𑁧. 𑀫𑀽𑀮𑀧𑀭𑀺𑀬𑀸𑀬𑀯𑀕𑁆𑀕𑁄

𑁧. 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀁

𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀉𑀓𑁆𑀓𑀝𑁆𑀞𑀸𑀬𑀁 𑀯𑀺𑀳𑀭𑀢𑀺 𑀲𑀼𑀪𑀕𑀯𑀦𑁂 𑀲𑀸𑀮𑀭𑀸𑀚𑀫𑀽𑀮𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁨. ‘‘𑀇𑀥, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑁋 𑀧𑀣𑀯𑀺𑀁 [𑀧𑀞𑀯𑀺𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀣𑀯𑀺𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀲𑀜𑁆𑀜𑀢𑁆𑀯𑀸 𑀧𑀣𑀯𑀺𑀁 𑀫𑀜𑁆𑀜𑀢𑀺, 𑀧𑀣𑀯𑀺𑀬𑀸 𑀫𑀜𑁆𑀜𑀢𑀺, 𑀧𑀣𑀯𑀺𑀢𑁄 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀆𑀧𑀁 𑀆𑀧𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀆𑀧𑀁 𑀆𑀧𑀢𑁄 𑀲𑀜𑁆𑀜𑀢𑁆𑀯𑀸 𑀆𑀧𑀁 𑀫𑀜𑁆𑀜𑀢𑀺, 𑀆𑀧𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀆𑀧𑀢𑁄 𑀫𑀜𑁆𑀜𑀢𑀺, 𑀆𑀧𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀆𑀧𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀢𑁂𑀚𑀁 𑀢𑁂𑀚𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀢𑁂𑀚𑀁 𑀢𑁂𑀚𑀢𑁄 𑀲𑀜𑁆𑀜𑀢𑁆𑀯𑀸 𑀢𑁂𑀚𑀁 𑀫𑀜𑁆𑀜𑀢𑀺, 𑀢𑁂𑀚𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀢𑁂𑀚𑀢𑁄 𑀫𑀜𑁆𑀜𑀢𑀺, 𑀢𑁂𑀚𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀢𑁂𑀚𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀯𑀸𑀬𑀁 𑀯𑀸𑀬𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀯𑀸𑀬𑀁 𑀯𑀸𑀬𑀢𑁄 𑀲𑀜𑁆𑀜𑀢𑁆𑀯𑀸 𑀯𑀸𑀬𑀁 𑀫𑀜𑁆𑀜𑀢𑀺, 𑀯𑀸𑀬𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀯𑀸𑀬𑀢𑁄 𑀫𑀜𑁆𑀜𑀢𑀺, 𑀯𑀸𑀬𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀯𑀸𑀬𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

𑁩. ‘‘𑀪𑀽𑀢𑁂 𑀪𑀽𑀢𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀪𑀽𑀢𑁂 𑀪𑀽𑀢𑀢𑁄 𑀲𑀜𑁆𑀜𑀢𑁆𑀯𑀸 𑀪𑀽𑀢𑁂 𑀫𑀜𑁆𑀜𑀢𑀺, 𑀪𑀽𑀢𑁂𑀲𑀼 𑀫𑀜𑁆𑀜𑀢𑀺, 𑀪𑀽𑀢𑀢𑁄 𑀫𑀜𑁆𑀜𑀢𑀺, 𑀪𑀽𑀢𑁂 𑀫𑁂𑀢𑀺 𑀫𑀜𑁆𑀜𑀢𑀺, 𑀪𑀽𑀢𑁂 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀤𑁂𑀯𑁂 𑀤𑁂𑀯𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀤𑁂𑀯𑁂 𑀤𑁂𑀯𑀢𑁄 𑀲𑀜𑁆𑀜𑀢𑁆𑀯𑀸 𑀤𑁂𑀯𑁂 𑀫𑀜𑁆𑀜𑀢𑀺, 𑀤𑁂𑀯𑁂𑀲𑀼 𑀫𑀜𑁆𑀜𑀢𑀺, 𑀤𑁂𑀯𑀢𑁄 𑀫𑀜𑁆𑀜𑀢𑀺, 𑀤𑁂𑀯𑁂 𑀫𑁂𑀢𑀺 𑀫𑀜𑁆𑀜𑀢𑀺, 𑀤𑁂𑀯𑁂 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀧𑀚𑀸𑀧𑀢𑀺𑀁 𑀧𑀚𑀸𑀧𑀢𑀺𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀧𑀚𑀸𑀧𑀢𑀺𑀁 𑀧𑀚𑀸𑀧𑀢𑀺𑀢𑁄 𑀲𑀜𑁆𑀜𑀢𑁆𑀯𑀸 𑀧𑀚𑀸𑀧𑀢𑀺𑀁 𑀫𑀜𑁆𑀜𑀢𑀺, 𑀧𑀚𑀸𑀧𑀢𑀺𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀧𑀚𑀸𑀧𑀢𑀺𑀢𑁄 𑀫𑀜𑁆𑀜𑀢𑀺, 𑀧𑀚𑀸𑀧𑀢𑀺𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀧𑀚𑀸𑀧𑀢𑀺𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀩𑁆𑀭𑀳𑁆𑀫𑀁 𑀩𑁆𑀭𑀳𑁆𑀫𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀩𑁆𑀭𑀳𑁆𑀫𑀁 𑀩𑁆𑀭𑀳𑁆𑀫𑀢𑁄 𑀲𑀜𑁆𑀜𑀢𑁆𑀯𑀸 𑀩𑁆𑀭𑀳𑁆𑀫𑀁 𑀫𑀜𑁆𑀜𑀢𑀺, 𑀩𑁆𑀭𑀳𑁆𑀫𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀩𑁆𑀭𑀳𑁆𑀫𑀢𑁄 𑀫𑀜𑁆𑀜𑀢𑀺, 𑀩𑁆𑀭𑀳𑁆𑀫𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀩𑁆𑀭𑀳𑁆𑀫𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀆𑀪𑀲𑁆𑀲𑀭𑁂 𑀆𑀪𑀲𑁆𑀲𑀭𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀆𑀪𑀲𑁆𑀲𑀭𑁂 𑀆𑀪𑀲𑁆𑀲𑀭𑀢𑁄 𑀲𑀜𑁆𑀜𑀢𑁆𑀯𑀸 𑀆𑀪𑀲𑁆𑀲𑀭𑁂 𑀫𑀜𑁆𑀜𑀢𑀺, 𑀆𑀪𑀲𑁆𑀲𑀭𑁂𑀲𑀼 𑀫𑀜𑁆𑀜𑀢𑀺, 𑀆𑀪𑀲𑁆𑀲𑀭𑀢𑁄 𑀫𑀜𑁆𑀜𑀢𑀺, 𑀆𑀪𑀲𑁆𑀲𑀭𑁂 𑀫𑁂𑀢𑀺 𑀫𑀜𑁆𑀜𑀢𑀺, 𑀆𑀪𑀲𑁆𑀲𑀭𑁂 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀲𑀼𑀪𑀓𑀺𑀡𑁆𑀳𑁂 𑀲𑀼𑀪𑀓𑀺𑀡𑁆𑀳𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀲𑀼𑀪𑀓𑀺𑀡𑁆𑀳𑁂 𑀲𑀼𑀪𑀓𑀺𑀡𑁆𑀳𑀢𑁄 𑀲𑀜𑁆𑀜𑀢𑁆𑀯𑀸 𑀲𑀼𑀪𑀓𑀺𑀡𑁆𑀳𑁂 𑀫𑀜𑁆𑀜𑀢𑀺, 𑀲𑀼𑀪𑀓𑀺𑀡𑁆𑀳𑁂𑀲𑀼 𑀫𑀜𑁆𑀜𑀢𑀺, 𑀲𑀼𑀪𑀓𑀺𑀡𑁆𑀳𑀢𑁄 𑀫𑀜𑁆𑀜𑀢𑀺, 𑀲𑀼𑀪𑀓𑀺𑀡𑁆𑀳𑁂 𑀫𑁂𑀢𑀺 𑀫𑀜𑁆𑀜𑀢𑀺, 𑀲𑀼𑀪𑀓𑀺𑀡𑁆𑀳𑁂 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀯𑁂𑀳𑀧𑁆𑀨𑀮𑁂 𑀯𑁂𑀳𑀧𑁆𑀨𑀮𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀯𑁂𑀳𑀧𑁆𑀨𑀮𑁂 𑀯𑁂𑀳𑀧𑁆𑀨𑀮𑀢𑁄 𑀲𑀜𑁆𑀜𑀢𑁆𑀯𑀸 𑀯𑁂𑀳𑀧𑁆𑀨𑀮𑁂 𑀫𑀜𑁆𑀜𑀢𑀺, 𑀯𑁂𑀳𑀧𑁆𑀨𑀮𑁂𑀲𑀼 𑀫𑀜𑁆𑀜𑀢𑀺, 𑀯𑁂𑀳𑀧𑁆𑀨𑀮𑀢𑁄 𑀫𑀜𑁆𑀜𑀢𑀺, 𑀯𑁂𑀳𑀧𑁆𑀨𑀮𑁂 𑀫𑁂𑀢𑀺 𑀫𑀜𑁆𑀜𑀢𑀺, 𑀯𑁂𑀳𑀧𑁆𑀨𑀮𑁂 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀅𑀪𑀺𑀪𑀼𑀁 𑀅𑀪𑀺𑀪𑀽𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀅𑀪𑀺𑀪𑀼𑀁 𑀅𑀪𑀺𑀪𑀽𑀢𑁄 𑀲𑀜𑁆𑀜𑀢𑁆𑀯𑀸 𑀅𑀪𑀺𑀪𑀼𑀁 𑀫𑀜𑁆𑀜𑀢𑀺, 𑀅𑀪𑀺𑀪𑀼𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀅𑀪𑀺𑀪𑀽𑀢𑁄 𑀫𑀜𑁆𑀜𑀢𑀺, 𑀅𑀪𑀺𑀪𑀼𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀅𑀪𑀺𑀪𑀼𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

𑁪. ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀢𑁄 𑀲𑀜𑁆𑀜𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀫𑀜𑁆𑀜𑀢𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀢𑁄 𑀫𑀜𑁆𑀜𑀢𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀢𑁄 𑀲𑀜𑁆𑀜𑀢𑁆𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀢𑁄 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀢𑁄 𑀲𑀜𑁆𑀜𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀫𑀜𑁆𑀜𑀢𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀢𑁄 𑀫𑀜𑁆𑀜𑀢𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀢𑁄 𑀲𑀜𑁆𑀜𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀫𑀜𑁆𑀜𑀢𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀢𑁄 𑀫𑀜𑁆𑀜𑀢𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

𑁫. ‘‘𑀤𑀺𑀝𑁆𑀞𑀁 𑀤𑀺𑀝𑁆𑀞𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀤𑀺𑀝𑁆𑀞𑀁 𑀤𑀺𑀝𑁆𑀞𑀢𑁄 𑀲𑀜𑁆𑀜𑀢𑁆𑀯𑀸 𑀤𑀺𑀝𑁆𑀞𑀁 𑀫𑀜𑁆𑀜𑀢𑀺, 𑀤𑀺𑀝𑁆𑀞𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀤𑀺𑀝𑁆𑀞𑀢𑁄 𑀫𑀜𑁆𑀜𑀢𑀺, 𑀤𑀺𑀝𑁆𑀞𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀤𑀺𑀝𑁆𑀞𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀲𑀼𑀢𑀁 𑀲𑀼𑀢𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀲𑀼𑀢𑀁 𑀲𑀼𑀢𑀢𑁄 𑀲𑀜𑁆𑀜𑀢𑁆𑀯𑀸 𑀲𑀼𑀢𑀁 𑀫𑀜𑁆𑀜𑀢𑀺, 𑀲𑀼𑀢𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀲𑀼𑀢𑀢𑁄 𑀫𑀜𑁆𑀜𑀢𑀺, 𑀲𑀼𑀢𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀲𑀼𑀢𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀫𑀼𑀢𑀁 𑀫𑀼𑀢𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀫𑀼𑀢𑀁 𑀫𑀼𑀢𑀢𑁄 𑀲𑀜𑁆𑀜𑀢𑁆𑀯𑀸 𑀫𑀼𑀢𑀁 𑀫𑀜𑁆𑀜𑀢𑀺, 𑀫𑀼𑀢𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀫𑀼𑀢𑀢𑁄 𑀫𑀜𑁆𑀜𑀢𑀺, 𑀫𑀼𑀢𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀫𑀼𑀢𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀯𑀺𑀜𑁆𑀜𑀸𑀢𑀁 𑀯𑀺𑀜𑁆𑀜𑀸𑀢𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀯𑀺𑀜𑁆𑀜𑀸𑀢𑀁 𑀯𑀺𑀜𑁆𑀜𑀸𑀢𑀢𑁄 𑀲𑀜𑁆𑀜𑀢𑁆𑀯𑀸 𑀯𑀺𑀜𑁆𑀜𑀸𑀢𑀁 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀢𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀢𑀢𑁄 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀢𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀢𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

𑁬. ‘‘𑀏𑀓𑀢𑁆𑀢𑀁 𑀏𑀓𑀢𑁆𑀢𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀏𑀓𑀢𑁆𑀢𑀁 𑀏𑀓𑀢𑁆𑀢𑀢𑁄 𑀲𑀜𑁆𑀜𑀢𑁆𑀯𑀸 𑀏𑀓𑀢𑁆𑀢𑀁 𑀫𑀜𑁆𑀜𑀢𑀺, 𑀏𑀓𑀢𑁆𑀢𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀏𑀓𑀢𑁆𑀢𑀢𑁄 𑀫𑀜𑁆𑀜𑀢𑀺, 𑀏𑀓𑀢𑁆𑀢𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀏𑀓𑀢𑁆𑀢𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀦𑀸𑀦𑀢𑁆𑀢𑀁 𑀦𑀸𑀦𑀢𑁆𑀢𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀦𑀸𑀦𑀢𑁆𑀢𑀁 𑀦𑀸𑀦𑀢𑁆𑀢𑀢𑁄 𑀲𑀜𑁆𑀜𑀢𑁆𑀯𑀸 𑀦𑀸𑀦𑀢𑁆𑀢𑀁 𑀫𑀜𑁆𑀜𑀢𑀺, 𑀦𑀸𑀦𑀢𑁆𑀢𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀦𑀸𑀦𑀢𑁆𑀢𑀢𑁄 𑀫𑀜𑁆𑀜𑀢𑀺, 𑀦𑀸𑀦𑀢𑁆𑀢𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀦𑀸𑀦𑀢𑁆𑀢𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀲𑀩𑁆𑀩𑀁 𑀲𑀩𑁆𑀩𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀲𑀩𑁆𑀩𑀁 𑀲𑀩𑁆𑀩𑀢𑁄 𑀲𑀜𑁆𑀜𑀢𑁆𑀯𑀸 𑀲𑀩𑁆𑀩𑀁 𑀫𑀜𑁆𑀜𑀢𑀺, 𑀲𑀩𑁆𑀩𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀲𑀩𑁆𑀩𑀢𑁄 𑀫𑀜𑁆𑀜𑀢𑀺, 𑀲𑀩𑁆𑀩𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀲𑀩𑁆𑀩𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀲𑀜𑁆𑀚𑀸𑀦𑀸𑀢𑀺; 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀲𑀜𑁆𑀜𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀲𑁆𑀫𑀺𑀁 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀢𑁄 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀁 𑀫𑁂𑀢𑀺 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀁 𑀅𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

𑀧𑀼𑀣𑀼𑀚𑁆𑀚𑀦𑀯𑀲𑁂𑀦 𑀧𑀞𑀫𑀦𑀬𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁄 𑀦𑀺𑀝𑁆𑀞𑀺𑀢𑁄.

𑁭. ‘‘𑀬𑁄𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀓𑁆𑀔𑁄 [𑀲𑁂𑀔𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀧𑁆𑀧𑀢𑁆𑀢𑀫𑀸𑀦𑀲𑁄 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀧𑀢𑁆𑀣𑀬𑀫𑀸𑀦𑁄 𑀯𑀺𑀳𑀭𑀢𑀺, 𑀲𑁄𑀧𑀺 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀅𑀪𑀺𑀚𑀸𑀦𑀸𑀢𑀺; 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀅𑀪𑀺𑀜𑁆𑀜𑀸𑀬 [𑀅𑀪𑀺𑀜𑁆𑀜𑀢𑁆𑀯𑀸 (𑀓.)] 𑀧𑀣𑀯𑀺𑀁 𑀫𑀸 𑀫𑀜𑁆𑀜𑀺 [𑀯𑀸 𑀫𑀜𑁆𑀜𑀢𑀺], 𑀧𑀣𑀯𑀺𑀬𑀸 𑀫𑀸 𑀫𑀜𑁆𑀜𑀺, 𑀧𑀣𑀯𑀺𑀢𑁄 𑀫𑀸 𑀫𑀜𑁆𑀜𑀺, 𑀧𑀣𑀯𑀺𑀁 𑀫𑁂𑀢𑀺 𑀫𑀸 𑀫𑀜𑁆𑀜𑀺, 𑀧𑀣𑀯𑀺𑀁 𑀫𑀸𑀪𑀺𑀦𑀦𑁆𑀤𑀺 [𑀯𑀸 𑀅𑀪𑀺𑀦𑀦𑁆𑀤𑀢𑀺 (𑀲𑀻.) 𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸]. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀧𑀭𑀺𑀜𑁆𑀜𑁂𑀬𑁆𑀬𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀆𑀧𑀁…𑀧𑁂… 𑀢𑁂𑀚𑀁… 𑀯𑀸𑀬𑀁… 𑀪𑀽𑀢𑁂… 𑀤𑁂𑀯𑁂… 𑀧𑀚𑀸𑀧𑀢𑀺𑀁… 𑀩𑁆𑀭𑀳𑁆𑀫𑀁… 𑀆𑀪𑀲𑁆𑀲𑀭𑁂… 𑀲𑀼𑀪𑀓𑀺𑀡𑁆𑀳𑁂… 𑀯𑁂𑀳𑀧𑁆𑀨𑀮𑁂… 𑀅𑀪𑀺𑀪𑀼𑀁… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁… 𑀤𑀺𑀝𑁆𑀞𑀁… 𑀲𑀼𑀢𑀁… 𑀫𑀼𑀢𑀁… 𑀯𑀺𑀜𑁆𑀜𑀸𑀢𑀁… 𑀏𑀓𑀢𑁆𑀢𑀁… 𑀦𑀸𑀦𑀢𑁆𑀢𑀁… 𑀲𑀩𑁆𑀩𑀁… 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀅𑀪𑀺𑀚𑀸𑀦𑀸𑀢𑀺; 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀅𑀪𑀺𑀜𑁆𑀜𑀸𑀬 𑀦𑀺𑀩𑁆𑀩𑀸𑀦𑀁 𑀫𑀸 𑀫𑀜𑁆𑀜𑀺, 𑀦𑀺𑀩𑁆𑀩𑀸𑀦𑀲𑁆𑀫𑀺𑀁 𑀫𑀸 𑀫𑀜𑁆𑀜𑀺, 𑀦𑀺𑀩𑁆𑀩𑀸𑀦𑀢𑁄 𑀫𑀸 𑀫𑀜𑁆𑀜𑀺, 𑀦𑀺𑀩𑁆𑀩𑀸𑀦𑀁 𑀫𑁂𑀢𑀺 𑀫𑀸 𑀫𑀜𑁆𑀜𑀺, 𑀦𑀺𑀩𑁆𑀩𑀸𑀦𑀁 𑀫𑀸𑀪𑀺𑀦𑀦𑁆𑀤𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀧𑀭𑀺𑀜𑁆𑀜𑁂𑀬𑁆𑀬𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

𑀲𑁂𑀓𑁆𑀔𑀯𑀲𑁂𑀦 [𑀲𑀢𑁆𑀣𑀸𑀭𑀯𑀲𑁂𑀦 (𑀲𑀻.), 𑀲𑀢𑁆𑀣𑀼𑀯𑀲𑁂𑀦 (𑀲𑁆𑀬𑀸. 𑀓.)] 𑀤𑀼𑀢𑀺𑀬𑀦𑀬𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁄 𑀦𑀺𑀝𑁆𑀞𑀺𑀢𑁄.

