𑁯. 𑀉𑀧𑁆𑀧𑀮𑀯𑀡𑁆𑀡𑀸𑀣𑁂𑀭𑀻𑀅𑀧𑀤𑀸𑀦𑀁

𑁩𑁮𑁪. ‘‘𑀪𑀺𑀓𑁆𑀔𑀼𑀦𑀻 𑀉𑀧𑁆𑀧𑀮𑀯𑀡𑁆𑀡𑀸, 𑀇𑀤𑁆𑀥𑀺𑀬𑀸 𑀧𑀸𑀭𑀫𑀺𑀁 𑀕𑀢𑀸;

𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁩𑁮𑁫. ‘‘‘𑀦𑀺𑀢𑁆𑀣𑀺𑀡𑁆𑀡𑀸 𑀚𑀸𑀢𑀺𑀲𑀁𑀲𑀸𑀭𑀁 [𑀚𑀸𑀢𑀺𑀲𑀁𑀲𑀸𑀭𑀸 (𑀧𑀻.)], 𑀧𑀢𑁆𑀢𑀸𑀳𑀁 𑀅𑀘𑀮𑀁 𑀧𑀤𑀁;

𑀲𑀩𑁆𑀩𑀤𑀼𑀓𑁆𑀔𑀁 𑀫𑀬𑀸 𑀔𑀻𑀡𑀁, 𑀆𑀭𑁄𑀘𑁂𑀫𑀺 𑀫𑀳𑀸𑀫𑀼𑀦𑀺.

𑁩𑁮𑁬. ‘‘‘𑀬𑀸𑀯𑀢𑀸 𑀧𑀭𑀺𑀲𑀸 𑀅𑀢𑁆𑀣𑀺, 𑀧𑀲𑀦𑁆𑀦𑀸 𑀚𑀺𑀦𑀲𑀸𑀲𑀦𑁂;

𑀬𑀲𑁆𑀲𑀸 𑀘 𑀫𑁂𑀧𑀭𑀸𑀥𑁄𑀢𑁆𑀣𑀺, 𑀔𑀫𑀦𑁆𑀢𑀼 𑀚𑀺𑀦𑀲𑀫𑁆𑀫𑀼𑀔𑀸.

𑁩𑁮𑁭. ‘‘‘𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑀺𑀬𑀸 [𑀲𑀁𑀲𑀭𑀦𑁆𑀢𑀸 𑀫𑁂 (𑀲𑁆𑀬𑀸.)], 𑀔𑀮𑀺𑀢𑀁 𑀫𑁂 𑀲𑀘𑁂 𑀪𑀯𑁂;

𑀆𑀭𑁄𑀘𑁂𑀫𑀺 𑀫𑀳𑀸𑀯𑀻𑀭, 𑀅𑀧𑀭𑀸𑀥𑀁 𑀔𑀫𑀲𑁆𑀲𑀼 𑀢𑀁 [𑀫𑁂 (𑀲𑁆𑀬𑀸.)].

𑁩𑁮𑁮. ‘‘‘𑀇𑀤𑁆𑀥𑀺𑀜𑁆𑀘𑀸𑀧𑀺 𑀦𑀺𑀤𑀲𑁆𑀲𑁂𑀳𑀺, 𑀫𑀫 𑀲𑀸𑀲𑀦𑀓𑀸𑀭𑀺𑀓𑁂;

𑀘𑀢𑀲𑁆𑀲𑁄 𑀧𑀭𑀺𑀲𑀸 𑀅𑀚𑁆𑀚, 𑀓𑀗𑁆𑀔𑀁 𑀙𑀺𑀦𑁆𑀤𑀸𑀳𑀺 𑀬𑀸𑀯𑀢𑀸.

𑁩𑁮𑁯. ‘‘‘𑀥𑀻𑀢𑀸 𑀢𑀼𑀬𑁆𑀳𑀁 𑀫𑀳𑀸𑀯𑀻𑀭, 𑀧𑀜𑁆𑀜𑀯𑀦𑁆𑀢 𑀚𑀼𑀢𑀺𑀦𑁆𑀥𑀭;

𑀩𑀳𑀼𑀜𑁆𑀘 𑀤𑀼𑀓𑁆𑀓𑀭𑀁 𑀓𑀫𑁆𑀫𑀁, 𑀓𑀢𑀁 𑀫𑁂 𑀅𑀢𑀺𑀤𑀼𑀓𑁆𑀓𑀭𑀁.

𑁩𑁯𑁦. ‘‘‘𑀉𑀧𑁆𑀧𑀮𑀲𑁆𑀲𑁂𑀯 𑀫𑁂 𑀯𑀡𑁆𑀡𑁄, 𑀦𑀸𑀫𑁂𑀦𑀼𑀧𑁆𑀧𑀮𑀦𑀸𑀫𑀺𑀓𑀸;

𑀲𑀸𑀯𑀺𑀓𑀸 𑀢𑁂 𑀫𑀳𑀸𑀯𑀻𑀭, 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀘𑀓𑁆𑀔𑀼𑀫.

𑁩𑁯𑁧. ‘‘‘𑀭𑀸𑀳𑀼𑀮𑁄 𑀘 𑀅𑀳𑀜𑁆𑀘𑁂𑀯, 𑀦𑁂𑀓𑀚𑀸𑀢𑀺𑀲𑀢𑁂 𑀩𑀳𑀽;

𑀏𑀓𑀲𑁆𑀫𑀺𑀁 𑀲𑀫𑁆𑀪𑀯𑁂 𑀚𑀸𑀢𑀸, 𑀲𑀫𑀸𑀦𑀙𑀦𑁆𑀤𑀫𑀸𑀦𑀲𑀸.

𑁩𑁯𑁨. ‘‘‘𑀦𑀺𑀩𑁆𑀩𑀢𑁆𑀢𑀺 𑀏𑀓𑀢𑁄 𑀳𑁄𑀢𑀺, 𑀚𑀸𑀢𑀺𑀬𑀸𑀧𑀺 𑀘 𑀏𑀓𑀢𑁄 [𑀚𑀸𑀢𑀻𑀲𑀼 𑀩𑀳𑀼𑀲𑁄 𑀫𑀫 (𑀲𑀻.)];

𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀉𑀪𑁄𑀧𑀺 𑀦𑀸𑀦𑀸𑀲𑀫𑁆𑀪𑀯𑀸.

