𑁬. 𑀯𑀺𑀳𑀸𑀭𑀯𑀺𑀫𑀸𑀦𑀯𑀢𑁆𑀣𑀼

𑁭𑁨𑁯. ‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦…𑀧𑁂… 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸.

𑁭𑁩𑁦. ‘‘𑀢𑀲𑁆𑀲𑀸 𑀢𑁂 𑀦𑀘𑁆𑀘𑀫𑀸𑀦𑀸𑀬, 𑀅𑀗𑁆𑀕𑀫𑀗𑁆𑀕𑁂𑀳𑀺 𑀲𑀩𑁆𑀩𑀲𑁄;

𑀤𑀺𑀩𑁆𑀩𑀸 𑀲𑀤𑁆𑀤𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀲𑀯𑀦𑀻𑀬𑀸 𑀫𑀦𑁄𑀭𑀫𑀸.

𑁭𑁩𑁧. ‘‘𑀢𑀲𑁆𑀲𑀸 𑀢𑁂 𑀦𑀘𑁆𑀘𑀫𑀸𑀦𑀸𑀬, 𑀅𑀗𑁆𑀕𑀫𑀗𑁆𑀕𑁂𑀳𑀺 𑀲𑀩𑁆𑀩𑀲𑁄;

𑀤𑀺𑀩𑁆𑀩𑀸 𑀕𑀦𑁆𑀥𑀸 𑀧𑀯𑀸𑀬𑀦𑁆𑀢𑀺, 𑀲𑀼𑀘𑀺𑀕𑀦𑁆𑀥𑀸 𑀫𑀦𑁄𑀭𑀫𑀸.

𑁭𑁩𑁨. ‘‘𑀯𑀺𑀯𑀢𑁆𑀢𑀫𑀸𑀦𑀸 𑀓𑀸𑀬𑁂𑀦, 𑀬𑀸 𑀯𑁂𑀡𑀻𑀲𑀼 𑀧𑀺𑀴𑀦𑁆𑀥𑀦𑀸;

𑀢𑁂𑀲𑀁 𑀲𑀼𑀬𑁆𑀬𑀢𑀺 𑀦𑀺𑀕𑁆𑀖𑁄𑀲𑁄, 𑀢𑀼𑀭𑀺𑀬𑁂 𑀧𑀜𑁆𑀘𑀗𑁆𑀕𑀺𑀓𑁂 𑀬𑀣𑀸.

𑁭𑁩𑁩. ‘‘𑀯𑀝𑀁𑀲𑀓𑀸 𑀯𑀸𑀢𑀥𑀼𑀢𑀸, 𑀯𑀸𑀢𑁂𑀦 𑀲𑀫𑁆𑀧𑀓𑀫𑁆𑀧𑀺𑀢𑀸;

𑀢𑁂𑀲𑀁 𑀲𑀼𑀬𑁆𑀬𑀢𑀺 𑀦𑀺𑀕𑁆𑀖𑁄𑀲𑁄, 𑀢𑀼𑀭𑀺𑀬𑁂 𑀧𑀜𑁆𑀘𑀗𑁆𑀕𑀺𑀓𑁂 𑀬𑀣𑀸.

𑁭𑁩𑁪. ‘‘𑀬𑀸𑀧𑀺 𑀢𑁂 𑀲𑀺𑀭𑀲𑁆𑀫𑀺𑀁 𑀫𑀸𑀮𑀸, 𑀲𑀼𑀘𑀺𑀕𑀦𑁆𑀥𑀸 𑀫𑀦𑁄𑀭𑀫𑀸;

𑀯𑀸𑀢𑀺 𑀕𑀦𑁆𑀥𑁄 𑀤𑀺𑀲𑀸 𑀲𑀩𑁆𑀩𑀸, 𑀭𑀼𑀓𑁆𑀔𑁄 𑀫𑀜𑁆𑀚𑀽𑀲𑀓𑁄 𑀬𑀣𑀸.

𑁭𑁩𑁫. ‘‘𑀖𑀸𑀬𑀲𑁂 𑀢𑀁 𑀲𑀼𑀘𑀺𑀕𑀦𑁆𑀥𑀁, 𑀭𑀽𑀧𑀁 𑀧𑀲𑁆𑀲𑀲𑀺 𑀅𑀫𑀸𑀦𑀼𑀲𑀁;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺.

