𑁬. 𑀤𑀤𑁆𑀤𑀮𑁆𑀮𑀯𑀺𑀫𑀸𑀦𑀯𑀢𑁆𑀣𑀼

𑁬𑁧𑁯. ‘‘𑀤𑀤𑁆𑀤𑀮𑁆𑀮𑀫𑀸𑀦𑀸 [𑀤𑀤𑁆𑀤𑀴𑁆𑀳𑀫𑀸𑀦𑀸 (𑀓.)] 𑀯𑀡𑁆𑀡𑁂𑀦, 𑀬𑀲𑀲𑀸 𑀘 𑀬𑀲𑀲𑁆𑀲𑀺𑀦𑀻;

𑀲𑀩𑁆𑀩𑁂 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂, 𑀯𑀡𑁆𑀡𑁂𑀦 𑀅𑀢𑀺𑀭𑁄𑀘𑀲𑀺.

𑁬𑁨𑁦. ‘‘𑀤𑀲𑁆𑀲𑀦𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀇𑀤𑀁 𑀧𑀞𑀫𑀤𑀲𑁆𑀲𑀦𑀁;

𑀓𑀲𑁆𑀫𑀸 𑀓𑀸𑀬𑀸 𑀦𑀼 𑀆𑀕𑀫𑁆𑀫, 𑀦𑀸𑀫𑁂𑀦 𑀪𑀸𑀲𑀲𑁂 𑀫𑀫’’𑀦𑁆𑀢𑀺.

𑁬𑁨𑁧. ‘‘𑀅𑀳𑀁 𑀪𑀤𑁆𑀤𑁂 𑀲𑀼𑀪𑀤𑁆𑀤𑀸𑀲𑀺𑀁, 𑀧𑀼𑀩𑁆𑀩𑁂 𑀫𑀸𑀦𑀼𑀲𑀓𑁂 𑀪𑀯𑁂;

𑀲𑀳𑀪𑀭𑀺𑀬𑀸 𑀘 𑀢𑁂 𑀆𑀲𑀺𑀁, 𑀪𑀕𑀺𑀦𑀻 𑀘 𑀓𑀦𑀺𑀝𑁆𑀞𑀺𑀓𑀸.

𑁬𑁨𑁨. ‘‘𑀲𑀸 𑀅𑀳𑀁 𑀓𑀸𑀬𑀲𑁆𑀲 𑀪𑁂𑀤𑀸, 𑀯𑀺𑀧𑁆𑀧𑀫𑀼𑀢𑁆𑀢𑀸 𑀢𑀢𑁄 𑀘𑀼𑀢𑀸;

𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁, 𑀉𑀧𑀧𑀦𑁆𑀦𑀸 𑀲𑀳𑀩𑁆𑀬𑀢’’𑀦𑁆𑀢𑀺.

𑁬𑁨𑁩. ‘‘𑀧𑀳𑀽𑀢𑀓𑀢𑀓𑀮𑁆𑀬𑀸𑀡𑀸, 𑀢𑁂 𑀤𑁂𑀯𑁂 𑀬𑀦𑁆𑀢𑀺 𑀧𑀸𑀡𑀺𑀦𑁄;

𑀬𑁂𑀲𑀁 𑀢𑁆𑀯𑀁 𑀓𑀺𑀢𑁆𑀢𑀬𑀺𑀲𑁆𑀲𑀲𑀺, 𑀲𑀼𑀪𑀤𑁆𑀤𑁂 𑀚𑀸𑀢𑀺𑀫𑀢𑁆𑀢𑀦𑁄.

𑁬𑁨𑁪. ‘‘𑀅𑀣 [𑀓𑀣𑀁 (𑀲𑀻. 𑀲𑁆𑀬𑀸.)] 𑀢𑁆𑀯𑀁 𑀓𑁂𑀦 𑀯𑀡𑁆𑀡𑁂𑀦, 𑀓𑁂𑀦 𑀯𑀸 𑀅𑀦𑀼𑀲𑀸𑀲𑀺𑀢𑀸;

𑀓𑀻𑀤𑀺𑀲𑁂𑀦𑁂𑀯 𑀤𑀸𑀦𑁂𑀦, 𑀲𑀼𑀩𑁆𑀩𑀢𑁂𑀦 𑀬𑀲𑀲𑁆𑀲𑀺𑀦𑀻.

