𑁨. 𑀫𑀼𑀘𑀮𑀺𑀦𑁆𑀤𑀯𑀕𑁆𑀕𑁄

𑁧. 𑀫𑀼𑀘𑀮𑀺𑀦𑁆𑀤𑀲𑀼𑀢𑁆𑀢𑀁

𑁧𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀫𑀼𑀘𑀮𑀺𑀦𑁆𑀤𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀳𑀸 𑀅𑀓𑀸𑀮𑀫𑁂𑀖𑁄 𑀉𑀤𑀧𑀸𑀤𑀺 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸 𑀲𑀻𑀢𑀯𑀸𑀢𑀤𑀼𑀤𑁆𑀤𑀺𑀦𑀻. 𑀅𑀣 𑀔𑁄 𑀫𑀼𑀘𑀮𑀺𑀦𑁆𑀤𑁄 𑀦𑀸𑀕𑀭𑀸𑀚𑀸 𑀲𑀓𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀕𑀯𑀢𑁄 𑀓𑀸𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺𑀫𑀼𑀤𑁆𑀥𑀦𑀺 𑀫𑀳𑀦𑁆𑀢𑀁 𑀨𑀡𑀁 𑀯𑀺𑀳𑀘𑁆𑀘 𑀅𑀝𑁆𑀞𑀸𑀲𑀺 𑁋 ‘‘𑀫𑀸 𑀪𑀕𑀯𑀦𑁆𑀢𑀁 𑀲𑀻𑀢𑀁, 𑀫𑀸 𑀪𑀕𑀯𑀦𑁆𑀢𑀁 𑀉𑀡𑁆𑀳𑀁, 𑀫𑀸 𑀪𑀕𑀯𑀦𑁆𑀢𑀁 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧 [𑀲𑀺𑀭𑀺𑀁𑀲𑀧 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀫𑁆𑀨𑀲𑁆𑀲𑁄’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀲𑀺. 𑀅𑀣 𑀔𑁄 𑀫𑀼𑀘𑀮𑀺𑀦𑁆𑀤𑁄 𑀦𑀸𑀕𑀭𑀸𑀚𑀸 𑀯𑀺𑀤𑁆𑀥𑀁 𑀯𑀺𑀕𑀢𑀯𑀮𑀸𑀳𑀓𑀁 𑀤𑁂𑀯𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀢𑁄 𑀓𑀸𑀬𑀸 𑀪𑁄𑀕𑁂 𑀯𑀺𑀦𑀺𑀯𑁂𑀞𑁂𑀢𑁆𑀯𑀸 𑀲𑀓𑀯𑀡𑁆𑀡𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀫𑀸𑀡𑀯𑀓𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀪𑀕𑀯𑀢𑁄 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺 𑀧𑀜𑁆𑀚𑀮𑀺𑀓𑁄 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑁄.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀼𑀔𑁄 𑀯𑀺𑀯𑁂𑀓𑁄 𑀢𑀼𑀝𑁆𑀞𑀲𑁆𑀲, 𑀲𑀼𑀢𑀥𑀫𑁆𑀫𑀲𑁆𑀲 𑀧𑀲𑁆𑀲𑀢𑁄;

𑀅𑀩𑁆𑀬𑀸𑀧𑀚𑁆𑀚𑀁 𑀲𑀼𑀔𑀁 𑀮𑁄𑀓𑁂, 𑀧𑀸𑀡𑀪𑀽𑀢𑁂𑀲𑀼 𑀲𑀁𑀬𑀫𑁄.

‘‘𑀲𑀼𑀔𑀸 𑀯𑀺𑀭𑀸𑀕𑀢𑀸 𑀮𑁄𑀓𑁂, 𑀓𑀸𑀫𑀸𑀦𑀁 𑀲𑀫𑀢𑀺𑀓𑁆𑀓𑀫𑁄;

𑀅𑀲𑁆𑀫𑀺𑀫𑀸𑀦𑀲𑁆𑀲 𑀬𑁄 𑀯𑀺𑀦𑀬𑁄, 𑀏𑀢𑀁 𑀯𑁂 𑀧𑀭𑀫𑀁 𑀲𑀼𑀔’’𑀦𑁆𑀢𑀺. 𑀧𑀞𑀫𑀁;

𑁨. 𑀭𑀸𑀚𑀲𑀼𑀢𑁆𑀢𑀁

𑁧𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀁 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀓𑁄 𑀦𑀼 𑀔𑁄, 𑀆𑀯𑀼𑀲𑁄, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀭𑀸𑀚𑀽𑀦𑀁 𑀫𑀳𑀤𑁆𑀥𑀦𑀢𑀭𑁄 𑀯𑀸 𑀫𑀳𑀸𑀪𑁄𑀕𑀢𑀭𑁄 𑀯𑀸 𑀫𑀳𑀸𑀓𑁄𑀲𑀢𑀭𑁄 𑀯𑀸 𑀫𑀳𑀸𑀯𑀺𑀚𑀺𑀢𑀢𑀭𑁄 𑀯𑀸 𑀫𑀳𑀸𑀯𑀸𑀳𑀦𑀢𑀭𑁄 𑀯𑀸 𑀫𑀳𑀩𑁆𑀩𑀮𑀢𑀭𑁄 𑀯𑀸 𑀫𑀳𑀺𑀤𑁆𑀥𑀺𑀓𑀢𑀭𑁄 𑀯𑀸 𑀫𑀳𑀸𑀦𑀼𑀪𑀸𑀯𑀢𑀭𑁄 𑀯𑀸 𑀭𑀸𑀚𑀸 𑀯𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄, 𑀭𑀸𑀚𑀸 𑀯𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄’’𑀢𑀺? 𑀅𑀬𑀜𑁆𑀘𑀭𑀳𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑀸𑀓𑀣𑀸 𑀳𑁄𑀢𑀺 𑀯𑀺𑀧𑁆𑀧𑀓𑀢𑀸.

𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀼𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸 𑀲𑀦𑁆𑀦𑀺𑀧𑀢𑀺𑀢𑀸, 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺?

‘‘𑀇𑀥, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀁 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘𑀓𑁄 𑀦𑀼 𑀔𑁄, 𑀆𑀯𑀼𑀲𑁄, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀭𑀸𑀚𑀽𑀦𑀁 𑀫𑀳𑀤𑁆𑀥𑀦𑀢𑀭𑁄 𑀯𑀸 𑀫𑀳𑀸𑀪𑁄𑀕𑀢𑀭𑁄 𑀯𑀸 𑀫𑀳𑀸𑀓𑁄𑀲𑀢𑀭𑁄 𑀯𑀸 𑀫𑀳𑀸𑀯𑀺𑀚𑀺𑀢𑀢𑀭𑁄 𑀯𑀸 𑀫𑀳𑀸𑀯𑀸𑀳𑀦𑀢𑀭𑁄 𑀯𑀸 𑀫𑀳𑀩𑁆𑀩𑀮𑀢𑀭𑁄 𑀯𑀸 𑀫𑀳𑀺𑀤𑁆𑀥𑀺𑀓𑀢𑀭𑁄 𑀯𑀸 𑀫𑀳𑀸𑀦𑀼𑀪𑀸𑀯𑀢𑀭𑁄 𑀯𑀸 𑀭𑀸𑀚𑀸 𑀯𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄, 𑀭𑀸𑀚𑀸 𑀯𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄’𑀢𑀺? 𑀅𑀬𑀁 𑀔𑁄 𑀦𑁄, 𑀪𑀦𑁆𑀢𑁂, 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀅𑀣 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺.