𑁮. ‘‘𑀬𑁄𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄, 𑀲𑁄𑀧𑀺 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀅𑀪𑀺𑀚𑀸𑀦𑀸𑀢𑀺; 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀅𑀪𑀺𑀜𑁆𑀜𑀸𑀬 𑀧𑀣𑀯𑀺𑀁 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀬𑀸 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀢𑁄 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀦𑀸𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀆𑀧𑀁…𑀧𑁂… 𑀢𑁂𑀚𑀁… 𑀯𑀸𑀬𑀁… 𑀪𑀽𑀢𑁂… 𑀤𑁂𑀯𑁂… 𑀧𑀚𑀸𑀧𑀢𑀺𑀁… 𑀩𑁆𑀭𑀳𑁆𑀫𑀁… 𑀆𑀪𑀲𑁆𑀲𑀭𑁂… 𑀲𑀼𑀪𑀓𑀺𑀡𑁆𑀳𑁂… 𑀯𑁂𑀳𑀧𑁆𑀨𑀮𑁂… 𑀅𑀪𑀺𑀪𑀼𑀁… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁… 𑀤𑀺𑀝𑁆𑀞𑀁… 𑀲𑀼𑀢𑀁… 𑀫𑀼𑀢𑀁… 𑀯𑀺𑀜𑁆𑀜𑀸𑀢𑀁… 𑀏𑀓𑀢𑁆𑀢𑀁… 𑀦𑀸𑀦𑀢𑁆𑀢𑀁… 𑀲𑀩𑁆𑀩𑀁… 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀅𑀪𑀺𑀚𑀸𑀦𑀸𑀢𑀺; 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀅𑀪𑀺𑀜𑁆𑀜𑀸𑀬 𑀦𑀺𑀩𑁆𑀩𑀸𑀦𑀁 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀢𑁄 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀁 𑀦𑀸𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

𑀔𑀻𑀡𑀸𑀲𑀯𑀯𑀲𑁂𑀦 𑀢𑀢𑀺𑀬𑀦𑀬𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁄 𑀦𑀺𑀝𑁆𑀞𑀺𑀢𑁄.

𑁯. ‘‘𑀬𑁄𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄, 𑀲𑁄𑀧𑀺 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀅𑀪𑀺𑀚𑀸𑀦𑀸𑀢𑀺; 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀅𑀪𑀺𑀜𑁆𑀜𑀸𑀬 𑀧𑀣𑀯𑀺𑀁 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀬𑀸 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀢𑁄 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀦𑀸𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀔𑀬𑀸 𑀭𑀸𑀕𑀲𑁆𑀲, 𑀯𑀻𑀢𑀭𑀸𑀕𑀢𑁆𑀢𑀸.

‘‘𑀆𑀧𑀁…𑀧𑁂… 𑀢𑁂𑀚𑀁… 𑀯𑀸𑀬𑀁… 𑀪𑀽𑀢𑁂… 𑀤𑁂𑀯𑁂… 𑀧𑀚𑀸𑀧𑀢𑀺𑀁… 𑀩𑁆𑀭𑀳𑁆𑀫𑀁… 𑀆𑀪𑀲𑁆𑀲𑀭𑁂… 𑀲𑀼𑀪𑀓𑀺𑀡𑁆𑀳𑁂… 𑀯𑁂𑀳𑀧𑁆𑀨𑀮𑁂… 𑀅𑀪𑀺𑀪𑀼𑀁… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 … 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 … 𑀤𑀺𑀝𑁆𑀞𑀁… 𑀲𑀼𑀢𑀁… 𑀫𑀼𑀢𑀁… 𑀯𑀺𑀜𑁆𑀜𑀸𑀢𑀁… 𑀏𑀓𑀢𑁆𑀢𑀁… 𑀦𑀸𑀦𑀢𑁆𑀢𑀁… 𑀲𑀩𑁆𑀩𑀁… 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀅𑀪𑀺𑀚𑀸𑀦𑀸𑀢𑀺; 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀅𑀪𑀺𑀜𑁆𑀜𑀸𑀬 𑀦𑀺𑀩𑁆𑀩𑀸𑀦𑀁 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀢𑁄 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀁 𑀦𑀸𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀔𑀬𑀸 𑀭𑀸𑀕𑀲𑁆𑀲, 𑀯𑀻𑀢𑀭𑀸𑀕𑀢𑁆𑀢𑀸.

𑀔𑀻𑀡𑀸𑀲𑀯𑀯𑀲𑁂𑀦 𑀘𑀢𑀼𑀢𑁆𑀣𑀦𑀬𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁄 𑀦𑀺𑀝𑁆𑀞𑀺𑀢𑁄.

𑁧𑁦. ‘‘𑀬𑁄𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄, 𑀲𑁄𑀧𑀺 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀅𑀪𑀺𑀚𑀸𑀦𑀸𑀢𑀺; 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀅𑀪𑀺𑀜𑁆𑀜𑀸𑀬 𑀧𑀣𑀯𑀺𑀁 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀬𑀸 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀢𑁄 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀦𑀸𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀔𑀬𑀸 𑀤𑁄𑀲𑀲𑁆𑀲, 𑀯𑀻𑀢𑀤𑁄𑀲𑀢𑁆𑀢𑀸.

‘‘𑀆𑀧𑀁…𑀧𑁂… 𑀢𑁂𑀚𑀁… 𑀯𑀸𑀬𑀁… 𑀪𑀽𑀢𑁂… 𑀤𑁂𑀯𑁂… 𑀧𑀚𑀸𑀧𑀢𑀺𑀁… 𑀩𑁆𑀭𑀳𑁆𑀫𑀁… 𑀆𑀪𑀲𑁆𑀲𑀭𑁂… 𑀲𑀼𑀪𑀓𑀺𑀡𑁆𑀳𑁂… 𑀯𑁂𑀳𑀧𑁆𑀨𑀮𑁂… 𑀅𑀪𑀺𑀪𑀼𑀁… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁… 𑀤𑀺𑀝𑁆𑀞𑀁… 𑀲𑀼𑀢𑀁… 𑀫𑀼𑀢𑀁… 𑀯𑀺𑀜𑁆𑀜𑀸𑀢𑀁… 𑀏𑀓𑀢𑁆𑀢𑀁… 𑀦𑀸𑀦𑀢𑁆𑀢𑀁… 𑀲𑀩𑁆𑀩𑀁… 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀅𑀪𑀺𑀚𑀸𑀦𑀸𑀢𑀺; 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀅𑀪𑀺𑀜𑁆𑀜𑀸𑀬 𑀦𑀺𑀩𑁆𑀩𑀸𑀦𑀁 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀢𑁄 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀁 𑀦𑀸𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀔𑀬𑀸 𑀤𑁄𑀲𑀲𑁆𑀲, 𑀯𑀻𑀢𑀤𑁄𑀲𑀢𑁆𑀢𑀸.

𑀔𑀻𑀡𑀸𑀲𑀯𑀯𑀲𑁂𑀦 𑀧𑀜𑁆𑀘𑀫𑀦𑀬𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁄 𑀦𑀺𑀝𑁆𑀞𑀺𑀢𑁄.

𑁧𑁧. ‘‘𑀬𑁄𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄, 𑀲𑁄𑀧𑀺 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀅𑀪𑀺𑀚𑀸𑀦𑀸𑀢𑀺; 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀅𑀪𑀺𑀜𑁆𑀜𑀸𑀬 𑀧𑀣𑀯𑀺𑀁 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀬𑀸 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀢𑁄 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀦𑀸𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀔𑀬𑀸 𑀫𑁄𑀳𑀲𑁆𑀲, 𑀯𑀻𑀢𑀫𑁄𑀳𑀢𑁆𑀢𑀸.

‘‘𑀆𑀧𑀁…𑀧𑁂… 𑀢𑁂𑀚𑀁… 𑀯𑀸𑀬𑀁… 𑀪𑀽𑀢𑁂… 𑀤𑁂𑀯𑁂… 𑀧𑀚𑀸𑀧𑀢𑀺𑀁… 𑀩𑁆𑀭𑀳𑁆𑀫𑀁… 𑀆𑀪𑀲𑁆𑀲𑀭𑁂… 𑀲𑀼𑀪𑀓𑀺𑀡𑁆𑀳𑁂… 𑀯𑁂𑀳𑀧𑁆𑀨𑀮𑁂… 𑀅𑀪𑀺𑀪𑀼𑀁… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 … 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁… 𑀤𑀺𑀝𑁆𑀞𑀁… 𑀲𑀼𑀢𑀁… 𑀫𑀼𑀢𑀁… 𑀯𑀺𑀜𑁆𑀜𑀸𑀢𑀁… 𑀏𑀓𑀢𑁆𑀢𑀁… 𑀦𑀸𑀦𑀢𑁆𑀢𑀁… 𑀲𑀩𑁆𑀩𑀁… 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀅𑀪𑀺𑀚𑀸𑀦𑀸𑀢𑀺; 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀅𑀪𑀺𑀜𑁆𑀜𑀸𑀬 𑀦𑀺𑀩𑁆𑀩𑀸𑀦𑀁 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀢𑁄 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀁 𑀦𑀸𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀔𑀬𑀸 𑀫𑁄𑀳𑀲𑁆𑀲, 𑀯𑀻𑀢𑀫𑁄𑀳𑀢𑁆𑀢𑀸.

𑀔𑀻𑀡𑀸𑀲𑀯𑀯𑀲𑁂𑀦 𑀙𑀝𑁆𑀞𑀦𑀬𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁄 𑀦𑀺𑀝𑁆𑀞𑀺𑀢𑁄.

𑁧𑁨. ‘‘𑀢𑀣𑀸𑀕𑀢𑁄𑀧𑀺, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀅𑀪𑀺𑀚𑀸𑀦𑀸𑀢𑀺; 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀅𑀪𑀺𑀜𑁆𑀜𑀸𑀬 𑀧𑀣𑀯𑀺𑀁 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀬𑀸 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀢𑁄 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀦𑀸𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀧𑀭𑀺𑀜𑁆𑀜𑀸𑀢𑀦𑁆𑀢𑀁 𑀢𑀣𑀸𑀕𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

‘‘𑀆𑀧𑀁…𑀧𑁂… 𑀢𑁂𑀚𑀁… 𑀯𑀸𑀬𑀁… 𑀪𑀽𑀢𑁂… 𑀤𑁂𑀯𑁂… 𑀧𑀚𑀸𑀧𑀢𑀺𑀁… 𑀩𑁆𑀭𑀳𑁆𑀫𑀁… 𑀆𑀪𑀲𑁆𑀲𑀭𑁂… 𑀲𑀼𑀪𑀓𑀺𑀡𑁆𑀳𑁂… 𑀯𑁂𑀳𑀧𑁆𑀨𑀮𑁂… 𑀅𑀪𑀺𑀪𑀼𑀁… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 … 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁… 𑀤𑀺𑀝𑁆𑀞𑀁… 𑀲𑀼𑀢𑀁… 𑀫𑀼𑀢𑀁… 𑀯𑀺𑀜𑁆𑀜𑀸𑀢𑀁… 𑀏𑀓𑀢𑁆𑀢𑀁… 𑀦𑀸𑀦𑀢𑁆𑀢𑀁… 𑀲𑀩𑁆𑀩𑀁… 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀅𑀪𑀺𑀚𑀸𑀦𑀸𑀢𑀺; 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀅𑀪𑀺𑀜𑁆𑀜𑀸𑀬 𑀦𑀺𑀩𑁆𑀩𑀸𑀦𑀁 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀢𑁄 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀁 𑀦𑀸𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀧𑀭𑀺𑀜𑁆𑀜𑀸𑀢𑀦𑁆𑀢𑀁 𑀢𑀣𑀸𑀕𑀢𑀲𑁆𑀲𑀸’𑀢𑀺 𑀯𑀤𑀸𑀫𑀺.

𑀢𑀣𑀸𑀕𑀢𑀯𑀲𑁂𑀦 𑀲𑀢𑁆𑀢𑀫𑀦𑀬𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁄 𑀦𑀺𑀝𑁆𑀞𑀺𑀢𑁄.

𑁧𑁩. ‘‘𑀢𑀣𑀸𑀕𑀢𑁄𑀧𑀺, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀅𑀪𑀺𑀚𑀸𑀦𑀸𑀢𑀺; 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀅𑀪𑀺𑀜𑁆𑀜𑀸𑀬 𑀧𑀣𑀯𑀺𑀁 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀬𑀸 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀢𑁄 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺, 𑀧𑀣𑀯𑀺𑀁 𑀦𑀸𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀦𑀦𑁆𑀤𑀻 [𑀦𑀦𑁆𑀤𑀺 (𑀲𑀻. 𑀲𑁆𑀬𑀸.)] 𑀤𑀼𑀓𑁆𑀔𑀲𑁆𑀲 𑀫𑀽𑀮’𑀦𑁆𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 ‘𑀪𑀯𑀸 𑀚𑀸𑀢𑀺 𑀪𑀽𑀢𑀲𑁆𑀲 𑀚𑀭𑀸𑀫𑀭𑀡’𑀦𑁆𑀢𑀺. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, ‘𑀢𑀣𑀸𑀕𑀢𑁄 𑀲𑀩𑁆𑀩𑀲𑁄 𑀢𑀡𑁆𑀳𑀸𑀦𑀁 𑀔𑀬𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀘𑀸𑀕𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’𑀢𑀺 𑀯𑀤𑀸𑀫𑀺.

‘‘𑀆𑀧𑀁 …𑀧𑁂… 𑀢𑁂𑀚𑀁… 𑀯𑀸𑀬𑀁… 𑀪𑀽𑀢𑁂… 𑀤𑁂𑀯𑁂… 𑀧𑀚𑀸𑀧𑀢𑀺𑀁… 𑀩𑁆𑀭𑀳𑁆𑀫𑀁… 𑀆𑀪𑀲𑁆𑀲𑀭𑁂… 𑀲𑀼𑀪𑀓𑀺𑀡𑁆𑀳𑁂… 𑀯𑁂𑀳𑀧𑁆𑀨𑀮𑁂… 𑀅𑀪𑀺𑀪𑀼𑀁… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁… 𑀤𑀺𑀝𑁆𑀞𑀁… 𑀲𑀼𑀢𑀁… 𑀫𑀼𑀢𑀁… 𑀯𑀺𑀜𑁆𑀜𑀸𑀢𑀁… 𑀏𑀓𑀢𑁆𑀢𑀁… 𑀦𑀸𑀦𑀢𑁆𑀢𑀁… 𑀲𑀩𑁆𑀩𑀁… 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀅𑀪𑀺𑀚𑀸𑀦𑀸𑀢𑀺; 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀢𑁄 𑀅𑀪𑀺𑀜𑁆𑀜𑀸𑀬 𑀦𑀺𑀩𑁆𑀩𑀸𑀦𑀁 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀢𑁄 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺, 𑀦𑀺𑀩𑁆𑀩𑀸𑀦𑀁 𑀦𑀸𑀪𑀺𑀦𑀦𑁆𑀤𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? ‘𑀦𑀦𑁆𑀤𑀻 𑀤𑀼𑀓𑁆𑀔𑀲𑁆𑀲 𑀫𑀽𑀮’𑀦𑁆𑀢𑀺 𑁋 𑀇𑀢𑀺 𑀯𑀺𑀤𑀺𑀢𑁆𑀯𑀸 ‘𑀪𑀯𑀸 𑀚𑀸𑀢𑀺 𑀪𑀽𑀢𑀲𑁆𑀲 𑀚𑀭𑀸𑀫𑀭𑀡’𑀦𑁆𑀢𑀺. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, ‘𑀢𑀣𑀸𑀕𑀢𑁄 𑀲𑀩𑁆𑀩𑀲𑁄 𑀢𑀡𑁆𑀳𑀸𑀦𑀁 𑀔𑀬𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀘𑀸𑀕𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’𑀢𑀺 𑀯𑀤𑀸𑀫𑀻’’𑀢𑀺.

𑀢𑀣𑀸𑀕𑀢𑀯𑀲𑁂𑀦 𑀅𑀝𑁆𑀞𑀫𑀦𑀬𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁄 𑀦𑀺𑀝𑁆𑀞𑀺𑀢𑁄.

𑀇𑀤𑀫𑀯𑁄𑀘 𑀪𑀕𑀯𑀸. 𑀦 𑀢𑁂 𑀪𑀺𑀓𑁆𑀔𑀽 [𑀦 𑀅𑀢𑁆𑀢𑀫𑀦𑀸 𑀢𑁂𑀪𑀺𑀓𑁆𑀔𑀽 (𑀲𑁆𑀬𑀸.), 𑀢𑁂 𑀪𑀺𑀓𑁆𑀔𑀽 (𑀧𑀻. 𑀓.)] 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀧𑀞𑀫𑀁.

𑁨. 𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑀁

𑁧𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀩𑁆𑀩𑀸𑀲𑀯𑀲𑀁𑀯𑀭𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁧𑁫. ‘‘𑀚𑀸𑀦𑀢𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑀁 𑀯𑀤𑀸𑀫𑀺, 𑀦𑁄 𑀅𑀚𑀸𑀦𑀢𑁄 𑀦𑁄 𑀅𑀧𑀲𑁆𑀲𑀢𑁄. 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄 𑀓𑀺𑀜𑁆𑀘 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑀁 𑀯𑀤𑀸𑀫𑀺? 𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑀁 𑀅𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑀁. 𑀅𑀬𑁄𑀦𑀺𑀲𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀆𑀲𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀆𑀲𑀯𑀸 𑀧𑀯𑀟𑁆𑀠𑀦𑁆𑀢𑀺; 𑀬𑁄𑀦𑀺𑀲𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀆𑀲𑀯𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀆𑀲𑀯𑀸 𑀧𑀳𑀻𑀬𑀦𑁆𑀢𑀺.

𑁧𑁬. ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀤𑀲𑁆𑀲𑀦𑀸 𑀧𑀳𑀸𑀢𑀩𑁆𑀩𑀸, 𑀅𑀢𑁆𑀣𑀺 𑀆𑀲𑀯𑀸 𑀲𑀁𑀯𑀭𑀸 𑀧𑀳𑀸𑀢𑀩𑁆𑀩𑀸, 𑀅𑀢𑁆𑀣𑀺 𑀆𑀲𑀯𑀸 𑀧𑀝𑀺𑀲𑁂𑀯𑀦𑀸 𑀧𑀳𑀸𑀢𑀩𑁆𑀩𑀸, 𑀅𑀢𑁆𑀣𑀺 𑀆𑀲𑀯𑀸 𑀅𑀥𑀺𑀯𑀸𑀲𑀦𑀸 𑀧𑀳𑀸𑀢𑀩𑁆𑀩𑀸, 𑀅𑀢𑁆𑀣𑀺 𑀆𑀲𑀯𑀸 𑀧𑀭𑀺𑀯𑀚𑁆𑀚𑀦𑀸 𑀧𑀳𑀸𑀢𑀩𑁆𑀩𑀸, 𑀅𑀢𑁆𑀣𑀺 𑀆𑀲𑀯𑀸 𑀯𑀺𑀦𑁄𑀤𑀦𑀸 𑀧𑀳𑀸𑀢𑀩𑁆𑀩𑀸, 𑀅𑀢𑁆𑀣𑀺 𑀆𑀲𑀯𑀸 𑀪𑀸𑀯𑀦𑀸 𑀧𑀳𑀸𑀢𑀩𑁆𑀩𑀸.