𑁬𑁨𑁫. ‘‘𑀬𑀲𑀁 𑀏𑀢𑀸𑀤𑀺𑀲𑀁 𑀧𑀢𑁆𑀢𑀸, 𑀯𑀺𑀲𑁂𑀲𑀁 𑀯𑀺𑀧𑀼𑀮𑀫𑀚𑁆𑀛𑀕𑀸;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺.

𑁬𑁨𑁬. ‘‘𑀅𑀝𑁆𑀞𑁂𑀯 𑀧𑀺𑀡𑁆𑀟𑀧𑀸𑀢𑀸𑀦𑀺, 𑀬𑀁 𑀤𑀸𑀦𑀁 𑀅𑀤𑀤𑀁 𑀧𑀼𑀭𑁂;

𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀲𑀗𑁆𑀖𑀲𑁆𑀲, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁬𑁨𑁭. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄…𑀧𑁂…𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁬𑁨𑁯. ‘‘𑀅𑀳𑀁 𑀢𑀬𑀸 𑀩𑀳𑀼𑀢𑀭𑁂 𑀪𑀺𑀓𑁆𑀔𑀽, 𑀲𑀜𑁆𑀜𑀢𑁂 𑀩𑁆𑀭𑀳𑁆𑀫𑀘𑀸𑀭𑀬𑁄 [𑀩𑁆𑀭𑀳𑁆𑀫𑀘𑀭𑀺𑀦𑁄 (𑀲𑁆𑀬𑀸.), 𑀩𑁆𑀭𑀳𑁆𑀫𑀘𑀸𑀭𑀺𑀬𑁂 (𑀧𑀻. 𑀓.)];

𑀢𑀧𑁆𑀧𑁂𑀲𑀺𑀁 𑀅𑀦𑁆𑀦𑀧𑀸𑀦𑁂𑀦, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁬𑁩𑁦. ‘‘𑀢𑀬𑀸 𑀩𑀳𑀼𑀢𑀭𑀁 𑀤𑀢𑁆𑀯𑀸, 𑀳𑀻𑀦𑀓𑀸𑀬𑀽𑀧𑀕𑀸 𑀅𑀳𑀁 [𑀅𑀳𑀼𑀁 (𑀓. 𑀲𑀻.)];

𑀓𑀣𑀁 𑀢𑁆𑀯𑀁 𑀅𑀧𑁆𑀧𑀢𑀭𑀁 𑀤𑀢𑁆𑀯𑀸, 𑀯𑀺𑀲𑁂𑀲𑀁 𑀯𑀺𑀧𑀼𑀮𑀫𑀚𑁆𑀛𑀕𑀸;

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺.

𑁬𑁩𑁧. ‘‘𑀫𑀦𑁄𑀪𑀸𑀯𑀦𑀻𑀬𑁄 𑀪𑀺𑀓𑁆𑀔𑀼, 𑀲𑀦𑁆𑀤𑀺𑀝𑁆𑀞𑁄 𑀫𑁂 𑀧𑀼𑀭𑁂 𑀅𑀳𑀼;

𑀢𑀸𑀳𑀁 𑀪𑀢𑁆𑀢𑁂𑀦 [𑀪𑀤𑁆𑀤𑁂 (𑀓.)] 𑀦𑀺𑀫𑀦𑁆𑀢𑁂𑀲𑀺𑀁, 𑀭𑁂𑀯𑀢𑀁 𑀅𑀢𑁆𑀢𑀦𑀝𑁆𑀞𑀫𑀁.

𑁬𑁩𑁨. ‘‘𑀲𑁄 𑀫𑁂 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑁄, 𑀅𑀦𑀼𑀓𑀫𑁆𑀧𑀸𑀬 𑀭𑁂𑀯𑀢𑁄;

𑀲𑀗𑁆𑀖𑁂 𑀤𑁂𑀳𑀻𑀢𑀺 𑀫𑀁𑀯𑁄𑀘, 𑀢𑀲𑁆𑀲𑀸𑀳𑀁 𑀯𑀘𑀦𑀁 𑀓𑀭𑀺𑀁.

𑁬𑁩𑁩. ‘‘𑀲𑀸 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸, 𑀅𑀧𑁆𑀧𑀫𑁂𑀬𑁆𑀬𑁂 𑀧𑀢𑀺𑀝𑁆𑀞𑀺𑀢𑀸;

𑀧𑀼𑀕𑁆𑀕𑀮𑁂𑀲𑀼 𑀢𑀬𑀸 𑀤𑀺𑀦𑁆𑀦𑀁, 𑀦 𑀢𑀁 𑀢𑀯 𑀫𑀳𑀧𑁆𑀨𑀮’’𑀦𑁆𑀢𑀺.

