𑁭. 𑀧𑀧𑀜𑁆𑀘𑀔𑀬𑀲𑀼𑀢𑁆𑀢𑀁

𑁬𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀅𑀢𑁆𑀢𑀦𑁄 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀧𑀳𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺.

𑀅𑀣 𑀔𑁄 𑀪𑀕𑀯𑀸 𑀅𑀢𑁆𑀢𑀦𑁄 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀧𑀳𑀸𑀦𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀲𑁆𑀲 𑀧𑀧𑀜𑁆𑀘𑀸 𑀞𑀺𑀢𑀺 𑀘 𑀦𑀢𑁆𑀣𑀺,

𑀲𑀦𑁆𑀤𑀸𑀦𑀁 𑀧𑀮𑀺𑀖𑀜𑁆𑀘 𑀯𑀻𑀢𑀺𑀯𑀢𑁆𑀢𑁄;

𑀢𑀁 𑀦𑀺𑀢𑁆𑀢𑀡𑁆𑀳𑀁 𑀫𑀼𑀦𑀺𑀁 𑀘𑀭𑀦𑁆𑀢𑀁,

𑀦𑀸𑀯𑀚𑀸𑀦𑀸𑀢𑀺 𑀲𑀤𑁂𑀯𑀓𑁄𑀧𑀺 𑀮𑁄𑀓𑁄’’𑀢𑀺. 𑀲𑀢𑁆𑀢𑀫𑀁;