𑁮. 𑀧𑀸𑀝𑀮𑀺𑀕𑀸𑀫𑀺𑀬𑀯𑀕𑁆𑀕𑁄

𑁧. 𑀧𑀞𑀫𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀲𑀼𑀢𑁆𑀢𑀁

𑁭𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀪𑀺𑀓𑁆𑀔𑀽 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂𑀥 𑀪𑀺𑀓𑁆𑀔𑀽 [𑀢𑁂 𑀘 𑀪𑀺𑀓𑁆𑀔𑀽 (𑀲𑀻. 𑀲𑁆𑀬𑀸. 𑀧𑀻. 𑀢𑀤𑀝𑁆𑀞𑀓𑀣𑀸𑀧𑀺 𑀑𑀮𑁄𑀓𑁂𑀢𑀩𑁆𑀩𑀸] 𑀅𑀝𑁆𑀞𑀺𑀁 𑀓𑀢𑁆𑀯𑀸 [𑀅𑀝𑁆𑀞𑀻𑀓𑀢𑁆𑀯𑀸 (𑀲𑀻. 𑀲𑁆𑀬𑀸.), 𑀅𑀝𑁆𑀞𑀺𑀓𑀢𑁆𑀯𑀸 (𑀧𑀻.)] 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑁄 [𑀲𑀩𑁆𑀩𑀁 𑀘𑁂𑀢𑀲𑀸 (𑀇𑀢𑀺𑀧𑀺 𑀅𑀜𑁆𑀜𑀲𑀼𑀢𑁆𑀢𑁂𑀲𑀼)] 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀢𑀤𑀸𑀬𑀢𑀦𑀁, 𑀬𑀢𑁆𑀣 𑀦𑁂𑀯 𑀧𑀣𑀯𑀻, 𑀦 𑀆𑀧𑁄, 𑀦 𑀢𑁂𑀚𑁄, 𑀦 𑀯𑀸𑀬𑁄, 𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀦 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁, 𑀦 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁, 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁, 𑀦𑀸𑀬𑀁 𑀮𑁄𑀓𑁄, 𑀦 𑀧𑀭𑀮𑁄𑀓𑁄, 𑀦 𑀉𑀪𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀸. 𑀢𑀢𑁆𑀭𑀸𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀦𑁂𑀯 𑀆𑀕𑀢𑀺𑀁 𑀯𑀤𑀸𑀫𑀺, 𑀦 𑀕𑀢𑀺𑀁, 𑀦 𑀞𑀺𑀢𑀺𑀁, 𑀦 𑀘𑀼𑀢𑀺𑀁, 𑀦 𑀉𑀧𑀧𑀢𑁆𑀢𑀺𑀁; 𑀅𑀧𑁆𑀧𑀢𑀺𑀝𑁆𑀞𑀁, 𑀅𑀧𑁆𑀧𑀯𑀢𑁆𑀢𑀁, 𑀅𑀦𑀸𑀭𑀫𑁆𑀫𑀡𑀫𑁂𑀯𑁂𑀢𑀁. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀲𑀼𑀢𑁆𑀢𑀁

𑁭𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀪𑀺𑀓𑁆𑀔𑀽 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂𑀥 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀤𑀼𑀤𑁆𑀤𑀲𑀁 𑀅𑀦𑀢𑀁 𑀦𑀸𑀫, 𑀦 𑀳𑀺 𑀲𑀘𑁆𑀘𑀁 𑀲𑀼𑀤𑀲𑁆𑀲𑀦𑀁;

𑀧𑀝𑀺𑀯𑀺𑀤𑁆𑀥𑀸 𑀢𑀡𑁆𑀳𑀸 𑀚𑀸𑀦𑀢𑁄, 𑀧𑀲𑁆𑀲𑀢𑁄 𑀦𑀢𑁆𑀣𑀺 𑀓𑀺𑀜𑁆𑀘𑀦’’𑀦𑁆𑀢𑀺. 𑀤𑀼𑀢𑀺𑀬𑀁;

𑁩. 𑀢𑀢𑀺𑀬𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀲𑀼𑀢𑁆𑀢𑀁

𑁭𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀪𑀺𑀓𑁆𑀔𑀽 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂𑀥 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸, 𑀫𑀦𑀲𑀺 𑀓𑀢𑁆𑀯𑀸, 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸, 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀁. 𑀦𑁄 𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀪𑀯𑀺𑀲𑁆𑀲 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀁, 𑀦𑀬𑀺𑀥 𑀚𑀸𑀢𑀲𑁆𑀲 𑀪𑀽𑀢𑀲𑁆𑀲 𑀓𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑁂𑀣. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀺 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀓𑀢𑀁 𑀅𑀲𑀗𑁆𑀔𑀢𑀁, 𑀢𑀲𑁆𑀫𑀸 𑀚𑀸𑀢𑀲𑁆𑀲 𑀪𑀽𑀢𑀲𑁆𑀲 𑀓𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀘𑀢𑀼𑀢𑁆𑀣𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀲𑀼𑀢𑁆𑀢𑀁

𑁭𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀪𑀺𑀓𑁆𑀔𑀽 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀢𑁂𑀥 𑀪𑀺𑀓𑁆𑀔𑀽 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁, 𑀅𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 𑀦𑀢𑁆𑀣𑀺. 𑀘𑀮𑀺𑀢𑁂 𑀅𑀲𑀢𑀺 𑀧𑀲𑁆𑀲𑀤𑁆𑀥𑀺, 𑀧𑀲𑁆𑀲𑀤𑁆𑀥𑀺𑀬𑀸 𑀲𑀢𑀺 𑀦𑀢𑀺 𑀦 𑀳𑁄𑀢𑀺. 𑀦𑀢𑀺𑀬𑀸 𑀅𑀲𑀢𑀺 𑀆𑀕𑀢𑀺𑀕𑀢𑀺 𑀦 𑀳𑁄𑀢𑀺. 𑀆𑀕𑀢𑀺𑀕𑀢𑀺𑀬𑀸 𑀅𑀲𑀢𑀺 𑀘𑀼𑀢𑀽𑀧𑀧𑀸𑀢𑁄 𑀦 𑀳𑁄𑀢𑀺. 𑀘𑀼𑀢𑀽𑀧𑀧𑀸𑀢𑁂 𑀅𑀲𑀢𑀺 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦 [𑀦 𑀉𑀪𑀬𑀫𑀦𑁆𑀢𑀭𑁂 (𑀲𑀩𑁆𑀩𑀢𑁆𑀣) 𑀫. 𑀦𑀺. 𑁩.𑁩𑁯𑁩; 𑀲𑀁. 𑀦𑀺. 𑁪.𑁮𑁭 𑀧𑀲𑁆𑀲𑀺𑀢𑀩𑁆𑀩𑀁]. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀘𑀼𑀦𑁆𑀤𑀲𑀼𑀢𑁆𑀢𑀁

𑁭𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀫𑀮𑁆𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀧𑀸𑀯𑀸 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀧𑀸𑀯𑀸𑀬𑀁 𑀯𑀺𑀳𑀭𑀢𑀺 𑀘𑀼𑀦𑁆𑀤𑀲𑁆𑀲 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀅𑀫𑁆𑀩𑀯𑀦𑁂.

𑀅𑀲𑁆𑀲𑁄𑀲𑀺 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑁋 ‘‘𑀪𑀕𑀯𑀸 𑀓𑀺𑀭 𑀫𑀮𑁆𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀸𑀯𑀁 𑀅𑀦𑀼𑀧𑁆𑀧𑀢𑁆𑀢𑁄 𑀧𑀸𑀯𑀸𑀬𑀁 𑀯𑀺𑀳𑀭𑀢𑀺 𑀫𑀬𑁆𑀳𑀁 𑀅𑀫𑁆𑀩𑀯𑀦𑁂’’𑀢𑀺. 𑀅𑀣 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀘𑀼𑀦𑁆𑀤𑀁 𑀓𑀫𑁆𑀫𑀸𑀭𑀧𑀼𑀢𑁆𑀢𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀣 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀲𑀓𑁂 𑀦𑀺𑀯𑁂𑀲𑀦𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀧𑀳𑀽𑀢𑀜𑁆𑀘 𑀲𑀽𑀓𑀭𑀫𑀤𑁆𑀤𑀯𑀁 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀘𑀼𑀦𑁆𑀤𑀲𑁆𑀲 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀘𑀼𑀦𑁆𑀤𑀁 𑀓𑀫𑁆𑀫𑀸𑀭𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑀁 𑀢𑁂, 𑀘𑀼𑀦𑁆𑀤, 𑀲𑀽𑀓𑀭𑀫𑀤𑁆𑀤𑀯𑀁 𑀧𑀝𑀺𑀬𑀢𑁆𑀢𑀁 𑀢𑁂𑀦 𑀫𑀁 𑀧𑀭𑀺𑀯𑀺𑀲, 𑀬𑀁 𑀧𑀦𑀜𑁆𑀜𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀢𑁆𑀢𑀁 𑀢𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑀁 𑀅𑀳𑁄𑀲𑀺 𑀲𑀽𑀓𑀭𑀫𑀤𑁆𑀤𑀯𑀁 𑀧𑀝𑀺𑀬𑀢𑁆𑀢𑀁 𑀢𑁂𑀦 𑀪𑀕𑀯𑀦𑁆𑀢𑀁 𑀧𑀭𑀺𑀯𑀺𑀲𑀺; 𑀬𑀁 𑀧𑀦𑀜𑁆𑀜𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀢𑁆𑀢𑀁 𑀢𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺.

