𑁧𑁭. 𑀢𑀺𑀁𑀲𑀦𑀺𑀧𑀸𑀢𑁄

𑁧. 𑀨𑀼𑀲𑁆𑀲𑀢𑁆𑀣𑁂𑀭𑀕𑀸𑀣𑀸

𑁯𑁪𑁯. 𑀧𑀸𑀲𑀸𑀤𑀺𑀓𑁂 𑀩𑀳𑀽 𑀤𑀺𑀲𑁆𑀯𑀸, 𑀪𑀸𑀯𑀺𑀢𑀢𑁆𑀢𑁂 𑀲𑀼𑀲𑀁𑀯𑀼𑀢𑁂;

𑀇𑀲𑀺 𑀧𑀡𑁆𑀟𑀭𑀲𑀕𑁄𑀢𑁆𑀢𑁄 [𑀧𑀡𑁆𑀟𑀭𑀲𑁆𑀲 𑀕𑁄𑀢𑁆𑀢𑁄 (𑀲𑀻.)], 𑀅𑀧𑀼𑀘𑁆𑀙𑀺 𑀨𑀼𑀲𑁆𑀲𑀲𑀯𑁆𑀳𑀬𑀁.

𑁯𑁫𑁦. ‘‘𑀓𑀺𑀁𑀙𑀦𑁆𑀤𑀸 𑀓𑀺𑀫𑀥𑀺𑀧𑁆𑀧𑀸𑀬𑀸, 𑀓𑀺𑀫𑀸𑀓𑀧𑁆𑀧𑀸 𑀪𑀯𑀺𑀲𑁆𑀲𑀭𑁂;

𑀅𑀦𑀸𑀕𑀢𑀫𑁆𑀳𑀺 𑀓𑀸𑀮𑀫𑁆𑀳𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’.

𑁯𑁫𑁧. ‘‘𑀲𑀼𑀡𑁄𑀳𑀺 𑀯𑀘𑀦𑀁 𑀫𑀬𑁆𑀳𑀁, 𑀇𑀲𑀺𑀧𑀡𑁆𑀟𑀭𑀲𑀯𑁆𑀳𑀬;

𑀲𑀓𑁆𑀓𑀘𑁆𑀘𑀁 𑀉𑀧𑀥𑀸𑀭𑁂𑀳𑀺, 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑁆𑀬𑀦𑀸𑀕𑀢𑀁.

𑁯𑁫𑁨. ‘‘𑀓𑁄𑀥𑀦𑀸 𑀉𑀧𑀦𑀸𑀳𑀻 𑀘, 𑀫𑀓𑁆𑀔𑀻 𑀣𑀫𑁆𑀪𑀻 𑀲𑀞𑀸 𑀩𑀳𑀽;

𑀉𑀲𑁆𑀲𑀼𑀓𑀻 𑀦𑀸𑀦𑀸𑀯𑀸𑀤𑀸 𑀘, 𑀪𑀯𑀺𑀲𑁆𑀲𑀦𑁆𑀢𑀺 𑀅𑀦𑀸𑀕𑀢𑁂.

𑁯𑁫𑁩. ‘‘𑀅𑀜𑁆𑀜𑀸𑀢𑀫𑀸𑀦𑀺𑀦𑁄 𑀥𑀫𑁆𑀫𑁂, 𑀕𑀫𑁆𑀪𑀻𑀭𑁂 𑀢𑀻𑀭𑀕𑁄𑀘𑀭𑀸;

𑀮𑀳𑀼𑀓𑀸 𑀅𑀕𑀭𑀼 𑀥𑀫𑁆𑀫𑁂, 𑀅𑀜𑁆𑀜𑀫𑀜𑁆𑀜𑀫𑀕𑀸𑀭𑀯𑀸.

𑁯𑁫𑁪. ‘‘𑀩𑀳𑀽 𑀆𑀤𑀻𑀦𑀯𑀸 𑀮𑁄𑀓𑁂, 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑁆𑀬𑀦𑀸𑀕𑀢𑁂;

𑀲𑀼𑀤𑁂𑀲𑀺𑀢𑀁 𑀇𑀫𑀁 𑀥𑀫𑁆𑀫𑀁, 𑀓𑀺𑀮𑁂𑀲𑁂𑀲𑁆𑀲𑀦𑁆𑀢𑀺 [𑀓𑀺𑀮𑁂𑀲𑀺𑀲𑁆𑀲𑀦𑁆𑀢𑀺 (𑀲𑀻.), 𑀓𑀺𑀮𑀺𑀲𑀺𑀲𑁆𑀲𑀦𑁆𑀢𑀺 (𑀲𑁆𑀬𑀸. 𑀓.)] 𑀤𑀼𑀫𑁆𑀫𑀢𑀻.

𑁯𑁫𑁫. ‘‘𑀕𑀼𑀡𑀳𑀻𑀦𑀸𑀧𑀺 𑀲𑀗𑁆𑀖𑀫𑁆𑀳𑀺, 𑀯𑁄𑀳𑀭𑀦𑁆𑀢𑀸 𑀯𑀺𑀲𑀸𑀭𑀤𑀸;

𑀩𑀮𑀯𑀦𑁆𑀢𑁄 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀼𑀔𑀭𑀸 𑀅𑀲𑁆𑀲𑀼𑀢𑀸𑀯𑀺𑀦𑁄.

𑁯𑁫𑁬. ‘‘𑀕𑀼𑀡𑀯𑀦𑁆𑀢𑁄𑀧𑀺 𑀲𑀗𑁆𑀖𑀫𑁆𑀳𑀺, 𑀯𑁄𑀳𑀭𑀦𑁆𑀢𑀸 𑀬𑀣𑀸𑀢𑁆𑀣𑀢𑁄;

𑀤𑀼𑀩𑁆𑀩𑀮𑀸 𑀢𑁂 𑀪𑀯𑀺𑀲𑁆𑀲𑀦𑁆𑀢𑀺, 𑀳𑀺𑀭𑀻𑀫𑀦𑀸 𑀅𑀦𑀢𑁆𑀣𑀺𑀓𑀸.

