𑁧𑁨. 𑀤𑀼𑀢𑀺𑀬𑀧𑀢𑀺𑀩𑁆𑀩𑀢𑀸𑀯𑀺𑀫𑀸𑀦𑀯𑀢𑁆𑀣𑀼

𑁧𑁦𑁧. ‘‘𑀯𑁂𑀴𑀼𑀭𑀺𑀬𑀣𑀫𑁆𑀪𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀁, 𑀯𑀺𑀫𑀸𑀦𑀫𑀸𑀭𑀼𑀬𑁆𑀳 𑀅𑀦𑁂𑀓𑀘𑀺𑀢𑁆𑀢𑀁;

𑀢𑀢𑁆𑀣𑀘𑁆𑀙𑀲𑀺 𑀤𑁂𑀯𑀺 𑀫𑀳𑀸𑀦𑀼𑀪𑀸𑀯𑁂, 𑀉𑀘𑁆𑀘𑀸𑀯𑀘𑀸 𑀇𑀤𑁆𑀥𑀺 𑀯𑀺𑀓𑀼𑀩𑁆𑀩𑀫𑀸𑀦𑀸;

𑀇𑀫𑀸 𑀘 𑀢𑁂 𑀅𑀘𑁆𑀙𑀭𑀸𑀬𑁄 𑀲𑀫𑀦𑁆𑀢𑀢𑁄, 𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀺 𑀧𑀫𑁄𑀤𑀬𑀦𑁆𑀢𑀺 𑀘.

𑁧𑁦𑁨. ‘‘𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑀸𑀲𑀺 𑀫𑀳𑀸𑀦𑀼𑀪𑀸𑀯𑁂, 𑀫𑀦𑀼𑀲𑁆𑀲𑀪𑀽𑀢𑀸 𑀓𑀺𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀓𑁂𑀦𑀸𑀲𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀢𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑁧𑁦𑁩. 𑀲𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸, 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀸;

𑀧𑀜𑁆𑀳𑀁 𑀧𑀼𑀝𑁆𑀞𑀸 𑀯𑀺𑀬𑀸𑀓𑀸𑀲𑀺, 𑀬𑀲𑁆𑀲 𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁧𑁦𑁪. ‘‘𑀅𑀳𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀪𑀽𑀢𑀸, 𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄 𑀅𑀳𑁄𑀲𑀺𑀁;

𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀸 𑀅𑀳𑁄𑀲𑀺𑀁, 𑀮𑁄𑀓𑁂 𑀅𑀤𑀺𑀦𑁆𑀦𑀁 𑀧𑀭𑀺𑀯𑀚𑁆𑀚𑀬𑀺𑀲𑁆𑀲𑀁.

𑁧𑁦𑁫. ‘‘𑀅𑀫𑀚𑁆𑀚𑀧𑀸 𑀦𑁄 𑀘 [𑀦𑀸𑀧𑀺 (𑀲𑁆𑀬𑀸.)] 𑀫𑀼𑀲𑀸 𑀅𑀪𑀸𑀡𑀺𑀁 [𑀅𑀪𑀸𑀲𑀺𑀁 (𑀓.)], 𑀲𑀓𑁂𑀦 𑀲𑀸𑀫𑀺𑀦𑀸 [𑀲𑀸𑀫𑀺𑀦𑀸𑀯 (𑀲𑀻.)] 𑀅𑀳𑁄𑀲𑀺𑀁 𑀢𑀼𑀝𑁆𑀞𑀸;

𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀧𑀲𑀦𑁆𑀦𑀘𑀺𑀢𑁆𑀢𑀸, 𑀲𑀓𑁆𑀓𑀘𑁆𑀘 𑀤𑀸𑀦𑀁 𑀯𑀺𑀧𑀼𑀮𑀁 𑀅𑀤𑀸𑀲𑀺𑀁.

𑁧𑁦𑁬. ‘‘𑀢𑁂𑀦 𑀫𑁂𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀢𑁂𑀦 𑀫𑁂 𑀇𑀥 𑀫𑀺𑀚𑁆𑀛𑀢𑀺;

𑀉𑀧𑁆𑀧𑀚𑁆𑀚𑀦𑁆𑀢𑀺 𑀘 𑀫𑁂 𑀪𑁄𑀕𑀸, 𑀬𑁂 𑀓𑁂𑀘𑀺 𑀫𑀦𑀲𑁄 𑀧𑀺𑀬𑀸.

𑁧𑁦𑁭. ‘‘𑀅𑀓𑁆𑀔𑀸𑀫𑀺 𑀢𑁂 𑀪𑀺𑀓𑁆𑀔𑀼 𑀫𑀳𑀸𑀦𑀼𑀪𑀸𑀯, 𑀫𑀦𑀼𑀲𑁆𑀲𑀪𑀽𑀢𑀸 𑀬𑀫𑀓𑀸𑀲𑀺 𑀧𑀼𑀜𑁆𑀜𑀁;

𑀢𑁂𑀦𑀫𑁆𑀳𑀺 𑀏𑀯𑀁 𑀚𑀮𑀺𑀢𑀸𑀦𑀼𑀪𑀸𑀯𑀸, 𑀯𑀡𑁆𑀡𑁄 𑀘 𑀫𑁂 𑀲𑀩𑁆𑀩𑀤𑀺𑀲𑀸 𑀧𑀪𑀸𑀲𑀢𑀻’’𑀢𑀺.

𑀤𑀼𑀢𑀺𑀬𑀧𑀢𑀺𑀩𑁆𑀩𑀢𑀸𑀯𑀺𑀫𑀸𑀦𑀁 𑀤𑁆𑀯𑀸𑀤𑀲𑀫𑀁.