𑁫. 𑀦𑀦𑁆𑀤𑀸𑀣𑁂𑀭𑀻𑀅𑀧𑀤𑀸𑀦𑀁

𑁧𑁬𑁬. ‘‘𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

𑁧𑁬𑁭. ‘‘𑀑𑀯𑀸𑀤𑀓𑁄 𑀯𑀺𑀜𑁆𑀜𑀸𑀧𑀓𑁄, 𑀢𑀸𑀭𑀓𑁄 𑀲𑀩𑁆𑀩𑀧𑀸𑀡𑀺𑀦𑀁;

𑀤𑁂𑀲𑀦𑀸𑀓𑀼𑀲𑀮𑁄 𑀩𑀼𑀤𑁆𑀥𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁧𑁬𑁮. ‘‘𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄, 𑀳𑀺𑀢𑁂𑀲𑀻 𑀲𑀩𑁆𑀩𑀧𑀸𑀡𑀺𑀦𑀁;

𑀲𑀫𑁆𑀧𑀢𑁆𑀢𑁂 𑀢𑀺𑀢𑁆𑀣𑀺𑀬𑁂 𑀲𑀩𑁆𑀩𑁂, 𑀧𑀜𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀧𑀺.

𑁧𑁬𑁯. ‘‘𑀏𑀯𑀁 𑀦𑀺𑀭𑀸𑀓𑀼𑀮𑀁 𑀆𑀲𑀺, 𑀲𑀼𑀜𑁆𑀜𑀢𑀁 𑀢𑀺𑀢𑁆𑀣𑀺𑀬𑁂𑀳𑀺 𑀘;

𑀯𑀺𑀘𑀺𑀢𑁆𑀢𑀁 𑀅𑀭𑀳𑀦𑁆𑀢𑁂𑀳𑀺, 𑀯𑀲𑀻𑀪𑀽𑀢𑁂𑀳𑀺 𑀢𑀸𑀤𑀺𑀪𑀺.

𑁧𑁭𑁦. ‘‘𑀭𑀢𑀦𑀸𑀦𑀝𑁆𑀞𑀧𑀜𑁆𑀜𑀸𑀲𑀁, 𑀉𑀕𑁆𑀕𑀢𑁄𑀯 𑀫𑀳𑀸𑀫𑀼𑀦𑀺;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀩𑀸𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄.

𑁧𑁭𑁧. ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁧𑁭𑁨. ‘‘𑀢𑀤𑀸𑀳𑀁 𑀳𑀁𑀲𑀯𑀢𑀺𑀬𑀁, 𑀚𑀸𑀢𑀸 𑀲𑁂𑀝𑁆𑀞𑀺𑀓𑀼𑀮𑁂 𑀅𑀳𑀼𑀁;

𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑁂, 𑀫𑀳𑀸𑀲𑀼𑀔𑀲𑀫𑀧𑁆𑀧𑀺𑀢𑀸.

𑁧𑁭𑁩. ‘‘𑀉𑀧𑁂𑀢𑁆𑀯𑀸 𑀢𑀁 𑀫𑀳𑀸𑀯𑀻𑀭𑀁, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀤𑁂𑀲𑀦𑀁;

𑀅𑀫𑀢𑀁 𑀧𑀭𑀫𑀲𑁆𑀲𑀸𑀤𑀁, 𑀧𑀭𑀫𑀢𑁆𑀣𑀦𑀺𑀯𑁂𑀤𑀓𑀁.

𑁧𑁭𑁪. ‘‘𑀢𑀤𑀸 𑀦𑀺𑀫𑀦𑁆𑀢𑀬𑀺𑀢𑁆𑀯𑀸𑀦, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁;

𑀤𑀢𑁆𑀯𑀸 𑀢𑀲𑁆𑀲 𑀫𑀳𑀸𑀤𑀸𑀦𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺.

𑁧𑁭𑁫. ‘‘𑀛𑀸𑀬𑀺𑀦𑀻𑀦𑀁 𑀪𑀺𑀓𑁆𑀔𑀼𑀦𑀻𑀦𑀁, 𑀅𑀕𑁆𑀕𑀝𑁆𑀞𑀸𑀦𑀫𑀧𑀢𑁆𑀣𑀬𑀺𑀁;

𑀦𑀺𑀧𑀘𑁆𑀘 𑀲𑀺𑀭𑀲𑀸 𑀥𑀻𑀭𑀁, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁.

