𑁧𑁬. 𑀲𑀺𑀭𑀺𑀫𑀸𑀯𑀺𑀫𑀸𑀦𑀯𑀢𑁆𑀣𑀼

𑁧𑁩𑁭. ‘‘𑀬𑀼𑀢𑁆𑀢𑀸 𑀘 𑀢𑁂 𑀧𑀭𑀫𑀅𑀮𑀗𑁆𑀓𑀢𑀸 𑀳𑀬𑀸, 𑀅𑀥𑁄𑀫𑀼𑀔𑀸 𑀅𑀖𑀲𑀺𑀕𑀫𑀸 𑀩𑀮𑀻 𑀚𑀯𑀸;

𑀅𑀪𑀺𑀦𑀺𑀫𑁆𑀫𑀺𑀢𑀸 𑀧𑀜𑁆𑀘𑀭𑀣𑀸𑀲𑀢𑀸 𑀘 𑀢𑁂, 𑀅𑀦𑁆𑀯𑁂𑀦𑁆𑀢𑀺 𑀢𑀁 𑀲𑀸𑀭𑀣𑀺𑀘𑁄𑀤𑀺𑀢𑀸 𑀳𑀬𑀸.

𑁧𑁩𑁮. ‘‘𑀲𑀸 𑀢𑀺𑀝𑁆𑀞𑀲𑀺 𑀭𑀣𑀯𑀭𑁂 𑀅𑀮𑀗𑁆𑀓𑀢𑀸, 𑀑𑀪𑀸𑀲𑀬𑀁 𑀚𑀮𑀫𑀺𑀯 𑀚𑁄𑀢𑀺 𑀧𑀸𑀯𑀓𑁄;

𑀧𑀼𑀘𑁆𑀙𑀸𑀫𑀺 𑀢𑀁 𑀯𑀭𑀢𑀦𑀼 [𑀯𑀭𑀘𑀸𑀭𑀼 (𑀓𑀢𑁆𑀣𑀘𑀺)] 𑀅𑀦𑁄𑀫𑀤𑀲𑁆𑀲𑀦𑁂, 𑀓𑀲𑁆𑀫𑀸 𑀦𑀼 𑀓𑀸𑀬𑀸 𑀅𑀦𑀥𑀺𑀯𑀭𑀁 𑀉𑀧𑀸𑀕𑀫𑀺.

𑁧𑁩𑁯. ‘‘𑀓𑀸𑀫𑀕𑁆𑀕𑀧𑀢𑁆𑀢𑀸𑀦𑀁 𑀬𑀫𑀸𑀳𑀼𑀦𑀼𑀢𑁆𑀢𑀭𑀁 [… 𑀦𑀼𑀢𑁆𑀢𑀭𑀸 (𑀓.), 𑀅𑀦𑀼𑀢𑁆𑀢𑀭𑀸 (𑀲𑁆𑀬𑀸.)], 𑀦𑀺𑀫𑁆𑀫𑀸𑀬 𑀦𑀺𑀫𑁆𑀫𑀸𑀬 𑀭𑀫𑀦𑁆𑀢𑀺 𑀤𑁂𑀯𑀢𑀸;

𑀢𑀲𑁆𑀫𑀸 𑀓𑀸𑀬𑀸 𑀅𑀘𑁆𑀙𑀭𑀸 𑀓𑀸𑀫𑀯𑀡𑁆𑀡𑀺𑀦𑀻, 𑀇𑀥𑀸𑀕𑀢𑀸 𑀅𑀦𑀥𑀺𑀯𑀭𑀁 𑀦𑀫𑀲𑁆𑀲𑀺𑀢𑀼𑀁.

𑁧𑁪𑁦. ‘‘𑀓𑀺𑀁 𑀢𑁆𑀯𑀁 𑀧𑀼𑀭𑁂 𑀲𑀼𑀘𑀭𑀺𑀢𑀫𑀸𑀘𑀭𑀻𑀥 [𑀲𑀼𑀘𑀭𑀺𑀢𑀁 𑀅𑀘𑀸𑀭𑀺𑀥 (𑀧𑀻.)],

𑀓𑁂𑀦𑀘𑁆𑀙𑀲𑀺 𑀢𑁆𑀯𑀁 𑀅𑀫𑀺𑀢𑀬𑀲𑀸 𑀲𑀼𑀔𑁂𑀥𑀺𑀢𑀸;

𑀇𑀤𑁆𑀥𑀻 𑀘 𑀢𑁂 𑀅𑀦𑀥𑀺𑀯𑀭𑀸 𑀯𑀺𑀳𑀗𑁆𑀕𑀫𑀸,

𑀯𑀡𑁆𑀡𑁄 𑀘 𑀢𑁂 𑀤𑀲 𑀤𑀺𑀲𑀸 𑀯𑀺𑀭𑁄𑀘𑀢𑀺.