𑀅𑀣 𑀔𑁄 𑀪𑀕𑀯𑀸 𑀘𑀼𑀦𑁆𑀤𑀁 𑀓𑀫𑁆𑀫𑀸𑀭𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑀁 𑀢𑁂, 𑀘𑀼𑀦𑁆𑀤, 𑀲𑀽𑀓𑀭𑀫𑀤𑁆𑀤𑀯𑀁 𑀅𑀯𑀲𑀺𑀝𑁆𑀞𑀁 𑀢𑀁 𑀲𑁄𑀩𑁆𑀪𑁂 𑀦𑀺𑀔𑀡𑀸𑀳𑀺. 𑀦𑀸𑀳𑀁 𑀢𑀁, 𑀘𑀼𑀦𑁆𑀤, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀬𑀲𑁆𑀲 𑀢𑀁 𑀧𑀭𑀺𑀪𑀼𑀢𑁆𑀢𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑁂𑀬𑁆𑀬 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑀲𑁆𑀲𑀸’’𑀢𑀺 [𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑁂𑀦𑀸𑀢𑀺 (𑀓. 𑀲𑀻.)]. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑀁 𑀅𑀳𑁄𑀲𑀺 𑀲𑀽𑀓𑀭𑀫𑀤𑁆𑀤𑀯𑀁 𑀅𑀯𑀲𑀺𑀝𑁆𑀞𑀁 𑀢𑀁 𑀲𑁄𑀩𑁆𑀪𑁂 𑀦𑀺𑀔𑀡𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀘𑀼𑀦𑁆𑀤𑀁 𑀓𑀫𑁆𑀫𑀸𑀭𑀧𑀼𑀢𑁆𑀢𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀪𑀕𑀯𑀢𑁄 𑀘𑀼𑀦𑁆𑀤𑀲𑁆𑀲 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀪𑀢𑁆𑀢𑀁 𑀪𑀼𑀢𑁆𑀢𑀸𑀯𑀺𑀲𑁆𑀲 𑀔𑀭𑁄 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺. 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸 𑀧𑀩𑀸𑀴𑁆𑀳𑀸 [𑀩𑀸𑀴𑁆𑀳𑀸 (𑀲𑀻. 𑀲𑁆𑀬𑀸. 𑀧𑀻.)] 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺 𑀫𑀸𑀭𑀡𑀦𑁆𑀢𑀺𑀓𑀸. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀲𑀺 𑀅𑀯𑀺𑀳𑀜𑁆𑀜𑀫𑀸𑀦𑁄. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀓𑀼𑀲𑀺𑀦𑀸𑀭𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺.

‘‘𑀘𑀼𑀦𑁆𑀤𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀓𑀫𑁆𑀫𑀸𑀭𑀲𑁆𑀲𑀸𑀢𑀺 𑀫𑁂 𑀲𑀼𑀢𑀁;

𑀆𑀩𑀸𑀥𑀁 𑀲𑀫𑁆𑀨𑀼𑀲𑀻 𑀥𑀻𑀭𑁄, 𑀧𑀩𑀸𑀴𑁆𑀳𑀁 𑀫𑀸𑀭𑀡𑀦𑁆𑀢𑀺𑀓𑀁.

‘‘𑀪𑀼𑀢𑁆𑀢𑀲𑁆𑀲 𑀘 𑀲𑀽𑀓𑀭𑀫𑀤𑁆𑀤𑀯𑁂𑀦, 𑀩𑁆𑀬𑀸𑀥𑀺𑀧𑁆𑀧𑀩𑀸𑀴𑁆𑀳𑁄 𑀉𑀤𑀧𑀸𑀤𑀺 𑀲𑀢𑁆𑀣𑀼𑀦𑁄;

𑀯𑀺𑀭𑀺𑀘𑁆𑀘𑀫𑀸𑀦𑁄 [𑀯𑀺𑀭𑀺𑀜𑁆𑀘𑀫𑀸𑀦𑁄 (?) 𑀯𑀺𑀭𑁂𑀘𑀫𑀸𑀦𑁄 (𑀤𑀻. 𑀦𑀺. 𑁨.𑁧𑁯𑁦)] 𑀪𑀕𑀯𑀸 𑀅𑀯𑁄𑀘, ‘𑀕𑀘𑁆𑀙𑀸𑀫𑀳𑀁 𑀓𑀼𑀲𑀺𑀦𑀸𑀭𑀁 𑀦𑀕𑀭’’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀬𑁂𑀦 𑀅𑀜𑁆𑀜𑀢𑀭𑀁 𑀭𑀼𑀓𑁆𑀔𑀫𑀽𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀗𑁆𑀖 𑀫𑁂 𑀢𑁆𑀯𑀁, 𑀆𑀦𑀦𑁆𑀤, 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀳𑀺; 𑀓𑀺𑀮𑀦𑁆𑀢𑁄𑀲𑁆𑀫𑀺, 𑀆𑀦𑀦𑁆𑀤, 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀗𑁆𑀖 𑀫𑁂 𑀢𑁆𑀯𑀁, 𑀆𑀦𑀦𑁆𑀤, 𑀧𑀸𑀦𑀻𑀬𑀁 𑀆𑀳𑀭; 𑀧𑀺𑀧𑀸𑀲𑀺𑀢𑁄𑀲𑁆𑀫𑀺, 𑀆𑀦𑀦𑁆𑀤, 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀸𑀦𑀺, 𑀪𑀦𑁆𑀢𑁂, 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀓𑀝𑀲𑀢𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺. 𑀢𑀁 𑀘𑀓𑁆𑀓𑀘𑁆𑀙𑀺𑀦𑁆𑀦𑀁 𑀉𑀤𑀓𑀁 𑀧𑀭𑀺𑀢𑁆𑀢𑀁 𑀮𑀼𑀴𑀺𑀢𑀁 𑀆𑀯𑀺𑀮𑀁 𑀲𑀦𑁆𑀤𑀢𑀺. 𑀅𑀬𑀁, 𑀪𑀦𑁆𑀢𑁂, 𑀓𑀼𑀓𑀼𑀝𑁆𑀞𑀸 [𑀓𑀓𑀼𑀢𑁆𑀣𑀸 (𑀲𑀻.), 𑀓𑀼𑀓𑀼𑀝𑀸 (𑀲𑁆𑀬𑀸.), 𑀓𑀓𑀼𑀥𑀸 (𑀤𑀻. 𑀦𑀺. 𑁨.𑁧𑁯𑁧)] 𑀦𑀤𑀻 𑀅𑀯𑀺𑀤𑀽𑀭𑁂 𑀅𑀘𑁆𑀙𑁄𑀤𑀓𑀸 𑀲𑀸𑀢𑁄𑀤𑀓𑀸 𑀲𑀻𑀢𑁄𑀤𑀓𑀸 𑀲𑁂𑀢𑁄𑀤𑀓𑀸 𑀲𑀼𑀧𑀢𑀺𑀢𑁆𑀣𑀸 𑀭𑀫𑀡𑀻𑀬𑀸. 𑀏𑀢𑁆𑀣 𑀪𑀕𑀯𑀸 𑀧𑀸𑀦𑀻𑀬𑀜𑁆𑀘 𑀧𑀺𑀯𑀺𑀲𑁆𑀲𑀢𑀺 𑀕𑀢𑁆𑀢𑀸𑀦𑀺 𑀘 𑀲𑀻𑀢𑀻𑀓𑀭𑀺𑀲𑁆𑀲𑀢𑀻’’𑀢𑀺 [𑀲𑀻𑀢𑀺𑀁 𑀓𑀭𑀺𑀲𑁆𑀲𑀢𑀻𑀢𑀺 (𑀲𑀻.), 𑀲𑀻𑀢𑀁 𑀓𑀭𑀺𑀲𑁆𑀲𑀢𑀻𑀢𑀺 (𑀲𑁆𑀬𑀸. 𑀧𑀻. 𑀓.)].

𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀗𑁆𑀖 𑀫𑁂 𑀢𑁆𑀯𑀁, 𑀆𑀦𑀦𑁆𑀤, 𑀧𑀸𑀦𑀻𑀬𑀁 𑀆𑀳𑀭; 𑀧𑀺𑀧𑀸𑀲𑀺𑀢𑁄𑀲𑁆𑀫𑀺, 𑀆𑀦𑀦𑁆𑀤, 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀬𑁂𑀦 𑀲𑀸 𑀦𑀤𑀻 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄 𑀲𑀸 𑀦𑀤𑀻 𑀘𑀓𑁆𑀓𑀘𑁆𑀙𑀺𑀦𑁆𑀦𑀸 𑀧𑀭𑀺𑀢𑁆𑀢𑀸 𑀮𑀼𑀴𑀺𑀢𑀸 𑀆𑀯𑀺𑀮𑀸 𑀲𑀦𑁆𑀤𑀫𑀸𑀦𑀸 𑀆𑀬𑀲𑁆𑀫𑀦𑁆𑀢𑁂 𑀆𑀦𑀦𑁆𑀤𑁂 𑀉𑀧𑀲𑀗𑁆𑀓𑀫𑀦𑁆𑀢𑁂 𑀅𑀘𑁆𑀙𑀸 𑀯𑀺𑀧𑁆𑀧𑀲𑀦𑁆𑀦𑀸 𑀅𑀦𑀸𑀯𑀺𑀮𑀸 𑀲𑀦𑁆𑀤𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄, 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸! 𑀅𑀬𑀜𑁆𑀳𑀺 𑀲𑀸 𑀦𑀤𑀻 𑀘𑀓𑁆𑀓𑀘𑁆𑀙𑀺𑀦𑁆𑀦𑀸 𑀧𑀭𑀺𑀢𑁆𑀢𑀸 𑀮𑀼𑀴𑀺𑀢𑀸 𑀆𑀯𑀺𑀮𑀸 𑀲𑀦𑁆𑀤𑀫𑀸𑀦𑀸 𑀫𑀬𑀺 𑀉𑀧𑀲𑀗𑁆𑀓𑀫𑀦𑁆𑀢𑁂 𑀅𑀘𑁆𑀙𑀸 𑀯𑀺𑀧𑁆𑀧𑀲𑀦𑁆𑀦𑀸 𑀅𑀦𑀸𑀯𑀺𑀮𑀸 𑀲𑀦𑁆𑀤𑀢𑀻’’𑀢𑀺!! 𑀧𑀢𑁆𑀢𑁂𑀦 𑀧𑀸𑀦𑀻𑀬𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂, 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸! 𑀅𑀬𑀜𑁆𑀳𑀺 𑀲𑀸, 𑀪𑀦𑁆𑀢𑁂, 𑀦𑀤𑀻 𑀘𑀓𑁆𑀓𑀘𑁆𑀙𑀺𑀦𑁆𑀦𑀸 𑀧𑀭𑀺𑀢𑁆𑀢𑀸 𑀮𑀼𑀴𑀺𑀢𑀸 𑀆𑀯𑀺𑀮𑀸 𑀲𑀦𑁆𑀤𑀫𑀸𑀦𑀸 𑀫𑀬𑀺 𑀉𑀧𑀲𑀗𑁆𑀓𑀫𑀦𑁆𑀢𑁂 𑀅𑀘𑁆𑀙𑀸 𑀯𑀺𑀧𑁆𑀧𑀲𑀦𑁆𑀦𑀸 𑀅𑀦𑀸𑀯𑀺𑀮𑀸 𑀲𑀦𑁆𑀤𑀢𑀺!! 𑀧𑀺𑀯𑀢𑀼 𑀪𑀕𑀯𑀸 𑀧𑀸𑀦𑀻𑀬𑀁, 𑀧𑀺𑀯𑀢𑀼 𑀲𑀼𑀕𑀢𑁄 𑀧𑀸𑀦𑀻𑀬’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀸𑀦𑀻𑀬𑀁 𑀅𑀧𑀸𑀬𑀺 [𑀅𑀧𑀸𑀲𑀺 (𑀲𑀻.)]. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀓𑀼𑀓𑀼𑀝𑁆𑀞𑀸 𑀦𑀤𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀼𑀓𑀼𑀝𑁆𑀞𑀁 𑀦𑀤𑀺𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀬𑁂𑀦 𑀅𑀫𑁆𑀩𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀘𑀼𑀦𑁆𑀤𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀗𑁆𑀖 𑀫𑁂 𑀢𑁆𑀯𑀁, 𑀘𑀼𑀦𑁆𑀤𑀓, 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀳𑀺; 𑀓𑀺𑀮𑀦𑁆𑀢𑁄𑀲𑁆𑀫𑀺, 𑀘𑀼𑀦𑁆𑀤𑀓, 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀘𑀼𑀦𑁆𑀤𑀓𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀲𑀺. 𑀅𑀣 𑀔𑁄 𑀪𑀕𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸. 𑀆𑀬𑀲𑁆𑀫𑀸 𑀧𑀦 𑀘𑀼𑀦𑁆𑀤𑀓𑁄 𑀢𑀢𑁆𑀣𑁂𑀯 𑀪𑀕𑀯𑀢𑁄 𑀧𑀼𑀭𑀢𑁄 𑀦𑀺𑀲𑀻𑀤𑀺.

‘‘𑀕𑀦𑁆𑀢𑁆𑀯𑀸𑀦 𑀩𑀼𑀤𑁆𑀥𑁄 𑀦𑀤𑀺𑀓𑀁 𑀓𑀼𑀓𑀼𑀝𑁆𑀞𑀁,

𑀅𑀘𑁆𑀙𑁄𑀤𑀓𑀁 𑀲𑀸𑀢𑀼𑀤𑀓𑀁 [𑀲𑀸𑀢𑁄𑀤𑀓𑀁 (𑀲𑀩𑁆𑀩𑀢𑁆𑀣)] 𑀯𑀺𑀧𑁆𑀧𑀲𑀦𑁆𑀦𑀁;

𑀑𑀕𑀸𑀳𑀺 𑀲𑀢𑁆𑀣𑀸 𑀲𑀼𑀓𑀺𑀮𑀦𑁆𑀢𑀭𑀽𑀧𑁄,

𑀢𑀣𑀸𑀕𑀢𑁄 𑀅𑀧𑁆𑀧𑀝𑀺𑀫𑁄𑀥 𑀮𑁄𑀓𑁂.

‘‘𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘𑀼𑀤𑀢𑀸𑀭𑀺 [𑀦𑁆𑀳𑀢𑁆𑀯𑀸 𑀘 𑀉𑀢𑁆𑀢𑀭𑀺 (𑀓.)] 𑀲𑀢𑁆𑀣𑀸,

𑀧𑀼𑀭𑀓𑁆𑀔𑀢𑁄 𑀪𑀺𑀓𑁆𑀔𑀼𑀕𑀡𑀲𑁆𑀲 𑀫𑀚𑁆𑀛𑁂;

𑀲𑀢𑁆𑀣𑀸 𑀧𑀯𑀢𑁆𑀢𑀸 𑀪𑀕𑀯𑀸 𑀇𑀥 𑀥𑀫𑁆𑀫𑁂,

𑀉𑀧𑀸𑀕𑀫𑀺 𑀅𑀫𑁆𑀩𑀯𑀦𑀁 𑀫𑀳𑁂𑀲𑀺;

𑀆𑀫𑀦𑁆𑀢𑀬𑀺 𑀘𑀼𑀦𑁆𑀤𑀓𑀁 𑀦𑀸𑀫 𑀪𑀺𑀓𑁆𑀔𑀼𑀁,

𑀘𑀢𑀼𑀕𑁆𑀕𑀼𑀡𑀁 𑀲𑀦𑁆𑀣𑀭 [𑀧𑀢𑁆𑀣𑀭 (𑀲𑀻. 𑀧𑀻.)] 𑀫𑁂 𑀦𑀺𑀧𑀚𑁆𑀚𑀁.

‘‘𑀲𑁄 𑀘𑁄𑀤𑀺𑀢𑁄 𑀪𑀸𑀯𑀺𑀢𑀢𑁆𑀢𑁂𑀦 𑀘𑀼𑀦𑁆𑀤𑁄,

𑀘𑀢𑀼𑀕𑁆𑀕𑀼𑀡𑀁 𑀲𑀦𑁆𑀣𑀭𑀺 [𑀧𑀢𑁆𑀣𑀭𑀺 (𑀲𑀻. 𑀧𑀻.)] 𑀔𑀺𑀧𑁆𑀧𑀫𑁂𑀯;

𑀦𑀺𑀧𑀚𑁆𑀚𑀺 𑀲𑀢𑁆𑀣𑀸 𑀲𑀼𑀓𑀺𑀮𑀦𑁆𑀢𑀭𑀽𑀧𑁄,

𑀘𑀼𑀦𑁆𑀤𑁄𑀧𑀺 𑀢𑀢𑁆𑀣 𑀧𑀫𑀼𑀔𑁂 𑀦𑀺𑀲𑀻𑀤𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀺𑀬𑀸 𑀔𑁄, 𑀧𑀦𑀸𑀦𑀦𑁆𑀤, 𑀘𑀼𑀦𑁆𑀤𑀲𑁆𑀲 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀓𑁄𑀘𑀺 𑀯𑀺𑀧𑁆𑀧𑀝𑀺𑀲𑀸𑀭𑀁 𑀉𑀧𑀤𑀳𑁂𑀬𑁆𑀬 𑁋 ‘𑀢𑀲𑁆𑀲 𑀢𑁂, 𑀆𑀯𑀼𑀲𑁄 𑀘𑀼𑀦𑁆𑀤, 𑀅𑀮𑀸𑀪𑀸, 𑀢𑀲𑁆𑀲 𑀢𑁂 𑀤𑀼𑀮𑁆𑀮𑀤𑁆𑀥𑀁 𑀬𑀲𑁆𑀲 𑀢𑁂 𑀢𑀣𑀸𑀕𑀢𑁄 𑀧𑀘𑁆𑀙𑀺𑀫𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄’𑀢𑀺. 𑀘𑀼𑀦𑁆𑀤𑀲𑁆𑀲𑀸𑀦𑀦𑁆𑀤, 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀏𑀯𑀁 𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀝𑀺𑀯𑀺𑀦𑁄𑀤𑁂𑀢𑀩𑁆𑀩𑁄 𑁋

‘‘‘𑀢𑀲𑁆𑀲 𑀢𑁂, 𑀆𑀯𑀼𑀲𑁄 𑀘𑀼𑀦𑁆𑀤, 𑀮𑀸𑀪𑀸, 𑀢𑀲𑁆𑀲 𑀢𑁂 𑀲𑀼𑀮𑀤𑁆𑀥𑀁 𑀬𑀲𑁆𑀲 𑀢𑁂 𑀢𑀣𑀸𑀕𑀢𑁄 𑀧𑀘𑁆𑀙𑀺𑀫𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀆𑀯𑀼𑀲𑁄 𑀘𑀼𑀦𑁆𑀤, 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 𑀤𑁆𑀯𑁂𑀫𑁂 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀲𑀫𑀯𑀺𑀧𑀸𑀓𑀸 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘. 𑀓𑀢𑀫𑁂 𑀤𑁆𑀯𑁂? 𑀬𑀜𑁆𑀘 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀬𑀜𑁆𑀘 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀇𑀫𑁂 𑀤𑁆𑀯𑁂 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀲𑀫𑀯𑀺𑀧𑀸𑀓𑀸 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘.

