𑁪. 𑀖𑁄𑀝𑀫𑀼𑀔𑀲𑀼𑀢𑁆𑀢𑀁

𑁪𑁧𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀉𑀤𑁂𑀦𑁄 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀢𑀺 𑀔𑁂𑀫𑀺𑀬𑀫𑁆𑀩𑀯𑀦𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀖𑁄𑀝𑀫𑀼𑀔𑁄 𑀩𑁆𑀭𑀸𑀳𑁆𑀫𑀡𑁄 𑀩𑀸𑀭𑀸𑀡𑀲𑀺𑀁 𑀅𑀦𑀼𑀧𑁆𑀧𑀢𑁆𑀢𑁄 𑀳𑁄𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀣 𑀔𑁄 𑀖𑁄𑀝𑀫𑀼𑀔𑁄 𑀩𑁆𑀭𑀸𑀳𑁆𑀫𑀡𑁄 𑀚𑀗𑁆𑀖𑀸𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀅𑀦𑀼𑀯𑀺𑀘𑀭𑀫𑀸𑀦𑁄 𑀬𑁂𑀦 𑀔𑁂𑀫𑀺𑀬𑀫𑁆𑀩𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀤𑁂𑀦𑁄 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀢𑀺. 𑀅𑀣 𑀔𑁄 𑀖𑁄𑀝𑀫𑀼𑀔𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦𑀸𑀬𑀲𑁆𑀫𑀸 𑀉𑀤𑁂𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀉𑀤𑁂𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑁂𑀦𑀁 𑀘𑀗𑁆𑀓𑀫𑀦𑁆𑀢𑀁 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀏𑀯𑀫𑀸𑀳 𑁋 ‘‘𑀅𑀫𑁆𑀪𑁄 𑀲𑀫𑀡, ‘𑀦𑀢𑁆𑀣𑀺 𑀥𑀫𑁆𑀫𑀺𑀓𑁄 𑀧𑀭𑀺𑀩𑁆𑀩𑀚𑁄’ [𑀧𑀭𑀺𑀩𑁆𑀩𑀸𑀚𑁄 (𑀲𑀻. 𑀧𑀻.)] 𑁋 𑀏𑀯𑀁 𑀫𑁂 𑀏𑀢𑁆𑀣 𑀳𑁄𑀢𑀺. 𑀢𑀜𑁆𑀘 𑀔𑁄 𑀪𑀯𑀦𑁆𑀢𑀭𑀽𑀧𑀸𑀦𑀁 𑀯𑀸 𑀅𑀤𑀲𑁆𑀲𑀦𑀸, 𑀬𑁄 𑀯𑀸 𑀧𑀦𑁂𑀢𑁆𑀣 𑀥𑀫𑁆𑀫𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀉𑀤𑁂𑀦𑁄 𑀘𑀗𑁆𑀓𑀫𑀸 𑀑𑀭𑁄𑀳𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀖𑁄𑀝𑀫𑀼𑀔𑁄𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀘𑀗𑁆𑀓𑀫𑀸 𑀑𑀭𑁄𑀳𑀺𑀢𑁆𑀯𑀸 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀔𑁄 𑀖𑁄𑀝𑀫𑀼𑀔𑀁 𑀩𑁆𑀭𑀸𑀳𑁆𑀫𑀡𑀁 𑀆𑀬𑀲𑁆𑀫𑀸 𑀉𑀤𑁂𑀦𑁄 𑀏𑀢𑀤𑀯𑁄𑀘 𑁋 ‘‘𑀲𑀁𑀯𑀺𑀚𑁆𑀚𑀦𑁆𑀢𑀺 [𑀲𑀁𑀯𑀺𑀚𑁆𑀚𑀦𑁆𑀢𑁂 (𑀩𑀳𑀽𑀲𑀼)] 𑀔𑁄, 𑀩𑁆𑀭𑀸𑀳𑁆𑀫𑀡, 𑀆𑀲𑀦𑀸𑀦𑀺. 𑀲𑀘𑁂 𑀆𑀓𑀗𑁆𑀔𑀲𑀺, 𑀦𑀺𑀲𑀻𑀤𑀸’’𑀢𑀺. ‘‘𑀏𑀢𑀤𑁂𑀯 𑀔𑁄 𑀧𑀦 𑀫𑀬𑀁 𑀪𑁄𑀢𑁄 𑀉𑀤𑁂𑀦𑀲𑁆𑀲 𑀆𑀕𑀫𑀬𑀫𑀸𑀦𑀸 (𑀦) 𑀦𑀺𑀲𑀻𑀤𑀸𑀫. 𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀧𑀼𑀩𑁆𑀩𑁂 𑀅𑀦𑀺𑀫𑀦𑁆𑀢𑀺𑀢𑁄 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’’𑀢𑀺? 𑀅𑀣 𑀔𑁄 𑀖𑁄𑀝𑀫𑀼𑀔𑁄 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀖𑁄𑀝𑀫𑀼𑀔𑁄 𑀩𑁆𑀭𑀸𑀳𑁆𑀫𑀡𑁄 𑀆𑀬𑀲𑁆𑀫𑀦𑁆𑀢𑀁 𑀉𑀤𑁂𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀫𑁆𑀪𑁄 𑀲𑀫𑀡, ‘𑀦𑀢𑁆𑀣𑀺 𑀥𑀫𑁆𑀫𑀺𑀓𑁄 𑀧𑀭𑀺𑀩𑁆𑀩𑀚𑁄’ 𑁋 𑀏𑀯𑀁 𑀫𑁂 𑀏𑀢𑁆𑀣 𑀳𑁄𑀢𑀺. 𑀢𑀜𑁆𑀘 𑀔𑁄 𑀪𑀯𑀦𑁆𑀢𑀭𑀽𑀧𑀸𑀦𑀁 𑀯𑀸 𑀅𑀤𑀲𑁆𑀲𑀦𑀸, 𑀬𑁄 𑀯𑀸 𑀧𑀦𑁂𑀢𑁆𑀣 𑀥𑀫𑁆𑀫𑁄’’𑀢𑀺. ‘‘𑀲𑀘𑁂 𑀔𑁄 𑀧𑀦 𑀫𑁂 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀅𑀦𑀼𑀜𑁆𑀜𑁂𑀬𑁆𑀬𑀁 𑀅𑀦𑀼𑀚𑀸𑀦𑁂𑀬𑁆𑀬𑀸𑀲𑀺, 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀜𑁆𑀘 𑀧𑀝𑀺𑀓𑁆𑀓𑁄𑀲𑁂𑀬𑁆𑀬𑀸𑀲𑀺; 𑀬𑀲𑁆𑀲 𑀘 𑀧𑀦 𑀫𑁂 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀦 𑀚𑀸𑀦𑁂𑀬𑁆𑀬𑀸𑀲𑀺, 𑀫𑀫𑀁𑀬𑁂𑀯 𑀢𑀢𑁆𑀣 𑀉𑀢𑁆𑀢𑀭𑀺 𑀧𑀝𑀺𑀧𑀼𑀘𑁆𑀙𑁂𑀬𑁆𑀬𑀸𑀲𑀺 𑁋 ‘𑀇𑀤𑀁, 𑀪𑁄 𑀉𑀤𑁂𑀦, 𑀓𑀣𑀁, 𑀇𑀫𑀲𑁆𑀲 𑀓𑁆𑀯𑀢𑁆𑀣𑁄’𑀢𑀺? 𑀏𑀯𑀁 𑀓𑀢𑁆𑀯𑀸 𑀲𑀺𑀬𑀸 𑀦𑁄 𑀏𑀢𑁆𑀣 𑀓𑀣𑀸𑀲𑀮𑁆𑀮𑀸𑀧𑁄’’𑀢𑀺. ‘‘𑀅𑀦𑀼𑀜𑁆𑀜𑁂𑀬𑁆𑀬𑀁 𑀔𑁆𑀯𑀸𑀳𑀁 𑀪𑁄𑀢𑁄 𑀉𑀤𑁂𑀦𑀲𑁆𑀲 𑀅𑀦𑀼𑀚𑀸𑀦𑀺𑀲𑁆𑀲𑀸𑀫𑀺, 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀜𑁆𑀘 𑀧𑀝𑀺𑀓𑁆𑀓𑁄𑀲𑀺𑀲𑁆𑀲𑀸𑀫𑀺; 𑀬𑀲𑁆𑀲 𑀘 𑀧𑀦𑀸𑀳𑀁 𑀪𑁄𑀢𑁄 𑀉𑀤𑁂𑀦𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀦 𑀚𑀸𑀦𑀺𑀲𑁆𑀲𑀸𑀫𑀺, 𑀪𑀯𑀦𑁆𑀢𑀁𑀬𑁂𑀯 𑀢𑀢𑁆𑀣 𑀉𑀤𑁂𑀦𑀁 𑀉𑀢𑁆𑀢𑀭𑀺 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑁋 ‘𑀇𑀤𑀁, 𑀪𑁄 𑀉𑀤𑁂𑀦, 𑀓𑀣𑀁, 𑀇𑀫𑀲𑁆𑀲 𑀓𑁆𑀯𑀢𑁆𑀣𑁄’𑀢𑀺? 𑀏𑀯𑀁 𑀓𑀢𑁆𑀯𑀸 𑀳𑁄𑀢𑀼 𑀦𑁄 𑀏𑀢𑁆𑀣 𑀓𑀣𑀸𑀲𑀮𑁆𑀮𑀸𑀧𑁄’’𑀢𑀺.