𑁧𑁪𑁧. ‘‘𑀤𑁂𑀯𑁂𑀳𑀺 𑀢𑁆𑀯𑀁 𑀧𑀭𑀺𑀯𑀼𑀢𑀸 𑀲𑀓𑁆𑀓𑀢𑀸 𑀘𑀲𑀺,

𑀓𑀼𑀢𑁄 𑀘𑀼𑀢𑀸 𑀲𑀼𑀕𑀢𑀺𑀕𑀢𑀸𑀲𑀺 𑀤𑁂𑀯𑀢𑁂;

𑀓𑀲𑁆𑀲 𑀯𑀸 𑀢𑁆𑀯𑀁 𑀯𑀘𑀦𑀓𑀭𑀸𑀦𑀼𑀲𑀸𑀲𑀦𑀺𑀁,

𑀆𑀘𑀺𑀓𑁆𑀔 𑀫𑁂 𑀢𑁆𑀯𑀁 𑀬𑀤𑀺 𑀩𑀼𑀤𑁆𑀥𑀲𑀸𑀯𑀺𑀓𑀸’’𑀢𑀺.

𑁧𑁪𑁨. ‘‘𑀦𑀕𑀦𑁆𑀢𑀭𑁂 𑀦𑀕𑀭𑀯𑀭𑁂 𑀲𑀼𑀫𑀸𑀧𑀺𑀢𑁂, 𑀧𑀭𑀺𑀘𑀸𑀭𑀺𑀓𑀸 𑀭𑀸𑀚𑀯𑀭𑀲𑁆𑀲 𑀲𑀺𑀭𑀺𑀫𑀢𑁄;

𑀦𑀘𑁆𑀘𑁂 𑀕𑀻𑀢𑁂 𑀧𑀭𑀫𑀲𑀼𑀲𑀺𑀓𑁆𑀔𑀺𑀢𑀸 𑀅𑀳𑀼𑀁, 𑀲𑀺𑀭𑀺𑀫𑀸𑀢𑀺 𑀫𑀁 𑀭𑀸𑀚𑀕𑀳𑁂 𑀅𑀯𑁂𑀤𑀺𑀁𑀲𑀼 [𑀅𑀯𑁂𑀤𑀺𑀲𑀼𑀁 (?)].

𑁧𑁪𑁩. ‘‘𑀩𑀼𑀤𑁆𑀥𑁄 𑀘 𑀫𑁂 𑀇𑀲𑀺𑀦𑀺𑀲𑀪𑁄 𑀯𑀺𑀦𑀸𑀬𑀓𑁄, 𑀅𑀤𑁂𑀲𑀬𑀻 𑀲𑀫𑀼𑀤𑀬𑀤𑀼𑀓𑁆𑀔𑀦𑀺𑀘𑁆𑀘𑀢𑀁;

𑀅𑀲𑀗𑁆𑀔𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀲𑀲𑁆𑀲𑀢𑀁, 𑀫𑀕𑁆𑀕𑀜𑁆𑀘𑀺𑀫𑀁 𑀅𑀓𑀼𑀝𑀺𑀮𑀫𑀜𑁆𑀚𑀲𑀁 𑀲𑀺𑀯𑀁.

𑁧𑁪𑁪. ‘‘𑀲𑀼𑀢𑁆𑀯𑀸𑀦𑀳𑀁 𑀅𑀫𑀢𑀧𑀤𑀁 𑀅𑀲𑀗𑁆𑀔𑀢𑀁, 𑀢𑀣𑀸𑀕𑀢𑀲𑁆𑀲𑀦𑀥𑀺𑀯𑀭𑀲𑁆𑀲 𑀲𑀸𑀲𑀦𑀁;

𑀲𑀻𑀮𑁂𑀲𑁆𑀯𑀳𑀁 𑀧𑀭𑀫𑀲𑀼𑀲𑀁𑀯𑀼𑀢𑀸 𑀅𑀳𑀼𑀁, 𑀥𑀫𑁆𑀫𑁂 𑀞𑀺𑀢𑀸 𑀦𑀭𑀯𑀭𑀩𑀼𑀤𑁆𑀥𑀤𑁂𑀲𑀺𑀢𑁂 [𑀪𑀸𑀲𑀺𑀢𑁂 (𑀲𑀻.)].

𑁧𑁪𑁫. ‘‘𑀜𑀢𑁆𑀯𑀸𑀦𑀳𑀁 𑀯𑀺𑀭𑀚𑀧𑀤𑀁 𑀅𑀲𑀗𑁆𑀔𑀢𑀁, 𑀢𑀣𑀸𑀕𑀢𑁂𑀦𑀦𑀥𑀺𑀯𑀭𑁂𑀦 𑀤𑁂𑀲𑀺𑀢𑀁;

𑀢𑀢𑁆𑀣𑁂𑀯𑀳𑀁 𑀲𑀫𑀣𑀲𑀫𑀸𑀥𑀺𑀫𑀸𑀨𑀼𑀲𑀺𑀁, 𑀲𑀸𑀬𑁂𑀯 𑀫𑁂 𑀧𑀭𑀫𑀦𑀺𑀬𑀸𑀫𑀢𑀸 𑀅𑀳𑀼.

