𑁮. 𑀫𑀮𑁆𑀮𑀺𑀓𑀸𑀯𑀺𑀫𑀸𑀦𑀯𑀢𑁆𑀣𑀼

𑁬𑁫𑁮. ‘‘𑀧𑀻𑀢𑀯𑀢𑁆𑀣𑁂 𑀧𑀻𑀢𑀥𑀚𑁂, 𑀧𑀻𑀢𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑁂;

𑀧𑀻𑀢𑀦𑁆𑀢𑀭𑀸𑀳𑀺 𑀯𑀕𑁆𑀕𑀽𑀳𑀺, 𑀅𑀧𑀺𑀴𑀦𑁆𑀥𑀸𑀯 𑀲𑁄𑀪𑀲𑀺.

𑁬𑁫𑁯. ‘‘𑀓𑀸 𑀓𑀫𑁆𑀩𑀼𑀓𑀸𑀬𑀽𑀭𑀥𑀭𑁂 [𑀓𑀓𑀫𑁆𑀩𑀼𑀓𑀸𑀬𑀼𑀭𑀥𑀭𑁂 (𑀲𑁆𑀬𑀸.)], 𑀓𑀜𑁆𑀘𑀦𑀸𑀯𑁂𑀴𑀪𑀽𑀲𑀺𑀢𑁂;

𑀳𑁂𑀫𑀚𑀸𑀮𑀓𑀲𑀜𑁆𑀙𑀦𑁆𑀦𑁂 [𑀧𑀘𑁆𑀙𑀦𑁆𑀦𑁂 (𑀲𑀻.)], 𑀦𑀸𑀦𑀸𑀭𑀢𑀦𑀫𑀸𑀮𑀺𑀦𑀻.

𑁬𑁬𑁦. ‘‘𑀲𑁄𑀯𑀡𑁆𑀡𑀫𑀬𑀸 𑀮𑁄𑀳𑀺𑀢𑀗𑁆𑀕𑀫𑀬𑀸 [𑀮𑁄𑀳𑀺𑀢𑀗𑁆𑀓𑀫𑀬𑀸 (𑀲𑀻. 𑀲𑁆𑀬𑀸.)] 𑀘, 𑀫𑀼𑀢𑁆𑀢𑀸𑀫𑀬𑀸 𑀯𑁂𑀴𑀼𑀭𑀺𑀬𑀫𑀬𑀸 𑀘;

𑀫𑀲𑀸𑀭𑀕𑀮𑁆𑀮𑀸 𑀲𑀳𑀮𑁄𑀳𑀺𑀢𑀗𑁆𑀕𑀸 [𑀲𑀳𑀮𑁄𑀳𑀺𑀢𑀗𑁆𑀓𑀸 (𑀲𑀻.), 𑀲𑀳𑀮𑁄𑀳𑀺𑀢𑀓𑀸 (𑀲𑁆𑀬𑀸.)], 𑀧𑀸𑀭𑁂𑀯𑀢𑀓𑁆𑀔𑀻𑀳𑀺 𑀫𑀡𑀻𑀳𑀺 𑀘𑀺𑀢𑁆𑀢𑀢𑀸.

𑁬𑁬𑁧. ‘‘𑀓𑁄𑀘𑀺 𑀓𑁄𑀘𑀺 𑀏𑀢𑁆𑀣 𑀫𑀬𑀽𑀭𑀲𑀼𑀲𑁆𑀲𑀭𑁄, 𑀳𑀁𑀲𑀲𑁆𑀲 𑀭𑀜𑁆𑀜𑁄 𑀓𑀭𑀯𑀻𑀓𑀲𑀼𑀲𑁆𑀲𑀭𑁄;

𑀢𑁂𑀲𑀁 𑀲𑀭𑁄 𑀲𑀼𑀬𑁆𑀬𑀢𑀺 𑀯𑀕𑁆𑀕𑀼𑀭𑀽𑀧𑁄, 𑀧𑀜𑁆𑀘𑀗𑁆𑀕𑀺𑀓𑀁 𑀢𑀽𑀭𑀺𑀬𑀫𑀺𑀯𑀧𑁆𑀧𑀯𑀸𑀤𑀺𑀢𑀁.