𑁪𑁧𑁩. ‘‘𑀘𑀢𑁆𑀢𑀸𑀭𑁄𑀫𑁂, 𑀩𑁆𑀭𑀸𑀳𑁆𑀫𑀡, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀳𑁄𑀢𑀺 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄. 𑀇𑀥 𑀧𑀦, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀧𑀭𑀦𑁆𑀢𑀧𑁄 𑀳𑁄𑀢𑀺 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄. 𑀇𑀥 𑀧𑀦, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀘 𑀳𑁄𑀢𑀺 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀧𑀭𑀦𑁆𑀢𑀧𑁄 𑀘 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄. 𑀇𑀥 𑀧𑀦, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦𑁂𑀯𑀢𑁆𑀢𑀦𑁆𑀢𑀧𑁄 𑀳𑁄𑀢𑀺 𑀦𑀸𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄, 𑀦 𑀧𑀭𑀦𑁆𑀢𑀧𑁄 𑀦 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄. 𑀲𑁄 𑀅𑀦𑀢𑁆𑀢𑀦𑁆𑀢𑀧𑁄 𑀅𑀧𑀭𑀦𑁆𑀢𑀧𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀻𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺. 𑀇𑀫𑁂𑀲𑀁, 𑀩𑁆𑀭𑀸𑀳𑁆𑀫𑀡, 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀓𑀢𑀫𑁄 𑀢𑁂 𑀧𑀼𑀕𑁆𑀕𑀮𑁄 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀻’’𑀢𑀺?

‘‘𑀬𑁆𑀯𑀸𑀬𑀁, 𑀪𑁄 𑀉𑀤𑁂𑀦, 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀅𑀬𑀁 𑀫𑁂 𑀧𑀼𑀕𑁆𑀕𑀮𑁄 𑀘𑀺𑀢𑁆𑀢𑀁 𑀦𑀸𑀭𑀸𑀥𑁂𑀢𑀺; 𑀬𑁄𑀧𑀸𑀬𑀁, 𑀪𑁄 𑀉𑀤𑁂𑀦, 𑀧𑀼𑀕𑁆𑀕𑀮𑁄 𑀧𑀭𑀦𑁆𑀢𑀧𑁄 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀅𑀬𑀫𑁆𑀧𑀺 𑀫𑁂 𑀧𑀼𑀕𑁆𑀕𑀮𑁄 𑀘𑀺𑀢𑁆𑀢𑀁 𑀦𑀸𑀭𑀸𑀥𑁂𑀢𑀺; 𑀬𑁄𑀧𑀸𑀬𑀁, 𑀪𑁄 𑀉𑀤𑁂𑀦, 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀘 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀧𑀭𑀦𑁆𑀢𑀧𑁄 𑀘 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀅𑀬𑀫𑁆𑀧𑀺 𑀫𑁂 𑀧𑀼𑀕𑁆𑀕𑀮𑁄 𑀘𑀺𑀢𑁆𑀢𑀁 𑀦𑀸𑀭𑀸𑀥𑁂𑀢𑀺; 𑀬𑁄 𑀘 𑀔𑁄 𑀅𑀬𑀁, 𑀪𑁄 𑀉𑀤𑁂𑀦, 𑀧𑀼𑀕𑁆𑀕𑀮𑁄 𑀦𑁂𑀯𑀢𑁆𑀢𑀦𑁆𑀢𑀧𑁄 𑀦𑀸𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀦 𑀧𑀭𑀦𑁆𑀢𑀧𑁄 𑀦 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀲𑁄 𑀅𑀦𑀢𑁆𑀢𑀦𑁆𑀢𑀧𑁄 𑀅𑀧𑀭𑀦𑁆𑀢𑀧𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀻𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺. 𑀅𑀬𑀫𑁂𑀯 𑀫𑁂 𑀧𑀼𑀕𑁆𑀕𑀮𑁄 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀻’’𑀢𑀺.