𑁧𑁭𑁬. ‘‘𑀢𑀤𑀸 𑀅𑀤𑀦𑁆𑀢𑀤𑀫𑀓𑁄, 𑀢𑀺𑀮𑁄𑀓𑀲𑀭𑀡𑁄 𑀧𑀪𑀽;

𑀩𑁆𑀬𑀸𑀓𑀸𑀲𑀺 𑀦𑀭𑀲𑀸𑀭𑀣𑀺, ‘𑀮𑀘𑁆𑀙𑀲𑁂 𑀢𑀁 𑀲𑀼𑀧𑀢𑁆𑀣𑀺𑀢𑀁.

𑁧𑁭𑁭. ‘‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁭𑁮. ‘‘‘𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑀸, 𑀑𑀭𑀲𑀸 𑀥𑀫𑁆𑀫𑀦𑀺𑀫𑁆𑀫𑀺𑀢𑀸;

𑀦𑀦𑁆𑀤𑀸𑀢𑀺 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀺𑀓𑀸’.

𑁧𑁭𑁯. ‘‘𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑀸 𑀳𑀼𑀢𑁆𑀯𑀸, 𑀬𑀸𑀯𑀚𑀻𑀯𑀁 𑀢𑀤𑀸 𑀚𑀺𑀦𑀁;

𑀫𑁂𑀢𑁆𑀢𑀘𑀺𑀢𑁆𑀢𑀸 𑀧𑀭𑀺𑀘𑀭𑀺𑀁, 𑀧𑀘𑁆𑀘𑀬𑁂𑀳𑀺 𑀯𑀺𑀦𑀸𑀬𑀓𑀁.

𑁧𑁮𑁦. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁧𑁮𑁧. ‘‘𑀢𑀢𑁄 𑀘𑀼𑀢𑀸 𑀬𑀸𑀫𑀫𑀕𑀁, 𑀢𑀢𑁄𑀳𑀁 𑀢𑀼𑀲𑀺𑀢𑀁 𑀕𑀢𑀸 [𑀅𑀕𑀁 (𑀲𑀻. 𑀧𑀻. 𑀓.)];

𑀢𑀢𑁄 𑀘 𑀦𑀺𑀫𑁆𑀫𑀸𑀦𑀭𑀢𑀺𑀁, 𑀯𑀲𑀯𑀢𑁆𑀢𑀺𑀧𑀼𑀭𑀁 𑀢𑀢𑁄 [𑀕𑀢𑀸 (𑀲𑁆𑀬𑀸.)].

𑁧𑁮𑁨. ‘‘𑀬𑀢𑁆𑀣 𑀬𑀢𑁆𑀣𑀽𑀧𑀧𑀚𑁆𑀚𑀸𑀫𑀺, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸;

𑀢𑀢𑁆𑀣 𑀢𑀢𑁆𑀣𑁂𑀯 𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

𑁧𑁮𑁩. ‘‘𑀢𑀢𑁄 𑀘𑀼𑀢𑀸 𑀫𑀦𑀼𑀲𑁆𑀲𑀢𑁆𑀢𑁂, 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀦𑀁;

𑀫𑀡𑁆𑀟𑀮𑀻𑀦𑀜𑁆𑀘 𑀭𑀸𑀚𑀽𑀦𑀁, 𑀫𑀳𑁂𑀲𑀺𑀢𑁆𑀢𑀫𑀓𑀸𑀭𑀬𑀺𑀁.

𑁧𑁮𑁪. ‘‘𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑁆𑀯𑀸𑀦, 𑀤𑁂𑀯𑁂𑀲𑀼 𑀫𑀦𑀼𑀚𑁂𑀲𑀼 𑀘;

𑀲𑀩𑁆𑀩𑀢𑁆𑀣 𑀲𑀼𑀔𑀺𑀢𑀸 𑀳𑀼𑀢𑁆𑀯𑀸, 𑀦𑁂𑀓𑀓𑀧𑁆𑀧𑁂𑀲𑀼 𑀲𑀁𑀲𑀭𑀺𑀁.