𑁩𑁯𑁩. ‘‘‘𑀧𑀼𑀢𑁆𑀢𑁄 𑀘 𑀭𑀸𑀳𑀼𑀮𑁄 𑀦𑀸𑀫, 𑀥𑀻𑀢𑀸 𑀉𑀧𑁆𑀧𑀮𑀲𑀯𑁆𑀳𑀬𑀸;

𑀧𑀲𑁆𑀲 𑀯𑀻𑀭 𑀫𑀫𑀁 𑀇𑀤𑁆𑀥𑀺𑀁, 𑀩𑀮𑀁 𑀤𑀲𑁆𑀲𑁂𑀫𑀺 𑀲𑀢𑁆𑀣𑀼𑀦𑁄.

𑁩𑁯𑁪. ‘‘‘𑀫𑀳𑀸𑀲𑀫𑀼𑀤𑁆𑀤𑁂 𑀘𑀢𑀼𑀭𑁄, 𑀧𑀓𑁆𑀔𑀺𑀧𑀺 𑀳𑀢𑁆𑀣𑀧𑀸𑀢𑀺𑀬𑀁;

𑀢𑁂𑀮𑀁 𑀳𑀢𑁆𑀣𑀕𑀢𑀜𑁆𑀘𑁂𑀯, 𑀔𑀺𑀟𑁆𑀟𑁄 [𑀯𑁂𑀚𑁆𑀚𑁄 (𑀲𑀻. 𑀧𑀻.)] 𑀓𑁄𑀫𑀸𑀭𑀓𑁄 𑀬𑀣𑀸.

𑁩𑁯𑁫. ‘‘‘𑀉𑀩𑁆𑀩𑀢𑁆𑀢𑀬𑀺𑀢𑁆𑀯𑀸 𑀧𑀣𑀯𑀺𑀁, 𑀧𑀓𑁆𑀔𑀺𑀧𑀺 𑀳𑀢𑁆𑀣𑀧𑀸𑀢𑀺𑀬𑀁;

𑀘𑀺𑀢𑁆𑀢𑀁 𑀫𑀼𑀜𑁆𑀚𑀁 𑀬𑀣𑀸 𑀦𑀸𑀫, 𑀮𑀼𑀜𑁆𑀘𑀺 𑀓𑁄𑀫𑀸𑀭𑀓𑁄 𑀬𑀼𑀯𑀸.

𑁩𑁯𑁬. ‘‘‘𑀘𑀓𑁆𑀓𑀯𑀸𑀴𑀲𑀫𑀁 𑀧𑀸𑀡𑀺𑀁, 𑀙𑀸𑀤𑀬𑀺𑀢𑁆𑀯𑀸𑀦 𑀫𑀢𑁆𑀣𑀓𑁂;

𑀯𑀲𑁆𑀲𑀸𑀧𑁂𑀢𑁆𑀯𑀸𑀦 𑀨𑀼𑀲𑀺𑀢𑀁, 𑀦𑀸𑀦𑀸𑀯𑀡𑁆𑀡𑀁 𑀧𑀼𑀦𑀧𑁆𑀧𑀼𑀦𑀁.

𑁩𑁯𑁭. ‘‘‘𑀪𑀽𑀫𑀺𑀁 𑀉𑀤𑀼𑀓𑁆𑀔𑀮𑀁 𑀓𑀢𑁆𑀯𑀸, 𑀥𑀜𑁆𑀜𑀁 𑀓𑀢𑁆𑀯𑀸𑀦 𑀲𑀓𑁆𑀔𑀭𑀁;

𑀲𑀺𑀦𑁂𑀭𑀼𑀁 𑀫𑀼𑀲𑀮𑀁 𑀓𑀢𑁆𑀯𑀸, 𑀫𑀤𑁆𑀤𑀺 𑀓𑁄𑀫𑀸𑀭𑀺𑀓𑀸 𑀬𑀣𑀸.

𑁩𑁯𑁮. ‘‘‘𑀥𑀻𑀢𑀸𑀳𑀁 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀦𑀸𑀫𑁂𑀦𑀼𑀧𑁆𑀧𑀮𑀲𑀯𑁆𑀳𑀬𑀸;

𑀅𑀪𑀺𑀜𑁆𑀜𑀸𑀲𑀼 𑀯𑀲𑀻𑀪𑀽𑀢𑀸, 𑀢𑀯 𑀲𑀸𑀲𑀦𑀓𑀸𑀭𑀺𑀓𑀸.

𑁩𑁯𑁯. ‘‘‘𑀦𑀸𑀦𑀸𑀯𑀺𑀓𑀼𑀩𑁆𑀩𑀦𑀁 𑀓𑀢𑁆𑀯𑀸, 𑀤𑀲𑁆𑀲𑁂𑀢𑁆𑀯𑀸 𑀮𑁄𑀓𑀦𑀸𑀬𑀓𑀁;

𑀦𑀸𑀫𑀕𑁄𑀢𑁆𑀢𑀜𑁆𑀘 𑀲𑀸𑀯𑁂𑀢𑁆𑀯𑀸 [𑀧𑀓𑀸𑀲𑁂𑀢𑁆𑀯𑀸 (𑀲𑁆𑀬𑀸.)], 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀘𑀓𑁆𑀔𑀼𑀫.

𑁪𑁦𑁦. ‘‘‘𑀇𑀤𑁆𑀥𑀻𑀲𑀼 𑀘 𑀯𑀲𑀻 𑀳𑁄𑀫𑀺, 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸;

𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲, 𑀯𑀲𑀻 𑀳𑁄𑀫𑀺 𑀫𑀳𑀸𑀫𑀼𑀦𑁂.

𑁪𑁦𑁧. ‘‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁪𑁦𑁨. ‘‘‘𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂 𑀢𑀣𑁂𑀯 𑀘;

𑀜𑀸𑀡𑀁 𑀫𑁂 𑀯𑀺𑀫𑀮𑀁 [𑀯𑀺𑀧𑀼𑀮𑀁 (𑀲𑁆𑀬𑀸.)] 𑀲𑀼𑀤𑁆𑀥𑀁, 𑀲𑀪𑀸𑀯𑁂𑀦 𑀫𑀳𑁂𑀲𑀺𑀦𑁄.