𑁧𑁪𑁬. ‘‘𑀮𑀤𑁆𑀥𑀸𑀦𑀳𑀁 𑀅𑀫𑀢𑀯𑀭𑀁 𑀯𑀺𑀲𑁂𑀲𑀦𑀁, 𑀏𑀓𑀁𑀲𑀺𑀓𑀸 𑀅𑀪𑀺𑀲𑀫𑀬𑁂 𑀯𑀺𑀲𑁂𑀲𑀺𑀬;

𑀅𑀲𑀁𑀲𑀬𑀸 𑀩𑀳𑀼𑀚𑀦𑀧𑀽𑀚𑀺𑀢𑀸 𑀅𑀳𑀁, 𑀔𑀺𑀟𑁆𑀟𑀸𑀭𑀢𑀺𑀁 [𑀔𑀺𑀟𑁆𑀟𑀁 𑀭𑀢𑀺𑀁 (𑀲𑁆𑀬𑀸. 𑀧𑀻.)] 𑀧𑀘𑁆𑀘𑀦𑀼𑀪𑁄𑀫𑀦𑀧𑁆𑀧𑀓𑀁.

𑁧𑁪𑁭. ‘‘𑀏𑀯𑀁 𑀅𑀳𑀁 𑀅𑀫𑀢𑀤𑀲𑀫𑁆𑀳𑀺 [𑀅𑀫𑀢𑀭𑀲𑀫𑁆𑀳𑀺 (𑀓.)] 𑀤𑁂𑀯𑀢𑀸, 𑀢𑀣𑀸𑀕𑀢𑀲𑁆𑀲𑀦𑀥𑀺𑀯𑀭𑀲𑁆𑀲 𑀲𑀸𑀯𑀺𑀓𑀸;

𑀥𑀫𑁆𑀫𑀤𑁆𑀤𑀲𑀸 𑀧𑀞𑀫𑀨𑀮𑁂 𑀧𑀢𑀺𑀝𑁆𑀞𑀺𑀢𑀸, 𑀲𑁄𑀢𑀸𑀧𑀦𑁆𑀦𑀸 𑀦 𑀘 𑀧𑀦 𑀫𑀢𑁆𑀣𑀺 𑀤𑀼𑀕𑁆𑀕𑀢𑀺.

𑁧𑁪𑁮. ‘‘𑀲𑀸 𑀯𑀦𑁆𑀤𑀺𑀢𑀼𑀁 𑀅𑀦𑀥𑀺𑀯𑀭𑀁 𑀉𑀧𑀸𑀕𑀫𑀺𑀁, 𑀧𑀸𑀲𑀸𑀤𑀺𑀓𑁂 𑀓𑀼𑀲𑀮𑀭𑀢𑁂 𑀘 𑀪𑀺𑀓𑁆𑀔𑀯𑁄;

𑀦𑀫𑀲𑁆𑀲𑀺𑀢𑀼𑀁 𑀲𑀫𑀡𑀲𑀫𑀸𑀕𑀫𑀁 𑀲𑀺𑀯𑀁, 𑀲𑀕𑀸𑀭𑀯𑀸 𑀲𑀺𑀭𑀺𑀫𑀢𑁄 𑀥𑀫𑁆𑀫𑀭𑀸𑀚𑀺𑀦𑁄.

𑁧𑁪𑁯. ‘‘𑀤𑀺𑀲𑁆𑀯𑀸 𑀫𑀼𑀦𑀺𑀁 𑀫𑀼𑀤𑀺𑀢𑀫𑀦𑀫𑁆𑀳𑀺 𑀧𑀻𑀡𑀺𑀢𑀸, 𑀢𑀣𑀸𑀕𑀢𑀁 𑀦𑀭𑀯𑀭𑀤𑀫𑁆𑀫𑀲𑀸𑀭𑀣𑀺𑀁;

𑀢𑀡𑁆𑀳𑀘𑁆𑀙𑀺𑀤𑀁 𑀓𑀼𑀲𑀮𑀭𑀢𑀁 𑀯𑀺𑀦𑀸𑀬𑀓𑀁, 𑀯𑀦𑁆𑀤𑀸𑀫𑀳𑀁 𑀧𑀭𑀫𑀳𑀺𑀢𑀸𑀦𑀼𑀓𑀫𑁆𑀧𑀓’’𑀦𑁆𑀢𑀺.

𑀲𑀺𑀭𑀺𑀫𑀸𑀯𑀺𑀫𑀸𑀦𑀁 𑀲𑁄𑀴𑀲𑀫𑀁.