𑁧𑁮𑁫. ‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀲𑀼𑀭𑀫𑁆𑀫𑁂 [𑀧𑀼𑀭𑀲𑁆𑀫𑀺𑀁 (𑀲𑁆𑀬𑀸.)] 𑀓𑀧𑀺𑀮𑀯𑁆𑀳𑀬𑁂;

𑀭𑀜𑁆𑀜𑁄 𑀲𑀼𑀤𑁆𑀥𑁄𑀤𑀦𑀲𑁆𑀲𑀸𑀳𑀁, 𑀥𑀻𑀢𑀸 𑀆𑀲𑀺𑀁 𑀅𑀦𑀺𑀦𑁆𑀤𑀺𑀢𑀸.

𑁧𑁮𑁬. ‘‘𑀲𑀺𑀭𑀺𑀬𑀸 [𑀲𑀺𑀭𑀺𑀁𑀯 (𑀲𑀻.), 𑀭𑀁𑀲𑀺𑀭𑀺𑀯 (𑀲𑁆𑀬𑀸.)] 𑀭𑀽𑀧𑀺𑀦𑀺𑀁 𑀤𑀺𑀲𑁆𑀯𑀸, 𑀦𑀦𑁆𑀤𑀺𑀢𑀁 𑀆𑀲𑀺 𑀢𑀁 𑀓𑀼𑀮𑀁;

𑀢𑁂𑀦 𑀦𑀦𑁆𑀤𑀸𑀢𑀺 𑀫𑁂 𑀦𑀸𑀫𑀁, 𑀲𑀼𑀦𑁆𑀤𑀭𑀁 𑀧𑀯𑀭𑀁 𑀅𑀳𑀼.

𑁧𑁮𑁭. ‘‘𑀬𑀼𑀯𑀢𑀻𑀦𑀜𑁆𑀘 𑀲𑀩𑁆𑀩𑀸𑀲𑀁, 𑀓𑀮𑁆𑀬𑀸𑀡𑀻𑀢𑀺 𑀘 𑀯𑀺𑀲𑁆𑀲𑀼𑀢𑀸;

𑀢𑀲𑁆𑀫𑀺𑀫𑁆𑀧𑀺 𑀦𑀕𑀭𑁂 𑀭𑀫𑁆𑀫𑁂, 𑀞𑀧𑁂𑀢𑁆𑀯𑀸 𑀢𑀁 𑀬𑀲𑁄𑀥𑀭𑀁.

𑁧𑁮𑁮. ‘‘𑀚𑁂𑀝𑁆𑀞𑁄 𑀪𑀸𑀢𑀸 𑀢𑀺𑀮𑁄𑀓𑀕𑁆𑀕𑁄, 𑀧𑀘𑁆𑀙𑀺𑀫𑁄 [𑀫𑀚𑁆𑀛𑀺𑀫𑁄 (𑀧𑀻.)] 𑀅𑀭𑀳𑀸 𑀢𑀣𑀸;

𑀏𑀓𑀸𑀓𑀺𑀦𑀻 𑀕𑀳𑀝𑁆𑀞𑀸𑀳𑀁, 𑀫𑀸𑀢𑀭𑀸 𑀧𑀭𑀺𑀘𑁄𑀤𑀺𑀢𑀸.

𑁧𑁮𑁯. ‘‘‘𑀲𑀸𑀓𑀺𑀬𑀫𑁆𑀳𑀺 𑀓𑀼𑀮𑁂 𑀚𑀸𑀢𑀸, 𑀧𑀼𑀢𑁆𑀢𑁂 𑀩𑀼𑀤𑁆𑀥𑀸𑀦𑀼𑀚𑀸 𑀢𑀼𑀯𑀁;

𑀦𑀦𑁆𑀤𑁂𑀦𑀧𑀺 𑀯𑀺𑀦𑀸 𑀪𑀽𑀢𑀸, 𑀅𑀕𑀸𑀭𑁂 𑀓𑀺𑀁 𑀦𑀼 𑀅𑀘𑁆𑀙𑀲𑀺.