‘‘𑀦 𑀔𑁆𑀯𑁂𑀢𑀁, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀧𑀢𑀺𑀭𑀽𑀧𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸𑀦𑀁 𑀬𑀁 𑀢𑀼𑀫𑁆𑀳𑁂 𑀏𑀯𑀭𑀽𑀧𑀺𑀁 𑀓𑀣𑀁 𑀓𑀣𑁂𑀬𑁆𑀬𑀸𑀣. 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀬𑀁 𑀓𑀭𑀡𑀻𑀬𑀁 𑁋 𑀥𑀫𑁆𑀫𑀻 𑀯𑀸 𑀓𑀣𑀸 𑀅𑀭𑀺𑀬𑁄 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀜𑁆𑀘 𑀓𑀸𑀫𑀲𑀼𑀔𑀁 𑀮𑁄𑀓𑁂, 𑀬𑀜𑁆𑀘𑀺𑀤𑀁 𑀤𑀺𑀯𑀺𑀬𑀁 𑀲𑀼𑀔𑀁;

𑀢𑀡𑁆𑀳𑀓𑁆𑀔𑀬𑀲𑀼𑀔𑀲𑁆𑀲𑁂𑀢𑁂, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺’’𑀦𑁆𑀢𑀺. 𑀤𑀼𑀢𑀺𑀬𑀁;

𑁩. 𑀤𑀡𑁆𑀟𑀲𑀼𑀢𑁆𑀢𑀁

𑁧𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀓𑀼𑀫𑀸𑀭𑀓𑀸 𑀅𑀦𑁆𑀢𑀭𑀸 𑀘 𑀲𑀸𑀯𑀢𑁆𑀣𑀺𑀁 𑀅𑀦𑁆𑀢𑀭𑀸 𑀘 𑀚𑁂𑀢𑀯𑀦𑀁 𑀅𑀳𑀺𑀁 𑀤𑀡𑁆𑀟𑁂𑀦 𑀳𑀦𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀲𑀫𑁆𑀩𑀳𑀼𑀮𑁂 𑀓𑀼𑀫𑀸𑀭𑀓𑁂 𑀅𑀦𑁆𑀢𑀭𑀸 𑀘 𑀲𑀸𑀯𑀢𑁆𑀣𑀺𑀁 𑀅𑀦𑁆𑀢𑀭𑀸 𑀘 𑀚𑁂𑀢𑀯𑀦𑀁 𑀅𑀳𑀺𑀁 𑀤𑀡𑁆𑀟𑁂𑀦 𑀳𑀦𑀦𑁆𑀢𑁂.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀼𑀔𑀓𑀸𑀫𑀸𑀦𑀺 𑀪𑀽𑀢𑀸𑀦𑀺, 𑀬𑁄 𑀤𑀡𑁆𑀟𑁂𑀦 𑀯𑀺𑀳𑀺𑀁𑀲𑀢𑀺;

𑀅𑀢𑁆𑀢𑀦𑁄 𑀲𑀼𑀔𑀫𑁂𑀲𑀸𑀦𑁄, 𑀧𑁂𑀘𑁆𑀘 𑀲𑁄 𑀦 𑀮𑀪𑀢𑁂 𑀲𑀼𑀔𑀁.

‘‘𑀲𑀼𑀔𑀓𑀸𑀫𑀸𑀦𑀺 𑀪𑀽𑀢𑀸𑀦𑀺, 𑀬𑁄 𑀤𑀡𑁆𑀟𑁂𑀦 𑀦 𑀳𑀺𑀁𑀲𑀢𑀺;

𑀅𑀢𑁆𑀢𑀦𑁄 𑀲𑀼𑀔𑀫𑁂𑀲𑀸𑀦𑁄, 𑀧𑁂𑀘𑁆𑀘 𑀲𑁄 𑀮𑀪𑀢𑁂 𑀲𑀼𑀔’’𑀦𑁆𑀢𑀺. 𑀢𑀢𑀺𑀬𑀁;

𑁪. 𑀲𑀓𑁆𑀓𑀸𑀭𑀲𑀼𑀢𑁆𑀢𑀁

𑁧𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄, 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄, 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀦 𑀧𑀭𑀺𑀩𑁆𑀩𑀸𑀚𑀓𑀸 𑀅𑀲𑀓𑁆𑀓𑀢𑀸 𑀳𑁄𑀦𑁆𑀢𑀺 𑀅𑀕𑀭𑀼𑀓𑀢𑀸 𑀅𑀫𑀸𑀦𑀺𑀢𑀸 [𑀦 𑀅𑀧𑀘𑀺𑀢𑀸 (𑀲𑁆𑀬𑀸. 𑀧𑀻.)] 𑀅𑀧𑀽𑀚𑀺𑀢𑀸 𑀅𑀦𑀧𑀘𑀺𑀢𑀸, 𑀦 𑀮𑀸𑀪𑀺𑀦𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀅𑀣 𑀔𑁄 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀪𑀕𑀯𑀢𑁄 𑀲𑀓𑁆𑀓𑀸𑀭𑀁 𑀅𑀲𑀳𑀫𑀸𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀕𑀸𑀫𑁂 𑀘 𑀅𑀭𑀜𑁆𑀜𑁂 𑀘 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀭𑁄𑀲𑁂𑀦𑁆𑀢𑀺 𑀯𑀺𑀳𑁂𑀲𑁂𑀦𑁆𑀢𑀺.

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀏𑀢𑀭𑀳𑀺, 𑀪𑀦𑁆𑀢𑁂, 𑀪𑀕𑀯𑀸 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄, 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄, 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀦 𑀧𑀭𑀺𑀩𑁆𑀩𑀸𑀚𑀓𑀸 𑀅𑀲𑀓𑁆𑀓𑀢𑀸 𑀅𑀕𑀭𑀼𑀓𑀢𑀸 𑀅𑀫𑀸𑀦𑀺𑀢𑀸 𑀅𑀧𑀽𑀚𑀺𑀢𑀸 𑀅𑀦𑀧𑀘𑀺𑀢𑀸, 𑀦 𑀮𑀸𑀪𑀺𑀦𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀅𑀣 𑀔𑁄 𑀢𑁂, 𑀪𑀦𑁆𑀢𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀪𑀕𑀯𑀢𑁄 𑀲𑀓𑁆𑀓𑀸𑀭𑀁 𑀅𑀲𑀳𑀫𑀸𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀕𑀸𑀫𑁂 𑀘 𑀅𑀭𑀜𑁆𑀜𑁂 𑀘 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀭𑁄𑀲𑁂𑀦𑁆𑀢𑀺 𑀯𑀺𑀳𑁂𑀲𑀦𑁆𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀕𑀸𑀫𑁂 𑀅𑀭𑀜𑁆𑀜𑁂 𑀲𑀼𑀔𑀤𑀼𑀓𑁆𑀔𑀨𑀼𑀝𑁆𑀞𑁄,

𑀦𑁂𑀯𑀢𑁆𑀢𑀢𑁄 𑀦𑁄 𑀧𑀭𑀢𑁄 𑀤𑀳𑁂𑀣;

𑀨𑀼𑀲𑀦𑁆𑀢𑀺 𑀨𑀲𑁆𑀲𑀸 𑀉𑀧𑀥𑀺𑀁 𑀧𑀝𑀺𑀘𑁆𑀘,

𑀦𑀺𑀭𑀽𑀧𑀥𑀺𑀁 𑀓𑁂𑀦 𑀨𑀼𑀲𑁂𑀬𑁆𑀬𑀼 𑀨𑀲𑁆𑀲𑀸’’𑀢𑀺. 𑀘𑀢𑀼𑀢𑁆𑀣𑀁;

𑁫. 𑀉𑀧𑀸𑀲𑀓𑀲𑀼𑀢𑁆𑀢𑀁

𑁧𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀇𑀘𑁆𑀙𑀸𑀦𑀗𑁆𑀕𑀮𑀓𑁄 𑀉𑀧𑀸𑀲𑀓𑁄 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑁄 𑀳𑁄𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀣 𑀔𑁄 𑀲𑁄 𑀉𑀧𑀸𑀲𑀓𑁄 𑀲𑀸𑀯𑀢𑁆𑀣𑀺𑀬𑀁 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀢𑀁 𑀉𑀧𑀸𑀲𑀓𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀘𑀺𑀭𑀲𑁆𑀲𑀁 𑀔𑁄 𑀢𑁆𑀯𑀁, 𑀉𑀧𑀸𑀲𑀓, 𑀇𑀫𑀁 𑀧𑀭𑀺𑀬𑀸𑀬𑀫𑀓𑀸𑀲𑀺 𑀬𑀤𑀺𑀤𑀁 𑀇𑀥𑀸𑀕𑀫𑀦𑀸𑀬𑀸’’𑀢𑀺.