𑀤𑀲𑁆𑀲𑀦𑀸 𑀧𑀳𑀸𑀢𑀩𑁆𑀩𑀸𑀲𑀯𑀸

𑁧𑁭. ‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀤𑀲𑁆𑀲𑀦𑀸 𑀧𑀳𑀸𑀢𑀩𑁆𑀩𑀸? 𑀇𑀥, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑁋 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑁋 𑀫𑀦𑀲𑀺𑀓𑀭𑀡𑀻𑀬𑁂 𑀥𑀫𑁆𑀫𑁂 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀫𑀦𑀲𑀺𑀓𑀭𑀡𑀻𑀬𑁂 𑀥𑀫𑁆𑀫𑁂 𑀦𑀧𑁆𑀧𑀚𑀸𑀦𑀸𑀢𑀺. 𑀲𑁄 𑀫𑀦𑀲𑀺𑀓𑀭𑀡𑀻𑀬𑁂 𑀥𑀫𑁆𑀫𑁂 𑀅𑀧𑁆𑀧𑀚𑀸𑀦𑀦𑁆𑀢𑁄 𑀅𑀫𑀦𑀲𑀺𑀓𑀭𑀡𑀻𑀬𑁂 𑀥𑀫𑁆𑀫𑁂 𑀅𑀧𑁆𑀧𑀚𑀸𑀦𑀦𑁆𑀢𑁄, 𑀬𑁂 𑀥𑀫𑁆𑀫𑀸 𑀦 𑀫𑀦𑀲𑀺𑀓𑀭𑀡𑀻𑀬𑀸, 𑀢𑁂 𑀥𑀫𑁆𑀫𑁂 𑀫𑀦𑀲𑀺 𑀓𑀭𑁄𑀢𑀺, 𑀬𑁂 𑀥𑀫𑁆𑀫𑀸 𑀫𑀦𑀲𑀺𑀓𑀭𑀡𑀻𑀬𑀸 𑀢𑁂 𑀥𑀫𑁆𑀫𑁂 𑀦 𑀫𑀦𑀲𑀺 𑀓𑀭𑁄𑀢𑀺.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀦 𑀫𑀦𑀲𑀺𑀓𑀭𑀡𑀻𑀬𑀸 𑀬𑁂 𑀥𑀫𑁆𑀫𑁂 𑀫𑀦𑀲𑀺 𑀓𑀭𑁄𑀢𑀺? 𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀸𑀲𑀯𑁄 𑀧𑀯𑀟𑁆𑀠𑀢𑀺; 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀪𑀯𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀪𑀯𑀸𑀲𑀯𑁄 𑀧𑀯𑀟𑁆𑀠𑀢𑀺; 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀅𑀯𑀺𑀚𑁆𑀚𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀅𑀯𑀺𑀚𑁆𑀚𑀸𑀲𑀯𑁄 𑀧𑀯𑀟𑁆𑀠𑀢𑀺 𑁋 𑀇𑀫𑁂 𑀥𑀫𑁆𑀫𑀸 𑀦 𑀫𑀦𑀲𑀺𑀓𑀭𑀡𑀻𑀬𑀸 𑀬𑁂 𑀥𑀫𑁆𑀫𑁂 𑀫𑀦𑀲𑀺 𑀓𑀭𑁄𑀢𑀺.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀫𑀦𑀲𑀺𑀓𑀭𑀡𑀻𑀬𑀸 𑀬𑁂 𑀥𑀫𑁆𑀫𑁂 𑀦 𑀫𑀦𑀲𑀺 𑀓𑀭𑁄𑀢𑀺? 𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀸𑀲𑀯𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀸𑀲𑀯𑁄 𑀧𑀳𑀻𑀬𑀢𑀺; 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀪𑀯𑀸𑀲𑀯𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀪𑀯𑀸𑀲𑀯𑁄 𑀧𑀳𑀻𑀬𑀢𑀺; 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀅𑀯𑀺𑀚𑁆𑀚𑀸𑀲𑀯𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀅𑀯𑀺𑀚𑁆𑀚𑀸𑀲𑀯𑁄 𑀧𑀳𑀻𑀬𑀢𑀺 𑁋 𑀇𑀫𑁂 𑀥𑀫𑁆𑀫𑀸 𑀫𑀦𑀲𑀺𑀓𑀭𑀡𑀻𑀬𑀸 𑀬𑁂 𑀥𑀫𑁆𑀫𑁂 𑀦 𑀫𑀦𑀲𑀺 𑀓𑀭𑁄𑀢𑀺.

‘‘𑀢𑀲𑁆𑀲 𑀅𑀫𑀦𑀲𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀫𑀦𑀲𑀺𑀓𑀸𑀭𑀸 𑀫𑀦𑀲𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀆𑀲𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀉𑀧𑁆𑀧𑀦𑁆𑀦𑀸 𑀘 𑀆𑀲𑀯𑀸 𑀧𑀯𑀟𑁆𑀠𑀦𑁆𑀢𑀺.

𑁧𑁮. ‘‘𑀲𑁄 𑀏𑀯𑀁 𑀅𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺 𑁋 ‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦𑀁? 𑀦 𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀁? 𑀓𑀺𑀁 𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀁? 𑀓𑀣𑀁 𑀦𑀼 𑀔𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀁? 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦𑀁? 𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁? 𑀦 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁? 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁? 𑀓𑀣𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁? 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀁 𑀅𑀦𑀸𑀕𑀢𑀫𑀤𑁆𑀥𑀸𑀦’𑀦𑁆𑀢𑀺? 𑀏𑀢𑀭𑀳𑀺 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀤𑁆𑀥𑀸𑀦𑀁 [𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀤𑁆𑀥𑀸𑀦𑀁 𑀆𑀭𑀩𑁆𑀪 (𑀲𑁆𑀬𑀸.)] 𑀅𑀚𑁆𑀛𑀢𑁆𑀢𑀁 𑀓𑀣𑀁𑀓𑀣𑀻 𑀳𑁄𑀢𑀺 𑁋 ‘𑀅𑀳𑀁 𑀦𑀼 𑀔𑁄𑀲𑁆𑀫𑀺? 𑀦𑁄 𑀦𑀼 𑀔𑁄𑀲𑁆𑀫𑀺? 𑀓𑀺𑀁 𑀦𑀼 𑀔𑁄𑀲𑁆𑀫𑀺? 𑀓𑀣𑀁 𑀦𑀼 𑀔𑁄𑀲𑁆𑀫𑀺? 𑀅𑀬𑀁 𑀦𑀼 𑀔𑁄 𑀲𑀢𑁆𑀢𑁄 𑀓𑀼𑀢𑁄 𑀆𑀕𑀢𑁄? 𑀲𑁄 𑀓𑀼𑀳𑀺𑀁 𑀕𑀸𑀫𑀻 𑀪𑀯𑀺𑀲𑁆𑀲𑀢𑀻’𑀢𑀺?

𑁧𑁯. ‘‘𑀢𑀲𑁆𑀲 𑀏𑀯𑀁 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀙𑀦𑁆𑀦𑀁 𑀤𑀺𑀝𑁆𑀞𑀻𑀦𑀁 𑀅𑀜𑁆𑀜𑀢𑀭𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. ‘𑀅𑀢𑁆𑀣𑀺 𑀫𑁂 𑀅𑀢𑁆𑀢𑀸’𑀢𑀺 𑀯𑀸 𑀅𑀲𑁆𑀲 [𑀯𑀸𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)] 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺; ‘𑀦𑀢𑁆𑀣𑀺 𑀫𑁂 𑀅𑀢𑁆𑀢𑀸’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺; ‘𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺; ‘𑀅𑀢𑁆𑀢𑀦𑀸𑀯 𑀅𑀦𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺; ‘𑀅𑀦𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺; 𑀅𑀣 𑀯𑀸 𑀧𑀦𑀲𑁆𑀲 𑀏𑀯𑀁 𑀤𑀺𑀝𑁆𑀞𑀺 𑀳𑁄𑀢𑀺 𑁋 ‘𑀬𑁄 𑀫𑁂 𑀅𑀬𑀁 𑀅𑀢𑁆𑀢𑀸 𑀯𑀤𑁄 𑀯𑁂𑀤𑁂𑀬𑁆𑀬𑁄 𑀢𑀢𑁆𑀭 𑀢𑀢𑁆𑀭 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀢𑀻’𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑀁 𑀤𑀺𑀝𑁆𑀞𑀺𑀯𑀺𑀲𑀽𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁. 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺; ‘𑀦 𑀧𑀭𑀺𑀫𑀼𑀘𑁆𑀘𑀢𑀺 𑀤𑀼𑀓𑁆𑀔𑀲𑁆𑀫𑀸’𑀢𑀺 𑀯𑀤𑀸𑀫𑀺.

𑁨𑁦. ‘‘𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑁋 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑁋 𑀫𑀦𑀲𑀺𑀓𑀭𑀡𑀻𑀬𑁂 𑀥𑀫𑁆𑀫𑁂 𑀧𑀚𑀸𑀦𑀸𑀢𑀺 𑀅𑀫𑀦𑀲𑀺𑀓𑀭𑀡𑀻𑀬𑁂 𑀥𑀫𑁆𑀫𑁂 𑀧𑀚𑀸𑀦𑀸𑀢𑀺. 𑀲𑁄 𑀫𑀦𑀲𑀺𑀓𑀭𑀡𑀻𑀬𑁂 𑀥𑀫𑁆𑀫𑁂 𑀧𑀚𑀸𑀦𑀦𑁆𑀢𑁄 𑀅𑀫𑀦𑀲𑀺𑀓𑀭𑀡𑀻𑀬𑁂 𑀥𑀫𑁆𑀫𑁂 𑀧𑀚𑀸𑀦𑀦𑁆𑀢𑁄 𑀬𑁂 𑀥𑀫𑁆𑀫𑀸 𑀦 𑀫𑀦𑀲𑀺𑀓𑀭𑀡𑀻𑀬𑀸 𑀢𑁂 𑀥𑀫𑁆𑀫𑁂 𑀦 𑀫𑀦𑀲𑀺 𑀓𑀭𑁄𑀢𑀺, 𑀬𑁂 𑀥𑀫𑁆𑀫𑀸 𑀫𑀦𑀲𑀺𑀓𑀭𑀡𑀻𑀬𑀸 𑀢𑁂 𑀥𑀫𑁆𑀫𑁂 𑀫𑀦𑀲𑀺 𑀓𑀭𑁄𑀢𑀺.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀦 𑀫𑀦𑀲𑀺𑀓𑀭𑀡𑀻𑀬𑀸 𑀬𑁂 𑀥𑀫𑁆𑀫𑁂 𑀦 𑀫𑀦𑀲𑀺 𑀓𑀭𑁄𑀢𑀺? 𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀸𑀲𑀯𑁄 𑀧𑀯𑀟𑁆𑀠𑀢𑀺; 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀪𑀯𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀪𑀯𑀸𑀲𑀯𑁄 𑀧𑀯𑀟𑁆𑀠𑀢𑀺; 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀅𑀯𑀺𑀚𑁆𑀚𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀅𑀯𑀺𑀚𑁆𑀚𑀸𑀲𑀯𑁄 𑀧𑀯𑀟𑁆𑀠𑀢𑀺 𑁋 𑀇𑀫𑁂 𑀥𑀫𑁆𑀫𑀸 𑀦 𑀫𑀦𑀲𑀺𑀓𑀭𑀡𑀻𑀬𑀸, 𑀬𑁂 𑀥𑀫𑁆𑀫𑁂 𑀦 𑀫𑀦𑀲𑀺 𑀓𑀭𑁄𑀢𑀺.

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀫𑀦𑀲𑀺𑀓𑀭𑀡𑀻𑀬𑀸 𑀬𑁂 𑀥𑀫𑁆𑀫𑁂 𑀫𑀦𑀲𑀺 𑀓𑀭𑁄𑀢𑀺? 𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀫𑀦𑀲𑀺𑀓𑀭𑁄𑀢𑁄 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀸𑀲𑀯𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀸𑀲𑀯𑁄 𑀧𑀳𑀻𑀬𑀢𑀺; 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀪𑀯𑀸𑀲𑀯𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀪𑀯𑀸𑀲𑀯𑁄 𑀧𑀳𑀻𑀬𑀢𑀺; 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀅𑀯𑀺𑀚𑁆𑀚𑀸𑀲𑀯𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀅𑀯𑀺𑀚𑁆𑀚𑀸𑀲𑀯𑁄 𑀧𑀳𑀻𑀬𑀢𑀺 𑁋 𑀇𑀫𑁂 𑀥𑀫𑁆𑀫𑀸 𑀫𑀦𑀲𑀺𑀓𑀭𑀡𑀻𑀬𑀸 𑀬𑁂 𑀥𑀫𑁆𑀫𑁂 𑀫𑀦𑀲𑀺 𑀓𑀭𑁄𑀢𑀺.

‘‘𑀢𑀲𑁆𑀲 𑀅𑀫𑀦𑀲𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀫𑀦𑀲𑀺𑀓𑀭𑀡𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀫𑀦𑀲𑀺𑀓𑀸𑀭𑀸 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀆𑀲𑀯𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀆𑀲𑀯𑀸 𑀧𑀳𑀻𑀬𑀦𑁆𑀢𑀺.

𑁨𑁧. ‘‘𑀲𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺. 𑀢𑀲𑁆𑀲 𑀏𑀯𑀁 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀤𑀲𑁆𑀲𑀦𑀸 𑀧𑀳𑀸𑀢𑀩𑁆𑀩𑀸.

𑀲𑀁𑀯𑀭𑀸 𑀧𑀳𑀸𑀢𑀩𑁆𑀩𑀸𑀲𑀯𑀸

𑁨𑁨. ‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀲𑀁𑀯𑀭𑀸 𑀧𑀳𑀸𑀢𑀩𑁆𑀩𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺. 𑀬𑀜𑁆𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀅𑀲𑀁𑀯𑀼𑀢𑀲𑁆𑀲 𑀯𑀺𑀳𑀭𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀲𑀁𑀯𑀼𑀢𑀲𑁆𑀲 𑀯𑀺𑀳𑀭𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀲𑁄𑀢𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺…𑀧𑁂… 𑀖𑀸𑀦𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺…𑀧𑁂… 𑀚𑀺𑀯𑁆𑀳𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺…𑀧𑁂… 𑀓𑀸𑀬𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺…𑀧𑁂… 𑀫𑀦𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺. 𑀬𑀜𑁆𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀦𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀅𑀲𑀁𑀯𑀼𑀢𑀲𑁆𑀲 𑀯𑀺𑀳𑀭𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀫𑀦𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀲𑀁𑀯𑀼𑀢𑀲𑁆𑀲 𑀯𑀺𑀳𑀭𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺.

‘‘𑀬𑀜𑁆𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀁𑀯𑀭𑀁 𑀅𑀲𑀁𑀯𑀼𑀢𑀲𑁆𑀲 𑀯𑀺𑀳𑀭𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀲𑀁𑀯𑀭𑀁 𑀲𑀁𑀯𑀼𑀢𑀲𑁆𑀲 𑀯𑀺𑀳𑀭𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀲𑀁𑀯𑀭𑀸 𑀧𑀳𑀸𑀢𑀩𑁆𑀩𑀸.

𑀧𑀝𑀺𑀲𑁂𑀯𑀦𑀸 𑀧𑀳𑀸𑀢𑀩𑁆𑀩𑀸𑀲𑀯𑀸

𑁨𑁩. ‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀧𑀝𑀺𑀲𑁂𑀯𑀦𑀸 𑀧𑀳𑀸𑀢𑀩𑁆𑀩𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀁 𑀧𑀝𑀺𑀲𑁂𑀯𑀢𑀺 𑁋 ‘𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬, 𑀉𑀡𑁆𑀳𑀲𑁆𑀲 𑀧𑀝𑀺𑀖𑀸𑀢𑀸𑀬, 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀁𑀲𑀧- [𑀲𑀺𑀭𑀺𑀁𑀲𑀧 (𑀲𑀻. 𑀲𑁆𑀬𑀸. 𑀧𑀻.)] 𑀲𑀫𑁆𑀨𑀲𑁆𑀲𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀬𑀸𑀯𑀤𑁂𑀯 𑀳𑀺𑀭𑀺𑀓𑁄𑀧𑀻𑀦𑀧𑁆𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁’.

‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀲𑁂𑀯𑀢𑀺 𑁋 ‘𑀦𑁂𑀯 𑀤𑀯𑀸𑀬, 𑀦 𑀫𑀤𑀸𑀬, 𑀦 𑀫𑀡𑁆𑀟𑀦𑀸𑀬, 𑀦 𑀯𑀺𑀪𑀽𑀲𑀦𑀸𑀬, 𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬, 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸, 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬, 𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀺 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘’ [𑀘𑀸𑀢𑀺 (𑀲𑀻.)].

‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀲𑁂𑀦𑀸𑀲𑀦𑀁 𑀧𑀝𑀺𑀲𑁂𑀯𑀢𑀺 𑁋 ‘𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬, 𑀉𑀡𑁆𑀳𑀲𑁆𑀲 𑀧𑀝𑀺𑀖𑀸𑀢𑀸𑀬, 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀁𑀲𑀧𑀲𑀫𑁆𑀨𑀲𑁆𑀲𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀬𑀸𑀯𑀤𑁂𑀯 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀁’.

‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑁂𑀯𑀢𑀺 𑁋 ‘𑀬𑀸𑀯𑀤𑁂𑀯 𑀉𑀧𑁆𑀧𑀦𑁆𑀦𑀸𑀦𑀁 𑀯𑁂𑀬𑁆𑀬𑀸𑀩𑀸𑀥𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀅𑀩𑁆𑀬𑀸𑀩𑀚𑁆𑀛𑀧𑀭𑀫𑀢𑀸𑀬’ [𑀅𑀩𑁆𑀬𑀸𑀧𑀚𑁆𑀛𑀧𑀭𑀫𑀢𑀸𑀬 (𑀲𑀻. 𑀲𑁆𑀬𑀸. 𑀧𑀻.), 𑀅𑀩𑁆𑀬𑀸𑀧𑀚𑁆𑀚𑀧𑀭𑀫𑀢𑀸𑀬 (𑀓.)].

‘‘𑀬𑀜𑁆𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀝𑀺𑀲𑁂𑀯𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀧𑀝𑀺𑀲𑁂𑀯𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀧𑀝𑀺𑀲𑁂𑀯𑀦𑀸 𑀧𑀳𑀸𑀢𑀩𑁆𑀩𑀸.

𑀅𑀥𑀺𑀯𑀸𑀲𑀦𑀸 𑀧𑀳𑀸𑀢𑀩𑁆𑀩𑀸𑀲𑀯𑀸

𑁨𑁪. ‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀅𑀥𑀺𑀯𑀸𑀲𑀦𑀸 𑀧𑀳𑀸𑀢𑀩𑁆𑀩𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲, 𑀚𑀺𑀖𑀘𑁆𑀙𑀸𑀬 𑀧𑀺𑀧𑀸𑀲𑀸𑀬. 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀁𑀲𑀧𑀲𑀫𑁆𑀨𑀲𑁆𑀲𑀸𑀦𑀁, 𑀤𑀼𑀭𑀼𑀢𑁆𑀢𑀸𑀦𑀁 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦𑀁, 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 [𑀢𑀺𑀧𑁆𑀧𑀸𑀦𑀁 (𑀲𑀻. 𑀲𑁆𑀬𑀸. 𑀧𑀻.)] 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑁄 𑀳𑁄𑀢𑀺.

‘‘𑀬𑀜𑁆𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀦𑀥𑀺𑀯𑀸𑀲𑀬𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀅𑀥𑀺𑀯𑀸𑀲𑀬𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀅𑀥𑀺𑀯𑀸𑀲𑀦𑀸 𑀧𑀳𑀸𑀢𑀩𑁆𑀩𑀸.

𑀧𑀭𑀺𑀯𑀚𑁆𑀚𑀦𑀸 𑀧𑀳𑀸𑀢𑀩𑁆𑀩𑀸𑀲𑀯𑀸

𑁨𑁫. ‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀧𑀭𑀺𑀯𑀚𑁆𑀚𑀦𑀸 𑀧𑀳𑀸𑀢𑀩𑁆𑀩𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀡𑁆𑀟𑀁 𑀳𑀢𑁆𑀣𑀺𑀁 𑀧𑀭𑀺𑀯𑀚𑁆𑀚𑁂𑀢𑀺, 𑀘𑀡𑁆𑀟𑀁 𑀅𑀲𑁆𑀲𑀁 𑀧𑀭𑀺𑀯𑀚𑁆𑀚𑁂𑀢𑀺, 𑀘𑀡𑁆𑀟𑀁 𑀕𑁄𑀡𑀁 𑀧𑀭𑀺𑀯𑀚𑁆𑀚𑁂𑀢𑀺, 𑀘𑀡𑁆𑀟𑀁 𑀓𑀼𑀓𑁆𑀓𑀼𑀭𑀁 𑀧𑀭𑀺𑀯𑀚𑁆𑀚𑁂𑀢𑀺, 𑀅𑀳𑀺𑀁 𑀔𑀸𑀡𑀼𑀁 𑀓𑀡𑁆𑀝𑀓𑀝𑁆𑀞𑀸𑀦𑀁 𑀲𑁄𑀩𑁆𑀪𑀁 𑀧𑀧𑀸𑀢𑀁 𑀘𑀦𑁆𑀤𑀦𑀺𑀓𑀁 𑀑𑀴𑀺𑀕𑀮𑁆𑀮𑀁. 𑀬𑀣𑀸𑀭𑀽𑀧𑁂 𑀅𑀦𑀸𑀲𑀦𑁂 𑀦𑀺𑀲𑀺𑀦𑁆𑀦𑀁 𑀬𑀣𑀸𑀭𑀽𑀧𑁂 𑀅𑀕𑁄𑀘𑀭𑁂 𑀘𑀭𑀦𑁆𑀢𑀁 𑀬𑀣𑀸𑀭𑀽𑀧𑁂 𑀧𑀸𑀧𑀓𑁂 𑀫𑀺𑀢𑁆𑀢𑁂 𑀪𑀚𑀦𑁆𑀢𑀁 𑀯𑀺𑀜𑁆𑀜𑀽 𑀲𑀩𑁆𑀭𑀳𑁆𑀫𑀘𑀸𑀭𑀻 𑀧𑀸𑀧𑀓𑁂𑀲𑀼 𑀞𑀸𑀦𑁂𑀲𑀼 𑀑𑀓𑀧𑁆𑀧𑁂𑀬𑁆𑀬𑀼𑀁, 𑀲𑁄 𑀢𑀜𑁆𑀘 𑀅𑀦𑀸𑀲𑀦𑀁 𑀢𑀜𑁆𑀘 𑀅𑀕𑁄𑀘𑀭𑀁 𑀢𑁂 𑀘 𑀧𑀸𑀧𑀓𑁂 𑀫𑀺𑀢𑁆𑀢𑁂 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀧𑀭𑀺𑀯𑀚𑁆𑀚𑁂𑀢𑀺.