𑁭𑁩𑁬. ‘‘𑀲𑀸𑀯𑀢𑁆𑀣𑀺𑀬𑀁 𑀫𑀬𑁆𑀳𑀁 𑀲𑀔𑀻 𑀪𑀤𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀓𑀸𑀭𑁂𑀲𑀺 𑀫𑀳𑀸𑀯𑀺𑀳𑀸𑀭𑀁;

𑀢𑀢𑁆𑀣𑀧𑁆𑀧𑀲𑀦𑁆𑀦𑀸 𑀅𑀳𑀫𑀸𑀦𑀼𑀫𑁄𑀤𑀺𑀁, 𑀤𑀺𑀲𑁆𑀯𑀸 𑀅𑀕𑀸𑀭𑀜𑁆𑀘 𑀧𑀺𑀬𑀜𑁆𑀘 𑀫𑁂𑀢𑀁.

𑁭𑁩𑁭. ‘‘𑀢𑀸𑀬𑁂𑀯 𑀫𑁂 𑀲𑀼𑀤𑁆𑀥𑀦𑀼𑀫𑁄𑀤𑀦𑀸𑀬, 𑀮𑀤𑁆𑀥𑀁 𑀯𑀺𑀫𑀸𑀦𑀩𑁆𑀪𑀼𑀢𑀤𑀲𑁆𑀲𑀦𑁂𑀬𑁆𑀬𑀁;

𑀲𑀫𑀦𑁆𑀢𑀢𑁄 𑀲𑁄𑀴𑀲𑀬𑁄𑀚𑀦𑀸𑀦𑀺, 𑀯𑁂𑀳𑀸𑀬𑀲𑀁 𑀕𑀘𑁆𑀙𑀢𑀺 𑀇𑀤𑁆𑀥𑀺𑀬𑀸 𑀫𑀫.

𑁭𑁩𑁮. ‘‘𑀓𑀽𑀝𑀸𑀕𑀸𑀭𑀸 𑀦𑀺𑀯𑁂𑀲𑀸 𑀫𑁂, 𑀯𑀺𑀪𑀢𑁆𑀢𑀸 𑀪𑀸𑀕𑀲𑁄 𑀫𑀺𑀢𑀸;

𑀤𑀤𑁆𑀤𑀮𑁆𑀮𑀫𑀸𑀦𑀸 𑀆𑀪𑀦𑁆𑀢𑀺, 𑀲𑀫𑀦𑁆𑀢𑀸 𑀲𑀢𑀬𑁄𑀚𑀦𑀁.

𑁭𑁩𑁯. ‘‘𑀧𑁄𑀓𑁆𑀔𑀭𑀜𑁆𑀜𑁄 𑀘 𑀫𑁂 𑀏𑀢𑁆𑀣, 𑀧𑀼𑀣𑀼𑀮𑁄𑀫𑀦𑀺𑀲𑁂𑀯𑀺𑀢𑀸;

𑀅𑀘𑁆𑀙𑁄𑀤𑀓𑀸 [𑀅𑀘𑁆𑀙𑁄𑀤𑀺𑀓𑀸 (𑀲𑀻.)] 𑀯𑀺𑀧𑁆𑀧𑀲𑀦𑁆𑀦𑀸, 𑀲𑁄𑀡𑁆𑀡𑀯𑀸𑀮𑀼𑀓𑀲𑀦𑁆𑀣𑀢𑀸.

𑁭𑁪𑁦. ‘‘𑀦𑀸𑀦𑀸𑀧𑀤𑀼𑀫𑀲𑀜𑁆𑀙𑀦𑁆𑀦𑀸, 𑀧𑀼𑀡𑁆𑀟𑀭𑀻𑀓𑀲𑀫𑁄𑀢𑀢𑀸 [𑀧𑀡𑁆𑀟𑀭𑀻𑀓𑀲𑀫𑁄𑀦𑀢𑀸 (𑀲𑀻.)];

𑀲𑀼𑀭𑀪𑀻 𑀲𑀫𑁆𑀧𑀯𑀸𑀬𑀦𑁆𑀢𑀺, 𑀫𑀦𑀼𑀜𑁆𑀜𑀸 𑀫𑀸𑀮𑀼𑀢𑁂𑀭𑀺𑀢𑀸.