‘‘𑀘𑀺𑀭𑀧𑀝𑀺𑀓𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄, 𑀅𑀧𑀺 𑀘𑀸𑀳𑀁 𑀓𑁂𑀳𑀺𑀘𑀺 𑀓𑁂𑀳𑀺𑀘𑀺 𑀓𑀺𑀘𑁆𑀘𑀓𑀭𑀡𑀻𑀬𑁂𑀳𑀺 𑀩𑁆𑀬𑀸𑀯𑀝𑁄. 𑀏𑀯𑀸𑀳𑀁 𑀦𑀸𑀲𑀓𑁆𑀔𑀺𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀼𑀔𑀁 𑀯𑀢 𑀢𑀲𑁆𑀲 𑀦 𑀳𑁄𑀢𑀺 𑀓𑀺𑀜𑁆𑀘𑀺,

𑀲𑀗𑁆𑀔𑀸𑀢𑀥𑀫𑁆𑀫𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲;

𑀲𑀓𑀺𑀜𑁆𑀘𑀦𑀁 𑀧𑀲𑁆𑀲 𑀯𑀺𑀳𑀜𑁆𑀜𑀫𑀸𑀦𑀁,

𑀚𑀦𑁄 𑀚𑀦𑀲𑁆𑀫𑀺𑀁 𑀧𑀝𑀺𑀩𑀦𑁆𑀥𑀭𑀽𑀧𑁄’’𑀢𑀺. 𑀧𑀜𑁆𑀘𑀫𑀁;

𑁬. 𑀕𑀩𑁆𑀪𑀺𑀦𑀻𑀲𑀼𑀢𑁆𑀢𑀁

𑁧𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀤𑀳𑀭𑀫𑀸𑀡𑀯𑀺𑀓𑀸 𑀧𑀚𑀸𑀧𑀢𑀺 𑀳𑁄𑀢𑀺 𑀕𑀩𑁆𑀪𑀺𑀦𑀻 𑀉𑀧𑀯𑀺𑀚𑀜𑁆𑀜𑀸. 𑀅𑀣 𑀔𑁄 𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸 𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘 𑁋 ‘‘𑀕𑀘𑁆𑀙 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀢𑁂𑀮𑀁 𑀆𑀳𑀭, 𑀬𑀁 𑀫𑁂 𑀯𑀺𑀚𑀸𑀢𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀲𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀏𑀢𑀤𑀯𑁄𑀘 𑁋 ‘‘𑀓𑀼𑀢𑁄 𑀧𑀦𑀸𑀳𑀁, 𑀪𑁄𑀢𑀺 [𑀪𑁄𑀢𑀺𑀬𑀸 (𑀲𑁆𑀬𑀸. 𑀧𑀻. 𑀓.)], 𑀢𑁂𑀮𑀁 𑀆𑀳𑀭𑀸𑀫𑀻’’𑀢𑀺? 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸 𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘 𑁋 ‘‘𑀕𑀘𑁆𑀙 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀢𑁂𑀮𑀁 𑀆𑀳𑀭, 𑀬𑀁 𑀫𑁂 𑀯𑀺𑀚𑀸𑀢𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀧𑀭𑀺𑀩𑁆𑀩𑀸𑀚𑀺𑀓𑁄 𑀢𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀏𑀢𑀤𑀯𑁄𑀘 𑁋 ‘‘𑀓𑀼𑀢𑁄 𑀧𑀦𑀸𑀳𑀁, 𑀪𑁄𑀢𑀺, 𑀢𑁂𑀮𑀁 𑀆𑀳𑀭𑀸𑀫𑀻’’𑀢𑀺? 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸 𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘 𑁋 ‘‘𑀕𑀘𑁆𑀙 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀢𑁂𑀮𑀁 𑀆𑀳𑀭, 𑀬𑀁 𑀫𑁂 𑀯𑀺𑀚𑀸𑀢𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀓𑁄𑀝𑁆𑀞𑀸𑀕𑀸𑀭𑁂 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀲𑀧𑁆𑀧𑀺𑀲𑁆𑀲 𑀯𑀸 𑀢𑁂𑀮𑀲𑁆𑀲 𑀯𑀸 𑀬𑀸𑀯𑀤𑀢𑁆𑀣𑀁 𑀧𑀸𑀢𑀼𑀁 𑀤𑀻𑀬𑀢𑀺 [𑀤𑀺𑀬𑁆𑀬𑀢𑀺 (𑀲𑀻. 𑀓.)], 𑀦𑁄 𑀦𑀻𑀳𑀭𑀺𑀢𑀼𑀁.

𑀅𑀣 𑀔𑁄 𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀭𑀜𑁆𑀜𑁄 𑀔𑁄 𑀧𑀦 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀓𑁄𑀝𑁆𑀞𑀸𑀕𑀸𑀭𑁂 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀲𑀧𑁆𑀧𑀺𑀲𑁆𑀲 𑀯𑀸 𑀢𑁂𑀮𑀲𑁆𑀲 𑀯𑀸 𑀬𑀸𑀯𑀤𑀢𑁆𑀣𑀁 𑀧𑀸𑀢𑀼𑀁 𑀤𑀻𑀬𑀢𑀺, 𑀦𑁄 𑀦𑀻𑀳𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀓𑁄𑀝𑁆𑀞𑀸𑀕𑀸𑀭𑀁 𑀕𑀦𑁆𑀢𑁆𑀯𑀸 𑀢𑁂𑀮𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀺𑀯𑀺𑀢𑁆𑀯𑀸 𑀖𑀭𑀁 𑀆𑀕𑀦𑁆𑀢𑁆𑀯𑀸 𑀉𑀘𑁆𑀙𑀤𑁆𑀤𑀺𑀢𑁆𑀯𑀸𑀦 [𑀉𑀕𑁆𑀕𑀺𑀭𑀺𑀢𑁆𑀯𑀸𑀦 (𑀲𑀻. 𑀲𑁆𑀬𑀸. 𑀧𑀻.), 𑀉𑀘𑁆𑀙𑀤𑀺𑀢𑁆𑀯𑀸 (𑀲𑀻. 𑀲𑁆𑀬𑀸. 𑀅𑀝𑁆𑀞.), 𑀉𑀘𑁆𑀙𑀟𑁆𑀟𑀺𑀢𑁆𑀯𑀸𑀦 (𑀓.)] 𑀤𑀤𑁂𑀬𑁆𑀬𑀁, 𑀬𑀁 𑀇𑀫𑀺𑀲𑁆𑀲𑀸 𑀯𑀺𑀚𑀸𑀢𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀲𑁄 𑀧𑀭𑀺𑀩𑁆𑀩𑀸𑀚𑀓𑁄 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀓𑁄𑀝𑁆𑀞𑀸𑀕𑀸𑀭𑀁 𑀕𑀦𑁆𑀢𑁆𑀯𑀸 𑀢𑁂𑀮𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀺𑀯𑀺𑀢𑁆𑀯𑀸 𑀖𑀭𑀁 𑀆𑀕𑀦𑁆𑀢𑁆𑀯𑀸 𑀦𑁂𑀯 𑀲𑀓𑁆𑀓𑁄𑀢𑀺 𑀉𑀤𑁆𑀥𑀁 𑀓𑀸𑀢𑀼𑀁, 𑀦 𑀧𑀦 𑀅𑀥𑁄. 𑀲𑁄 𑀤𑀼𑀓𑁆𑀔𑀸𑀳𑀺 𑀢𑀺𑀩𑁆𑀩𑀸𑀳𑀺 [𑀢𑀺𑀧𑁆𑀧𑀸𑀳𑀺 (𑀲𑁆𑀬𑀸.)] 𑀔𑀭𑀸𑀳𑀺 𑀓𑀝𑀼𑀓𑀸𑀳𑀺 𑀯𑁂𑀤𑀦𑀸𑀳𑀺 𑀨𑀼𑀝𑁆𑀞𑁄 𑀆𑀯𑀝𑁆𑀝𑀢𑀺 𑀧𑀭𑀺𑀯𑀝𑁆𑀝𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀤𑀼𑀓𑁆𑀔𑀸𑀳𑀺 𑀢𑀺𑀩𑁆𑀩𑀸𑀳𑀺 𑀔𑀭𑀸𑀳𑀺 𑀓𑀝𑀼𑀓𑀸𑀳𑀺 𑀯𑁂𑀤𑀦𑀸𑀳𑀺 𑀨𑀼𑀝𑁆𑀞𑀁 𑀆𑀯𑀝𑁆𑀝𑀫𑀸𑀦𑀁 𑀧𑀭𑀺𑀯𑀝𑁆𑀝𑀫𑀸𑀦𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀼𑀔𑀺𑀦𑁄 𑀯𑀢 𑀬𑁂 𑀅𑀓𑀺𑀜𑁆𑀘𑀦𑀸,

𑀯𑁂𑀤𑀕𑀼𑀦𑁄 𑀳𑀺 𑀚𑀦𑀸 𑀅𑀓𑀺𑀜𑁆𑀘𑀦𑀸;

𑀲𑀓𑀺𑀜𑁆𑀘𑀦𑀁 𑀧𑀲𑁆𑀲 𑀯𑀺𑀳𑀜𑁆𑀜𑀫𑀸𑀦𑀁,

𑀚𑀦𑁄 𑀚𑀦𑀲𑁆𑀫𑀺𑀁 𑀧𑀝𑀺𑀩𑀦𑁆𑀥𑀘𑀺𑀢𑁆𑀢𑁄’’ [𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 (𑀲𑁆𑀬𑀸.), 𑀧𑀝𑀺𑀩𑀦𑁆𑀥𑀭𑀼𑀧𑁄 (?)] 𑀢𑀺. 𑀙𑀝𑁆𑀞𑀁;

𑁭. 𑀏𑀓𑀧𑀼𑀢𑁆𑀢𑀓𑀲𑀼𑀢𑁆𑀢𑀁

𑁧𑁭. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀉𑀧𑀸𑀲𑀓𑀲𑁆𑀲 𑀏𑀓𑀧𑀼𑀢𑁆𑀢𑀓𑁄 𑀧𑀺𑀬𑁄 𑀫𑀦𑀸𑀧𑁄 𑀓𑀸𑀮𑀗𑁆𑀓𑀢𑁄 𑀳𑁄𑀢𑀺.

