𑁆𑀢𑀁 𑀲𑀸𑀫𑀁 𑀯𑀸𑀬𑀺𑀢𑀁. 𑀢𑀁 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀏𑀢𑀤𑀯𑁄𑀘 𑁋 ‘‘𑀲𑀗𑁆𑀖𑁂, 𑀕𑁄𑀢𑀫𑀺, 𑀤𑁂𑀳𑀺. 𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺 𑀲𑀗𑁆𑀖𑁄 𑀘𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀦𑀯𑀁 𑀤𑀼𑀲𑁆𑀲𑀬𑀼𑀕𑀁 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀲𑀸𑀫𑀁 𑀓𑀦𑁆𑀢𑀁 𑀲𑀸𑀫𑀁 𑀯𑀸𑀬𑀺𑀢𑀁. 𑀢𑀁 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀏𑀢𑀤𑀯𑁄𑀘 𑁋 ‘‘𑀲𑀗𑁆𑀖𑁂, 𑀕𑁄𑀢𑀫𑀺, 𑀤𑁂𑀳𑀺. 𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺 𑀲𑀗𑁆𑀖𑁄 𑀘𑀸’’𑀢𑀺.

𑁩𑁭𑁭. 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀦𑀯𑀁 𑀤𑀼𑀲𑁆𑀲𑀬𑀼𑀕𑀁. 𑀩𑀳𑀽𑀧𑀓𑀸𑀭𑀸 [𑀩𑀳𑀼𑀓𑀸𑀭𑀸 (𑀲𑁆𑀬𑀸. 𑀓𑀁.)], 𑀪𑀦𑁆𑀢𑁂, 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀪𑀕𑀯𑀢𑁄 𑀫𑀸𑀢𑀼𑀘𑁆𑀙𑀸 𑀆𑀧𑀸𑀤𑀺𑀓𑀸 𑀧𑁄𑀲𑀺𑀓𑀸 𑀔𑀻𑀭𑀲𑁆𑀲 𑀤𑀸𑀬𑀺𑀓𑀸; 𑀪𑀕𑀯𑀦𑁆𑀢𑀁 𑀚𑀦𑁂𑀢𑁆𑀢𑀺𑀬𑀸 𑀓𑀸𑀮𑀗𑁆𑀓𑀢𑀸𑀬 𑀣𑀜𑁆𑀜𑀁 𑀧𑀸𑀬𑁂𑀲𑀺. 𑀪𑀕𑀯𑀸𑀧𑀺, 𑀪𑀦𑁆𑀢𑁂, 𑀩𑀳𑀽𑀧𑀓𑀸𑀭𑁄 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸. 𑀪𑀕𑀯𑀦𑁆𑀢𑀁, 𑀪𑀦𑁆𑀢𑁂, 𑀆𑀕𑀫𑁆𑀫 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑀸. 𑀪𑀕𑀯𑀦𑁆𑀢𑀁, 𑀪𑀦𑁆𑀢𑁂, 𑀆𑀕𑀫𑁆𑀫 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸. 𑀪𑀕𑀯𑀦𑁆𑀢𑀁, 𑀪𑀦𑁆𑀢𑁂, 𑀆𑀕𑀫𑁆𑀫 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀪𑀕𑀯𑀦𑁆𑀢𑀁, 𑀪𑀦𑁆𑀢𑁂, 𑀆𑀕𑀫𑁆𑀫 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀤𑀼𑀓𑁆𑀔𑁂 𑀦𑀺𑀓𑁆𑀓𑀗𑁆𑀔𑀸, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀦𑀺𑀓𑁆𑀓𑀗𑁆𑀔𑀸, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀦𑀺𑀓𑁆𑀓𑀗𑁆𑀔𑀸, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀦𑀺𑀓𑁆𑀓𑀗𑁆𑀔𑀸. 𑀪𑀕𑀯𑀸𑀧𑀺, 𑀪𑀦𑁆𑀢𑁂, 𑀩𑀳𑀽𑀧𑀓𑀸𑀭𑁄 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸’’𑀢𑀺.