‘‘𑀓𑀲𑁆𑀫𑀸 𑀧𑀦 𑀢𑁂, 𑀩𑁆𑀭𑀸𑀳𑁆𑀫𑀡, 𑀇𑀫𑁂 𑀢𑀬𑁄 𑀧𑀼𑀕𑁆𑀕𑀮𑀸 𑀘𑀺𑀢𑁆𑀢𑀁 𑀦𑀸𑀭𑀸𑀥𑁂𑀦𑁆𑀢𑀻’’𑀢𑀺? ‘‘𑀬𑁆𑀯𑀸𑀬𑀁, 𑀪𑁄 𑀉𑀤𑁂𑀦, 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀲𑁄 𑀅𑀢𑁆𑀢𑀸𑀦𑀁 𑀲𑀼𑀔𑀓𑀸𑀫𑀁 𑀤𑀼𑀓𑁆𑀔𑀧𑀝𑀺𑀓𑁆𑀓𑀽𑀮𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺; 𑀇𑀫𑀺𑀦𑀸 𑀫𑁂 𑀅𑀬𑀁 𑀧𑀼𑀕𑁆𑀕𑀮𑁄 𑀘𑀺𑀢𑁆𑀢𑀁 𑀦𑀸𑀭𑀸𑀥𑁂𑀢𑀺. 𑀬𑁄𑀧𑀸𑀬𑀁, 𑀪𑁄 𑀉𑀤𑁂𑀦, 𑀧𑀼𑀕𑁆𑀕𑀮𑁄 𑀧𑀭𑀦𑁆𑀢𑀧𑁄 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀲𑁄 𑀧𑀭𑀁 𑀲𑀼𑀔𑀓𑀸𑀫𑀁 𑀤𑀼𑀓𑁆𑀔𑀧𑀝𑀺𑀓𑁆𑀓𑀽𑀮𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺; 𑀇𑀫𑀺𑀦𑀸 𑀫𑁂 𑀅𑀬𑀁 𑀧𑀼𑀕𑁆𑀕𑀮𑁄 𑀘𑀺𑀢𑁆𑀢𑀁 𑀦𑀸𑀭𑀸𑀥𑁂𑀢𑀺. 𑀬𑁄𑀧𑀸𑀬𑀁, 𑀪𑁄 𑀉𑀤𑁂𑀦, 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀘 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀧𑀭𑀦𑁆𑀢𑀧𑁄 𑀘 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀲𑁄 𑀅𑀢𑁆𑀢𑀸𑀦𑀜𑁆𑀘 𑀧𑀭𑀜𑁆𑀘 𑀲𑀼𑀔𑀓𑀸𑀫𑀁 𑀤𑀼𑀓𑁆𑀔𑀧𑀝𑀺𑀓𑁆𑀓𑀽𑀮𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺; 𑀇𑀫𑀺𑀦𑀸 𑀫𑁂 𑀅𑀬𑀁 𑀧𑀼𑀕𑁆𑀕𑀮𑁄 𑀘𑀺𑀢𑁆𑀢𑀁 𑀦𑀸𑀭𑀸𑀥𑁂𑀢𑀺. 𑀬𑁄 𑀘 𑀔𑁄 𑀅𑀬𑀁, 𑀪𑁄 𑀉𑀤𑁂𑀦, 𑀧𑀼𑀕𑁆𑀕𑀮𑁄 𑀦𑁂𑀯𑀢𑁆𑀢𑀦𑁆𑀢𑀧𑁄 𑀦𑀸𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀦 𑀧𑀭𑀦𑁆𑀢𑀧𑁄 𑀦 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀲𑁄 𑀅𑀦𑀢𑁆𑀢𑀦𑁆𑀢𑀧𑁄 𑀅𑀧𑀭𑀦𑁆𑀢𑀧𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀻𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺, 𑀲𑁄 𑀅𑀢𑁆𑀢𑀸𑀦𑀜𑁆𑀘 𑀧𑀭𑀜𑁆𑀘 𑀲𑀼𑀔𑀓𑀸𑀫𑀁 𑀤𑀼𑀓𑁆𑀔𑀧𑀝𑀺𑀓𑁆𑀓𑀽𑀮𑀁 𑀦𑁂𑀯 𑀆𑀢𑀸𑀧𑁂𑀢𑀺 𑀦 𑀧𑀭𑀺𑀢𑀸𑀧𑁂𑀢𑀺; 𑀇𑀫𑀺𑀦𑀸 𑀫𑁂 𑀅𑀬𑀁 𑀧𑀼𑀕𑁆𑀕𑀮𑁄 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀻’’𑀢𑀺.

𑁪𑁧𑁪. ‘‘𑀤𑁆𑀯𑁂𑀫𑀸, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀲𑀸. 𑀓𑀢𑀫𑀸 𑀤𑁆𑀯𑁂? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑀸 𑀧𑀭𑀺𑀲𑀸 𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼 𑀧𑀼𑀢𑁆𑀢𑀪𑀭𑀺𑀬𑀁 𑀧𑀭𑀺𑀬𑁂𑀲𑀢𑀺, 𑀤𑀸𑀲𑀺𑀤𑀸𑀲𑀁 𑀧𑀭𑀺𑀬𑁂𑀲𑀢𑀺, 𑀔𑁂𑀢𑁆𑀢𑀯𑀢𑁆𑀣𑀼𑀁 𑀧𑀭𑀺𑀬𑁂𑀲𑀢𑀺, 𑀚𑀸𑀢𑀭𑀽𑀧𑀭𑀚𑀢𑀁 𑀧𑀭𑀺𑀬𑁂𑀲𑀢𑀺.

‘‘𑀇𑀥 𑀧𑀦, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑀸 𑀧𑀭𑀺𑀲𑀸 𑀅𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼 𑀧𑀼𑀢𑁆𑀢𑀪𑀭𑀺𑀬𑀁 𑀧𑀳𑀸𑀬, 𑀤𑀸𑀲𑀺𑀤𑀸𑀲𑀁 𑀧𑀳𑀸𑀬, 𑀔𑁂𑀢𑁆𑀢𑀯𑀢𑁆𑀣𑀼𑀁 𑀧𑀳𑀸𑀬, 𑀚𑀸𑀢𑀭𑀽𑀧𑀭𑀚𑀢𑀁 𑀧𑀳𑀸𑀬, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸. 𑀲𑁆𑀯𑀸𑀬𑀁, 𑀩𑁆𑀭𑀸𑀳𑁆𑀫𑀡, 𑀧𑀼𑀕𑁆𑀕𑀮𑁄 𑀦𑁂𑀯𑀢𑁆𑀢𑀦𑁆𑀢𑀧𑁄 𑀦𑀸𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀦 𑀧𑀭𑀦𑁆𑀢𑀧𑁄 𑀦 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄. 𑀲𑁄 𑀅𑀦𑀢𑁆𑀢𑀦𑁆𑀢𑀧𑁄 𑀅𑀧𑀭𑀦𑁆𑀢𑀧𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀻𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺. 𑀇𑀥 𑀓𑀢𑀫𑀁 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀧𑀼𑀕𑁆𑀕𑀮𑀁 𑀓𑀢𑀫𑀸𑀬 𑀧𑀭𑀺𑀲𑀸𑀬 𑀩𑀳𑀼𑀮𑀁 𑀲𑀫𑀦𑀼𑀧𑀲𑁆𑀲𑀲𑀺 𑁋 𑀬𑀸 𑀘𑀸𑀬𑀁 𑀧𑀭𑀺𑀲𑀸 𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼 𑀧𑀼𑀢𑁆𑀢𑀪𑀭𑀺𑀬𑀁 𑀧𑀭𑀺𑀬𑁂𑀲𑀢𑀺 𑀤𑀸𑀲𑀺𑀤𑀸𑀲𑀁 𑀧𑀭𑀺𑀬𑁂𑀲𑀢𑀺 𑀔𑁂𑀢𑁆𑀢𑀯𑀢𑁆𑀣𑀼𑀁 𑀧𑀭𑀺𑀬𑁂𑀲𑀢𑀺 𑀚𑀸𑀢𑀭𑀽𑀧𑀭𑀚𑀢𑀁 𑀧𑀭𑀺𑀬𑁂𑀲𑀢𑀺, 𑀬𑀸 𑀘𑀸𑀬𑀁 𑀧𑀭𑀺𑀲𑀸 𑀅𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼 𑀧𑀼𑀢𑁆𑀢𑀪𑀭𑀺𑀬𑀁 𑀧𑀳𑀸𑀬 𑀤𑀸𑀲𑀺𑀤𑀸𑀲𑀁 𑀧𑀳𑀸𑀬 𑀔𑁂𑀢𑁆𑀢𑀯𑀢𑁆𑀣𑀼𑀁 𑀧𑀳𑀸𑀬 𑀚𑀸𑀢𑀭𑀽𑀧𑀭𑀚𑀢𑀁 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸’’𑀢𑀺?