‘‘𑀬𑀜𑁆𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀯𑀚𑁆𑀚𑀬𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀧𑀭𑀺𑀯𑀚𑁆𑀚𑀬𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀧𑀭𑀺𑀯𑀚𑁆𑀚𑀦𑀸 𑀧𑀳𑀸𑀢𑀩𑁆𑀩𑀸.

𑀯𑀺𑀦𑁄𑀤𑀦𑀸 𑀧𑀳𑀸𑀢𑀩𑁆𑀩𑀸𑀲𑀯𑀸

𑁨𑁬. ‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀯𑀺𑀦𑁄𑀤𑀦𑀸 𑀧𑀳𑀸𑀢𑀩𑁆𑀩𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺, 𑀉𑀧𑁆𑀧𑀦𑁆𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁…𑀧𑁂… 𑀉𑀧𑁆𑀧𑀦𑁆𑀦𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁…𑀧𑁂… 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺.

‘‘𑀬𑀜𑁆𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀯𑀺𑀦𑁄𑀤𑀬𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀯𑀺𑀦𑁄𑀤𑀬𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀯𑀺𑀦𑁄𑀤𑀦𑀸 𑀧𑀳𑀸𑀢𑀩𑁆𑀩𑀸.

𑀪𑀸𑀯𑀦𑀸 𑀧𑀳𑀸𑀢𑀩𑁆𑀩𑀸𑀲𑀯𑀸

𑁨𑁭. ‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀪𑀸𑀯𑀦𑀸 𑀧𑀳𑀸𑀢𑀩𑁆𑀩𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁; 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺…𑀧𑁂… 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺… 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺… 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺… 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁.

‘‘𑀬𑀜𑁆𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀪𑀸𑀯𑀬𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀪𑀸𑀯𑀬𑀢𑁄 𑀏𑀯𑀁𑀲 𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀪𑀸𑀯𑀦𑀸 𑀧𑀳𑀸𑀢𑀩𑁆𑀩𑀸.

𑁨𑁮. ‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀬𑁂 𑀆𑀲𑀯𑀸 𑀤𑀲𑁆𑀲𑀦𑀸 𑀧𑀳𑀸𑀢𑀩𑁆𑀩𑀸 𑀢𑁂 𑀤𑀲𑁆𑀲𑀦𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀬𑁂 𑀆𑀲𑀯𑀸 𑀲𑀁𑀯𑀭𑀸 𑀧𑀳𑀸𑀢𑀩𑁆𑀩𑀸 𑀢𑁂 𑀲𑀁𑀯𑀭𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀬𑁂 𑀆𑀲𑀯𑀸 𑀧𑀝𑀺𑀲𑁂𑀯𑀦𑀸 𑀧𑀳𑀸𑀢𑀩𑁆𑀩𑀸 𑀢𑁂 𑀧𑀝𑀺𑀲𑁂𑀯𑀦𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀬𑁂 𑀆𑀲𑀯𑀸 𑀅𑀥𑀺𑀯𑀸𑀲𑀦𑀸 𑀧𑀳𑀸𑀢𑀩𑁆𑀩𑀸 𑀢𑁂 𑀅𑀥𑀺𑀯𑀸𑀲𑀦𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀬𑁂 𑀆𑀲𑀯𑀸 𑀧𑀭𑀺𑀯𑀚𑁆𑀚𑀦𑀸 𑀧𑀳𑀸𑀢𑀩𑁆𑀩𑀸 𑀢𑁂 𑀧𑀭𑀺𑀯𑀚𑁆𑀚𑀦𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀬𑁂 𑀆𑀲𑀯𑀸 𑀯𑀺𑀦𑁄𑀤𑀦𑀸 𑀧𑀳𑀸𑀢𑀩𑁆𑀩𑀸 𑀢𑁂 𑀯𑀺𑀦𑁄𑀤𑀦𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀬𑁂 𑀆𑀲𑀯𑀸 𑀪𑀸𑀯𑀦𑀸 𑀧𑀳𑀸𑀢𑀩𑁆𑀩𑀸 𑀢𑁂 𑀪𑀸𑀯𑀦𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺; 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑁋 ‘𑀪𑀺𑀓𑁆𑀔𑀼 𑀲𑀩𑁆𑀩𑀸𑀲𑀯𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺, 𑀅𑀘𑁆𑀙𑁂𑀘𑁆𑀙𑀺 [𑀅𑀘𑁆𑀙𑁂𑀚𑁆𑀚𑀺 (𑀓.)] 𑀢𑀡𑁆𑀳𑀁, 𑀯𑀺𑀯𑀢𑁆𑀢𑀬𑀺 [𑀯𑀸𑀯𑀢𑁆𑀢𑀬𑀺 (𑀲𑀻. 𑀧𑀻.)] 𑀲𑀁𑀬𑁄𑀚𑀦𑀁, 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀼𑀢𑀺𑀬𑀁.

𑁩. 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀁

𑁨𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸. 𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼 𑀅𑀦𑀼𑀓𑀫𑁆𑀧𑀸 𑁋 ‘𑀓𑀺𑀦𑁆𑀢𑀺 𑀫𑁂 𑀲𑀸𑀯𑀓𑀸 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑁂𑀬𑁆𑀬𑀼𑀁, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’𑀢𑀺. 𑀢𑀼𑀫𑁆𑀳𑁂 𑀘 𑀫𑁂, 𑀪𑀺𑀓𑁆𑀔𑀯𑁂, 𑀆𑀫𑀺𑀲𑀤𑀸𑀬𑀸𑀤𑀸 𑀪𑀯𑁂𑀬𑁆𑀬𑀸𑀣 𑀦𑁄 𑀥𑀫𑁆𑀫𑀤𑀸𑀬𑀸𑀤𑀸, 𑀢𑀼𑀫𑁆𑀳𑁂𑀧𑀺 𑀢𑁂𑀦 𑀆𑀤𑀺𑀬𑀸 [𑀆𑀤𑀺𑀲𑁆𑀲𑀸 (𑀲𑀻. 𑀲𑁆𑀬𑀸. 𑀧𑀻.)] 𑀪𑀯𑁂𑀬𑁆𑀬𑀸𑀣 𑁋 ‘𑀆𑀫𑀺𑀲𑀤𑀸𑀬𑀸𑀤𑀸 𑀲𑀢𑁆𑀣𑀼𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, 𑀦𑁄 𑀥𑀫𑁆𑀫𑀤𑀸𑀬𑀸𑀤𑀸’𑀢𑀺; 𑀅𑀳𑀫𑁆𑀧𑀺 𑀢𑁂𑀦 𑀆𑀤𑀺𑀬𑁄 𑀪𑀯𑁂𑀬𑁆𑀬𑀁 𑁋 ‘𑀆𑀫𑀺𑀲𑀤𑀸𑀬𑀸𑀤𑀸 𑀲𑀢𑁆𑀣𑀼𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, 𑀦𑁄 𑀥𑀫𑁆𑀫𑀤𑀸𑀬𑀸𑀤𑀸’𑀢𑀺. 𑀢𑀼𑀫𑁆𑀳𑁂 𑀘 𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑁂𑀬𑁆𑀬𑀸𑀣, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸, 𑀢𑀼𑀫𑁆𑀳𑁂𑀧𑀺 𑀢𑁂𑀦 𑀦 𑀆𑀤𑀺𑀬𑀸 𑀪𑀯𑁂𑀬𑁆𑀬𑀸𑀣 𑁋 ‘𑀥𑀫𑁆𑀫𑀤𑀸𑀬𑀸𑀤𑀸 𑀲𑀢𑁆𑀣𑀼𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’𑀢𑀺; 𑀅𑀳𑀫𑁆𑀧𑀺 𑀢𑁂𑀦 𑀦 𑀆𑀤𑀺𑀬𑁄 𑀪𑀯𑁂𑀬𑁆𑀬𑀁 𑁋 ‘𑀥𑀫𑁆𑀫𑀤𑀸𑀬𑀸𑀤𑀸 𑀲𑀢𑁆𑀣𑀼𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’𑀢𑀺. 𑀢𑀲𑁆𑀫𑀸𑀢𑀺𑀳 𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸. 𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼 𑀅𑀦𑀼𑀓𑀫𑁆𑀧𑀸 𑁋 ‘𑀓𑀺𑀦𑁆𑀢𑀺 𑀫𑁂 𑀲𑀸𑀯𑀓𑀸 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑁂𑀬𑁆𑀬𑀼𑀁, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’𑀢𑀺.

𑁩𑁦. ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀪𑀼𑀢𑁆𑀢𑀸𑀯𑀻 𑀅𑀲𑁆𑀲𑀁 𑀧𑀯𑀸𑀭𑀺𑀢𑁄 𑀧𑀭𑀺𑀧𑀼𑀡𑁆𑀡𑁄 𑀧𑀭𑀺𑀬𑁄𑀲𑀺𑀢𑁄 𑀲𑀼𑀳𑀺𑀢𑁄 𑀬𑀸𑀯𑀤𑀢𑁆𑀣𑁄; 𑀲𑀺𑀬𑀸 𑀘 𑀫𑁂 𑀧𑀺𑀡𑁆𑀟𑀧𑀸𑀢𑁄 𑀅𑀢𑀺𑀭𑁂𑀓𑀥𑀫𑁆𑀫𑁄 𑀙𑀟𑁆𑀟𑀦𑀻𑀬𑀥𑀫𑁆𑀫𑁄 [𑀙𑀟𑁆𑀟𑀺𑀬𑀥𑀫𑁆𑀫𑁄 (𑀲𑀻. 𑀲𑁆𑀬𑀸. 𑀧𑀻.)]. 𑀅𑀣 𑀤𑁆𑀯𑁂 𑀪𑀺𑀓𑁆𑀔𑀽 𑀆𑀕𑀘𑁆𑀙𑁂𑀬𑁆𑀬𑀼𑀁 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬- [𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀮 (𑀲𑀻. 𑀧𑀻.)] 𑀧𑀭𑁂𑀢𑀸. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑁂𑀬𑁆𑀬𑀁 𑁋 ‘𑀅𑀳𑀁 𑀔𑁄𑀫𑁆𑀳𑀺, 𑀪𑀺𑀓𑁆𑀔𑀯𑁂, 𑀪𑀼𑀢𑁆𑀢𑀸𑀯𑀻 𑀧𑀯𑀸𑀭𑀺𑀢𑁄 𑀧𑀭𑀺𑀧𑀼𑀡𑁆𑀡𑁄 𑀧𑀭𑀺𑀬𑁄𑀲𑀺𑀢𑁄 𑀲𑀼𑀳𑀺𑀢𑁄 𑀬𑀸𑀯𑀤𑀢𑁆𑀣𑁄; 𑀅𑀢𑁆𑀣𑀺 𑀘 𑀫𑁂 𑀅𑀬𑀁 𑀧𑀺𑀡𑁆𑀟𑀧𑀸𑀢𑁄 𑀅𑀢𑀺𑀭𑁂𑀓𑀥𑀫𑁆𑀫𑁄 𑀙𑀟𑁆𑀟𑀦𑀻𑀬𑀥𑀫𑁆𑀫𑁄. 𑀲𑀘𑁂 𑀆𑀓𑀗𑁆𑀔𑀣, 𑀪𑀼𑀜𑁆𑀚𑀣, 𑀦𑁄 𑀘𑁂 𑀢𑀼𑀫𑁆𑀳𑁂 𑀪𑀼𑀜𑁆𑀚𑀺𑀲𑁆𑀲𑀣 [𑀲𑀘𑁂 𑀢𑀼𑀫𑁆𑀳𑁂 𑀦 𑀪𑀼𑀜𑁆𑀚𑀺𑀲𑁆𑀲𑀣 (𑀲𑀻. 𑀲𑁆𑀬𑀸. 𑀧𑀻.)], 𑀇𑀤𑀸𑀦𑀸𑀳𑀁 𑀅𑀧𑁆𑀧𑀳𑀭𑀺𑀢𑁂 𑀯𑀸 𑀙𑀟𑁆𑀟𑁂𑀲𑁆𑀲𑀸𑀫𑀺, 𑀅𑀧𑁆𑀧𑀸𑀡𑀓𑁂 𑀯𑀸 𑀉𑀤𑀓𑁂 𑀑𑀧𑀺𑀮𑀸𑀧𑁂𑀲𑁆𑀲𑀸𑀫𑀻’𑀢𑀺. 𑀢𑀢𑁆𑀭𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀫𑀲𑁆𑀲 𑁋 ‘𑀪𑀕𑀯𑀸 𑀔𑁄 𑀪𑀼𑀢𑁆𑀢𑀸𑀯𑀻 𑀧𑀯𑀸𑀭𑀺𑀢𑁄 𑀧𑀭𑀺𑀧𑀼𑀡𑁆𑀡𑁄 𑀧𑀭𑀺𑀬𑁄𑀲𑀺𑀢𑁄 𑀲𑀼𑀳𑀺𑀢𑁄 𑀬𑀸𑀯𑀤𑀢𑁆𑀣𑁄; 𑀅𑀢𑁆𑀣𑀺 𑀘𑀸𑀬𑀁 𑀪𑀕𑀯𑀢𑁄 𑀧𑀺𑀡𑁆𑀟𑀧𑀸𑀢𑁄 𑀅𑀢𑀺𑀭𑁂𑀓𑀥𑀫𑁆𑀫𑁄 𑀙𑀟𑁆𑀟𑀦𑀻𑀬𑀥𑀫𑁆𑀫𑁄. 𑀲𑀘𑁂 𑀫𑀬𑀁 𑀦 𑀪𑀼𑀜𑁆𑀚𑀺𑀲𑁆𑀲𑀸𑀫, 𑀇𑀤𑀸𑀦𑀺 𑀪𑀕𑀯𑀸 𑀅𑀧𑁆𑀧𑀳𑀭𑀺𑀢𑁂 𑀯𑀸 𑀙𑀟𑁆𑀟𑁂𑀲𑁆𑀲𑀢𑀺, 𑀅𑀧𑁆𑀧𑀸𑀡𑀓𑁂 𑀯𑀸 𑀉𑀤𑀓𑁂 𑀑𑀧𑀺𑀮𑀸𑀧𑁂𑀲𑁆𑀲𑀢𑀺’. 𑀯𑀼𑀢𑁆𑀢𑀁 𑀔𑁄 𑀧𑀦𑁂𑀢𑀁 𑀪𑀕𑀯𑀢𑀸 𑁋 ‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸’𑀢𑀺. 𑀆𑀫𑀺𑀲𑀜𑁆𑀜𑀢𑀭𑀁 𑀔𑁄 𑀧𑀦𑁂𑀢𑀁, 𑀬𑀤𑀺𑀤𑀁 𑀧𑀺𑀡𑁆𑀟𑀧𑀸𑀢𑁄. 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀇𑀫𑀺𑀦𑀸𑀯 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑁂𑀦 𑀏𑀯𑀁 𑀇𑀫𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 [𑀭𑀢𑁆𑀢𑀺𑀤𑀺𑀯𑀁 (𑀓.)] 𑀯𑀻𑀢𑀺𑀦𑀸𑀫𑁂𑀬𑁆𑀬’’𑀦𑁆𑀢𑀺. 𑀲𑁄 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀢𑁂𑀦𑁂𑀯 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑁂𑀦 𑀏𑀯𑀁 𑀢𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀻𑀢𑀺𑀦𑀸𑀫𑁂𑀬𑁆𑀬. 𑀅𑀣 𑀤𑀼𑀢𑀺𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀫𑀲𑁆𑀲 𑁋 ‘𑀪𑀕𑀯𑀸 𑀔𑁄 𑀪𑀼𑀢𑁆𑀢𑀸𑀯𑀻 𑀧𑀯𑀸𑀭𑀺𑀢𑁄 𑀧𑀭𑀺𑀧𑀼𑀡𑁆𑀡𑁄 𑀧𑀭𑀺𑀬𑁄𑀲𑀺𑀢𑁄 𑀲𑀼𑀳𑀺𑀢𑁄 𑀬𑀸𑀯𑀤𑀢𑁆𑀣𑁄; 𑀅𑀢𑁆𑀣𑀺 𑀘𑀸𑀬𑀁 𑀪𑀕𑀯𑀢𑁄 𑀧𑀺𑀡𑁆𑀟𑀧𑀸𑀢𑁄 𑀅𑀢𑀺𑀭𑁂𑀓𑀥𑀫𑁆𑀫𑁄 𑀙𑀟𑁆𑀟𑀦𑀻𑀬𑀥𑀫𑁆𑀫𑁄. 𑀲𑀘𑁂 𑀫𑀬𑀁 𑀦 𑀪𑀼𑀜𑁆𑀚𑀺𑀲𑁆𑀲𑀸𑀫, 𑀇𑀤𑀸𑀦𑀺 𑀪𑀕𑀯𑀸 𑀅𑀧𑁆𑀧𑀳𑀭𑀺𑀢𑁂 𑀯𑀸 𑀙𑀟𑁆𑀟𑁂𑀲𑁆𑀲𑀢𑀺, 𑀅𑀧𑁆𑀧𑀸𑀡𑀓𑁂 𑀯𑀸 𑀉𑀤𑀓𑁂 𑀑𑀧𑀺𑀮𑀸𑀧𑁂𑀲𑁆𑀲𑀢𑀺. 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 [𑀧𑀝𑀺𑀯𑀺𑀦𑁂𑀢𑁆𑀯𑀸 (𑀲𑀻. 𑀲𑁆𑀬𑀸. 𑀧𑀻.)] 𑀏𑀯𑀁 𑀇𑀫𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀻𑀢𑀺𑀦𑀸𑀫𑁂𑀬𑁆𑀬’𑀦𑁆𑀢𑀺. 𑀲𑁄 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀏𑀯𑀁 𑀢𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀻𑀢𑀺𑀦𑀸𑀫𑁂𑀬𑁆𑀬. 𑀓𑀺𑀜𑁆𑀘𑀸𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀏𑀯𑀁 𑀢𑀁 𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀻𑀢𑀺𑀦𑀸𑀫𑁂𑀬𑁆𑀬, 𑀅𑀣 𑀔𑁄 𑀅𑀲𑀼𑀬𑁂𑀯 𑀫𑁂 𑀧𑀼𑀭𑀺𑀫𑁄 𑀪𑀺𑀓𑁆𑀔𑀼 𑀧𑀼𑀚𑁆𑀚𑀢𑀭𑁄 𑀘 𑀧𑀸𑀲𑀁𑀲𑀢𑀭𑁄 𑀘. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀜𑁆𑀳𑀺 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀮𑁆𑀮𑁂𑀔𑀸𑀬 𑀲𑀼𑀪𑀭𑀢𑀸𑀬 𑀯𑀻𑀭𑀺𑀬𑀸𑀭𑀫𑁆𑀪𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀺. 𑀢𑀲𑁆𑀫𑀸𑀢𑀺𑀳 𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸. 𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼 𑀅𑀦𑀼𑀓𑀫𑁆𑀧𑀸 𑁋 ‘𑀓𑀺𑀦𑁆𑀢𑀺 𑀫𑁂 𑀲𑀸𑀯𑀓𑀸 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑁂𑀬𑁆𑀬𑀼𑀁, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 [𑀯𑀢𑁆𑀯𑀸 (𑀲𑀻. 𑀧𑀻.) 𑀏𑀯𑀫𑀻𑀤𑀺𑀲𑁂𑀲𑀼 𑀞𑀸𑀦𑁂𑀲𑀼] 𑀲𑀼𑀕𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑁩𑁧. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁂’’𑀢𑀺. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋

‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀺, 𑀓𑀺𑀢𑁆𑀢𑀸𑀯𑀢𑀸 𑀘 𑀧𑀦 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀫𑀦𑀼𑀲𑀺𑀓𑁆𑀔𑀦𑁆𑀢𑀻’’𑀢𑀺? ‘‘𑀤𑀽𑀭𑀢𑁄𑀧𑀺 𑀔𑁄 𑀫𑀬𑀁, 𑀆𑀯𑀼𑀲𑁄, 𑀆𑀕𑀘𑁆𑀙𑀸𑀫 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀫𑀜𑁆𑀜𑀸𑀢𑀼𑀁. 𑀲𑀸𑀥𑀼 𑀯𑀢𑀸𑀬𑀲𑁆𑀫𑀦𑁆𑀢𑀁𑀬𑁂𑀯 𑀲𑀸𑀭𑀺𑀧𑀼𑀢𑁆𑀢𑀁 𑀧𑀝𑀺𑀪𑀸𑀢𑀼 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄; 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀸𑀯𑀼𑀲𑁄, 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋

‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀺? 𑀇𑀥𑀸𑀯𑀼𑀲𑁄, 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀺, 𑀬𑁂𑀲𑀜𑁆𑀘 𑀥𑀫𑁆𑀫𑀸𑀦𑀁 𑀲𑀢𑁆𑀣𑀸 𑀧𑀳𑀸𑀦𑀫𑀸𑀳, 𑀢𑁂 𑀘 𑀥𑀫𑁆𑀫𑁂 𑀦𑀧𑁆𑀧𑀚𑀳𑀦𑁆𑀢𑀺, 𑀩𑀸𑀳𑀼𑀮𑀺𑀓𑀸 [𑀩𑀸𑀳𑀼𑀮𑁆𑀮𑀺𑀓𑀸 (𑀲𑁆𑀬𑀸.)] 𑀘 𑀳𑁄𑀦𑁆𑀢𑀺, 𑀲𑀸𑀣𑀮𑀺𑀓𑀸, 𑀑𑀓𑁆𑀓𑀫𑀦𑁂 𑀧𑀼𑀩𑁆𑀩𑀗𑁆𑀕𑀫𑀸, 𑀧𑀯𑀺𑀯𑁂𑀓𑁂 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸. 𑀢𑀢𑁆𑀭𑀸𑀯𑀼𑀲𑁄, 𑀣𑁂𑀭𑀸 𑀪𑀺𑀓𑁆𑀔𑀽 𑀢𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑀸 𑀪𑀯𑀦𑁆𑀢𑀺. ‘𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻’𑀢𑀺 𑁋 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀕𑀸𑀭𑀬𑁆𑀳𑀸 𑀪𑀯𑀦𑁆𑀢𑀺. ‘𑀬𑁂𑀲𑀜𑁆𑀘 𑀥𑀫𑁆𑀫𑀸𑀦𑀁 𑀲𑀢𑁆𑀣𑀸 𑀧𑀳𑀸𑀦𑀫𑀸𑀳 𑀢𑁂 𑀘 𑀥𑀫𑁆𑀫𑁂 𑀦𑀧𑁆𑀧𑀚𑀳𑀦𑁆𑀢𑀻’𑀢𑀺 𑁋 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀕𑀸𑀭𑀬𑁆𑀳𑀸 𑀪𑀯𑀦𑁆𑀢𑀺. ‘𑀩𑀸𑀳𑀼𑀮𑀺𑀓𑀸 𑀘, 𑀲𑀸𑀣𑀮𑀺𑀓𑀸, 𑀑𑀓𑁆𑀓𑀫𑀦𑁂 𑀧𑀼𑀩𑁆𑀩𑀗𑁆𑀕𑀫𑀸, 𑀧𑀯𑀺𑀯𑁂𑀓𑁂 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸’𑀢𑀺 𑁋 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀞𑀸𑀦𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀕𑀸𑀭𑀬𑁆𑀳𑀸 𑀪𑀯𑀦𑁆𑀢𑀺. 𑀣𑁂𑀭𑀸, 𑀆𑀯𑀼𑀲𑁄, 𑀪𑀺𑀓𑁆𑀔𑀽 𑀇𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑀸 𑀪𑀯𑀦𑁆𑀢𑀺. 𑀢𑀢𑁆𑀭𑀸𑀯𑀼𑀲𑁄, 𑀫𑀚𑁆𑀛𑀺𑀫𑀸 𑀪𑀺𑀓𑁆𑀔𑀽…𑀧𑁂… 𑀦𑀯𑀸 𑀪𑀺𑀓𑁆𑀔𑀽 𑀢𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑀸 𑀪𑀯𑀦𑁆𑀢𑀺. ‘𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻’𑀢𑀺 𑁋 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀦𑀯𑀸 𑀪𑀺𑀓𑁆𑀔𑀽 𑀕𑀸𑀭𑀬𑁆𑀳𑀸 𑀪𑀯𑀦𑁆𑀢𑀺. ‘𑀬𑁂𑀲𑀜𑁆𑀘 𑀥𑀫𑁆𑀫𑀸𑀦𑀁 𑀲𑀢𑁆𑀣𑀸 𑀧𑀳𑀸𑀦𑀫𑀸𑀳 𑀢𑁂 𑀘 𑀥𑀫𑁆𑀫𑁂 𑀦𑀧𑁆𑀧𑀚𑀳𑀦𑁆𑀢𑀻’𑀢𑀺 𑁋 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀦𑀯𑀸 𑀪𑀺𑀓𑁆𑀔𑀽 𑀕𑀸𑀭𑀬𑁆𑀳𑀸 𑀪𑀯𑀦𑁆𑀢𑀺. ‘𑀩𑀸𑀳𑀼𑀮𑀺𑀓𑀸 𑀘 𑀳𑁄𑀦𑁆𑀢𑀺, 𑀲𑀸𑀣𑀮𑀺𑀓𑀸, 𑀑𑀓𑁆𑀓𑀫𑀦𑁂 𑀧𑀼𑀩𑁆𑀩𑀗𑁆𑀕𑀫𑀸, 𑀧𑀯𑀺𑀯𑁂𑀓𑁂 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸’𑀢𑀺 𑁋 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀞𑀸𑀦𑁂𑀦 𑀦𑀯𑀸 𑀪𑀺𑀓𑁆𑀔𑀽 𑀕𑀸𑀭𑀬𑁆𑀳𑀸 𑀪𑀯𑀦𑁆𑀢𑀺. 𑀦𑀯𑀸, 𑀆𑀯𑀼𑀲𑁄, 𑀪𑀺𑀓𑁆𑀔𑀽 𑀇𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀕𑀸𑀭𑀬𑁆𑀳𑀸 𑀪𑀯𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀺.

𑁩𑁨. ‘‘𑀓𑀺𑀢𑁆𑀢𑀸𑀯𑀢𑀸 𑀘, 𑀧𑀦𑀸𑀯𑀼𑀲𑁄, 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀫𑀦𑀼𑀲𑀺𑀓𑁆𑀔𑀦𑁆𑀢𑀺? 𑀇𑀥𑀸𑀯𑀼𑀲𑁄, 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀫𑀦𑀼𑀲𑀺𑀓𑁆𑀔𑀦𑁆𑀢𑀺 𑁋 𑀬𑁂𑀲𑀜𑁆𑀘 𑀥𑀫𑁆𑀫𑀸𑀦𑀁 𑀲𑀢𑁆𑀣𑀸 𑀧𑀳𑀸𑀦𑀫𑀸𑀳 𑀢𑁂 𑀘 𑀥𑀫𑁆𑀫𑁂 𑀧𑀚𑀳𑀦𑁆𑀢𑀺; 𑀦 𑀘 𑀩𑀸𑀳𑀼𑀮𑀺𑀓𑀸 𑀳𑁄𑀦𑁆𑀢𑀺, 𑀦 𑀲𑀸𑀣𑀮𑀺𑀓𑀸 𑀑𑀓𑁆𑀓𑀫𑀦𑁂 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸 𑀧𑀯𑀺𑀯𑁂𑀓𑁂 𑀧𑀼𑀩𑁆𑀩𑀗𑁆𑀕𑀫𑀸. 𑀢𑀢𑁆𑀭𑀸𑀯𑀼𑀲𑁄, 𑀣𑁂𑀭𑀸 𑀪𑀺𑀓𑁆𑀔𑀽 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑀸 𑀪𑀯𑀦𑁆𑀢𑀺. ‘𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀫𑀦𑀼𑀲𑀺𑀓𑁆𑀔𑀦𑁆𑀢𑀻’𑀢𑀺 𑁋 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀧𑀸𑀲𑀁𑀲𑀸 𑀪𑀯𑀦𑁆𑀢𑀺. ‘𑀬𑁂𑀲𑀜𑁆𑀘 𑀥𑀫𑁆𑀫𑀸𑀦𑀁 𑀲𑀢𑁆𑀣𑀸 𑀧𑀳𑀸𑀦𑀫𑀸𑀳 𑀢𑁂 𑀘 𑀥𑀫𑁆𑀫𑁂 𑀧𑀚𑀳𑀦𑁆𑀢𑀻’𑀢𑀺 𑁋 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀧𑀸𑀲𑀁𑀲𑀸 𑀪𑀯𑀦𑁆𑀢𑀺. ‘𑀦 𑀘 𑀩𑀸𑀳𑀼𑀮𑀺𑀓𑀸, 𑀦 𑀲𑀸𑀣𑀮𑀺𑀓𑀸 𑀑𑀓𑁆𑀓𑀫𑀦𑁂 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸 𑀧𑀯𑀺𑀯𑁂𑀓𑁂 𑀧𑀼𑀩𑁆𑀩𑀗𑁆𑀕𑀫𑀸’𑀢𑀺 𑁋 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀞𑀸𑀦𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀧𑀸𑀲𑀁𑀲𑀸 𑀪𑀯𑀦𑁆𑀢𑀺. 𑀣𑁂𑀭𑀸, 𑀆𑀯𑀼𑀲𑁄, 𑀪𑀺𑀓𑁆𑀔𑀽 𑀇𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑀸 𑀪𑀯𑀦𑁆𑀢𑀺. 𑀢𑀢𑁆𑀭𑀸𑀯𑀼𑀲𑁄, 𑀫𑀚𑁆𑀛𑀺𑀫𑀸 𑀪𑀺𑀓𑁆𑀔𑀽…𑀧𑁂… 𑀦𑀯𑀸 𑀪𑀺𑀓𑁆𑀔𑀽 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑀸 𑀪𑀯𑀦𑁆𑀢𑀺. ‘𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀫𑀦𑀼𑀲𑀺𑀓𑁆𑀔𑀦𑁆𑀢𑀻’𑀢𑀺 𑁋 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦 𑀦𑀯𑀸 𑀪𑀺𑀓𑁆𑀔𑀽 𑀧𑀸𑀲𑀁𑀲𑀸 𑀪𑀯𑀦𑁆𑀢𑀺. ‘𑀬𑁂𑀲𑀜𑁆𑀘 𑀥𑀫𑁆𑀫𑀸𑀦𑀁 𑀲𑀢𑁆𑀣𑀸 𑀧𑀳𑀸𑀦𑀫𑀸𑀳 𑀢𑁂 𑀘 𑀥𑀫𑁆𑀫𑁂 𑀧𑀚𑀳𑀦𑁆𑀢𑀻’𑀢𑀺 𑁋 𑀇𑀫𑀺𑀦𑀸 𑀤𑀼𑀢𑀺𑀬𑁂𑀦 𑀞𑀸𑀦𑁂𑀦 𑀦𑀯𑀸 𑀪𑀺𑀓𑁆𑀔𑀽 𑀧𑀸𑀲𑀁𑀲𑀸 𑀪𑀯𑀦𑁆𑀢𑀺. ‘𑀦 𑀘 𑀩𑀸𑀳𑀼𑀮𑀺𑀓𑀸, 𑀦 𑀲𑀸𑀣𑀮𑀺𑀓𑀸 𑀑𑀓𑁆𑀓𑀫𑀦𑁂 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸 𑀧𑀯𑀺𑀯𑁂𑀓𑁂 𑀧𑀼𑀩𑁆𑀩𑀗𑁆𑀕𑀫𑀸’𑀢𑀺 𑁋 𑀇𑀫𑀺𑀦𑀸 𑀢𑀢𑀺𑀬𑁂𑀦 𑀞𑀸𑀦𑁂𑀦 𑀦𑀯𑀸 𑀪𑀺𑀓𑁆𑀔𑀽 𑀧𑀸𑀲𑀁𑀲𑀸 𑀪𑀯𑀦𑁆𑀢𑀺. 𑀦𑀯𑀸, 𑀆𑀯𑀼𑀲𑁄, 𑀪𑀺𑀓𑁆𑀔𑀽 𑀇𑀫𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀸𑀲𑀁𑀲𑀸 𑀪𑀯𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀫𑀦𑀼𑀲𑀺𑀓𑁆𑀔𑀦𑁆𑀢𑀺.

𑁩𑁩. ‘‘𑀢𑀢𑁆𑀭𑀸𑀯𑀼𑀲𑁄, 𑀮𑁄𑀪𑁄 𑀘 𑀧𑀸𑀧𑀓𑁄 𑀤𑁄𑀲𑁄 𑀘 𑀧𑀸𑀧𑀓𑁄. 𑀮𑁄𑀪𑀲𑁆𑀲 𑀘 𑀧𑀳𑀸𑀦𑀸𑀬 𑀤𑁄𑀲𑀲𑁆𑀲 𑀘 𑀧𑀳𑀸𑀦𑀸𑀬 𑀅𑀢𑁆𑀣𑀺 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀓𑀢𑀫𑀸 𑀘 𑀲𑀸, 𑀆𑀯𑀼𑀲𑁄, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 [𑀲𑁂𑀬𑁆𑀬𑀣𑀻𑀤𑀁 (𑀲𑀻. 𑀲𑁆𑀬𑀸. 𑀧𑀻.)] 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀔𑁄 𑀲𑀸, 𑀆𑀯𑀼𑀲𑁄, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀢𑀢𑁆𑀭𑀸𑀯𑀼𑀲𑁄, 𑀓𑁄𑀥𑁄 𑀘 𑀧𑀸𑀧𑀓𑁄 𑀉𑀧𑀦𑀸𑀳𑁄 𑀘 𑀧𑀸𑀧𑀓𑁄…𑀧𑁂… 𑀫𑀓𑁆𑀔𑁄 𑀘 𑀧𑀸𑀧𑀓𑁄 𑀧𑀴𑀸𑀲𑁄 𑀘 𑀧𑀸𑀧𑀓𑁄, 𑀇𑀲𑁆𑀲𑀸 𑀘 𑀧𑀸𑀧𑀺𑀓𑀸 𑀫𑀘𑁆𑀙𑁂𑀭𑀜𑁆𑀘 𑀧𑀸𑀧𑀓𑀁, 𑀫𑀸𑀬𑀸 𑀘 𑀧𑀸𑀧𑀺𑀓𑀸 𑀲𑀸𑀞𑁂𑀬𑁆𑀬𑀜𑁆𑀘 𑀧𑀸𑀧𑀓𑀁, 𑀣𑀫𑁆𑀪𑁄 𑀘 𑀧𑀸𑀧𑀓𑁄 𑀲𑀸𑀭𑀫𑁆𑀪𑁄 𑀘 𑀧𑀸𑀧𑀓𑁄, 𑀫𑀸𑀦𑁄 𑀘 𑀧𑀸𑀧𑀓𑁄 𑀅𑀢𑀺𑀫𑀸𑀦𑁄 𑀘 𑀧𑀸𑀧𑀓𑁄, 𑀫𑀤𑁄 𑀘 𑀧𑀸𑀧𑀓𑁄 𑀧𑀫𑀸𑀤𑁄 𑀘 𑀧𑀸𑀧𑀓𑁄. 𑀫𑀤𑀲𑁆𑀲 𑀘 𑀧𑀳𑀸𑀦𑀸𑀬 𑀧𑀫𑀸𑀤𑀲𑁆𑀲 𑀘 𑀧𑀳𑀸𑀦𑀸𑀬 𑀅𑀢𑁆𑀣𑀺 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀓𑀢𑀫𑀸 𑀘 𑀲𑀸, 𑀆𑀯𑀼𑀲𑁄, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀔𑁄 𑀲𑀸, 𑀆𑀯𑀼𑀲𑁄, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺.

𑀇𑀤𑀫𑀯𑁄𑀘𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀢𑀢𑀺𑀬𑀁.

𑁪. 𑀪𑀬𑀪𑁂𑀭𑀯𑀲𑀼𑀢𑁆𑀢𑀁

𑁩𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 [𑀲𑀸𑀭𑀸𑀡𑀻𑀬𑀁 (𑀲𑀻. 𑀲𑁆𑀬𑀸. 𑀧𑀻.)] 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑁂𑀫𑁂, 𑀪𑁄 𑀕𑁄𑀢𑀫, 𑀓𑀼𑀮𑀧𑀼𑀢𑁆𑀢𑀸 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀉𑀤𑁆𑀤𑀺𑀲𑁆𑀲 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸, 𑀪𑀯𑀁 𑀢𑁂𑀲𑀁 𑀕𑁄𑀢𑀫𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀪𑀯𑀁 𑀢𑁂𑀲𑀁 𑀕𑁄𑀢𑀫𑁄 𑀩𑀳𑀼𑀓𑀸𑀭𑁄, 𑀪𑀯𑀁 𑀢𑁂𑀲𑀁 𑀕𑁄𑀢𑀫𑁄 𑀲𑀫𑀸𑀤𑀧𑁂𑀢𑀸 [𑀲𑀫𑀸𑀤𑀸𑀧𑁂𑀢𑀸 (?)]; 𑀪𑁄𑀢𑁄 𑀘 𑀧𑀦 𑀕𑁄𑀢𑀫𑀲𑁆𑀲 𑀲𑀸 𑀚𑀦𑀢𑀸 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺. ‘‘𑀏𑀯𑀫𑁂𑀢𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀫𑁂𑀢𑀁, 𑀩𑁆𑀭𑀸𑀳𑁆𑀫𑀡! 𑀬𑁂 𑀢𑁂, 𑀩𑁆𑀭𑀸𑀳𑁆𑀫𑀡, 𑀓𑀼𑀮𑀧𑀼𑀢𑁆𑀢𑀸 𑀫𑀫𑀁 𑀉𑀤𑁆𑀤𑀺𑀲𑁆𑀲 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸, 𑀅𑀳𑀁 𑀢𑁂𑀲𑀁 𑀧𑀼𑀩𑁆𑀩𑀗𑁆𑀕𑀫𑁄, 𑀅𑀳𑀁 𑀢𑁂𑀲𑀁 𑀩𑀳𑀼𑀓𑀸𑀭𑁄, 𑀅𑀳𑀁 𑀢𑁂𑀲𑀁 𑀲𑀫𑀸𑀤𑀧𑁂𑀢𑀸; 𑀫𑀫 𑀘 𑀧𑀦 𑀲𑀸 𑀚𑀦𑀢𑀸 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺. ‘‘𑀤𑀼𑀭𑀪𑀺𑀲𑀫𑁆𑀪𑀯𑀸𑀦𑀺 𑀳𑀺 𑀔𑁄, 𑀪𑁄 𑀕𑁄𑀢𑀫, 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀤𑀼𑀓𑁆𑀓𑀭𑀁 𑀧𑀯𑀺𑀯𑁂𑀓𑀁, 𑀤𑀼𑀭𑀪𑀺𑀭𑀫𑀁 𑀏𑀓𑀢𑁆𑀢𑁂, 𑀳𑀭𑀦𑁆𑀢𑀺 𑀫𑀜𑁆𑀜𑁂 𑀫𑀦𑁄 𑀯𑀦𑀸𑀦𑀺 𑀲𑀫𑀸𑀥𑀺𑀁 𑀅𑀮𑀪𑀫𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. ‘‘𑀏𑀯𑀫𑁂𑀢𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀫𑁂𑀢𑀁, 𑀩𑁆𑀭𑀸𑀳𑁆𑀫𑀡! 𑀤𑀼𑀭𑀪𑀺𑀲𑀫𑁆𑀪𑀯𑀸𑀦𑀺 𑀳𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀤𑀼𑀓𑁆𑀓𑀭𑀁 𑀧𑀯𑀺𑀯𑁂𑀓𑀁, 𑀤𑀼𑀭𑀪𑀺𑀭𑀫𑀁 𑀏𑀓𑀢𑁆𑀢𑁂, 𑀳𑀭𑀦𑁆𑀢𑀺 𑀫𑀜𑁆𑀜𑁂 𑀫𑀦𑁄 𑀯𑀦𑀸𑀦𑀺 𑀲𑀫𑀸𑀥𑀺𑀁 𑀅𑀮𑀪𑀫𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺.

𑁩𑁫. ‘‘𑀫𑀬𑁆𑀳𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀏𑀢𑀤𑀳𑁄𑀲𑀺 𑁋 ‘𑀤𑀼𑀭𑀪𑀺𑀲𑀫𑁆𑀪𑀯𑀸𑀦𑀺 𑀳𑀺 𑀔𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀤𑀼𑀓𑁆𑀓𑀭𑀁 𑀧𑀯𑀺𑀯𑁂𑀓𑀁, 𑀤𑀼𑀭𑀪𑀺𑀭𑀫𑀁 𑀏𑀓𑀢𑁆𑀢𑁂, 𑀳𑀭𑀦𑁆𑀢𑀺 𑀫𑀜𑁆𑀜𑁂 𑀫𑀦𑁄 𑀯𑀦𑀸𑀦𑀺 𑀲𑀫𑀸𑀥𑀺𑀁 𑀅𑀮𑀪𑀫𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄’𑀢𑀺. 𑀢𑀲𑁆𑀲 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀳𑁂𑀢𑀼 𑀳𑀯𑁂 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀼𑀲𑀮𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺; 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑁄𑀳𑀫𑀲𑁆𑀫𑀺. 𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄’𑀢𑀺. 𑀏𑀢𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬.