𑁩𑁭𑁮. ‘‘𑀏𑀯𑀫𑁂𑀢𑀁, 𑀆𑀦𑀦𑁆𑀤. 𑀬𑀁 𑀳𑀸𑀦𑀦𑁆𑀤, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑀁 𑀆𑀕𑀫𑁆𑀫 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀇𑀫𑀲𑁆𑀲𑀸𑀦𑀦𑁆𑀤, 𑀧𑀼𑀕𑁆𑀕𑀮𑀲𑁆𑀲 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦 𑀦 𑀲𑀼𑀧𑁆𑀧𑀢𑀺𑀓𑀸𑀭𑀁 𑀯𑀤𑀸𑀫𑀺, 𑀬𑀤𑀺𑀤𑀁 𑁋 𑀅𑀪𑀺𑀯𑀸𑀤𑀦-𑀧𑀘𑁆𑀘𑀼𑀝𑁆𑀞𑀸𑀦-𑀅𑀜𑁆𑀚𑀮𑀺𑀓𑀫𑁆𑀫 𑀲𑀸𑀫𑀻𑀘𑀺𑀓𑀫𑁆𑀫𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸- 𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀼𑀧𑁆𑀧𑀤𑀸𑀦𑁂𑀦.

‘‘𑀬𑀁 𑀳𑀸𑀦𑀦𑁆𑀤, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑀁 𑀆𑀕𑀫𑁆𑀫 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀇𑀫𑀲𑁆𑀲𑀸𑀦𑀦𑁆𑀤, 𑀧𑀼𑀕𑁆𑀕𑀮𑀲𑁆𑀲 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦 𑀦 𑀲𑀼𑀧𑁆𑀧𑀢𑀺𑀓𑀸𑀭𑀁 𑀯𑀤𑀸𑀫𑀺, 𑀬𑀤𑀺𑀤𑀁 𑁋 𑀅𑀪𑀺𑀯𑀸𑀤𑀦-𑀧𑀘𑁆𑀘𑀼𑀝𑁆𑀞𑀸𑀦-𑀅𑀜𑁆𑀚𑀮𑀺𑀓𑀫𑁆𑀫-𑀲𑀸𑀫𑀻𑀘𑀺𑀓𑀫𑁆𑀫𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸- 𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀼𑀧𑁆𑀧𑀤𑀸𑀦𑁂𑀦.

‘‘𑀬𑀁 𑀳𑀸𑀦𑀦𑁆𑀤, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑀁 𑀆𑀕𑀫𑁆𑀫 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀥𑀫𑁆𑀫𑁂… 𑀲𑀗𑁆𑀖𑁂… 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀇𑀫𑀲𑁆𑀲𑀸𑀦𑀦𑁆𑀤, 𑀧𑀼𑀕𑁆𑀕𑀮𑀲𑁆𑀲 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦 𑀦 𑀲𑀼𑀧𑁆𑀧𑀢𑀺𑀓𑀸𑀭𑀁 𑀯𑀤𑀸𑀫𑀺, 𑀬𑀤𑀺𑀤𑀁 𑁋 𑀅𑀪𑀺𑀯𑀸𑀤𑀦-𑀧𑀘𑁆𑀘𑀼𑀝𑁆𑀞𑀸𑀦-𑀅𑀜𑁆𑀚𑀮𑀺𑀓𑀫𑁆𑀫-𑀲𑀸𑀫𑀻𑀘𑀺𑀓𑀫𑁆𑀫𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸- 𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀼𑀧𑁆𑀧𑀤𑀸𑀦𑁂𑀦.

