𑁫. 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁩𑁯𑁯. ‘‘𑀫𑀦𑀼𑀚𑀲𑁆𑀲 𑀧𑀫𑀢𑁆𑀢𑀘𑀸𑀭𑀺𑀦𑁄, 𑀢𑀡𑁆𑀳𑀸 𑀯𑀟𑁆𑀠𑀢𑀺 𑀫𑀸𑀮𑀼𑀯𑀸 𑀯𑀺𑀬;

𑀲𑁄 𑀧𑁆𑀮𑀯𑀢𑀻 [𑀧𑁆𑀮𑀯𑀢𑀺 (𑀲𑀻. 𑀧𑀻. 𑀓.), 𑀧𑀭𑀺𑀧𑁆𑀮𑀯𑀢𑀺 (𑀲𑁆𑀬𑀸.)] 𑀳𑀼𑀭𑀸 𑀳𑀼𑀭𑀁, 𑀨𑀮𑀫𑀺𑀘𑁆𑀙𑀁𑀯 𑀯𑀦𑀲𑁆𑀫𑀺 𑀯𑀸𑀦𑀭𑁄.

𑁪𑁦𑁦. ‘‘𑀬𑀁 𑀏𑀲𑀸 𑀲𑀳𑀢𑁂 [𑀲𑀳𑀢𑀺 (𑀧𑀻. 𑀓.)] 𑀚𑀫𑁆𑀫𑀻, 𑀢𑀡𑁆𑀳𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀸;

𑀲𑁄𑀓𑀸 𑀢𑀲𑁆𑀲 𑀧𑀯𑀟𑁆𑀠𑀦𑁆𑀢𑀺, 𑀅𑀪𑀺𑀯𑀝𑁆𑀞𑀁𑀯 [𑀅𑀪𑀺𑀯𑀼𑀝𑁆𑀞𑀁𑀯 (𑀲𑁆𑀬𑀸.), 𑀅𑀪𑀺𑀯𑀟𑁆𑀠𑀁𑀯 (𑀓.)] 𑀩𑀻𑀭𑀡𑀁.

𑁪𑁦𑁧. ‘‘𑀬𑁄 𑀘𑁂𑀢𑀁 𑀲𑀳𑀢𑁂 [𑀲𑀳𑀢𑀺 (𑀧𑀻. 𑀓.)] 𑀚𑀫𑁆𑀫𑀺𑀁, 𑀢𑀡𑁆𑀳𑀁 𑀮𑁄𑀓𑁂 𑀤𑀼𑀭𑀘𑁆𑀘𑀬𑀁;

𑀲𑁄𑀓𑀸 𑀢𑀫𑁆𑀳𑀸 𑀧𑀧𑀢𑀦𑁆𑀢𑀺, 𑀉𑀤𑀩𑀺𑀦𑁆𑀤𑀽𑀯 𑀧𑁄𑀓𑁆𑀔𑀭𑀸.

𑁪𑁦𑁨. ‘‘𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀁 𑀯𑁄, 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀢𑀡𑁆𑀳𑀸𑀬 𑀫𑀽𑀮𑀁 𑀔𑀡𑀣, 𑀉𑀲𑀻𑀭𑀢𑁆𑀣𑁄𑀯 𑀩𑀻𑀭𑀡𑀁;

𑀫𑀸 𑀯𑁄 𑀦𑀴𑀁𑀯 𑀲𑁄𑀢𑁄𑀯, 𑀫𑀸𑀭𑁄 𑀪𑀜𑁆𑀚𑀺 𑀧𑀼𑀦𑀧𑁆𑀧𑀼𑀦𑀁.

𑁪𑁦𑁩. ‘‘𑀓𑀭𑁄𑀣 𑀩𑀼𑀤𑁆𑀥𑀯𑀘𑀦𑀁, 𑀔𑀡𑁄 𑀯𑁄 𑀫𑀸 𑀉𑀧𑀘𑁆𑀘𑀕𑀸;

𑀔𑀡𑀸𑀢𑀻𑀢𑀸 𑀳𑀺 𑀲𑁄𑀘𑀦𑁆𑀢𑀺, 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑀸.

𑁪𑁦𑁪. ‘‘𑀧𑀫𑀸𑀤𑁄 𑀭𑀚𑁄 𑀧𑀫𑀸𑀤𑁄 [𑀲𑀩𑁆𑀩𑀤𑀸 (𑀲𑀻. 𑀓.), 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 𑀉𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀑𑀮𑁄𑀓𑁂𑀢𑀩𑁆𑀩𑀸], 𑀧𑀫𑀸𑀤𑀸𑀦𑀼𑀧𑀢𑀺𑀢𑁄 𑀭𑀚𑁄;

𑀅𑀧𑁆𑀧𑀫𑀸𑀤𑁂𑀦 𑀯𑀺𑀚𑁆𑀚𑀸𑀬, 𑀅𑀩𑁆𑀩𑀳𑁂 𑀲𑀮𑁆𑀮𑀫𑀢𑁆𑀢𑀦𑁄’’𑀢𑀺.

… 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄 [𑀫𑀸𑀮𑀼𑀗𑁆𑀓𑁆𑀬𑀧𑀼𑀢𑁆𑀢𑁄 (𑀲𑀻. 𑀲𑁆𑀬𑀸. 𑀧𑀻.)] 𑀣𑁂𑀭𑁄….