𑁧𑁯𑁦. ‘‘‘𑀚𑀭𑀸𑀯𑀲𑀸𑀦𑀁 𑀬𑁄𑀩𑁆𑀩𑀜𑁆𑀜𑀁, 𑀭𑀽𑀧𑀁 𑀅𑀲𑀼𑀘𑀺𑀲𑀫𑁆𑀫𑀢𑀁;

𑀭𑁄𑀕𑀦𑁆𑀢𑀫𑀧𑀺𑀘𑀸𑀭𑁄𑀕𑁆𑀬𑀁, 𑀚𑀻𑀯𑀺𑀢𑀁 𑀫𑀭𑀡𑀦𑁆𑀢𑀺𑀓𑀁.

𑁧𑁯𑁧. ‘‘‘𑀇𑀤𑀫𑁆𑀧𑀺 𑀢𑁂 𑀲𑀼𑀪𑀁 𑀭𑀽𑀧𑀁, 𑀲𑀲𑀻𑀓𑀦𑁆𑀢𑀁 𑀫𑀦𑁄𑀳𑀭𑀁;

𑀪𑀽𑀲𑀦𑀸𑀦𑀁 𑀅𑀮𑀗𑁆𑀓𑀸𑀭𑀁, 𑀲𑀺𑀭𑀺𑀲𑀗𑁆𑀖𑀸𑀝𑀲𑀦𑁆𑀦𑀺𑀪𑀁.

𑁧𑁯𑁨. ‘‘‘𑀧𑀼𑀜𑁆𑀚𑀺𑀢𑀁 𑀮𑁄𑀓𑀲𑀸𑀭𑀁𑀯, 𑀦𑀬𑀦𑀸𑀦𑀁 𑀭𑀲𑀸𑀬𑀦𑀁;

𑀧𑀼𑀜𑁆𑀜𑀸𑀦𑀁 𑀓𑀺𑀢𑁆𑀢𑀺𑀚𑀦𑀦𑀁, 𑀉𑀓𑁆𑀓𑀸𑀓𑀓𑀼𑀮𑀦𑀦𑁆𑀤𑀦𑀁.

𑁧𑁯𑁩. ‘‘‘𑀦 𑀘𑀺𑀭𑁂𑀦𑁂𑀯 𑀓𑀸𑀮𑁂𑀦, 𑀚𑀭𑀸 𑀲𑀫𑀥𑀺𑀲𑁂𑀲𑁆𑀲𑀢𑀺 [𑀲𑀫𑀪𑀺𑀪𑁄𑀲𑁆𑀲𑀢𑀺 (𑀲𑀻. 𑀲𑁆𑀬𑀸.), 𑀲𑀫𑀥𑀺𑀳𑁂𑀲𑁆𑀲𑀢𑀺 (𑀧𑀻.)];

𑀯𑀺𑀳𑀸𑀬 𑀕𑁂𑀳𑀁 𑀓𑀸𑀭𑀼𑀜𑁆𑀜𑁂 [𑀓𑀸𑀭𑀼𑀜𑁆𑀜𑁂 (𑀲𑀻. 𑀧𑀻.), 𑀧𑀸𑀭𑀬𑁆𑀳𑀺𑀁 (𑀲𑁆𑀬𑀸.)], 𑀘𑀭 𑀥𑀫𑁆𑀫𑀫𑀦𑀺𑀦𑁆𑀤𑀺𑀢𑁂’.

𑁧𑁯𑁪. ‘‘𑀲𑀼𑀢𑁆𑀯𑀸𑀳𑀁 𑀫𑀸𑀢𑀼 𑀯𑀘𑀦𑀁, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀤𑁂𑀳𑁂𑀦 𑀦 𑀢𑀼 𑀘𑀺𑀢𑁆𑀢𑁂𑀦, 𑀭𑀽𑀧𑀬𑁄𑀩𑁆𑀩𑀦𑀮𑀸𑀴𑀺𑀢𑀸.