‘‘‘𑀆𑀬𑀼𑀲𑀁𑀯𑀢𑁆𑀢𑀦𑀺𑀓𑀁 𑀆𑀬𑀲𑁆𑀫𑀢𑀸 𑀘𑀼𑀦𑁆𑀤𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀯𑀡𑁆𑀡𑀲𑀁𑀯𑀢𑁆𑀢𑀦𑀺𑀓𑀁 𑀆𑀬𑀲𑁆𑀫𑀢𑀸 𑀘𑀼𑀦𑁆𑀤𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀲𑀼𑀔𑀲𑀁𑀯𑀢𑁆𑀢𑀦𑀺𑀓𑀁 𑀆𑀬𑀲𑁆𑀫𑀢𑀸 𑀘𑀼𑀦𑁆𑀤𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁 𑀆𑀬𑀲𑁆𑀫𑀢𑀸 𑀘𑀼𑀦𑁆𑀤𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀬𑀲𑀲𑀁𑀯𑀢𑁆𑀢𑀦𑀺𑀓𑀁 𑀆𑀬𑀲𑁆𑀫𑀢𑀸 𑀘𑀼𑀦𑁆𑀤𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀆𑀥𑀺𑀧𑀢𑁂𑀬𑁆𑀬𑀲𑀁𑀯𑀢𑁆𑀢𑀦𑀺𑀓𑀁 𑀆𑀬𑀲𑁆𑀫𑀢𑀸 𑀘𑀼𑀦𑁆𑀤𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀓𑀫𑁆𑀫𑀁 𑀉𑀧𑀘𑀺𑀢’𑀦𑁆𑀢𑀺. 𑀘𑀼𑀦𑁆𑀤𑀲𑁆𑀲𑀸𑀦𑀦𑁆𑀤, 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀏𑀯𑀁 𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀝𑀺𑀯𑀺𑀦𑁄𑀤𑁂𑀢𑀩𑁆𑀩𑁄’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺,

𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀺;

𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀁,

𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲𑀦𑀺𑀩𑁆𑀩𑀼𑀢𑁄’’𑀢𑀺 [𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 (𑀲𑀻. 𑀲𑁆𑀬𑀸. 𑀧𑀻.)]. 𑀧𑀜𑁆𑀘𑀫𑀁;

𑁬. 𑀧𑀸𑀝𑀮𑀺𑀕𑀸𑀫𑀺𑀬𑀲𑀼𑀢𑁆𑀢𑀁

𑁭𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀫𑀕𑀥𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀧𑀸𑀝𑀮𑀺𑀕𑀸𑀫𑁄 𑀢𑀤𑀯𑀲𑀭𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀧𑀸𑀝𑀮𑀺𑀕𑀸𑀫𑀺𑀬𑀸 [𑀧𑀸𑀝𑀮𑀺𑀕𑀸𑀫𑀺𑀓𑀸 (𑀤𑀻. 𑀦𑀺. 𑁨.𑁧𑁪𑁮)] 𑀉𑀧𑀸𑀲𑀓𑀸 𑁋 ‘‘𑀪𑀕𑀯𑀸 𑀓𑀺𑀭 𑀫𑀕𑀥𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀸𑀝𑀮𑀺𑀕𑀸𑀫𑀁 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀅𑀣 𑀔𑁄 𑀧𑀸𑀝𑀮𑀺𑀕𑀸𑀫𑀺𑀬𑀸 𑀉𑀧𑀸𑀲𑀓𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀧𑀸𑀝𑀮𑀺𑀕𑀸𑀫𑀺𑀬𑀸 𑀉𑀧𑀸𑀲𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀆𑀯𑀲𑀣𑀸𑀕𑀸𑀭’’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀣 𑀔𑁄 𑀧𑀸𑀝𑀮𑀺𑀕𑀸𑀫𑀺𑀬𑀸 𑀉𑀧𑀸𑀲𑀓𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦𑀸𑀯𑀲𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀩𑁆𑀩𑀲𑀦𑁆𑀣𑀭𑀺𑀁 𑀆𑀯𑀲𑀣𑀸𑀕𑀸𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀉𑀤𑀓𑀫𑀡𑀺𑀓𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀮𑀧𑁆𑀧𑀤𑀻𑀧𑀁 𑀆𑀭𑁄𑀧𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀧𑀸𑀝𑀮𑀺𑀕𑀸𑀫𑀺𑀬𑀸 𑀉𑀧𑀸𑀲𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀩𑁆𑀩𑀲𑀦𑁆𑀣𑀭𑀺𑀲𑀦𑁆𑀣𑀢𑀁 [𑀲𑀩𑁆𑀩𑀲𑀦𑁆𑀣𑀭𑀺𑀁 𑀲𑀦𑁆𑀣𑀢𑀁 (𑀲𑀻. 𑀲𑁆𑀬𑀸. 𑀧𑀻.)], 𑀪𑀦𑁆𑀢𑁂, 𑀆𑀯𑀲𑀣𑀸𑀕𑀸𑀭𑀁; 𑀆𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺; 𑀉𑀤𑀓𑀫𑀡𑀺𑀓𑁄 𑀧𑀢𑀺𑀝𑁆𑀞𑀸𑀧𑀺𑀢𑁄 [𑀉𑀤𑀓𑀫𑀡𑀺𑀓𑀁 𑀧𑀢𑀺𑀝𑁆𑀞𑀸𑀧𑀺𑀢𑀁 (𑀲𑁆𑀬𑀸.)] 𑀢𑁂𑀮𑀧𑁆𑀧𑀤𑀻𑀧𑁄 𑀆𑀭𑁄𑀧𑀺𑀢𑁄. 𑀬𑀲𑁆𑀲𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀆𑀯𑀲𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀆𑀯𑀲𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀚𑁆𑀛𑀺𑀫𑀁 𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀔𑁄 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀆𑀯𑀲𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀙𑀺𑀫𑀁 𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺 𑀪𑀕𑀯𑀦𑁆𑀢𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸. 𑀧𑀸𑀝𑀮𑀺𑀕𑀸𑀫𑀺𑀬𑀸𑀧𑀺 𑀔𑁄 𑀉𑀧𑀸𑀲𑀓𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀆𑀯𑀲𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀁 𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑀸 𑀦𑀺𑀲𑀻𑀤𑀺𑀁𑀲𑀼 𑀪𑀕𑀯𑀦𑁆𑀢𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸. 𑀅𑀣 𑀔𑁄 𑀪𑀕𑀯𑀸 𑀧𑀸𑀝𑀮𑀺𑀕𑀸𑀫𑀺𑀬𑁂 𑀉𑀧𑀸𑀲𑀓𑁂 𑀆𑀫𑀦𑁆𑀢𑁂𑀲𑀺 𑁋

‘‘𑀧𑀜𑁆𑀘𑀺𑀫𑁂, 𑀕𑀳𑀧𑀢𑀬𑁄, 𑀆𑀤𑀻𑀦𑀯𑀸 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀧𑀫𑀸𑀤𑀸𑀥𑀺𑀓𑀭𑀡𑀁 𑀫𑀳𑀢𑀺𑀁 𑀪𑁄𑀕𑀚𑀸𑀦𑀺𑀁 𑀦𑀺𑀕𑀘𑁆𑀙𑀢𑀺. 𑀅𑀬𑀁 𑀧𑀞𑀫𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀬𑀜𑁆𑀜𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺 𑁋 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁, 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁, 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁, 𑀬𑀤𑀺 𑀲𑀫𑀡𑀧𑀭𑀺𑀲𑀁 𑁋 𑀅𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀢𑀺 𑀫𑀗𑁆𑀓𑀼𑀪𑀽𑀢𑁄. 𑀅𑀬𑀁 𑀢𑀢𑀺𑀬𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀧𑀜𑁆𑀘𑀫𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸. 𑀇𑀫𑁂 𑀔𑁄, 𑀕𑀳𑀧𑀢𑀬𑁄, 𑀧𑀜𑁆𑀘 𑀆𑀤𑀻𑀦𑀯𑀸 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