‘‘𑀬𑀁 𑀳𑀸𑀦𑀦𑁆𑀤, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑀁 𑀆𑀕𑀫𑁆𑀫 𑀤𑀼𑀓𑁆𑀔𑁂 𑀦𑀺𑀓𑁆𑀓𑀗𑁆𑀔𑁄 𑀳𑁄𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀦𑀺𑀓𑁆𑀓𑀗𑁆𑀔𑁄 𑀳𑁄𑀢𑀺, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀦𑀺𑀓𑁆𑀓𑀗𑁆𑀔𑁄 𑀳𑁄𑀢𑀺, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀦𑀺𑀓𑁆𑀓𑀗𑁆𑀔𑁄 𑀳𑁄𑀢𑀺, 𑀇𑀫𑀲𑁆𑀲𑀸𑀦𑀦𑁆𑀤, 𑀧𑀼𑀕𑁆𑀕𑀮𑀲𑁆𑀲 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦 𑀦 𑀲𑀼𑀧𑁆𑀧𑀢𑀺𑀓𑀸𑀭𑀁 𑀯𑀤𑀸𑀫𑀺, 𑀬𑀤𑀺𑀤𑀁 𑁋 𑀅𑀪𑀺𑀯𑀸𑀤𑀦-𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫-𑀲𑀸𑀫𑀻𑀘𑀺𑀓𑀫𑁆𑀫-𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸- 𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀼𑀧𑁆𑀧𑀤𑀸𑀦𑁂𑀦.

𑁩𑁭𑁯. ‘‘𑀘𑀼𑀤𑁆𑀤𑀲 𑀔𑁄 𑀧𑀦𑀺𑀫𑀸𑀦𑀦𑁆𑀤, 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸. 𑀓𑀢𑀫𑀸 𑀘𑀼𑀤𑁆𑀤𑀲? 𑀢𑀣𑀸𑀕𑀢𑁂 𑀅𑀭𑀳𑀦𑁆𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀧𑀞𑀫𑀸 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸. 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂 [𑀧𑀘𑁆𑀘𑁂𑀓𑀩𑀼𑀤𑁆𑀥𑁂 (𑀲𑀻. 𑀧𑀻.)] 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀤𑀼𑀢𑀺𑀬𑀸 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸. 𑀢𑀣𑀸𑀕𑀢𑀲𑀸𑀯𑀓𑁂 𑀅𑀭𑀳𑀦𑁆𑀢𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀢𑀢𑀺𑀬𑀸 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸. 𑀅𑀭𑀳𑀢𑁆𑀢𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀘𑀢𑀼𑀢𑁆𑀣𑀻 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸. 𑀅𑀦𑀸𑀕𑀸𑀫𑀺𑀲𑁆𑀲 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀧𑀜𑁆𑀘𑀫𑀻 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸. 𑀅𑀦𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀙𑀝𑁆𑀞𑀻 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸. 𑀲𑀓𑀤𑀸𑀕𑀸𑀫𑀺𑀲𑁆𑀲 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀲𑀢𑁆𑀢𑀫𑀻 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸. 𑀲𑀓𑀤𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀅𑀝𑁆𑀞𑀫𑀻 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸. 𑀲𑁄𑀢𑀸𑀧𑀦𑁆𑀦𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀦𑀯𑀫𑀻 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀤𑀲𑀫𑀻 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸. 𑀩𑀸𑀳𑀺𑀭𑀓𑁂 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀏𑀓𑀸𑀤𑀲𑀫𑀻 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸. 𑀧𑀼𑀣𑀼𑀚𑁆𑀚𑀦𑀲𑀻𑀮𑀯𑀦𑁆𑀢𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀤𑁆𑀯𑀸𑀤𑀲𑀫𑀻 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸. 𑀧𑀼𑀣𑀼𑀚𑁆𑀚𑀦𑀤𑀼𑀲𑁆𑀲𑀻𑀮𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀢𑁂𑀭𑀲𑀫𑀻 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸. 𑀢𑀺𑀭𑀘𑁆𑀙𑀸𑀦𑀕𑀢𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀘𑀼𑀤𑁆𑀤𑀲𑀫𑀻 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸 𑀤𑀓𑁆𑀔𑀺𑀡𑀸𑀢𑀺.

