𑁩. 𑀧𑀘𑁆𑀘𑀯𑁂𑀓𑁆𑀔𑀡𑀲𑀼𑀢𑁆𑀢𑀁

𑁫𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀅𑀢𑁆𑀢𑀦𑁄 𑀅𑀦𑁂𑀓𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀳𑀻𑀦𑁂 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀅𑀦𑁂𑀓𑁂 𑀘 𑀓𑀼𑀲𑀮𑁂 𑀥𑀫𑁆𑀫𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀢𑁂.

𑀅𑀣 𑀔𑁄 𑀪𑀕𑀯𑀸 [𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 (𑀲𑀻. 𑀓.)] 𑀅𑀢𑁆𑀢𑀦𑁄 𑀅𑀦𑁂𑀓𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀳𑀻𑀦𑁂 𑀯𑀺𑀤𑀺𑀢𑁆𑀯𑀸 𑀅𑀦𑁂𑀓𑁂 𑀘 𑀓𑀼𑀲𑀮𑁂 𑀥𑀫𑁆𑀫𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀢𑁂 [𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 (𑀲𑀻. 𑀓.)] 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀅𑀳𑀼 𑀧𑀼𑀩𑁆𑀩𑁂 𑀢𑀤𑀸 𑀦𑀸𑀳𑀼, 𑀦𑀸𑀳𑀼 𑀧𑀼𑀩𑁆𑀩𑁂 𑀢𑀤𑀸 𑀅𑀳𑀼;

𑀦 𑀘𑀸𑀳𑀼 𑀦 𑀘 𑀪𑀯𑀺𑀲𑁆𑀲𑀢𑀺, 𑀦 𑀘𑁂𑀢𑀭𑀳𑀺 𑀯𑀺𑀚𑁆𑀚𑀢𑀻’’𑀢𑀺. 𑀢𑀢𑀺𑀬𑀁;