𑁪𑁦𑁩. ‘‘‘𑀧𑀼𑀭𑀺𑀫𑀸𑀦𑀁 𑀚𑀺𑀦𑀕𑁆𑀕𑀸𑀦𑀁, 𑀲𑀗𑁆𑀕𑀫𑀁 𑀢𑁂 𑀦𑀺𑀤𑀲𑁆𑀲𑀺𑀢𑀁 [𑀲𑀫𑁆𑀫𑀼𑀔𑀸 𑀘 𑀧𑀭𑀫𑁆𑀫𑀼𑀔𑀸 (𑀲𑀻.)];

𑀅𑀥𑀺𑀓𑀸𑀭𑀁 𑀩𑀳𑀼𑀁 𑀫𑀬𑁆𑀳𑀁, 𑀢𑀼𑀬𑁆𑀳𑀢𑁆𑀣𑀸𑀬 𑀫𑀳𑀸𑀫𑀼𑀦𑀺.

𑁪𑁦𑁪. ‘‘‘𑀬𑀁 𑀫𑀬𑀸 𑀧𑀽𑀭𑀺𑀢𑀁 𑀓𑀫𑁆𑀫𑀁, 𑀓𑀼𑀲𑀮𑀁 𑀲𑀭 𑀫𑁂 𑀫𑀼𑀦𑀺;

𑀢𑀯𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀧𑀼𑀜𑁆𑀜𑀁 𑀉𑀧𑀘𑀺𑀢𑀁 𑀫𑀬𑀸.

𑁪𑁦𑁫. ‘‘‘𑀅𑀪𑀩𑁆𑀩𑀝𑁆𑀞𑀸𑀦𑁂 𑀯𑀚𑁆𑀚𑁂𑀢𑁆𑀯𑀸, 𑀯𑀸𑀭𑀬𑀦𑁆𑀢𑀻 [𑀧𑀭𑀺𑀯𑀚𑁆𑀚𑀦𑁆𑀢𑀺 (𑀲𑀻.), 𑀧𑀭𑀺𑀧𑀸𑀘𑁂𑀦𑁆𑀢𑁄 (𑀲𑁆𑀬𑀸.)] 𑀅𑀦𑀸𑀘𑀭𑀁;

𑀢𑀯𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀘𑀢𑁆𑀢𑀁 𑀫𑁂 𑀚𑀻𑀯𑀺𑀢𑀼𑀢𑁆𑀢𑀫𑀁.

𑁪𑁦𑁬. ‘‘‘𑀤𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀅𑀤𑀸𑀲𑀺𑀁 𑀫𑀫 𑀚𑀻𑀯𑀺𑀢𑀁;

𑀧𑀭𑀺𑀘𑁆𑀘𑀢𑁆𑀢𑀸 𑀘 𑀫𑁂 𑀳𑁄𑀫𑀺, 𑀢𑀯𑀢𑁆𑀣𑀸𑀬 𑀫𑀳𑀸𑀫𑀼𑀦𑀺.

𑁪𑁦𑁭. ‘‘‘𑀢𑀤𑀸𑀢𑀺𑀯𑀺𑀫𑁆𑀳𑀺𑀢𑀸 𑀲𑀩𑁆𑀩𑀸, 𑀲𑀺𑀭𑀲𑀸𑀯 𑀓𑀢𑀜𑁆𑀚𑀮𑀻;

𑀅𑀯𑁄𑀘𑀬𑁆𑀬𑁂 𑀓𑀣𑀁 𑀆𑀲𑀺, 𑀅𑀢𑀼𑀮𑀺𑀤𑁆𑀥𑀺𑀧𑀭𑀓𑁆𑀓𑀫𑀸’.

𑁪𑁦𑁮. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀦𑀸𑀕𑀓𑀜𑁆𑀜𑀸 𑀅𑀳𑀁 𑀢𑀤𑀸;

𑀯𑀺𑀫𑀮𑀸 𑀦𑀸𑀫 𑀦𑀸𑀫𑁂𑀦, 𑀓𑀜𑁆𑀜𑀸𑀦𑀁 𑀲𑀸𑀥𑀼𑀲𑀫𑁆𑀫𑀢𑀸.

𑁪𑁦𑁯. ‘‘𑀫𑀳𑁄𑀭𑀕𑁄 𑀫𑀳𑀸𑀦𑀸𑀕𑁄, 𑀧𑀲𑀦𑁆𑀦𑁄 𑀚𑀺𑀦𑀲𑀸𑀲𑀦𑁂;

𑀧𑀤𑀼𑀫𑀼𑀢𑁆𑀢𑀭𑀁 𑀫𑀳𑀸𑀢𑁂𑀚𑀁, 𑀦𑀺𑀫𑀦𑁆𑀢𑁂𑀲𑀺 𑀲𑀲𑀸𑀯𑀓𑀁.

𑁪𑁧𑁦. ‘‘𑀭𑀢𑀦𑀫𑀬𑀁 𑀫𑀡𑁆𑀟𑀧𑀁, 𑀧𑀮𑁆𑀮𑀗𑁆𑀓𑀁 𑀭𑀢𑀦𑀸𑀫𑀬𑀁;

𑀭𑀢𑀦𑀁 𑀯𑀸𑀮𑀼𑀓𑀸𑀓𑀺𑀡𑁆𑀡𑀁, 𑀉𑀧𑀪𑁄𑀕𑀁 𑀭𑀢𑀦𑀸𑀫𑀬𑀁.

𑁪𑁧𑁧. ‘‘𑀫𑀕𑁆𑀕𑀜𑁆𑀘 𑀧𑀝𑀺𑀬𑀸𑀤𑁂𑀲𑀺, 𑀭𑀢𑀦𑀤𑁆𑀥𑀚𑀪𑀽𑀲𑀺𑀢𑀁;

𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀯𑀚𑁆𑀚𑀦𑁆𑀢𑁄 𑀢𑀽𑀭𑀺𑀬𑁂𑀳𑀺 𑀲𑁄.