‘‘𑀬𑁆𑀯𑀸𑀬𑀁, 𑀪𑁄 𑀉𑀤𑁂𑀦, 𑀧𑀼𑀕𑁆𑀕𑀮𑁄 𑀦𑁂𑀯𑀢𑁆𑀢𑀦𑁆𑀢𑀧𑁄 𑀦𑀸𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀦 𑀧𑀭𑀦𑁆𑀢𑀧𑁄 𑀦 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀲𑁄 𑀅𑀦𑀢𑁆𑀢𑀦𑁆𑀢𑀧𑁄 𑀅𑀧𑀭𑀦𑁆𑀢𑀧𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀻𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺; 𑀇𑀫𑀸𑀳𑀁 𑀧𑀼𑀕𑁆𑀕𑀮𑀁 𑀬𑀸𑀬𑀁 𑀧𑀭𑀺𑀲𑀸 𑀅𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼 𑀧𑀼𑀢𑁆𑀢𑀪𑀭𑀺𑀬𑀁 𑀧𑀳𑀸𑀬 𑀤𑀸𑀲𑀺𑀤𑀸𑀲𑀁 𑀧𑀳𑀸𑀬 𑀔𑁂𑀢𑁆𑀢𑀯𑀢𑁆𑀣𑀼𑀁 𑀧𑀳𑀸𑀬 𑀚𑀸𑀢𑀭𑀽𑀧𑀭𑀚𑀢𑀁 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸 𑀇𑀫𑀺𑀲𑁆𑀲𑀁 𑀧𑀭𑀺𑀲𑀸𑀬𑀁 𑀩𑀳𑀼𑀮𑀁 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺.

‘‘𑀇𑀤𑀸𑀦𑁂𑀯 𑀔𑁄 𑀧𑀦 𑀢𑁂, 𑀩𑁆𑀭𑀸𑀳𑁆𑀫𑀡, 𑀪𑀸𑀲𑀺𑀢𑀁 𑁋 ‘𑀫𑀬𑀁 𑀏𑀯𑀁 𑀆𑀚𑀸𑀦𑀸𑀫 𑁋 𑀅𑀫𑁆𑀪𑁄 𑀲𑀫𑀡, 𑀦𑀢𑁆𑀣𑀺 𑀥𑀫𑁆𑀫𑀺𑀓𑁄 𑀧𑀭𑀺𑀩𑁆𑀩𑀚𑁄, 𑀏𑀯𑀁 𑀫𑁂 𑀏𑀢𑁆𑀣 𑀳𑁄𑀢𑀺. 𑀢𑀜𑁆𑀘 𑀔𑁄 𑀪𑀯𑀦𑁆𑀢𑀭𑀽𑀧𑀸𑀦𑀁 𑀯𑀸 𑀅𑀤𑀲𑁆𑀲𑀦𑀸, 𑀬𑁄 𑀯𑀸 𑀧𑀦𑁂𑀢𑁆𑀣 𑀥𑀫𑁆𑀫𑁄’’’𑀢𑀺. ‘‘𑀅𑀤𑁆𑀥𑀸 𑀫𑁂𑀲𑀸, 𑀪𑁄 𑀉𑀤𑁂𑀦, 𑀲𑀸𑀦𑀼𑀕𑁆𑀕𑀳𑀸 𑀯𑀸𑀘𑀸 𑀪𑀸𑀲𑀺𑀢𑀸. ‘𑀅𑀢𑁆𑀣𑀺 𑀥𑀫𑁆𑀫𑀺𑀓𑁄 𑀧𑀭𑀺𑀩𑁆𑀩𑀚𑁄’ 𑁋 𑀏𑀯𑀁 𑀫𑁂 𑀏𑀢𑁆𑀣 𑀳𑁄𑀢𑀺. 𑀏𑀯𑀜𑁆𑀘 𑀧𑀦 𑀫𑀁 𑀪𑀯𑀁 𑀉𑀤𑁂𑀦𑁄 𑀥𑀸𑀭𑁂𑀢𑀼. 𑀬𑁂 𑀘 𑀫𑁂 𑀪𑁄𑀢𑀸 𑀉𑀤𑁂𑀦𑁂𑀦 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀲𑀁𑀔𑀺𑀢𑁆𑀢𑁂𑀦 𑀯𑀼𑀢𑁆𑀢𑀸 𑀯𑀺𑀢𑁆𑀣𑀸𑀭𑁂𑀦 𑀅𑀯𑀺𑀪𑀢𑁆𑀢𑀸, 𑀲𑀸𑀥𑀼 𑀫𑁂 𑀪𑀯𑀁, 𑀉𑀤𑁂𑀦𑁄 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑁂 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀲𑀼𑀡𑀸𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀖𑁄𑀝𑀫𑀼𑀔𑁄 𑀩𑁆𑀭𑀸𑀳𑁆𑀫𑀡𑁄 𑀆𑀬𑀲𑁆𑀫𑀢𑁄 𑀉𑀤𑁂𑀦𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀆𑀬𑀲𑁆𑀫𑀸 𑀉𑀤𑁂𑀦𑁄 𑀏𑀢𑀤𑀯𑁄𑀘 𑁋