𑁭𑁪𑁧. ‘‘𑀚𑀫𑁆𑀩𑀼𑀬𑁄 𑀧𑀦𑀲𑀸 𑀢𑀸𑀮𑀸, 𑀦𑀸𑀴𑀺𑀓𑁂𑀭𑀯𑀦𑀸𑀦𑀺 𑀘;

𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀚𑀸𑀢𑀸, 𑀦𑀸𑀦𑀸𑀭𑀼𑀓𑁆𑀔𑀸 𑀅𑀭𑁄𑀧𑀺𑀫𑀸.

𑁭𑁪𑁨. ‘‘𑀦𑀸𑀦𑀸𑀢𑀽𑀭𑀺𑀬𑀲𑀗𑁆𑀖𑀼𑀝𑁆𑀞𑀁, 𑀅𑀘𑁆𑀙𑀭𑀸𑀕𑀡𑀖𑁄𑀲𑀺𑀢𑀁;

𑀬𑁄𑀧𑀺 𑀫𑀁 𑀲𑀼𑀧𑀺𑀦𑁂 𑀧𑀲𑁆𑀲𑁂, 𑀲𑁄𑀧𑀺 𑀯𑀺𑀢𑁆𑀢𑁄 𑀲𑀺𑀬𑀸 𑀦𑀭𑁄.

𑁭𑁪𑁩. ‘‘𑀏𑀢𑀸𑀤𑀺𑀲𑀁 𑀅𑀩𑁆𑀪𑀼𑀢𑀤𑀲𑁆𑀲𑀦𑁂𑀬𑁆𑀬𑀁, 𑀯𑀺𑀫𑀸𑀦𑀁 𑀲𑀩𑁆𑀩𑀲𑁄𑀧𑀪𑀁;

𑀫𑀫 𑀓𑀫𑁆𑀫𑁂𑀳𑀺 𑀦𑀺𑀩𑁆𑀩𑀢𑁆𑀢𑀁, 𑀅𑀮𑀁 𑀧𑀼𑀜𑁆𑀜𑀸𑀦𑀺 𑀓𑀸𑀢𑀯𑁂’’𑀢𑀺.

𑁭𑁪𑁪. ‘‘𑀢𑀸𑀬𑁂𑀯 𑀢𑁂 𑀲𑀼𑀤𑁆𑀥𑀦𑀼𑀫𑁄𑀤𑀦𑀸𑀬, 𑀮𑀤𑁆𑀥𑀁 𑀯𑀺𑀫𑀸𑀦𑀩𑁆𑀪𑀼𑀢𑀤𑀲𑁆𑀲𑀦𑁂𑀬𑁆𑀬𑀁;

𑀬𑀸 𑀘𑁂𑀯 𑀲𑀸 𑀤𑀸𑀦𑀫𑀤𑀸𑀲𑀺 𑀦𑀸𑀭𑀻, 𑀢𑀲𑁆𑀲𑀸 𑀕𑀢𑀺𑀁 𑀩𑁆𑀭𑀽𑀳𑀺 𑀓𑀼𑀳𑀺𑀁 𑀉𑀧𑁆𑀧𑀦𑁆𑀦𑀸 [𑀉𑀧𑀧𑀦𑁆𑀦𑀸 (𑀓.)] 𑀲𑀸’’𑀢𑀺.

𑁭𑁪𑁫. ‘‘𑀬𑀸 𑀲𑀸 𑀅𑀳𑀼 𑀫𑀬𑁆𑀳𑀁 𑀲𑀔𑀻 𑀪𑀤𑀦𑁆𑀢𑁂, 𑀲𑀗𑁆𑀖𑀲𑁆𑀲 𑀓𑀸𑀭𑁂𑀲𑀺 𑀫𑀳𑀸𑀯𑀺𑀳𑀸𑀭𑀁;

𑀯𑀺𑀜𑁆𑀜𑀸𑀢𑀥𑀫𑁆𑀫𑀸 𑀲𑀸 𑀅𑀤𑀸𑀲𑀺 𑀤𑀸𑀦𑀁, 𑀉𑀧𑁆𑀧𑀦𑁆𑀦𑀸 𑀦𑀺𑀫𑁆𑀫𑀸𑀦𑀭𑀢𑀻𑀲𑀼 𑀤𑁂𑀯𑁂𑀲𑀼.