𑁧𑁯𑁫. ‘‘𑀫𑀳𑀢𑀸 𑀘 𑀧𑀬𑀢𑁆𑀢𑁂𑀦, 𑀛𑀸𑀦𑀚𑁆𑀛𑁂𑀦 𑀧𑀭𑀁 𑀫𑀫;

𑀓𑀸𑀢𑀼𑀜𑁆𑀘 𑀯𑀤𑀢𑁂 𑀫𑀸𑀢𑀸, 𑀦 𑀘𑀸𑀳𑀁 𑀢𑀢𑁆𑀣 𑀉𑀲𑁆𑀲𑀼𑀓𑀸.

𑁧𑁯𑁬. ‘‘𑀢𑀢𑁄 𑀫𑀳𑀸𑀓𑀸𑀭𑀼𑀡𑀺𑀓𑁄, 𑀤𑀺𑀲𑁆𑀯𑀸 𑀫𑀁 𑀓𑀸𑀫𑀮𑀸𑀮𑀲𑀁 [𑀓𑀫𑀮𑀸𑀦𑀦𑀁 (𑀲𑁆𑀬𑀸.)];

𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀁 𑀭𑀽𑀧𑀲𑁆𑀫𑀺𑀁, 𑀫𑀫 𑀘𑀓𑁆𑀔𑀼𑀧𑀣𑁂 𑀚𑀺𑀦𑁄.

𑁧𑁯𑁭. ‘‘𑀲𑀓𑁂𑀦 𑀆𑀦𑀼𑀪𑀸𑀯𑁂𑀦, 𑀇𑀢𑁆𑀣𑀺𑀁 𑀫𑀸𑀧𑁂𑀲𑀺 𑀲𑁄𑀪𑀺𑀦𑀺𑀁;

𑀤𑀲𑁆𑀲𑀦𑀻𑀬𑀁 𑀲𑀼𑀭𑀼𑀘𑀺𑀭𑀁, 𑀫𑀫𑀢𑁄𑀧𑀺 𑀲𑀼𑀭𑀽𑀧𑀺𑀦𑀺𑀁.

𑁧𑁯𑁮. ‘‘𑀢𑀫𑀳𑀁 𑀯𑀺𑀫𑁆𑀳𑀺𑀢𑀸 𑀤𑀺𑀲𑁆𑀯𑀸, 𑀅𑀢𑀺𑀯𑀺𑀫𑁆𑀳𑀺𑀢𑀤𑁂𑀳𑀺𑀦𑀺𑀁;

𑀘𑀺𑀦𑁆𑀢𑀬𑀺𑀁 𑀲𑀨𑀮𑀁 𑀫𑁂𑀢𑀺, 𑀦𑁂𑀢𑁆𑀢𑀮𑀸𑀪𑀜𑁆𑀘 𑀫𑀸𑀦𑀼𑀲𑀁.

𑁧𑁯𑁯. ‘‘𑀢𑀫𑀳𑀁 𑀏𑀳𑀺 𑀲𑀼𑀪𑀕𑁂, 𑀬𑁂𑀦𑀢𑁆𑀣𑁄 𑀢𑀁 𑀯𑀤𑁂𑀳𑀺 𑀫𑁂;

𑀓𑀼𑀮𑀁 𑀢𑁂 𑀦𑀸𑀫𑀕𑁄𑀢𑁆𑀢𑀜𑁆𑀘, 𑀯𑀤 𑀫𑁂 𑀬𑀤𑀺 𑀢𑁂 𑀧𑀺𑀬𑀁.

𑁨𑁦𑁦. ‘𑀦 𑀯𑀜𑁆𑀘𑀓𑀸𑀮𑁄 𑀲𑀼𑀪𑀕𑁂 [𑀧𑀜𑁆𑀳𑀓𑀸𑀮𑁄 𑀲𑀼𑀪𑀡𑁂 (𑀲𑀻. 𑀲𑁆𑀬𑀸. 𑀧𑀻.)], 𑀉𑀘𑁆𑀙𑀗𑁆𑀕𑁂 𑀫𑀁 𑀦𑀺𑀯𑀸𑀲𑀬;

𑀲𑀻𑀤𑀦𑁆𑀢𑀻𑀯 𑀫𑀫𑀗𑁆𑀕𑀸𑀦𑀺, 𑀧𑀲𑀼𑀧𑁆𑀧𑀬 𑀫𑀼𑀳𑀼𑀢𑁆𑀢𑀓𑀁’.