𑁩𑁬. ‘‘𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀧𑀭𑀺𑀲𑀼𑀤𑁆𑀥𑀯𑀘𑀻𑀓𑀫𑁆𑀫𑀦𑁆𑀢𑀸…𑀧𑁂… 𑀅𑀧𑀭𑀺𑀲𑀼𑀤𑁆𑀥𑀫𑀦𑁄𑀓𑀫𑁆𑀫𑀦𑁆𑀢𑀸 …𑀧𑁂… 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑀲𑀦𑁆𑀤𑁄𑀲𑀳𑁂𑀢𑀼 𑀳𑀯𑁂 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀼𑀲𑀮𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺; 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄𑀳𑀫𑀲𑁆𑀫𑀺. 𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄’𑀢𑀺. 𑀏𑀢𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬.

𑁩𑁭. ‘‘𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀪𑀺𑀚𑁆𑀛𑀸𑀮𑀽 𑀓𑀸𑀫𑁂𑀲𑀼 𑀢𑀺𑀩𑁆𑀩𑀲𑀸𑀭𑀸𑀕𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀅𑀪𑀺𑀚𑁆𑀛𑀸𑀮𑀼𑀓𑀸𑀫𑁂𑀲𑀼𑀢𑀺𑀩𑁆𑀩𑀲𑀸𑀭𑀸𑀕𑀲𑀦𑁆𑀤𑁄𑀲𑀳𑁂𑀢𑀼 𑀳𑀯𑁂 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀼𑀲𑀮𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀅𑀪𑀺𑀚𑁆𑀛𑀸𑀮𑀼 𑀓𑀸𑀫𑁂𑀲𑀼 𑀢𑀺𑀩𑁆𑀩𑀲𑀸𑀭𑀸𑀕𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺; 𑀅𑀦𑀪𑀺𑀚𑁆𑀛𑀸𑀮𑀽𑀳𑀫𑀲𑁆𑀫𑀺. 𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀅𑀦𑀪𑀺𑀚𑁆𑀛𑀸𑀮𑀽 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄’𑀢𑀺. 𑀏𑀢𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀅𑀦𑀪𑀺𑀚𑁆𑀛𑀸𑀮𑀼𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬.

𑁩𑁮. ‘‘𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑀲𑀦𑁆𑀤𑁄𑀲𑀳𑁂𑀢𑀼 𑀳𑀯𑁂 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀼𑀲𑀮𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺; 𑀫𑁂𑀢𑁆𑀢𑀘𑀺𑀢𑁆𑀢𑁄𑀳𑀫𑀲𑁆𑀫𑀺. 𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀫𑁂𑀢𑁆𑀢𑀘𑀺𑀢𑁆𑀢𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄’𑀢𑀺. 𑀏𑀢𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀫𑁂𑀢𑁆𑀢𑀘𑀺𑀢𑁆𑀢𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬.

𑁩𑁯. ‘‘𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀣𑀻𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀣𑀻𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀸𑀦𑀲𑀦𑁆𑀤𑁄𑀲𑀳𑁂𑀢𑀼 𑀳𑀯𑁂 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀼𑀲𑀮𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀣𑀻𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺; 𑀯𑀺𑀕𑀢𑀣𑀻𑀦𑀫𑀺𑀤𑁆𑀥𑁄𑀳𑀫𑀲𑁆𑀫𑀺. 𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀯𑀺𑀕𑀢𑀣𑀻𑀦𑀫𑀺𑀤𑁆𑀥𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄’𑀢𑀺. 𑀏𑀢𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀯𑀺𑀕𑀢𑀣𑀻𑀦𑀫𑀺𑀤𑁆𑀥𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬.

𑁪𑁦. ‘‘𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀉𑀤𑁆𑀥𑀢𑀸 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀉𑀤𑁆𑀥𑀢𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀲𑀦𑁆𑀤𑁄𑀲𑀳𑁂𑀢𑀼 𑀳𑀯𑁂 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀼𑀲𑀮𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀉𑀤𑁆𑀥𑀢𑁄 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺; 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄𑀳𑀫𑀲𑁆𑀫𑀺. 𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄’𑀢𑀺. 𑀏𑀢𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬.

𑁪𑁧. ‘‘𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀓𑀗𑁆𑀔𑀻 𑀯𑀺𑀘𑀺𑀓𑀺𑀘𑁆𑀙𑀻 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀓𑀗𑁆𑀔𑀺𑀯𑀺𑀘𑀺𑀓𑀺𑀘𑁆𑀙𑀺𑀲𑀦𑁆𑀤𑁄𑀲𑀳𑁂𑀢𑀼 𑀳𑀯𑁂 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀼𑀲𑀮𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀓𑀗𑁆𑀔𑀻 𑀯𑀺𑀘𑀺𑀓𑀺𑀘𑁆𑀙𑀻 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺; 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄𑀳𑀫𑀲𑁆𑀫𑀺. 𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄’𑀢𑀺. 𑀏𑀢𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬.

𑁪𑁨. ‘‘𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀢𑁆𑀢𑀼𑀓𑁆𑀓𑀁𑀲𑀓𑀸 𑀧𑀭𑀯𑀫𑁆𑀪𑀻 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀲𑀦𑁆𑀤𑁄𑀲𑀳𑁂𑀢𑀼 𑀳𑀯𑁂 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀼𑀲𑀮𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀅𑀢𑁆𑀢𑀼𑀓𑁆𑀓𑀁𑀲𑀓𑁄 𑀧𑀭𑀯𑀫𑁆𑀪𑀻 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺; 𑀅𑀦𑀢𑁆𑀢𑀼𑀓𑁆𑀓𑀁𑀲𑀓𑁄 𑀅𑀧𑀭𑀯𑀫𑁆𑀪𑀻𑀳𑀫𑀲𑁆𑀫𑀺. 𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀅𑀦𑀢𑁆𑀢𑀼𑀓𑁆𑀓𑀁𑀲𑀓𑀸 𑀅𑀧𑀭𑀯𑀫𑁆𑀪𑀻 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄’𑀢𑀺. 𑀏𑀢𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀅𑀦𑀢𑁆𑀢𑀼𑀓𑁆𑀓𑀁𑀲𑀓𑀢𑀁 𑀅𑀧𑀭𑀯𑀫𑁆𑀪𑀺𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬.

𑁪𑁩. ‘‘𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀙𑀫𑁆𑀪𑀻 𑀪𑀻𑀭𑀼𑀓𑀚𑀸𑀢𑀺𑀓𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀙𑀫𑁆𑀪𑀺𑀪𑀻𑀭𑀼𑀓𑀚𑀸𑀢𑀺𑀓𑀲𑀦𑁆𑀤𑁄𑀲𑀳𑁂𑀢𑀼 𑀳𑀯𑁂 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀼𑀲𑀮𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀙𑀫𑁆𑀪𑀻 𑀪𑀻𑀭𑀼𑀓𑀚𑀸𑀢𑀺𑀓𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺; 𑀯𑀺𑀕𑀢𑀮𑁄𑀫𑀳𑀁𑀲𑁄𑀳𑀫𑀲𑁆𑀫𑀺. 𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀯𑀺𑀕𑀢𑀮𑁄𑀫𑀳𑀁𑀲𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄’𑀢𑀺. 𑀏𑀢𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀯𑀺𑀕𑀢𑀮𑁄𑀫𑀳𑀁𑀲𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬.

𑁪𑁪. ‘‘𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀦𑀺𑀓𑀸𑀫𑀬𑀫𑀸𑀦𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑀺𑀓𑀸𑀫𑀦 [𑀦𑀺𑀓𑀸𑀫𑀬𑀫𑀸𑀦 (𑀲𑀻. 𑀲𑁆𑀬𑀸.)] 𑀲𑀦𑁆𑀤𑁄𑀲𑀳𑁂𑀢𑀼 𑀳𑀯𑁂 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀼𑀲𑀮𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀦𑀺𑀓𑀸𑀫𑀬𑀫𑀸𑀦𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺; 𑀅𑀧𑁆𑀧𑀺𑀘𑁆𑀙𑁄𑀳𑀫𑀲𑁆𑀫𑀺. 𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀅𑀧𑁆𑀧𑀺𑀘𑁆𑀙𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄’𑀢𑀺. 𑀏𑀢𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀅𑀧𑁆𑀧𑀺𑀘𑁆𑀙𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬.

𑁪𑁫. ‘‘𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀓𑀼𑀲𑀻𑀢𑀸 𑀳𑀻𑀦𑀯𑀻𑀭𑀺𑀬𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀓𑀼𑀲𑀻𑀢𑀳𑀻𑀦𑀯𑀻𑀭𑀺𑀬𑀲𑀦𑁆𑀤𑁄𑀲𑀳𑁂𑀢𑀼 𑀳𑀯𑁂 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀼𑀲𑀮𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺; 𑀆𑀭𑀤𑁆𑀥𑀯𑀻𑀭𑀺𑀬𑁄𑀳𑀫𑀲𑁆𑀫𑀺. 𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄’𑀢𑀺. 𑀏𑀢𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀆𑀭𑀤𑁆𑀥𑀯𑀻𑀭𑀺𑀬𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬.

𑁪𑁬. ‘‘𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀫𑀼𑀝𑁆𑀞𑀲𑁆𑀲𑀢𑀻 𑀅𑀲𑀫𑁆𑀧𑀚𑀸𑀦𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀫𑀼𑀝𑁆𑀞𑀲𑁆𑀲𑀢𑀺𑀅𑀲𑀫𑁆𑀧𑀚𑀸𑀦𑀲𑀦𑁆𑀤𑁄𑀲𑀳𑁂𑀢𑀼 𑀳𑀯𑁂 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀼𑀲𑀮𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀫𑀼𑀝𑁆𑀞𑀲𑁆𑀲𑀢𑀺 𑀅𑀲𑀫𑁆𑀧𑀚𑀸𑀦𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺; 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀳𑀫𑀲𑁆𑀫𑀺. 𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄’𑀢𑀺. 𑀏𑀢𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬.

𑁪𑁭. ‘‘𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀲𑀫𑀸𑀳𑀺𑀢𑀸 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀅𑀲𑀫𑀸𑀳𑀺𑀢𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀲𑀦𑁆𑀤𑁄𑀲𑀳𑁂𑀢𑀼 𑀳𑀯𑁂 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀼𑀲𑀮𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀅𑀲𑀫𑀸𑀳𑀺𑀢𑁄 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺; 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄𑀳𑀫𑀲𑁆𑀫𑀺. 𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄’𑀢𑀺. 𑀏𑀢𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑀫𑀸𑀥𑀺𑀲𑀫𑁆𑀧𑀤𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬.

𑁪𑁮. ‘‘𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀤𑀼𑀧𑁆𑀧𑀜𑁆𑀜𑀸 𑀏𑀴𑀫𑀽𑀕𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺, 𑀤𑀼𑀧𑁆𑀧𑀜𑁆𑀜𑀏𑀴𑀫𑀽𑀕𑀲𑀦𑁆𑀤𑁄𑀲𑀳𑁂𑀢𑀼 𑀳𑀯𑁂 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀓𑀼𑀲𑀮𑀁 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺. 𑀦 𑀔𑁄 𑀧𑀦𑀸𑀳𑀁 𑀤𑀼𑀧𑁆𑀧𑀜𑁆𑀜𑁄 𑀏𑀴𑀫𑀽𑀕𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺; 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄𑀳𑀫𑀲𑁆𑀫𑀺. 𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄’𑀢𑀺. 𑀏𑀢𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀜𑀸𑀲𑀫𑁆𑀧𑀤𑀁 𑀅𑀢𑁆𑀢𑀦𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬.

𑀲𑁄𑀴𑀲𑀧𑀭𑀺𑀬𑀸𑀬𑀁 𑀦𑀺𑀝𑁆𑀞𑀺𑀢𑀁.

𑁪𑁯. ‘‘𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀬𑀸 𑀢𑀸 𑀭𑀢𑁆𑀢𑀺𑀬𑁄 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀮𑀓𑁆𑀔𑀺𑀢𑀸 𑁋 𑀘𑀸𑀢𑀼𑀤𑁆𑀤𑀲𑀻 𑀧𑀜𑁆𑀘𑀤𑀲𑀻 𑀅𑀝𑁆𑀞𑀫𑀻 𑀘 𑀧𑀓𑁆𑀔𑀲𑁆𑀲 𑁋 𑀢𑀣𑀸𑀭𑀽𑀧𑀸𑀲𑀼 𑀭𑀢𑁆𑀢𑀻𑀲𑀼 𑀬𑀸𑀦𑀺 𑀢𑀸𑀦𑀺 𑀆𑀭𑀸𑀫𑀘𑁂𑀢𑀺𑀬𑀸𑀦𑀺 𑀯𑀦𑀘𑁂𑀢𑀺𑀬𑀸𑀦𑀺 𑀭𑀼𑀓𑁆𑀔𑀘𑁂𑀢𑀺𑀬𑀸𑀦𑀺 𑀪𑀺𑀁𑀲𑀦𑀓𑀸𑀦𑀺 𑀲𑀮𑁄𑀫𑀳𑀁𑀲𑀸𑀦𑀺 𑀢𑀣𑀸𑀭𑀽𑀧𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑁂𑀬𑁆𑀬𑀁 𑀅𑀧𑁆𑀧𑁂𑀯 𑀦𑀸𑀫𑀸𑀳𑀁 𑀪𑀬𑀪𑁂𑀭𑀯𑀁 𑀧𑀲𑁆𑀲𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀅𑀧𑀭𑁂𑀦 𑀲𑀫𑀬𑁂𑀦 𑀬𑀸 𑀢𑀸 𑀭𑀢𑁆𑀢𑀺𑀬𑁄 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀮𑀓𑁆𑀔𑀺𑀢𑀸 𑁋 𑀘𑀸𑀢𑀼𑀤𑁆𑀤𑀲𑀻 𑀧𑀜𑁆𑀘𑀤𑀲𑀻 𑀅𑀝𑁆𑀞𑀫𑀻 𑀘 𑀧𑀓𑁆𑀔𑀲𑁆𑀲 𑁋 𑀢𑀣𑀸𑀭𑀽𑀧𑀸𑀲𑀼 𑀭𑀢𑁆𑀢𑀻𑀲𑀼 𑀬𑀸𑀦𑀺 𑀢𑀸𑀦𑀺 𑀆𑀭𑀸𑀫𑀘𑁂𑀢𑀺𑀬𑀸𑀦𑀺 𑀯𑀦𑀘𑁂𑀢𑀺𑀬𑀸𑀦𑀺 𑀭𑀼𑀓𑁆𑀔𑀘𑁂𑀢𑀺𑀬𑀸𑀦𑀺 𑀪𑀺𑀁𑀲𑀦𑀓𑀸𑀦𑀺 𑀲𑀮𑁄𑀫𑀳𑀁𑀲𑀸𑀦𑀺 𑀢𑀣𑀸𑀭𑀽𑀧𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑀸𑀫𑀺. 𑀢𑀢𑁆𑀣 𑀘 𑀫𑁂, 𑀩𑁆𑀭𑀸𑀳𑁆𑀫𑀡, 𑀯𑀺𑀳𑀭𑀢𑁄 𑀫𑀕𑁄 𑀯𑀸 𑀆𑀕𑀘𑁆𑀙𑀢𑀺, 𑀫𑁄𑀭𑁄 𑀯𑀸 𑀓𑀝𑁆𑀞𑀁 𑀧𑀸𑀢𑁂𑀢𑀺, 𑀯𑀸𑀢𑁄 𑀯𑀸 𑀧𑀡𑁆𑀡𑀓𑀲𑀝𑀁 [𑀧𑀡𑁆𑀡𑀲𑀝𑀁 (𑀲𑀻. 𑀧𑀻.)] 𑀏𑀭𑁂𑀢𑀺; 𑀢𑀲𑁆𑀲 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡 𑀏𑀢𑀤𑀳𑁄𑀲𑀺 [𑀢𑀲𑁆𑀲 𑀫𑀬𑁆𑀳𑀁 𑀏𑀯𑀁 𑀳𑁄𑀢𑀺 (𑀲𑀻. 𑀲𑁆𑀬𑀸.)] 𑁋 ‘𑀏𑀢𑀁 𑀦𑀽𑀦 𑀢𑀁 𑀪𑀬𑀪𑁂𑀭𑀯𑀁 𑀆𑀕𑀘𑁆𑀙𑀢𑀻’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀢𑀤𑀳𑁄𑀲𑀺 𑁋 ‘𑀓𑀺𑀁 𑀦𑀼 𑀔𑁄 𑀅𑀳𑀁 𑀅𑀜𑁆𑀜𑀤𑀢𑁆𑀣𑀼 𑀪𑀬𑀧𑀝𑀺𑀓𑀗𑁆𑀔𑀻 [𑀪𑀬𑀧𑀸𑀝𑀺𑀓𑀗𑁆𑀔𑀻 (𑀲𑀻.)] 𑀯𑀺𑀳𑀭𑀸𑀫𑀺? 𑀬𑀁𑀦𑀽𑀦𑀸𑀳𑀁 𑀬𑀣𑀸𑀪𑀽𑀢𑀁 𑀬𑀣𑀸𑀪𑀽𑀢𑀲𑁆𑀲 [𑀬𑀣𑀸𑀪𑀽𑀢𑀲𑁆𑀲 𑀬𑀣𑀸𑀪𑀽𑀢𑀲𑁆𑀲 (𑀲𑀻. 𑀲𑁆𑀬𑀸.)] 𑀫𑁂 𑀢𑀁 𑀪𑀬𑀪𑁂𑀭𑀯𑀁 𑀆𑀕𑀘𑁆𑀙𑀢𑀺, 𑀢𑀣𑀸𑀪𑀽𑀢𑀁 𑀢𑀣𑀸𑀪𑀽𑀢𑁄𑀯 [𑀬𑀣𑀸𑀪𑀽𑀢𑁄 𑀬𑀣𑀸𑀪𑀽𑀢𑁄𑀯 (𑀲𑀻. 𑀲𑁆𑀬𑀸.)] 𑀢𑀁 𑀪𑀬𑀪𑁂𑀭𑀯𑀁 𑀧𑀝𑀺𑀯𑀺𑀦𑁂𑀬𑁆𑀬’𑀦𑁆𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀘𑀗𑁆𑀓𑀫𑀦𑁆𑀢𑀲𑁆𑀲 𑀢𑀁 𑀪𑀬𑀪𑁂𑀭𑀯𑀁 𑀆𑀕𑀘𑁆𑀙𑀢𑀺. 𑀲𑁄 𑀔𑁄 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀦𑁂𑀯 𑀢𑀸𑀯 𑀢𑀺𑀝𑁆𑀞𑀸𑀫𑀺 𑀦 𑀦𑀺𑀲𑀻𑀤𑀸𑀫𑀺 𑀦 𑀦𑀺𑀧𑀚𑁆𑀚𑀸𑀫𑀺, 𑀬𑀸𑀯 𑀘𑀗𑁆𑀓𑀫𑀦𑁆𑀢𑁄𑀯 𑀢𑀁 𑀪𑀬𑀪𑁂𑀭𑀯𑀁 𑀧𑀝𑀺𑀯𑀺𑀦𑁂𑀫𑀺. 𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀞𑀺𑀢𑀲𑁆𑀲 𑀢𑀁 𑀪𑀬𑀪𑁂𑀭𑀯𑀁 𑀆𑀕𑀘𑁆𑀙𑀢𑀺. 𑀲𑁄 𑀔𑁄 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀦𑁂𑀯 𑀢𑀸𑀯 𑀘𑀗𑁆𑀓𑀫𑀸𑀫𑀺 𑀦 𑀦𑀺𑀲𑀻𑀤𑀸𑀫𑀺 𑀦 𑀦𑀺𑀧𑀚𑁆𑀚𑀸𑀫𑀺. 𑀬𑀸𑀯 𑀞𑀺𑀢𑁄𑀯 𑀢𑀁 𑀪𑀬𑀪𑁂𑀭𑀯𑀁 𑀧𑀝𑀺𑀯𑀺𑀦𑁂𑀫𑀺. 𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀦𑀺𑀲𑀺𑀦𑁆𑀦𑀲𑁆𑀲 𑀢𑀁 𑀪𑀬𑀪𑁂𑀭𑀯𑀁 𑀆𑀕𑀘𑁆𑀙𑀢𑀺. 𑀲𑁄 𑀔𑁄 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀦𑁂𑀯 𑀢𑀸𑀯 𑀦𑀺𑀧𑀚𑁆𑀚𑀸𑀫𑀺 𑀦 𑀢𑀺𑀝𑁆𑀞𑀸𑀫𑀺 𑀦 𑀘𑀗𑁆𑀓𑀫𑀸𑀫𑀺, 𑀬𑀸𑀯 𑀦𑀺𑀲𑀺𑀦𑁆𑀦𑁄𑀯 𑀢𑀁 𑀪𑀬𑀪𑁂𑀭𑀯𑀁 𑀧𑀝𑀺𑀯𑀺𑀦𑁂𑀫𑀺. 𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀦𑀺𑀧𑀦𑁆𑀦𑀲𑁆𑀲 𑀢𑀁 𑀪𑀬𑀪𑁂𑀭𑀯𑀁 𑀆𑀕𑀘𑁆𑀙𑀢𑀺. 𑀲𑁄 𑀔𑁄 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀦𑁂𑀯 𑀢𑀸𑀯 𑀦𑀺𑀲𑀻𑀤𑀸𑀫𑀺 𑀦 𑀢𑀺𑀝𑁆𑀞𑀸𑀫𑀺 𑀦 𑀘𑀗𑁆𑀓𑀫𑀸𑀫𑀺, 𑀬𑀸𑀯 𑀦𑀺𑀧𑀦𑁆𑀦𑁄𑀯 𑀢𑀁 𑀪𑀬𑀪𑁂𑀭𑀯𑀁 𑀧𑀝𑀺𑀯𑀺𑀦𑁂𑀫𑀺.