𑁯𑁫𑁭. ‘‘𑀭𑀚𑀢𑀁 𑀚𑀸𑀢𑀭𑀽𑀧𑀜𑁆𑀘, 𑀔𑁂𑀢𑁆𑀢𑀁 𑀯𑀢𑁆𑀣𑀼𑀫𑀚𑁂𑀴𑀓𑀁;

𑀤𑀸𑀲𑀺𑀤𑀸𑀲𑀜𑁆𑀘 𑀤𑀼𑀫𑁆𑀫𑁂𑀥𑀸, 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑁆𑀬𑀦𑀸𑀕𑀢𑁂.

𑁯𑁫𑁮. ‘‘𑀉𑀚𑁆𑀛𑀸𑀦𑀲𑀜𑁆𑀜𑀺𑀦𑁄 𑀩𑀸𑀮𑀸, 𑀲𑀻𑀮𑁂𑀲𑀼 𑀅𑀲𑀫𑀸𑀳𑀺𑀢𑀸;

𑀉𑀦𑁆𑀦𑀴𑀸 𑀯𑀺𑀘𑀭𑀺𑀲𑁆𑀲𑀦𑁆𑀢𑀺, 𑀓𑀮𑀳𑀸𑀪𑀺𑀭𑀢𑀸 𑀫𑀕𑀸.

𑁯𑁫𑁯. ‘‘𑀉𑀤𑁆𑀥𑀢𑀸 𑀘 𑀪𑀯𑀺𑀲𑁆𑀲𑀦𑁆𑀢𑀺, 𑀦𑀻𑀮𑀘𑀻𑀯𑀭𑀧𑀸𑀭𑀼𑀢𑀸;

𑀓𑀼𑀳𑀸 𑀣𑀤𑁆𑀥𑀸 𑀮𑀧𑀸 𑀲𑀺𑀗𑁆𑀕𑀻, 𑀘𑀭𑀺𑀲𑁆𑀲𑀦𑁆𑀢𑁆𑀬𑀭𑀺𑀬𑀸 𑀯𑀺𑀬.

𑁯𑁬𑁦. ‘‘𑀢𑁂𑀮𑀲𑀡𑁆𑀞𑁂𑀳𑀺 𑀓𑁂𑀲𑁂𑀳𑀺, 𑀘𑀧𑀮𑀸 𑀅𑀜𑁆𑀚𑀦𑀓𑁆𑀔𑀺𑀓𑀸;

𑀭𑀣𑀺𑀬𑀸𑀬 𑀕𑀫𑀺𑀲𑁆𑀲𑀦𑁆𑀢𑀺, 𑀤𑀦𑁆𑀢𑀯𑀡𑁆𑀡𑀺𑀓𑀧𑀸𑀭𑀼𑀢𑀸.

𑁯𑁬𑁧. ‘‘𑀅𑀚𑁂𑀕𑀼𑀘𑁆𑀙𑀁 𑀯𑀺𑀫𑀼𑀢𑁆𑀢𑁂𑀳𑀺, 𑀲𑀼𑀭𑀢𑁆𑀢𑀁 𑀅𑀭𑀳𑀤𑁆𑀥𑀚𑀁;

𑀚𑀺𑀕𑀼𑀘𑁆𑀙𑀺𑀲𑁆𑀲𑀦𑁆𑀢𑀺 𑀓𑀸𑀲𑀸𑀯𑀁, 𑀑𑀤𑀸𑀢𑁂𑀲𑀼 𑀲𑀫𑀼𑀘𑁆𑀙𑀺𑀢𑀸 [𑀑𑀤𑀸𑀢𑁂 𑀲𑀼𑀲𑀫𑀼𑀘𑁆𑀙𑀺𑀢𑀸 (𑀲𑀻.)].

𑁯𑁬𑁨. ‘‘𑀮𑀸𑀪𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀓𑀼𑀲𑀻𑀢𑀸 𑀳𑀻𑀦𑀯𑀻𑀭𑀺𑀬𑀸;

𑀓𑀺𑀘𑁆𑀙𑀦𑁆𑀢𑀸 𑀯𑀦𑀧𑀢𑁆𑀣𑀸𑀦𑀺, 𑀕𑀸𑀫𑀦𑁆𑀢𑁂𑀲𑀼 𑀯𑀲𑀺𑀲𑁆𑀲𑀭𑁂.

𑁯𑁬𑁩. ‘‘𑀬𑁂 𑀬𑁂 𑀮𑀸𑀪𑀁 𑀮𑀪𑀺𑀲𑁆𑀲𑀦𑁆𑀢𑀺, 𑀫𑀺𑀘𑁆𑀙𑀸𑀚𑀻𑀯𑀭𑀢𑀸 𑀲𑀤𑀸;

𑀢𑁂 𑀢𑁂𑀯 𑀅𑀦𑀼𑀲𑀺𑀓𑁆𑀔𑀦𑁆𑀢𑀸, 𑀪𑀚𑀺𑀲𑁆𑀲𑀦𑁆𑀢𑀺 𑀅𑀲𑀁𑀬𑀢𑀸.

𑁯𑁬𑁪. ‘‘𑀬𑁂 𑀬𑁂 𑀅𑀮𑀸𑀪𑀺𑀦𑁄 𑀮𑀸𑀪𑀁, 𑀦 𑀢𑁂 𑀧𑀼𑀚𑁆𑀚𑀸 𑀪𑀯𑀺𑀲𑁆𑀲𑀭𑁂;

𑀲𑀼𑀧𑁂𑀲𑀮𑁂𑀧𑀺 𑀢𑁂 𑀥𑀻𑀭𑁂, 𑀲𑁂𑀯𑀺𑀲𑁆𑀲𑀦𑁆𑀢𑀺 𑀦 𑀢𑁂 𑀢𑀤𑀸.