𑁪𑁧𑁫. ‘‘𑀓𑀢𑀫𑁄 𑀘, 𑀩𑁆𑀭𑀸𑀳𑁆𑀫𑀡, 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀘𑁂𑀮𑀓𑁄 𑀳𑁄𑀢𑀺 𑀫𑀼𑀢𑁆𑀢𑀸𑀘𑀸𑀭𑁄 𑀳𑀢𑁆𑀣𑀸𑀧𑀮𑁂𑀔𑀦𑁄 𑀦𑀏𑀳𑀺𑀪𑀤𑁆𑀤𑀦𑁆𑀢𑀺𑀓𑁄 𑀦𑀢𑀺𑀝𑁆𑀞𑀪𑀤𑁆𑀤𑀦𑁆𑀢𑀺𑀓𑁄, 𑀦𑀸𑀪𑀺𑀳𑀝𑀁 𑀦 𑀉𑀤𑁆𑀤𑀺𑀲𑁆𑀲𑀓𑀢𑀁 𑀦 𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀢𑀺. 𑀲𑁄 𑀦 𑀓𑀼𑀫𑁆𑀪𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦 𑀓𑀴𑁄𑀧𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦 𑀏𑀴𑀓𑀫𑀦𑁆𑀢𑀭𑀁, 𑀦 𑀤𑀡𑁆𑀟𑀫𑀦𑁆𑀢𑀭𑀁, 𑀦 𑀫𑀼𑀲𑀮𑀫𑀦𑁆𑀢𑀭𑀁, 𑀦 𑀤𑁆𑀯𑀺𑀦𑁆𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁, 𑀦 𑀕𑀩𑁆𑀪𑀺𑀦𑀺𑀬𑀸, 𑀦 𑀧𑀸𑀬𑀫𑀸𑀦𑀸𑀬, 𑀦 𑀧𑀼𑀭𑀺𑀲𑀦𑁆𑀢𑀭𑀕𑀢𑀸𑀬, 𑀦 𑀲𑀗𑁆𑀓𑀺𑀢𑁆𑀢𑀻𑀲𑀼, 𑀦 𑀬𑀢𑁆𑀣 𑀲𑀸 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀦 𑀬𑀢𑁆𑀣 𑀫𑀓𑁆𑀔𑀺𑀓𑀸 𑀲𑀡𑁆𑀟𑀲𑀡𑁆𑀟𑀘𑀸𑀭𑀺𑀦𑀻, 𑀦 𑀫𑀘𑁆𑀙𑀁 𑀦 𑀫𑀁𑀲𑀁, 𑀦 𑀲𑀼𑀭𑀁 𑀦 𑀫𑁂𑀭𑀬𑀁 𑀦 𑀣𑀼𑀲𑁄𑀤𑀓𑀁 𑀧𑀺𑀯𑀢𑀺. 𑀲𑁄 𑀏𑀓𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀏𑀓𑀸𑀮𑁄𑀧𑀺𑀓𑁄, 𑀤𑁆𑀯𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀤𑁆𑀯𑀸𑀮𑁄𑀧𑀺𑀓𑁄…𑀧𑁂… 𑀲𑀢𑁆𑀢𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀲𑀢𑁆𑀢𑀸𑀮𑁄𑀧𑀺𑀓𑁄; 𑀏𑀓𑀺𑀲𑁆𑀲𑀸𑀧𑀺 𑀤𑀢𑁆𑀢𑀺𑀬𑀸 𑀬𑀸𑀧𑁂𑀢𑀺, 𑀤𑁆𑀯𑀻𑀳𑀺𑀧𑀺 𑀤𑀢𑁆𑀢𑀻𑀳𑀺 𑀬𑀸𑀧𑁂𑀢𑀺…𑀧𑁂… 𑀲𑀢𑁆𑀢𑀳𑀺𑀧𑀺 𑀤𑀢𑁆𑀢𑀻𑀳𑀺 𑀬𑀸𑀧𑁂𑀢𑀺; 𑀏𑀓𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺, 𑀤𑁆𑀯𑀻𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺…𑀧𑁂… 𑀲𑀢𑁆𑀢𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑁋 𑀇𑀢𑀺 𑀏𑀯𑀭𑀽𑀧𑀁 𑀅𑀤𑁆𑀥𑀫𑀸𑀲𑀺𑀓𑀁 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀲𑁄 𑀲𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀲𑀸𑀫𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀦𑀻𑀯𑀸𑀭𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀤𑀤𑁆𑀤𑀼𑀮𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀳𑀝𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀓𑀡𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀆𑀘𑀸𑀫𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀧𑀺𑀜𑁆𑀜𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀢𑀺𑀡𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀕𑁄𑀫𑀬𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀬𑀸𑀧𑁂𑀢𑀺 𑀧𑀯𑀢𑁆𑀢𑀨𑀮𑀪𑁄𑀚𑀻. 𑀲𑁄 𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀫𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀙𑀯𑀤𑀼𑀲𑁆𑀲𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀧𑀁𑀲𑀼𑀓𑀽𑀮𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀢𑀺𑀭𑀻𑀝𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀅𑀚𑀺𑀦𑀫𑁆𑀧𑀺 𑀥𑀸𑀭𑁂𑀢𑀺, 𑀅𑀚𑀺𑀦𑀓𑁆𑀔𑀺𑀧𑀫𑁆𑀧𑀺 𑀥𑀸𑀭𑁂𑀢𑀺, 𑀓𑀼𑀲𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺, 𑀯𑀸𑀓𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺, 𑀨𑀮𑀓𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺, 𑀓𑁂𑀲𑀓𑀫𑁆𑀩𑀮𑀫𑁆𑀧𑀺 𑀥𑀸𑀭𑁂𑀢𑀺, 𑀯𑀸𑀴𑀓𑀫𑁆𑀩𑀮𑀫𑁆𑀧𑀺 𑀥𑀸𑀭𑁂𑀢𑀺, 𑀉𑀮𑀽𑀓𑀧𑀓𑁆𑀔𑀫𑁆𑀧𑀺 𑀥𑀸𑀭𑁂𑀢𑀺; 𑀓𑁂𑀲𑀫𑀲𑁆𑀲𑀼𑀮𑁄𑀘𑀓𑁄𑀧𑀺 𑀳𑁄𑀢𑀺 𑀓𑁂𑀲𑀫𑀲𑁆𑀲𑀼𑀮𑁄𑀘𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄, 𑀉𑀩𑁆𑀪𑀝𑁆𑀞𑀓𑁄𑀧𑀺 𑀳𑁄𑀢𑀺 𑀆𑀲𑀦𑀧𑀝𑀺𑀓𑁆𑀔𑀺𑀢𑁆𑀢𑁄, 𑀉𑀓𑁆𑀓𑀼𑀝𑀺𑀓𑁄𑀧𑀺 𑀳𑁄𑀢𑀺 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄, 𑀓𑀡𑁆𑀝𑀓𑀸𑀧𑀲𑁆𑀲𑀬𑀺𑀓𑁄𑀧𑀺 𑀳𑁄𑀢𑀺 𑀓𑀡𑁆𑀝𑀓𑀸𑀧𑀲𑁆𑀲𑀬𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺; 𑀲𑀸𑀬𑀢𑀢𑀺𑀬𑀓𑀫𑁆𑀧𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺 𑁋 𑀇𑀢𑀺 𑀏𑀯𑀭𑀽𑀧𑀁 𑀅𑀦𑁂𑀓𑀯𑀺𑀳𑀺𑀢𑀁 𑀓𑀸𑀬𑀲𑁆𑀲 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄.

𑁪𑁧𑁬. ‘‘𑀓𑀢𑀫𑁄 𑀘, 𑀩𑁆𑀭𑀸𑀳𑁆𑀫𑀡, 𑀧𑀼𑀕𑁆𑀕𑀮𑁄 𑀧𑀭𑀦𑁆𑀢𑀧𑁄 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀑𑀭𑀩𑁆𑀪𑀺𑀓𑁄 𑀳𑁄𑀢𑀺 𑀲𑀽𑀓𑀭𑀺𑀓𑁄 𑀲𑀸𑀓𑀼𑀡𑀺𑀓𑁄 𑀫𑀸𑀕𑀯𑀺𑀓𑁄 𑀮𑀼𑀤𑁆𑀤𑁄 𑀫𑀘𑁆𑀙𑀖𑀸𑀢𑀓𑁄 𑀘𑁄𑀭𑁄 𑀘𑁄𑀭𑀖𑀸𑀢𑀓𑁄 𑀕𑁄𑀖𑀸𑀢𑀓𑁄 𑀩𑀦𑁆𑀥𑀦𑀸𑀕𑀸𑀭𑀺𑀓𑁄 𑁋 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀧𑀼𑀕𑁆𑀕𑀮𑁄 𑀧𑀭𑀦𑁆𑀢𑀧𑁄 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄.