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀉𑀧𑀸𑀲𑀓𑀸 𑀅𑀮𑁆𑀮𑀯𑀢𑁆𑀣𑀸 𑀅𑀮𑁆𑀮𑀓𑁂𑀲𑀸 𑀤𑀺𑀯𑀸 𑀤𑀺𑀯𑀲𑁆𑀲 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀢𑁂 𑀉𑀧𑀸𑀲𑀓𑁂 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄 𑀢𑀼𑀫𑁆𑀳𑁂, 𑀉𑀧𑀸𑀲𑀓𑀸, 𑀅𑀮𑁆𑀮𑀯𑀢𑁆𑀣𑀸 𑀅𑀮𑁆𑀮𑀓𑁂𑀲𑀸 𑀇𑀥𑀽𑀧𑀲𑀗𑁆𑀓𑀫𑀦𑁆𑀢𑀸 𑀤𑀺𑀯𑀸 𑀤𑀺𑀯𑀲𑁆𑀲𑀸’’𑀢𑀺?

𑀏𑀯𑀁 𑀯𑀼𑀢𑁆𑀢𑁂, 𑀲𑁄 𑀉𑀧𑀸𑀲𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀁 𑀔𑁄, 𑀪𑀦𑁆𑀢𑁂, 𑀏𑀓𑀧𑀼𑀢𑁆𑀢𑀓𑁄 𑀧𑀺𑀬𑁄 𑀫𑀦𑀸𑀧𑁄 𑀓𑀸𑀮𑀗𑁆𑀓𑀢𑁄. 𑀢𑁂𑀦 𑀫𑀬𑀁 𑀅𑀮𑁆𑀮𑀯𑀢𑁆𑀣𑀸 𑀅𑀮𑁆𑀮𑀓𑁂𑀲𑀸 𑀇𑀥𑀽𑀧𑀲𑀗𑁆𑀓𑀫𑀦𑁆𑀢𑀸 𑀤𑀺𑀯𑀸 𑀤𑀺𑀯𑀲𑁆𑀲𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀧𑀺𑀬𑀭𑀽𑀧𑀲𑁆𑀲𑀸𑀤𑀕𑀥𑀺𑀢𑀸𑀲𑁂 [𑀧𑀺𑀬𑀭𑀽𑀧𑀲𑁆𑀲𑀸𑀢𑀕𑀥𑀺𑀢𑀸𑀲𑁂 (𑀲𑀻. 𑀧𑀻.)],

𑀤𑁂𑀯𑀓𑀸𑀬𑀸 𑀧𑀼𑀣𑀼 𑀫𑀦𑀼𑀲𑁆𑀲𑀸 𑀘;

𑀅𑀖𑀸𑀯𑀺𑀦𑁄 𑀧𑀭𑀺𑀚𑀼𑀦𑁆𑀦𑀸,

𑀫𑀘𑁆𑀘𑀼𑀭𑀸𑀚𑀲𑁆𑀲 𑀯𑀲𑀁 𑀕𑀘𑁆𑀙𑀦𑁆𑀢𑀺.

‘‘𑀬𑁂 𑀯𑁂 𑀤𑀺𑀯𑀸 𑀘 𑀭𑀢𑁆𑀢𑁄 𑀘,

𑀅𑀧𑁆𑀧𑀫𑀢𑁆𑀢𑀸 𑀚𑀳𑀦𑁆𑀢𑀺 𑀧𑀺𑀬𑀭𑀽𑀧𑀁;

𑀢𑁂 𑀯𑁂 𑀔𑀡𑀦𑁆𑀢𑀺 𑀅𑀖𑀫𑀽𑀮𑀁,

𑀫𑀘𑁆𑀘𑀼𑀦𑁄 𑀆𑀫𑀺𑀲𑀁 𑀤𑀼𑀭𑀢𑀺𑀯𑀢𑁆𑀢’’𑀦𑁆𑀢𑀺. 𑀲𑀢𑁆𑀢𑀫𑀁;

𑁮. 𑀲𑀼𑀧𑁆𑀧𑀯𑀸𑀲𑀸𑀲𑀼𑀢𑁆𑀢𑀁

𑁧𑁮. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀼𑀡𑁆𑀟𑀺𑀓𑀸𑀬𑀁 [𑀓𑀼𑀡𑁆𑀟𑀺𑀬𑀸𑀬𑀁 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀳𑀭𑀢𑀺 𑀓𑀼𑀡𑁆𑀟𑀥𑀸𑀦𑀯𑀦𑁂 [𑀓𑀼𑀡𑁆𑀟𑀺𑀝𑁆𑀞𑀸𑀦𑀯𑀦𑁂 (𑀲𑁆𑀬𑀸. 𑀧𑀻.)]. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀕𑀩𑁆𑀪𑀁 𑀥𑀸𑀭𑁂𑀢𑀺. 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀸 𑀲𑀸 𑀤𑀼𑀓𑁆𑀔𑀸𑀳𑀺 𑀢𑀺𑀩𑁆𑀩𑀸𑀳𑀺 𑀔𑀭𑀸𑀳𑀺 𑀓𑀝𑀼𑀓𑀸𑀳𑀺 𑀯𑁂𑀤𑀦𑀸𑀳𑀺 𑀨𑀼𑀝𑁆𑀞𑀸 𑀢𑀻𑀳𑀺 𑀯𑀺𑀢𑀓𑁆𑀓𑁂𑀳𑀺 𑀅𑀥𑀺𑀯𑀸𑀲𑁂𑀢𑀺 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸 𑀬𑁄 𑀇𑀫𑀲𑁆𑀲 𑀏𑀯𑀭𑀽𑀧𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺; 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀯𑀢 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀬𑁄 𑀇𑀫𑀲𑁆𑀲 𑀏𑀯𑀭𑀽𑀧𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑁄; 𑀲𑀼𑀲𑀼𑀔𑀁 𑀯𑀢 𑀢𑀁 𑀦𑀺𑀩𑁆𑀩𑀸𑀦𑀁 𑀬𑀢𑁆𑀣𑀺𑀤𑀁 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀦 𑀲𑀁𑀯𑀺𑀚𑁆𑀚𑀢𑀻’’𑀢𑀺.

𑀅𑀣 𑀔𑁄 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑀲𑀸𑀫𑀺𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀅𑀬𑁆𑀬𑀧𑀼𑀢𑁆𑀢, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀸𑀳𑀺; 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙 𑁋 ‘𑀲𑀼𑀧𑁆𑀧𑀯𑀸𑀲𑀸, 𑀪𑀦𑁆𑀢𑁂, 𑀓𑁄𑀮𑀺𑀬𑀥𑀻𑀢𑀸 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺; 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀻’𑀢𑀺. 𑀏𑀯𑀜𑁆𑀘 𑀯𑀤𑁂𑀳𑀺 𑁋 ‘𑀲𑀼𑀧𑁆𑀧𑀯𑀸𑀲𑀸, 𑀪𑀦𑁆𑀢𑁂, 𑀓𑁄𑀮𑀺𑀬𑀥𑀻𑀢𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀕𑀩𑁆𑀪𑀁 𑀥𑀸𑀭𑁂𑀢𑀺. 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀸 𑀲𑀸 𑀤𑀼𑀓𑁆𑀔𑀸𑀳𑀺 𑀢𑀺𑀩𑁆𑀩𑀸𑀳𑀺 𑀔𑀭𑀸𑀳𑀺 𑀓𑀝𑀼𑀓𑀸𑀳𑀺 𑀯𑁂𑀤𑀦𑀸𑀳𑀺 𑀨𑀼𑀝𑁆𑀞𑀸 𑀢𑀻𑀳𑀺 𑀯𑀺𑀢𑀓𑁆𑀓𑁂𑀳𑀺 𑀅𑀥𑀺𑀯𑀸𑀲𑁂𑀢𑀺 𑁋 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸 𑀬𑁄 𑀇𑀫𑀲𑁆𑀲 𑀏𑀯𑀭𑀽𑀧𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺; 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀯𑀢 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀬𑁄 𑀇𑀫𑀲𑁆𑀲 𑀏𑀯𑀭𑀽𑀧𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑁄; 𑀲𑀼𑀲𑀼𑀔𑀁 𑀯𑀢 𑀢𑀁 𑀦𑀺𑀩𑁆𑀩𑀸𑀦𑀁 𑀬𑀢𑁆𑀣𑀺𑀤𑀁 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀦 𑀲𑀁𑀯𑀺𑀚𑁆𑀚𑀢𑀻’’’𑀢𑀺.