𑁪𑁧𑁨. ‘‘𑀧𑀭𑀺𑀲𑀸𑀳𑀺 𑀘 𑀘𑀢𑀽𑀳𑀺 [𑀧𑀭𑀺𑀲𑀸𑀳𑀺 𑀘𑀢𑀽𑀳𑀺 𑀲𑁄 (𑀲𑀻.), 𑀧𑀭𑀺𑀲𑀸𑀳𑀺 𑀘𑀢𑀲𑁆𑀲𑁄 𑀳𑀺 (𑀧𑀻.)], 𑀧𑀭𑀺𑀯𑀼𑀢𑁄 [𑀲𑀳𑀺𑀢𑁄 (𑀲𑀻.), 𑀨𑀭𑀢𑁂 (𑀲𑁆𑀬𑀸.), 𑀧𑀭𑁂𑀢𑁄 (𑀧𑀻.)] 𑀮𑁄𑀓𑀦𑀸𑀬𑀓𑁄;

𑀫𑀳𑁄𑀭𑀕𑀲𑁆𑀲 𑀪𑀯𑀦𑁂, 𑀦𑀺𑀲𑀻𑀤𑀺 𑀧𑀭𑀫𑀸𑀲𑀦𑁂.

𑁪𑁧𑁩. ‘‘𑀅𑀦𑁆𑀦𑀁 𑀧𑀸𑀦𑀁 𑀔𑀸𑀤𑀦𑀻𑀬𑀁, 𑀪𑁄𑀚𑀦𑀜𑁆𑀘 𑀫𑀳𑀸𑀭𑀳𑀁;

𑀯𑀭𑀁 𑀯𑀭𑀜𑁆𑀘 𑀧𑀸𑀤𑀸𑀲𑀺, 𑀦𑀸𑀕𑀭𑀸𑀚𑀸 𑀫𑀳𑀸𑀬𑀲𑀁.

𑁪𑁧𑁪. ‘‘𑀪𑀼𑀜𑁆𑀚𑀺𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄, 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀬𑁄𑀦𑀺𑀲𑁄;

𑀅𑀦𑀼𑀫𑁄𑀤𑀦𑀻𑀬𑀁𑀓𑀸𑀲𑀺, 𑀦𑀸𑀕𑀓𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸.

𑁪𑁧𑁫. ‘‘𑀲𑀩𑁆𑀩𑀜𑁆𑀜𑀼𑀁 𑀨𑀼𑀮𑁆𑀮𑀺𑀢𑀁 𑀤𑀺𑀲𑁆𑀯𑀸, 𑀦𑀸𑀕𑀓𑀜𑁆𑀜𑀸 𑀫𑀳𑀸𑀬𑀲𑀁;

𑀧𑀲𑀦𑁆𑀦𑀁 𑀲𑀢𑁆𑀣𑀼𑀦𑁄 𑀘𑀺𑀢𑁆𑀢𑀁, 𑀲𑀼𑀦𑀺𑀩𑀦𑁆𑀥𑀜𑁆𑀘 𑀫𑀸𑀦𑀲𑀁.

𑁪𑁧𑁬. ‘‘𑀫𑀫𑀜𑁆𑀘 𑀘𑀺𑀢𑁆𑀢𑀫𑀜𑁆𑀜𑀸𑀬, 𑀚𑀮𑀚𑀼𑀢𑁆𑀢𑀫𑀦𑀸𑀫𑀓𑁄;

𑀢𑀲𑁆𑀫𑀺𑀁 𑀔𑀡𑁂 𑀫𑀳𑀸𑀯𑀻𑀭𑁄, 𑀪𑀺𑀓𑁆𑀔𑀼𑀦𑀺𑀁 𑀤𑀲𑁆𑀲𑀬𑀺𑀤𑁆𑀥𑀺𑀬𑀸.

𑁪𑁧𑁭. ‘‘𑀇𑀤𑁆𑀥𑀻 𑀅𑀦𑁂𑀓𑀸 𑀤𑀲𑁆𑀲𑁂𑀲𑀺, 𑀪𑀺𑀓𑁆𑀔𑀼𑀦𑀻 𑀲𑀸 𑀯𑀺𑀲𑀸𑀭𑀤𑀸;

𑀧𑀫𑁄𑀤𑀺𑀢𑀸 𑀯𑁂𑀤𑀚𑀸𑀢𑀸, 𑀲𑀢𑁆𑀣𑀸𑀭𑀁 𑀇𑀤𑀫𑀩𑁆𑀭𑀯𑀺 [𑀏𑀢𑀤𑀩𑁆𑀭𑀯𑀺𑀁 (𑀲𑁆𑀬𑀸. 𑀧𑀻.)].

𑁪𑁧𑁮. ‘‘‘𑀅𑀤𑁆𑀤𑀲𑀸𑀳𑀁 𑀇𑀫𑀁 𑀇𑀤𑁆𑀥𑀺𑀁, 𑀲𑀼𑀫𑀦𑀁 𑀇𑀢𑀭𑀸𑀬𑀧𑀺;

𑀓𑀣𑀁 𑀅𑀳𑁄𑀲𑀺 𑀲𑀸 𑀯𑀻𑀭, 𑀇𑀤𑁆𑀥𑀺𑀬𑀸 𑀲𑀼𑀯𑀺𑀲𑀸𑀭𑀤𑀸’.

𑁪𑁧𑁯. ‘‘‘𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸, 𑀥𑀻𑀢𑀸 𑀫𑀫 𑀫𑀳𑀺𑀤𑁆𑀥𑀺𑀓𑀸;

𑀫𑀫𑀸𑀦𑀼𑀲𑀸𑀲𑀦𑀺𑀓𑀭𑀸, 𑀇𑀤𑁆𑀥𑀺𑀬𑀸 𑀲𑀼𑀯𑀺𑀲𑀸𑀭𑀤𑀸’.

𑁪𑁨𑁦. ‘‘𑀩𑀼𑀤𑁆𑀥𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀏𑀯𑀁 𑀧𑀢𑁆𑀣𑁂𑀲𑀳𑀁 𑀢𑀤𑀸 [𑀢𑀼𑀝𑁆𑀞𑀸 𑀏𑀯𑀁 𑀅𑀯𑁄𑀘𑀳𑀁 (𑀲𑁆𑀬𑀸.), 𑀏𑀯𑀫𑀳𑁄𑀲𑀳𑀁 𑀢𑀤𑀸 (𑀓.)];

𑀅𑀳𑀫𑁆𑀧𑀺 𑀢𑀸𑀤𑀺𑀲𑀸 𑀳𑁄𑀫𑀺, 𑀇𑀤𑁆𑀥𑀺𑀬𑀸 𑀲𑀼𑀯𑀺𑀲𑀸𑀭𑀤𑀸.

