𑁧𑁦. 𑀧𑀸𑀭𑀺𑀘𑁆𑀙𑀢𑁆𑀢𑀓𑀯𑀺𑀫𑀸𑀦𑀯𑀢𑁆𑀣𑀼

𑁬𑁮𑁦. ‘‘𑀧𑀸𑀭𑀺𑀘𑁆𑀙𑀢𑁆𑀢𑀓𑁂 𑀓𑁄𑀯𑀺𑀴𑀸𑀭𑁂, 𑀭𑀫𑀡𑀻𑀬𑁂 𑀫𑀦𑁄𑀭𑀫𑁂;

𑀤𑀺𑀩𑁆𑀩𑀫𑀸𑀮𑀁 𑀕𑀦𑁆𑀣𑀫𑀸𑀦𑀸, 𑀕𑀸𑀬𑀦𑁆𑀢𑀻 𑀲𑀫𑁆𑀧𑀫𑁄𑀤𑀲𑀺.

𑁬𑁮𑁧. ‘‘𑀢𑀲𑁆𑀲𑀸 𑀢𑁂 𑀦𑀘𑁆𑀘𑀫𑀸𑀦𑀸𑀬, 𑀅𑀗𑁆𑀕𑀫𑀗𑁆𑀕𑁂𑀳𑀺 𑀲𑀩𑁆𑀩𑀲𑁄;

𑀤𑀺𑀩𑁆𑀩𑀸 𑀲𑀤𑁆𑀤𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀲𑀯𑀦𑀻𑀬𑀸 𑀫𑀦𑁄𑀭𑀫𑀸.

𑁬𑁮𑁨. ‘‘𑀢𑀲𑁆𑀲𑀸 𑀢𑁂 𑀦𑀘𑁆𑀘𑀫𑀸𑀦𑀸𑀬, 𑀅𑀗𑁆𑀕𑀫𑀗𑁆𑀕𑁂𑀳𑀺 𑀲𑀩𑁆𑀩𑀲𑁄;

𑀤𑀺𑀩𑁆𑀩𑀸 𑀕𑀦𑁆𑀥𑀸 𑀧𑀯𑀸𑀬𑀦𑁆𑀢𑀺, 𑀲𑀼𑀘𑀺𑀕𑀦𑁆𑀥𑀸 𑀫𑀦𑁄𑀭𑀫𑀸.

𑁬𑁮𑁩. ‘‘𑀯𑀺𑀯𑀢𑁆𑀢𑀫𑀸𑀦𑀸 𑀓𑀸𑀬𑁂𑀦, 𑀬𑀸 𑀯𑁂𑀡𑀻𑀲𑀼 𑀧𑀺𑀴𑀦𑁆𑀥𑀦𑀸.

𑀢𑁂𑀲𑀁 𑀲𑀼𑀬𑁆𑀬𑀢𑀺 𑀦𑀺𑀕𑁆𑀖𑁄𑀲𑁄, 𑀢𑀽𑀭𑀺𑀬𑁂 𑀧𑀜𑁆𑀘𑀗𑁆𑀕𑀺𑀓𑁂 𑀬𑀣𑀸.

𑁬𑁮𑁪. ‘‘𑀯𑀝𑀁𑀲𑀓𑀸 𑀯𑀸𑀢𑀥𑀼𑀢𑀸 [𑀯𑀸𑀢𑀥𑀽𑀢𑀸 (𑀲𑀻. 𑀲𑁆𑀬𑀸.)], 𑀯𑀸𑀢𑁂𑀦 𑀲𑀫𑁆𑀧𑀓𑀫𑁆𑀧𑀺𑀢𑀸;

𑀢𑁂𑀲𑀁 𑀲𑀼𑀬𑁆𑀬𑀢𑀺 𑀦𑀺𑀕𑁆𑀖𑁄𑀲𑁄, 𑀢𑀽𑀭𑀺𑀬𑁂 𑀧𑀜𑁆𑀘𑀗𑁆𑀕𑀺𑀓𑁂 𑀬𑀣𑀸.

