𑁭.𑀓𑀸𑀢𑀺𑀬𑀸𑀦𑀢𑁆𑀣𑁂𑀭𑀕𑀸𑀣𑀸

𑁪𑁧𑁧. ‘‘𑀉𑀝𑁆𑀞𑁂𑀳𑀺 𑀦𑀺𑀲𑀻𑀤 𑀓𑀸𑀢𑀺𑀬𑀸𑀦, 𑀫𑀸 𑀦𑀺𑀤𑁆𑀤𑀸𑀩𑀳𑀼𑀮𑁄 𑀅𑀳𑀼 𑀚𑀸𑀕𑀭𑀲𑁆𑀲𑀼;

𑀫𑀸 𑀢𑀁 𑀅𑀮𑀲𑀁 𑀧𑀫𑀢𑁆𑀢𑀩𑀦𑁆𑀥𑀼, 𑀓𑀽𑀝𑁂𑀦𑁂𑀯 𑀚𑀺𑀦𑀸𑀢𑀼 𑀫𑀘𑁆𑀘𑀼𑀭𑀸𑀚𑀸.

𑁪𑁧𑁨. ‘‘𑀲𑁂𑀬𑁆𑀬𑀣𑀸𑀧𑀺 [𑀲𑀬𑀣𑀸𑀧𑀺 (𑀲𑀻. 𑀧𑀻.)] 𑀫𑀳𑀸𑀲𑀫𑀼𑀤𑁆𑀤𑀯𑁂𑀕𑁄, 𑀏𑀯𑀁 𑀚𑀸𑀢𑀺𑀚𑀭𑀸𑀢𑀺𑀯𑀢𑁆𑀢𑀢𑁂 𑀢𑀁;

𑀲𑁄 𑀓𑀭𑁄𑀳𑀺 𑀲𑀼𑀤𑀻𑀧𑀫𑀢𑁆𑀢𑀦𑁄 𑀢𑁆𑀯𑀁, 𑀦 𑀳𑀺 𑀢𑀸𑀡𑀁 𑀢𑀯 𑀯𑀺𑀚𑁆𑀚𑀢𑁂𑀯 𑀅𑀜𑁆𑀜𑀁.

𑁪𑁧𑁩. ‘‘𑀲𑀢𑁆𑀣𑀸 𑀳𑀺 𑀯𑀺𑀚𑁂𑀲𑀺 𑀫𑀕𑁆𑀕𑀫𑁂𑀢𑀁, 𑀲𑀗𑁆𑀕𑀸 𑀚𑀸𑀢𑀺𑀚𑀭𑀸𑀪𑀬𑀸 𑀅𑀢𑀻𑀢𑀁;

𑀧𑀼𑀩𑁆𑀩𑀸𑀧𑀭𑀭𑀢𑁆𑀢𑀫𑀧𑁆𑀧𑀫𑀢𑁆𑀢𑁄, 𑀅𑀦𑀼𑀬𑀼𑀜𑁆𑀚𑀲𑁆𑀲𑀼 𑀤𑀴𑁆𑀳𑀁 𑀓𑀭𑁄𑀳𑀺 𑀬𑁄𑀕𑀁.

𑁪𑁧𑁪. ‘‘𑀧𑀼𑀭𑀺𑀫𑀸𑀦𑀺 𑀧𑀫𑀼𑀜𑁆𑀘 𑀩𑀦𑁆𑀥𑀦𑀸𑀦𑀺, 𑀲𑀗𑁆𑀖𑀸𑀝𑀺𑀔𑀼𑀭𑀫𑀼𑀡𑁆𑀟𑀪𑀺𑀓𑁆𑀔𑀪𑁄𑀚𑀻;

𑀫𑀸 𑀔𑀺𑀟𑁆𑀟𑀸𑀭𑀢𑀺𑀜𑁆𑀘 𑀫𑀸 𑀦𑀺𑀤𑁆𑀤𑀁, 𑀅𑀦𑀼𑀬𑀼𑀜𑁆𑀚𑀺𑀢𑁆𑀣 𑀛𑀸𑀬 𑀓𑀸𑀢𑀺𑀬𑀸𑀦.

𑁪𑁧𑁫. ‘‘𑀛𑀸𑀬𑀸𑀳𑀺 𑀚𑀺𑀦𑀸𑀳𑀺 𑀓𑀸𑀢𑀺𑀬𑀸𑀦, 𑀬𑁄𑀕𑀓𑁆𑀔𑁂𑀫𑀧𑀣𑁂𑀲𑀼 𑀓𑁄𑀯𑀺𑀤𑁄𑀲𑀺;

𑀧𑀧𑁆𑀧𑀼𑀬𑁆𑀬 𑀅𑀦𑀼𑀢𑁆𑀢𑀭𑀁 𑀯𑀺𑀲𑀼𑀤𑁆𑀥𑀺𑀁, 𑀧𑀭𑀺𑀦𑀺𑀩𑁆𑀩𑀸𑀳𑀺𑀲𑀺 𑀯𑀸𑀭𑀺𑀦𑀸𑀯 𑀚𑁄𑀢𑀺.

𑁪𑁧𑁬. ‘‘𑀧𑀚𑁆𑀚𑁄𑀢𑀓𑀭𑁄 𑀧𑀭𑀺𑀢𑁆𑀢𑀭𑀁𑀲𑁄, 𑀯𑀸𑀢𑁂𑀦 𑀯𑀺𑀦𑀫𑁆𑀬𑀢𑁂 𑀮𑀢𑀸𑀯;

𑀏𑀯𑀫𑁆𑀧𑀺 𑀢𑀼𑀯𑀁 𑀅𑀦𑀸𑀤𑀺𑀬𑀸𑀦𑁄, 𑀫𑀸𑀭𑀁 𑀇𑀦𑁆𑀤𑀲𑀕𑁄𑀢𑁆𑀢 𑀦𑀺𑀤𑁆𑀥𑀼𑀦𑀸𑀳𑀺;

𑀲𑁄 𑀯𑁂𑀤𑀬𑀺𑀢𑀸𑀲𑀼 𑀯𑀻𑀢𑀭𑀸𑀕𑁄, 𑀓𑀸𑀮𑀁 𑀓𑀗𑁆𑀔 𑀇𑀥𑁂𑀯 𑀲𑀻𑀢𑀺𑀪𑀽𑀢𑁄’’𑀢𑀺.

… 𑀓𑀸𑀢𑀺𑀬𑀸𑀦𑁄 𑀣𑁂𑀭𑁄….