𑁪𑁨𑁧. ‘‘𑀧𑀫𑁄𑀤𑀺𑀢𑀸𑀳𑀁 𑀲𑀼𑀫𑀦𑀸, 𑀧𑀢𑁆𑀣𑁂 𑀉𑀢𑁆𑀢𑀫𑀫𑀸𑀦𑀲𑀸 [𑀧𑀢𑁆𑀢𑀉𑀢𑁆𑀢𑀫𑀫𑀸𑀦𑀲𑀸 (𑀲𑀻. 𑀲𑁆𑀬𑀸. 𑀧𑀻.)];

𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀈𑀤𑀺𑀲𑀸 𑀳𑁄𑀫𑀺 𑀦𑀸𑀬𑀓.

𑁪𑁨𑁨. ‘‘𑀫𑀡𑀺𑀫𑀬𑀫𑁆𑀳𑀺 𑀧𑀮𑁆𑀮𑀗𑁆𑀓𑁂, 𑀫𑀡𑁆𑀟𑀧𑀫𑁆𑀳𑀺 𑀧𑀪𑀲𑁆𑀲𑀭𑁂;

𑀅𑀦𑁆𑀦𑀧𑀸𑀦𑁂𑀦 𑀢𑀧𑁆𑀧𑁂𑀢𑁆𑀯𑀸, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁.

𑁪𑁨𑁩. ‘‘𑀦𑀸𑀕𑀸𑀦𑀁 𑀧𑀯𑀭𑀁 𑀧𑀼𑀧𑁆𑀨𑀁, 𑀅𑀭𑀼𑀡𑀁 𑀦𑀸𑀫 𑀉𑀧𑁆𑀧𑀮𑀁;

𑀯𑀡𑁆𑀡𑀁 𑀫𑁂 𑀈𑀤𑀺𑀲𑀁 𑀳𑁄𑀢𑀼, 𑀧𑀽𑀚𑁂𑀲𑀺𑀁 𑀮𑁄𑀓𑀦𑀸𑀬𑀓𑀁.

𑁪𑁨𑁪. ‘‘𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁪𑁨𑁫. ‘‘𑀢𑀢𑁄 𑀘𑀼𑀢𑀸𑀳𑀁 𑀫𑀦𑀼𑀚𑁂, 𑀉𑀧𑀧𑀦𑁆𑀦𑀸 𑀲𑀬𑀫𑁆𑀪𑀼𑀦𑁄;

𑀉𑀧𑁆𑀧𑀮𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀁, 𑀧𑀺𑀡𑁆𑀟𑀧𑀸𑀢𑀫𑀤𑀸𑀲𑀳𑀁.

𑁪𑁨𑁬. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀯𑀺𑀧𑀲𑁆𑀲𑀻 𑀦𑀸𑀫 𑀦𑀸𑀬𑀓𑁄;

𑀉𑀧𑁆𑀧𑀚𑁆𑀚𑀺 𑀘𑀸𑀭𑀼𑀤𑀲𑁆𑀲𑀦𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸.

𑁪𑁨𑁭. ‘‘𑀲𑁂𑀝𑁆𑀞𑀺𑀥𑀻𑀢𑀸 𑀢𑀤𑀸 𑀳𑀼𑀢𑁆𑀯𑀸, 𑀩𑀸𑀭𑀸𑀡𑀲𑀺𑀧𑀼𑀭𑀼𑀢𑁆𑀢𑀫𑁂;

𑀦𑀺𑀫𑀦𑁆𑀢𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁.

𑁪𑁨𑁮. ‘‘𑀫𑀳𑀸𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀉𑀧𑁆𑀧𑀮𑁂𑀳𑀺 𑀯𑀺𑀦𑀸𑀬𑀓𑀁;

𑀧𑀽𑀚𑀬𑀺𑀢𑁆𑀯𑀸 𑀘𑁂𑀢𑀲𑀸𑀯 [𑀘 𑀢𑁂𑀳𑁂𑀯 (𑀲𑁆𑀬𑀸. 𑀧𑀻.)], 𑀯𑀡𑁆𑀡𑀲𑁄𑀪𑀁 𑀅𑀧𑀢𑁆𑀣𑀬𑀺𑀁.

𑁪𑁨𑁯. ‘‘𑀇𑀫𑀫𑁆𑀳𑀺 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀫𑀳𑀸𑀬𑀲𑁄;

𑀓𑀲𑁆𑀲𑀧𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀉𑀧𑁆𑀧𑀚𑁆𑀚𑀺 𑀯𑀤𑀢𑀁 𑀯𑀭𑁄.

𑁪𑁩𑁦. ‘‘𑀉𑀧𑀝𑁆𑀞𑀸𑀓𑁄 𑀫𑀳𑁂𑀲𑀺𑀲𑁆𑀲, 𑀢𑀤𑀸 𑀆𑀲𑀺 𑀦𑀭𑀺𑀲𑁆𑀲𑀭𑁄;

𑀓𑀸𑀲𑀺𑀭𑀸𑀚𑀸 𑀓𑀺𑀓𑀻 𑀦𑀸𑀫, 𑀩𑀸𑀭𑀸𑀡𑀲𑀺𑀧𑀼𑀭𑀼𑀢𑁆𑀢𑀫𑁂.

𑁪𑁩𑁧. ‘‘𑀢𑀲𑁆𑀲𑀸𑀲𑀺𑀁 𑀤𑀼𑀢𑀺𑀬𑀸 𑀥𑀻𑀢𑀸, 𑀲𑀫𑀡𑀕𑀼𑀢𑁆𑀢𑀲𑀯𑁆𑀳𑀬𑀸;

𑀥𑀫𑁆𑀫𑀁 𑀲𑀼𑀢𑁆𑀯𑀸 𑀚𑀺𑀦𑀕𑁆𑀕𑀲𑁆𑀲, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺𑀁.

𑁪𑁩𑁨. ‘‘𑀅𑀦𑀼𑀚𑀸𑀦𑀺 𑀦 𑀦𑁄 𑀢𑀸𑀢𑁄, 𑀅𑀕𑀸𑀭𑁂𑀯 𑀢𑀤𑀸 𑀫𑀬𑀁;

𑀯𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀯𑀺𑀘𑀭𑀺𑀫𑁆𑀳 𑀅𑀢𑀦𑁆𑀤𑀺𑀢𑀸.