‘‘𑀢𑀢𑁆𑀭𑀸𑀦𑀦𑁆𑀤, 𑀢𑀺𑀭𑀘𑁆𑀙𑀸𑀦𑀕𑀢𑁂 𑀤𑀸𑀦𑀁 𑀤𑀢𑁆𑀯𑀸 𑀲𑀢𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸, 𑀧𑀼𑀣𑀼𑀚𑁆𑀚𑀦𑀤𑀼𑀲𑁆𑀲𑀻𑀮𑁂 𑀤𑀸𑀦𑀁 𑀤𑀢𑁆𑀯𑀸 𑀲𑀳𑀲𑁆𑀲𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸, 𑀧𑀼𑀣𑀼𑀚𑁆𑀚𑀦𑀲𑀻𑀮𑀯𑀦𑁆𑀢𑁂 𑀤𑀸𑀦𑀁 𑀤𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸, 𑀩𑀸𑀳𑀺𑀭𑀓𑁂 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁂 𑀤𑀸𑀦𑀁 𑀤𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂 𑀤𑀸𑀦𑀁 𑀤𑀢𑁆𑀯𑀸 𑀅𑀲𑀗𑁆𑀔𑁂𑀬𑁆𑀬𑀸 𑀅𑀧𑁆𑀧𑀫𑁂𑀬𑁆𑀬𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸, 𑀓𑁄 𑀧𑀦 𑀯𑀸𑀤𑁄 𑀲𑁄𑀢𑀸𑀧𑀦𑁆𑀦𑁂, 𑀓𑁄 𑀧𑀦 𑀯𑀸𑀤𑁄 𑀲𑀓𑀤𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂, 𑀓𑁄 𑀧𑀦 𑀯𑀸𑀤𑁄 𑀲𑀓𑀤𑀸𑀕𑀸𑀫𑀺𑀲𑁆𑀲, 𑀓𑁄 𑀧𑀦 𑀯𑀸𑀤𑁄 𑀅𑀦𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂, 𑀓𑁄 𑀧𑀦 𑀯𑀸𑀤𑁄 𑀅𑀦𑀸𑀕𑀸𑀫𑀺𑀲𑁆𑀲, 𑀓𑁄 𑀧𑀦 𑀯𑀸𑀤𑁄 𑀅𑀭𑀳𑀢𑁆𑀢𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂, 𑀓𑁄 𑀧𑀦 𑀯𑀸𑀤𑁄 𑀅𑀭𑀳𑀦𑁆𑀢𑁂, 𑀓𑁄 𑀧𑀦 𑀯𑀸𑀤𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂, 𑀓𑁄 𑀧𑀦 𑀯𑀸𑀤𑁄 𑀢𑀣𑀸𑀕𑀢𑁂 𑀅𑀭𑀳𑀦𑁆𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂!