𑁨𑁦𑁧. ‘‘𑀢𑀢𑁄 𑀲𑀻𑀲𑀁 𑀫𑀫𑀗𑁆𑀓𑁂 𑀲𑀸, 𑀓𑀢𑁆𑀯𑀸 𑀲𑀬𑀺 𑀲𑀼𑀮𑁄𑀘𑀦𑀸;

𑀢𑀲𑁆𑀲𑀸 𑀦𑀮𑀸𑀝𑁂 𑀧𑀢𑀺𑀢𑀸, 𑀮𑀼𑀤𑁆𑀥𑀸 [𑀮𑀽𑀢𑀸 (𑀲𑁆𑀬𑀸.)] 𑀧𑀭𑀫𑀤𑀸𑀭𑀼𑀡𑀸.

𑁨𑁦𑁨. ‘‘𑀲𑀳 𑀢𑀲𑁆𑀲𑀸 𑀦𑀺𑀧𑀸𑀢𑁂𑀦, 𑀧𑀺𑀴𑀓𑀸 𑀉𑀧𑀧𑀚𑁆𑀚𑀣;

𑀧𑀕𑁆𑀖𑀭𑀺𑀁𑀲𑀼 𑀧𑀪𑀺𑀦𑁆𑀦𑀸 𑀘, 𑀓𑀼𑀡𑀧𑀸 𑀧𑀼𑀩𑁆𑀩𑀮𑁄𑀳𑀺𑀢𑀸.

𑁨𑁦𑁩. ‘‘𑀧𑀪𑀺𑀦𑁆𑀦𑀁 𑀯𑀤𑀦𑀜𑁆𑀘𑀸𑀧𑀺, 𑀓𑀼𑀡𑀧𑀁 𑀧𑀽𑀢𑀺𑀕𑀦𑁆𑀥𑀦𑀁;

𑀉𑀤𑁆𑀥𑀼𑀫𑀸𑀢𑀁 𑀯𑀺𑀦𑀺𑀮𑀜𑁆𑀘, 𑀧𑀼𑀩𑁆𑀩𑀜𑁆𑀘𑀸𑀧𑀺 𑀲𑀭𑀻𑀭𑀓𑀁.

𑁨𑁦𑁪. ‘‘𑀲𑀸 𑀧𑀯𑁂𑀤𑀺𑀢𑀲𑀩𑁆𑀩𑀗𑁆𑀕𑀻, 𑀦𑀺𑀲𑁆𑀲𑀲𑀦𑁆𑀢𑀻 𑀫𑀼𑀳𑀼𑀁 𑀫𑀼𑀳𑀼𑀁;

𑀯𑁂𑀤𑀬𑀦𑁆𑀢𑀻 𑀲𑀓𑀁 𑀤𑀼𑀓𑁆𑀔𑀁, 𑀓𑀭𑀼𑀡𑀁 𑀧𑀭𑀺𑀤𑁂𑀯𑀬𑀺.

𑁨𑁦𑁫. ‘‘‘𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑀸 𑀳𑁄𑀫𑀺, 𑀨𑀼𑀲𑀬𑀦𑁆𑀢𑀺 𑀘 𑀯𑁂𑀤𑀦𑀸;

𑀫𑀳𑀸𑀤𑀼𑀓𑁆𑀔𑁂 𑀦𑀺𑀫𑀼𑀕𑁆𑀕𑀫𑁆𑀳𑀺, 𑀲𑀭𑀡𑀁 𑀳𑁄𑀳𑀺 𑀫𑁂 𑀲𑀔𑀻’.