‘‘𑀧𑀭𑀫’’𑀦𑁆𑀢𑀺 𑀔𑁄 𑀲𑁄 𑀓𑁄𑀮𑀺𑀬𑀧𑀼𑀢𑁆𑀢𑁄 𑀲𑀼𑀧𑁆𑀧𑀯𑀸𑀲𑀸𑀬 𑀓𑁄𑀮𑀺𑀬𑀥𑀻𑀢𑀸𑀬 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀓𑁄𑀮𑀺𑀬𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀧𑁆𑀧𑀯𑀸𑀲𑀸, 𑀪𑀦𑁆𑀢𑁂, 𑀓𑁄𑀮𑀺𑀬𑀥𑀻𑀢𑀸 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀺; 𑀏𑀯𑀜𑁆𑀘 𑀯𑀤𑁂𑀢𑀺 𑁋 ‘𑀲𑀼𑀧𑁆𑀧𑀯𑀸𑀲𑀸, 𑀪𑀦𑁆𑀢𑁂, 𑀓𑁄𑀮𑀺𑀬𑀥𑀻𑀢𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀕𑀩𑁆𑀪𑀁 𑀥𑀸𑀭𑁂𑀢𑀺. 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀸 𑀲𑀸 𑀤𑀼𑀓𑁆𑀔𑀸𑀳𑀺 𑀢𑀺𑀩𑁆𑀩𑀸𑀳𑀺 𑀔𑀭𑀸𑀳𑀺 𑀓𑀝𑀼𑀓𑀸𑀳𑀺 𑀯𑁂𑀤𑀦𑀸𑀳𑀺 𑀨𑀼𑀝𑁆𑀞𑀸 𑀢𑀻𑀳𑀺 𑀯𑀺𑀢𑀓𑁆𑀓𑁂𑀳𑀺 𑀅𑀥𑀺𑀯𑀸𑀲𑁂𑀢𑀺 𑁋 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸 𑀬𑁄 𑀇𑀫𑀲𑁆𑀲 𑀏𑀯𑀭𑀽𑀧𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺; 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀯𑀢 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀬𑁄 𑀇𑀫𑀲𑁆𑀲 𑀏𑀯𑀭𑀽𑀧𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑁄; 𑀲𑀼𑀲𑀼𑀔𑀁 𑀯𑀢 𑀦𑀺𑀩𑁆𑀩𑀸𑀦𑀁 𑀬𑀢𑁆𑀣𑀺𑀤𑀁 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀦 𑀲𑀁𑀯𑀺𑀚𑁆𑀚𑀢𑀻’’’𑀢𑀺.

‘‘𑀲𑀼𑀔𑀺𑀦𑀻 𑀳𑁄𑀢𑀼 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸; 𑀅𑀭𑁄𑀕𑀸 𑀅𑀭𑁄𑀕𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀢𑀽’’𑀢𑀺. 𑀲𑀳 𑀯𑀘𑀦𑀸 𑀘 𑀧𑀦 𑀪𑀕𑀯𑀢𑁄 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑀲𑀼𑀔𑀺𑀦𑀻 𑀅𑀭𑁄𑀕𑀸 𑀅𑀭𑁄𑀕𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺.

‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀓𑁄𑀮𑀺𑀬𑀧𑀼𑀢𑁆𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀲𑀓𑀁 𑀖𑀭𑀁 𑀢𑁂𑀦 𑀧𑀘𑁆𑀘𑀸𑀬𑀸𑀲𑀺. 𑀅𑀤𑁆𑀤𑀲𑀸 𑀔𑁄 𑀲𑁄 𑀓𑁄𑀮𑀺𑀬𑀧𑀼𑀢𑁆𑀢𑁄 𑀲𑀼𑀧𑁆𑀧𑀯𑀸𑀲𑀁 𑀓𑁄𑀮𑀺𑀬𑀥𑀻𑀢𑀭𑀁 𑀲𑀼𑀔𑀺𑀦𑀺𑀁 𑀅𑀭𑁄𑀕𑀁 𑀅𑀭𑁄𑀕𑀁 𑀧𑀼𑀢𑁆𑀢𑀁 𑀯𑀺𑀚𑀸𑀢𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄, 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸, 𑀬𑀢𑁆𑀭 𑀳𑀺 𑀦𑀸𑀫𑀸𑀬𑀁 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑀲𑀳 𑀯𑀘𑀦𑀸 𑀘 𑀧𑀦 [𑀲𑀳 𑀯𑀘𑀦𑀸 𑀧𑀦 (𑀧𑀻.), 𑀲𑀳 𑀯𑀘𑀦𑀸 (?)] 𑀪𑀕𑀯𑀢𑁄 𑀲𑀼𑀔𑀺𑀦𑀻 𑀅𑀭𑁄𑀕𑀸 𑀅𑀭𑁄𑀕𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺𑀲𑁆𑀲𑀢𑀻’’𑀢𑀺! 𑀅𑀢𑁆𑀢𑀫𑀦𑁄 𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀅𑀳𑁄𑀲𑀺.

𑀅𑀣 𑀔𑁄 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑀲𑀸𑀫𑀺𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀅𑀬𑁆𑀬𑀧𑀼𑀢𑁆𑀢, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀸𑀳𑀺 𑁋 ‘𑀲𑀼𑀧𑁆𑀧𑀯𑀸𑀲𑀸, 𑀪𑀦𑁆𑀢𑁂, 𑀓𑁄𑀮𑀺𑀬𑀥𑀻𑀢𑀸 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’𑀢𑀺; 𑀏𑀯𑀜𑁆𑀘 𑀯𑀤𑁂𑀳𑀺 𑁋 ‘𑀲𑀼𑀧𑁆𑀧𑀯𑀸𑀲𑀸, 𑀪𑀦𑁆𑀢𑁂, 𑀓𑁄𑀮𑀺𑀬𑀥𑀻𑀢𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀕𑀩𑁆𑀪𑀁 𑀥𑀸𑀭𑁂𑀢𑀺. 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀸 𑀲𑀸 𑀏𑀢𑀭𑀳𑀺 𑀲𑀼𑀔𑀺𑀦𑀻 𑀅𑀭𑁄𑀕𑀸 𑀅𑀭𑁄𑀕𑀁 𑀧𑀼𑀢𑁆𑀢𑀁 𑀯𑀺𑀚𑀸𑀢𑀸. 𑀲𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑁂𑀢𑀺. 𑀅𑀥𑀺𑀯𑀸𑀲𑁂𑀢𑀼 𑀓𑀺𑀭, 𑀪𑀦𑁆𑀢𑁂, 𑀪𑀕𑀯𑀸 𑀲𑀼𑀧𑁆𑀧𑀯𑀸𑀲𑀸𑀬 𑀓𑁄𑀮𑀺𑀬𑀥𑀻𑀢𑀸𑀬 𑀲𑀢𑁆𑀢 𑀪𑀢𑁆𑀢𑀸𑀦𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’’𑀢𑀺.