𑁩𑁮𑁦. ‘‘𑀲𑀢𑁆𑀢 𑀔𑁄 𑀧𑀦𑀺𑀫𑀸𑀦𑀦𑁆𑀤, 𑀲𑀗𑁆𑀖𑀕𑀢𑀸 𑀤𑀓𑁆𑀔𑀺𑀡𑀸. 𑀓𑀢𑀫𑀸 𑀲𑀢𑁆𑀢? 𑀩𑀼𑀤𑁆𑀥𑀧𑁆𑀧𑀫𑀼𑀔𑁂 𑀉𑀪𑀢𑁄𑀲𑀗𑁆𑀖𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀧𑀞𑀫𑀸 𑀲𑀗𑁆𑀖𑀕𑀢𑀸 𑀤𑀓𑁆𑀔𑀺𑀡𑀸. 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀉𑀪𑀢𑁄𑀲𑀗𑁆𑀖𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀤𑀼𑀢𑀺𑀬𑀸 𑀲𑀗𑁆𑀖𑀕𑀢𑀸 𑀤𑀓𑁆𑀔𑀺𑀡𑀸. 𑀪𑀺𑀓𑁆𑀔𑀼𑀲𑀗𑁆𑀖𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀢𑀢𑀺𑀬𑀸 𑀲𑀗𑁆𑀖𑀕𑀢𑀸 𑀤𑀓𑁆𑀔𑀺𑀡𑀸. 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀘𑀢𑀼𑀢𑁆𑀣𑀻 𑀲𑀗𑁆𑀖𑀕𑀢𑀸 𑀤𑀓𑁆𑀔𑀺𑀡𑀸. ‘𑀏𑀢𑁆𑀢𑀓𑀸 𑀫𑁂 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑁆𑀲𑀣𑀸’𑀢𑀺 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀧𑀜𑁆𑀘𑀫𑀻 𑀲𑀗𑁆𑀖𑀕𑀢𑀸 𑀤𑀓𑁆𑀔𑀺𑀡𑀸. ‘𑀏𑀢𑁆𑀢𑀓𑀸 𑀫𑁂 𑀪𑀺𑀓𑁆𑀔𑀽 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑁆𑀲𑀣𑀸’𑀢𑀺 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀙𑀝𑁆𑀞𑀻 𑀲𑀗𑁆𑀖𑀕𑀢𑀸 𑀤𑀓𑁆𑀔𑀺𑀡𑀸. ‘𑀏𑀢𑁆𑀢𑀓𑀸 𑀫𑁂 𑀪𑀺𑀓𑁆𑀔𑀼𑀦𑀺𑀬𑁄 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑁆𑀲𑀣𑀸’𑀢𑀺 𑀤𑀸𑀦𑀁 𑀤𑁂𑀢𑀺 𑁋 𑀅𑀬𑀁 𑀲𑀢𑁆𑀢𑀫𑀻 𑀲𑀗𑁆𑀖𑀕𑀢𑀸 𑀤𑀓𑁆𑀔𑀺𑀡𑀸.

‘‘𑀪𑀯𑀺𑀲𑁆𑀲𑀦𑁆𑀢𑀺 𑀔𑁄 𑀧𑀦𑀸𑀦𑀦𑁆𑀤, 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀕𑁄𑀢𑁆𑀭𑀪𑀼𑀦𑁄 𑀓𑀸𑀲𑀸𑀯𑀓𑀡𑁆𑀞𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸. 𑀢𑁂𑀲𑀼 𑀤𑀼𑀲𑁆𑀲𑀻𑀮𑁂𑀲𑀼 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀤𑀲𑁆𑀲𑀦𑁆𑀢𑀺. 𑀢𑀤𑀸𑀧𑀸𑀳𑀁, 𑀆𑀦𑀦𑁆𑀤, 𑀲𑀗𑁆𑀖𑀕𑀢𑀁 𑀤𑀓𑁆𑀔𑀺𑀡𑀁 𑀅𑀲𑀗𑁆𑀔𑁂𑀬𑁆𑀬𑀁 𑀅𑀧𑁆𑀧𑀫𑁂𑀬𑁆𑀬𑀁 𑀯𑀤𑀸𑀫𑀺. 𑀦 𑀢𑁆𑀯𑁂𑀯𑀸𑀳𑀁, 𑀆𑀦𑀦𑁆𑀤, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀲𑀗𑁆𑀖𑀕𑀢𑀸𑀬 𑀤𑀓𑁆𑀔𑀺𑀡𑀸𑀬 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁 𑀤𑀸𑀦𑀁 𑀫𑀳𑀧𑁆𑀨𑀮𑀢𑀭𑀁 𑀯𑀤𑀸𑀫𑀺.