𑁬𑁩𑁪. ‘‘𑀇𑀤𑀸𑀦𑁂𑀯𑀸𑀳𑀁 𑀚𑀸𑀦𑀸𑀫𑀺, 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁;

𑀲𑀸𑀳𑀁 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀢𑁆𑀢𑀁, 𑀯𑀤𑀜𑁆𑀜𑀽 𑀯𑀻𑀢𑀫𑀘𑁆𑀙𑀭𑀸;

𑀲𑀗𑁆𑀖𑁂 𑀤𑀸𑀦𑀸𑀦𑀺 𑀤𑀲𑁆𑀲𑀸𑀫𑀺 [𑀲𑀗𑁆𑀖𑁂 𑀤𑀸𑀦𑀁 𑀤𑀲𑁆𑀲𑀸𑀫𑀺𑀳𑀁 (𑀲𑁆𑀬𑀸.)], 𑀅𑀧𑁆𑀧𑀫𑀢𑁆𑀢𑀸 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺.

𑁬𑁩𑁫. ‘‘𑀓𑀸 𑀏𑀲𑀸 𑀤𑁂𑀯𑀢𑀸 𑀪𑀤𑁆𑀤𑁂, 𑀢𑀬𑀸 𑀫𑀦𑁆𑀢𑀬𑀢𑁂 𑀲𑀳;

𑀲𑀩𑁆𑀩𑁂 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂, 𑀯𑀡𑁆𑀡𑁂𑀦 𑀅𑀢𑀺𑀭𑁄𑀘𑀢𑀻’’𑀢𑀺.

𑁬𑁩𑁬. ‘‘𑀫𑀦𑀼𑀲𑁆𑀲𑀪𑀽𑀢𑀸 𑀤𑁂𑀯𑀺𑀦𑁆𑀤, 𑀧𑀼𑀩𑁆𑀩𑁂 𑀫𑀸𑀦𑀼𑀲𑀓𑁂 𑀪𑀯𑁂;

𑀲𑀳𑀪𑀭𑀺𑀬𑀸 𑀘 𑀫𑁂 𑀆𑀲𑀺, 𑀪𑀕𑀺𑀦𑀻 𑀘 𑀓𑀦𑀺𑀝𑁆𑀞𑀺𑀓𑀸;

𑀲𑀗𑁆𑀖𑁂 𑀤𑀸𑀦𑀸𑀦𑀺 𑀤𑀢𑁆𑀯𑀸𑀦, 𑀓𑀢𑀧𑀼𑀜𑁆𑀜𑀸 𑀯𑀺𑀭𑁄𑀘𑀢𑀻’’𑀢𑀺.

𑁬𑁩𑁭. ‘‘𑀥𑀫𑁆𑀫𑁂𑀦 𑀧𑀼𑀩𑁆𑀩𑁂 𑀪𑀕𑀺𑀦𑀻, 𑀢𑀬𑀸 𑀪𑀤𑁆𑀤𑁂 𑀯𑀺𑀭𑁄𑀘𑀢𑀺;

𑀬𑀁 𑀲𑀗𑁆𑀖𑀫𑁆𑀳𑀺 𑀅𑀧𑁆𑀧𑀫𑁂𑀬𑁆𑀬𑁂, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀤𑀓𑁆𑀔𑀺𑀡𑀁.

𑁬𑁩𑁮. ‘‘𑀧𑀼𑀘𑁆𑀙𑀺𑀢𑁄 𑀳𑀺 𑀫𑀬𑀸 𑀩𑀼𑀤𑁆𑀥𑁄, 𑀕𑀺𑀚𑁆𑀛𑀓𑀽𑀝𑀫𑁆𑀳𑀺 𑀧𑀩𑁆𑀩𑀢𑁂;

𑀯𑀺𑀧𑀸𑀓𑀁 𑀲𑀁𑀯𑀺𑀪𑀸𑀕𑀲𑁆𑀲, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁬𑁩𑁯. ‘‘𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁬𑁪𑁦. ‘‘𑀢𑀁 𑀫𑁂 𑀩𑀼𑀤𑁆𑀥𑁄 𑀯𑀺𑀬𑀸𑀓𑀸𑀲𑀺, 𑀚𑀸𑀦𑀁 𑀓𑀫𑁆𑀫𑀨𑀮𑀁 𑀲𑀓𑀁;

𑀯𑀺𑀧𑀸𑀓𑀁 𑀲𑀁𑀯𑀺𑀪𑀸𑀕𑀲𑁆𑀲, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁬𑁪𑁧. [𑀯𑀺. 𑀯. 𑁭𑁫𑁦; 𑀓𑀣𑀸. 𑁭𑁯𑁮] ‘‘𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄.

