𑁫. 𑀦𑀦𑁆𑀤𑀼𑀢𑁆𑀢𑀭𑀸𑀣𑁂𑀭𑀻𑀕𑀸𑀣𑀸

𑁮𑁭. ‘‘𑀅𑀕𑁆𑀕𑀺𑀁 𑀘𑀦𑁆𑀤𑀜𑁆𑀘 𑀲𑀽𑀭𑀺𑀬𑀜𑁆𑀘, 𑀤𑁂𑀯𑀢𑀸 𑀘 𑀦𑀫𑀲𑁆𑀲𑀺𑀳𑀁;

𑀦𑀤𑀻𑀢𑀺𑀢𑁆𑀣𑀸𑀦𑀺 𑀕𑀦𑁆𑀢𑁆𑀯𑀸𑀦, 𑀉𑀤𑀓𑀁 𑀑𑀭𑀼𑀳𑀸𑀫𑀺𑀳𑀁.

𑁮𑁮. ‘‘𑀩𑀳𑀽𑀯𑀢𑀲𑀫𑀸𑀤𑀸𑀦𑀸, 𑀅𑀟𑁆𑀠𑀁 𑀲𑀻𑀲𑀲𑁆𑀲 𑀑𑀮𑀺𑀔𑀺𑀁;

𑀙𑀫𑀸𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺, 𑀭𑀢𑁆𑀢𑀺𑀁 𑀪𑀢𑁆𑀢𑀁 𑀦 𑀪𑀼𑀜𑁆𑀚𑀳𑀁.

𑁮𑁯. ‘‘𑀯𑀺𑀪𑀽𑀲𑀸𑀫𑀡𑁆𑀟𑀦𑀭𑀢𑀸, 𑀦𑁆𑀳𑀸𑀧𑀦𑀼𑀘𑁆𑀙𑀸𑀤𑀦𑁂𑀳𑀺 𑀘;

𑀉𑀧𑀓𑀸𑀲𑀺𑀁 𑀇𑀫𑀁 𑀓𑀸𑀬𑀁, 𑀓𑀸𑀫𑀭𑀸𑀕𑁂𑀦 𑀅𑀝𑁆𑀝𑀺𑀢𑀸.

𑁯𑁦. ‘‘𑀢𑀢𑁄 𑀲𑀤𑁆𑀥𑀁 𑀮𑀪𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀤𑀺𑀲𑁆𑀯𑀸 𑀓𑀸𑀬𑀁 𑀬𑀣𑀸𑀪𑀽𑀢𑀁, 𑀓𑀸𑀫𑀭𑀸𑀕𑁄 𑀲𑀫𑀽𑀳𑀢𑁄.

𑁯𑁧. ‘‘𑀲𑀩𑁆𑀩𑁂 𑀪𑀯𑀸 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀇𑀘𑁆𑀙𑀸 𑀘 𑀧𑀢𑁆𑀣𑀦𑀸𑀧𑀺 𑀘;

𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀸, 𑀲𑀦𑁆𑀢𑀺𑀁 𑀧𑀸𑀧𑀼𑀡𑀺 𑀘𑁂𑀢𑀲𑁄’’𑀢𑀺.

… 𑀦𑀦𑁆𑀤𑀼𑀢𑁆𑀢𑀭𑀸 𑀣𑁂𑀭𑀻….