𑁩𑁮𑁧. ‘‘𑀘𑀢𑀲𑁆𑀲𑁄 𑀔𑁄 𑀇𑀫𑀸, 𑀆𑀦𑀦𑁆𑀤, 𑀤𑀓𑁆𑀔𑀺𑀡𑀸 𑀯𑀺𑀲𑀼𑀤𑁆𑀥𑀺𑀬𑁄. 𑀓𑀢𑀫𑀸 𑀘𑀢𑀲𑁆𑀲𑁄? 𑀅𑀢𑁆𑀣𑀸𑀦𑀦𑁆𑀤, 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄. 𑀅𑀢𑁆𑀣𑀸𑀦𑀦𑁆𑀤, 𑀤𑀓𑁆𑀔𑀺𑀡𑀸 𑀧𑀝𑀺𑀕𑁆𑀕𑀸𑀳𑀓𑀢𑁄 𑀯𑀺𑀲𑀼𑀚𑁆𑀛𑀢𑀺 𑀦𑁄 𑀤𑀸𑀬𑀓𑀢𑁄. 𑀅𑀢𑁆𑀣𑀸𑀦𑀦𑁆𑀤, 𑀤𑀓𑁆𑀔𑀺𑀡𑀸 𑀦𑁂𑀯 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄. 𑀅𑀢𑁆𑀣𑀸𑀦𑀦𑁆𑀤, 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀘𑁂𑀯 𑀯𑀺𑀲𑀼𑀚𑁆𑀛𑀢𑀺 𑀧𑀝𑀺𑀕𑁆𑀕𑀸𑀳𑀓𑀢𑁄 𑀘.

‘‘𑀓𑀣𑀜𑁆𑀘𑀸𑀦𑀦𑁆𑀤, 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄? 𑀇𑀥𑀸𑀦𑀦𑁆𑀤, 𑀤𑀸𑀬𑀓𑁄 𑀳𑁄𑀢𑀺 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄, 𑀧𑀝𑀺𑀕𑁆𑀕𑀸𑀳𑀓𑀸 𑀳𑁄𑀦𑁆𑀢𑀺 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑁋 𑀏𑀯𑀁 𑀔𑁄, 𑀆𑀦𑀦𑁆𑀤, 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄.

‘‘𑀓𑀣𑀜𑁆𑀘𑀸𑀦𑀦𑁆𑀤, 𑀤𑀓𑁆𑀔𑀺𑀡𑀸 𑀧𑀝𑀺𑀕𑁆𑀕𑀸𑀳𑀓𑀢𑁄 𑀯𑀺𑀲𑀼𑀚𑁆𑀛𑀢𑀺 𑀦𑁄 𑀤𑀸𑀬𑀓𑀢𑁄? 𑀇𑀥𑀸𑀦𑀦𑁆𑀤, 𑀤𑀸𑀬𑀓𑁄 𑀳𑁄𑀢𑀺 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄, 𑀧𑀝𑀺𑀕𑁆𑀕𑀸𑀳𑀓𑀸 𑀳𑁄𑀦𑁆𑀢𑀺 𑀲𑀻𑀮𑀯𑀦𑁆𑀢𑁄 [𑀲𑀻𑀮𑀯𑀦𑁆𑀢𑀸 (𑀲𑀻.)] 𑀓𑀮𑁆𑀬𑀸𑀡𑀥𑀫𑁆𑀫𑀸 𑁋 𑀏𑀯𑀁 𑀔𑁄, 𑀆𑀦𑀦𑁆𑀤, 𑀤𑀓𑁆𑀔𑀺𑀡𑀸 𑀧𑀝𑀺𑀕𑁆𑀕𑀸𑀳𑀓𑀢𑁄 𑀯𑀺𑀲𑀼𑀚𑁆𑀛𑀢𑀺 𑀦𑁄 𑀤𑀸𑀬𑀓𑀢𑁄.

‘‘𑀓𑀣𑀜𑁆𑀘𑀸𑀦𑀦𑁆𑀤, 𑀤𑀓𑁆𑀔𑀺𑀡𑀸 𑀦𑁂𑀯 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄? 𑀇𑀥𑀸𑀦𑀦𑁆𑀤, 𑀤𑀸𑀬𑀓𑁄 𑀘 𑀳𑁄𑀢𑀺 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄, 𑀧𑀝𑀺𑀕𑁆𑀕𑀸𑀳𑀓𑀸 𑀘 𑀳𑁄𑀦𑁆𑀢𑀺 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑁋 𑀏𑀯𑀁 𑀔𑁄, 𑀆𑀦𑀦𑁆𑀤, 𑀤𑀓𑁆𑀔𑀺𑀡𑀸 𑀦𑁂𑀯 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄.