𑁯𑁬𑁫. ‘‘𑀫𑀺𑀮𑀓𑁆𑀔𑀼𑀭𑀚𑀦𑀁 𑀭𑀢𑁆𑀢𑀁 [𑀧𑀺𑀮𑀓𑁆𑀔𑀭𑀚𑀦𑀁 𑀭𑀢𑁆𑀢𑀁 (?)], 𑀕𑀭𑀳𑀦𑁆𑀢𑀸 𑀲𑀓𑀁 𑀥𑀚𑀁;

𑀢𑀺𑀢𑁆𑀣𑀺𑀬𑀸𑀦𑀁 𑀥𑀚𑀁 𑀓𑁂𑀘𑀺, 𑀥𑀸𑀭𑀺𑀲𑁆𑀲𑀦𑁆𑀢𑁆𑀬𑀯𑀤𑀸𑀢𑀓𑀁.

𑁯𑁬𑁬. ‘‘𑀅𑀕𑀸𑀭𑀯𑁄 𑀘 𑀓𑀸𑀲𑀸𑀯𑁂, 𑀢𑀤𑀸 𑀢𑁂𑀲𑀁 𑀪𑀯𑀺𑀲𑁆𑀲𑀢𑀺;

𑀧𑀝𑀺𑀲𑀗𑁆𑀔𑀸 𑀘 𑀓𑀸𑀲𑀸𑀯𑁂, 𑀪𑀺𑀓𑁆𑀔𑀽𑀦𑀁 𑀦 𑀪𑀯𑀺𑀲𑁆𑀲𑀢𑀺.

𑁯𑁬𑁭. ‘‘𑀅𑀪𑀺𑀪𑀽𑀢𑀲𑁆𑀲 𑀤𑀼𑀓𑁆𑀔𑁂𑀦, 𑀲𑀮𑁆𑀮𑀯𑀺𑀤𑁆𑀥𑀲𑁆𑀲 𑀭𑀼𑀧𑁆𑀧𑀢𑁄;

𑀧𑀝𑀺𑀲𑀗𑁆𑀔𑀸 𑀫𑀳𑀸𑀖𑁄𑀭𑀸, 𑀦𑀸𑀕𑀲𑁆𑀲𑀸𑀲𑀺 𑀅𑀘𑀺𑀦𑁆𑀢𑀺𑀬𑀸.

𑁯𑁬𑁮. ‘‘𑀙𑀤𑁆𑀤𑀦𑁆𑀢𑁄 𑀳𑀺 𑀢𑀤𑀸 𑀤𑀺𑀲𑁆𑀯𑀸, 𑀲𑀼𑀭𑀢𑁆𑀢𑀁 𑀅𑀭𑀳𑀤𑁆𑀥𑀚𑀁;

𑀢𑀸𑀯𑀤𑁂𑀯 𑀪𑀡𑀻 𑀕𑀸𑀣𑀸, 𑀕𑀚𑁄 𑀅𑀢𑁆𑀣𑁄𑀧𑀲𑀁𑀳𑀺𑀢𑀸’’.

𑁯𑁬𑁯. [𑀥. 𑀧. 𑁯; 𑀚𑀸. 𑁧.𑁨.𑁧𑁪𑁧; 𑁧.𑁧𑁬.𑁧𑁨𑁨] ‘‘𑀅𑀦𑀺𑀓𑁆𑀓𑀲𑀸𑀯𑁄 𑀓𑀸𑀲𑀸𑀯𑀁, 𑀬𑁄 𑀯𑀢𑁆𑀣𑀁 𑀧𑀭𑀺𑀥𑀲𑁆𑀲𑀢𑀺 [𑀧𑀭𑀺𑀤𑀳𑀺𑀲𑁆𑀲𑀢𑀺 (𑀲𑀻. 𑀲𑁆𑀬𑀸.)];

𑀅𑀧𑁂𑀢𑁄 𑀤𑀫𑀲𑀘𑁆𑀘𑁂𑀦, 𑀦 𑀲𑁄 𑀓𑀸𑀲𑀸𑀯𑀫𑀭𑀳𑀢𑀺.

𑁯𑁭𑁦. ‘‘𑀬𑁄 𑀘 𑀯𑀦𑁆𑀢𑀓𑀸𑀲𑀸𑀯𑀲𑁆𑀲, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄;

𑀉𑀧𑁂𑀢𑁄 𑀤𑀫𑀲𑀘𑁆𑀘𑁂𑀦, 𑀲 𑀯𑁂 𑀓𑀸𑀲𑀸𑀯𑀫𑀭𑀳𑀢𑀺.

𑁯𑁭𑁧. ‘‘𑀯𑀺𑀧𑀦𑁆𑀦𑀲𑀻𑀮𑁄 𑀤𑀼𑀫𑁆𑀫𑁂𑀥𑁄, 𑀧𑀸𑀓𑀝𑁄 𑀓𑀸𑀫𑀓𑀸𑀭𑀺𑀬𑁄;

𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀦𑀺𑀲𑁆𑀲𑀼𑀓𑁆𑀓𑁄, 𑀦 𑀲𑁄 𑀓𑀸𑀲𑀸𑀯𑀫𑀭𑀳𑀢𑀺.

𑁯𑁭𑁨. ‘‘𑀬𑁄 𑀘 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀯𑀻𑀢𑀭𑀸𑀕𑁄 𑀲𑀫𑀸𑀳𑀺𑀢𑁄;

𑀑𑀤𑀸𑀢𑀫𑀦𑀲𑀗𑁆𑀓𑀧𑁆𑀧𑁄, 𑀲 𑀯𑁂 𑀓𑀸𑀲𑀸𑀯𑀫𑀭𑀳𑀢𑀺.

𑁯𑁭𑁩. ‘‘𑀉𑀤𑁆𑀥𑀢𑁄 𑀉𑀦𑁆𑀦𑀴𑁄 𑀩𑀸𑀮𑁄, 𑀲𑀻𑀮𑀁 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀑𑀤𑀸𑀢𑀓𑀁 𑀅𑀭𑀳𑀢𑀺, 𑀓𑀸𑀲𑀸𑀯𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺.