𑁭𑁪𑁬. ‘‘𑀧𑀚𑀸𑀧𑀢𑀻 𑀢𑀲𑁆𑀲 𑀲𑀼𑀦𑀺𑀫𑁆𑀫𑀺𑀢𑀲𑁆𑀲, 𑀅𑀘𑀺𑀦𑁆𑀢𑀺𑀬𑀸 𑀓𑀫𑁆𑀫𑀯𑀺𑀧𑀸𑀓𑀸 𑀢𑀲𑁆𑀲;

𑀬𑀫𑁂𑀢𑀁 𑀧𑀼𑀘𑁆𑀙𑀲𑀺 𑀓𑀼𑀳𑀺𑀁 𑀉𑀧𑁆𑀧𑀦𑁆𑀦𑀸 [𑀉𑀧𑀧𑀦𑁆𑀦𑀸 (𑀓.)] 𑀲𑀸𑀢𑀺, 𑀢𑀁 𑀢𑁂 𑀯𑀺𑀬𑀸𑀓𑀸𑀲𑀺𑀁 𑀅𑀦𑀜𑁆𑀜𑀣𑀸 𑀅𑀳𑀁.

𑁭𑁪𑁭. ‘‘𑀢𑁂𑀦𑀳𑀜𑁆𑀜𑁂𑀧𑀺 𑀲𑀫𑀸𑀤𑀧𑁂𑀣, 𑀲𑀗𑁆𑀖𑀲𑁆𑀲 𑀤𑀸𑀦𑀸𑀦𑀺 𑀤𑀤𑀸𑀣 𑀯𑀺𑀢𑁆𑀢𑀸;

𑀥𑀫𑁆𑀫𑀜𑁆𑀘 𑀲𑀼𑀡𑀸𑀣 𑀧𑀲𑀦𑁆𑀦𑀫𑀸𑀦𑀲𑀸, 𑀲𑀼𑀤𑀼𑀮𑁆𑀮𑀪𑁄 𑀮𑀤𑁆𑀥𑁄 𑀫𑀦𑀼𑀲𑁆𑀲𑀮𑀸𑀪𑁄.

𑁭𑁪𑁮. ‘‘𑀬𑀁 𑀫𑀕𑁆𑀕𑀁 𑀫𑀕𑁆𑀕𑀸𑀥𑀺𑀧𑀢𑀻 𑀅𑀤𑁂𑀲𑀬𑀺 [𑀫𑀕𑁆𑀕𑀸𑀥𑀺𑀧𑀢𑁆𑀬𑀤𑁂𑀲𑀬𑀺 (𑀲𑀻.)], 𑀩𑁆𑀭𑀳𑁆𑀫𑀲𑁆𑀲𑀭𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄;

𑀲𑀗𑁆𑀖𑀲𑁆𑀲 𑀤𑀸𑀦𑀸𑀦𑀺 𑀤𑀤𑀸𑀣 𑀯𑀺𑀢𑁆𑀢𑀸, 𑀫𑀳𑀧𑁆𑀨𑀮𑀸 𑀬𑀢𑁆𑀣 𑀪𑀯𑀦𑁆𑀢𑀺 𑀤𑀓𑁆𑀔𑀺𑀡𑀸.