‘‘𑀓𑀣𑀜𑁆𑀘𑀸𑀦𑀦𑁆𑀤, 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀘𑁂𑀯 𑀯𑀺𑀲𑀼𑀚𑁆𑀛𑀢𑀺 𑀧𑀝𑀺𑀕𑁆𑀕𑀸𑀳𑀓𑀢𑁄 𑀘? 𑀇𑀥𑀸𑀦𑀦𑁆𑀤, 𑀤𑀸𑀬𑀓𑁄 𑀘 𑀳𑁄𑀢𑀺 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄, 𑀧𑀝𑀺𑀕𑁆𑀕𑀸𑀳𑀓𑀸 𑀘 𑀳𑁄𑀦𑁆𑀢𑀺 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑁋 𑀏𑀯𑀁 𑀔𑁄, 𑀆𑀦𑀦𑁆𑀤, 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀘𑁂𑀯 𑀯𑀺𑀲𑀼𑀚𑁆𑀛𑀢𑀺 𑀧𑀝𑀺𑀕𑁆𑀕𑀸𑀳𑀓𑀢𑁄 𑀘. 𑀇𑀫𑀸 𑀔𑁄, 𑀆𑀦𑀦𑁆𑀤, 𑀘𑀢𑀲𑁆𑀲𑁄 𑀤𑀓𑁆𑀔𑀺𑀡𑀸 𑀯𑀺𑀲𑀼𑀤𑁆𑀥𑀺𑀬𑁄’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁩𑁮𑁨. ‘‘𑀬𑁄 𑀲𑀻𑀮𑀯𑀸 𑀤𑀼𑀲𑁆𑀲𑀻𑀮𑁂𑀲𑀼 𑀤𑀤𑀸𑀢𑀺 𑀤𑀸𑀦𑀁,

𑀥𑀫𑁆𑀫𑁂𑀦 𑀮𑀤𑁆𑀥𑀁 [𑀮𑀤𑁆𑀥𑀸 (𑀲𑀻. 𑀧𑀻.)] 𑀲𑀼𑀧𑀲𑀦𑁆𑀦𑀘𑀺𑀢𑁆𑀢𑁄;

𑀅𑀪𑀺𑀲𑀤𑁆𑀤𑀳𑀁 𑀓𑀫𑁆𑀫𑀨𑀮𑀁 𑀉𑀴𑀸𑀭𑀁,

𑀲𑀸 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺.

‘‘𑀬𑁄 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀦𑁆𑀢𑁂𑀲𑀼 𑀤𑀤𑀸𑀢𑀺 𑀤𑀸𑀦𑀁,

𑀅𑀥𑀫𑁆𑀫𑁂𑀦 𑀮𑀤𑁆𑀥𑀁 𑀅𑀧𑁆𑀧𑀲𑀦𑁆𑀦𑀘𑀺𑀢𑁆𑀢𑁄;

𑀅𑀦𑀪𑀺𑀲𑀤𑁆𑀤𑀳𑀁 𑀓𑀫𑁆𑀫𑀨𑀮𑀁 𑀉𑀴𑀸𑀭𑀁,

𑀲𑀸 𑀤𑀓𑁆𑀔𑀺𑀡𑀸 𑀧𑀝𑀺𑀕𑁆𑀕𑀸𑀳𑀓𑀢𑁄 𑀯𑀺𑀲𑀼𑀚𑁆𑀛𑀢𑀺.