𑁬𑁪𑁨. [𑀯𑀺. 𑀯. 𑁭𑁫𑁧; 𑀓𑀣𑀸. 𑁭𑁯𑁮] ‘‘𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁬𑁪𑁩. [𑀯𑀺. 𑀯. 𑁭𑁫𑁨; 𑀓𑀣𑀸. 𑁭𑁯𑁮] ‘‘𑀏𑀲𑁄 𑀳𑀺 𑀲𑀗𑁆𑀖𑁄 𑀯𑀺𑀧𑀼𑀮𑁄 𑀫𑀳𑀕𑁆𑀕𑀢𑁄, 𑀏𑀲𑀧𑁆𑀧𑀫𑁂𑀬𑁆𑀬𑁄 𑀉𑀤𑀥𑀻𑀯 𑀲𑀸𑀕𑀭𑁄;

𑀏𑀢𑁂 𑀳𑀺 𑀲𑁂𑀝𑁆𑀞𑀸 𑀦𑀭𑀯𑀻𑀭𑀲𑀸𑀯𑀓𑀸, 𑀧𑀪𑀗𑁆𑀓𑀭𑀸 𑀥𑀫𑁆𑀫𑀫𑀼𑀤𑀻𑀭𑀬𑀦𑁆𑀢𑀺 [𑀥𑀫𑁆𑀫𑀓𑀣𑀁 𑀉𑀤𑀻𑀭𑀬𑀦𑁆𑀢𑀺 (𑀲𑁆𑀬𑀸.)].

𑁬𑁪𑁪. [𑀯𑀺. 𑀯. 𑁭𑁫𑁩; 𑀓𑀣𑀸. 𑁭𑁯𑁮] ‘‘𑀢𑁂𑀲𑀁 𑀲𑀼𑀤𑀺𑀦𑁆𑀦𑀁 𑀲𑀼𑀳𑀼𑀢𑀁 𑀲𑀼𑀬𑀺𑀝𑁆𑀞𑀁, 𑀬𑁂 𑀲𑀗𑁆𑀖𑀫𑀼𑀤𑁆𑀤𑀺𑀲𑁆𑀲 𑀤𑀤𑀦𑁆𑀢𑀺 𑀤𑀸𑀦𑀁;

𑀲𑀸 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀧𑀢𑀺𑀝𑁆𑀞𑀺𑀢𑀸, 𑀫𑀳𑀧𑁆𑀨𑀮𑀸 𑀮𑁄𑀓𑀯𑀺𑀤𑀽𑀦 [𑀮𑁄𑀓𑀯𑀺𑀤𑀽𑀳𑀺 (𑀲𑁆𑀬𑀸. 𑀓.)] 𑀯𑀡𑁆𑀡𑀺𑀢𑀸.

𑁬𑁪𑁫. [𑀯𑀺. 𑀯. 𑁭𑁫𑁪; 𑀓𑀣𑀸. 𑁭𑁯𑁮] ‘‘𑀏𑀢𑀸𑀤𑀺𑀲𑀁 𑀬𑀜𑁆𑀜𑀫𑀦𑀼𑀲𑁆𑀲𑀭𑀦𑁆𑀢𑀸 [𑀧𑀼𑀜𑁆𑀜𑀫𑀦𑀼𑀲𑁆𑀲𑀭𑀦𑁆𑀢𑀸 (𑀲𑁆𑀬𑀸. 𑀓.)], 𑀬𑁂 𑀯𑁂𑀤𑀚𑀸𑀢𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂;

𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀫𑀮𑀁 𑀲𑀫𑀽𑀮𑀁, 𑀅𑀦𑀺𑀦𑁆𑀤𑀺𑀢𑀸 𑀲𑀕𑁆𑀕𑀫𑀼𑀧𑁂𑀦𑁆𑀢𑀺 𑀞𑀸𑀦’’𑀦𑁆𑀢𑀺.

𑀤𑀤𑁆𑀤𑀮𑁆𑀮𑀯𑀺𑀫𑀸𑀦𑀁 [𑀤𑀤𑁆𑀤𑀴𑁆𑀳𑀯𑀺𑀫𑀸𑀦𑀁 (𑀓.)] 𑀙𑀝𑁆𑀞𑀁.