𑁪𑁩𑁩. ‘‘𑀓𑁄𑀫𑀸𑀭𑀺𑀩𑁆𑀭𑀳𑁆𑀫𑀘𑀭𑀺𑀬𑀁, 𑀭𑀸𑀚𑀓𑀜𑁆𑀜𑀸 𑀲𑀼𑀔𑁂𑀥𑀺𑀢𑀸;

𑀩𑀼𑀤𑁆𑀥𑁄𑀧𑀝𑁆𑀞𑀸𑀦𑀦𑀺𑀭𑀢𑀸, 𑀫𑀼𑀤𑀺𑀢𑀸 𑀲𑀢𑁆𑀢𑀥𑀻𑀢𑀭𑁄.

𑁪𑁩𑁪. ‘‘𑀲𑀫𑀡𑀻 𑀲𑀫𑀡𑀕𑀼𑀢𑁆𑀢𑀸 𑀘, 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀤𑀸𑀬𑀺𑀓𑀸 [𑀪𑀺𑀓𑁆𑀔𑀼𑀤𑀸𑀲𑀺𑀓𑀸 (𑀲𑀻. 𑀲𑁆𑀬𑀸.)];

𑀥𑀫𑁆𑀫𑀸 𑀘𑁂𑀯 𑀲𑀼𑀥𑀫𑁆𑀫𑀸 𑀘, 𑀲𑀢𑁆𑀢𑀫𑀻 𑀲𑀗𑁆𑀖𑀤𑀸𑀬𑀺𑀓𑀸 [𑀲𑀁𑀖𑀤𑀸𑀲𑀺𑀓𑀸 (𑀲𑀻. 𑀲𑁆𑀬𑀸.)].

𑁪𑁩𑁫. ‘‘𑀅𑀳𑀁 𑀔𑁂𑀫𑀸 𑀘 𑀲𑀧𑁆𑀧𑀜𑁆𑀜𑀸, 𑀧𑀝𑀸𑀘𑀸𑀭𑀸 𑀘 𑀓𑀼𑀡𑁆𑀟𑀮𑀸;

𑀓𑀺𑀲𑀸𑀕𑁄𑀢𑀫𑀻 𑀥𑀫𑁆𑀫𑀤𑀺𑀦𑁆𑀦𑀸, 𑀯𑀺𑀲𑀸𑀔𑀸 𑀳𑁄𑀢𑀺 𑀲𑀢𑁆𑀢𑀫𑀻.

𑁪𑁩𑁬. ‘‘𑀢𑁂𑀳𑀺 𑀓𑀫𑁆𑀫𑁂𑀳𑀺 𑀲𑀼𑀓𑀢𑁂𑀳𑀺, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀘𑁆𑀙𑀳𑀁.

𑁪𑁩𑁭. ‘‘𑀢𑀢𑁄 𑀘𑀼𑀢𑀸 𑀫𑀦𑀼𑀲𑁆𑀲𑁂𑀲𑀼, 𑀉𑀧𑀧𑀦𑁆𑀦𑀸 𑀫𑀳𑀸𑀓𑀼𑀮𑁂;

𑀧𑀻𑀢𑀁 𑀫𑀝𑁆𑀞𑀁 𑀯𑀭𑀁 𑀤𑀼𑀲𑁆𑀲𑀁, 𑀅𑀤𑀁 𑀅𑀭𑀳𑀢𑁄 𑀅𑀳𑀁.

𑁪𑁩𑁮. ‘‘𑀢𑀢𑁄 𑀘𑀼𑀢𑀸𑀭𑀺𑀝𑁆𑀞𑀧𑀼𑀭𑁂, 𑀚𑀸𑀢𑀸 𑀯𑀺𑀧𑁆𑀧𑀓𑀼𑀮𑁂 𑀅𑀳𑀁;

𑀥𑀻𑀢𑀸 𑀢𑀺𑀭𑀺𑀝𑀺𑀯𑀘𑁆𑀙𑀲𑁆𑀲, 𑀉𑀫𑁆𑀫𑀸𑀤𑀦𑁆𑀢𑀻 𑀫𑀦𑁄𑀳𑀭𑀸.

𑁪𑁩𑁯. ‘‘𑀢𑀢𑁄 𑀘𑀼𑀢𑀸 𑀚𑀦𑀧𑀤𑁂, 𑀓𑀼𑀮𑁂 𑀅𑀜𑁆𑀜𑀢𑀭𑁂 𑀅𑀳𑀁;

𑀧𑀲𑀽𑀢𑀸 𑀦𑀸𑀢𑀺𑀨𑀻𑀢𑀫𑁆𑀳𑀺, 𑀲𑀸𑀮𑀺𑀁 𑀕𑁄𑀧𑁂𑀫𑀳𑀁 𑀢𑀤𑀸.

𑁪𑁪𑁦. ‘‘𑀤𑀺𑀲𑁆𑀯𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁, 𑀧𑀜𑁆𑀘𑀮𑀸𑀚𑀸𑀲𑀢𑀸𑀦𑀺𑀳𑀁;

𑀤𑀢𑁆𑀯𑀸 𑀧𑀤𑀼𑀫𑀘𑁆𑀙𑀦𑁆𑀦𑀸𑀦𑀺, 𑀧𑀜𑁆𑀘 𑀧𑀼𑀢𑁆𑀢𑀲𑀢𑀸𑀦𑀺𑀳𑀁.

𑁪𑁪𑁧. ‘‘𑀧𑀢𑁆𑀣𑀬𑀺𑀁 𑀢𑁂𑀧𑀺 𑀧𑀢𑁆𑀣𑁂𑀲𑀼𑀁, 𑀫𑀥𑀼𑀁 𑀤𑀢𑁆𑀯𑀸 𑀲𑀬𑀫𑁆𑀪𑀼𑀦𑁄;

𑀢𑀢𑁄 𑀘𑀼𑀢𑀸 𑀅𑀭𑀜𑁆𑀜𑁂𑀳𑀁, 𑀅𑀚𑀸𑀬𑀺𑀁 𑀧𑀤𑀼𑀫𑁄𑀤𑀭𑁂.

𑁪𑁪𑁨. ‘‘𑀓𑀸𑀲𑀺𑀭𑀜𑁆𑀜𑁄 𑀫𑀳𑁂𑀲𑀻𑀳𑀁, 𑀳𑀼𑀢𑁆𑀯𑀸 𑀲𑀓𑁆𑀓𑀢𑀧𑀽𑀚𑀺𑀢𑀸;

𑀅𑀚𑀦𑀺𑀁 𑀭𑀸𑀚𑀧𑀼𑀢𑁆𑀢𑀸𑀦𑀁, 𑀅𑀦𑀽𑀦𑀁 𑀲𑀢𑀧𑀜𑁆𑀘𑀓𑀁.

