𑁧𑁨. 𑀩𑁆𑀭𑀳𑁆𑀫𑀤𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁪𑁪𑁧. ‘‘𑀅𑀓𑁆𑀓𑁄𑀥𑀲𑁆𑀲 𑀓𑀼𑀢𑁄 𑀓𑁄𑀥𑁄, 𑀤𑀦𑁆𑀢𑀲𑁆𑀲 𑀲𑀫𑀚𑀻𑀯𑀺𑀦𑁄;

𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀲𑁆𑀲, 𑀉𑀧𑀲𑀦𑁆𑀢𑀲𑁆𑀲 𑀢𑀸𑀤𑀺𑀦𑁄.

𑁪𑁪𑁨. ‘‘𑀢𑀲𑁆𑀲𑁂𑀯 𑀢𑁂𑀦 𑀧𑀸𑀧𑀺𑀬𑁄, 𑀬𑁄 𑀓𑀼𑀤𑁆𑀥𑀁 𑀧𑀝𑀺𑀓𑀼𑀚𑁆𑀛𑀢𑀺;

𑀓𑀼𑀤𑁆𑀥𑀁 𑀅𑀧𑁆𑀧𑀝𑀺𑀓𑀼𑀚𑁆𑀛𑀦𑁆𑀢𑁄, 𑀲𑀗𑁆𑀕𑀸𑀫𑀁 𑀚𑁂𑀢𑀺 𑀤𑀼𑀚𑁆𑀚𑀬𑀁.

𑁪𑁪𑁩. [𑀲𑀁. 𑀦𑀺. 𑁧.𑁧𑁮𑁮, 𑁨𑁫𑁦] ‘‘𑀉𑀪𑀺𑀦𑁆𑀦𑀫𑀢𑁆𑀣𑀁 𑀘𑀭𑀢𑀺, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘;

𑀧𑀭𑀁 𑀲𑀗𑁆𑀓𑀼𑀧𑀺𑀢𑀁 𑀜𑀢𑁆𑀯𑀸, 𑀬𑁄 𑀲𑀢𑁄 𑀉𑀧𑀲𑀫𑁆𑀫𑀢𑀺.

𑁪𑁪𑁪. [𑀲𑀁. 𑀦𑀺. 𑁧.𑁧𑁮𑁮, 𑁨𑁫𑁦] ‘‘𑀉𑀪𑀺𑀦𑁆𑀦𑀁 𑀢𑀺𑀓𑀺𑀘𑁆𑀙𑀦𑁆𑀢𑀁 𑀢𑀁, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘;

𑀚𑀦𑀸 𑀫𑀜𑁆𑀜𑀦𑁆𑀢𑀺 𑀩𑀸𑀮𑁄𑀢𑀺, 𑀬𑁂 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸.

𑁪𑁪𑁫. ‘‘𑀉𑀧𑁆𑀧𑀚𑁆𑀚𑁂 𑀢𑁂 𑀲𑀘𑁂 𑀓𑁄𑀥𑁄, 𑀆𑀯𑀚𑁆𑀚 𑀓𑀓𑀘𑀽𑀧𑀫𑀁;

𑀉𑀧𑁆𑀧𑀚𑁆𑀚𑁂 𑀘𑁂 𑀭𑀲𑁂 𑀢𑀡𑁆𑀳𑀸, 𑀧𑀼𑀢𑁆𑀢𑀫𑀁𑀲𑀽𑀧𑀫𑀁 𑀲𑀭.

𑁪𑁪𑁬. ‘‘𑀲𑀘𑁂 𑀥𑀸𑀯𑀢𑀺 𑀘𑀺𑀢𑁆𑀢𑀁 𑀢𑁂, 𑀓𑀸𑀫𑁂𑀲𑀼 𑀘 𑀪𑀯𑁂𑀲𑀼 𑀘;

𑀔𑀺𑀧𑁆𑀧𑀁 𑀦𑀺𑀕𑁆𑀕𑀡𑁆𑀳 𑀲𑀢𑀺𑀬𑀸, 𑀓𑀺𑀝𑁆𑀞𑀸𑀤𑀁 𑀯𑀺𑀬 𑀤𑀼𑀧𑁆𑀧𑀲𑀼’’𑀦𑁆𑀢𑀺;

… 𑀩𑁆𑀭𑀳𑁆𑀫𑀤𑀢𑁆𑀢𑁄 𑀣𑁂𑀭𑁄….