‘‘𑀧𑀭𑀫’’𑀦𑁆𑀢𑀺 𑀔𑁄 𑀲𑁄 𑀓𑁄𑀮𑀺𑀬𑀧𑀼𑀢𑁆𑀢𑁄 𑀲𑀼𑀧𑁆𑀧𑀯𑀸𑀲𑀸𑀬 𑀓𑁄𑀮𑀺𑀬𑀥𑀻𑀢𑀸𑀬 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀓𑁄𑀮𑀺𑀬𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀼𑀧𑁆𑀧𑀯𑀸𑀲𑀸, 𑀪𑀦𑁆𑀢𑁂, 𑀓𑁄𑀮𑀺𑀬𑀥𑀻𑀢𑀸 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺; 𑀏𑀯𑀜𑁆𑀘 𑀯𑀤𑁂𑀢𑀺 𑁋 ‘𑀲𑀼𑀧𑁆𑀧𑀯𑀸𑀲𑀸, 𑀪𑀦𑁆𑀢𑁂, 𑀓𑁄𑀮𑀺𑀬𑀥𑀻𑀢𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀕𑀩𑁆𑀪𑀁 𑀥𑀸𑀭𑁂𑀢𑀺. 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀸 𑀲𑀸 𑀏𑀢𑀭𑀳𑀺 𑀲𑀼𑀔𑀺𑀦𑀻 𑀅𑀭𑁄𑀕𑀸 𑀅𑀭𑁄𑀕𑀁 𑀧𑀼𑀢𑁆𑀢𑀁 𑀯𑀺𑀚𑀸𑀢𑀸. 𑀲𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑁂𑀢𑀺. 𑀅𑀥𑀺𑀯𑀸𑀲𑁂𑀢𑀼 𑀓𑀺𑀭, 𑀪𑀦𑁆𑀢𑁂, 𑀪𑀕𑀯𑀸 𑀲𑀼𑀧𑁆𑀧𑀯𑀸𑀲𑀸𑀬 𑀓𑁄𑀮𑀺𑀬𑀥𑀻𑀢𑀸𑀬 𑀲𑀢𑁆𑀢 𑀪𑀢𑁆𑀢𑀸𑀦𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁂𑀦 𑀉𑀧𑀸𑀲𑀓𑁂𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑀺𑀢𑁄 𑀳𑁄𑀢𑀺. 𑀲𑁄 𑀘 𑀉𑀧𑀸𑀲𑀓𑁄 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 [𑀫𑀳𑀸𑀫𑁄𑀕𑁆𑀕𑀮𑀸𑀦𑀲𑁆𑀲 (𑀓.)] 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀬𑁂𑀦 𑀲𑁄 𑀉𑀧𑀸𑀲𑀓𑁄 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀉𑀧𑀸𑀲𑀓𑀁 𑀏𑀯𑀁 𑀯𑀤𑁂𑀳𑀺 𑁋 ‘𑀲𑀼𑀧𑁆𑀧𑀯𑀸𑀲𑀸, 𑀆𑀯𑀼𑀲𑁄, 𑀓𑁄𑀮𑀺𑀬𑀥𑀻𑀢𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀕𑀩𑁆𑀪𑀁 𑀥𑀸𑀭𑁂𑀲𑀺. 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀸 𑀲𑀸 𑀏𑀢𑀭𑀳𑀺 𑀲𑀼𑀔𑀺𑀦𑀻 𑀅𑀭𑁄𑀕𑀸 𑀅𑀭𑁄𑀕𑀁 𑀧𑀼𑀢𑁆𑀢𑀁 𑀯𑀺𑀚𑀸𑀢𑀸. 𑀲𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑁂𑀢𑀺. 𑀓𑀭𑁄𑀢𑀼 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑀲𑀢𑁆𑀢 𑀪𑀢𑁆𑀢𑀸𑀦𑀺, 𑀧𑀘𑁆𑀙𑀸 𑀢𑁆𑀯𑀁 𑀓𑀭𑀺𑀲𑁆𑀲𑀲𑀻’𑀢𑀺 [𑀓𑀭𑀺𑀲𑁆𑀲𑀲𑀻𑀢𑀺 𑀲𑀜𑁆𑀜𑀸𑀧𑁂𑀳𑀺 (𑀓.)]. 𑀢𑀼𑀬𑁆𑀳𑁂𑀲𑁄 𑀉𑀧𑀝𑁆𑀞𑀸𑀓𑁄’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑁄 𑀉𑀧𑀸𑀲𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀉𑀧𑀸𑀲𑀓𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀧𑁆𑀧𑀯𑀸𑀲𑀸, 𑀆𑀯𑀼𑀲𑁄, 𑀓𑁄𑀮𑀺𑀬𑀥𑀻𑀢𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀕𑀩𑁆𑀪𑀁 𑀥𑀸𑀭𑁂𑀢𑀺. 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀸 𑀲𑀸 𑀏𑀢𑀭𑀳𑀺 𑀲𑀼𑀔𑀺𑀦𑀻 𑀅𑀭𑁄𑀕𑀸 𑀅𑀭𑁄𑀕𑀁 𑀧𑀼𑀢𑁆𑀢𑀁 𑀯𑀺𑀚𑀸𑀢𑀸. 𑀲𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑁂𑀢𑀺. 𑀓𑀭𑁄𑀢𑀼 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑀲𑀢𑁆𑀢 𑀪𑀢𑁆𑀢𑀸𑀦𑀺, 𑀧𑀘𑁆𑀙𑀸 𑀢𑁆𑀯𑀁 𑀓𑀭𑀺𑀲𑁆𑀲𑀲𑀻’’𑀢𑀺.

‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀧𑀸𑀝𑀺𑀪𑁄𑀕𑁄 𑁋 𑀪𑁄𑀕𑀸𑀦𑀜𑁆𑀘 𑀚𑀻𑀯𑀺𑀢𑀲𑁆𑀲 𑀘 𑀲𑀤𑁆𑀥𑀸𑀬 𑀘, 𑀓𑀭𑁄𑀢𑀼 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑀲𑀢𑁆𑀢 𑀪𑀢𑁆𑀢𑀸𑀦𑀺, 𑀧𑀘𑁆𑀙𑀸𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀤𑁆𑀯𑀺𑀦𑁆𑀦𑀁 𑀔𑁄 𑀢𑁂 𑀅𑀳𑀁 [𑀤𑁆𑀯𑀺𑀦𑁆𑀦𑀁 𑀔𑁄 𑀢𑁂𑀲𑀁 (𑀧𑀻.), 𑀤𑁆𑀯𑀺𑀦𑁆𑀦𑀁 𑀔𑁄 𑀦𑁂𑀲𑀁 (𑀓.)], 𑀆𑀯𑀼𑀲𑁄, 𑀥𑀫𑁆𑀫𑀸𑀦𑀁 𑀧𑀸𑀝𑀺𑀪𑁄𑀕𑁄 𑁋 𑀪𑁄𑀕𑀸𑀦𑀜𑁆𑀘 𑀚𑀻𑀯𑀺𑀢𑀲𑁆𑀲 𑀘. 𑀲𑀤𑁆𑀥𑀸𑀬 𑀧𑀦 𑀢𑁆𑀯𑀁𑀬𑁂𑀯 𑀧𑀸𑀝𑀺𑀪𑁄𑀕𑁄’’𑀢𑀺.

‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑁆𑀯𑀺𑀦𑁆𑀦𑀁 𑀥𑀫𑁆𑀫𑀸𑀦𑀁 𑀧𑀸𑀝𑀺𑀪𑁄𑀕𑁄 𑁋 𑀪𑁄𑀕𑀸𑀦𑀜𑁆𑀘 𑀚𑀻𑀯𑀺𑀢𑀲𑁆𑀲 𑀘, 𑀓𑀭𑁄𑀢𑀼 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑀲𑀢𑁆𑀢 𑀪𑀢𑁆𑀢𑀸𑀦𑀺, 𑀧𑀘𑁆𑀙𑀸𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀉𑀧𑀸𑀲𑀓𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀜𑁆𑀜𑀢𑁆𑀢𑁄 [𑀲𑀜𑁆𑀜𑀸𑀢𑁄 (𑀲𑁆𑀬𑀸.)], 𑀪𑀦𑁆𑀢𑁂, 𑀲𑁄 𑀉𑀧𑀸𑀲𑀓𑁄 𑀫𑀬𑀸; 𑀓𑀭𑁄𑀢𑀼 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑀲𑀢𑁆𑀢 𑀪𑀢𑁆𑀢𑀸𑀦𑀺, 𑀧𑀘𑁆𑀙𑀸 𑀲𑁄 𑀓𑀭𑀺𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑀲𑀢𑁆𑀢𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺, 𑀢𑀜𑁆𑀘 𑀤𑀸𑀭𑀓𑀁 𑀪𑀕𑀯𑀦𑁆𑀢𑀁 𑀯𑀦𑁆𑀤𑀸𑀧𑁂𑀲𑀺 𑀲𑀩𑁆𑀩𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀁.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑀁 𑀤𑀸𑀭𑀓𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺 𑀢𑁂, 𑀤𑀸𑀭𑀓, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀦 𑀓𑀺𑀜𑁆𑀘𑀺 𑀤𑀼𑀓𑁆𑀔’’𑀦𑁆𑀢𑀺? ‘‘𑀓𑀼𑀢𑁄 𑀫𑁂, 𑀪𑀦𑁆𑀢𑁂 𑀲𑀸𑀭𑀺𑀧𑀼𑀢𑁆𑀢, 𑀔𑀫𑀦𑀻𑀬𑀁, 𑀓𑀼𑀢𑁄 𑀬𑀸𑀧𑀦𑀻𑀬𑀁! 𑀲𑀢𑁆𑀢 𑀫𑁂 𑀯𑀲𑁆𑀲𑀸𑀦𑀺 𑀮𑁄𑀳𑀺𑀢𑀓𑀼𑀫𑁆𑀪𑀺𑀬𑀁 𑀯𑀼𑀢𑁆𑀢𑀸𑀦𑀻’’𑀢𑀺.