𑁪𑁪𑁩. ‘‘𑀬𑀤𑀸 𑀢𑁂 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀸, 𑀓𑀻𑀴𑀦𑁆𑀢𑀸 𑀚𑀮𑀓𑀻𑀴𑀺𑀢𑀁;

𑀤𑀺𑀲𑁆𑀯𑀸 𑀑𑀧𑀢𑁆𑀢𑀧𑀤𑀼𑀫𑀁, 𑀆𑀲𑀼𑀁 𑀧𑀘𑁆𑀘𑁂𑀓𑀦𑀸𑀬𑀓𑀸.

𑁪𑁪𑁪. ‘‘𑀲𑀸𑀳𑀁 𑀢𑁂𑀳𑀺 𑀯𑀺𑀦𑀸𑀪𑀽𑀢𑀸, 𑀲𑀼𑀢𑀯𑀻𑀭𑁂𑀳𑀺 𑀲𑁄𑀓𑀺𑀦𑀻 [𑀲𑀼𑀢𑀯𑀭𑁂𑀳𑀺 𑀲𑁄𑀓𑀺𑀦𑀻 (𑀲𑀻. 𑀲𑁆𑀬𑀸.)];

𑀘𑀼𑀢𑀸 𑀇𑀲𑀺𑀕𑀺𑀮𑀺𑀧𑀲𑁆𑀲𑁂, 𑀕𑀸𑀫𑀓𑀫𑁆𑀳𑀺 𑀅𑀚𑀸𑀬𑀺𑀳𑀁.

𑁪𑁪𑁫. ‘‘𑀬𑀤𑀸 𑀩𑀼𑀤𑁆𑀥𑀸 𑀲𑀼𑀢𑀫𑀢𑀻, 𑀲𑀼𑀢𑀸𑀦𑀁 𑀪𑀢𑁆𑀢𑀼𑀦𑁄𑀧𑀺 𑀘 [𑀓𑀲𑀢𑀁 𑀢𑀤𑀸 (𑀲𑀻.), 𑀅𑀢𑁆𑀢𑀦𑁄𑀧𑀺 𑀘 (𑀲𑁆𑀬𑀸.)];

𑀬𑀸𑀕𑀼𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑀻, 𑀅𑀝𑁆𑀞 𑀧𑀘𑁆𑀘𑁂𑀓𑀦𑀸𑀬𑀓𑁂.

𑁪𑁪𑁬. ‘‘𑀪𑀺𑀓𑁆𑀔𑀸𑀬 𑀕𑀸𑀫𑀁 𑀕𑀘𑁆𑀙𑀦𑁆𑀢𑁂, 𑀤𑀺𑀲𑁆𑀯𑀸 𑀧𑀼𑀢𑁆𑀢𑁂 𑀅𑀦𑀼𑀲𑁆𑀲𑀭𑀺𑀁;

𑀔𑀻𑀭𑀥𑀸𑀭𑀸 𑀯𑀺𑀦𑀺𑀕𑁆𑀕𑀘𑁆𑀙𑀺, 𑀢𑀤𑀸 𑀫𑁂 𑀧𑀼𑀢𑁆𑀢𑀧𑁂𑀫𑀲𑀸.

𑁪𑁪𑁭. ‘‘𑀢𑀢𑁄 𑀢𑁂𑀲𑀁 𑀅𑀤𑀁 𑀬𑀸𑀕𑀼𑀁, 𑀧𑀲𑀦𑁆𑀦𑀸 𑀲𑁂𑀳𑀺 𑀧𑀸𑀡𑀺𑀪𑀺;

𑀢𑀢𑁄 𑀘𑀼𑀢𑀸𑀳𑀁 𑀢𑀺𑀤𑀲𑀁, 𑀦𑀦𑁆𑀤𑀦𑀁 𑀉𑀧𑀧𑀚𑁆𑀚𑀳𑀁.

𑁪𑁪𑁮. ‘‘𑀅𑀦𑀼𑀪𑁄𑀢𑁆𑀯𑀸 𑀲𑀼𑀔𑀁 𑀤𑀼𑀓𑁆𑀔𑀁, 𑀲𑀁𑀲𑀭𑀺𑀢𑁆𑀯𑀸 𑀪𑀯𑀸𑀪𑀯𑁂;

𑀢𑀯𑀢𑁆𑀣𑀸𑀬 𑀫𑀳𑀸𑀯𑀻𑀭, 𑀧𑀭𑀺𑀘𑁆𑀘𑀢𑁆𑀢𑀜𑁆𑀘 𑀚𑀻𑀯𑀺𑀢𑀁.

𑁪𑁪𑁯. ‘‘𑀏𑀯𑀁 𑀩𑀳𑀼𑀯𑀺𑀥𑀁 𑀤𑀼𑀓𑁆𑀔𑀁, 𑀲𑀫𑁆𑀧𑀢𑁆𑀢𑀻 𑀘 𑀩𑀳𑀼𑀩𑁆𑀩𑀺𑀥𑀸;

𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀚𑀸𑀢𑀸 𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑁂.

𑁪𑁫𑁦. ‘‘𑀫𑀳𑀸𑀥𑀦𑀲𑁂𑀝𑁆𑀞𑀺𑀓𑀼𑀮𑁂, 𑀲𑀼𑀔𑀺𑀢𑁂 𑀲𑀚𑁆𑀚𑀺𑀢𑁂 𑀢𑀣𑀸;

𑀦𑀸𑀦𑀸𑀭𑀢𑀦𑀧𑀚𑁆𑀚𑁄𑀢𑁂, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑁂.

𑁪𑁫𑁧. ‘‘𑀲𑀓𑁆𑀓𑀢𑀸 𑀧𑀽𑀚𑀺𑀢𑀸 𑀘𑁂𑀯, 𑀫𑀸𑀦𑀺𑀢𑀸𑀧𑀘𑀺𑀢𑀸 𑀢𑀣𑀸;

𑀭𑀽𑀧𑀲𑀻𑀭𑀺𑀫𑀦𑀼𑀧𑁆𑀧𑀢𑁆𑀢𑀸 [𑀭𑀽𑀧𑀲𑁄𑀪𑀕𑁆𑀕𑀲𑀫𑁆𑀧𑀦𑁆𑀦𑀸 (𑀲𑀻.)], 𑀓𑀼𑀮𑁂𑀲𑀼 𑀅𑀢𑀺𑀲𑀓𑁆𑀓𑀢𑀸 [𑀅𑀪𑀺𑀲𑀫𑁆𑀫𑀢𑀸 (𑀲𑀻.)].