𑁬𑁮𑁫. ‘‘𑀬𑀸𑀧𑀺 𑀢𑁂 𑀲𑀺𑀭𑀲𑁆𑀫𑀺𑀁 𑀫𑀸𑀮𑀸, 𑀲𑀼𑀘𑀺𑀕𑀦𑁆𑀥𑀸 𑀫𑀦𑁄𑀭𑀫𑀸;

𑀯𑀸𑀢𑀺 𑀕𑀦𑁆𑀥𑁄 𑀤𑀺𑀲𑀸 𑀲𑀩𑁆𑀩𑀸, 𑀭𑀼𑀓𑁆𑀔𑁄 𑀫𑀜𑁆𑀚𑀽𑀲𑀓𑁄 𑀬𑀣𑀸.

𑁬𑁮𑁬. ‘‘𑀖𑀸𑀬𑀲𑁂 𑀢𑀁 𑀲𑀼𑀘𑀺𑀕𑀦𑁆𑀥𑀁 [𑀲𑀼𑀘𑀺𑀁 𑀕𑀦𑁆𑀥𑀁 (𑀲𑀻.)], 𑀭𑀽𑀧𑀁 𑀧𑀲𑁆𑀲𑀲𑀺 𑀅𑀫𑀸𑀦𑀼𑀲𑀁 [𑀫𑀸𑀦𑀼𑀲𑀁 (𑀧𑀻.)];

𑀤𑁂𑀯𑀢𑁂 𑀧𑀼𑀘𑁆𑀙𑀺𑀢𑀸𑀘𑀺𑀓𑁆𑀔, 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮’’𑀦𑁆𑀢𑀺.

𑁬𑁮𑁭. ‘‘𑀧𑀪𑀲𑁆𑀲𑀭𑀁 𑀅𑀘𑁆𑀘𑀺𑀫𑀦𑁆𑀢𑀁, 𑀯𑀡𑁆𑀡𑀕𑀦𑁆𑀥𑁂𑀦 𑀲𑀁𑀬𑀼𑀢𑀁;

𑀅𑀲𑁄𑀓𑀧𑀼𑀧𑁆𑀨𑀫𑀸𑀮𑀸𑀳𑀁, 𑀩𑀼𑀤𑁆𑀥𑀲𑁆𑀲 𑀉𑀧𑀦𑀸𑀫𑀬𑀺𑀁.

𑁬𑁮𑁮. ‘‘𑀢𑀸𑀳𑀁 𑀓𑀫𑁆𑀫𑀁 𑀓𑀭𑀺𑀢𑁆𑀯𑀸𑀦, 𑀓𑀼𑀲𑀮𑀁 𑀩𑀼𑀤𑁆𑀥𑀯𑀡𑁆𑀡𑀺𑀢𑀁;

𑀅𑀧𑁂𑀢𑀲𑁄𑀓𑀸 𑀲𑀼𑀔𑀺𑀢𑀸, 𑀲𑀫𑁆𑀧𑀫𑁄𑀤𑀸𑀫𑀦𑀸𑀫𑀬𑀸’’𑀢𑀺.

𑀧𑀸𑀭𑀺𑀘𑁆𑀙𑀢𑁆𑀢𑀓𑀯𑀺𑀫𑀸𑀦𑀁 𑀤𑀲𑀫𑀁.

𑀧𑀸𑀭𑀺𑀘𑁆𑀙𑀢𑁆𑀢𑀓𑀯𑀕𑁆𑀕𑁄 𑀢𑀢𑀺𑀬𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀉𑀴𑀸𑀭𑁄 𑀉𑀘𑁆𑀙𑀼 𑀧𑀮𑁆𑀮𑀗𑁆𑀓𑁄, 𑀮𑀢𑀸 𑀘 𑀕𑀼𑀢𑁆𑀢𑀺𑀮𑁂𑀦 𑀘;

𑀤𑀤𑁆𑀤𑀮𑁆𑀮𑀧𑁂𑀲𑀫𑀮𑁆𑀮𑀺𑀓𑀸, 𑀯𑀺𑀲𑀸𑀮𑀓𑁆𑀔𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄;

𑀯𑀕𑁆𑀕𑁄 𑀢𑁂𑀦 𑀧𑀯𑀼𑀘𑁆𑀘𑀢𑀻𑀢𑀺.