‘‘𑀧𑀜𑁆𑀘𑀺𑀫𑁂, 𑀕𑀳𑀧𑀢𑀬𑁄, 𑀆𑀦𑀺𑀲𑀁𑀲𑀸 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀅𑀧𑁆𑀧𑀫𑀸𑀤𑀸𑀥𑀺𑀓𑀭𑀡𑀁 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀅𑀥𑀺𑀕𑀘𑁆𑀙𑀢𑀺. 𑀅𑀬𑀁 𑀧𑀞𑀫𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀬𑀜𑁆𑀜𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺 𑁋 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁, 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁, 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁, 𑀬𑀤𑀺 𑀲𑀫𑀡𑀧𑀭𑀺𑀲𑀁 𑁋 𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀢𑀺 𑀅𑀫𑀗𑁆𑀓𑀼𑀪𑀽𑀢𑁄. 𑀅𑀬𑀁 𑀢𑀢𑀺𑀬𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀗𑁆𑀓𑀭𑁄𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀧𑀜𑁆𑀘𑀫𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀇𑀫𑁂 𑀔𑁄, 𑀕𑀳𑀧𑀢𑀬𑁄, 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀸𑀝𑀮𑀺𑀕𑀸𑀫𑀺𑀬𑁂 𑀉𑀧𑀸𑀲𑀓𑁂 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸 𑀔𑁄, 𑀕𑀳𑀧𑀢𑀬𑁄, 𑀭𑀢𑁆𑀢𑀺; 𑀬𑀲𑁆𑀲𑀤𑀸𑀦𑀺 𑀢𑀼𑀫𑁆𑀳𑁂 𑀓𑀸𑀮𑀁 𑀫𑀜𑁆𑀜𑀣𑀸’’𑀢𑀺. [‘‘𑀏𑀯𑀁 𑀪𑀦𑁆𑀢𑁂‘‘𑀢𑀺 𑀔𑁄𑀧𑀸𑀝𑀮𑀺𑀕𑀸𑀫𑀺𑀬𑀸 𑀉𑀧𑀸𑀲𑀓𑀸 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 (𑀫𑀳𑀸𑀯. 𑁨𑁮𑁫; 𑀤𑀻. 𑀦𑀺. 𑁨.𑁧𑁫𑁧)] 𑀅𑀣 𑀔𑁄 𑀧𑀸𑀝𑀮𑀺𑀕𑀸𑀫𑀺𑀬𑀸 𑀉𑀧𑀸𑀲𑀓𑀸 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 [‘‘𑀏𑀯𑀁 𑀪𑀦𑁆𑀢𑁂‘‘𑀢𑀺 𑀔𑁄𑀧𑀸𑀝𑀮𑀺𑀕𑀸𑀫𑀺𑀬𑀸 𑀉𑀧𑀸𑀲𑀓𑀸 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 (𑀫𑀳𑀸𑀯. 𑁨𑁮𑁫; 𑀤𑀻. 𑀦𑀺. 𑁨.𑁧𑁫𑁧)] 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀪𑀕𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀧𑀸𑀝𑀮𑀺𑀕𑀸𑀫𑀺𑀬𑁂𑀲𑀼 𑀉𑀧𑀸𑀲𑀓𑁂𑀲𑀼 𑀲𑀼𑀜𑁆𑀜𑀸𑀕𑀸𑀭𑀁 𑀧𑀸𑀯𑀺𑀲𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 [𑀲𑀼𑀦𑀻𑀥𑀯𑀲𑁆𑀲𑀓𑀸𑀭𑀸 (𑀲𑀻. 𑀲𑁆𑀬𑀸. 𑀧𑀻.)] 𑀫𑀕𑀥𑀫𑀳𑀸𑀫𑀢𑁆𑀢𑀸 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀺 𑀯𑀚𑁆𑀚𑀻𑀦𑀁 𑀧𑀝𑀺𑀩𑀸𑀳𑀸𑀬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀤𑁂𑀯𑀢𑀸𑀬𑁄 𑀲𑀳𑀲𑁆𑀲𑀲𑀳𑀲𑁆𑀲𑁂𑀯 [𑀲𑀳𑀲𑁆𑀲𑁂𑀯 (𑀲𑁆𑀬𑀸. 𑀓.), 𑀲𑀳𑀲𑁆𑀲𑀲𑁆𑀲𑁂𑀯 (𑀧𑀻.)] 𑀧𑀸𑀝𑀮𑀺𑀕𑀸𑀫𑁂 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀫𑀳𑁂𑀲𑀓𑁆𑀔𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀚𑁆𑀛𑀺𑀫𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀫𑀚𑁆𑀛𑀺𑀫𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀦𑀻𑀘𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀦𑀻𑀘𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁.

𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀢𑀸 𑀤𑁂𑀯𑀢𑀸𑀬𑁄 𑀲𑀳𑀲𑁆𑀲𑀲𑀳𑀲𑁆𑀲𑁂𑀯 𑀧𑀸𑀝𑀮𑀺𑀕𑀸𑀫𑁂 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺𑀬𑁄. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀫𑀳𑁂𑀲𑀓𑁆𑀔𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀚𑁆𑀛𑀺𑀫𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀫𑀚𑁆𑀛𑀺𑀫𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀦𑀻𑀘𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀦𑀻𑀘𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑁂 𑀧𑀘𑁆𑀘𑀼𑀝𑁆𑀞𑀸𑀬 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋

‘‘𑀓𑁂 𑀦𑀼 𑀔𑁄 [𑀓𑁄 𑀦𑀼 𑀔𑁄 (𑀲𑀩𑁆𑀩𑀢𑁆𑀣)] 𑀆𑀦𑀦𑁆𑀤 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀻’’𑀢𑀺 [𑀫𑀸𑀧𑁂𑀢𑀻𑀢𑀺 (𑀲𑀩𑁆𑀩𑀢𑁆𑀣)]. ‘‘𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸, 𑀪𑀦𑁆𑀢𑁂, 𑀫𑀕𑀥𑀫𑀳𑀸𑀫𑀢𑁆𑀢𑀸 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀺 𑀯𑀚𑁆𑀚𑀻𑀦𑀁 𑀧𑀝𑀺𑀩𑀸𑀳𑀸𑀬𑀸’’𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀤𑁂𑀯𑁂𑀳𑀺 𑀢𑀸𑀯𑀢𑀺𑀁𑀲𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀺 𑀯𑀚𑁆𑀚𑀻𑀦𑀁 𑀧𑀝𑀺𑀩𑀸𑀳𑀸𑀬. 𑀇𑀥𑀸𑀳𑀁, 𑀆𑀦𑀦𑁆𑀤, 𑀅𑀤𑁆𑀤𑀲𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀫𑁆𑀩𑀳𑀼𑀮𑀸 𑀤𑁂𑀯𑀢𑀸𑀬𑁄 𑀲𑀳𑀲𑁆𑀲𑀲𑀳𑀲𑁆𑀲𑁂𑀯 𑀧𑀸𑀝𑀮𑀺𑀕𑀸𑀫𑁂 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺𑀬𑁄. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀫𑀳𑁂𑀲𑀓𑁆𑀔𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀚𑁆𑀛𑀺𑀫𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀫𑀚𑁆𑀛𑀺𑀫𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀦𑀻𑀘𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀦𑀻𑀘𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀸𑀯𑀢𑀸, 𑀆𑀦𑀦𑁆𑀤, 𑀅𑀭𑀺𑀬𑀁 𑀆𑀬𑀢𑀦𑀁 𑀬𑀸𑀯𑀢𑀸 𑀯𑀡𑀺𑀧𑁆𑀧𑀣𑁄 𑀇𑀤𑀁 𑀅𑀕𑁆𑀕𑀦𑀕𑀭𑀁 𑀪𑀯𑀺𑀲𑁆𑀲𑀢𑀺 𑀧𑀸𑀝𑀮𑀺𑀧𑀼𑀢𑁆𑀢𑀁 𑀧𑀼𑀝𑀪𑁂𑀤𑀦𑀁. 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀢𑀬𑁄 𑀅𑀦𑁆𑀢𑀭𑀸𑀬𑀸 𑀪𑀯𑀺𑀲𑁆𑀲𑀦𑁆𑀢𑀺 𑁋 𑀅𑀕𑁆𑀕𑀺𑀢𑁄 𑀯𑀸 𑀉𑀤𑀓𑀢𑁄 𑀯𑀸 𑀫𑀺𑀣𑀼𑀪𑁂𑀤𑀢𑁄 𑀯𑀸’’𑀢𑀺.

𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀸𑀡𑀺𑀬𑀁 [𑀲𑀸𑀭𑀸𑀡𑀻𑀬𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀦𑁄 𑀪𑀯𑀁 𑀕𑁄𑀢𑀫𑁄 𑀅𑀚𑁆𑀚𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀬𑁂𑀦 𑀲𑀓𑁄 𑀆𑀯𑀲𑀣𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀓𑁂 𑀆𑀯𑀲𑀣𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑁂𑀲𑀼𑀁 𑁋 ‘‘𑀓𑀸𑀮𑁄, 𑀪𑁄 𑀕𑁄𑀢𑀫, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸𑀦𑀁 𑀫𑀕𑀥𑀫𑀳𑀸𑀫𑀢𑁆𑀢𑀸𑀦𑀁 𑀆𑀯𑀲𑀣𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀼𑀁 𑀲𑀫𑁆𑀧𑀯𑀸𑀭𑁂𑀲𑀼𑀁.

𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑁂 𑀫𑀕𑀥𑀫𑀳𑀸𑀫𑀢𑁆𑀢𑁂 𑀪𑀕𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘‘𑀬𑀲𑁆𑀫𑀺𑀁 𑀧𑀤𑁂𑀲𑁂 𑀓𑀧𑁆𑀧𑁂𑀢𑀺, 𑀯𑀸𑀲𑀁 𑀧𑀡𑁆𑀟𑀺𑀢𑀚𑀸𑀢𑀺𑀬𑁄;

𑀲𑀻𑀮𑀯𑀦𑁆𑀢𑁂𑀢𑁆𑀣 𑀪𑁄𑀚𑁂𑀢𑁆𑀯𑀸, 𑀲𑀜𑁆𑀜𑀢𑁂 𑀩𑁆𑀭𑀳𑁆𑀫𑀘𑀸𑀭𑀬𑁄 [𑀩𑁆𑀭𑀳𑁆𑀫𑀘𑀸𑀭𑀺𑀦𑁄 (𑀲𑁆𑀬𑀸.), 𑀩𑁆𑀭𑀳𑁆𑀫𑀘𑀭𑀺𑀬𑁂 (𑀧𑀻. 𑀓.)].

‘‘𑀬𑀸 𑀢𑀢𑁆𑀣 𑀤𑁂𑀯𑀢𑀸 𑀆𑀲𑀼𑀁, 𑀢𑀸𑀲𑀁 𑀤𑀓𑁆𑀔𑀺𑀡𑀫𑀸𑀤𑀺𑀲𑁂;

𑀢𑀸 𑀧𑀽𑀚𑀺𑀢𑀸 𑀧𑀽𑀚𑀬𑀦𑁆𑀢𑀺, 𑀫𑀸𑀦𑀺𑀢𑀸 𑀫𑀸𑀦𑀬𑀦𑁆𑀢𑀺 𑀦𑀁.