𑁫𑁦. ‘‘𑀲𑀦𑁆𑀢𑀺 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀭𑀢𑁆𑀢𑀺𑀁𑀬𑁂𑀯 𑀲𑀫𑀸𑀦𑀁 𑀤𑀺𑀯𑀸𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, 𑀤𑀺𑀯𑀸𑀬𑁂𑀯 𑀲𑀫𑀸𑀦𑀁 𑀭𑀢𑁆𑀢𑀻𑀢𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀇𑀤𑀫𑀳𑀁 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀫𑁆𑀫𑁄𑀳𑀯𑀺𑀳𑀸𑀭𑀲𑁆𑀫𑀺𑀁 𑀯𑀤𑀸𑀫𑀺. 𑀅𑀳𑀁 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡, 𑀭𑀢𑁆𑀢𑀺𑀁𑀬𑁂𑀯 𑀲𑀫𑀸𑀦𑀁 𑀭𑀢𑁆𑀢𑀻𑀢𑀺 𑀲𑀜𑁆𑀚𑀸𑀦𑀸𑀫𑀺, 𑀤𑀺𑀯𑀸𑀬𑁂𑀯 𑀲𑀫𑀸𑀦𑀁 𑀤𑀺𑀯𑀸𑀢𑀺 𑀲𑀜𑁆𑀚𑀸𑀦𑀸𑀫𑀺. 𑀬𑀁 𑀔𑁄 𑀢𑀁, 𑀩𑁆𑀭𑀸𑀳𑁆𑀫𑀡, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀲𑀫𑁆𑀫𑁄𑀳𑀥𑀫𑁆𑀫𑁄 𑀲𑀢𑁆𑀢𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺, 𑀫𑀫𑁂𑀯 𑀢𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀲𑀫𑁆𑀫𑁄𑀳𑀥𑀫𑁆𑀫𑁄 𑀲𑀢𑁆𑀢𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺.

𑁫𑁧. ‘‘𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂, 𑀩𑁆𑀭𑀸𑀳𑁆𑀫𑀡, 𑀯𑀻𑀭𑀺𑀬𑀁 𑀅𑀳𑁄𑀲𑀺 𑀅𑀲𑀮𑁆𑀮𑀻𑀦𑀁, 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸 [𑀅𑀧𑁆𑀧𑀫𑁆𑀫𑀼𑀝𑁆𑀞𑀸 (𑀲𑁆𑀬𑀸.)], 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁. 𑀲𑁄 𑀔𑁄 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀸𑀲𑀺𑀁, 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀲𑀺𑀁; 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁.

𑁫𑁨. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀁. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺. 𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀭𑀢𑁆𑀢𑀺𑀬𑀸 𑀧𑀞𑀫𑁂 𑀬𑀸𑀫𑁂 𑀧𑀞𑀫𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸, 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀢𑀫𑁄 𑀯𑀺𑀳𑀢𑁄 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄, 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄.

𑁫𑁩. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀁. 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀸𑀫𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀫𑀺 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸; 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸; 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀸𑀫𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀫𑀺. 𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀤𑀼𑀢𑀺𑀬𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸, 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀢𑀫𑁄 𑀯𑀺𑀳𑀢𑁄 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄, 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄.

𑁫𑁪. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀁. 𑀲𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁. ‘𑀇𑀫𑁂 𑀆𑀲𑀯𑀸’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀢𑀲𑁆𑀲 𑀫𑁂 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀅𑀳𑁄𑀲𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀢𑀢𑀺𑀬𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸, 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀢𑀫𑁄 𑀯𑀺𑀳𑀢𑁄 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄, 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄.

𑁫𑁫. ‘‘𑀲𑀺𑀬𑀸 𑀔𑁄 𑀧𑀦 𑀢𑁂, 𑀩𑁆𑀭𑀸𑀳𑁆𑀫𑀡, 𑀏𑀯𑀫𑀲𑁆𑀲 𑁋 ‘𑀅𑀚𑁆𑀚𑀸𑀧𑀺 𑀦𑀽𑀦 𑀲𑀫𑀡𑁄 𑀕𑁄𑀢𑀫𑁄 𑀅𑀯𑀻𑀢𑀭𑀸𑀕𑁄 𑀅𑀯𑀻𑀢𑀤𑁄𑀲𑁄 𑀅𑀯𑀻𑀢𑀫𑁄𑀳𑁄, 𑀢𑀲𑁆𑀫𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀻’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀤𑁆𑀯𑁂 𑀔𑁄 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀅𑀢𑁆𑀣𑀯𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀸𑀫𑀺 𑁋 𑀅𑀢𑁆𑀢𑀦𑁄 𑀘 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀲𑀫𑁆𑀧𑀲𑁆𑀲𑀫𑀸𑀦𑁄, 𑀧𑀘𑁆𑀙𑀺𑀫𑀜𑁆𑀘 𑀚𑀦𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄’’𑀢𑀺.

𑁫𑁬. ‘‘𑀅𑀦𑀼𑀓𑀫𑁆𑀧𑀺𑀢𑀭𑀽𑀧𑀸 𑀯𑀢𑀸𑀬𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀧𑀘𑁆𑀙𑀺𑀫𑀸 𑀚𑀦𑀢𑀸, 𑀬𑀣𑀸 𑀢𑀁 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫! 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺; 𑀏𑀯𑀫𑁂𑀯𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.

𑀪𑀬𑀪𑁂𑀭𑀯𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.

𑁫. 𑀅𑀦𑀗𑁆𑀕𑀡𑀲𑀼𑀢𑁆𑀢𑀁

𑁫𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄, 𑀪𑀺𑀓𑁆𑀔𑀯𑁂’’𑀢𑀺. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋

‘‘𑀘𑀢𑁆𑀢𑀸𑀭𑁄𑀫𑁂, 𑀆𑀯𑀼𑀲𑁄, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥𑀸𑀯𑀼𑀲𑁄, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀸𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀇𑀥 𑀧𑀦𑀸𑀯𑀼𑀲𑁄, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀸𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀇𑀥𑀸𑀯𑀼𑀲𑁄, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀦𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀇𑀥 𑀧𑀦𑀸𑀯𑀼𑀲𑁄, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀦𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀢𑁆𑀭𑀸𑀯𑀼𑀲𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀲𑀸𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀬𑀁 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀸𑀗𑁆𑀕𑀡𑀸𑀦𑀁𑀬𑁂𑀯 𑀲𑀢𑀁 𑀳𑀻𑀦𑀧𑀼𑀭𑀺𑀲𑁄 𑀅𑀓𑁆𑀔𑀸𑀬𑀢𑀺. 𑀢𑀢𑁆𑀭𑀸𑀯𑀼𑀲𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀲𑀸𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀸𑀗𑁆𑀕𑀡𑀸𑀦𑀁𑀬𑁂𑀯 𑀲𑀢𑀁 𑀲𑁂𑀝𑁆𑀞𑀧𑀼𑀭𑀺𑀲𑁄 𑀅𑀓𑁆𑀔𑀸𑀬𑀢𑀺. 𑀢𑀢𑁆𑀭𑀸𑀯𑀼𑀲𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀅𑀦𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀬𑀁 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀦𑀗𑁆𑀕𑀡𑀸𑀦𑀁𑀬𑁂𑀯 𑀲𑀢𑀁 𑀳𑀻𑀦𑀧𑀼𑀭𑀺𑀲𑁄 𑀅𑀓𑁆𑀔𑀸𑀬𑀢𑀺. 𑀢𑀢𑁆𑀭𑀸𑀯𑀼𑀲𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀅𑀦𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀦𑀗𑁆𑀕𑀡𑀸𑀦𑀁𑀬𑁂𑀯 𑀲𑀢𑀁 𑀲𑁂𑀝𑁆𑀞𑀧𑀼𑀭𑀺𑀲𑁄 𑀅𑀓𑁆𑀔𑀸𑀬𑀢𑀻’’𑀢𑀺.

𑁫𑁮. 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀓𑁄 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦𑀺𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀸𑀗𑁆𑀕𑀡𑀸𑀦𑀁𑀬𑁂𑀯 𑀲𑀢𑀁 𑀏𑀓𑁄 𑀳𑀻𑀦𑀧𑀼𑀭𑀺𑀲𑁄 𑀅𑀓𑁆𑀔𑀸𑀬𑀢𑀺, 𑀏𑀓𑁄 𑀲𑁂𑀝𑁆𑀞𑀧𑀼𑀭𑀺𑀲𑁄 𑀅𑀓𑁆𑀔𑀸𑀬𑀢𑀺? 𑀓𑁄 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦𑀺𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀦𑀗𑁆𑀕𑀡𑀸𑀦𑀁𑀬𑁂𑀯 𑀲𑀢𑀁 𑀏𑀓𑁄 𑀳𑀻𑀦𑀧𑀼𑀭𑀺𑀲𑁄 𑀅𑀓𑁆𑀔𑀸𑀬𑀢𑀺, 𑀏𑀓𑁄 𑀲𑁂𑀝𑁆𑀞𑀧𑀼𑀭𑀺𑀲𑁄 𑀅𑀓𑁆𑀔𑀸𑀬𑀢𑀻’’𑀢𑀺?

𑁫𑁯. ‘‘𑀢𑀢𑁆𑀭𑀸𑀯𑀼𑀲𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀲𑀸𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀦 𑀙𑀦𑁆𑀤𑀁 𑀚𑀦𑁂𑀲𑁆𑀲𑀢𑀺 𑀦 𑀯𑀸𑀬𑀫𑀺𑀲𑁆𑀲𑀢𑀺 𑀦 𑀯𑀻𑀭𑀺𑀬𑀁 𑀆𑀭𑀪𑀺𑀲𑁆𑀲𑀢𑀺 𑀢𑀲𑁆𑀲𑀗𑁆𑀕𑀡𑀲𑁆𑀲 𑀧𑀳𑀸𑀦𑀸𑀬; 𑀲𑁄 𑀲𑀭𑀸𑀕𑁄 𑀲𑀤𑁄𑀲𑁄 𑀲𑀫𑁄𑀳𑁄 𑀲𑀸𑀗𑁆𑀕𑀡𑁄 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀓𑀸𑀮𑀁 𑀓𑀭𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀓𑀁𑀲𑀧𑀸𑀢𑀺 𑀆𑀪𑀢𑀸 𑀆𑀧𑀡𑀸 𑀯𑀸 𑀓𑀫𑁆𑀫𑀸𑀭𑀓𑀼𑀮𑀸 𑀯𑀸 𑀭𑀚𑁂𑀦 𑀘 𑀫𑀮𑁂𑀦 𑀘 𑀧𑀭𑀺𑀬𑁄𑀦𑀤𑁆𑀥𑀸. 𑀢𑀫𑁂𑀦𑀁 𑀲𑀸𑀫𑀺𑀓𑀸 𑀦 𑀘𑁂𑀯 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀼𑀁 𑀦 𑀘 𑀧𑀭𑀺𑀬𑁄𑀤𑀧𑁂𑀬𑁆𑀬𑀼𑀁 [𑀧𑀭𑀺𑀬𑁄𑀤𑀸𑀧𑁂𑀬𑁆𑀬𑀼𑀁 (?)], 𑀭𑀚𑀸𑀧𑀣𑁂 𑀘 𑀦𑀁 𑀦𑀺𑀓𑁆𑀔𑀺𑀧𑁂𑀬𑁆𑀬𑀼𑀁. 𑀏𑀯𑀜𑁆𑀳𑀺 𑀲𑀸, 𑀆𑀯𑀼𑀲𑁄, 𑀓𑀁𑀲𑀧𑀸𑀢𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀁𑀓𑀺𑀮𑀺𑀝𑁆𑀞𑀢𑀭𑀸 𑀅𑀲𑁆𑀲 𑀫𑀮𑀕𑁆𑀕𑀳𑀺𑀢𑀸’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀲𑀸𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀦 𑀙𑀦𑁆𑀤𑀁 𑀚𑀦𑁂𑀲𑁆𑀲𑀢𑀺 𑀦 𑀯𑀸𑀬𑀫𑀺𑀲𑁆𑀲𑀢𑀺 𑀦 𑀯𑀻𑀭𑀺𑀬𑀁 𑀆𑀭𑀪𑀺𑀲𑁆𑀲𑀢𑀺 𑀢𑀲𑁆𑀲𑀗𑁆𑀕𑀡𑀲𑁆𑀲 𑀧𑀳𑀸𑀦𑀸𑀬; 𑀲𑁄 𑀲𑀭𑀸𑀕𑁄 𑀲𑀤𑁄𑀲𑁄 𑀲𑀫𑁄𑀳𑁄 𑀲𑀸𑀗𑁆𑀕𑀡𑁄 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀓𑀸𑀮𑀁 𑀓𑀭𑀺𑀲𑁆𑀲𑀢𑀺.

‘‘𑀢𑀢𑁆𑀭𑀸𑀯𑀼𑀲𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀲𑀸𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀙𑀦𑁆𑀤𑀁 𑀚𑀦𑁂𑀲𑁆𑀲𑀢𑀺 𑀯𑀸𑀬𑀫𑀺𑀲𑁆𑀲𑀢𑀺 𑀯𑀻𑀭𑀺𑀬𑀁 𑀆𑀭𑀪𑀺𑀲𑁆𑀲𑀢𑀺 𑀢𑀲𑁆𑀲𑀗𑁆𑀕𑀡𑀲𑁆𑀲 𑀧𑀳𑀸𑀦𑀸𑀬; 𑀲𑁄 𑀅𑀭𑀸𑀕𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀅𑀦𑀗𑁆𑀕𑀡𑁄 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀓𑀸𑀮𑀁 𑀓𑀭𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀓𑀁𑀲𑀧𑀸𑀢𑀺 𑀆𑀪𑀢𑀸 𑀆𑀧𑀡𑀸 𑀯𑀸 𑀓𑀫𑁆𑀫𑀸𑀭𑀓𑀼𑀮𑀸 𑀯𑀸 𑀭𑀚𑁂𑀦 𑀘 𑀫𑀮𑁂𑀦 𑀘 𑀧𑀭𑀺𑀬𑁄𑀦𑀤𑁆𑀥𑀸. 𑀢𑀫𑁂𑀦𑀁 𑀲𑀸𑀫𑀺𑀓𑀸 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀼𑀜𑁆𑀘𑁂𑀯 𑀧𑀭𑀺𑀬𑁄𑀤𑀧𑁂𑀬𑁆𑀬𑀼𑀜𑁆𑀘, 𑀦 𑀘 𑀦𑀁 𑀭𑀚𑀸𑀧𑀣𑁂 𑀦𑀺𑀓𑁆𑀔𑀺𑀧𑁂𑀬𑁆𑀬𑀼𑀁. 𑀏𑀯𑀜𑁆𑀳𑀺 𑀲𑀸, 𑀆𑀯𑀼𑀲𑁄, 𑀓𑀁𑀲𑀧𑀸𑀢𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀭𑀺𑀲𑀼𑀤𑁆𑀥𑀢𑀭𑀸 𑀅𑀲𑁆𑀲 𑀧𑀭𑀺𑀬𑁄𑀤𑀸𑀢𑀸’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀲𑀸𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀙𑀦𑁆𑀤𑀁 𑀚𑀦𑁂𑀲𑁆𑀲𑀢𑀺 𑀯𑀸𑀬𑀫𑀺𑀲𑁆𑀲𑀢𑀺 𑀯𑀻𑀭𑀺𑀬𑀁 𑀆𑀭𑀪𑀺𑀲𑁆𑀲𑀢𑀺 𑀢𑀲𑁆𑀲𑀗𑁆𑀕𑀡𑀲𑁆𑀲 𑀧𑀳𑀸𑀦𑀸𑀬; 𑀲𑁄 𑀅𑀭𑀸𑀕𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀅𑀦𑀗𑁆𑀕𑀡𑁄 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀓𑀸𑀮𑀁 𑀓𑀭𑀺𑀲𑁆𑀲𑀢𑀺.

‘‘𑀢𑀢𑁆𑀭𑀸𑀯𑀼𑀲𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀅𑀦𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀲𑀼𑀪𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀫𑀦𑀲𑀺𑀓𑀸𑀭𑀸 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀲𑁆𑀲𑀢𑀺; 𑀲𑁄 𑀲𑀭𑀸𑀕𑁄 𑀲𑀤𑁄𑀲𑁄 𑀲𑀫𑁄𑀳𑁄 𑀲𑀸𑀗𑁆𑀕𑀡𑁄 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀓𑀸𑀮𑀁 𑀓𑀭𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀓𑀁𑀲𑀧𑀸𑀢𑀺 𑀆𑀪𑀢𑀸 𑀆𑀧𑀡𑀸 𑀯𑀸 𑀓𑀫𑁆𑀫𑀸𑀭𑀓𑀼𑀮𑀸 𑀯𑀸 𑀧𑀭𑀺𑀲𑀼𑀤𑁆𑀥𑀸 𑀧𑀭𑀺𑀬𑁄𑀤𑀸𑀢𑀸. 𑀢𑀫𑁂𑀦𑀁 𑀲𑀸𑀫𑀺𑀓𑀸 𑀦 𑀘𑁂𑀯 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀼𑀁 𑀦 𑀘 𑀧𑀭𑀺𑀬𑁄𑀤𑀧𑁂𑀬𑁆𑀬𑀼𑀁, 𑀭𑀚𑀸𑀧𑀣𑁂 𑀘 𑀦𑀁 𑀦𑀺𑀓𑁆𑀔𑀺𑀧𑁂𑀬𑁆𑀬𑀼𑀁. 𑀏𑀯𑀜𑁆𑀳𑀺 𑀲𑀸, 𑀆𑀯𑀼𑀲𑁄, 𑀓𑀁𑀲𑀧𑀸𑀢𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀁𑀓𑀺𑀮𑀺𑀝𑁆𑀞𑀢𑀭𑀸 𑀅𑀲𑁆𑀲 𑀫𑀮𑀕𑁆𑀕𑀳𑀺𑀢𑀸’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀅𑀦𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀲𑀼𑀪𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀫𑀦𑀲𑀺𑀓𑀸𑀭𑀸 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀲𑁆𑀲𑀢𑀺;𑀲𑁄 𑀲𑀭𑀸𑀕𑁄 𑀲𑀤𑁄𑀲𑁄 𑀲𑀫𑁄𑀳𑁄 𑀲𑀸𑀗𑁆𑀕𑀡𑁄 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄𑀓𑀸𑀮𑀁𑀓𑀭𑀺𑀲𑁆𑀲𑀢𑀺.