𑁬𑁬𑁨. ‘‘𑀭𑀣𑁄 𑀘 𑀢𑁂 𑀲𑀼𑀪𑁄 𑀯𑀕𑁆𑀕𑀼 [𑀯𑀕𑁆𑀕𑀽 (𑀲𑁆𑀬𑀸.)], 𑀦𑀸𑀦𑀸𑀭𑀢𑀦𑀘𑀺𑀢𑁆𑀢𑀺𑀢𑁄 [𑀦𑀸𑀦𑀸𑀭𑀢𑀦𑀘𑀺𑀢𑁆𑀢𑀗𑁆𑀕𑁄 (𑀲𑁆𑀬𑀸.)];

𑀦𑀸𑀦𑀸𑀯𑀡𑁆𑀡𑀸𑀳𑀺 𑀥𑀸𑀢𑀽𑀳𑀺, 𑀲𑀼𑀯𑀺𑀪𑀢𑁆𑀢𑁄𑀯 𑀲𑁄𑀪𑀢𑀺.

𑁬𑁬𑁩. ‘‘𑀢𑀲𑁆𑀫𑀺𑀁 𑀭𑀣𑁂 𑀓𑀜𑁆𑀘𑀦𑀩𑀺𑀫𑁆𑀩𑀯𑀡𑁆𑀡𑁂, 𑀬𑀸 𑀢𑁆𑀯𑀁 [𑀬𑀢𑁆𑀣 (𑀓. 𑀲𑀻. 𑀲𑁆𑀬𑀸. 𑀓.)] 𑀞𑀺𑀢𑀸 𑀪𑀸𑀲𑀲𑀺 𑀫𑀁 𑀧𑀤𑁂𑀲𑀁;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺.

𑁬𑁬𑁪. ‘‘𑀲𑁄𑀯𑀡𑁆𑀡𑀚𑀸𑀮𑀁 𑀫𑀡𑀺𑀲𑁄𑀡𑁆𑀡𑀘𑀺𑀢𑁆𑀢𑀺𑀢𑀁 [𑀯𑀺𑀘𑀺𑀢𑁆𑀢𑀁 (𑀓.), 𑀘𑀺𑀢𑁆𑀢𑀁 (𑀲𑀻. 𑀲𑁆𑀬𑀸.)], 𑀫𑀼𑀢𑁆𑀢𑀸𑀘𑀺𑀢𑀁 𑀳𑁂𑀫𑀚𑀸𑀮𑁂𑀦 𑀙𑀦𑁆𑀦𑀁 [𑀲𑀜𑁆𑀙𑀦𑁆𑀦𑀁 (𑀓.)];

𑀧𑀭𑀺𑀦𑀺𑀩𑁆𑀩𑀼𑀢𑁂 𑀕𑁄𑀢𑀫𑁂 𑀅𑀧𑁆𑀧𑀫𑁂𑀬𑁆𑀬𑁂, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀳𑀫𑀸𑀪𑀺𑀭𑁄𑀧𑀬𑀺𑀁.

𑁬𑁬𑁫. ‘‘𑀢𑀸𑀳𑀁 𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀓𑀼𑀲𑀮𑀁 𑀩𑀼𑀤𑁆𑀥𑀯𑀡𑁆𑀡𑀺𑀢𑀁;

𑀅𑀧𑁂𑀢𑀲𑁄𑀓𑀸 𑀲𑀼𑀔𑀺𑀢𑀸, 𑀲𑀫𑁆𑀧𑀫𑁄𑀤𑀸𑀫𑀦𑀸𑀫𑀬𑀸’’𑀢𑀺.

𑀫𑀮𑁆𑀮𑀺𑀓𑀸𑀯𑀺𑀫𑀸𑀦𑀁 𑀅𑀝𑁆𑀞𑀫𑀁.