𑁪𑁧𑁭. ‘‘𑀓𑀢𑀫𑁄 𑀘, 𑀩𑁆𑀭𑀸𑀳𑁆𑀫𑀡, 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀘 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄, 𑀧𑀭𑀦𑁆𑀢𑀧𑁄 𑀘 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄? 𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀭𑀸𑀚𑀸 𑀯𑀸 𑀳𑁄𑀢𑀺 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄, 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀫𑀳𑀸𑀲𑀸𑀮𑁄. 𑀲𑁄 𑀧𑀼𑀭𑀢𑁆𑀣𑀺𑀫𑁂𑀦 𑀦𑀕𑀭𑀲𑁆𑀲 𑀦𑀯𑀁 𑀲𑀦𑁆𑀣𑀸𑀕𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀔𑀭𑀸𑀚𑀺𑀦𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑀧𑁆𑀧𑀺𑀢𑁂𑀮𑁂𑀦 𑀓𑀸𑀬𑀁 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀫𑀕𑀯𑀺𑀲𑀸𑀡𑁂𑀦 𑀧𑀺𑀝𑁆𑀞𑀺𑀁 𑀓𑀡𑁆𑀟𑀼𑀯𑀫𑀸𑀦𑁄 𑀦𑀯𑀁 𑀲𑀦𑁆𑀣𑀸𑀕𑀸𑀭𑀁 𑀧𑀯𑀺𑀲𑀢𑀺 𑀲𑀤𑁆𑀥𑀺𑀁 𑀫𑀳𑁂𑀲𑀺𑀬𑀸 𑀩𑁆𑀭𑀸𑀳𑁆𑀫𑀡𑁂𑀦 𑀘 𑀧𑀼𑀭𑁄𑀳𑀺𑀢𑁂𑀦. 𑀲𑁄 𑀢𑀢𑁆𑀣 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀳𑀭𑀺𑀢𑀼𑀧𑀮𑀺𑀢𑁆𑀢𑀸𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀏𑀓𑀺𑀲𑁆𑀲𑀸𑀬 𑀕𑀸𑀯𑀺𑀬𑀸 𑀲𑀭𑀽𑀧𑀯𑀘𑁆𑀙𑀸𑀬 𑀬𑀁 𑀏𑀓𑀲𑁆𑀫𑀺𑀁 𑀣𑀦𑁂 𑀔𑀻𑀭𑀁 𑀳𑁄𑀢𑀺 𑀢𑁂𑀦 𑀭𑀸𑀚𑀸 𑀬𑀸𑀧𑁂𑀢𑀺, 𑀬𑀁 𑀤𑀼𑀢𑀺𑀬𑀲𑁆𑀫𑀺𑀁 𑀣𑀦𑁂 𑀔𑀻𑀭𑀁 𑀳𑁄𑀢𑀺 𑀢𑁂𑀦 𑀫𑀳𑁂𑀲𑀻 𑀬𑀸𑀧𑁂𑀢𑀺, 𑀬𑀁 𑀢𑀢𑀺𑀬𑀲𑁆𑀫𑀺𑀁 𑀣𑀦𑁂 𑀔𑀻𑀭𑀁 𑀳𑁄𑀢𑀺 𑀢𑁂𑀦 𑀩𑁆𑀭𑀸𑀳𑁆𑀫𑀡𑁄 𑀧𑀼𑀭𑁄𑀳𑀺𑀢𑁄 𑀬𑀸𑀧𑁂𑀢𑀺, 𑀬𑀁 𑀘𑀢𑀼𑀢𑁆𑀣𑀲𑁆𑀫𑀺𑀁 𑀣𑀦𑁂 𑀔𑀻𑀭𑀁 𑀳𑁄𑀢𑀺 𑀢𑁂𑀦 𑀅𑀕𑁆𑀕𑀺𑀁 𑀚𑀼𑀳𑀢𑀺, 𑀅𑀯𑀲𑁂𑀲𑁂𑀦 𑀯𑀘𑁆𑀙𑀓𑁄 𑀬𑀸𑀧𑁂𑀢𑀺. 𑀲𑁄 𑀏𑀯𑀫𑀸𑀳 𑁋 ‘𑀏𑀢𑁆𑀢𑀓𑀸 𑀉𑀲𑀪𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀯𑀘𑁆𑀙𑀢𑀭𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀯𑀘𑁆𑀙𑀢𑀭𑀺𑀬𑁄 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀅𑀚𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬’, 𑀏𑀢𑁆𑀢𑀓𑀸 𑀉𑀭𑀩𑁆𑀪𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀅𑀲𑁆𑀲𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀭𑀼𑀓𑁆𑀔𑀸 𑀙𑀺𑀚𑁆𑀚𑀦𑁆𑀢𑀼 𑀬𑀽𑀧𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀤𑀩𑁆𑀪𑀸 𑀮𑀽𑀬𑀦𑁆𑀢𑀼 𑀩𑀭𑀺𑀳𑀺𑀲𑀢𑁆𑀣𑀸𑀬𑀸’𑀢𑀺. 𑀬𑁂𑀧𑀺𑀲𑁆𑀲 𑀢𑁂 𑀳𑁄𑀦𑁆𑀢𑀺 ‘𑀤𑀸𑀲𑀸’𑀢𑀺 𑀯𑀸 ‘𑀧𑁂𑀲𑁆𑀲𑀸’𑀢𑀺 𑀯𑀸 ‘𑀓𑀫𑁆𑀫𑀓𑀭𑀸’𑀢𑀺 𑀯𑀸 𑀢𑁂𑀧𑀺 𑀤𑀡𑁆𑀟𑀢𑀚𑁆𑀚𑀺𑀢𑀸 𑀪𑀬𑀢𑀚𑁆𑀚𑀺𑀢𑀸 𑀅𑀲𑁆𑀲𑀼𑀫𑀼𑀔𑀸 𑀭𑀼𑀤𑀫𑀸𑀦𑀸 𑀧𑀭𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀘 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄, 𑀧𑀭𑀦𑁆𑀢𑀧𑁄 𑀘 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄.

𑁪𑁧𑁮. ‘‘𑀓𑀢𑀫𑁄 𑀘, 𑀩𑁆𑀭𑀸𑀳𑁆𑀫𑀡, 𑀧𑀼𑀕𑁆𑀕𑀮𑁄 𑀦𑁂𑀯𑀢𑁆𑀢𑀦𑁆𑀢𑀧𑁄 𑀦𑀸𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄, 𑀦 𑀧𑀭𑀦𑁆𑀢𑀧𑁄 𑀦 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄; 𑀲𑁄 𑀅𑀦𑀢𑁆𑀢𑀦𑁆𑀢𑀧𑁄 𑀅𑀧𑀭𑀦𑁆𑀢𑀧𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀻𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺? 𑀇𑀥, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀢𑀁 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄. 𑀲𑁄 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀣𑀸𑀕𑀢𑁂 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑁂𑀦 𑀲𑀤𑁆𑀥𑀸𑀧𑀝𑀺𑀮𑀸𑀪𑁂𑀦 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑁄𑀧𑀣𑁄 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸. 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀧𑁆𑀧𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬, 𑀅𑀧𑁆𑀧𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬, 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺.

‘‘𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀤𑀺𑀦𑁆𑀦𑀸𑀤𑀸𑀬𑀻 𑀤𑀺𑀦𑁆𑀦𑀧𑀸𑀝𑀺𑀓𑀗𑁆𑀔𑀻. 𑀅𑀣𑁂𑀦𑁂𑀦 𑀲𑀼𑀘𑀺𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺.

‘‘𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀳𑀸𑀬 𑀩𑁆𑀭𑀳𑁆𑀫𑀘𑀸𑀭𑀻 𑀳𑁄𑀢𑀺 𑀆𑀭𑀸𑀘𑀸𑀭𑀻 𑀯𑀺𑀭𑀢𑁄 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸.

‘‘𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀲𑀘𑁆𑀘𑀯𑀸𑀤𑀻 𑀲𑀘𑁆𑀘𑀲𑀦𑁆𑀥𑁄 𑀣𑁂𑀢𑁄 𑀧𑀘𑁆𑀘𑀬𑀺𑀓𑁄 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲.

‘‘𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺; 𑀇𑀢𑁄 𑀲𑀼𑀢𑁆𑀯𑀸 𑀦 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀦 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸 𑀲𑀳𑀺𑀢𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸, 𑀲𑀫𑀕𑁆𑀕𑀸𑀭𑀸𑀫𑁄 𑀲𑀫𑀕𑁆𑀕𑀭𑀢𑁄 𑀲𑀫𑀕𑁆𑀕𑀦𑀦𑁆𑀤𑀻 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

‘‘𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻, 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀁𑀳𑀺𑀢𑀁.

‘‘𑀲𑁄 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀏𑀓𑀪𑀢𑁆𑀢𑀺𑀓𑁄 𑀳𑁄𑀢𑀺 𑀭𑀢𑁆𑀢𑀽𑀧𑀭𑀢𑁄 𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸. 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀥𑀸𑀭𑀡𑀫𑀡𑁆𑀟𑀦𑀯𑀺𑀪𑀽𑀲𑀦𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀚𑀸𑀢𑀭𑀽𑀧𑀭𑀚𑀢𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀆𑀫𑀓𑀥𑀜𑁆𑀜𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀆𑀫𑀓𑀫𑀁𑀲𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀢𑁆𑀣𑀺𑀓𑀼𑀫𑀸𑀭𑀺𑀓𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀤𑀸𑀲𑀺𑀤𑀸𑀲𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀅𑀚𑁂𑀴𑀓𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀓𑀼𑀓𑁆𑀓𑀼𑀝𑀲𑀽𑀓𑀭𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀳𑀢𑁆𑀣𑀺𑀕𑀯𑀲𑁆𑀲𑀯𑀴𑀯𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀔𑁂𑀢𑁆𑀢𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀸𑀦𑀼𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀓𑀬𑀯𑀺𑀓𑁆𑀓𑀬𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀢𑀼𑀮𑀸𑀓𑀽𑀝𑀓𑀁𑀲𑀓𑀽𑀝𑀫𑀸𑀦𑀓𑀽𑀝𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀉𑀓𑁆𑀓𑁄𑀝𑀦𑀯𑀜𑁆𑀘𑀦𑀦𑀺𑀓𑀢𑀺𑀲𑀸𑀘𑀺𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀙𑁂𑀤𑀦𑀯𑀥𑀩𑀦𑁆𑀥𑀦𑀯𑀺𑀧𑀭𑀸𑀫𑁄𑀲𑀆𑀮𑁄𑀧𑀲𑀳𑀲𑀸𑀓𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺.