𑁪𑁫𑁨. ‘‘𑀅𑀢𑀻𑀯 𑀧𑀢𑁆𑀣𑀺𑀢𑀸 𑀘𑀸𑀲𑀺𑀁, 𑀭𑀽𑀧𑀪𑁄𑀕𑀲𑀺𑀭𑀻𑀳𑀺 𑀘;

𑀧𑀢𑁆𑀣𑀺𑀢𑀸 𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀳𑀺, 𑀅𑀦𑁂𑀓𑁂𑀳𑀺 𑀲𑀢𑁂𑀳𑀺𑀧𑀺.

𑁪𑁫𑁩. ‘‘𑀅𑀕𑀸𑀭𑀁 𑀧𑀚𑀳𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀅𑀟𑁆𑀠𑀫𑀸𑀲𑁂 𑀅𑀲𑀫𑁆𑀧𑀢𑁆𑀢𑁂, 𑀘𑀢𑀼𑀲𑀘𑁆𑀘𑀫𑀧𑀸𑀧𑀼𑀡𑀺𑀁.

𑁪𑁫𑁪. ‘‘𑀇𑀤𑁆𑀥𑀺𑀬𑀸 𑀅𑀪𑀺𑀦𑀺𑀫𑁆𑀫𑀺𑀢𑁆𑀯𑀸, 𑀘𑀢𑀼𑀭𑀲𑁆𑀲𑀁 𑀭𑀣𑀁 𑀅𑀳𑀁;

𑀩𑀼𑀤𑁆𑀥𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀲𑁆𑀲𑀁, 𑀮𑁄𑀓𑀦𑀸𑀣𑀲𑁆𑀲 𑀢𑀸𑀤𑀺𑀦𑁄.

𑁪𑁫𑁫. ‘‘‘𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀁 𑀉𑀧𑀕𑀫𑁆𑀫 𑀧𑀸𑀤𑀧𑀁 [𑀪𑀺𑀓𑁆𑀔𑀼𑀦𑀻 (𑀲𑀻. 𑀧𑀻. 𑀓.) 𑀣𑁂𑀭𑀻𑀕𑀸. 𑁨𑁩𑁦], 𑀏𑀓𑀸 𑀢𑀼𑀯𑀁 𑀢𑀺𑀝𑁆𑀞𑀲𑀺 𑀲𑀸𑀮𑀫𑀽𑀮𑁂;

𑀦 𑀘𑀸𑀧𑀺 𑀢𑁂 𑀤𑀼𑀢𑀺𑀬𑁄 𑀅𑀢𑁆𑀣𑀺 𑀓𑁄𑀘𑀺 [𑀦 𑀘𑀢𑁆𑀣𑀺 𑀢𑁂 𑀤𑀼𑀢𑀺𑀬𑀸 𑀯𑀡𑁆𑀡𑀥𑀸𑀢𑀼 (𑀲𑀻. 𑀧𑀻. 𑀓.)], 𑀩𑀸𑀮𑁂 𑀦 𑀢𑁆𑀯𑀁 𑀪𑀸𑀬𑀲𑀺 𑀥𑀼𑀢𑁆𑀢𑀓𑀸𑀦𑀁’.

𑁪𑁫𑁬. ‘‘‘𑀲𑀢𑀁 𑀲𑀳𑀲𑁆𑀲𑀸𑀦𑀺𑀧𑀺 𑀥𑀼𑀢𑁆𑀢𑀓𑀸𑀦𑀁 [𑀲𑀳𑀲𑁆𑀲𑀸𑀦𑀫𑁆𑀧𑀺 𑀥𑀼𑀢𑁆𑀢𑀓𑀸𑀦𑀁 (𑀧𑀻.) 𑀣𑁂𑀭𑀻𑀕𑀸. 𑁨𑁩𑁧], 𑀲𑀫𑀸𑀕𑀢𑀸 𑀏𑀤𑀺𑀲𑀓𑀸 𑀪𑀯𑁂𑀬𑁆𑀬𑀼𑀁;

𑀮𑁄𑀫𑀁 𑀦 𑀇𑀜𑁆𑀚𑁂 𑀦 𑀲𑀫𑁆𑀧𑀯𑁂𑀥𑁂, 𑀓𑀺𑀁 𑀫𑁂 𑀢𑀼𑀯𑀁 𑀫𑀸𑀭 𑀓𑀭𑀺𑀲𑁆𑀲𑀲𑁂𑀓𑁄 [𑀦 𑀫𑀸𑀭 𑀪𑀸𑀬𑀸𑀫𑀺 𑀢𑀯𑁂𑀓𑀺𑀓𑀸𑀧𑀺 (𑀲𑀻. 𑀓.) … 𑀢𑀫𑁂𑀓𑀺𑀓𑀸𑀲𑀺𑀁 (𑀧𑀻.)].

𑁪𑁫𑁭. ‘‘‘𑀏𑀲𑀸 𑀅𑀦𑁆𑀢𑀭𑀥𑀸𑀬𑀸𑀫𑀺, 𑀓𑀼𑀘𑁆𑀙𑀺𑀁 𑀯𑀸 𑀧𑀯𑀺𑀲𑀸𑀫𑀺 𑀢𑁂;

𑀪𑀫𑀼𑀓𑀦𑁆𑀢𑀭𑀺𑀓𑀸𑀬𑀫𑁆𑀧𑀺, 𑀢𑀺𑀝𑁆𑀞𑀦𑁆𑀢𑀺𑀁 𑀫𑀁 𑀦 𑀤𑀓𑁆𑀔𑀲𑀺.

𑁪𑁫𑁮. ‘‘‘𑀘𑀺𑀢𑁆𑀢𑀲𑁆𑀫𑀺𑀁 𑀯𑀲𑀻𑀪𑀽𑀢𑀸𑀫𑁆𑀳𑀺, 𑀇𑀤𑁆𑀥𑀺𑀧𑀸𑀤𑀸 𑀲𑀼𑀪𑀸𑀯𑀺𑀢𑀸;