𑁭. 𑀕𑀼𑀢𑁆𑀢𑀸𑀣𑁂𑀭𑀻𑀕𑀸𑀣𑀸

𑁧𑁬𑁩. ‘‘𑀕𑀼𑀢𑁆𑀢𑁂 𑀬𑀤𑀢𑁆𑀣𑀁 𑀧𑀩𑁆𑀩𑀚𑁆𑀚𑀸, 𑀳𑀺𑀢𑁆𑀯𑀸 𑀧𑀼𑀢𑁆𑀢𑀁 𑀯𑀲𑀼𑀁 𑀧𑀺𑀬𑀁;

𑀢𑀫𑁂𑀯 𑀅𑀦𑀼𑀩𑁆𑀭𑀽𑀳𑁂𑀳𑀺, 𑀫𑀸 𑀘𑀺𑀢𑁆𑀢𑀲𑁆𑀲 𑀯𑀲𑀁 𑀕𑀫𑀺.

𑁧𑁬𑁪. ‘‘𑀘𑀺𑀢𑁆𑀢𑁂𑀦 𑀯𑀜𑁆𑀘𑀺𑀢𑀸 𑀲𑀢𑁆𑀢𑀸, 𑀫𑀸𑀭𑀲𑁆𑀲 𑀯𑀺𑀲𑀬𑁂 𑀭𑀢𑀸;

𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀦𑁆𑀢𑀺 𑀅𑀯𑀺𑀤𑁆𑀤𑀲𑀽.

𑁧𑁬𑁫. ‘‘𑀓𑀸𑀫𑀘𑁆𑀙𑀦𑁆𑀤𑀜𑁆𑀘 𑀩𑁆𑀬𑀸𑀧𑀸𑀤𑀁, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀫𑁂𑀯 𑀘;

𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀁, 𑀯𑀺𑀘𑀺𑀓𑀺𑀘𑁆𑀙𑀜𑁆𑀘 𑀧𑀜𑁆𑀘𑀫𑀁.

𑁧𑁬𑁬. ‘‘𑀲𑀁𑀬𑁄𑀚𑀦𑀸𑀦𑀺 𑀏𑀢𑀸𑀦𑀺, 𑀧𑀚𑀳𑀺𑀢𑁆𑀯𑀸𑀦 𑀪𑀺𑀓𑁆𑀔𑀼𑀦𑀻;

𑀑𑀭𑀫𑁆𑀪𑀸𑀕𑀫𑀦𑀻𑀬𑀸𑀦𑀺, 𑀦𑀬𑀺𑀤𑀁 𑀧𑀼𑀦𑀭𑁂𑀳𑀺𑀲𑀺.

𑁧𑁬𑁭. ‘‘𑀭𑀸𑀕𑀁 𑀫𑀸𑀦𑀁 𑀅𑀯𑀺𑀚𑁆𑀚𑀜𑁆𑀘, 𑀉𑀤𑁆𑀥𑀘𑁆𑀘𑀜𑁆𑀘 𑀯𑀺𑀯𑀚𑁆𑀚𑀺𑀬;

𑀲𑀁𑀬𑁄𑀚𑀦𑀸𑀦𑀺 𑀙𑁂𑀢𑁆𑀯𑀸𑀦, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀲𑀺.

𑁧𑁬𑁮. ‘‘𑀔𑁂𑀧𑁂𑀢𑁆𑀯𑀸 𑀚𑀸𑀢𑀺𑀲𑀁𑀲𑀸𑀭𑀁, 𑀧𑀭𑀺𑀜𑁆𑀜𑀸𑀬 𑀧𑀼𑀦𑀩𑁆𑀪𑀯𑀁;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀘𑁆𑀙𑀸𑀢𑀸, 𑀉𑀧𑀲𑀦𑁆𑀢𑀸 𑀘𑀭𑀺𑀲𑁆𑀲𑀢𑀻’’𑀢𑀺.

… 𑀕𑀼𑀢𑁆𑀢𑀸 𑀣𑁂𑀭𑀻….