𑀅𑀣 𑀔𑁄 𑀲𑀼𑀧𑁆𑀧𑀯𑀸𑀲𑀸 𑀓𑁄𑀮𑀺𑀬𑀥𑀻𑀢𑀸 𑁋 ‘‘𑀧𑀼𑀢𑁆𑀢𑁄 𑀫𑁂 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑀻’’𑀢𑀺 𑀅𑀢𑁆𑀢𑀫𑀦𑀸 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀅𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 (𑀲𑀼𑀧𑁆𑀧𑀯𑀸𑀲𑀁 𑀓𑁄𑀮𑀻𑀬𑀥𑀻𑀢𑀭𑀁 𑀅𑀢𑁆𑀢𑀫𑀦𑀁 𑀧𑀫𑀼𑀤𑀺𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀁 𑀯𑀺𑀤𑀺𑀢𑁆𑀯𑀸 [𑀤𑀺𑀲𑁆𑀯𑀸 (𑀲𑀻.)]) [( ) 𑀦𑀢𑁆𑀣𑀺 𑀇𑀗𑁆𑀕𑀮𑀺𑀲𑀧𑁄𑀢𑁆𑀣𑀓𑁂] 𑀲𑀼𑀧𑁆𑀧𑀯𑀸𑀲𑀁 𑀓𑁄𑀮𑀺𑀬𑀥𑀻𑀢𑀭𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑁂𑀬𑁆𑀬𑀸𑀲𑀺 𑀢𑁆𑀯𑀁, 𑀲𑀼𑀧𑁆𑀧𑀯𑀸𑀲𑁂, 𑀅𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀧𑀼𑀢𑁆𑀢’’𑀦𑁆𑀢𑀺? ‘‘𑀇𑀘𑁆𑀙𑁂𑀬𑁆𑀬𑀸𑀫𑀳𑀁, 𑀪𑀕𑀯𑀸, 𑀅𑀜𑁆𑀜𑀸𑀦𑀺𑀧𑀺 𑀏𑀯𑀭𑀽𑀧𑀸𑀦𑀺 𑀲𑀢𑁆𑀢 𑀧𑀼𑀢𑁆𑀢𑀸𑀦𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀅𑀲𑀸𑀢𑀁 𑀲𑀸𑀢𑀭𑀽𑀧𑁂𑀦, 𑀧𑀺𑀬𑀭𑀽𑀧𑁂𑀦 𑀅𑀧𑁆𑀧𑀺𑀬𑀁;

𑀤𑀼𑀓𑁆𑀔𑀁 𑀲𑀼𑀔𑀲𑁆𑀲 𑀭𑀽𑀧𑁂𑀦, 𑀧𑀫𑀢𑁆𑀢𑀫𑀢𑀺𑀯𑀢𑁆𑀢𑀢𑀻’’𑀢𑀺. 𑀅𑀝𑁆𑀞𑀫𑀁;

𑁯. 𑀯𑀺𑀲𑀸𑀔𑀸𑀲𑀼𑀢𑁆𑀢𑀁

𑁧𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀓𑁄𑀘𑀺𑀤𑁂𑀯 𑀅𑀢𑁆𑀣𑁄 𑀭𑀜𑁆𑀜𑁂 𑀧𑀲𑁂𑀦𑀤𑀺𑀫𑁆𑀳𑀺 𑀓𑁄𑀲𑀮𑁂 𑀧𑀝𑀺𑀩𑀤𑁆𑀥𑁄 [𑀧𑀝𑀺𑀩𑀦𑁆𑀥𑁄 (𑀧𑀻. 𑀓.)] 𑀳𑁄𑀢𑀺. 𑀢𑀁 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀦 𑀬𑀣𑀸𑀥𑀺𑀧𑁆𑀧𑀸𑀬𑀁 𑀢𑀻𑀭𑁂𑀢𑀺.

𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀤𑀺𑀯𑀸 𑀤𑀺𑀯𑀲𑁆𑀲 [𑀤𑀺𑀯𑀸𑀤𑀺𑀯𑀲𑁆𑀲𑁂𑀯 (𑀲𑁆𑀬𑀸.), 𑀤𑀺𑀯𑀸𑀤𑀺𑀯𑀲𑁆𑀲𑁂𑀬𑁂𑀯 (𑀧𑀻.), 𑀤𑀺𑀯𑀸 𑀤𑀺𑀯𑀲𑁆𑀲𑀬𑁂𑀯 (𑀓.)] 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀳𑀦𑁆𑀤 𑀓𑀼𑀢𑁄 𑀦𑀼 𑀢𑁆𑀯𑀁, 𑀯𑀺𑀲𑀸𑀔𑁂, 𑀆𑀕𑀘𑁆𑀙𑀲𑀺 𑀤𑀺𑀯𑀸 𑀤𑀺𑀯𑀲𑁆𑀲𑀸’’𑀢𑀺? ‘‘𑀇𑀥 𑀫𑁂, 𑀪𑀦𑁆𑀢𑁂, 𑀓𑁄𑀘𑀺𑀤𑁂𑀯 𑀅𑀢𑁆𑀣𑁄 𑀭𑀜𑁆𑀜𑁂 𑀧𑀲𑁂𑀦𑀤𑀺𑀫𑁆𑀳𑀺 𑀓𑁄𑀲𑀮𑁂 𑀧𑀝𑀺𑀩𑀤𑁆𑀥𑁄; 𑀢𑀁 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀦 𑀬𑀣𑀸𑀥𑀺𑀧𑁆𑀧𑀸𑀬𑀁 𑀢𑀻𑀭𑁂𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀩𑁆𑀩𑀁 𑀧𑀭𑀯𑀲𑀁 𑀤𑀼𑀓𑁆𑀔𑀁, 𑀲𑀩𑁆𑀩𑀁 𑀇𑀲𑁆𑀲𑀭𑀺𑀬𑀁 𑀲𑀼𑀔𑀁;

𑀲𑀸𑀥𑀸𑀭𑀡𑁂 𑀯𑀺𑀳𑀜𑁆𑀜𑀦𑁆𑀢𑀺, 𑀬𑁄𑀕𑀸 𑀳𑀺 𑀤𑀼𑀭𑀢𑀺𑀓𑁆𑀓𑀫𑀸’’𑀢𑀺. 𑀦𑀯𑀫𑀁;

𑁧𑁦. 𑀪𑀤𑁆𑀤𑀺𑀬𑀲𑀼𑀢𑁆𑀢𑀁

𑁨𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀅𑀦𑀼𑀧𑀺𑀬𑀸𑀬𑀁 𑀯𑀺𑀳𑀭𑀢𑀺 𑀅𑀫𑁆𑀩𑀯𑀦𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀓𑀸𑀴𑀻𑀕𑁄𑀥𑀸𑀬 𑀧𑀼𑀢𑁆𑀢𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺!

𑀅𑀲𑁆𑀲𑁄𑀲𑀼𑀁 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀪𑀤𑁆𑀤𑀺𑀬𑀲𑁆𑀲 𑀓𑀸𑀴𑀻𑀕𑁄𑀥𑀸𑀬 𑀧𑀼𑀢𑁆𑀢𑀲𑁆𑀲 𑀅𑀭𑀜𑁆𑀜𑀕𑀢𑀲𑁆𑀲𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑀲𑁆𑀲𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑀲𑁆𑀲𑀧𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑀲𑁆𑀲 𑁋 ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺! 𑀲𑀼𑀢𑁆𑀯𑀸𑀦 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄, 𑀆𑀯𑀼𑀲𑁄, 𑀆𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀓𑀸𑀴𑀻𑀕𑁄𑀥𑀸𑀬 𑀧𑀼𑀢𑁆𑀢𑁄 𑀅𑀦𑀪𑀺𑀭𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀬𑀁𑀲 𑀧𑀼𑀩𑁆𑀩𑁂 𑀅𑀕𑀸𑀭𑀺𑀬𑀪𑀽𑀢𑀲𑁆𑀲 [𑀅𑀕𑀸𑀭𑀺𑀓𑀪𑀽𑀢𑀲𑁆𑀲 (𑀲𑁆𑀬𑀸.)] 𑀭𑀚𑁆𑀚𑀲𑀼𑀔𑀁, 𑀲𑁄 𑀢𑀫𑀦𑀼𑀲𑁆𑀲𑀭𑀫𑀸𑀦𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’’𑀦𑁆𑀢𑀺!