𑁯𑁭𑁪. ‘‘𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘, 𑀤𑀼𑀝𑁆𑀞𑀘𑀺𑀢𑁆𑀢𑀸 𑀅𑀦𑀸𑀤𑀭𑀸;

𑀢𑀸𑀤𑀻𑀦𑀁 𑀫𑁂𑀢𑁆𑀢𑀘𑀺𑀢𑁆𑀢𑀸𑀦𑀁, 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀦𑁆𑀢𑁆𑀬𑀦𑀸𑀕𑀢𑁂.

𑁯𑁭𑁫. ‘‘𑀲𑀺𑀓𑁆𑀔𑀸𑀧𑁂𑀦𑁆𑀢𑀸𑀧𑀺 𑀣𑁂𑀭𑁂𑀳𑀺, 𑀩𑀸𑀮𑀸 𑀘𑀻𑀯𑀭𑀥𑀸𑀭𑀡𑀁;

𑀦 𑀲𑀼𑀡𑀺𑀲𑁆𑀲𑀦𑁆𑀢𑀺 𑀤𑀼𑀫𑁆𑀫𑁂𑀥𑀸, 𑀧𑀸𑀓𑀝𑀸 𑀓𑀸𑀫𑀓𑀸𑀭𑀺𑀬𑀸.

𑁯𑁭𑁬. ‘‘𑀢𑁂 𑀢𑀣𑀸 𑀲𑀺𑀓𑁆𑀔𑀺𑀢𑀸 𑀩𑀸𑀮𑀸, 𑀅𑀜𑁆𑀜𑀫𑀜𑁆𑀜𑀁 𑀅𑀕𑀸𑀭𑀯𑀸;

𑀦𑀸𑀤𑀺𑀬𑀺𑀲𑁆𑀲𑀦𑁆𑀢𑀼𑀧𑀚𑁆𑀛𑀸𑀬𑁂, 𑀔𑀴𑀼𑀗𑁆𑀓𑁄 𑀯𑀺𑀬 𑀲𑀸𑀭𑀣𑀺𑀁.

𑁯𑁭𑁭. ‘‘𑀏𑀯𑀁 𑀅𑀦𑀸𑀕𑀢𑀤𑁆𑀥𑀸𑀦𑀁, 𑀧𑀝𑀺𑀧𑀢𑁆𑀢𑀺 𑀪𑀯𑀺𑀲𑁆𑀲𑀢𑀺;

𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘, 𑀧𑀢𑁆𑀢𑁂 𑀓𑀸𑀮𑀫𑁆𑀳𑀺 𑀧𑀘𑁆𑀙𑀺𑀫𑁂.

𑁯𑁭𑁮. ‘‘𑀧𑀼𑀭𑀸 𑀆𑀕𑀘𑁆𑀙𑀢𑁂 𑀏𑀢𑀁, 𑀅𑀦𑀸𑀕𑀢𑀁 𑀫𑀳𑀩𑁆𑀪𑀬𑀁;

𑀲𑀼𑀩𑁆𑀩𑀘𑀸 𑀳𑁄𑀣 𑀲𑀔𑀺𑀮𑀸, 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸.

𑁯𑁭𑁯. ‘‘𑀫𑁂𑀢𑁆𑀢𑀘𑀺𑀢𑁆𑀢𑀸 𑀓𑀸𑀭𑀼𑀡𑀺𑀓𑀸, 𑀳𑁄𑀣 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸;

𑀆𑀭𑀤𑁆𑀥𑀯𑀻𑀭𑀺𑀬𑀸 𑀧𑀳𑀺𑀢𑀢𑁆𑀢𑀸, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑀸.

𑁯𑁮𑁦. ‘‘𑀧𑀫𑀸𑀤𑀁 𑀪𑀬𑀢𑁄 𑀤𑀺𑀲𑁆𑀯𑀸, 𑀅𑀧𑁆𑀧𑀫𑀸𑀤𑀜𑁆𑀘 𑀔𑁂𑀫𑀢𑁄;

𑀪𑀸𑀯𑁂𑀣𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀨𑀼𑀲𑀦𑁆𑀢𑀸 𑀅𑀫𑀢𑀁 𑀧𑀤’’𑀦𑁆𑀢𑀺.

… 𑀨𑀼𑀲𑁆𑀲𑁄 𑀣𑁂𑀭𑁄….

𑁨. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁯𑁮𑁧. ‘‘𑀬𑀣𑀸𑀘𑀸𑀭𑀻 𑀬𑀣𑀸𑀲𑀢𑁄 𑀲𑀢𑀻𑀫𑀸, 𑀬𑀢𑀲𑀗𑁆𑀓𑀧𑁆𑀧𑀚𑁆𑀛𑀸𑀬𑀺 𑀅𑀧𑁆𑀧𑀫𑀢𑁆𑀢𑁄;

𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑀢𑁆𑀢𑁄, 𑀏𑀓𑁄 𑀲𑀦𑁆𑀢𑀼𑀲𑀺𑀢𑁄 𑀢𑀫𑀸𑀳𑀼 𑀪𑀺𑀓𑁆𑀔𑀼𑀁.

𑁯𑁮𑁨. ‘‘𑀅𑀮𑁆𑀮𑀁 𑀲𑀼𑀓𑁆𑀔𑀁 𑀯𑀸 𑀪𑀼𑀜𑁆𑀚𑀦𑁆𑀢𑁄, 𑀦 𑀩𑀸𑀴𑁆𑀳𑀁 𑀲𑀼𑀳𑀺𑀢𑁄 𑀲𑀺𑀬𑀸;

𑀊𑀦𑀽𑀤𑀭𑁄 𑀫𑀺𑀢𑀸𑀳𑀸𑀭𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂.