‘‘𑀢𑀢𑁄 𑀦𑀁 𑀅𑀦𑀼𑀓𑀫𑁆𑀧𑀦𑁆𑀢𑀺, 𑀫𑀸𑀢𑀸 𑀧𑀼𑀢𑁆𑀢𑀁𑀯 𑀑𑀭𑀲𑀁;

𑀤𑁂𑀯𑀢𑀸𑀦𑀼𑀓𑀫𑁆𑀧𑀺𑀢𑁄 𑀧𑁄𑀲𑁄, 𑀲𑀤𑀸 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸𑀦𑀁 𑀫𑀕𑀥𑀫𑀳𑀸𑀫𑀢𑁆𑀢𑀸𑀦𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀸 𑀳𑁄𑀦𑁆𑀢𑀺 𑁋 ‘‘𑀬𑁂𑀦𑀚𑁆𑀚 𑀲𑀫𑀡𑁄 𑀕𑁄𑀢𑀫𑁄 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀲𑁆𑀲𑀢𑀺 𑀢𑀁 ‘𑀕𑁄𑀢𑀫𑀤𑁆𑀯𑀸𑀭𑀁’ 𑀦𑀸𑀫 𑀪𑀯𑀺𑀲𑁆𑀲𑀢𑀺. 𑀬𑁂𑀦 𑀢𑀺𑀢𑁆𑀣𑁂𑀦 𑀕𑀗𑁆𑀕𑀁 𑀦𑀤𑀺𑀁 𑀢𑀭𑀺𑀲𑁆𑀲𑀢𑀺 𑀢𑀁 ‘𑀕𑁄𑀢𑀫𑀢𑀺𑀢𑁆𑀣𑀁’ 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺 𑀢𑀁 ‘𑀕𑁄𑀢𑀫𑀤𑁆𑀯𑀸𑀭𑀁’ 𑀦𑀸𑀫 𑀅𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀕𑀗𑁆𑀕𑀸 𑀦𑀤𑀻 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀕𑀗𑁆𑀕𑀸 𑀦𑀤𑀻 𑀧𑀽𑀭𑀸 𑀳𑁄𑀢𑀺 𑀲𑀫𑀢𑀺𑀢𑁆𑀢𑀺𑀓𑀸 𑀓𑀸𑀓𑀧𑁂𑀬𑁆𑀬𑀸. 𑀅𑀧𑁆𑀧𑁂𑀓𑀘𑁆𑀘𑁂 𑀫𑀦𑀼𑀲𑁆𑀲𑀸 𑀦𑀸𑀯𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀉𑀴𑀼𑀫𑁆𑀧𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀓𑀼𑀮𑁆𑀮𑀁 𑀩𑀦𑁆𑀥𑀦𑁆𑀢𑀺 𑀅𑀧𑀸𑀭𑀸 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑀸. 𑀅𑀣 𑀔𑁄 𑀪𑀕𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑁋 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀑𑀭𑀺𑀫𑀢𑀻𑀭𑁂 [𑀑𑀭𑀺𑀫𑀢𑀻𑀭𑀸 (𑀩𑀳𑀽𑀲𑀼) 𑀫𑀳𑀸𑀯. 𑁨𑁮𑁬; 𑀤𑀻. 𑀦𑀺. 𑁨.𑁧𑁫𑁪 𑀧𑀲𑁆𑀲𑀺𑀢𑀩𑁆𑀩𑀁)] 𑀅𑀦𑁆𑀢𑀭𑀳𑀺𑀢𑁄 𑀧𑀸𑀭𑀺𑀫𑀢𑀻𑀭𑁂 𑀧𑀘𑁆𑀘𑀼𑀝𑁆𑀞𑀸𑀲𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦.

𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑁂 𑀫𑀦𑀼𑀲𑁆𑀲𑁂 𑀅𑀧𑁆𑀧𑁂𑀓𑀘𑁆𑀘𑁂 𑀦𑀸𑀯𑀁 𑀧𑀭𑀺𑀬𑁂𑀲𑀦𑁆𑀢𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀉𑀴𑀼𑀫𑁆𑀧𑀁 𑀧𑀭𑀺𑀬𑁂𑀲𑀦𑁆𑀢𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀓𑀼𑀮𑁆𑀮𑀁 𑀩𑀦𑁆𑀥𑀦𑁆𑀢𑁂 𑀅𑀧𑀸𑀭𑀸 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑁂.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑁂 𑀢𑀭𑀦𑁆𑀢𑀺 𑀅𑀡𑁆𑀡𑀯𑀁 𑀲𑀭𑀁,

𑀲𑁂𑀢𑀼𑀁 𑀓𑀢𑁆𑀯𑀸𑀦 𑀯𑀺𑀲𑀚𑁆𑀚 𑀧𑀮𑁆𑀮𑀮𑀸𑀦𑀺;

𑀓𑀼𑀮𑁆𑀮𑀜𑁆𑀳𑀺 𑀚𑀦𑁄 𑀧𑀩𑀦𑁆𑀥𑀢𑀺 [𑀩𑀦𑁆𑀥𑀢𑀺 (𑀲𑁆𑀬𑀸. 𑀧𑀻.)],

𑀢𑀺𑀡𑁆𑀡𑀸 [𑀦𑀺𑀢𑀺𑀡𑁆𑀡𑀸 (𑀓.)] 𑀫𑁂𑀥𑀸𑀯𑀺𑀦𑁄 𑀚𑀦𑀸’’𑀢𑀺. 𑀙𑀝𑁆𑀞𑀁;

𑁭. 𑀤𑁆𑀯𑀺𑀥𑀸𑀧𑀣𑀲𑀼𑀢𑁆𑀢𑀁

𑁭𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀆𑀬𑀲𑁆𑀫𑀢𑀸 𑀦𑀸𑀕𑀲𑀫𑀸𑀮𑁂𑀦 𑀧𑀘𑁆𑀙𑀸𑀲𑀫𑀡𑁂𑀦. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑀫𑀸𑀮𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑁆𑀯𑀺𑀥𑀸𑀧𑀣𑀁 [𑀤𑁆𑀯𑁂𑀥𑀸𑀧𑀣𑀁 (𑀲𑀻.)]. 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀪𑀕𑀯𑀸 𑀧𑀦𑁆𑀣𑁄; 𑀇𑀫𑀺𑀦𑀸 𑀕𑀘𑁆𑀙𑀸𑀫𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑀫𑀸𑀮𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀦𑀸𑀕𑀲𑀫𑀸𑀮, 𑀧𑀦𑁆𑀣𑁄; 𑀇𑀫𑀺𑀦𑀸 𑀕𑀘𑁆𑀙𑀸𑀫𑀸’’𑀢𑀺.

𑀤𑀼𑀢𑀺𑀬𑀫𑁆𑀧𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑀫𑀸𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀪𑀕𑀯𑀸 𑀧𑀦𑁆𑀣𑁄; 𑀇𑀫𑀺𑀦𑀸 𑀕𑀘𑁆𑀙𑀸𑀫𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑀫𑀸𑀮𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀦𑀸𑀕𑀲𑀫𑀸𑀮, 𑀧𑀦𑁆𑀣𑁄; 𑀇𑀫𑀺𑀦𑀸 𑀕𑀘𑁆𑀙𑀸𑀫𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑀫𑀸𑀮𑁄 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀢𑀢𑁆𑀣𑁂𑀯 𑀙𑀫𑀸𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀸𑀫𑀺 𑁋 ‘‘𑀇𑀤𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀦𑀸𑀕𑀲𑀫𑀸𑀮𑀲𑁆𑀲 𑀢𑁂𑀦 𑀧𑀦𑁆𑀣𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑁄𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀆𑀓𑁄𑀝𑁂𑀲𑀼𑀁 𑀧𑀢𑁆𑀢𑀜𑁆𑀘 𑀪𑀺𑀦𑁆𑀤𑀺𑀁𑀲𑀼 𑀲𑀗𑁆𑀖𑀸𑀝𑀺𑀜𑁆𑀘 𑀯𑀺𑀧𑁆𑀨𑀸𑀮𑁂𑀲𑀼𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑀫𑀸𑀮𑁄 𑀪𑀺𑀦𑁆𑀦𑁂𑀦 𑀧𑀢𑁆𑀢𑁂𑀦 𑀯𑀺𑀧𑁆𑀨𑀸𑀮𑀺𑀢𑀸𑀬 𑀲𑀗𑁆𑀖𑀸𑀝𑀺𑀬𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀦𑀸𑀕𑀲𑀫𑀸𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀢𑁂𑀦 𑀧𑀦𑁆𑀣𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑁄𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀆𑀓𑁄𑀝𑁂𑀲𑀼𑀁, 𑀧𑀢𑁆𑀢𑀜𑁆𑀘 𑀪𑀺𑀦𑁆𑀤𑀺𑀁𑀲𑀼, 𑀲𑀗𑁆𑀖𑀸𑀝𑀺𑀜𑁆𑀘 𑀯𑀺𑀧𑁆𑀨𑀸𑀮𑁂𑀲𑀼’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀤𑁆𑀥𑀺𑀁 𑀘𑀭𑀫𑁂𑀓𑀢𑁄 𑀯𑀲𑀁,

𑀫𑀺𑀲𑁆𑀲𑁄 𑀅𑀜𑁆𑀜𑀚𑀦𑁂𑀦 𑀯𑁂𑀤𑀕𑀽;

𑀯𑀺𑀤𑁆𑀯𑀸 𑀧𑀚𑀳𑀸𑀢𑀺 𑀧𑀸𑀧𑀓𑀁,

𑀓𑁄𑀜𑁆𑀘𑁄 𑀔𑀻𑀭𑀧𑀓𑁄𑀯 𑀦𑀺𑀦𑁆𑀦𑀕’’𑀦𑁆𑀢𑀺. 𑀲𑀢𑁆𑀢𑀫𑀁;