‘‘𑀲𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦, 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦. 𑀲𑁄 𑀬𑁂𑀦 𑀬𑁂𑀦𑁂𑀯 𑀧𑀓𑁆𑀓𑀫𑀢𑀺 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀓𑁆𑀔𑀻 𑀲𑀓𑀼𑀡𑁄 𑀬𑁂𑀦 𑀬𑁂𑀦𑁂𑀯 𑀟𑁂𑀢𑀺 𑀲𑀧𑀢𑁆𑀢𑀪𑀸𑀭𑁄𑀯 𑀟𑁂𑀢𑀺, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦, 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦. 𑀲𑁄 𑀬𑁂𑀦 𑀬𑁂𑀦𑁂𑀯 𑀧𑀓𑁆𑀓𑀫𑀢𑀺 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀺. 𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀚𑁆𑀛𑀢𑁆𑀢𑀁 𑀅𑀦𑀯𑀚𑁆𑀚𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

𑁪𑁧𑁯. ‘‘𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬𑀦 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀚𑁆𑀛𑀢𑁆𑀢𑀁 𑀅𑀩𑁆𑀬𑀸𑀲𑁂𑀓𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

‘‘𑀲𑁄 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺.

‘‘𑀲𑁄 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄, (𑀇𑀫𑀸𑀬 𑀘 𑀅𑀭𑀺𑀬𑀸𑀬 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄,) [𑀧𑀲𑁆𑀲 𑀫. 𑀦𑀺. 𑁧.𑁨𑁯𑁬] 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁. 𑀲𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸, 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬, 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀲𑁄 𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺, 𑀅𑀪𑀺𑀚𑁆𑀛𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺; 𑀩𑁆𑀬𑀸𑀧𑀸𑀤𑀧𑀤𑁄𑀲𑀁 𑀧𑀳𑀸𑀬 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀯𑀺𑀳𑀭𑀢𑀺 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻, 𑀩𑁆𑀬𑀸𑀧𑀸𑀤𑀧𑀤𑁄𑀲𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺; 𑀣𑀺𑀦𑀫𑀺𑀤𑁆𑀥𑀁 𑀧𑀳𑀸𑀬 𑀯𑀺𑀕𑀢𑀣𑀻𑀦𑀫𑀺𑀤𑁆𑀥𑁄 𑀯𑀺𑀳𑀭𑀢𑀺 𑀆𑀮𑁄𑀓𑀲𑀜𑁆𑀜𑀻 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀣𑀻𑀦𑀫𑀺𑀤𑁆𑀥𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺; 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀸𑀬 𑀅𑀦𑀼𑀤𑁆𑀥𑀢𑁄 𑀯𑀺𑀳𑀭𑀢𑀺 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺; 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀳𑀭𑀢𑀺 𑀅𑀓𑀣𑀁𑀓𑀣𑀻 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺.

‘‘𑀲𑁄 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸, 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸, 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺.

𑁪𑁨𑁦. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺, 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄; 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄; 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸…𑀧𑁂… 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸…𑀧𑁂… 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; ‘𑀇𑀫𑁂 𑀆𑀲𑀯𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺.

‘‘𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀧𑀼𑀕𑁆𑀕𑀮𑁄 𑀦𑁂𑀯𑀢𑁆𑀢𑀦𑁆𑀢𑀧𑁄 𑀦𑀸𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄, 𑀦 𑀧𑀭𑀦𑁆𑀢𑀧𑁄 𑀦 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄. 𑀲𑁄 𑀅𑀦𑀢𑁆𑀢𑀦𑁆𑀢𑀧𑁄 𑀅𑀧𑀭𑀦𑁆𑀢𑀧𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀻𑀪𑀽𑀢𑁄 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻’’𑀢𑀺.

𑁪𑁨𑁧. 𑀏𑀯𑀁 𑀯𑀼𑀢𑁆𑀢𑁂, 𑀖𑁄𑀝𑀫𑀼𑀔𑁄 𑀩𑁆𑀭𑀸𑀳𑁆𑀫𑀡𑁄 𑀆𑀬𑀲𑁆𑀫𑀦𑁆𑀢𑀁 𑀉𑀤𑁂𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀉𑀤𑁂𑀦, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀉𑀤𑁂𑀦! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀉𑀤𑁂𑀦, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺 𑁋 𑀏𑀯𑀫𑁂𑀯𑀁 𑀪𑁄𑀢𑀸 𑀉𑀤𑁂𑀦𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁 𑀪𑀯𑀦𑁆𑀢𑀁 𑀉𑀤𑁂𑀦𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀉𑀤𑁂𑀦𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. ‘‘𑀫𑀸 𑀔𑁄 𑀫𑀁 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀲𑀭𑀡𑀁 𑀅𑀕𑀫𑀸𑀲𑀺. 𑀢𑀫𑁂𑀯 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀳𑀺 𑀬𑀫𑀳𑀁 𑀲𑀭𑀡𑀁 𑀕𑀢𑁄’’𑀢𑀺. ‘‘𑀓𑀳𑀁 𑀧𑀦, 𑀪𑁄 𑀉𑀤𑁂𑀦, 𑀏𑀢𑀭𑀳𑀺 𑀲𑁄 𑀪𑀯𑀁 𑀕𑁄𑀢𑀫𑁄 𑀯𑀺𑀳𑀭𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺? ‘‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀢𑀭𑀳𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺.

‘‘𑀲𑀘𑁂𑀧𑀺 [𑀲𑀘𑁂 𑀳𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑀬𑀁, 𑀪𑁄 𑀉𑀤𑁂𑀦, 𑀲𑀼𑀡𑁂𑀬𑁆𑀬𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑀲𑀼 𑀬𑁄𑀚𑀦𑁂𑀲𑀼, 𑀤𑀲𑀧𑀺 𑀫𑀬𑀁 𑀬𑁄𑀚𑀦𑀸𑀦𑀺 𑀕𑀘𑁆𑀙𑁂𑀬𑁆𑀬𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁. 𑀲𑀘𑁂𑀧𑀺 [𑀲𑀘𑁂 (𑀲𑀻. 𑀧𑀻.), 𑀲𑀘𑁂 𑀳𑀺 (𑀲𑁆𑀬𑀸. 𑀓𑀁.)] 𑀫𑀬𑀁, 𑀪𑁄 𑀉𑀤𑁂𑀦, 𑀲𑀼𑀡𑁂𑀬𑁆𑀬𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀯𑀻𑀲𑀢𑀺𑀬𑀸 𑀬𑁄𑀚𑀦𑁂𑀲𑀼… 𑀢𑀺𑀁𑀲𑀸𑀬 𑀬𑁄𑀚𑀦𑁂𑀲𑀼… 𑀘𑀢𑁆𑀢𑀸𑀭𑀻𑀲𑀸𑀬 𑀬𑁄𑀚𑀦𑁂𑀲𑀼… 𑀧𑀜𑁆𑀜𑀸𑀲𑀸𑀬 𑀬𑁄𑀚𑀦𑁂𑀲𑀼, 𑀧𑀜𑁆𑀜𑀸𑀲𑀫𑁆𑀧𑀺 𑀫𑀬𑀁 𑀬𑁄𑀚𑀦𑀸𑀦𑀺 𑀕𑀘𑁆𑀙𑁂𑀬𑁆𑀬𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁. 𑀬𑁄𑀚𑀦𑀲𑀢𑁂 𑀘𑁂𑀧𑀺 [𑀬𑁄𑀚𑀦𑀲𑀢𑁂𑀧𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑀬𑀁, 𑀪𑁄 𑀉𑀤𑁂𑀦, 𑀲𑀼𑀡𑁂𑀬𑁆𑀬𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁, 𑀬𑁄𑀚𑀦𑀲𑀢𑀫𑁆𑀧𑀺 𑀫𑀬𑀁 𑀕𑀘𑁆𑀙𑁂𑀬𑁆𑀬𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁.