𑁯𑁮𑁩. ‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁯𑁮𑁪. ‘‘𑀓𑀧𑁆𑀧𑀺𑀬𑀁 𑀢𑀁 𑀘𑁂 𑀙𑀸𑀤𑁂𑀢𑀺, 𑀘𑀻𑀯𑀭𑀁 𑀇𑀤𑀫𑀢𑁆𑀣𑀺𑀓𑀁 [𑀇𑀤𑀫𑀢𑁆𑀣𑀺𑀢𑀁 (𑀲𑀻.)];

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁯𑁮𑁫. ‘‘𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀲𑁆𑀲, 𑀚𑀡𑁆𑀡𑀼𑀓𑁂 𑀦𑀸𑀪𑀺𑀯𑀲𑁆𑀲𑀢𑀺;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁯𑁮𑁬. [𑀲𑀁. 𑀦𑀺. 𑁪.𑁨𑁫𑁩; 𑀇𑀢𑀺𑀯𑀼. 𑁫𑁩] ‘‘𑀬𑁄 𑀲𑀼𑀔𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤, 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀲𑀮𑁆𑀮𑀢𑁄;

𑀉𑀪𑀬𑀦𑁆𑀢𑀭𑁂𑀦 [𑀉𑀪𑀬𑀫𑀦𑁆𑀢𑀭𑁂 (𑀲𑀻.)] 𑀦𑀸𑀳𑁄𑀲𑀺, 𑀓𑁂𑀦 𑀮𑁄𑀓𑀲𑁆𑀫𑀺 𑀓𑀺𑀁 𑀲𑀺𑀬𑀸.

𑁯𑁮𑁭. ‘‘𑀫𑀸 𑀫𑁂 𑀓𑀤𑀸𑀘𑀺 𑀧𑀸𑀧𑀺𑀘𑁆𑀙𑁄, 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄;

𑀅𑀧𑁆𑀧𑀲𑁆𑀲𑀼𑀢𑁄 𑀅𑀦𑀸𑀤𑀭𑁄, 𑀓𑁂𑀦 𑀮𑁄𑀓𑀲𑁆𑀫𑀺 𑀓𑀺𑀁 𑀲𑀺𑀬𑀸.

𑁯𑁮𑁮. ‘‘𑀩𑀳𑀼𑀲𑁆𑀲𑀼𑀢𑁄 𑀘 𑀫𑁂𑀥𑀸𑀯𑀻, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄;

𑀘𑁂𑀢𑁄𑀲𑀫𑀣𑀫𑀦𑀼𑀬𑀼𑀢𑁆𑀢𑁄, 𑀅𑀧𑀺 𑀫𑀼𑀤𑁆𑀥𑀦𑀺 𑀢𑀺𑀝𑁆𑀞𑀢𑀼.

𑁯𑁮𑁯. ‘‘𑀬𑁄 𑀧𑀧𑀜𑁆𑀘𑀫𑀦𑀼𑀬𑀼𑀢𑁆𑀢𑁄, 𑀧𑀧𑀜𑁆𑀘𑀸𑀪𑀺𑀭𑀢𑁄 𑀫𑀕𑁄;

𑀯𑀺𑀭𑀸𑀥𑀬𑀻 𑀲𑁄 𑀦𑀺𑀩𑁆𑀩𑀸𑀦𑀁, 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀢𑁆𑀢𑀭𑀁.

𑁯𑁯𑁦. ‘‘𑀬𑁄 𑀘 𑀧𑀧𑀜𑁆𑀘𑀁 𑀳𑀺𑀢𑁆𑀯𑀸𑀦, 𑀦𑀺𑀧𑁆𑀧𑀧𑀜𑁆𑀘𑀧𑀣𑁂 𑀭𑀢𑁄;

𑀆𑀭𑀸𑀥𑀬𑀻 𑀲𑁄 𑀦𑀺𑀩𑁆𑀩𑀸𑀦𑀁, 𑀬𑁄𑀕𑀓𑁆𑀔𑁂𑀫𑀁 𑀅𑀦𑀼𑀢𑁆𑀢𑀭𑀁.

𑁯𑁯𑁧. [𑀥. 𑀧. 𑁯𑁮] ‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀬𑀢𑁆𑀣 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁.

𑁯𑁯𑁨. ‘‘𑀭𑀫𑀡𑀻𑀬𑀸𑀦𑀺 𑀅𑀭𑀜𑁆𑀜𑀸𑀦𑀺, 𑀬𑀢𑁆𑀣 𑀦 𑀭𑀫𑀢𑀻 𑀚𑀦𑁄;

𑀯𑀻𑀢𑀭𑀸𑀕𑀸 𑀭𑀫𑀺𑀲𑁆𑀲𑀦𑁆𑀢𑀺, 𑀦 𑀢𑁂 𑀓𑀸𑀫𑀕𑀯𑁂𑀲𑀺𑀦𑁄.

𑁯𑁯𑁩. [𑀥. 𑀧. 𑁭𑁬] ‘‘𑀦𑀺𑀥𑀻𑀦𑀁𑀯 𑀧𑀯𑀢𑁆𑀢𑀸𑀭𑀁, 𑀬𑀁 𑀧𑀲𑁆𑀲𑁂 𑀯𑀚𑁆𑀚𑀤𑀲𑁆𑀲𑀺𑀦𑀁;

𑀦𑀺𑀕𑁆𑀕𑀬𑁆𑀳𑀯𑀸𑀤𑀺𑀁 𑀫𑁂𑀥𑀸𑀯𑀺𑀁, 𑀢𑀸𑀤𑀺𑀲𑀁 𑀧𑀡𑁆𑀟𑀺𑀢𑀁 𑀪𑀚𑁂;

𑀢𑀸𑀤𑀺𑀲𑀁 𑀪𑀚𑀫𑀸𑀦𑀲𑁆𑀲, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄.