‘‘𑀬𑁄 𑀤𑀼𑀲𑁆𑀲𑀻𑀮𑁄 𑀤𑀼𑀲𑁆𑀲𑀻𑀮𑁂𑀲𑀼 𑀤𑀤𑀸𑀢𑀺 𑀤𑀸𑀦𑀁,

𑀅𑀥𑀫𑁆𑀫𑁂𑀦 𑀮𑀤𑁆𑀥𑀁 𑀅𑀧𑁆𑀧𑀲𑀦𑁆𑀦𑀘𑀺𑀢𑁆𑀢𑁄;

𑀅𑀦𑀪𑀺𑀲𑀤𑁆𑀤𑀳𑀁 𑀓𑀫𑁆𑀫𑀨𑀮𑀁 𑀉𑀴𑀸𑀭𑀁,

𑀦 𑀢𑀁 𑀤𑀸𑀦𑀁 𑀯𑀺𑀧𑀼𑀮𑀧𑁆𑀨𑀮𑀦𑁆𑀢𑀺 𑀩𑁆𑀭𑀽𑀫𑀺.

‘‘𑀬𑁄 𑀲𑀻𑀮𑀯𑀸 𑀲𑀻𑀮𑀯𑀦𑁆𑀢𑁂𑀲𑀼 𑀤𑀤𑀸𑀢𑀺 𑀤𑀸𑀦𑀁,

𑀥𑀫𑁆𑀫𑁂𑀦 𑀮𑀤𑁆𑀥𑀁 𑀲𑀼𑀧𑀲𑀦𑁆𑀦𑀘𑀺𑀢𑁆𑀢𑁄;

𑀅𑀪𑀺𑀲𑀤𑁆𑀤𑀳𑀁 𑀓𑀫𑁆𑀫𑀨𑀮𑀁 𑀉𑀴𑀸𑀭𑀁,

𑀢𑀁 𑀯𑁂 𑀤𑀸𑀦𑀁 𑀯𑀺𑀧𑀼𑀮𑀧𑁆𑀨𑀮𑀦𑁆𑀢𑀺 𑀩𑁆𑀭𑀽𑀫𑀺 [𑀲𑀸 𑀤𑀓𑁆𑀔𑀺𑀡𑀸 𑀦𑁂𑀯𑀼𑀪𑀢𑁄 𑀯𑀺𑀲𑀼𑀚𑁆𑀛𑀢𑀺 (𑀲𑀻. 𑀧𑀻.)].

‘‘𑀬𑁄 𑀯𑀻𑀢𑀭𑀸𑀕𑁄 𑀯𑀻𑀢𑀭𑀸𑀕𑁂𑀲𑀼 𑀤𑀤𑀸𑀢𑀺 𑀤𑀸𑀦𑀁,

𑀥𑀫𑁆𑀫𑁂𑀦 𑀮𑀤𑁆𑀥𑀁 𑀲𑀼𑀧𑀲𑀦𑁆𑀦𑀘𑀺𑀢𑁆𑀢𑁄;

𑀅𑀪𑀺𑀲𑀤𑁆𑀤𑀳𑀁 𑀓𑀫𑁆𑀫𑀨𑀮𑀁 𑀉𑀴𑀸𑀭𑀁,

𑀢𑀁 𑀯𑁂 𑀤𑀸𑀦𑀁 𑀆𑀫𑀺𑀲𑀤𑀸𑀦𑀸𑀦𑀫𑀕𑁆𑀕’’ [𑀢𑀁 𑀯𑁂 𑀤𑀸𑀦𑀁 𑀯𑀺𑀧𑀼𑀮𑀦𑁆𑀢𑀺 𑀩𑁆𑀭𑀽𑀫𑀺 (𑀲𑀻.)] 𑀦𑁆𑀢𑀺.

𑀤𑀓𑁆𑀔𑀺𑀡𑀸𑀯𑀺𑀪𑀗𑁆𑀕𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑁆𑀯𑀸𑀤𑀲𑀫𑀁.

𑀯𑀺𑀪𑀗𑁆𑀕𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀘𑀢𑀼𑀢𑁆𑀣𑁄.