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀆𑀬𑀲𑁆𑀫𑀸, 𑀪𑀦𑁆𑀢𑁂, 𑀪𑀤𑁆𑀤𑀺𑀬𑁄 𑀓𑀸𑀴𑀻𑀕𑁄𑀥𑀸𑀬 𑀧𑀼𑀢𑁆𑀢𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’𑀦𑁆𑀢𑀺! 𑀦𑀺𑀲𑁆𑀲𑀁𑀲𑀬𑀁 𑀔𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀓𑀸𑀴𑀻𑀕𑁄𑀥𑀸𑀬 𑀧𑀼𑀢𑁆𑀢𑁄 𑀅𑀦𑀪𑀺𑀭𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺. 𑀬𑀁𑀲 𑀧𑀼𑀩𑁆𑀩𑁂 𑀅𑀕𑀸𑀭𑀺𑀬𑀪𑀽𑀢𑀲𑁆𑀲 𑀭𑀚𑁆𑀚𑀲𑀼𑀔𑀁, 𑀲𑁄 𑀢𑀫𑀦𑀼𑀲𑁆𑀲𑀭𑀫𑀸𑀦𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’’𑀦𑁆𑀢𑀺!

𑀅𑀣 𑀔𑁄 𑀪𑀕𑀯𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀫 𑀯𑀘𑀦𑁂𑀦 𑀪𑀤𑁆𑀤𑀺𑀬𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀳𑀺 𑁋 ‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀪𑀤𑁆𑀤𑀺𑀬, 𑀆𑀫𑀦𑁆𑀢𑁂𑀢𑀻’’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀓𑀸𑀴𑀻𑀕𑁄𑀥𑀸𑀬 𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀤𑁆𑀤𑀺𑀬𑀁 𑀓𑀸𑀴𑀻𑀕𑁄𑀥𑀸𑀬 𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀪𑀤𑁆𑀤𑀺𑀬, 𑀆𑀫𑀦𑁆𑀢𑁂𑀢𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀓𑀸𑀴𑀻𑀕𑁄𑀥𑀸𑀬 𑀧𑀼𑀢𑁆𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀪𑀤𑁆𑀤𑀺𑀬𑀁 𑀓𑀸𑀴𑀻𑀕𑁄𑀥𑀸𑀬 𑀧𑀼𑀢𑁆𑀢𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀤𑁆𑀤𑀺𑀬, 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’’𑀦𑁆𑀢𑀺! ‘‘𑀏𑀯𑀁, 𑀪𑀦𑁆𑀢𑁂’’𑀢𑀺.

‘‘𑀓𑀺𑀁 𑀧𑀦 [𑀓𑀁 𑀧𑀦 (𑀲𑁆𑀬𑀸 𑀧𑀻.)] 𑀢𑁆𑀯𑀁, 𑀪𑀤𑁆𑀤𑀺𑀬, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’’𑀦𑁆𑀢𑀺! ‘‘𑀧𑀼𑀩𑁆𑀩𑁂 𑀫𑁂, 𑀪𑀦𑁆𑀢𑁂, 𑀅𑀕𑀸𑀭𑀺𑀬𑀪𑀽𑀢𑀲𑁆𑀲 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀲𑁆𑀲 𑀅𑀦𑁆𑀢𑁄𑀧𑀺 𑀅𑀦𑁆𑀢𑁂𑀧𑀼𑀭𑁂 𑀭𑀓𑁆𑀔𑀸 𑀲𑀼𑀲𑀁𑀯𑀺𑀳𑀺𑀢𑀸 𑀅𑀳𑁄𑀲𑀺, 𑀩𑀳𑀺𑀧𑀺 𑀅𑀦𑁆𑀢𑁂𑀧𑀼𑀭𑁂 𑀭𑀓𑁆𑀔𑀸 𑀲𑀼𑀲𑀁𑀯𑀺𑀳𑀺𑀢𑀸 𑀅𑀳𑁄𑀲𑀺, 𑀅𑀦𑁆𑀢𑁄𑀧𑀺 𑀦𑀕𑀭𑁂 𑀭𑀓𑁆𑀔𑀸 𑀲𑀼𑀲𑀁𑀯𑀺𑀳𑀺𑀢𑀸 𑀅𑀳𑁄𑀲𑀺, 𑀩𑀳𑀺𑀧𑀺 𑀦𑀕𑀭𑁂 𑀭𑀓𑁆𑀔𑀸 𑀲𑀼𑀲𑀁𑀯𑀺𑀳𑀺𑀢𑀸 𑀅𑀳𑁄𑀲𑀺, 𑀅𑀦𑁆𑀢𑁄𑀧𑀺 𑀚𑀦𑀧𑀤𑁂 𑀭𑀓𑁆𑀔𑀸 𑀲𑀼𑀲𑀁𑀯𑀺𑀳𑀺𑀢𑀸 𑀅𑀳𑁄𑀲𑀺, 𑀩𑀳𑀺𑀧𑀺 𑀚𑀦𑀧𑀤𑁂 𑀭𑀓𑁆𑀔𑀸 𑀲𑀼𑀲𑀁𑀯𑀺𑀳𑀺𑀢𑀸 𑀅𑀳𑁄𑀲𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀏𑀯𑀁 𑀭𑀓𑁆𑀔𑀺𑀢𑁄 𑀕𑁄𑀧𑀺𑀢𑁄 𑀲𑀦𑁆𑀢𑁄 𑀪𑀻𑀢𑁄 𑀉𑀩𑁆𑀩𑀺𑀕𑁆𑀕𑁄 𑀉𑀲𑁆𑀲𑀗𑁆𑀓𑀻 𑀉𑀢𑁆𑀭𑀸𑀲𑀻 𑀯𑀺𑀳𑀸𑀲𑀺𑀁. 𑀏𑀢𑀭𑀳𑀺 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀏𑀓𑁄 [𑀏𑀓𑀓𑁄 (𑀲𑁆𑀬𑀸. 𑀧𑀻.)] 𑀅𑀪𑀻𑀢𑁄 𑀅𑀦𑀼𑀩𑁆𑀩𑀺𑀕𑁆𑀕𑁄 𑀅𑀦𑀼𑀲𑁆𑀲𑀗𑁆𑀓𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀧𑀦𑁆𑀦𑀮𑁄𑀫𑁄 𑀧𑀭𑀤𑀢𑁆𑀢𑀯𑀼𑀢𑁆𑀢𑁄 [𑀧𑀭𑀤𑀯𑀼𑀢𑁆𑀢𑁄 (𑀓. 𑀲𑀻. 𑀲𑁆𑀬𑀸. 𑀧𑀻.)], 𑀫𑀺𑀕𑀪𑀽𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀸𑀫𑀺. 𑀇𑀫𑀁 [𑀇𑀤𑀁 (𑀲𑀻. 𑀓.)] 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 [𑀉𑀤𑀸𑀦𑁂𑀫𑀺 (𑀓.)] 𑁋 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’’𑀦𑁆𑀢𑀺!

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸,

𑀇𑀢𑀺𑀪𑀯𑀸𑀪𑀯𑀢𑀜𑁆𑀘 𑀯𑀻𑀢𑀺𑀯𑀢𑁆𑀢𑁄;

𑀢𑀁 𑀯𑀺𑀕𑀢𑀪𑀬𑀁 𑀲𑀼𑀔𑀺𑀁 𑀅𑀲𑁄𑀓𑀁,

𑀤𑁂𑀯𑀸 𑀦𑀸𑀦𑀼𑀪𑀯𑀦𑁆𑀢𑀺 𑀤𑀲𑁆𑀲𑀦𑀸𑀬𑀸’’𑀢𑀺. 𑀤𑀲𑀫𑀁;

𑀫𑀼𑀘𑀮𑀺𑀦𑁆𑀤𑀯𑀕𑁆𑀕𑁄 𑀤𑀼𑀢𑀺𑀬𑁄 𑀦𑀺𑀝𑁆𑀞𑀺𑀢𑁄.