𑁯𑁯𑁪. [𑀥. 𑀧. 𑁭𑁭] ‘‘𑀑𑀯𑀤𑁂𑀬𑁆𑀬𑀸𑀦𑀼𑀲𑀸𑀲𑁂𑀬𑁆𑀬, 𑀅𑀲𑀩𑁆𑀪𑀸 𑀘 𑀦𑀺𑀯𑀸𑀭𑀬𑁂;

𑀲𑀢𑀜𑁆𑀳𑀺 𑀲𑁄 𑀧𑀺𑀬𑁄 𑀳𑁄𑀢𑀺, 𑀅𑀲𑀢𑀁 𑀳𑁄𑀢𑀺 𑀅𑀧𑁆𑀧𑀺𑀬𑁄.

𑁯𑁯𑁫. ‘‘𑀅𑀜𑁆𑀜𑀲𑁆𑀲 𑀪𑀕𑀯𑀸 𑀩𑀼𑀤𑁆𑀥𑁄, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀘𑀓𑁆𑀔𑀼𑀫𑀸;

𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑀫𑁆𑀳𑀺, 𑀲𑁄𑀢𑀫𑁄𑀥𑁂𑀲𑀺𑀫𑀢𑁆𑀣𑀺𑀓𑁄;

𑀢𑀁 𑀫𑁂 𑀅𑀫𑁄𑀖𑀁 𑀲𑀯𑀦𑀁, 𑀯𑀺𑀫𑀼𑀢𑁆𑀢𑁄𑀫𑁆𑀳𑀺 𑀅𑀦𑀸𑀲𑀯𑁄.

𑁯𑁯𑁬. ‘‘𑀦𑁂𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀬, 𑀦𑀧𑀺 𑀤𑀺𑀩𑁆𑀩𑀲𑁆𑀲 𑀘𑀓𑁆𑀔𑀼𑀦𑁄;

𑀘𑁂𑀢𑁄𑀧𑀭𑀺𑀬𑀸𑀬 𑀇𑀤𑁆𑀥𑀺𑀬𑀸, 𑀘𑀼𑀢𑀺𑀬𑀸 𑀉𑀧𑀧𑀢𑁆𑀢𑀺𑀬𑀸;

𑀲𑁄𑀢𑀥𑀸𑀢𑀼𑀯𑀺𑀲𑀼𑀤𑁆𑀥𑀺𑀬𑀸, 𑀧𑀡𑀺𑀥𑀻 𑀫𑁂 𑀦 𑀯𑀺𑀚𑁆𑀚𑀢𑀺 [𑀓𑀣𑀸. 𑁩𑁭𑁮].

𑁯𑁯𑁭. ‘‘𑀭𑀼𑀓𑁆𑀔𑀫𑀽𑀮𑀁𑀯 𑀦𑀺𑀲𑁆𑀲𑀸𑀬, 𑀫𑀼𑀡𑁆𑀟𑁄 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑁄;

𑀧𑀜𑁆𑀜𑀸𑀬 𑀉𑀢𑁆𑀢𑀫𑁄 𑀣𑁂𑀭𑁄, 𑀉𑀧𑀢𑀺𑀲𑁆𑀲𑁄𑀯 [𑀉𑀧𑀢𑀺𑀲𑁆𑀲𑁄 𑀘 (𑀲𑀻. 𑀓.)] 𑀛𑀸𑀬𑀢𑀺.

𑁯𑁯𑁮. ‘‘𑀅𑀯𑀺𑀢𑀓𑁆𑀓𑀁 𑀲𑀫𑀸𑀧𑀦𑁆𑀦𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄;

𑀅𑀭𑀺𑀬𑁂𑀦 𑀢𑀼𑀡𑁆𑀳𑀻𑀪𑀸𑀯𑁂𑀦, 𑀉𑀧𑁂𑀢𑁄 𑀳𑁄𑀢𑀺 𑀢𑀸𑀯𑀤𑁂.

𑁯𑁯𑁯. [𑀉𑀤𑀸. 𑁨𑁪] ‘‘𑀬𑀣𑀸𑀧𑀺 𑀧𑀩𑁆𑀩𑀢𑁄 𑀲𑁂𑀮𑁄, 𑀅𑀘𑀮𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄;

𑀏𑀯𑀁 𑀫𑁄𑀳𑀓𑁆𑀔𑀬𑀸 𑀪𑀺𑀓𑁆𑀔𑀼, 𑀧𑀩𑁆𑀩𑀢𑁄𑀯 𑀦 𑀯𑁂𑀥𑀢𑀺.

𑁧𑁦𑁦𑁦. ‘‘𑀅𑀦𑀗𑁆𑀕𑀡𑀲𑁆𑀲 𑀧𑁄𑀲𑀲𑁆𑀲, 𑀦𑀺𑀘𑁆𑀘𑀁 𑀲𑀼𑀘𑀺𑀕𑀯𑁂𑀲𑀺𑀦𑁄;

𑀯𑀸𑀮𑀕𑁆𑀕𑀫𑀢𑁆𑀢𑀁 𑀧𑀸𑀧𑀲𑁆𑀲, 𑀅𑀩𑁆𑀪𑀫𑀢𑁆𑀢𑀁𑀯 𑀔𑀸𑀬𑀢𑀺.

𑁧𑁦𑁦𑁧. ‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀦𑀦𑁆𑀤𑀸𑀫𑀺 𑀚𑀻𑀯𑀺𑀢𑀁;

𑀦𑀺𑀓𑁆𑀔𑀺𑀧𑀺𑀲𑁆𑀲𑀁 𑀇𑀫𑀁 𑀓𑀸𑀬𑀁, 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄.

𑁧𑁦𑁦𑁨. ‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀦𑀦𑁆𑀤𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀦𑀺𑀩𑁆𑀩𑀺𑀲𑀁 𑀪𑀢𑀓𑁄 𑀬𑀣𑀸.

