𑁭. 𑀲𑀼𑀪𑀽𑀢𑀺𑀲𑀼𑀢𑁆𑀢𑀁

𑁫𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀼𑀪𑀽𑀢𑀺 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀅𑀯𑀺𑀢𑀓𑁆𑀓𑀁 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸.

𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀪𑀽𑀢𑀺𑀁 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀅𑀯𑀺𑀢𑀓𑁆𑀓𑀁 𑀲𑀫𑀸𑀥𑀺𑀁 𑀲𑀫𑀸𑀧𑀦𑁆𑀦𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀲𑁆𑀲 𑀯𑀺𑀢𑀓𑁆𑀓𑀸 𑀯𑀺𑀥𑀽𑀧𑀺𑀢𑀸,

𑀅𑀚𑁆𑀛𑀢𑁆𑀢𑀁 𑀲𑀼𑀯𑀺𑀓𑀧𑁆𑀧𑀺𑀢𑀸 𑀅𑀲𑁂𑀲𑀸;

𑀢𑀁 𑀲𑀗𑁆𑀕𑀫𑀢𑀺𑀘𑁆𑀘 𑀅𑀭𑀽𑀧𑀲𑀜𑁆𑀜𑀻,

𑀘𑀢𑀼𑀬𑁄𑀕𑀸𑀢𑀺𑀕𑀢𑁄 𑀦 𑀚𑀸𑀢𑀼 𑀫𑁂𑀢𑀻’’𑀢𑀺 [𑀦 𑀚𑀸𑀢𑀺𑀫𑁂𑀢𑀻𑀢𑀺 (𑀲𑁆𑀬𑀸. 𑀧𑀻. 𑀅𑀝𑁆𑀞. 𑀧𑀸𑀞𑀦𑁆𑀢𑀭𑀁)]. 𑀲𑀢𑁆𑀢𑀫𑀁;