‘‘𑀢𑀢𑁆𑀭𑀸𑀯𑀼𑀲𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀅𑀦𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀲𑀼𑀪𑀦𑀺𑀫𑀺𑀢𑁆𑀢𑀁 𑀦 𑀫𑀦𑀲𑀺 𑀓𑀭𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀅𑀫𑀦𑀲𑀺𑀓𑀸𑀭𑀸 𑀭𑀸𑀕𑁄 𑀘𑀺𑀢𑁆𑀢𑀁 𑀦𑀸𑀦𑀼𑀤𑁆𑀥𑀁𑀲𑁂𑀲𑁆𑀲𑀢𑀺; 𑀲𑁄 𑀅𑀭𑀸𑀕𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀅𑀦𑀗𑁆𑀕𑀡𑁄 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀓𑀸𑀮𑀁 𑀓𑀭𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀓𑀁𑀲𑀧𑀸𑀢𑀺 𑀆𑀪𑀢𑀸 𑀆𑀧𑀡𑀸 𑀯𑀸 𑀓𑀫𑁆𑀫𑀸𑀭𑀓𑀼𑀮𑀸 𑀯𑀸 𑀧𑀭𑀺𑀲𑀼𑀤𑁆𑀥𑀸 𑀧𑀭𑀺𑀬𑁄𑀤𑀸𑀢𑀸. 𑀢𑀫𑁂𑀦𑀁 𑀲𑀸𑀫𑀺𑀓𑀸 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀼𑀜𑁆𑀘𑁂𑀯 𑀧𑀭𑀺𑀬𑁄𑀤𑀧𑁂𑀬𑁆𑀬𑀼𑀜𑁆𑀘, 𑀦 𑀘 𑀦𑀁 𑀭𑀚𑀸𑀧𑀣𑁂 𑀦𑀺𑀓𑁆𑀔𑀺𑀧𑁂𑀬𑁆𑀬𑀼𑀁. 𑀏𑀯𑀜𑁆𑀳𑀺 𑀲𑀸, 𑀆𑀯𑀼𑀲𑁄, 𑀓𑀁𑀲𑀧𑀸𑀢𑀺 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀭𑀺𑀲𑀼𑀤𑁆𑀥𑀢𑀭𑀸 𑀅𑀲𑁆𑀲 𑀧𑀭𑀺𑀬𑁄𑀤𑀸𑀢𑀸’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀅𑀦𑀗𑁆𑀕𑀡𑁄𑀯 𑀲𑀫𑀸𑀦𑁄 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀅𑀗𑁆𑀕𑀡’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀲𑀼𑀪𑀦𑀺𑀫𑀺𑀢𑁆𑀢𑀁 𑀦 𑀫𑀦𑀲𑀺 𑀓𑀭𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀅𑀫𑀦𑀲𑀺𑀓𑀸𑀭𑀸 𑀭𑀸𑀕𑁄 𑀘𑀺𑀢𑁆𑀢𑀁 𑀦𑀸𑀦𑀼𑀤𑁆𑀥𑀁𑀲𑁂𑀲𑁆𑀲𑀢𑀺; 𑀲𑁄 𑀅𑀭𑀸𑀕𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀅𑀦𑀗𑁆𑀕𑀡𑁄 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀓𑀸𑀮𑀁 𑀓𑀭𑀺𑀲𑁆𑀲𑀢𑀺.

‘‘𑀅𑀬𑀁 𑀔𑁄, 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦𑀺𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀸𑀗𑁆𑀕𑀡𑀸𑀦𑀁𑀬𑁂𑀯 𑀲𑀢𑀁 𑀏𑀓𑁄 𑀳𑀻𑀦𑀧𑀼𑀭𑀺𑀲𑁄 𑀅𑀓𑁆𑀔𑀸𑀬𑀢𑀺, 𑀏𑀓𑁄 𑀲𑁂𑀝𑁆𑀞𑀧𑀼𑀭𑀺𑀲𑁄 𑀅𑀓𑁆𑀔𑀸𑀬𑀢𑀺. 𑀅𑀬𑀁 𑀧𑀦𑀸𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦𑀺𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀦𑀗𑁆𑀕𑀡𑀸𑀦𑀁𑀬𑁂𑀯 𑀲𑀢𑀁 𑀏𑀓𑁄 𑀳𑀻𑀦𑀧𑀼𑀭𑀺𑀲𑁄 𑀅𑀓𑁆𑀔𑀸𑀬𑀢𑀺, 𑀏𑀓𑁄 𑀲𑁂𑀝𑁆𑀞𑀧𑀼𑀭𑀺𑀲𑁄 𑀅𑀓𑁆𑀔𑀸𑀬𑀢𑀻’’𑀢𑀺.

𑁬𑁦. ‘‘𑀅𑀗𑁆𑀕𑀡𑀁 𑀅𑀗𑁆𑀕𑀡𑀦𑁆𑀢𑀺, 𑀆𑀯𑀼𑀲𑁄, 𑀯𑀼𑀘𑁆𑀘𑀢𑀺. 𑀓𑀺𑀲𑁆𑀲 𑀦𑀼 𑀔𑁄 𑀏𑀢𑀁, 𑀆𑀯𑀼𑀲𑁄, 𑀅𑀥𑀺𑀯𑀘𑀦𑀁 𑀬𑀤𑀺𑀤𑀁 𑀅𑀗𑁆𑀕𑀡’’𑀦𑁆𑀢𑀺? ‘‘𑀧𑀸𑀧𑀓𑀸𑀦𑀁 𑀔𑁄 𑀏𑀢𑀁, 𑀆𑀯𑀼𑀲𑁄, 𑀅𑀓𑀼𑀲𑀮𑀸𑀦𑀁 𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀥𑀺𑀯𑀘𑀦𑀁, 𑀬𑀤𑀺𑀤𑀁 𑀅𑀗𑁆𑀕𑀡’’𑀦𑁆𑀢𑀺.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀆𑀧𑀢𑁆𑀢𑀺𑀜𑁆𑀘 𑀯𑀢 𑀆𑀧𑀦𑁆𑀦𑁄 𑀅𑀲𑁆𑀲𑀁, 𑀦 𑀘 𑀫𑀁 𑀪𑀺𑀓𑁆𑀔𑀽 𑀚𑀸𑀦𑁂𑀬𑁆𑀬𑀼𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’𑀢𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀢𑀁 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀽 𑀚𑀸𑀦𑁂𑀬𑁆𑀬𑀼𑀁 𑁋 ‘𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’𑀢𑀺. ‘𑀚𑀸𑀦𑀦𑁆𑀢𑀺 𑀫𑀁 𑀪𑀺𑀓𑁆𑀔𑀽 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’𑀢𑀺 𑁋 𑀇𑀢𑀺 𑀲𑁄 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀧𑁆𑀧𑀢𑀻𑀢𑁄. 𑀬𑁄 𑀘𑁂𑀯 𑀔𑁄, 𑀆𑀯𑀼𑀲𑁄, 𑀓𑁄𑀧𑁄 𑀬𑁄 𑀘 𑀅𑀧𑁆𑀧𑀘𑁆𑀘𑀬𑁄 𑁋 𑀉𑀪𑀬𑀫𑁂𑀢𑀁 𑀅𑀗𑁆𑀕𑀡𑀁.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀆𑀧𑀢𑁆𑀢𑀺𑀜𑁆𑀘 𑀯𑀢 𑀆𑀧𑀦𑁆𑀦𑁄 𑀅𑀲𑁆𑀲𑀁, 𑀅𑀦𑀼𑀭𑀳𑁄 𑀫𑀁 𑀪𑀺𑀓𑁆𑀔𑀽 𑀘𑁄𑀤𑁂𑀬𑁆𑀬𑀼𑀁, 𑀦𑁄 𑀲𑀗𑁆𑀖𑀫𑀚𑁆𑀛𑁂’𑀢𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀢𑀁 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀘𑁄𑀤𑁂𑀬𑁆𑀬𑀼𑀁, 𑀦𑁄 𑀅𑀦𑀼𑀭𑀳𑁄. ‘𑀲𑀗𑁆𑀖𑀫𑀚𑁆𑀛𑁂 𑀫𑀁 𑀪𑀺𑀓𑁆𑀔𑀽 𑀘𑁄𑀤𑁂𑀦𑁆𑀢𑀺, 𑀦𑁄 𑀅𑀦𑀼𑀭𑀳𑁄’𑀢𑀺 𑁋 𑀇𑀢𑀺 𑀲𑁄 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀧𑁆𑀧𑀢𑀻𑀢𑁄. 𑀬𑁄 𑀘𑁂𑀯 𑀔𑁄, 𑀆𑀯𑀼𑀲𑁄, 𑀓𑁄𑀧𑁄 𑀬𑁄 𑀘 𑀅𑀧𑁆𑀧𑀘𑁆𑀘𑀬𑁄 𑁋 𑀉𑀪𑀬𑀫𑁂𑀢𑀁 𑀅𑀗𑁆𑀕𑀡𑀁.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀆𑀧𑀢𑁆𑀢𑀺𑀜𑁆𑀘 𑀯𑀢 𑀆𑀧𑀦𑁆𑀦𑁄 𑀅𑀲𑁆𑀲𑀁, 𑀲𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀫𑀁 𑀘𑁄𑀤𑁂𑀬𑁆𑀬, 𑀦𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄’𑀢𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀢𑀁 𑀪𑀺𑀓𑁆𑀔𑀼𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀘𑁄𑀤𑁂𑀬𑁆𑀬, 𑀦𑁄 𑀲𑀧𑁆𑀧𑀝𑀺𑀧𑀼𑀕𑁆𑀕𑀮𑁄. ‘𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀫𑀁 𑀘𑁄𑀤𑁂𑀢𑀺, 𑀦𑁄 𑀲𑀧𑁆𑀧𑀝𑀺𑀧𑀼𑀕𑁆𑀕𑀮𑁄’𑀢𑀺 𑁋 𑀇𑀢𑀺 𑀲𑁄 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀧𑁆𑀧𑀢𑀻𑀢𑁄. 𑀬𑁄 𑀘𑁂𑀯 𑀔𑁄, 𑀆𑀯𑀼𑀲𑁄, 𑀓𑁄𑀧𑁄 𑀬𑁄 𑀘 𑀅𑀧𑁆𑀧𑀘𑁆𑀘𑀬𑁄 𑁋 𑀉𑀪𑀬𑀫𑁂𑀢𑀁 𑀅𑀗𑁆𑀕𑀡𑀁.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀫𑀫𑁂𑀯 𑀲𑀢𑁆𑀣𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬, 𑀦 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀸’𑀢𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬, 𑀦 𑀢𑀁 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬. ‘𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀲𑀢𑁆𑀣𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦 𑀫𑀁 𑀲𑀢𑁆𑀣𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻’𑀢𑀺 𑁋 𑀇𑀢𑀺 𑀲𑁄 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀧𑁆𑀧𑀢𑀻𑀢𑁄. 𑀬𑁄 𑀘𑁂𑀯 𑀔𑁄, 𑀆𑀯𑀼𑀲𑁄, 𑀓𑁄𑀧𑁄 𑀬𑁄 𑀘 𑀅𑀧𑁆𑀧𑀘𑁆𑀘𑀬𑁄 𑁋 𑀉𑀪𑀬𑀫𑁂𑀢𑀁 𑀅𑀗𑁆𑀕𑀡𑀁.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀫𑀫𑁂𑀯 𑀪𑀺𑀓𑁆𑀔𑀽 𑀧𑀼𑀭𑀓𑁆𑀔𑀢𑁆𑀯𑀸 𑀧𑀼𑀭𑀓𑁆𑀔𑀢𑁆𑀯𑀸 𑀕𑀸𑀫𑀁 𑀪𑀢𑁆𑀢𑀸𑀬 𑀧𑀯𑀺𑀲𑁂𑀬𑁆𑀬𑀼𑀁, 𑀦 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀽 𑀧𑀼𑀭𑀓𑁆𑀔𑀢𑁆𑀯𑀸 𑀧𑀼𑀭𑀓𑁆𑀔𑀢𑁆𑀯𑀸 𑀕𑀸𑀫𑀁 𑀪𑀢𑁆𑀢𑀸𑀬 𑀧𑀯𑀺𑀲𑁂𑀬𑁆𑀬𑀼’𑀦𑁆𑀢𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀽 𑀧𑀼𑀭𑀓𑁆𑀔𑀢𑁆𑀯𑀸 𑀧𑀼𑀭𑀓𑁆𑀔𑀢𑁆𑀯𑀸 𑀕𑀸𑀫𑀁 𑀪𑀢𑁆𑀢𑀸𑀬 𑀧𑀯𑀺𑀲𑁂𑀬𑁆𑀬𑀼𑀁, 𑀦 𑀢𑀁 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀽 𑀧𑀼𑀭𑀓𑁆𑀔𑀢𑁆𑀯𑀸 𑀧𑀼𑀭𑀓𑁆𑀔𑀢𑁆𑀯𑀸 𑀕𑀸𑀫𑀁 𑀪𑀢𑁆𑀢𑀸𑀬 𑀧𑀯𑀺𑀲𑁂𑀬𑁆𑀬𑀼𑀁. ‘𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀪𑀺𑀓𑁆𑀔𑀽 𑀧𑀼𑀭𑀓𑁆𑀔𑀢𑁆𑀯𑀸 𑀧𑀼𑀭𑀓𑁆𑀔𑀢𑁆𑀯𑀸 𑀕𑀸𑀫𑀁 𑀪𑀢𑁆𑀢𑀸𑀬 𑀧𑀯𑀺𑀲𑀦𑁆𑀢𑀺, 𑀦 𑀫𑀁 𑀪𑀺𑀓𑁆𑀔𑀽 𑀧𑀼𑀭𑀓𑁆𑀔𑀢𑁆𑀯𑀸 𑀧𑀼𑀭𑀓𑁆𑀔𑀢𑁆𑀯𑀸 𑀕𑀸𑀫𑀁 𑀪𑀢𑁆𑀢𑀸𑀬 𑀧𑀯𑀺𑀲𑀦𑁆𑀢𑀻’𑀢𑀺 𑁋 𑀇𑀢𑀺 𑀲𑁄 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀧𑁆𑀧𑀢𑀻𑀢𑁄. 𑀬𑁄 𑀘𑁂𑀯 𑀔𑁄, 𑀆𑀯𑀼𑀲𑁄, 𑀓𑁄𑀧𑁄 𑀬𑁄 𑀘 𑀅𑀧𑁆𑀧𑀘𑁆𑀘𑀬𑁄 𑁋 𑀉𑀪𑀬𑀫𑁂𑀢𑀁 𑀅𑀗𑁆𑀕𑀡𑀁.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀅𑀳𑀫𑁂𑀯 𑀮𑀪𑁂𑀬𑁆𑀬𑀁 𑀪𑀢𑁆𑀢𑀕𑁆𑀕𑁂 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟𑀁, 𑀦 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀮𑀪𑁂𑀬𑁆𑀬 𑀪𑀢𑁆𑀢𑀕𑁆𑀕𑁂 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’𑀦𑁆𑀢𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀮𑀪𑁂𑀬𑁆𑀬 𑀪𑀢𑁆𑀢𑀕𑁆𑀕𑁂 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟𑀁, 𑀦 𑀲𑁄 𑀪𑀺𑀓𑁆𑀔𑀼 𑀮𑀪𑁂𑀬𑁆𑀬 𑀪𑀢𑁆𑀢𑀕𑁆𑀕𑁂 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟𑀁. ‘𑀅𑀜𑁆𑀜𑁄 𑀪𑀺𑀓𑁆𑀔𑀼 𑀮𑀪𑀢𑀺 𑀪𑀢𑁆𑀢𑀕𑁆𑀕𑁂 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟𑀁, 𑀦𑀸𑀳𑀁 𑀮𑀪𑀸𑀫𑀺 𑀪𑀢𑁆𑀢𑀕𑁆𑀕𑁂 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’𑀦𑁆𑀢𑀺 𑁋 𑀇𑀢𑀺 𑀲𑁄 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀧𑁆𑀧𑀢𑀻𑀢𑁄. 𑀬𑁄 𑀘𑁂𑀯 𑀔𑁄, 𑀆𑀯𑀼𑀲𑁄, 𑀓𑁄𑀧𑁄 𑀬𑁄 𑀘 𑀅𑀧𑁆𑀧𑀘𑁆𑀘𑀬𑁄 𑁋 𑀉𑀪𑀬𑀫𑁂𑀢𑀁 𑀅𑀗𑁆𑀕𑀡𑀁.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀅𑀳𑀫𑁂𑀯 𑀪𑀢𑁆𑀢𑀕𑁆𑀕𑁂 𑀪𑀼𑀢𑁆𑀢𑀸𑀯𑀻 𑀅𑀦𑀼𑀫𑁄𑀤𑁂𑀬𑁆𑀬𑀁, 𑀦 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀢𑁆𑀢𑀕𑁆𑀕𑁂 𑀪𑀼𑀢𑁆𑀢𑀸𑀯𑀻 𑀅𑀦𑀼𑀫𑁄𑀤𑁂𑀬𑁆𑀬𑀸’𑀢𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀢𑁆𑀢𑀕𑁆𑀕𑁂 𑀪𑀼𑀢𑁆𑀢𑀸𑀯𑀻 𑀅𑀦𑀼𑀫𑁄𑀤𑁂𑀬𑁆𑀬, 𑀦 𑀲𑁄 𑀪𑀺𑀓𑁆𑀔𑀼 𑀪𑀢𑁆𑀢𑀕𑁆𑀕𑁂 𑀪𑀼𑀢𑁆𑀢𑀸𑀯𑀻 𑀅𑀦𑀼𑀫𑁄𑀤𑁂𑀬𑁆𑀬. ‘𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀢𑁆𑀢𑀕𑁆𑀕𑁂 𑀪𑀼𑀢𑁆𑀢𑀸𑀯𑀻 𑀅𑀦𑀼𑀫𑁄𑀤𑀢𑀺, 𑀦𑀸𑀳𑀁 𑀪𑀢𑁆𑀢𑀕𑁆𑀕𑁂 𑀪𑀼𑀢𑁆𑀢𑀸𑀯𑀻 𑀅𑀦𑀼𑀫𑁄𑀤𑀸𑀫𑀻’𑀢𑀺 𑁋 𑀇𑀢𑀺 𑀲𑁄 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀧𑁆𑀧𑀢𑀻𑀢𑁄. 𑀬𑁄 𑀘𑁂𑀯 𑀔𑁄, 𑀆𑀯𑀼𑀲𑁄, 𑀓𑁄𑀧𑁄 𑀬𑁄 𑀘 𑀅𑀧𑁆𑀧𑀘𑁆𑀘𑀬𑁄 𑁋 𑀉𑀪𑀬𑀫𑁂𑀢𑀁 𑀅𑀗𑁆𑀕𑀡𑀁.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀅𑀳𑀫𑁂𑀯 𑀆𑀭𑀸𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀦 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀭𑀸𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀸’𑀢𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀭𑀸𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬, 𑀦 𑀲𑁄 𑀪𑀺𑀓𑁆𑀔𑀼 𑀆𑀭𑀸𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬. ‘𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀭𑀸𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦𑀸𑀳𑀁 𑀆𑀭𑀸𑀫𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀫𑀻’𑀢𑀺 𑁋 𑀇𑀢𑀺 𑀲𑁄 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀧𑁆𑀧𑀢𑀻𑀢𑁄. 𑀬𑁄 𑀘𑁂𑀯 𑀔𑁄, 𑀆𑀯𑀼𑀲𑁄, 𑀓𑁄𑀧𑁄 𑀬𑁄 𑀘 𑀅𑀧𑁆𑀧𑀘𑁆𑀘𑀬𑁄 𑁋 𑀉𑀪𑀬𑀫𑁂𑀢𑀁 𑀅𑀗𑁆𑀕𑀡𑀁.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘𑀅𑀳𑁄 𑀯𑀢 𑀅𑀳𑀫𑁂𑀯 𑀆𑀭𑀸𑀫𑀕𑀢𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁…𑀧𑁂… 𑀉𑀧𑀸𑀲𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁…𑀧𑁂… 𑀉𑀧𑀸𑀲𑀺𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀦 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀭𑀸𑀫𑀕𑀢𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀸’𑀢𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀭𑀸𑀫𑀕𑀢𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬, 𑀦 𑀲𑁄 𑀪𑀺𑀓𑁆𑀔𑀼 𑀆𑀭𑀸𑀫𑀕𑀢𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬. ‘𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀭𑀸𑀫𑀕𑀢𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦𑀸𑀳𑀁 𑀆𑀭𑀸𑀫𑀕𑀢𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀫𑀻’𑀢𑀺 𑁋 𑀇𑀢𑀺 𑀲𑁄 𑀓𑀼𑀧𑀺𑀢𑁄 𑀳𑁄𑀢𑀺 𑀅𑀧𑁆𑀧𑀢𑀻𑀢𑁄. 𑀬𑁄 𑀘𑁂𑀯 𑀔𑁄, 𑀆𑀯𑀼𑀲𑁄, 𑀓𑁄𑀧𑁄 𑀬𑁄 𑀘 𑀅𑀧𑁆𑀧𑀘𑁆𑀘𑀬𑁄 𑁋 𑀉𑀪𑀬𑀫𑁂𑀢𑀁 𑀅𑀗𑁆𑀕𑀡𑀁.