𑁧𑁦𑁦𑁩. ‘‘𑀉𑀪𑀬𑁂𑀦 𑀫𑀺𑀤𑀁 𑀫𑀭𑀡𑀫𑁂𑀯, 𑀦𑀸𑀫𑀭𑀡𑀁 𑀧𑀘𑁆𑀙𑀸 𑀯𑀸 𑀧𑀼𑀭𑁂 𑀯𑀸;

𑀧𑀝𑀺𑀧𑀚𑁆𑀚𑀣 𑀫𑀸 𑀯𑀺𑀦𑀲𑁆𑀲𑀣, 𑀔𑀡𑁄 𑀯𑁄 𑀫𑀸 𑀉𑀧𑀘𑁆𑀘𑀕𑀸.

𑁧𑁦𑁦𑁪. ‘‘𑀦𑀕𑀭𑀁 𑀬𑀣𑀸 𑀧𑀘𑁆𑀘𑀦𑁆𑀢𑀁, 𑀕𑀼𑀢𑁆𑀢𑀁 𑀲𑀦𑁆𑀢𑀭𑀩𑀸𑀳𑀺𑀭𑀁;

𑀏𑀯𑀁 𑀕𑁄𑀧𑁂𑀣 𑀅𑀢𑁆𑀢𑀸𑀦𑀁, 𑀔𑀡𑁄 𑀯𑁄 𑀫𑀸 𑀉𑀧𑀘𑁆𑀘𑀕𑀸;

𑀔𑀡𑀸𑀢𑀻𑀢𑀸 𑀳𑀺 𑀲𑁄𑀘𑀦𑁆𑀢𑀺, 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑀸.

𑁧𑁦𑁦𑁫. ‘‘𑀉𑀧𑀲𑀦𑁆𑀢𑁄 𑀉𑀧𑀭𑀢𑁄, 𑀫𑀦𑁆𑀢𑀪𑀸𑀡𑀻 [𑀫𑀢𑁆𑀢𑀪𑀸𑀡𑀻 (𑀲𑀻.)] 𑀅𑀦𑀼𑀤𑁆𑀥𑀢𑁄;

𑀥𑀼𑀦𑀸𑀢𑀺 𑀧𑀸𑀧𑀓𑁂 𑀥𑀫𑁆𑀫𑁂, 𑀤𑀼𑀫𑀧𑀢𑁆𑀢𑀁𑀯 𑀫𑀸𑀮𑀼𑀢𑁄.

𑁧𑁦𑁦𑁬. ‘‘𑀉𑀧𑀲𑀦𑁆𑀢𑁄 𑀉𑀧𑀭𑀢𑁄, 𑀫𑀦𑁆𑀢𑀪𑀸𑀡𑀻 𑀅𑀦𑀼𑀤𑁆𑀥𑀢𑁄;

𑀅𑀧𑁆𑀧𑀸𑀲𑀺 [𑀅𑀩𑁆𑀩𑀳𑀺 (𑀲𑁆𑀬𑀸.), 𑀅𑀪𑀸𑀲𑀺 (?)] 𑀧𑀸𑀧𑀓𑁂 𑀥𑀫𑁆𑀫𑁂, 𑀤𑀼𑀫𑀧𑀢𑁆𑀢𑀁𑀯 𑀫𑀸𑀮𑀼𑀢𑁄.

𑁧𑁦𑁦𑁭. ‘‘𑀉𑀧𑀲𑀦𑁆𑀢𑁄 𑀅𑀦𑀸𑀬𑀸𑀲𑁄, 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄;

𑀓𑀮𑁆𑀬𑀸𑀡𑀲𑀻𑀮𑁄 𑀫𑁂𑀥𑀸𑀯𑀻, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀲𑀺𑀬𑀸.

𑁧𑁦𑁦𑁮. ‘‘𑀦 𑀯𑀺𑀲𑁆𑀲𑀲𑁂 𑀏𑀓𑀢𑀺𑀬𑁂𑀲𑀼 𑀏𑀯𑀁, 𑀅𑀕𑀸𑀭𑀺𑀲𑀼 𑀧𑀩𑁆𑀩𑀚𑀺𑀢𑁂𑀲𑀼 𑀘𑀸𑀧𑀺;

𑀲𑀸𑀥𑀽𑀧𑀺 𑀳𑀼𑀢𑁆𑀯𑀸 𑀦 𑀅𑀲𑀸𑀥𑀼 𑀳𑁄𑀦𑁆𑀢𑀺, 𑀅𑀲𑀸𑀥𑀼 𑀳𑀼𑀢𑁆𑀯𑀸 𑀧𑀼𑀦 𑀲𑀸𑀥𑀼 𑀳𑁄𑀦𑁆𑀢𑀺.

𑁧𑁦𑁦𑁯. ‘‘𑀓𑀸𑀫𑀘𑁆𑀙𑀦𑁆𑀤𑁄 𑀘 𑀩𑁆𑀬𑀸𑀧𑀸𑀤𑁄, 𑀣𑀺𑀦𑀫𑀺𑀤𑁆𑀥𑀜𑁆𑀘 𑀪𑀺𑀓𑁆𑀔𑀼𑀦𑁄;

𑀉𑀤𑁆𑀥𑀘𑁆𑀘𑀁 𑀯𑀺𑀘𑀺𑀓𑀺𑀘𑁆𑀙𑀸 𑀘, 𑀧𑀜𑁆𑀘𑁂𑀢𑁂 𑀘𑀺𑀢𑁆𑀢𑀓𑁂𑀮𑀺𑀲𑀸.

𑁧𑁦𑁧𑁦. ‘‘𑀬𑀲𑁆𑀲 𑀲𑀓𑁆𑀓𑀭𑀺𑀬𑀫𑀸𑀦𑀲𑁆𑀲, 𑀅𑀲𑀓𑁆𑀓𑀸𑀭𑁂𑀦 𑀘𑀽𑀪𑀬𑀁;

𑀲𑀫𑀸𑀥𑀺 𑀦 𑀯𑀺𑀓𑀫𑁆𑀧𑀢𑀺, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀦𑁄.