‘‘𑀬𑀢𑁄 𑀘 𑀔𑁄, 𑀪𑁄 𑀉𑀤𑁂𑀦, 𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑁄 𑀪𑀯𑀁 𑀕𑁄𑀢𑀫𑁄, 𑀧𑀭𑀺𑀦𑀺𑀩𑁆𑀩𑀼𑀢𑀫𑁆𑀧𑀺 𑀫𑀬𑀁 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀉𑀤𑁂𑀦𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢𑀁. 𑀅𑀢𑁆𑀣𑀺 𑀘 𑀫𑁂, 𑀪𑁄 𑀉𑀤𑁂𑀦, 𑀅𑀗𑁆𑀕𑀭𑀸𑀚𑀸 𑀤𑁂𑀯𑀲𑀺𑀓𑀁 𑀦𑀺𑀘𑁆𑀘𑀪𑀺𑀓𑁆𑀔𑀁 𑀤𑀤𑀸𑀢𑀺, 𑀢𑀢𑁄 𑀅𑀳𑀁 𑀪𑁄𑀢𑁄 𑀉𑀤𑁂𑀦𑀲𑁆𑀲 𑀏𑀓𑀁 𑀦𑀺𑀘𑁆𑀘𑀪𑀺𑀓𑁆𑀔𑀁 𑀤𑀤𑀸𑀫𑀻’’𑀢𑀺. ‘‘𑀓𑀺𑀁 𑀧𑀦 𑀢𑁂, 𑀩𑁆𑀭𑀸𑀳𑁆𑀫𑀡, 𑀅𑀗𑁆𑀕𑀭𑀸𑀚𑀸 𑀤𑁂𑀯𑀲𑀺𑀓𑀁 𑀦𑀺𑀘𑁆𑀘𑀪𑀺𑀓𑁆𑀔𑀁 𑀤𑀤𑀸𑀢𑀻’’𑀢𑀺? ‘‘𑀧𑀜𑁆𑀘, 𑀪𑁄 𑀉𑀤𑁂𑀦, 𑀓𑀳𑀸𑀧𑀡𑀲𑀢𑀸𑀦𑀻’’𑀢𑀺. ‘‘𑀦 𑀔𑁄 𑀦𑁄, 𑀩𑁆𑀭𑀸𑀳𑁆𑀫𑀡, 𑀓𑀧𑁆𑀧𑀢𑀺 𑀚𑀸𑀢𑀭𑀽𑀧𑀭𑀚𑀢𑀁 𑀧𑀝𑀺𑀕𑁆𑀕𑀳𑁂𑀢𑀼’’𑀦𑁆𑀢𑀺. ‘‘𑀲𑀘𑁂 𑀢𑀁 𑀪𑁄𑀢𑁄 𑀉𑀤𑁂𑀦𑀲𑁆𑀲 𑀦 𑀓𑀧𑁆𑀧𑀢𑀺 𑀯𑀺𑀳𑀸𑀭𑀁 𑀪𑁄𑀢𑁄 𑀉𑀤𑁂𑀦𑀲𑁆𑀲 𑀓𑀸𑀭𑀸𑀧𑁂𑀲𑁆𑀲𑀸𑀫𑀻’’𑀢𑀺. ‘‘𑀲𑀘𑁂 𑀔𑁄 𑀫𑁂 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀯𑀺𑀳𑀸𑀭𑀁, 𑀓𑀸𑀭𑀸𑀧𑁂𑀢𑀼𑀓𑀸𑀫𑁄, 𑀧𑀸𑀝𑀮𑀺𑀧𑀼𑀢𑁆𑀢𑁂 𑀲𑀗𑁆𑀖𑀲𑁆𑀲 𑀉𑀧𑀝𑁆𑀞𑀸𑀦𑀲𑀸𑀮𑀁 𑀓𑀸𑀭𑀸𑀧𑁂𑀳𑀻’’𑀢𑀺. ‘‘𑀇𑀫𑀺𑀦𑀸𑀧𑀸𑀳𑀁 𑀪𑁄𑀢𑁄 𑀉𑀤𑁂𑀦𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀅𑀢𑁆𑀢𑀫𑀦𑁄 𑀅𑀪𑀺𑀭𑀤𑁆𑀥𑁄 𑀬𑀁 𑀫𑀁 𑀪𑀯𑀁 𑀉𑀤𑁂𑀦𑁄 𑀲𑀗𑁆𑀖𑁂 𑀤𑀸𑀦𑁂 𑀲𑀫𑀸𑀤𑀧𑁂𑀢𑀺. 𑀏𑀲𑀸𑀳𑀁, 𑀪𑁄 𑀉𑀤𑁂𑀦, 𑀏𑀢𑀺𑀲𑁆𑀲𑀸 𑀘 𑀦𑀺𑀘𑁆𑀘𑀪𑀺𑀓𑁆𑀔𑀸𑀬 𑀅𑀧𑀭𑀸𑀬 𑀘 𑀦𑀺𑀘𑁆𑀘𑀪𑀺𑀓𑁆𑀔𑀸𑀬 𑀧𑀸𑀝𑀮𑀺𑀧𑀼𑀢𑁆𑀢𑁂 𑀲𑀗𑁆𑀖𑀲𑁆𑀲 𑀉𑀧𑀝𑁆𑀞𑀸𑀦𑀲𑀸𑀮𑀁 𑀓𑀸𑀭𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀖𑁄𑀝𑀫𑀼𑀔𑁄 𑀩𑁆𑀭𑀸𑀳𑁆𑀫𑀡𑁄 𑀏𑀢𑀺𑀲𑁆𑀲𑀸 𑀘 𑀦𑀺𑀘𑁆𑀘𑀪𑀺𑀓𑁆𑀔𑀸𑀬 𑀅𑀧𑀭𑀸𑀬 𑀘 𑀦𑀺𑀘𑁆𑀘𑀪𑀺𑀓𑁆𑀔𑀸𑀬 𑀧𑀸𑀝𑀮𑀺𑀧𑀼𑀢𑁆𑀢𑁂 𑀲𑀗𑁆𑀖𑀲𑁆𑀲 𑀉𑀧𑀝𑁆𑀞𑀸𑀦𑀲𑀸𑀮𑀁 𑀓𑀸𑀭𑀸𑀧𑁂𑀲𑀺. 𑀲𑀸 𑀏𑀢𑀭𑀳𑀺 ‘𑀖𑁄𑀝𑀫𑀼𑀔𑀻’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀖𑁄𑀝𑀫𑀼𑀔𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.