𑁨𑁦𑁬. ‘‘‘𑀓𑀼𑀳𑀺𑀁 𑀯𑀤𑀦𑀲𑁄𑀪𑀁 𑀢𑁂, 𑀓𑀼𑀳𑀺𑀁 𑀢𑁂 𑀢𑀼𑀗𑁆𑀕𑀦𑀸𑀲𑀺𑀓𑀸;

𑀢𑀫𑁆𑀩𑀩𑀺𑀫𑁆𑀩𑀯𑀭𑁄𑀝𑁆𑀞𑀁 𑀢𑁂, 𑀯𑀤𑀦𑀁 𑀢𑁂 𑀓𑀼𑀳𑀺𑀁 𑀕𑀢𑀁.

𑁨𑁦𑁭. ‘‘‘𑀓𑀼𑀳𑀺𑀁 𑀲𑀲𑀻𑀦𑀺𑀪𑀁 𑀯𑀡𑁆𑀡𑀁, 𑀓𑀫𑁆𑀩𑀼𑀕𑀻𑀯𑀸 𑀓𑀼𑀳𑀺𑀁 𑀕𑀢𑀸;

𑀤𑁄𑀴𑀸𑀮𑁄𑀮𑀸𑀯 [𑀤𑀸𑀫𑀸𑀫𑀸𑀮𑀜𑁆𑀘 (𑀲𑁆𑀬𑀸.), 𑀤𑁄𑀮𑁄𑀮𑀼𑀮𑁆𑀮𑀸𑀯 (𑀓.)] 𑀢𑁂 𑀓𑀡𑁆𑀡𑀸, 𑀯𑁂𑀯𑀡𑁆𑀡𑀁 𑀲𑀫𑀼𑀧𑀸𑀕𑀢𑀸.

𑁨𑁦𑁮. ‘‘‘𑀫𑀓𑀼𑀴𑀔𑀸𑀭𑀓𑀸𑀓𑀸𑀭𑀸 [𑀫𑀓𑀼𑀮𑀫𑁆𑀩𑀼𑀭𑀽𑀳𑀸𑀓𑀸𑀭𑀸 (𑀲𑀻.), 𑀫𑀓𑀼𑀴𑀧𑀤𑀼𑀫𑀸𑀓𑀸𑀭𑀸 (𑀲𑁆𑀬𑀸.)], 𑀓𑀮𑀺𑀓𑀸𑀯 [𑀓𑀮𑀲𑀸𑀯 (𑀲𑀻. 𑀲𑁆𑀬𑀸. 𑀧𑀻.)] 𑀧𑀬𑁄𑀥𑀭𑀸;

𑀧𑀪𑀺𑀦𑁆𑀦𑀸 𑀧𑀽𑀢𑀺𑀓𑀼𑀡𑀧𑀸, 𑀤𑀼𑀝𑁆𑀞𑀕𑀦𑁆𑀥𑀺𑀢𑁆𑀢𑀫𑀸𑀕𑀢𑀸.

𑁨𑁦𑁯. ‘‘‘𑀯𑁂𑀤𑀺𑀫𑀚𑁆𑀛𑀸𑀯 𑀲𑀼𑀲𑁆𑀲𑁄𑀡𑀻 [𑀢𑀦𑀼𑀫𑀚𑁆𑀛𑀸 𑀧𑀼𑀣𑀼𑀲𑁆𑀲𑁄𑀡𑀻 (𑀲𑀻. 𑀲𑁆𑀬𑀸.), 𑀯𑁂𑀤𑀺𑀫𑀚𑁆𑀛𑀸 𑀧𑀼𑀣𑀼𑀲𑁆𑀲𑁄𑀡𑀻 (𑀧𑀻.)], 𑀲𑀽𑀦𑀸𑀯 𑀦𑀻𑀢𑀓𑀺𑀩𑁆𑀩𑀺𑀲𑀸;

𑀚𑀸𑀢𑀸 𑀅𑀫𑁂𑀚𑁆𑀛𑀪𑀭𑀺𑀢𑀸, 𑀅𑀳𑁄 𑀭𑀽𑀧𑀫𑀲𑀲𑁆𑀲𑀢𑀁.