𑁧𑁦𑁧𑁧. ‘‘𑀢𑀁 𑀛𑀸𑀬𑀺𑀦𑀁 𑀲𑀸𑀢𑀢𑀺𑀓𑀁, 𑀲𑀼𑀔𑀼𑀫𑀤𑀺𑀝𑁆𑀞𑀺𑀯𑀺𑀧𑀲𑁆𑀲𑀓𑀁;

𑀉𑀧𑀸𑀤𑀸𑀦𑀓𑁆𑀔𑀬𑀸𑀭𑀸𑀫𑀁, 𑀆𑀳𑀼 𑀲𑀧𑁆𑀧𑀼𑀭𑀺𑀲𑁄 𑀇𑀢𑀺.

𑁧𑁦𑁧𑁨. ‘‘𑀫𑀳𑀸𑀲𑀫𑀼𑀤𑁆𑀤𑁄 𑀧𑀣𑀯𑀻, 𑀧𑀩𑁆𑀩𑀢𑁄 𑀅𑀦𑀺𑀮𑁄𑀧𑀺 𑀘;

𑀉𑀧𑀫𑀸𑀬 𑀦 𑀬𑀼𑀚𑁆𑀚𑀦𑁆𑀢𑀺, 𑀲𑀢𑁆𑀣𑀼 𑀯𑀭𑀯𑀺𑀫𑀼𑀢𑁆𑀢𑀺𑀬𑀸.

𑁧𑁦𑁧𑁩. ‘‘𑀘𑀓𑁆𑀓𑀸𑀦𑀼𑀯𑀢𑁆𑀢𑀓𑁄 𑀣𑁂𑀭𑁄, 𑀫𑀳𑀸𑀜𑀸𑀡𑀻 𑀲𑀫𑀸𑀳𑀺𑀢𑁄;

𑀧𑀣𑀯𑀸𑀧𑀕𑁆𑀕𑀺𑀲𑀫𑀸𑀦𑁄, 𑀦 𑀭𑀚𑁆𑀚𑀢𑀺 𑀦 𑀤𑀼𑀲𑁆𑀲𑀢𑀺.

𑁧𑁦𑁧𑁪. ‘‘𑀧𑀜𑁆𑀜𑀸𑀧𑀸𑀭𑀫𑀺𑀢𑀁 𑀧𑀢𑁆𑀢𑁄, 𑀫𑀳𑀸𑀩𑀼𑀤𑁆𑀥𑀺 𑀫𑀳𑀸𑀫𑀢𑀺;

𑀅𑀚𑀴𑁄 𑀚𑀴𑀲𑀫𑀸𑀦𑁄, 𑀲𑀤𑀸 𑀘𑀭𑀢𑀺 𑀦𑀺𑀩𑁆𑀩𑀼𑀢𑁄.

𑁧𑁦𑁧𑁫. ‘‘𑀧𑀭𑀺𑀘𑀺𑀡𑁆𑀡𑁄 𑀫𑀬𑀸 𑀲𑀢𑁆𑀣𑀸…𑀧𑁂… 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸.

𑁧𑁦𑁧𑁬. ‘‘𑀲𑀫𑁆𑀧𑀸𑀤𑁂𑀣𑀧𑁆𑀧𑀫𑀸𑀤𑁂𑀦, 𑀏𑀲𑀸 𑀫𑁂 𑀅𑀦𑀼𑀲𑀸𑀲𑀦𑀻;

𑀳𑀦𑁆𑀤𑀸𑀳𑀁 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀁, 𑀯𑀺𑀧𑁆𑀧𑀫𑀼𑀢𑁆𑀢𑁄𑀫𑁆𑀳𑀺 𑀲𑀩𑁆𑀩𑀥𑀻’’𑀢𑀺.

… 𑀲𑀸𑀭𑀺𑀧𑀼𑀢𑁆𑀢𑁄 𑀣𑁂𑀭𑁄….

𑁩. 𑀆𑀦𑀦𑁆𑀤𑀢𑁆𑀣𑁂𑀭𑀕𑀸𑀣𑀸

𑁧𑁦𑁧𑁭. ‘‘𑀧𑀺𑀲𑀼𑀡𑁂𑀦 𑀘 𑀓𑁄𑀥𑀦𑁂𑀦 𑀘, 𑀫𑀘𑁆𑀙𑀭𑀺𑀦𑀸 𑀘 𑀯𑀺𑀪𑀽𑀢𑀦𑀦𑁆𑀤𑀺𑀦𑀸;

𑀲𑀔𑀺𑀢𑀁 𑀦 𑀓𑀭𑁂𑀬𑁆𑀬 𑀧𑀡𑁆𑀟𑀺𑀢𑁄, 𑀧𑀸𑀧𑁄 𑀓𑀸𑀧𑀼𑀭𑀺𑀲𑁂𑀦 𑀲𑀗𑁆𑀕𑀫𑁄.

𑁧𑁦𑁧𑁮. ‘‘𑀲𑀤𑁆𑀥𑁂𑀦 𑀘 𑀧𑁂𑀲𑀮𑁂𑀦 𑀘, 𑀧𑀜𑁆𑀜𑀯𑀢𑀸 𑀩𑀳𑀼𑀲𑁆𑀲𑀼𑀢𑁂𑀦 𑀘;

𑀲𑀔𑀺𑀢𑀁 𑀓𑀭𑁂𑀬𑁆𑀬 𑀧𑀡𑁆𑀟𑀺𑀢𑁄, 𑀪𑀤𑁆𑀤𑁄 𑀲𑀧𑁆𑀧𑀼𑀭𑀺𑀲𑁂𑀦 𑀲𑀗𑁆𑀕𑀫𑁄.

𑁧𑁦𑁧𑁯. ‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀩𑀺𑀫𑁆𑀩𑀁…𑀧𑁂… 𑀬𑀲𑁆𑀲 𑀦𑀢𑁆𑀣𑀺 𑀥𑀼𑀯𑀁 𑀞𑀺𑀢𑀺.