𑁭𑁪𑁯. [𑀔𑀼. 𑀧𑀸. 𑁬.𑁬; 𑀲𑀼. 𑀦𑀺. 𑁨𑁨𑁯] ‘‘𑀬𑁂 𑀧𑀼𑀕𑁆𑀕𑀮𑀸 𑀅𑀝𑁆𑀞 𑀲𑀢𑀁 𑀧𑀲𑀢𑁆𑀣𑀸, 𑀘𑀢𑁆𑀢𑀸𑀭𑀺 𑀏𑀢𑀸𑀦𑀺 𑀬𑀼𑀕𑀸𑀦𑀺 𑀳𑁄𑀦𑁆𑀢𑀺;

𑀢𑁂 𑀤𑀓𑁆𑀔𑀺𑀡𑁂𑀬𑁆𑀬𑀸 𑀲𑀼𑀕𑀢𑀲𑁆𑀲 𑀲𑀸𑀯𑀓𑀸, 𑀏𑀢𑁂𑀲𑀼 𑀤𑀺𑀦𑁆𑀦𑀸𑀦𑀺 𑀫𑀳𑀧𑁆𑀨𑀮𑀸𑀦𑀺.

𑁭𑁫𑁦. [𑀯𑀺. 𑀯. 𑁬𑁪𑁧] ‘‘𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄.

𑁭𑁫𑁧. [𑀯𑀺. 𑀯. 𑁬𑁪𑁨] ‘‘𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁭𑁫𑁨. [𑀯𑀺. 𑀯. 𑁬𑁪𑁩] ‘‘𑀏𑀲𑁄 𑀳𑀺 𑀲𑀗𑁆𑀖𑁄 𑀯𑀺𑀧𑀼𑀮𑁄 𑀫𑀳𑀕𑁆𑀕𑀢𑁄, 𑀏𑀲𑀧𑁆𑀧𑀫𑁂𑀬𑁆𑀬𑁄 𑀉𑀤𑀥𑀻𑀯 𑀲𑀸𑀕𑀭𑁄;

𑀏𑀢𑁂𑀳𑀺 𑀲𑁂𑀝𑁆𑀞𑀸 𑀦𑀭𑀯𑀻𑀭𑀲𑀸𑀯𑀓𑀸, 𑀧𑀪𑀗𑁆𑀓𑀭𑀸 𑀥𑀫𑁆𑀫𑀫𑀼𑀤𑀻𑀭𑀬𑀦𑁆𑀢𑀺 [𑀦𑀢𑁆𑀣𑁂𑀢𑁆𑀣 𑀧𑀸𑀞𑀪𑁂𑀤𑁄].

𑁭𑁫𑁩. [𑀯𑀺. 𑀯. 𑁬𑁪𑁪] ‘‘𑀢𑁂𑀲𑀁 𑀲𑀼𑀤𑀺𑀦𑁆𑀦𑀁 𑀲𑀼𑀳𑀼𑀢𑀁 𑀲𑀼𑀬𑀺𑀝𑁆𑀞𑀁, 𑀬𑁂 𑀲𑀗𑁆𑀖𑀫𑀼𑀤𑁆𑀤𑀺𑀲𑁆𑀲 𑀤𑀤𑀦𑁆𑀢𑀺 𑀤𑀸𑀦𑀁;

𑀲𑀸 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀧𑀢𑀺𑀝𑁆𑀞𑀺𑀢𑀸, 𑀫𑀳𑀧𑁆𑀨𑀮𑀸 𑀮𑁄𑀓𑀯𑀺𑀤𑀽𑀦 [𑀮𑁄𑀓𑀯𑀺𑀤𑀽𑀳𑀺 (𑀓.)] 𑀯𑀡𑁆𑀡𑀺𑀢𑀸.

𑁭𑁫𑁪. ‘‘𑀏𑀢𑀸𑀤𑀺𑀲𑀁 𑀬𑀜𑁆𑀜𑀫𑀦𑀼𑀲𑁆𑀲𑀭𑀦𑁆𑀢𑀸, 𑀬𑁂 𑀯𑁂𑀤𑀚𑀸𑀢𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂;

𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀫𑀮𑀁 𑀲𑀫𑀽𑀮𑀁, 𑀅𑀦𑀺𑀦𑁆𑀤𑀺𑀢𑀸 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦’’𑀦𑁆𑀢𑀺.

𑀯𑀺𑀳𑀸𑀭𑀯𑀺𑀫𑀸𑀦𑀁 𑀙𑀝𑁆𑀞𑀁.

𑀪𑀸𑀡𑀯𑀸𑀭𑀁 𑀤𑀼𑀢𑀺𑀬𑀁 𑀦𑀺𑀝𑁆𑀞𑀺𑀢𑀁.