𑁨𑁧𑁦. ‘‘‘𑀲𑀩𑁆𑀩𑀁 𑀲𑀭𑀻𑀭𑀲𑀜𑁆𑀚𑀸𑀢𑀁, 𑀧𑀽𑀢𑀺𑀕𑀦𑁆𑀥𑀁 𑀪𑀬𑀸𑀦𑀓𑀁;

𑀲𑀼𑀲𑀸𑀦𑀫𑀺𑀯 𑀩𑀻𑀪𑀘𑁆𑀙𑀁, 𑀭𑀫𑀦𑁆𑀢𑁂 𑀬𑀢𑁆𑀣 𑀩𑀸𑀮𑀺𑀲𑀸’.

𑁨𑁧𑁧. ‘‘𑀢𑀤𑀸 𑀫𑀳𑀸𑀓𑀸𑀭𑀼𑀡𑀺𑀓𑁄, 𑀪𑀸𑀢𑀸 𑀫𑁂 𑀮𑁄𑀓𑀦𑀸𑀬𑀓𑁄;

𑀤𑀺𑀲𑁆𑀯𑀸 𑀲𑀁𑀯𑀺𑀕𑁆𑀕𑀘𑀺𑀢𑁆𑀢𑀁 𑀫𑀁, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁨𑁧𑁨. ‘‘‘𑀆𑀢𑀼𑀭𑀁 𑀓𑀼𑀡𑀧𑀁 𑀧𑀽𑀢𑀺𑀁, 𑀧𑀲𑁆𑀲 𑀦𑀦𑁆𑀤𑁂 𑀲𑀫𑀼𑀲𑁆𑀲𑀬𑀁;

𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁.

𑁨𑁧𑁩. ‘‘‘𑀬𑀣𑀸 𑀇𑀤𑀁 𑀢𑀣𑀸 𑀏𑀢𑀁, 𑀬𑀣𑀸 𑀏𑀢𑀁 𑀢𑀣𑀸 𑀇𑀤𑀁;

𑀤𑀼𑀕𑁆𑀕𑀦𑁆𑀥𑀁 𑀧𑀽𑀢𑀺𑀓𑀁 𑀯𑀸𑀢𑀺, 𑀩𑀸𑀮𑀸𑀦𑀁 𑀅𑀪𑀺𑀦𑀦𑁆𑀤𑀺𑀢𑀁.

𑁨𑁧𑁪. ‘‘‘𑀏𑀯𑀫𑁂𑀢𑀁 𑀅𑀯𑁂𑀓𑁆𑀔𑀦𑁆𑀢𑀻, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀸;

𑀢𑀢𑁄 𑀲𑀓𑀸𑀬 𑀧𑀜𑁆𑀜𑀸𑀬, 𑀅𑀪𑀺𑀦𑀺𑀩𑁆𑀩𑀺𑀚𑁆𑀛 𑀤𑀓𑁆𑀔𑀲𑀺’.

𑁨𑁧𑁫. ‘‘𑀢𑀢𑁄𑀳𑀁 𑀅𑀢𑀺𑀲𑀁𑀯𑀺𑀕𑁆𑀕𑀸, 𑀲𑀼𑀢𑁆𑀯𑀸 𑀕𑀸𑀣𑀸 𑀲𑀼𑀪𑀸𑀲𑀺𑀢𑀸;

𑀢𑀢𑁆𑀭𑀝𑁆𑀞𑀺𑀢𑀸𑀯𑀳𑀁 𑀲𑀦𑁆𑀢𑀻, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁨𑁧𑁬. ‘‘𑀬𑀢𑁆𑀣 𑀬𑀢𑁆𑀣 𑀦𑀺𑀲𑀺𑀦𑁆𑀦𑀸𑀳𑀁, 𑀲𑀤𑀸 𑀛𑀸𑀦𑀧𑀭𑀸𑀬𑀦𑀸;

𑀚𑀺𑀦𑁄 𑀢𑀲𑁆𑀫𑀺𑀁 𑀕𑀼𑀡𑁂 𑀢𑀼𑀝𑁆𑀞𑁄, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑁨𑁧𑁭. ‘‘𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁…𑀧𑁂… 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑁨𑁧𑁮. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁨𑁧𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀚𑀦𑀧𑀤𑀓𑀮𑁆𑀬𑀸𑀡𑀻 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀦𑀦𑁆𑀤𑀸𑀣𑁂𑀭𑀺𑀬𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.