𑁮. 𑀯𑀺𑀲𑀸𑀔𑀸𑀲𑀼𑀢𑁆𑀢𑀁

𑁭𑁮. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀦𑀢𑁆𑀢𑀸 𑀓𑀸𑀮𑀗𑁆𑀓𑀢𑀸 𑀳𑁄𑀢𑀺 𑀧𑀺𑀬𑀸 𑀫𑀦𑀸𑀧𑀸. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀅𑀮𑁆𑀮𑀯𑀢𑁆𑀣𑀸 𑀅𑀮𑁆𑀮𑀓𑁂𑀲𑀸 𑀤𑀺𑀯𑀸 𑀤𑀺𑀯𑀲𑁆𑀲 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀳𑀦𑁆𑀤 𑀓𑀼𑀢𑁄 𑀦𑀼 𑀢𑁆𑀯𑀁, 𑀯𑀺𑀲𑀸𑀔𑁂, 𑀆𑀕𑀘𑁆𑀙𑀲𑀺 𑀅𑀮𑁆𑀮𑀯𑀢𑁆𑀣𑀸 𑀅𑀮𑁆𑀮𑀓𑁂𑀲𑀸 𑀇𑀥𑀽𑀧𑀲𑀗𑁆𑀓𑀦𑁆𑀢𑀸 𑀤𑀺𑀯𑀸 𑀤𑀺𑀯𑀲𑁆𑀲𑀸’’𑀢𑀺? ‘‘𑀦𑀢𑁆𑀢𑀸 𑀫𑁂, 𑀪𑀦𑁆𑀢𑁂, 𑀧𑀺𑀬𑀸 𑀫𑀦𑀸𑀧𑀸 𑀓𑀸𑀮𑀗𑁆𑀓𑀢𑀸. 𑀢𑁂𑀦𑀸𑀳𑀁 𑀅𑀮𑁆𑀮𑀯𑀢𑁆𑀣𑀸 𑀅𑀮𑁆𑀮𑀓𑁂𑀲𑀸 𑀇𑀥𑀽𑀧𑀲𑀗𑁆𑀓𑀦𑁆𑀢𑀸 𑀤𑀺𑀯𑀸 𑀤𑀺𑀯𑀲𑁆𑀲𑀸’’𑀢𑀺. ‘‘𑀇𑀘𑁆𑀙𑁂𑀬𑁆𑀬𑀸𑀲𑀺 𑀢𑁆𑀯𑀁, 𑀯𑀺𑀲𑀸𑀔𑁂, 𑀬𑀸𑀯𑀢𑀺𑀓𑀸 [𑀬𑀸𑀯𑀢𑀓𑀸 (?)] 𑀲𑀸𑀯𑀢𑁆𑀣𑀺𑀬𑀸 𑀫𑀦𑀼𑀲𑁆𑀲𑀸 𑀢𑀸𑀯𑀢𑀺𑀓𑁂 [𑀢𑀸𑀯𑀢𑀓𑁂 (?)] 𑀧𑀼𑀢𑁆𑀢𑁂 𑀘 𑀦𑀢𑁆𑀢𑀸𑀭𑁄 𑀘𑀸’’𑀢𑀺? ‘‘𑀇𑀘𑁆𑀙𑁂𑀬𑁆𑀬𑀸𑀳𑀁, 𑀪𑀕𑀯𑀸 [𑀇𑀘𑁆𑀙𑁂𑀬𑁆𑀬𑀸𑀳𑀁 𑀪𑀦𑁆𑀢𑁂 𑀪𑀕𑀯𑀸 (𑀲𑁆𑀬𑀸.)] 𑀬𑀸𑀯𑀢𑀺𑀓𑀸 𑀲𑀸𑀯𑀢𑁆𑀣𑀺𑀬𑀸 𑀫𑀦𑀼𑀲𑁆𑀲𑀸 𑀢𑀸𑀯𑀢𑀺𑀓𑁂 𑀧𑀼𑀢𑁆𑀢𑁂 𑀘 𑀦𑀢𑁆𑀢𑀸𑀭𑁄 𑀘𑀸’’𑀢𑀺.

‘‘𑀓𑀻𑀯𑀩𑀳𑀼𑀓𑀸 𑀧𑀦, 𑀯𑀺𑀲𑀸𑀔𑁂, 𑀲𑀸𑀯𑀢𑁆𑀣𑀺𑀬𑀸 𑀫𑀦𑀼𑀲𑁆𑀲𑀸 𑀤𑁂𑀯𑀲𑀺𑀓𑀁 𑀓𑀸𑀮𑀁 𑀓𑀭𑁄𑀦𑁆𑀢𑀻’’𑀢𑀺? ‘‘𑀤𑀲𑀧𑀺, 𑀪𑀦𑁆𑀢𑁂, 𑀲𑀸𑀯𑀢𑁆𑀣𑀺𑀬𑀸 𑀫𑀦𑀼𑀲𑁆𑀲𑀸 𑀤𑁂𑀯𑀲𑀺𑀓𑀁 𑀓𑀸𑀮𑀁 𑀓𑀭𑁄𑀦𑁆𑀢𑀺; 𑀦𑀯𑀧𑀺, 𑀪𑀦𑁆𑀢𑁂… 𑀅𑀝𑁆𑀞𑀧𑀺, 𑀪𑀦𑁆𑀢𑁂… 𑀲𑀢𑁆𑀢𑀧𑀺, 𑀪𑀦𑁆𑀢𑁂… 𑀙𑀧𑀺, 𑀪𑀦𑁆𑀢𑁂… 𑀧𑀜𑁆𑀘𑀧𑀺, 𑀪𑀦𑁆𑀢𑁂… 𑀘𑀢𑁆𑀢𑀸𑀭𑁄𑀧𑀺, 𑀪𑀦𑁆𑀢𑁂… 𑀢𑀻𑀡𑀺𑀧𑀺, 𑀪𑀦𑁆𑀢𑁂… 𑀤𑁆𑀯𑁂𑀧𑀺, 𑀪𑀦𑁆𑀢𑁂, 𑀲𑀸𑀯𑀢𑁆𑀣𑀺𑀬𑀸 𑀫𑀦𑀼𑀲𑁆𑀲𑀸 𑀤𑁂𑀯𑀲𑀺𑀓𑀁 𑀓𑀸𑀮𑀁 𑀓𑀭𑁄𑀦𑁆𑀢𑀺. 𑀏𑀓𑁄𑀧𑀺, 𑀪𑀦𑁆𑀢𑁂, 𑀲𑀸𑀯𑀢𑁆𑀣𑀺𑀬𑀸 𑀫𑀦𑀼𑀲𑁆𑀲𑁄 𑀤𑁂𑀯𑀲𑀺𑀓𑀁 𑀓𑀸𑀮𑀁 𑀓𑀭𑁄𑀢𑀺. 𑀅𑀯𑀺𑀯𑀺𑀢𑁆𑀢𑀸, 𑀪𑀦𑁆𑀢𑁂, 𑀲𑀸𑀯𑀢𑁆𑀣𑀺 𑀫𑀦𑀼𑀲𑁆𑀲𑁂𑀳𑀺 𑀓𑀸𑀮𑀁 𑀓𑀭𑁄𑀦𑁆𑀢𑁂𑀳𑀻’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀺𑀲𑀸𑀔𑁂, 𑀅𑀧𑀺 𑀦𑀼 𑀢𑁆𑀯𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀅𑀦𑀮𑁆𑀮𑀯𑀢𑁆𑀣𑀸 𑀯𑀸 𑀪𑀯𑁂𑀬𑁆𑀬𑀸𑀲𑀺 𑀅𑀦𑀮𑁆𑀮𑀓𑁂𑀲𑀸 𑀯𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀅𑀮𑀁 𑀫𑁂, 𑀪𑀦𑁆𑀢𑁂, 𑀢𑀸𑀯 𑀩𑀳𑀼𑀓𑁂𑀳𑀺 𑀧𑀼𑀢𑁆𑀢𑁂𑀳𑀺 𑀘 𑀦𑀢𑁆𑀢𑀸𑀭𑁂𑀳𑀺 𑀘𑀸’’𑀢𑀺.

‘‘𑀬𑁂𑀲𑀁 𑀔𑁄, 𑀯𑀺𑀲𑀸𑀔𑁂, 𑀲𑀢𑀁 𑀧𑀺𑀬𑀸𑀦𑀺, 𑀲𑀢𑀁 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀦𑀯𑀼𑀢𑀺 𑀧𑀺𑀬𑀸𑀦𑀺, 𑀦𑀯𑀼𑀢𑀺 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀅𑀲𑀻𑀢𑀺 𑀧𑀺𑀬𑀸𑀦𑀺, 𑀅𑀲𑀻𑀢𑀺 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀲𑀢𑁆𑀢𑀢𑀺 𑀧𑀺𑀬𑀸𑀦𑀺, 𑀲𑀢𑁆𑀢𑀢𑀺 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀲𑀝𑁆𑀞𑀺 𑀧𑀺𑀬𑀸𑀦𑀺, 𑀲𑀝𑁆𑀞𑀺 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀧𑀜𑁆𑀜𑀸𑀲𑀁 𑀧𑀺𑀬𑀸𑀦𑀺, 𑀧𑀜𑁆𑀜𑀸𑀲𑀁 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀘𑀢𑁆𑀢𑀸𑀭𑀻𑀲𑀁 𑀧𑀺𑀬𑀸𑀦𑀺, 𑀘𑀢𑁆𑀢𑀸𑀭𑀻𑀲𑀁 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺, 𑀬𑁂𑀲𑀁 𑀢𑀺𑀁𑀲𑀁 𑀧𑀺𑀬𑀸𑀦𑀺, 𑀢𑀺𑀁𑀲𑀁 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀯𑀻𑀲𑀢𑀺 𑀧𑀺𑀬𑀸𑀦𑀺, 𑀯𑀻𑀲𑀢𑀺 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺, 𑀬𑁂𑀲𑀁 𑀤𑀲 𑀧𑀺𑀬𑀸𑀦𑀺, 𑀤𑀲 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀦𑀯 𑀧𑀺𑀬𑀸𑀦𑀺, 𑀦𑀯 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀅𑀝𑁆𑀞 𑀧𑀺𑀬𑀸𑀦𑀺, 𑀅𑀝𑁆𑀞 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀲𑀢𑁆𑀢 𑀧𑀺𑀬𑀸𑀦𑀺, 𑀲𑀢𑁆𑀢 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀙 𑀧𑀺𑀬𑀸𑀦𑀺, 𑀙 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀧𑀜𑁆𑀘 𑀧𑀺𑀬𑀸𑀦𑀺, 𑀧𑀜𑁆𑀘 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀘𑀢𑁆𑀢𑀸𑀭𑀺 𑀧𑀺𑀬𑀸𑀦𑀺, 𑀘𑀢𑁆𑀢𑀸𑀭𑀺 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀢𑀻𑀡𑀺 𑀧𑀺𑀬𑀸𑀦𑀺, 𑀢𑀻𑀡𑀺 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀤𑁆𑀯𑁂 𑀧𑀺𑀬𑀸𑀦𑀺, 𑀤𑁆𑀯𑁂 𑀢𑁂𑀲𑀁 𑀤𑀼𑀓𑁆𑀔𑀸𑀦𑀺; 𑀬𑁂𑀲𑀁 𑀏𑀓𑀁 𑀧𑀺𑀬𑀁, 𑀏𑀓𑀁 𑀢𑁂𑀲𑀁 𑀤𑀼𑀓𑁆𑀔𑀁; 𑀬𑁂𑀲𑀁 𑀦𑀢𑁆𑀣𑀺 𑀧𑀺𑀬𑀁, 𑀦𑀢𑁆𑀣𑀺 𑀢𑁂𑀲𑀁 𑀤𑀼𑀓𑁆𑀔𑀁, 𑀅𑀲𑁄𑀓𑀸 𑀢𑁂 𑀯𑀺𑀭𑀚𑀸 𑀅𑀦𑀼𑀧𑀸𑀬𑀸𑀲𑀸𑀢𑀺 𑀯𑀤𑀸𑀫𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑁂 𑀓𑁂𑀘𑀺 𑀲𑁄𑀓𑀸 𑀧𑀭𑀺𑀤𑁂𑀯𑀺𑀢𑀸 𑀯𑀸,

𑀤𑀼𑀓𑁆𑀔𑀸 𑀘 [𑀤𑀼𑀓𑁆𑀔𑀸 𑀯 (𑀅𑀝𑁆𑀞.)] 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸;

𑀧𑀺𑀬𑀁 𑀧𑀝𑀺𑀘𑁆𑀘𑀧𑁆𑀧𑀪𑀯𑀦𑁆𑀢𑀺 𑀏𑀢𑁂,

𑀧𑀺𑀬𑁂 𑀅𑀲𑀦𑁆𑀢𑁂 𑀦 𑀪𑀯𑀦𑁆𑀢𑀺 𑀏𑀢𑁂.

‘‘𑀢𑀲𑁆𑀫𑀸 𑀳𑀺 𑀢𑁂 𑀲𑀼𑀔𑀺𑀦𑁄 𑀯𑀻𑀢𑀲𑁄𑀓𑀸,

𑀬𑁂𑀲𑀁 𑀧𑀺𑀬𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂;

𑀢𑀲𑁆𑀫𑀸 𑀅𑀲𑁄𑀓𑀁 𑀯𑀺𑀭𑀚𑀁 𑀧𑀢𑁆𑀣𑀬𑀸𑀦𑁄,

𑀧𑀺𑀬𑀁 𑀦 𑀓𑀬𑀺𑀭𑀸𑀣 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂’’𑀢𑀺. 𑀅𑀝𑁆𑀞𑀫𑀁;

𑁯. 𑀧𑀞𑀫𑀤𑀩𑁆𑀩𑀲𑀼𑀢𑁆𑀢𑀁

𑁭𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄 𑀫𑁂 𑀤𑀸𑀦𑀺, 𑀲𑀼𑀕𑀢𑀸’’𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀢𑁆𑀯𑀁, 𑀤𑀩𑁆𑀩, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀲𑀭𑀻𑀭𑀲𑁆𑀲 𑀛𑀸𑀬𑀫𑀸𑀦𑀲𑁆𑀲 𑀟𑀬𑁆𑀳𑀫𑀸𑀦𑀲𑁆𑀲 𑀦𑁂𑀯 𑀙𑀸𑀭𑀺𑀓𑀸 𑀧𑀜𑁆𑀜𑀸𑀬𑀺𑀢𑁆𑀣 𑀦 𑀫𑀲𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀧𑁆𑀧𑀺𑀲𑁆𑀲 𑀯𑀸 𑀢𑁂𑀮𑀲𑁆𑀲 𑀯𑀸 𑀛𑀸𑀬𑀫𑀸𑀦𑀲𑁆𑀲 𑀟𑀬𑁆𑀳𑀫𑀸𑀦𑀲𑁆𑀲 𑀦𑁂𑀯 𑀙𑀸𑀭𑀺𑀓𑀸 𑀧𑀜𑁆𑀜𑀸𑀬𑀢𑀺 𑀦 𑀫𑀲𑀺; 𑀏𑀯𑀫𑁂𑀯 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀲𑀭𑀻𑀭𑀲𑁆𑀲 𑀛𑀸𑀬𑀫𑀸𑀦𑀲𑁆𑀲 𑀟𑀬𑁆𑀳𑀫𑀸𑀦𑀲𑁆𑀲 𑀦𑁂𑀯 𑀙𑀸𑀭𑀺𑀓𑀸 𑀧𑀜𑁆𑀜𑀸𑀬𑀺𑀢𑁆𑀣 𑀦 𑀫𑀲𑀻𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀅𑀪𑁂𑀤𑀺 𑀓𑀸𑀬𑁄 𑀦𑀺𑀭𑁄𑀥𑀺 𑀲𑀜𑁆𑀜𑀸,

𑀯𑁂𑀤𑀦𑀸 𑀲𑀻𑀢𑀺𑀪𑀯𑀺𑀁𑀲𑀼 [𑀧𑀻𑀢𑀺𑀤𑀳𑀁𑀲𑀼 (𑀲𑀻. 𑀧𑀻.), 𑀲𑀻𑀢𑀺𑀤𑀳𑀺𑀁𑀲𑀼 (𑀓.)] 𑀲𑀩𑁆𑀩𑀸;

𑀯𑀽𑀧𑀲𑀫𑀺𑀁𑀲𑀼 𑀲𑀗𑁆𑀔𑀸𑀭𑀸,

𑀯𑀺𑀜𑁆𑀜𑀸𑀡𑀁 𑀅𑀢𑁆𑀣𑀫𑀸𑀕𑀫𑀸’’𑀢𑀺. 𑀦𑀯𑀫𑀁;

𑁧𑁦. 𑀤𑀼𑀢𑀺𑀬𑀤𑀩𑁆𑀩𑀲𑀼𑀢𑁆𑀢𑀁

𑁮𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀤𑀩𑁆𑀩𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀲𑀭𑀻𑀭𑀲𑁆𑀲 𑀛𑀸𑀬𑀫𑀸𑀦𑀲𑁆𑀲 𑀟𑀬𑁆𑀳𑀫𑀸𑀦𑀲𑁆𑀲 𑀦𑁂𑀯 𑀙𑀸𑀭𑀺𑀓𑀸 𑀧𑀜𑁆𑀜𑀸𑀬𑀺𑀢𑁆𑀣 𑀦 𑀫𑀲𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀧𑁆𑀧𑀺𑀲𑁆𑀲 𑀯𑀸 𑀢𑁂𑀮𑀲𑁆𑀲 𑀯𑀸 𑀛𑀸𑀬𑀫𑀸𑀦𑀲𑁆𑀲 𑀟𑀬𑁆𑀳𑀫𑀸𑀦𑀲𑁆𑀲 𑀦𑁂𑀯 𑀙𑀸𑀭𑀺𑀓𑀸 𑀧𑀜𑁆𑀜𑀸𑀬𑀢𑀺 𑀦 𑀫𑀲𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀤𑀩𑁆𑀩𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀲𑀭𑀻𑀭𑀲𑁆𑀲 𑀛𑀸𑀬𑀫𑀸𑀦𑀲𑁆𑀲 𑀟𑀬𑁆𑀳𑀫𑀸𑀦𑀲𑁆𑀲 𑀦𑁂𑀯 𑀙𑀸𑀭𑀺𑀓𑀸 𑀧𑀜𑁆𑀜𑀸𑀬𑀺𑀢𑁆𑀣 𑀦 𑀫𑀲𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀅𑀬𑁄𑀖𑀦𑀳𑀢𑀲𑁆𑀲𑁂𑀯, 𑀚𑀮𑀢𑁄 𑀚𑀸𑀢𑀯𑁂𑀤𑀲𑁄 [𑀚𑀸𑀢𑀯𑁂𑀤𑀲𑁆𑀲 (𑀲𑁆𑀬𑀸.)];

𑀅𑀦𑀼𑀧𑀼𑀩𑁆𑀩𑀽𑀧𑀲𑀦𑁆𑀢𑀲𑁆𑀲, 𑀬𑀣𑀸 𑀦 𑀜𑀸𑀬𑀢𑁂 𑀕𑀢𑀺.

𑀏𑀯𑀁 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀸𑀦𑀁, 𑀓𑀸𑀫𑀩𑀦𑁆𑀥𑁄𑀖𑀢𑀸𑀭𑀺𑀦𑀁;

𑀧𑀜𑁆𑀜𑀸𑀧𑁂𑀢𑀼𑀁 𑀕𑀢𑀺 𑀦𑀢𑁆𑀣𑀺, 𑀧𑀢𑁆𑀢𑀸𑀦𑀁 𑀅𑀘𑀮𑀁 𑀲𑀼𑀔’’𑀦𑁆𑀢𑀺. 𑀤𑀲𑀫𑀁;

𑀧𑀸𑀝𑀮𑀺𑀕𑀸𑀫𑀺𑀬𑀯𑀕𑁆𑀕𑁄 [𑀧𑀸𑀝𑀮𑀺𑀕𑀸𑀫𑀯𑀕𑁆𑀕𑁄 (𑀓.)] 𑀅𑀝𑁆𑀞𑀫𑁄.